Sacred Texts  Bible  Index 
Polyglot  KJV  Sep  Vul 

2 Samuel (2 Shmuel) Index
  Previous  Next 

Tanach (Hebrew): 2 Samuel (2 Shmuel) Chapter 6

1 ‏וַיֹּ֨סֶף ע֥וֹד דָּוִ֛ד אֶת־כָּל־בָּח֥וּר בְּיִשְׂרָאֵ֖ל שְׁלֹשִׁ֥ים אָֽלֶף׃

2 ‏וַיָּ֣קָם׀ וַיֵּ֣לֶךְ דָּוִ֗ד וְכָל־הָעָם֙ אֲשֶׁ֣ר אִתּ֔וֹ מִֽבַּעֲלֵ֖י יְהוּדָ֑ה לְהַעֲל֣וֹת מִשָּׁ֗ם אֵ֚ת אֲר֣וֹן הָאֱלֹהִ֔ים אֲשֶׁר־נִקְרָ֣א שֵׁ֗ם שֵׁ֣ם יְהוָ֧ה צְבָא֛וֹת יֹשֵׁ֥ב הַכְּרֻבִ֖ים עָלָֽיו׃

3 ‏וַיַּרְכִּ֜בוּ אֶת־אֲר֤וֹן הָֽאֱלֹהִים֙ אֶל־עֲגָלָ֣ה חֲדָשָׁ֔ה וַיִּשָּׂאֻ֔הוּ מִבֵּ֥ית אֲבִינָדָ֖ב אֲשֶׁ֣ר בַּגִּבְעָ֑ה וְעֻזָּ֣א וְאַחְי֗וֹ בְּנֵי֙ אֲבִ֣ינָדָ֔ב נֹהֲגִ֖ים אֶת־הָעֲגָלָ֥ה חֲדָשָֽׁה׃

4 ‏וַיִּשָּׂאֻ֗הוּ מִבֵּ֤ית אֲבִֽינָדָב֙ אֲשֶׁ֣ר בַּגִּבְעָ֔ה עִ֖ם אֲר֣וֹן הָאֱלֹהִ֑ים וְאַחְי֕וֹ הֹלֵ֖ךְ לִפְנֵ֥י הָאָרֽוֹן׃

5 ‏וְדָוִ֣ד׀ וְכָל־בֵּ֣ית יִשְׂרָאֵ֗ל מְשַֽׂחֲקִים֙ לִפְנֵ֣י יְהוָ֔ה בְּכֹ֖ל עֲצֵ֣י בְרוֹשִׁ֑ים וּבְכִנֹּר֤וֹת וּבִנְבָלִים֙ וּבְתֻפִּ֔ים וּבִמְנַֽעַנְעִ֖ים וּֽבְצֶלְצֶלִֽים׃

6 ‏וַיָּבֹ֖אוּ עַד־גֹּ֣רֶן נָכ֑וֹן וַיִּשְׁלַ֨ח עֻזָּ֜א אֶל־אֲר֤וֹן הָֽאֱלֹהִים֙ וַיֹּ֣אחֶז בּ֔וֹ כִּ֥י שָׁמְט֖וּ הַבָּקָֽר׃

7 ‏וַיִּֽחַר־אַ֤ף יְהוָה֙ בְּעֻזָּ֔ה וַיַּכֵּ֥הוּ שָׁ֛ם הָאֱלֹהִ֖ים עַל־הַשַּׁ֑ל וַיָּ֣מָת שָׁ֔ם עִ֖ם אֲר֥וֹן הָאֱלֹהִֽים׃

8 ‏וַיִּ֣חַר לְדָוִ֔ד עַל֩ אֲשֶׁ֨ר פָּרַ֧ץ יְהוָ֛ה פֶּ֖רֶץ בְּעֻזָּ֑ה וַיִּקְרָ֞א לַמָּק֤וֹם הַהוּא֙ פֶּ֣רֶץ עֻזָּ֔ה עַ֖ד הַיּ֥וֹם הַזֶּֽה׃

9 ‏וַיִּרָ֥א דָוִ֛ד אֶת־יְהוָ֖ה בַּיּ֣וֹם הַה֑וּא וַיֹּ֕אמֶר אֵ֛יךְ יָב֥וֹא אֵלַ֖י אֲר֥וֹן יְהוָֽה׃

10 ‏וְלֹֽא־אָבָ֣ה דָוִ֗ד לְהָסִ֥יר אֵלָ֛יו אֶת־אֲר֥וֹן יְהוָ֖ה עַל־עִ֣יר דָּוִ֑ד וַיַּטֵּ֣הוּ דָוִ֔ד בֵּ֥ית עֹבֵֽד־אֱד֖וֹם הַגִּתִּֽי׃

11 ‏וַיֵּשֶׁב֩ אֲר֨וֹן יְהוָ֜ה בֵּ֣ית עֹבֵ֥ד אֱדֹ֛ם הַגִּתִּ֖י שְׁלֹשָׁ֣ה חֳדָשִׁ֑ים וַיְבָ֧רֶךְ יְהוָ֛ה אֶת־עֹבֵ֥ד אֱדֹ֖ם וְאֶת־כָּל־בֵּיתֽוֹ׃

12 ‏וַיֻּגַּ֗ד לַמֶּ֣לֶךְ דָּוִד֮ לֵאמֹר֒ בֵּרַ֣ךְ יְהוָ֗ה אֶת־בֵּ֨ית עֹבֵ֤ד אֱדֹם֙ וְאֶת־כָּל־אֲשֶׁר־ל֔וֹ בַּעֲב֖וּר אֲר֣וֹן הָאֱלֹהִ֑ים וַיֵּ֣לֶךְ דָּוִ֗ד וַיַּעַל֩ אֶת־אֲר֨וֹן הָאֱלֹהִ֜ים מִבֵּ֨ית עֹבֵ֥ד אֱדֹ֛ם עִ֥יר דָּוִ֖ד בְּשִׂמְחָֽה׃

13 ‏וַיְהִ֗י כִּ֧י צָעֲד֛וּ נֹשְׂאֵ֥י אֲרוֹן־יְהוָ֖ה שִׁשָּׁ֣ה צְעָדִ֑ים וַיִּזְבַּ֥ח שׁ֖וֹר וּמְרִֽיא׃

14 ‏וְדָוִ֛ד מְכַרְכֵּ֥ר בְּכָל־עֹ֖ז לִפְנֵ֣י יְהוָ֑ה וְדָוִ֕ד חָג֖וּר אֵפ֥וֹד בָּֽד׃

15 ‏וְדָוִד֙ וְכָל־בֵּ֣ית יִשְׂרָאֵ֔ל מַעֲלִ֖ים אֶת־אֲר֣וֹן יְהוָ֑ה בִּתְרוּעָ֖ה וּבְק֥וֹל שׁוֹפָֽר׃

16 ‏וְהָיָה֙ אֲר֣וֹן יְהוָ֔ה בָּ֖א עִ֣יר דָּוִ֑ד וּמִיכַ֨ל בַּת־שָׁא֜וּל נִשְׁקְפָ֣ה׀ בְּעַ֣ד הַחַלּ֗וֹן וַתֵּ֨רֶא אֶת־הַמֶּ֤לֶךְ דָּוִד֙ מְפַזֵּ֤ז וּמְכַרְכֵּר֙ לִפְנֵ֣י יְהוָ֔ה וַתִּ֥בֶז ל֖וֹ בְּלִבָּֽהּ׃

17 ‏וַיָּבִ֜אוּ אֶת־אֲר֣וֹן יְהוָ֗ה וַיַּצִּ֤גוּ אֹתוֹ֙ בִּמְקוֹמ֔וֹ בְּת֣וֹךְ הָאֹ֔הֶל אֲשֶׁ֥ר נָטָה־ל֖וֹ דָּוִ֑ד וַיַּ֨עַל דָּוִ֥ד עֹל֛וֹת לִפְנֵ֥י יְהוָ֖ה וּשְׁלָמִֽים׃

18 ‏וַיְכַ֣ל דָּוִ֔ד מֵהַעֲל֥וֹת הָעוֹלָ֖ה וְהַשְּׁלָמִ֑ים וַיְבָ֣רֶךְ אֶת־הָעָ֔ם בְּשֵׁ֖ם יְהוָ֥ה צְבָאֽוֹת׃

19 ‏וַיְחַלֵּ֨ק לְכָל־הָעָ֜ם לְכָל־הֲמ֣וֹן יִשְׂרָאֵל֮ לְמֵאִ֣ישׁ וְעַד־אִשָּׁה֒ לְאִ֗ישׁ חַלַּ֥ת לֶ֙חֶם֙ אַחַ֔ת וְאֶשְׁפָּ֣ר אֶחָ֔ד וַאֲשִׁישָׁ֖ה אֶחָ֑ת וַיֵּ֥לֶךְ כָּל־הָעָ֖ם אִ֥ישׁ לְבֵיתֽוֹ׃

20 ‏וַיָּ֥שָׁב דָּוִ֖ד לְבָרֵ֣ךְ אֶת־בֵּית֑וֹ וַתֵּצֵ֞א מִיכַ֤ל בַּת־שָׁאוּל֙ לִקְרַ֣את דָּוִ֔ד וַתֹּ֗אמֶר מַה־נִּכְבַּ֨ד הַיּ֜וֹם מֶ֣לֶךְ יִשְׂרָאֵ֗ל אֲשֶׁ֨ר נִגְלָ֤ה הַיּוֹם֙ לְעֵינֵ֨י אַמְה֣וֹת עֲבָדָ֔יו כְּהִגָּל֥וֹת נִגְל֖וֹת אַחַ֥ד הָרֵקִֽים׃

21 ‏וַיֹּ֣אמֶר דָּוִד֮ אֶל־מִיכַל֒ לִפְנֵ֣י יְהוָ֗ה אֲשֶׁ֨ר בָּֽחַר־בִּ֤י מֵֽאָבִיךְ֙ וּמִכָּל־בֵּית֔וֹ לְצַוֹּ֨ת אֹתִ֥י נָגִ֛יד עַל־עַ֥ם יְהוָ֖ה עַל־יִשְׂרָאֵ֑ל וְשִׂחַקְתִּ֖י לִפְנֵ֥י יְהוָֽה׃

22 ‏וּנְקַלֹּ֤תִי עוֹד֙ מִזֹּ֔את וְהָיִ֥יתִי שָׁפָ֖ל בְּעֵינָ֑י וְעִם־הָֽאֲמָהוֹת֙ אֲשֶׁ֣ר אָמַ֔רְתְּ עִמָּ֖ם אִכָּבֵֽדָה׃

23 ‏וּלְמִיכַל֙ בַּת־שָׁא֔וּל לֹֽא־הָ֥יָה לָ֖הּ יָ֑לֶד עַ֖ד3 י֥וֹם מוֹתָֽהּ׃ פ

1 wayyōsef ‘wōḏ dāwiḏ ’eṯ-kāl-bāḥûr bəyiśərā’ēl šəlōšîm ’ālef:

2 wayyāqām| wayyēleḵə dāwiḏ wəḵāl-hā‘ām ’ăšer ’itwō miba‘ălê yəhûḏâ ləha‘ălwōṯ miššām ’ēṯ ’ărwōn hā’ĕlōhîm ’ăšer-niqərā’ šēm šēm yəhwâ ṣəḇā’wōṯ yōšēḇ hakəruḇîm ‘ālāyw:

3 wayyarəkiḇû ’eṯ-’ărwōn hā’ĕlōhîm ’el-‘ăḡālâ ḥăḏāšâ wayyiśśā’uhû mibêṯ ’ăḇînāḏāḇ ’ăšer bagiḇə‘â wə‘uzzā’ wə’aḥəywō bənê ’ăḇînāḏāḇ nōhăḡîm ’eṯ-hā‘ăḡālâ ḥăḏāšâ:

4 wayyiśśā’uhû mibêṯ ’ăḇînāḏāḇ ’ăšer bagiḇə‘â ‘im ’ărwōn hā’ĕlōhîm wə’aḥəywō hōlēḵə lifənê hā’ārwōn:

5 wəḏāwiḏ| wəḵāl-bêṯ yiśərā’ēl məśaḥăqîm lifənê yəhwâ bəḵōl ‘ăṣê ḇərwōšîm ûḇəḵinnōrwōṯ ûḇinəḇālîm ûḇəṯupîm ûḇiməna‘anə‘îm ûḇəṣeləṣelîm:

6 wayyāḇō’û ‘aḏ-gōren nāḵwōn wayyišəlaḥ ‘uzzā’ ’el-’ărwōn hā’ĕlōhîm wayyō’ḥez bwō kî šāməṭû habāqār:

7 wayyiḥar-’af yəhwâ bə‘uzzâ wayyakēhû šām hā’ĕlōhîm ‘al-haššal wayyāmāṯ šām ‘im ’ărwōn hā’ĕlōhîm:

8 wayyiḥar ləḏāwiḏ ‘al ’ăšer pāraṣ yəhwâ pereṣ bə‘uzzâ wayyiqərā’ lammāqwōm hahû’ pereṣ ‘uzzâ ‘aḏ hayywōm hazzeh:

9 wayyirā’ ḏāwiḏ ’eṯ-yəhwâ bayywōm hahû’ wayyō’mer ’êḵə yāḇwō’ ’ēlay ’ărwōn yəhwâ:

10 wəlō’-’āḇâ ḏāwiḏ ləhāsîr ’ēlāyw ’eṯ-’ărwōn yəhwâ ‘al-‘îr dāwiḏ wayyaṭṭēhû ḏāwiḏ bêṯ ‘ōḇēḏ-’ĕḏwōm hagitî:

11 wayyēšeḇ ’ărwōn yəhwâ bêṯ ‘ōḇēḏ ’ĕḏōm hagitî šəlōšâ ḥŏḏāšîm wayəḇāreḵə yəhwâ ’eṯ-‘ōḇēḏ ’ĕḏōm wə’eṯ-kāl-bêṯwō:

12 wayyugaḏ lammeleḵə dāwiḏ lē’mōr bēraḵə yəhwâ ’eṯ-bêṯ ‘ōḇēḏ ’ĕḏōm wə’eṯ-kāl-’ăšer-lwō ba‘ăḇûr ’ărwōn hā’ĕlōhîm wayyēleḵə dāwiḏ wayya‘al ’eṯ-’ărwōn hā’ĕlōhîm mibêṯ ‘ōḇēḏ ’ĕḏōm ‘îr dāwiḏ bəśiməḥâ:

13 wayəhî kî ṣā‘ăḏû nōśə’ê ’ărwōn-yəhwâ šiššâ ṣə‘āḏîm wayyizəbaḥ šwōr ûmərî’:

14 wəḏāwiḏ məḵarəkēr bəḵāl-‘ōz lifənê yəhwâ wəḏāwiḏ ḥāḡûr ’ēfwōḏ bāḏ:

15 wəḏāwiḏ wəḵāl-bêṯ yiśərā’ēl ma‘ălîm ’eṯ-’ărwōn yəhwâ biṯərû‘â ûḇəqwōl šwōfār:

16 wəhāyâ ’ărwōn yəhwâ bā’ ‘îr dāwiḏ ûmîḵal baṯ-šā’ûl nišəqəfâ| bə‘aḏ haḥallwōn watēre’ ’eṯ-hammeleḵə dāwiḏ məfazzēz ûməḵarəkēr lifənê yəhwâ watiḇez lwō bəlibāh:

17 wayyāḇi’û ’eṯ-’ărwōn yəhwâ wayyaṣṣiḡû ’ōṯwō biməqwōmwō bəṯwōḵə hā’ōhel ’ăšer nāṭâ-lwō dāwiḏ wayya‘al dāwiḏ ‘ōlwōṯ lifənê yəhwâ ûšəlāmîm:

18 wayəḵal dāwiḏ mēha‘ălwōṯ hā‘wōlâ wəhaššəlāmîm wayəḇāreḵə ’eṯ-hā‘ām bəšēm yəhwâ ṣəḇā’wōṯ:

19 wayəḥallēq ləḵāl-hā‘ām ləḵāl-hămwōn yiśərā’ēl ləmē’îš wə‘aḏ-’iššâ lə’îš ḥallaṯ leḥem ’aḥaṯ wə’ešəpār ’eḥāḏ wa’ăšîšâ ’eḥāṯ wayyēleḵə kāl-hā‘ām ’îš ləḇêṯwō:

20 wayyāšāḇ dāwiḏ ləḇārēḵə ’eṯ-bêṯwō watēṣē’ mîḵal baṯ-šā’ûl liqəra’ṯ dāwiḏ watō’mer mah-nniḵəbaḏ hayywōm meleḵə yiśərā’ēl ’ăšer niḡəlâ hayywōm lə‘ênê ’aməhwōṯ ‘ăḇāḏāyw kəhigālwōṯ niḡəlwōṯ ’aḥaḏ hārēqîm:

21 wayyō’mer dāwiḏ ’el-mîḵal lifənê yəhwâ ’ăšer bāḥar-bî mē’āḇîḵə ûmikāl-bêṯwō ləṣaûōṯ ’ōṯî nāḡîḏ ‘al-‘am yəhwâ ‘al-yiśərā’ēl wəśiḥaqətî lifənê yəhwâ:

22 ûnəqallōṯî ‘wōḏ mizzō’ṯ wəhāyîṯî šāfāl bə‘ênāy wə‘im-hā’ămâwōṯ ’ăšer ’āmarətə ‘immām ’ikāḇēḏâ:

23 ûləmîḵal baṯ-šā’ûl lō’-hāyâ lāh yāleḏ ‘aḏ3 ywōm mwōṯāh: f


Next: 2 Samuel (2 Shmuel) Chapter 7