Sacred Texts  Bible  World Bible  Index  Previous  Next 

Gothic Bible: John

5:45 [CA] . . . . þatei ik wrohidedjau izwis du attin; ist saei wrohida izwis, Moses, du þammei jus weneiþ.

5:46 [CA] jabai allis Mose galaubidedeiþ, ga~þau~laubidedeiþ mis; bi mik auk jains gamelida.

5:47 [CA] þande nu jainis melam ni galaubeiþ, hvaiwa meinaim waurdam galaubjaiþ?

6:1 [CA] Afar þata galaiþ Iesus ufar marein þo Galeilaie jah Tibairiade.

6:2 [CA] jah laistida ina manageins filu, unte gasehvun taiknins þozei gatawida bi siukaim.

6:3 [CA] usiddja þan ana fairguni Iesus jah jainar gasat miþ siponjam seinaim.

6:4 [CA] wasuh þan nehva pasxa, so dulþs Iudaie.

6:5 [CA] þaruh ushof augona Iesus jah gaumida þammei manageins filu iddja du imma, qaþuh du Filippau: hvaþro bugjam hlaibans, ei matjaina þai?

6:6 [CA] þatuh þan qaþ fraisands ina; iþ silba wissa þatei habaida taujan.

6:7 [CA] andhof imma Filippus: twaim hundam skatte hlaibos ni ganohai sind þaim, þei nimai hvarjizuh leitil.

6:8 [CA] qaþ ains þize siponje is, Andraias, broþar Paitraus Seimonaus:

6:9 [CA] ist magula ains her, saei habaiþ ·e· hlaibans barizeinans jah ·b· fiskans; akei þata hva ist du swa managaim?

6:10 [CA] iþ Iesus qaþ: waurkeiþ þans mans anakumbjan. wasuh þan hawi manag ana þamma stada. þaruh anakumbidedun wairos raþjon swaswe fimf þusundjos.

6:11 [CA] namuh þan þans hlaibans Iesus jah awiliudonds gadailida þaim anakumbjandam; samaleiko jah þize fiske, swa filu swe wildedun.

6:12 [CA] þanuh, biþe sadai waurþun, qaþ du siponjam seinaim: galisiþ þos aflifnandeins drauhsnos, þei waihtai ni fraqistnai.

6:13 [CA] þanuh galesun jah gafullidedun ·ib· tainjons gabruko us fimf hlaibam þaim barizeinam, þatei aflifnoda þaim matjandam.

6:14 [CA] þaruh þai mans gasaihvandans þoei gatawida taikn Iesus, qeþun þatei sa ist bi sunjai praufetus sa qimanda in þo manaseþ.

6:15 [CA] iþ Iesus kunnands þatei munaidedun usgaggan jah wilwan ei tawidedeina ina du þiudana, afiddja aftra in fairguni is ains.

6:16 [CA] iþ swe seiþu warþ, atiddjedun siponjos is ana marein,

6:17 [CA] jah usstigun in skip, iddjedunuh ufar marein in Kafarnaum. jah riqis juþan warþ jah ni atiddja nauhþan du im Iesus.

6:18 [CA] iþ marei winda mikilamma waiandin urraisida was.

6:19 [CA] þaruh farjandans swe spaurde ·k· jah ·e· aiþþau ·l· gasaihvand Iesu gaggandan ana marein jah nehva skipa qimandan jah ohtedun sis.

6:20 [CA] þaruh is qaþ : ik im, ni ogeiþ izwis.

6:21 [CA] þaruh wildedun ina niman in skip, jah sunsaiw þata skip warþ ana airþai ana þoei eis iddjedun.

6:22 [CA] iftumin daga managei sei stoþ hindar marein, sehvun þatei skip anþar ni was jainar alja ain, jah þatei miþ~ni~qam siponjam seinaim Iesus in þata skip, ak ainai siponjos is galiþun.

6:23 [CA] anþara þan skipa qemun us Tibairiadau nehva þamma stada, þarei matidedun hlaif, ana þammei awiliudoda frauja.

6:24 [CA] þaruh þan gasahv managei þatei Iesus nist jainar nih siponjos is, gastigun in skipa jah qemun in Kafarnaum sokjandans Iesu.

6:25 [CA] jah bigetun ina hindar marein qeþunuh du imma: rabbei, hvan her qamt?

6:26 [CA] andhof im Iesus jah qaþ: amen amen qiþa izwis, sokeiþ mik, ni þatei sehvuþ taiknins jah fauratanja, ak þatei matideduþ þize hlaibe jah sadai waurþuþ.

6:27 [CA] waurkjaiþ ni þana mat þana fralusanan, ak mat þana wisandan du libainai aiweinon, þanei sunus mans gibiþ izwis; þanuh auk atta gasiglida guþ.

6:28 [CA] þaruh qeþun du imma: hva taujaima, ei waurkjaima waurstwa gudis?

6:29 [CA] andhof Iesus jah qaþ du im: þat~ist waurstw gudis, ei galaubjaiþ þammei insandida jains.

6:30 [CA] qeþun du imma: aþþan hva taujis þu taikne, ei saihvaima jah galaubjaima þus? hva waurkeis?

6:31 [CA] attans unsarai manna matidedun ana auþidai, swaswe ist gameliþ: hlaif us himina gaf im du matjan.

6:32 [CA] þaruh qaþ im Iesus: amen amen qiþa izwis, ni Moses gaf izwis hlaif us himina, ak atta meins gaf izwis hlaif us himina þana sunjeinan.

6:33 [CA] sa auk hlaifs gudis ist, saei atstaig us himina jah gaf libain þizai manasedai.

6:34 [CA] þanuh qeþun du imma: frauja, framwigis gif unsis þana hlaif.

6:35 [CA] jah qaþ du im Iesus: ik im sa hlaifs libainais; þana gaggandan du mis ni huggreiþ jah þana galaubjandan du mis ni þaurseiþ hvanhun.

6:36 [CA] akei qaþ izwis þatei gasehvuþ mik jah ni galaubeiþ.

6:37 [CA] all þatei gaf mis atta, du mis qimiþ, jah þana gaggandan du mis ni uswairpa ut;

6:38 [CA] unte atstaig us himina, nih þeei taujau wiljan meinana, ak wiljan þis sandjandins mik.

6:39 [CA] . . . .

6:40 [CA] þatuh þan ist wilja þis sandjandins mik, ei hvazuh saei saihviþ þana sunu jah galaubeiþ du imma, aigi libain aiweinon, jah urraisja ina ik in spedistin daga.

6:41 [CA] birodidedun þan Iudaieis bi ina, unte qaþ: ik im hlaifs sa atsteigands us himina,

6:42 [CA] jah qeþun: niu sa ist Iesus sa sunus Iosefis, þizei weis kunþedum attan jah aiþein? hvaiwa nu qiþiþ sa þatei us himina atstaig?

6:43 [CA] andhof þan Iesus jah qaþ du im: ni birodeiþ miþ izwis misso.

6:44 [CA] ni manna mag qiman at mis, nibai atta saei sandida mik atþinsiþ ina, jah ik urraisja ina in þamma spedistin daga.

6:45 [CA] ist gameliþ ana praufetum: jah wairþand allai laisidai gudis. hvazuh nu sa gahausjands at attin jah ganam gaggiþ du mis.

6:46 [CA] ni þatei attan sehvi hvas, nibai saei was fram attin, sa sahv attan.

6:47 [CA] amen amen qiþa izwis: saei galaubeiþ du mis aih libain aiweinon.

6:48 [CA] ik im sa hlaifs libainais.

6:49 [CA] attans izwarai matidedun manna in auþidai jah gaswultun.

6:50 [CA] sa ist hlaifs saei us himina atstaig, ei saei þis matjai, ni gadauþnai.

6:51 [CA] ik im hlaifs sa libanda, sa us himina qumana; jabai hvas matjiþ þis hlaibis, libaiþ in ajukduþ; jah þan sa hlaifs þanei ik giba, leik mein ist þatei ik giba in þizos manasedais libainais.

6:52 [CA] þanuh sokun miþ sis misso Iudaieis qiþandans: hvaiwa mag sa unsis leik giban du matjan?

6:53 [CA] þaruh qaþ du im Iesus: amen amen qiþa izwis, nibai matjiþ leik þis sunaus mans jah driggkaiþ is bloþ, ni habaiþ libain in izwis silbam.

6:54 [CA] saei matjiþ mein leik jah driggkiþ mein bloþ, aih libain aiweinon, jah ik urraisja ina in þamma spedistin daga.

6:55 [CA] þata auk leik meinata bi sunjai ist mats, jah þata bloþ mein bi sunjai ist draggk.

6:56 [CA] saei matjiþ mein leik jah driggkiþ mein bloþ, in mis wisiþ jah ik in imma.

6:57 [CA] swaswe insandida mik libands atta, jah ik liba in attins, jah saei matjiþ mik, jah sa libaiþ in meina.

6:58 [CA] sa ist hlaifs saei us himina atstaig, ni swaswe matidedun attans izwarai manna jah gadauþnodedun; iþ saei matjiþ þana hlaif libaiþ in ajukduþ.

6:59 [CA] þata qaþ in swnagoge laisjands in Kafarnaum.

6:60 [CA] þanuh managai gahausjandans þize siponje is qeþun: hardu ist þata waurd, hvas mag þis hausjon?

6:61 [CA] iþ witands Iesus in sis silbin þatei birodidedun þata þai siponjos is, qaþ du im: þata izwis gamarzeiþ?

6:62 [CA] jabai nu gasaihviþ sunu mans ussteigan, þadei was faurþis?

6:63 [CA] ahma ist saei liban taujiþ, þata leik ni boteiþ waiht. þo waurda þoei ik rodida izwis, ahma ist jah libains ist,

6:64 [CA] akei sind izwara sumai, þaiei ni galaubjand. wissuh þan us frumistja Iesus hvarjai sind þai ni galaubjandans, jah hvas ist saei galeiweiþ ina.

6:65 [CA] jah qaþ: duþe qaþ izwis þatei ni ainshun mag qiman at mis, nibai ist atgiban imma fram attin meinamma.

6:66 [CA] uzuh þamma mela managai galiþun siponje is ibukai jah þanaseiþs miþ imma ni iddjedun.

6:67 [CA] þaruh qaþ Iesus du þaim twalibim: ibai jah jus wileiþ galeiþan?

6:68 [CA] þanuh andhof imma Seimon Paitrus: frauja, du hvamma galeiþaima? waurda libainais aiweinons habais.

6:69 [CA] jah weis galaubidedum jah ufkunþedum þatei þu is Xristus, sunus gudis libandins.

6:70 [CA] andhof im Iesus: niu ik izwis ·ib· gawalida jah izwara ains diabaulus ist?

6:71 [CA] qaþuh þan þana Iudan Seimonis, Iskariotu, sa auk habaida ina galewjan, ains wisands þize twalibe.

7:1 [CA] Jah hvarboda Iesus afar þata in Galeilaia; ni auk wilda in Iudaia gaggan, unte sokidedun ina þai Iudaieis usqiman.

7:2 [CA] wasuh þan nehva dulþs Iudaie, so hleþrastakeins.

7:3 [CA] þanuh qeþun du imma broþrjus is: usleiþ þaþro jah gagg in Iudaian, ei jah þai siponjos saihvaina waurstwa þeina þoei þu taujis.

7:4 [CA] ni manna auk in analaugnein hva taujiþ jah sokeiþ sik uskunþana wisan. jabai þata taujis, bairhtei þuk silban þizai manasedai.

7:5 [CA] ni auk þai broþrjus is galaubidedun imma.

7:6 [CA] þaruh qaþ im Iesus: mel mein ni nauh ist, iþ mel izwar sinteino ist manwu.

7:7 [CA] ni mag so manaseþs fijan izwis, iþ mik fijaiþ; unte ik weitwodja bi ins þatei waurstwa ize ubila sind.

7:8 [CA] jus galeiþiþ in dulþ þo, iþ ik ni nauh galeiþa in þo dulþ, unte meinata mel ni nauh usfulliþ ist.

7:9 [CA] þatuh þan qaþ du im wisands in Galeilaia.

7:10 [CA] iþ biþe galiþun þai broþrjus is, þanuh jah is galaiþ in þo dulþ ni andaugjo, ak swe analaugniba.

7:11 [CA] þanuh Iudaieis sokidedun ina in þizai dulþai jah qeþun: hvar ist jains?

7:12 [CA] jah birodeins mikila was in managein: sumaih qeþun þatei sunjeins ist; anþarai qeþun: ne, ak airzeiþ þo managein.

7:13 [CA] nih þan ainshun sweþauh balþaba rodida bi ina in agisis Iudaie.

7:14 [CA] iþ juþan ana midjai dulþ usstaig Iesus in alh jah laisida.

7:15 [CA] jah sildaleikidedun manageins qiþandans: hvaiwa sa bokos kann unuslaisiþs?

7:16 [CA] andhof þan Iesus jah qaþ: so meina laiseins nist meina, ak þis sandjandins mik.

7:17 [CA] jabai hvas wili wiljan is taujan, ufkunnaiþ bi þo laisein framuh guda sijai, þau iku fram mis silbin rodja.

7:18 [CA] saei fram sis silbin rodeiþ, hauhiþa seina sokeiþ; iþ saei sokeiþ hauhiþa þis sandjandins sik, sah sunjeins ist jah inwindiþa in imma nist.

7:19 [CA] niu Moses gaf izwis witoþ? jah ni ainshun izwara taujiþ þata witoþ; hva mik sokeiþ usqiman?

7:20 [CA] andhof so managei jah qeþun: unhulþon habais; hvas þuk sokeiþ usqiman?

7:21 [CA] andhof Iesus jah qaþ du im: ain waurstw gatawida, jah allai sildaleikeiþ.

7:22 [CA] duþþe Moses atgaf izwis bimait, ni þatei fram Mose sijai, ak us attam, jah in sabbato bimaitiþ mannan.

7:23 [CA] jabai bimait nimiþ manna in sabbato, ei ni gatairaidau witoþ þata Mosezis; iþ mis hatizoþ, unte allana mannan hailana gatawida in sabbato?

7:24 [CA] ni stojaiþ bi siunai, ak þo garaihton staua stojaiþ.

7:25 [CA] qeþunuh þan sumai þize Iairusaulwmeite: niu sa ist þammei sokjand usqiman?

7:26 [CA] jah sai, andaugiba rodeiþ jah waiht du imma ni qiþand; ibai aufto bi sunjai ufkunþedun þai reiks þatei sa ist bi sunjai Xristus?

7:27 [CA] akei þana kunnum, hvaþro ist; iþ Xristus, biþe qimiþ, ni manna wait hvaþro ist.

7:28 [CA] hropida þan in alh laisjands Iesus jah qiþands: jah mik kunnuþ jah wituþ hvaþro im; jah af mis silbin ni qam, ak ist sunjeins saei sandida mik, þanei jus ni kunnuþ.

7:29 [CA] iþ ik kann ina, unte fram imma im, jah is mik insandida.

7:30 [CA] sokidedun þan ina gafahan, jah ni ainshun uslagida ana ina handu, unte nauhþanuh ni atiddja hveila is.

7:31 [CA] iþ managai þizos manageins galaubidedun imma jah qeþun: Xristus, þan qimiþ, ibai [ei] managizeins taiknins taujai þaimei sa tawida?

7:32 [CA] hausidedun þan Fareisaieis þo managein birodjandein bi ina þata. inuhsandidedun andbahtans þai Fareisaieis jah þai auhumistans gudjans, ei gafaifaheina ina.

7:33 [CA] þanuh qaþ Iesus: nauh leitila hveila miþ izwis im, jah þan gagga du þamma sandjandin mik.

7:34 [CA] sokeiþ mik jah ni bigitiþ, jah þarei im ik, jus ni maguþ qiman.

7:35 [CA] þaruh qeþun þai Iudaieis du sis misso: hvadre sa skuli gaggan, þei weis ni bigitaima ina? nibai in distahein þiudo skuli gaggan jah laisjan þiudos?

7:36 [CA] hva sijai þata waurd, þatei qaþ: sokeiþ mik jah ni bigitiþ, jah þarei im ik, jus ni maguþ qiman?

7:37 [CA] iþ in spedistin daga þamma mikilin dulþais stoþ Iesus jah hropida qiþands: jabai hvana þaursjai, gaggai du mis jah driggkai.

7:38 [CA] saei galaubeiþ du mis, swaswe qaþ gameleins, ahvos us wambai is rinnand watins libandins.

7:39 [CA] þatuh þan qaþ bi ahman þanei skuldedun niman þai galaubjandans du imma; unte ni nauhþanuh was ahma sa weiha ana im, unte Iesus nauhþanuh ni hauhiþs was.

7:40 [CA] managai þan þizos manageins hausjandans þize waurde qeþun: sa ist bi sunjai sa praufetes.

7:41 [CA] sumaih qeþun: sa ist Xristus. sumaih qeþun: ibai þau us Galeilaia Xristus qimiþ?

7:42 [CA] niu gameleins qaþ þatei us fraiwa Daweidis jah us Beþlaihaim weihsa, þarei was Daweid, Xristus qimiþ?

7:43 [CA] þanuh missaqiss in þizai managein warþ bi ina.

7:44 [CA] sumaih þan ize wildedun fahan ina; akei ni ainshun uslagida ana ina handuns.

7:45 [CA] galiþun þan þai andbahtos du þaim auhumistam gudjam jah Fareisaium; þaruh qeþun du im jainai: duhve ni attauhuþ ina?

7:46 [CA] andhofun þai andbahtos: ni hvanhun aiw rodida manna, swaswe sa manna.

7:47 [CA] andhofun þan im þai Fareisaieis: ibai jah jus afairzidai sijuþ?

7:48 [CA] sai, jau ainshun þize reike galaubidedi imma aiþþau Fareisaie?

7:49 [CA] alja so managei, þaiei ni kunnun witoþ, fraqiþanai sind.

7:50 [CA] qaþ Nikaudemus du im, saei atiddja du imma in naht, sums wisands izei:

7:51 [CA] ibai witoþ unsar stojiþ mannan, nibai faurþis hauseiþ fram imma jah ufkunnaiþ hva taujai?

7:52 [CA] andhofun jah qeþun du imma: ibai jah þu us Galeilaia is? ussokei jah saihv þatei praufetus us Galeilaia ni urreisiþ.

8:12 [CA] Aftra du im Iesus rodida qaþuh: ik im liuhaþ manasedais; saei laisteiþ mik ni gaggiþ in riqiza, ak habaiþ liuhaþ libainais.

8:13 [CA] þanuh qeþun du imma þai Fareisaieis: þu bi þuk silban weitwodeis; so weitwodiþa þeina nist sunjeina.

8:14 [CA] andhof Iesus jah qaþ du im: jah jabai ik weitwodja bi mik silban, sunja ist so weitwodiþa meina, unte wait hvaþro qam jah hvaþ galeiþa, iþ jus ni wituþ hvaþro qima, aiþþau hvaþ galeiþa.

8:15 [CA] jus bi leika stojiþ, iþ ik ni stoja ainnohun.

8:16 [CA] jaþ~þan jabai stoja ik, staua meina sunjeina ist, unte ains ni im, ak ik jah saei sandida mik atta.

8:17 [CA] jah þan in witoda izwaramma gameliþ ist þatei twaddje manne weitwodiþa sunja ist.

8:18 [CA] ik im saei weitwodja bi mik silban, jah weitwodeiþ bi mik saei sandida mik atta.

8:19 [CA] qeþun þan du imma: hvar ist sa atta þeins? andhof Iesus: ni mik kunnuþ nih attan meinana; iþ mik kunþedeiþ, jah þau attan meinana kunþedeiþ.

8:20 [CA] þo waurda rodida in gazaufwlakio, laisjands in alh; jah ainshun ni faifah ina, unte nauhþanuh ni qam hveila is.

8:21 [CA] þanuh qaþ aftra du im Iesus: ik galeiþa, jah sokeiþ mik, jah in frawaurhtai izwarai gadauþniþ. þadei ik gagga, jus ni maguþ qiman.

8:22 [CA] qeþun þan Iudaieis: nibai usqimai sis silbin, ei qiþiþ: þadei ik gagga, jus ni maguþ qiman?

8:23 [CA] jah qaþ du im Iesus: jus us þaim dalaþro sijuþ, iþ ik us þaim iupaþro im; jus us þamma fairhvau sijuþ, iþ ik ni im us þamma fairhvau.

8:24 [CA] qaþ nu izwis þatei gadauþniþ in frawaurhtim izwaraim; jabai auk ni galaubeiþ þatei ik im, gadauþniþ in frawaurhtim izwaraim.

8:25 [CA] þaruh qeþun du imma: þu hvas is? jah qaþ du im Iesus: anastodeins, þatei jah rodja du izwis.

8:26 [CA] manag skal bi izwis rodjan jah stojan; akei saei sandida mik sunjeins ist; jah ik þatei hausida at imma þata rodja in þamma fairhvau.

8:27 [CA] ni froþun þatei attan im qaþ.

8:28 [CA] qaþuh þan du im Iesus: þan ushauheiþ þana sunu mans, þanuh ufkunnaiþ þatei ik im, jah af mis silbin tauja ni waiht, ak swaswe laisida mik atta meins, þata rodja.

8:29 [CA] jah saei sandida mik miþ mis ist; ni bilaiþ mis ainamma atta, unte ik þatei leikaiþ imma tauja sinteino.

8:30 [CA] þata imma rodjandin managai galaubidedun imma.

8:31 [CA] þanuh qaþ Iesus du þaim galaubjandam sis Iudaium: jabai jus gastandiþ in waurda meinamma, bi sunjai siponjos meinai sijuþ,

8:32 [CA] jah ufkunnaiþ sunja, jah so sunja frijans izwis briggiþ.

8:33 [CA] andhofun imma: fraiw Abrahamis sijum jah ni mannhun skalkinodedum aiw hvanhun; hvaiwa þu qiþis þatei frijai wairþiþ?

8:34 [CA] andhof im Iesus: amen amen, qiþa izwis þatei hvazuh saei taujiþ frawaurht, skalks ist frawaurhtai.

8:35 [CA] sah þan skalks ni wisiþ in garda du aiwa, sunus wisiþ du aiwa.

8:36 [CA] jabai nu sunus izwis frijans briggiþ, bi sunjai frijai sijuþ.

8:37 [CA] wait þatei fraiw Abrahamis sijuþ; akei sokeiþ mis usqiman, unte waurd mein ni gamot in izwis.

8:38 [CA] ik þatei gasahv at attin meinamma rodja, jah jus þatei hausideduþ fram attin izwaramma taujiþ.

8:39 [CA] andhofun jah qeþun du imma: atta unsar Abraham ist. qaþ im Iesus: iþ barna Abrahamis weseiþ, waurstwa Abrahamis tawidedeiþ.

8:40 [CA] iþ nu sokeiþ mik usqiman, mannan izei sunja izwis rodida, þoei hausida fram guda; þatuh Abraham ni tawida.

8:41 [CA] jus taujiþ toja attins izwaris. þanuh qeþun imma: weis us horinassau ni sijum gabauranai; ainana attan aigum, guþ.

8:42 [CA] qaþ du im Iesus: jabai guþ atta izwar wesi, friodedeiþ þau mik, unte ik fram guda urrann jah qam; nih þan auk fram mis silbin ni qam, ak is mik insandida.

8:43 [CA] duhve maþlein meina ni kunnuþ? unte ni maguþ hausjan waurd mein.

8:44 [CA] jus us attin diabaulau sijuþ jah lustuns þis attins izwaris wileiþ taujan. jains manamaurþrja was fram frumistja jah in sunjai ni gastoþ; unte nist sunja in imma. þan rodeiþ liugn, us seinaim rodeiþ, unte liugnja ist jah atta is.

8:45 [CA] iþ ik, þatei sunja rodida, ni galaubeiþ mis.

8:46 [CA] hvas izwara gasakiþ mik bi frawaurht? þande sunja qiþa, duhve ni galaubeiþ mis?

8:47 [CA] sa wisands us guda waurda gudis hauseiþ; duþe jus ni hauseiþ, unte us guda ni sijuþ.

8:48 [CA] andhofun þan þai Iudaieis jah qeþun du imma: niu waila qiþam weis þatei Samareites is þu jah unhulþon habais?

8:49 [CA] andhof Iesus: ik unhulþon ni haba, ak swera attan meinana, jah jus unsweraiþ mik.

8:50 [CA] ik ni sokja hauhein meina; ist saei sokeiþ jah stojiþ.

8:51 [CA] amen amen qiþa izwis: jabai hvas waurd mein fastaiþ, dauþu ni gasaihviþ aiwa dage.

8:52 [CA] þanuh qeþun du imma þai Iudaieis: nu ufkunþedum þatei unhulþon habais. Abraham gadauþnoda jah praufeteis, jah þu qiþis: jabai hvas mein waurd fastai, ni kausjai dauþau aiwa dage.

8:53 [CA] ibai þu maiza is attin unsaramma Abrahama, saei gadauþnoda? jah praufeteis gadauþnodedun. hvana þuk silban taujis þu?

8:54 [CA] andhof Iesus: jabai ik hauhja mik silban, so hauheins meina ni waihts ist; ist atta meins saei hauheiþ mik, þanei jus qiþiþ þatei guþ unsar ist.

8:55 [CA] jah ni kunnuþ ina; iþ ik kann ina; jah jabai qeþjau þatei ni kunnjau ina, sijau galeiks izwis liugnja; ak kann ina jah waurd is fasta.

8:56 [CA] Abraham atta izwar sifaida ei gasehvi dag meinana, jah gasahv jah faginoda.

8:57 [CA] þanuh qeþun þai Iudaieis du imma: fimf tiguns jere nauh ni habais jah Abraham sahvt?

8:58 [CA] qaþ im Iesus: amen amen qiþa izwis: faurþizei Abraham waurþi, im ik.

8:59 [CA] þanuh nemun stainans, ei waurpeina ana ina; iþ Iesus þan gafalh sik jah usiddja us alh usleiþands þairh midjans ins, jah hvarboda swa.

9:1 [CA] Jah þairhgaggands gaumida mann blindamma us gabaurþai.

9:2 [CA] þaruh frehun ina siponjos is qiþandans: rabbei, hvas frawaurhta, sau þau fadrein is, ei blinds gabaurans warþ?

9:3 [CA] andhof Iesus: nih sa frawaurhta nih fadrein is, ak ei bairhta waurþeina waurstwa gudis ana imma.

9:4 [CA] ik skal waurkjan waurstwa þis sandjandins mik, unte dags ist; qimiþ nahts, þa(n)ei ni manna mag waurkjan.

9:5 [CA] þan in þamma fairhvau im, liuhaþ im þis fairhvaus.

9:6 [CA] þata qiþands gaspaiw dalaþ, jah gawaurhta fani us þamma spaiskuldra, jah gasmait imma ana augona þata fani þamma blindin,

9:7 [CA] jah qaþ du imma: gagg þwahan in swumsl Siloamis, þatei gaskeirjada insandiþs. galaiþ jah afþwoh jah qam saihvands.

9:8 [CA] þanuh garaznans jah þai saihvandans ina faurþis, þatei is bidagwa was, qeþun: niu sa ist saei sat aihtronds?

9:9 [CA] sumaih qeþun: þatei sa ist; sumaih þatei galeiks þamma ist; iþ is qaþ: þatei ik im.

9:10 [CA] þanuh qeþun du imma: hvaiwa usluknodedun þus þo augona?

9:11 [CA] andhof jains jah qaþ: manna haitans Iesus fani gawaurhta jah bismait mis augona jah qaþ mis: gagg afþwahan in þata swumfsl Siloamis; iþ ik galaiþ jah biþwahands ussahv.

9:12 [CA] qeþun þan du imma: hvar ist sa? iþ is qaþ: ni wait.

9:13 [CA] gatiuhand ina du Fareisaium, þana saei was blinds.

9:14 [CA] wasuh þan sabbato, þan þata fani gawaurhta Iesus jah uslauk imma augona.

9:15 [CA] aftra þan frehun ina jah þai Fareisaieis hvaiwa ussahv; iþ is qaþ jah þaim: fani galagida mis ana augona jah afþwoh, jah saihva.

9:16 [CA] qeþun þan sumai þize Fareisaie: sa manna nist fram guda, þande sabbate daga ni witaiþ. sumaih qeþun: hvaiwa mag manna frawaurhts swaleikos taiknins taujan? jah missaqiss warþ miþ im.

9:17 [CA] qeþunuh du þamma faurþis blindin aftra: þu hva qiþis bi þana ei uslauk þus augona? iþ is qaþuh: þatei praufetus ist.

9:18 [CA] ni galaubidedun þan Iudaieis bi ina þatei is blinds wesi jah ussehvi, unte atwopidedun þans fadrein is, þis ussaihvandins.

9:19 [CA] jah frehun ins qiþandans: sau ist sa sunus izwar þanei jus qiþiþ þatei blinds gabaurans waurþi? hvaiwa nu saihviþ?

9:20 [CA] andhofun þan im þai fadrein is jah qeþun: witum þatei sa ist sunus unsar, jah þatei blinds gabaurans warþ;

9:21 [CA] iþ hvaiwa nu saihviþ ni witum, aiþþau hvas uslauk imma þo augona weis ni witum; silba uswahsans ist, ina fraihniþ, silba bi sik rodjai.

9:22 [CA] þata qeþun þai fadrein is, unte ohtedun sis Iudaiuns; juþan auk gaqeþun sis Iudaieis, ei, jabai hvas ina andhaihaiti Xristu, utana swnagogais wairþai.

9:23 [CA] duhþe þai berusjos is qeþun þatei uswahsans ist, silban fraihniþ.

9:24 [CA] atwopidedun þan anþaramma sinþa þana mannan saei was blinds, jah qeþun du imma: gif hauhein guda! weis witum þatei sa manna frawaurhts ist.

9:25 [CA] þanuh andhof jains: jabai frawaurhts ist, ik ni wait; þat~ain wait ei blinds was, iþ nu saihva.

9:26 [CA] þanuh qeþun aftra: hva gatawida þus? hvaiwa uslauk þus augona?

9:27 [CA] andhof im: qaþ izwis ju jah ni hausideduþ; hva aftra wileiþ hausjan? ibai jah jus wileiþ þamma siponjos wairþan?

9:28 [CA] þanuh lailoun imma jah qeþun: þu is siponeis þamma, iþ weis Mose siponjos sijum.

9:29 [CA] weis witum þatei du Mose rodida guþ, iþ þana ni kunnum, hvaþro ist.

9:30 [CA] andhof sa manna jah qaþ du im: auk in þamma sildaleik ist, þatei jus ni wituþ hvaþro ist, jah uslauk mis augona.

9:31 [CA] witumuh þan þatei guþ frawaurhtaim ni andhauseiþ, ak jabai hvas gudblostreis ist jah wiljan is taujiþ, þamma hauseiþ.

9:32 [CA] fram aiwa ni gahausiþ was þatei uslukiþ hvas augona blindamma gabauranamma.

9:33 [CA] nih wesi sa fram guda, ni mahtedi taujan ni waiht.

9:34 [CA] andhofun jah qeþun du imma: in frawaurhtim þu gabaurans warst alls jah þu laiseis unsis? jah uswaurpun imma ut.

9:35 [CA] hausida Iesus þatei uswaurpun imma ut, jah bigat ina qaþuh du imma: þu ga~u~laubeis du sunau gudis?

9:36 [CA] andhof jains jah qaþ: an hvas ist, frauja, ei galaubjau du imma?

9:37 [CA] qaþ þan imma Iesus: jah gasahvt ina jah saei rodeiþ miþ þus, sa ist.

9:38 [CA] iþ is qaþuh: galaubja, frauja; jah inwait ina.

9:39 [CA] jah qaþ Iesus: du stauai ik in þamma fairhvau qam, ei þai unsaihvandans saihvaina jah þai saihvandans blindai wairþaina.

9:40 [CA] jah hausidedun þize Fareisaie sumai þata, þai wisandans miþ imma, jah qeþun du imma: ibai jah weis blindai sijum?

9:41 [CA] qaþ im Iesus: iþ blindai weseiþ, ni þau habaidedeiþ frawaurhtais; iþ nu qiþiþ þatei gasaihvam; eiþan frawaurhts izwara þairhwisiþ.

10:1 [CA] Amen amen qiþa izwis, saei inn ni atgaggiþ þairh daur in gardan lambe, ak steigiþ aljaþro, sah hliftus ist jah waidedja.

10:2 [CA] iþ sa inngaggands þairh daur hairdeis ist lambe.

10:3 [CA] þammuh daurawards uslukiþ, jah þo lamba stibnai is hausjand, jah þo swesona lamba haitiþ bi namin jah ustiuhiþ þo.

10:4 [CA] jah þan þo swesona ustiuhiþ, faura im gaggiþ, jah þo lamba ina laistjand, unte kunnun stibna is.

10:5 [CA] iþ framaþjana ni laistjand, ak þliuhand faura imma, unte ni kunnun þize framaþjane stibna.

10:6 [CA] þo gajukon qaþ im Iesus: iþ jainai ni froþun hva was, þatei rodida du im.

10:7 [CA] þanuh qaþ aftra du im Iesus: amen amen, qiþa izwis þatei ik im daur þize lambe.

10:8 [CA] allai swa managai swe qemun, þiubos sind jah waidedjans; akei ni hausidedun im þo lamba.

10:9 [CA] ik im þata daur. þairh mik jabai hvas inngaggiþ, ganisiþ, jah inngaggiþ jah utgaggiþ jah winja bigitiþ.

10:10 [CA] þiubs ni qimiþ, nibai ei stilai jah ufsneiþai jah fraqistjai; iþ ik qam, ei libain aigeina jah managizo aigeina.

10:11 [CA] ik im hairdeis gods. hairdeis sa goda saiwala seina lagjiþ faur lamba.

10:12 [CA] iþ asneis jah saei nist hairdeis, þizei ni sind lamba swesa, gasaihviþ wulf qimandan jah bileiþiþ þaim lambam jah þliuhiþ, jah sa wulfs frawilwiþ þo jah distahjiþ þo lamba.

10:13 [CA] iþ sa asneis afþliuhiþ, unte asneis ist jah ni kar~ist ina þize lambe.

10:14 [CA] ik im hairdeis sa goda jah kann meina jah kunnun mik þo meina,

10:15 [CA] swaswe kann mik atta jah ik kann attan, jah saiwala meina lagja faur þo lamba.

10:16 [CA] jah anþara lamba aih þoei ni sind þis awistris, jah þo skal briggan, jah stibnos meinaizos hausjand, jah wairþand ain aweþi, ains hairdeis.

10:17 [CA] duhþe atta mik frijoþ, unte ik lagja saiwala meina, ei aftra nimau þo.

10:18 [CA] ni hvashun nimiþ þo af mis silbin; waldufni haba aflagjan þo, jah waldufni haba aftra niman þo. þo anabusn nam at attin meinamma.

10:19 [CA] þanuh missaqiss aftra warþ miþ Iudaium in þize waurde.

10:20 [CA] qeþunuh managai ize: unhulþon habaiþ jah dwalmoþ; hva þamma hauseiþ?

10:21 [CA] sumaih qeþun: þo waurda ni sind unhulþon habandins; ibai mag unhulþo blindaim augona uslukan?

10:22 [CA] warþ þan inniujiþa in Iairusaulwmai, jah wintrus was.

10:23 [CA] jah hvarboda Iesus in alh in ubizwai Saulaumonis.

10:24 [CA] þanuh birunnun ina Iudaieis jah qeþun du imma: und hva saiwala unsara hahis? jabai þu sijais Xristus, qiþ unsis andaugiba.

10:25 [CA] andhof Iesus: qaþ izwis, jah ni galaubeiþ; waurstwa þoei ik tauja in namin attins meinis, þo weitwodjand bi mik;

10:26 [CA] akei jus ni galaubeiþ, unte ni sijuþ lambe meinaize, swaswe qaþ izwis.

10:27 [CA] lamba meina stibnai meinai hausjand, jah ik kann þo, jah laistjand mik.

10:28 [CA] jah ik libain aiweinon giba im, jah ni fraqistnand aiw; jah ni frawilwiþ hvashun þo us handau meinai.

10:29 [CA] atta meins þatei fragaf mis, maizo allaim ist, jah ni aiw ainshun mag frawilwan þo us handau attins meinis.

10:30 [CA] ik jah atta meins ain siju.

10:31 [CA] nemun aftra stainans þai Iudaieis, ei waurpeina ana ina.

10:32 [CA] andhof im Iesus: managa goda waurstwa ataugida izwis us attin meinamma, in hvarjis þize waurstwe staineiþ mik?

10:33 [CA] andhofun imma þai Iudaieis: in godis waurstwis ni stainjam þuk, ak in wajamereins, jah þatei þu manna wisands taujis þuk silban du guda.

10:34 [CA] andhof im Iesus: niu ist gameliþ in witoda izwaramma: ik qaþ, guda sijuþ?

10:35 [CA] jabai jainans qaþ guda, du þaimei waurd gudis warþ, jah ni maht ist gatairan þata gamelido;

10:36 [CA] þanei atta gaweihaida jah insandida in þana fairhvu, jus qiþiþ þatei wajamerjau, unte qaþ: sunus gudis im?

10:37 [CA] niba taujau waurstwa attins meinis, ni galaubeiþ mis;

10:38 [CA] iþ jabai taujau, niba mis galaubjaiþ, þaim waurstwam galaubjaiþ, ei ufkunnaiþ jah galaubjaiþ þatei in mis atta jah ik in imma.

10:39 [CA] sokidedun ina aftra gafahan, jah usiddja us handum ize.

10:40 [CA] jah galaiþ aftra ufar Iaurdanu in þana stad þarei was Iohannes frumist daupjands, jah salida jainar.

10:41 [CA] jah managai qemun at imma jah qeþun þatei Iohannes gatawida taikne ni ainohun; iþ allata þatei qaþ Iohannes bi þana, sunja was.

10:42 [CA] jah galaubidedun managai du imma jainar.

11:1 [CA] Wasuh þan sums siuks, Lazarus af Beþanias, us haimai Marjins jah Marþins, swistrs izos.

11:2 [CA] wasuh þan Marja, soei salboda fraujan balsana jah biswarb fotuns is skufta seinamma, þizozei broþar Lazarus siuks was.

11:3 [CA] insandidedun þan þos swistrjus is du imma qiþandeins: frauja, sai, þanei frijos siuks ist.

11:4 [CA] iþ is gahausjands qaþ: so siukei nist du dauþau, ak in hauheinais gudis, ei hauhjaidau sunus gudis þairh þata.

11:5 [CA] frijoduh þan Iesus Marþan jah swistar izos jah Lazaru.

11:6 [CA] swe hausida þatei siuks was, þanuh þan salida in þammei was stada twans dagans.

11:7 [CA] þaþroh þan afar þata qaþ du siponjam: gaggam in Iudaian aftra.

11:8 [CA] qeþun du imma þai siponjos: rabbei, nu sokidedun þuk afwairpan stainam Iudaieis, jah aftra gaggis jaind?

11:9 [CA] andhof Iesus: niu twalif sind hveilos dagis? jabai hvas gaggiþ in dag, ni gastiggqiþ, unte liuhaþ þis fairhvaus gasaihviþ;

11:10 [CA] aþþan jabai hvas gaggiþ in naht, gastiggqiþ, unte liuhad nist in imma.

11:11 [CA] þo qaþ jah afar þata qiþiþ du im: Lazarus, frijonds unsar, gasaizlep; akei gaggam, ei uswakjau ina.

11:12 [CA] þanuh qeþun þai siponjos is: frauja, jabai slepiþ, hails wairþiþ.

11:13 [CA] qaþuh þan Iesus bi dauþu is; iþ jainai hugidedun þatei is bi slep qeþi.

11:14 [CA] þanuh þan qaþ du im Iesus swikunþaba: Lazarus gaswalt,

11:15 [CA] jah fagino in izwara, ei galaubjaiþ, unte ni was jainar; akei gaggam du imma.

11:16 [CA] þanuh qaþ Þomas saei haitada Didimus þaim gahlaibam seinaim: gaggam jah weis, ei gaswiltaima miþ imma.

11:17 [CA] qimands þan Iesus bigat ina juþan fidwor dagans habandan in hlaiwa.

11:18 [CA] wasuh þan Beþania nehva Iairusaulwmi[a]m, swaswe ana spaurdim fimftaihunim.

11:19 [CA] jah managai Iudaie gaqemun bi Marþan jah Marjan, ei gaþrafstidedeina ijos bi þana broþar izo.

11:20 [CA] iþ Marþa, sunsei hausida þatei Iesus qimiþ, wiþraïddja ina; iþ Marja in garda sat.

11:21 [CA] þanuh qaþ Marþa du Iesua: frauja, iþ weseis her, ni þau gadauþnodedi broþar meins.

11:22 [CA] akei jah nu wait, ei þishvah þei bidjis guþ, gibiþ þus guþ.

11:23 [CA] qaþ izai Iesus: usstandiþ broþar þeins.

11:24 [CA] qaþ du imma Marþa: wait þatei usstandiþ in usstassai in þamma spedistin daga.

11:25 [CA] qaþ þan Iesus: ik im so usstass jah libains; saei galaubeiþ du mis, þauh ga~ba~dauþniþ, libaid;

11:26 [CA] jah hvazuh saei libaiþ jah galaubeiþ du mis, ni gadauþniþ aiw. galaubeis þata?

11:27 [CA] qaþ imma: jai, frauja, ik galaubida þatei þu is Xristus, sunus gudis, sa in þana fairhvu qimanda.

11:28 [CA] jah þata qiþandei galaiþ jah wopida Marjan, swistar seina, þiubjo qiþandei: laisareis qam jah haitiþ þuk.

11:29 [CA] iþ jaina, sunsei hausida, urrais sprauto jah iddja du imma.

11:30 [CA] niþ~þan nauhþanuh qam Iesus in weihsa, ak was nauhþanuh in þamma stada þarei gamotida imma Marþa.

11:31 [CA] Iudaieis þan þai wisandans miþ izai in garda þrafstjandans ija, gasaihvandans Marjan þatei sprauto usstoþ jah usiddja, iddjedunuh afar izai qiþandans þatei gaggiþ du hlaiwa, ei greitai jainar.

11:32 [CA] iþ Marja, sunsei qam þarei was Iesus, gasaihvandei ina draus imma du fotum qiþandei du imma: frauja, iþ weiseis her, ni þauh gaswulti meins broþar.

11:33 [CA] þanuh Iesus, sunsei gasahv ija greitandein jah Iudaiuns þaiei qemun miþ izai gretandans, inrauhtida ahmin jah inwagida sik silban.

11:34 [CA] jah qaþ: hvar lagideduþ ina? qeþun du imma: frauja, hiri jah saihv.

11:35 [CA] jah tagrida Iesus.

11:36 [CA] þaruh qeþun þai Iudaieis: sai, hvaiwa frioda ina.

11:37 [CA] sumai þan ize qeþun: niu mahta sa izei uslauk augona þamma blindin gataujan ei jah sa ni gadauþnodedi?

11:38 [CA] þanuh Iesus aftra inrauhtiþs in sis silbin gaggiþ du þamma hlaiwa. wasuh þan hulundi jah staina ufarlagida was ufaro.

11:39 [CA] qaþ Iesus: afnimiþ þana stain. qaþ du imma swistar þis dauþins Marþa: frauja, ju fuls ist; fidurdogs auk ist.

11:40 [CA] qaþ izai Iesus: niu qaþ þus þatei jabai galaubeis, gasaihvis wulþu gudis?

11:41 [CA] ushofun þan þana stain þarei was. iþ Iesus uzuhhof augona iup jah qaþ: atta, awiliudo þus, unte andhausides mis;

11:42 [CA] jah þan ik wissa þatei sinteino mis andhauseis; akei in manageins þizos bistandandeins qaþ, ei galaubjaina þatei þu mik insandides.

11:43 [CA] jah þata qiþands stibnai mikilai hropida: Lazaru, hiri ut!

11:44 [CA] jah urrann sa dauþa gabundans handuns jah fotuns faskjam, jah wlits is auralja bibundans. qaþ du im Iesus: andbindiþ ina jah letiþ gaggan.

11:45 [CA] þanuh managai þize Judaiei þai qimandans at Marjin jah saihvandans þatei gatawida, galaubidedun imma.

11:46 [CA] sumaiþ~þan ize galiþun du Fareisaium jah qeþun du im þatei gatawida Iesus.

11:47 [CA] galesun þan þai auhumistans gudjans jah þai Farei(saieis) . . . .

12:1 [CA] . . . . in Beþanijin, þarei was Lazarus sa dauþa, þanei urraisida us dauþaim Iesus.

12:2 [CA] þaruh gawaurhtedun imma nahtamat jainar, jah Marþa andbahtida; iþ Lazarus was sums þize anakumbjandane miþ imma.

12:3 [CA] iþ Marja nam pund balsanis nardaus pistikeinis filugalaubis jah gasalboda fotuns Iesua jah biswarb fotuns is skufta seinamma; iþ sa gards fulls warþ daunais þizos salbonais.

12:4 [CA] qaþ þan ains þize siponje is, Judas Seimonis sa Iskariotes, izei skaftida sik du galewjan ina:

12:5 [CA] duhve þata balsan ni frabauht was in ·t· skatte jah fradailiþ wesi þarbam?

12:6 [CA] þatuþ~þan qaþ, ni þeei ina þize þarbane kara wesi, ak unte þiubs was jah arka habaida jah þata innwaurpano bar.

12:7 [CA] qaþ þan Iesus: let ija; in dag gafilhis meinis fastaida þata.

12:8 [CA] iþ þans unledans sinteino habaiþ miþ izwis, iþ mik ni sinteino habaiþ.

12:9 [CA] fanþ þan manageins filu Iudaie þatei Iesus jainar ist, jah qemun, ni in Iesuis ainis, ak ei jah Lazaru sehveina, þanei urraisida us dauþaim.

12:10 [CA] munaidedunuþ~þan auk þai auhumistans gudjans, ei jah Lazarau usqemeina,

12:11 [CA] unte managai in þis garunnun Iudaiei jah galaubidedun Iesua.

12:12 [CA] iftumin daga manageins filu sei qam at dulþai, gahausjandans þatei qimiþ Iesus in Iairausaulwmai,

12:13 [CA] nemun astans peikabagme jah urrunnun wiþragamotjan imma jah hropidedun: osanna, þiuþida sa qimanda in namin fraujins, þiudans Israelis.

12:14 [CA] bigat þan Iesus asilu, gasat ana ina, swaswe ist gameliþ:

12:15 [CA] ni ogs þus, dauhtar Sion, sai, þiudans þeins qimiþ sitands ana fulin asilaus.

12:16 [CA] þatuþ~þan ni kunþedun siponjos is frumist; ak biþe gasweraiþs was Iesus, þanuh gamundedun þatei þata was du þamma gameliþ, jah þata gatawidedun imma.

12:17 [CA] weitwodida þan so managei, sei was miþ imma, þan Lazaru wopida us hlaiwa jah urraisida ina us dauþaim.

12:18 [CA] duþþe iddjedun gamotjan imma managei, unte hausidedun ei gatawidedi þo taikn.

12:19 [CA] þanuh þai Fareisaieis qeþun du sis misso: saihviþ þatei ni boteiþ waiht; sai, so manaseds afar imma galaiþ.

12:20 [CA] wesunuþ~þan sumai þiudo þize urrinnandane, ei inwiteina in þizai dulþai.

12:21 [CA] þai atiddjedun du Filippau, þamma fram Beþsaeida Galeilaie, jah bedun ina qiþandans: frauja, wileima Iesu gasaihvan.

12:22 [CA] gaggiþ Filippus jah qiþiþ du Andraiin, jah aftra Andraias jah Filippus qeþun du Iesua.

12:23 [CA] iþ Iesus andhof im qiþands: qam hveila ei sweraidau sunus mans.

12:24 [CA] amen amen qiþa izwis: nibai kaurno hvaiteis gadriusando in airþa gaswiltiþ, silbo ainata aflifniþ: iþ jabai gaswiltiþ, manag akran bairiþ.

12:25 [CA] saei frijoþ saiwala seina, fraqisteiþ izai, jah saei fiaiþ saiwala seina in þamma fairhvau, in libainai aiweinon bairgiþ izai.

12:26 [CA] jabai mis hvas andbahtjai, mik laistjai: jah þarei im ik, þaruh sa andbahts meins wisan habaiþ; jah jabai hvas mis andbahtiþ, sweraiþ ina atta.

12:27 [CA] nu saiwala meina gadrobnoda, jah hva qiþau? atta, nasei mik us þizai hveilai. akei duþþe qam in þizai hveilai.

12:28 [CA] atta, hauhei namo þeinata! qam þan stibna us himina: jah hauhida jah aftra hauhja.

12:29 [CA] managei þan sei stoþ gahausjandei, qeþun þeihvon wairþan; sumaih qeþun: aggilus du imma rodida.

12:30 [CA] andhof Iesus jah qaþ: ni in meina so stibna warþ, ak in izwara.

12:31 [CA] nu staua ist þizai manasedai, nu sa reiks þis fairhvaus uswairpada ut.

12:32 [CA] jah ik jabai ushauhjada af airþai, alla atþinsa du mis.

12:33 [CA] þatuþ~þan qaþ bandwjands hvileikamma dauþau skulda gadauþnan.

12:34 [CA] andhof imma so managei: weis hausidedum ana witoda þatei Xristus sijai du aiwa; jah hvaiwa þu qiþis þatei skulds ist ushauhjan sa sunus mans? hvas ist sa sunus mans?

12:35 [CA] qaþ þan du im Iesus: nauh leitil mel liuhaþ in izwis ist. gaggiþ þande liuhaþ habaiþ, ei riqiz izwis ni gafahai; jah saei gaggiþ in riqiza, ni wait hvaþ gaggiþ.

12:36 [CA] þande liuhaþ habaiþ, galaubeiþ du liuhada, ei sunjus liuhadis wairþaiþ. þata rodida Iesus, jah galaiþ jah gafalh sik faura im.

12:37 [CA] swa filu imma taikne gataujandin in andwairþja ize, ni galaubidedun imma,

12:38 [CA] ei þata waurd Esaeiins praufetaus usfullnodedi þatei qaþ: frauja, hvas galaubida hauseinai unsarai? jah arms fraujins hvamma andhuliþs warþ?

12:39 [CA] duþþe ni mahtedun galaubjan; unte aftra qaþ Esaeias:

12:40 [CA] gablindida ize augona jah gadaubida ize hairtona, ei ni gaumidedeina augam jah froþeina hairtin jah gawandidedeina jah ganasidedjau ins.

12:41 [CA] þata qaþ Esaeias, þan sahv wulþu is jah rodida bi ina.

12:42 [CA] þanuh þan sweþauh jah us þaim reikam managai galaubidedun du imma, akei faura Fareisaium ni andhaihaitun, ei us swnagogei ni uswaurpanai waurþeina.

12:43 [CA] frijodedun auk mais hauhein manniska þau hauhein gudis.

12:44 [CA] iþ Iesus hropida jah qaþ: saei galaubeiþ du mis ni galaubeiþ du mis, ak du þamma sandjandin mik.

12:45 [CA] jah saei saihviþ mik, saihviþ þana sandjandan mik.

12:46 [CA] ik liuhad in þamma fairhvau qam, ei hvazuh saei galaubjai du mis, in riqiza ni wisai.

12:47 [CA] jah jabai hvas meinaim hausjai waurdam jah galaubjai, ik ni stoja ina; nih þan qam ei stojau manased, ak ei ganasjau manased.

12:48 [CA] saei frakann mis jah ni andnimiþ waurda meina, habaid þana stojandan sik. waurd þatei rodida, þata stojiþ ina in spedistin daga.

12:49 [CA] unte ik us mis silbin ni rodida, ak saei sandida mik atta, sah mis anabusn at(gaf) . . . .

13:11 [CA] . . . . qaþ: ni allai hrainjai sijuþ.

13:12 [CA] Biþeh þan usþwoh fotuns ize jah nam wastjos seinos, anakumbjands aftra qaþ du im: witudu hva gatawida izwis?

13:13 [CA] jus wopeid mik: laisareis jah frauja. waila qiþiþ, im auk.

13:14 [CA] jabai nu usþwoh izwis fotuns, frauja jah laisareis, jah jus skuluþ izwis misso þwahan fotuns.

13:15 [CA] du frisahtai auk atgaf izwis, ei swaswe ik gatawida izwis, swa jus taujaiþ.

13:16 [CA] amen amen qiþa izwis: nist skalks maiza fraujin seinamma, nih apaustaulus maiza þamma sandjandin sik.

13:17 [CA] þande þata wituþ, audagai sijuþ, jabai taujiþ þata.

13:18 [CA] ni bi allans izwis qiþa. ik wait hvarjans gawalida; ak ei usfulliþ waurþi þata gamelido: saei matida miþ mis hlaib, ushof ana mik fairzna seina.

13:19 [CA] fram himma qiþa izwis, faurþizei waurþi, ei biþe wairþai, galaubjaiþ þatei ik im.

13:20 [CA] amen amen qiþa izwis: saei andnimiþ þana þanei ik insandja, mik andnimiþ; iþ saei mik andnimiþ, andnimiþ þana sandjandan mik.

13:21 [CA] þata qiþands Iesus indrobnoda ahmin jah weitwodida jah qaþ: amen amen, qiþa izwis þatei ains izwara galeweiþ mik.

13:22 [CA] þanuh sehvun du sis misso þai siponjos, þagkjandans bi hvarjana qeþi.

13:23 [CA] wasuh þan anakumbjands ains þize siponje is in barma Iesuis, þanei frijoda Iesus.

13:24 [CA] bandwiduh þan þamma Seimon Paitrus du fraihnan hvas wesi, bi þanei qaþ.

13:25 [CA] anakumbida þan jains swa ana barma Iesuis qaþuh imma: frauja, hvas ist?

13:26 [CA] andhof Iesus: sa ist þammei ik ufdaupjands þana hlaif giba. jah ufdaupjands þana hlaif gaf Iudin Seimonis, Skariotau.

13:27 [CA] jah afar þamma hlaiba þan galaiþ in jainana Satana. qaþ þan du imma Iesus: þatei taujis, tawei sprauto.

13:28 [CA] þatuh þan ainshun ni wissa þize anakumbjandane, duhve qaþ imma.

13:29 [CA] sumai mundedun, ei unte arka habaida Iudas, þatei qeþi imma Iesus: bugei þizei þaurbeima du dulþai, aiþþau þaim unledam ei hva gibau.

13:30 [CA] biþe andnam þana hlaib jains, suns galaiþ ut. wasuh þan nahts, þan galaiþ ut.

13:31 [CA] qaþ þan Iesus: nu gasweraids warþ sunus mans, jah guþ hauhiþs ist in imma.

13:32 [CA] jabai nu guþ hauhiþs ist in imma, jah guþ hauheiþ ina in sis jah suns hauhida ina.

13:33 [CA] barnilona, nauh leitil mel miþ izwis im. sokeiþ mik, jah swaswe qaþ du Iudaium, ei þadei ik gagga, jus ni maguþ qiman, jah izwis qiþa nu.

13:34 [CA] anabusn niuja giba izwis, ei frijoþ izwis misso swe ik frijoda izwis, þei jah jus frijoþ misso izwis.

13:35 [CA] bi þamma ufkunnand allai, þei meinai siponjos sijuþ, jabai friaþwa habaid miþ izwis misso.

13:36 [CA] þanuh qaþ du imma Seimon Paitrus: frauja, hvad gaggis? andhafjands Iesus qaþ: þadei ik gagga, ni magt mik nu laistjan; iþ biþe laisteis.

13:37 [CA] þaruh Paitrus qaþ du imma: frauja, duhve ni mag þuk laistjan nu? saiwala meina faur þuk lagja.

13:38 [CA] andhof Iesus: saiwala þeina faur mik lagjis? amen amen qiþa þus, þei hana ni hrukeiþ, unte þu mik afaikis kunnan þrim sinþam.

14:1 [CA] Ni indrobnai izwar hairto; galaubeiþ du guda jah du mis galaubeiþ.

14:2 [CA] in garda attins meinis saliþwos managos sind; aþþan niba weseina, aiþþau qeþjau du izwis: gagga manwjan stad izwis.

14:3 [CA] jah þan jabai gagga, manwja izwis stad, aftra qima jah franima izwis du mis silbin, ei þarei im ik, þaruh sijuþ jah jus.

14:4 [CA] jah þadei ik gagga kunnuþ jah þana wig kunnuþ.

14:5 [CA] þaruh qaþ imma Þomas: frauja, ni witum hvaþ gaggis, jah hvaiwa magum þana wig kunnan?

14:6 [CA] qaþ imma Iesus: ik im sa wigs jah sunja jah libains. ainshun ni qimiþ at attin, niba þairh mik.

14:7 [CA] iþ kunþedeiþ mik, aiþþau kunþedeiþ jah attan meinana; jah þan fram himma kunnuþ ina jah gasaihviþ ina.

14:8 [CA] iþ Filippus qaþuh du imma: frauja, augei unsis þana attan; þatuh ganah unsis.

14:9 [CA] þaruh qaþ imma Iesus: swalaud melis miþ izwis was, jah ni ufkunþes mik, Filippu? saei gasahv mik, gasahv attan, jah hvaiwa þu qiþis: augei unsis þana attan?

14:10 [CA] niu galaubeis þatei ik in attin jah atta in mis ist? þo waurda þoei ik rodja izwis, af mis silbin ni rodja, ak atta saei in mis ist, sa taujiþ þo waurstwa.

14:11 [CA] Galaubeiþ mis þatei ik in attin jah atta in mis; iþ jabai , in þize waurstwe [ni] galaubeiþ mis.

14:12 [CA] amen amen qiþa izwis, saei galaubeid mis: þo waurstwa þoei ik tauja, jah is taujiþ jah maizona þaim taujiþ; unte ik du attin gagga.

14:13 [CA] jah þatei hva bidjiþ in namin meinamma, þata tauja, ei hauhjaidau atta in sunau.

14:14 [CA] jabai hvis bidjiþ mik in namin meinamma, ik tauja.

14:15 [CA] jabai mik frijoþ, anabusnins meinos fastaid.

14:16 [CA] jah ik bidja attan, jah anþarana parakletu gibiþ izwis, ei sijai miþ izwis du aiwa,

14:17 [CA] ahma sunjos, þanei so manaseiþs ni mag niman, unte ni saihviþ ina, nih kann ina; iþ jus kunnuþ ina, unte is miþ izwis wisiþ jah in izwis ist.

14:18 [CA] ni leta izwis widuwairnans; qima at izwis.

14:19 [CA] nauh leitil, jah so manaseiþs mik ni þanaseiþs saihviþ; iþ jus saihviþ mik, þatei ik liba, jah jus libaiþ.

14:20 [CA] in jainamma daga ufkunnaiþ jus þatei ik in attin meinamma jah jus in mis jah ik in izwis.

14:21 [CA] Saei habaid anabusnins meinos jah fastaiþ þos, sa ist saei frijoþ mik: jah þan saei frijoþ mik, frijoda fram attin meinamma, jah ik frijo ina jah gabairhtja imma mik silban.

14:22 [CA] þaruh qaþ imma Iudas, ni sa Iskarjotes: frauja, hva warþ, ei unsis munais gabairhtjan þuk silban, iþ þizai manasedai ni?

14:23 [CA] andhof Iesus jah qaþ du imma: jabai hvas mik frijoþ, [jah] waurd mein fastaiþ, jah atta meins frijoþ ina, jah du imma galeiþos jah saliþwos at imma gataujos.

14:24 [CA] iþ saei ni frioþ mik, þo waurda meina ni fastaiþ; jah þata waurd þatei hauseiþ nist mein, ak þis sandjandins mik attins.

14:25 [CA] þata rodida izwis at izwis wisands.

14:26 [CA] aþþan sa parakletus, ahma sa weiha, þanei sandeiþ atta in namin meinamma, sa izwis laiseiþ allata jah gamaudeiþ izwis allis þatei qaþ du izwis.

14:27 [CA] gawairþi bileiþa izwis, gawairþi mein giba izwis; ni swaswe so manaseþs gibiþ, ik giba izwis. ni indrobnaina izwara hairtona nih faurhtjaina.

14:28 [CA] Hausideduþ ei ik qaþ izwis: galeiþa jah qima at izwis; jabai frijodedeiþ mik, aiþþau jus faginodedeiþ ei ik gagga du attin: unte atta meins maiza mis ist.

14:29 [CA] jah nu qaþ izwis, faurþizei waurþi, ei biþe wairþai, galaubjaiþ.

14:30 [CA] þanaseiþs filu ni maþlja miþ izwis; qimiþ saei þizai manasedai reikinoþ, jah in mis ni bigitiþ waiht.

14:31 [CA] ak ei ufkunnai so manaseþs þatei ik frijoda attan meinana, jah swaswe anabaud mis atta, swa tauja. urreisiþ, gaggam þaþro.

15:1 [CA] Ik im weinatriu þata sunjeino, jah atta meins waurstwja ist.

15:2 [CA] all taine in mis unbairandane akran goþ, usnimiþ ita: jah all akran bairandane, gahraineiþ ita, ei managizo akran bairaina.

15:3 [CA] ju jus hrainjai sijuþ in þis waurdis þatei rodida du izwis.

15:4 [CA] wisaiþ in mis jah ik in izwis. swe sa weinatains ni mag akran bairan af sis silbin, niba ist ana weinatriwa, swah nih jus, niba in mis sijuþ.

15:5 [CA] ik im þata weinatriu, iþ jus weinatainos; saei wisiþ in mis jah ik in imma, swa bairiþ akran manag, þatei inuh mik ni maguþ taujan ni waiht.

15:6 [CA] niba saei wisiþ in mis, uswairpada ut swe weinatains, jah gaþaursniþ jah galisada, jah in fon galagjand jah inbrannjada.

15:7 [CA] aþþan jabai sijuþ in mis, jah waurda meina in izwis sind, þatahvah þei wileiþ bidjiþ, jah wairþiþ izwis.

15:8 [CA] in þamma hauhiþs ist atta meins, ei akran manag bairaiþ jah wairþaiþ meinai siponjos.

15:9 [CA] swaswe frijoda mik atta, swah ik frijoda izwis; wisaiþ in friaþwai meinai.

15:10 [CA] jabai anabusnins meinos fastaid, sijuþ in friaþwai meinai, swaswe ik anabusnins attins meinis fastaida, jah wisa in friaþwai is.

15:11 [CA] þata rodida izwis, ei faheþs meina in izwis sijai, jah faheds izwara usfulljaidau.

15:12 [CA] þata ist anabusns meina, ei frijoþ izwis misso, swaswe ik frijoda izwis.

15:13 [CA] maizein þizai friaþwa[i] manna ni habaiþ, ei hvas saiwala seina lagjiþ faur frijonds seinans.

15:14 [CA] jus frijonds meinai sijuþ, jabai taujiþ þatei ik anabiuda izwis.

15:15 [CA] þanaseiþs izwis ni qiþa skalkans; unte skalks ni wait hva taujiþ is frauja, iþ ik izwis qaþ frijonds, unte all þatei hausida at attin meinamma, gakannida izwis.

15:16 [CA] ni jus mik gawalideduþ, ak ik gawalida izwis ei jus sniwaiþ jah akran bairaiþ, jah akran izwar du aiwa sijai, ei þatahvah þei bidjaiþ attan in namin meinamma, gibiþ izwis.

15:17 [CA] þata anabiuda izwis ei frijoþ izwis misso.

15:18 [CA] jabai so manaseds izwis fijai, kunneiþ ei mik fruman izwis fijaida.

15:19 [CA] jabai þis fairhvaus weseiþ, aiþþau so manaseds swesans frijodedi; aþþan unte us þamma fairhvau ni sijuþ, ak ik gawalida izwis us þamma fairhvau, duþþe fijaid izwis so manaseþs.

15:20 [CA] gamuneiþ þis waurdis þatei ik qaþ du izwis: nist skalks maiza fraujin seinamma. jabai mik wrekun, jah izwis wrikand; jabai mein waurd fastaidedeina, jah izwar fastaina.

15:21 [CA] ak þata allata taujand izwis in namins meinis, unte ni kunnun þana sandjandan mik.

15:22 [CA] nih qemjau jah rodidedjau du im, frawaurht ni habaidedeina: iþ nu inilons ni haband bi frawaurht seina.

15:23 [CA] saei mik fijaiþ, jah attan meinana fijaiþ.

15:24 [CA] iþ þo waurstwa ni gatawidedjau in im þoei anþar ainshun ni gatawida, frawaurht ni habaidedeina; iþ nu jah gasehvun mik jah fijaidedun jah mik jah attan meinana.

15:25 [CA] ak ei usfullnodedi waurd þata gamelido in witoda ize: ei fijaidedun mik arwjo.

15:26 [CA] aþþan þan qimiþ parakletus þanei ik insandja izwis fram attin, ahman sunjos izei fram attin urrinniþ, sa weitwodeiþ bi mik.

15:27 [CA] jah þan jus weitwodeiþ, unte fram fruma miþ mis sijuþ.

16:1 [CA] Þata rodida izwis, ei ni afmarzjaindau.

16:2 [CA] us gaqumþim dreiband izwis; akei qimiþ hveila, ei sahvazuh izei usqimiþ izwis, þuggkeiþ hunsla saljan guda.

16:3 [CA] jah þata taujand, unte ni ufkunþedun attan nih mik.

16:4 [CA] akei þata rodida izwis, ei biþe qimai so hveila ize, gamuneiþ þize þatei ik qaþ izwis. iþ þata izwis fram fruma ni qaþ, unte miþ izwis was.

16:5 [CA] Iþ nu gagga du þamma sandjandin mik, jah ainshun us izwis ni fraihniþ mik: hvaþ gaggis?

16:6 [CA] akei unte þata rodida izwis, gauriþa gadaubida izwar hairto.

16:7 [CA] akei ik sunja izwis qiþa: batizo ist izwis ei ik galeiþau; unte jabai ik ni galeiþa, parakletus ni qimiþ at izwis; aþþan jabai gagga, sandja ina du izwis.

16:8 [CA] jah qimands is gasakiþ þo manaseþ bi frawaurht jah bi garaihtiþa jah bi staua;

16:9 [CA] bi frawaurht raihtis, [þata] þatei ni galaubjand du mis;

16:10 [CA] iþ bi garaihtiþa, þatei du attin meinamma gagga, jah ni þanaseiþs saihviþ mik;

16:11 [CA] iþ bi staua, þatei sa reiks þis fairhvaus afdomiþs warþ.

16:12 [CA] Nauh ganoh skal qiþan izwis, akei ni maguþ frabairan nu.

16:13 [CA] iþ þan qimiþ jains, ahma sunjos, briggiþ izwis in allai sunjai; nih þan rodeiþ af sis silbin ak swa filu swe hauseiþ rodeiþ, jah þata anawairþo gateihiþ izwis.

16:14 [CA] jains mik hauheiþ, unte us meinamma nimiþ jah gateihiþ izwis.

16:15 [CA] all þatei aih atta, mein ist; duhþe qaþ þatei us meinamma nimiþ jah gateihiþ izwis.

16:16 [CA] Leitil nauh jah ni saihviþ mik; jah aftra leitil jah gasaihviþ mik, unte ik gagga du attin.

16:17 [CA] þaruh qeþun us þaim siponjam du sis misso: hva ist þata þatei qiþiþ unsis: leitil ei ni saihviþ mik, jah aftra leitil jah gasaihviþ mik, jah þatei ik gagga du attin?

16:18 [CA] qeþunuh: þata hva sijai þatei qiþiþ: leitil, ni witum hva qiþiþ.

16:19 [CA] iþ Iesus wissuh þatei wildedun ina fraihnan jah qaþ im: bi þata sokeiþ miþ izwis misso þatei qaþ: leitil jah ni saihviþ mik, jah aftra leitil jah gasaihviþ mik.

16:20 [CA] amen, amen, qiþa izwis þei greitiþ jah gaunoþ jus, iþ manaseþs faginoþ; jus saurgandans wairþiþ, akei so saurga izwara du fahedai wairþiþ.

16:21 [CA] qino, þan bairiþ, saurga habaid, unte qam hveila izos; iþ biþe gabauran ist barn, ni þanaseiþs ni gaman þizos aglons faura fahedai, unte gabaurans warþ manna in fairhvau.

16:22 [CA] jah þan jus auk nu saurga habaiþ, iþ aftra saihva izwis jah faginoþ izwar hairto, jah þo fahed izwara ni ainshun nimiþ af izwis.

16:23 [CA] jah in jainamma daga mik ni fraihniþ waihtais. amen amen, qiþa izwis þatei þishvah þei bidjiþ attan in namin meinamma, gibiþ izwis.

16:24 [CA] und hita ni beduþ ni waihtais in namin meinamma; bidjaiþ jah nimiþ, ei faheþs izwara sijai usfullida.

16:25 [CA] þata in gajukom rodida izwis; akei qimiþ hveila, þanuh izwis ni þanaseiþs in gajukom rodja, ak andaugiba bi attan gateiha izwis.

16:26 [CA] in jainamma daga in namin meinamma bidjiþ, jah ni qiþa izwis þei ik bidjau attan bi izwis;

16:27 [CA] ak silba atta frijoþ izwis, unte jus mik frijodeduþ jah galaubideduþ þatei ik fram guda urrann.

16:28 [CA] uzuhiddja fram attin jah atiddja in þana fairhvu; aftra bileiþa þamma fairhvau jah gagga du attin.

16:29 [CA] þaruh qeþun þai siponjos is: sai, nu andaugiba rodeis jah gajukono ni ainohun qiþis.

16:30 [CA] nu witum ei þu kant alla, jah ni þarft ei þuk hvas fraihnai; bi þamma galaubjam þatei þu fram guda urrant.

16:31 [CA] andhof im Iesus: nu galaubeiþ?

16:32 [CA] sai, qimiþ hveila jah nu qam, ei distahjada hvarjizuh du seinaim, jah mik ainana bileiþiþ; jah ni im ains, unte atta miþ mis ist.

16:33 [CA] þata rodida izwis, þei in mis gawairþi aigeiþ. in þamma fairhvau aglons habaid; akei þrafsteiþ izwis, ik gajiukaida þana fairhvu.

17:1 [CA] Þata rodida Iesus uzuhhof augona seina du himina jah qaþ: atta, qam hveila, hauhei þeinana sunu, ei sunus þeins hauhjai þuk;

17:2 [CA] swaswe atgaft imma waldufni allaize leike, ei all þatei atgaft imma, gibai im libain aiweinon.

17:3 [CA] soh þan ist so aiweino libains, ei kunneina þuk ainana sunjana guþ jah þanei insandides, Iesu Xristu.

17:4 [CA] ik þuk hauhida ana airþai; waurstw ustauh þatei atgaft mis du waurkjan.

17:5 [CA] jah nu hauhei mik, þu atta, at þus silbin þamma wulþau, þanei habaida at þus, faurþizei sa fairhvus wesi.

17:6 [CA] gabairhtida þeinata namo mannam þanzei atgaft mis us þamma fairhvau. þeinai wesun jah mis atgaft ins, jah þata waurd þeinata gafastaidedun.

17:7 [CA] nu ufkunþa ei alla þoei atgaft mis, at þus sind;

17:8 [CA] unte þo waurda þoei atgaft mis, atgaf im, jah eis nemun bi sunjai þatei fram þus urrann, jah galaubidedun þatei þu mik insandides.

17:9 [CA] ik bi ins bidja; ni bi þo manaseþ bidja, ak bi þans þanzei atgaft mis, unte þeinai sind.

17:10 [CA] jah meina alla þeina sind jah þeina meina, jah hauhiþs im in þaim.

17:11 [CA] ni þanaseiþs im in þamma fairhvau; iþ þai in þamma fairhvau sind, jah ik du þus gagga. atta weiha, fastai ins in namin þeinamma, þanzei atgaft mis, ei sijaina ain swaswe wit.

17:12 [CA] þan was miþ im in þamma fairhvau, ik fastaida ins in namin þeinamma. þanzei atgaft mis gafastaida, jah ainshun us im ni fraqistnoda, niba sa sunus fralustais, ei þata gamelido usfulliþ waurþi.

17:13 [CA] iþ nu du þus gagga, jah þata rodja in manasedai, ei habaina fahed meina usfullida in sis.

17:14 [CA] ik atgaf im waurd þeinata; jah so manaseþs fijaida ins, unte ni sind us þamma fairhvau, swaswe ik us þamma fairhvau ni im.

17:15 [CA] ni bidja ei usnimais ins us þamma fairhvau, ak ei bairgais im faura þamma unseljin.

17:16 [CA] us þamma fairhvau ni sind, swaswe ik us þamma fairhvau ni im.

17:17 [CA] weihai ins in sunjai; waurd þeinata sunja ist.

17:18 [CA] swaswe mik insandides in manaseþ, swah ik insandida ins in þo manased.

17:19 [CA] jah fram im ik weiha mik silban, ei sijaina jah eis weihai in sunjai.

17:20 [CA] aþþan ni bi þans bidja ainans, ak bi þans galaubjandans þairh waurda ize du mis,

17:21 [CA] ei allai ain sijaina, swaswe þu, atta, in mis jah ik in þus, ei jah þai in uggkis ain sijaina, ei so manaseþs galaubjai þatei þu mik insandides.

17:22 [CA] jah ik wulþu þanei gaft mis, gaf im, ei sijaina ain, swaswe wit ain siju.

17:23 [CA] ik in im jah þu in mis, ei sijaina ustauhanai du ainamma, jah kunnei so manaseþs þatei þu mik insandides jah frijodes ins, swaswe mik frijodes.

17:24 [CA] atta, þatei atgaft mis, wiljau ei þarei im ik, jah þai sijaina miþ mis, ei saihvaina wulþu meinana þanei gaft mis, unte frijodes mik faur gaskaft fairhvaus.

17:25 [CA] atta garaihta, jah so manaseþs þuk ni ufkunþa; iþ ik þuk kunþa. jah þai ufkunþedun þatei þu mik insandides.

17:26 [CA] jah gakannida im namo þeinata jah kannja, ei friaþwa þoei frijodes mik, in im sijai jah ik in im.

18:1 [CA] Þata qiþands Iesus usiddja miþ siponjam seinaim ufar rinnon þo Kaidron, þarei was aurtigards, in þanei galaiþ Iesus jah siponjos is.

18:2 [CA] wissuh þan jah Iudas sa galewjands ina þana stad, þatei ufta gaïddja Iesus jainar miþ siponjam seinaim.

18:3 [CA] iþ Iudas nam hansa jah þize gudjane jah Fareisaie andbahtans, iddjuh jaindwairþs miþ skeimam jah haizam jah wepnam.

18:4 [CA] iþ Iesus witands alla þoei qemun ana ina, usgaggands ut qaþ im: hvana sokeiþ?

18:5 [CA] andhafjandans imma qeþun: Iesu, þana Nazoraiu. þaruh qaþ im Iesus: ik im. stoþuh þan jah Iudas sa lewjands ina miþ im.

18:6 [CA] þaruh swe qaþ im þatei ik im, galiþun ibukai jah gadrusun dalaþ.

18:7 [CA] þaþroh þan ins aftra frah: hvana sokeiþ? iþ eis qeþun: Iesu, þana Nazoraiu.

18:8 [CA] andhof Iesus: qaþ izwis þatei ik im; jabai nu mik sokeiþ, letiþ þans gaggan.

18:9 [CA] ei usfullnodedi þata waurd þatei qaþ, ei þanzei atgaft mis, ni fraqistida ize ainummehun.

18:10 [CA] iþ Seimon Paitrus habands hairu, uslauk ina jah sloh þis auhumistins gudjins skalk jah afmaimait imma auso taihswo; sah þan haitans was namin Malkus.

18:11 [CA] þaruh qaþ Iesus du Paitrau: lagei þana hairu in fodr. stikl þanei gaf mis atta, niu drigkau þana?

18:12 [CA] þaruh hansa jah sa þusundifaþs jah andbahtos Iudaie undgripun Iesu jah gabundun ina,

18:13 [CA] jah gatauhun ina du Annin frumist; sa was auk swaihra Kajafin, saei was auhumists weiha þis ataþnjis.

18:14 [CA] wasuh þan Kajafa, saei garaginoda Iudaium þatei batizo ist ainana mannan fraqistjan faur managein.

18:15 [CA] þaruh laistida Iesu Seimon Paitrus jah anþar siponeis. sah þan siponeis was kunþs þamma gudjin jah miþinngalaiþ miþ Iesua in rohsn þis gudjins.

18:16 [CA] iþ Paitrus stoþ at daurom uta. þaruh usiddja ut sa siponeis anþar, saei was kunþs þamma gudjin, jah qaþ daurawardai jah attauh inn Paitru.

18:17 [CA] þaruh qaþ jaina þiwi, so daurawardo, du Paitrau: ibai jah þu þize siponje is þis mans? iþ is qaþ: ni im.

18:18 [CA] þaruh stoþun skalkos jah andbahtos haurja waurkjandans, unte kald was, jah warmidedun sik; jah þan was miþ im Paitrus standands jah warmjands sik.

18:19 [CA] iþ sa auhumista gudja frah Iesu bi siponjans is jah bi laisein is.

18:20 [CA] andhof imma Iesus: ik andaugjo rodida manasedai; ik sinteino laisida in gaqumþai jah in gudhusa, þarei sinteino Iudaieis gaqimand, jah þiubjo ni rodida waiht.

18:21 [CA] hvis mik fraihnis? fraihn þans hausjandans hva rodidedjau du im; sai, þai witun þatei qaþ ik.

18:22 [CA] iþ þata qiþandin imma, sums andbahte standands gaf slah lofin Iesua qaþuh: swau andhafjis þamma reikistin gudjin?

18:23 [CA] andhof Iesus: jabai ubilaba rodida, weitwodei bi þata ubil, aiþþau jabai waila, duhve mik slahis?

18:24 [CA] þanuh insandida ina Annas gabundanana du Kajafin, þamma maistin gudjin.

18:25 [CA] iþ Seimon Paitrus was standands jah warmjands sik. þaruh qeþun du imma: niu jah þu þize siponje þis is? iþ is afaiaik jah qaþ: ne, ni im.

18:26 [CA] qaþ sums þize skalke þis maistins gudjins, sah niþjis was þammei afmaimait Paitrus auso: niu þuk sahv ik in aurtigarda miþ imma?

18:27 [CA] þaruh aftra afaiaik Paitrus, jah suns hana hrukida.

18:28 [CA] iþ eis tauhun Iesu fram Kajafin in praitoriaun. þanuh was maurgins. iþ eis ni iddjedun in praitoria, ei ni bisaulnodedeina, ak matidedeina pasxa.

18:29 [CA] þaruh atiddja ut Peilatus du im jah qaþ: hvo wrohe bairiþ ana þana mannan?

18:30 [CA] andhofun jah qeþun du imma: nih wesi sa ubiltojis, ni þau weis atgebeima þus ina.

18:31 [CA] þaruh qaþ im Peilatus: nimiþ ina jus jah bi witoda izwaramma stojiþ ina. iþ eis qeþunuh du imma Iudaieis: unsis ni skuld ist usqiman manne ainummehun.

18:32 [CA] ei waurd fraujins usfullnodedi, þatei qaþ, bandwjands hvileikamma dauþau skulda gaswiltan.

18:33 [CA] galaiþ in praitauria aftra Peilatus jah wopida Iesu qaþuh imma: þu is þiudans Iudaie?

18:34 [CA] andhof Iesus: abu þus silbin þu þata qiþis þau anþarai þus qeþun bi mik?

18:35 [CA] andhof Peilatus: waitei ik Iudaius im? so þiuda þeina jah gudjans anafulhun þuk mis; hva gatawides?

18:36 [CA] andhof Iesus: þiudangardi meina nist us þamma fairhvau; iþ us þamma fairhvau wesi meina þiudangardi, aiþþau andbahtos meinai usdaudidedeina, ei ni galewiþs wesjau Iudaium. iþ nu þiudangardi meina nist þaþro.

18:37 [CA] þaruh qaþ imma Peilatus: an nuh þiudans is þu? andhafjands Iesus : þu qiþis ei þiudans im ik. ik du þamma gabaurans im jah du þamma qam in þamma fairhvau ei weitwodjau sunjai. hvazuh saei ist sunjos, hauseiþ stibnos meinaizos.

18:38 [CA] þanuh qaþ imma Peilatus: hva ist so sunja! jah þata qiþands galaiþ ut du Iudaium jah qaþ im: ik ainohun fairino ni bigita in þamma.

18:39 [CA] iþ ist biuhti izwis ei ainana izwis fraletau in pasxa; wileidu nu ei fraletau izwis þana þiudan Iudaie?

18:40 [CA] iþ eis hropidedun aftra allai qiþandans: ne þana, ak Barabban; sah þan was sa Barabba waidedja.

19:1 [CA] Þanuh þan nam Peilatus Iesu jah usblaggw.

19:2 [CA] jah þai gadrauhteis uswundun wipja us þaurnum jah galagidedun imma ana haubid jah wastjai paurpurodai gawasidedun ina,

19:3 [CA] jah qeþun: hails þiudans Iudaie! jah gebun imma slahins lofin.

19:4 [CA] atiddja aftra ut Peilatus jah qaþ im: sai, attiuha izwis ina ut, ei witeiþ þatei in imma ni ainohun fairino bigat.

19:5 [CA] þaruh usiddja ut Iesus bairands þana þaurneinan waip jah þo paurpurodon wastja. jah qaþ im: sa ist sa manna.

19:6 [CA] þaruh biþe sehvun ina þai maistans gudjans jah andbahtos, hropidedun qiþandans: ushramei, ushramei ina! qaþ im Peilatus: nimiþ ina jus jah hramjiþ. iþ ik fairina in imma ni bigita.

19:7 [CA] andhofun imma Iudaieis: weis witoþ aihum, jah bi þamma witoda unsaramma skal gaswiltan, unte sik silban gudis sunu gatawida.

19:8 [CA] biþe gahausida Peilatus þata waurd, mais ohta sis.

19:9 [CA] jah galaiþ in praitauria aftra jah qaþ du Iesua: hvaþro is þu? iþ Iesus andawaurdi ni gaf imma.

19:10 [CA] þaruh qaþ imma Peilatus: du mis ni rodeis? niu waist þatei waldufni aih ushramjan þuk jah waldufni aih fraletan þuk?

19:11 [CA] andhof Iesus: ni aihtedeis waldufnje ainhun ana mik, nih wesi þus atgiban iupaþro; duhþe sa galewjands mik þus maizein frawaurht habaid.

19:12 [CA] Framuh þamma sokida Peilatus fraletan ina. iþ Iudaieis hropidedun qiþandans: jabai þana fraletis, ni is frijonds kaisara; sahvazuh izei þiudan sik silban taujiþ, andstandiþ kaisara.

19:13 [CA] þanuh Peilatus hausjands þize . . . .


Next: Romans