‎1 ‏וַיֹּ֤אמֶר דָּוִד֙ אֶל־לִבּ֔וֹ עַתָּ֛ה אֶסָּפֶ֥ה יוֹם־אֶחָ֖ד בְּיַד־שָׁא֑וּל אֵֽין־לִ֨י ט֜וֹב כִּ֣י הִמָּלֵ֥ט אִמָּלֵ֣ט׀ אֶל־אֶ֣רֶץ פְּלִשְׁתִּ֗ים וְנוֹאַ֨שׁ מִמֶּ֤נִּי שָׁאוּל֙ לְבַקְשֵׁ֤נִי עוֹד֙ בְּכָל־גְּב֣וּל יִשְׂרָאֵ֔ל וְנִמְלַטְתִּ֖י מִיָּדֽוֹ׃

‎2 ‏וַיָּ֣קָם דָּוִ֔ד וַיַּעֲבֹ֣ר ה֔וּא וְשֵׁשׁ־מֵא֥וֹת אִ֖ישׁ אֲשֶׁ֣ר עִמּ֑וֹ אֶל־אָכִ֥ישׁ בֶּן־מָע֖וֹךְ מֶ֥לֶךְ גַּֽת׃

‎3 ‏וַיֵּשֶׁב֩ דָּוִ֨ד עִם־אָכִ֥ישׁ בְּגַ֛ת ה֥וּא וַאֲנָשָׁ֖יו אִ֣ישׁ וּבֵית֑וֹ דָּוִד֙ וּשְׁתֵּ֣י נָשָׁ֔יו אֲחִינֹ֙עַם֙ הַיִּזְרְעֵאלִ֔ית וַאֲבִיגַ֥יִל אֵֽשֶׁת־נָבָ֖ל הַֽכַּרְמְלִֽית׃

‎4 ‏וַיֻּגַּ֣ד לְשָׁא֔וּל כִּֽי־בָרַ֥ח דָּוִ֖ד גַּ֑ת וְלֹֽא־יוסף יָסַ֥ף ע֖וֹד לְבַקְשֽׁוֹ׃ ס

‎5 ‏וַיֹּ֨אמֶר דָּוִ֜ד אֶל־אָכִ֗ישׁ אִם־נָא֩ מָצָ֨אתִי חֵ֤ן בְּעֵינֶ֙יךָ֙ יִתְּנוּ־לִ֣י מָק֗וֹם בְּאַחַ֛ת עָרֵ֥י הַשָּׂדֶ֖ה וְאֵ֣שְׁבָה שָּׁ֑ם וְלָ֨מָּה יֵשֵׁ֧ב עַבְדְּךָ֛ בְּעִ֥יר הַמַּמְלָכָ֖ה עִמָּֽךְ׃

‎6 ‏וַיִּתֶּן־ל֥וֹ אָכִ֛ישׁ בַּיּ֥וֹם הַה֖וּא אֶת־צִֽקְלָ֑ג לָכֵ֞ן הָיְתָ֤ה צִֽקְלַג֙ לְמַלְכֵ֣י יְהוּדָ֔ה עַ֖ד הַיּ֥וֹם הַזֶּֽה׃ פ

‎7 ‏וַֽיְהִי֙ מִסְפַּ֣ר הַיָּמִ֔ים אֲשֶׁר־יָשַׁ֥ב דָּוִ֖ד בִּשְׂדֵ֣ה פְלִשְׁתִּ֑ים יָמִ֖ים וְאַרְבָּעָ֥ה חֳדָשִֽׁים׃

‎8 ‏וַיַּ֤עַל דָּוִד֙ וַֽאֲנָשָׁ֔יו וַֽיִּפְשְׁט֛וּ אֶל־הַגְּשׁוּרִ֥י והגרזי וְהַגִּזְרִ֖י וְהָעֲמָלֵקִ֑י כִּ֣י הֵ֜נָּה יֹשְׁב֤וֹת הָאָ֙רֶץ֙ אֲשֶׁ֣ר מֵֽעוֹלָ֔ם בּוֹאֲךָ֥ שׁ֖וּרָה וְעַד־אֶ֥רֶץ מִצְרָֽיִם׃

‎9 ‏וְהִכָּ֤ה דָוִד֙ אֶת־הָאָ֔רֶץ וְלֹ֥א יְחַיֶּ֖ה אִ֣ישׁ וְאִשָּׁ֑ה וְלָקַח֩ צֹ֨אן וּבָקָ֜ר וַחֲמֹרִ֤ים וּגְמַלִּים֙ וּבְגָדִ֔ים וַיָּ֖שָׁב וַיָּבֹ֥א אֶל־אָכִֽישׁ׃

‎10 ‏וַיֹּ֣אמֶר אָכִ֔ישׁ אַל־פְּשַׁטְתֶּ֖ם הַיּ֑וֹם וַיֹּ֣אמֶר דָּוִ֗ד עַל־נֶ֤גֶב יְהוּדָה֙ וְעַל־נֶ֣גֶב הַיַּרְחְמְאֵלִ֔י וְאֶל־נֶ֖גֶב הַקֵּינִֽי׃

‎11 ‏וְאִ֨ישׁ וְאִשָּׁ֜ה לֹֽא־יְחַיֶּ֣ה דָוִ֗ד לְהָבִ֥יא גַת֙ לֵאמֹ֔ר פֶּן־יַגִּ֥דוּ עָלֵ֖ינוּ לֵאמֹ֑ר כֹּֽה־עָשָׂ֤ה דָוִד֙ וְכֹ֣ה מִשְׁפָּט֔וֹ כָּל־הַ֨יָּמִ֔ים אֲשֶׁ֥ר יָשַׁ֖ב בִּשְׂדֵ֥ה פְלִשְׁתִּֽים׃

‎12 ‏וַיַּאֲמֵ֥ן אָכִ֖ישׁ בְּדָוִ֣ד לֵאמֹ֑ר הַבְאֵ֤שׁ הִבְאִישׁ֙ בְּעַמּ֣וֹ בְיִשְׂרָאֵ֔ל וְהָ֥יָה לִ֖י לְעֶ֥בֶד עוֹלָֽם׃ פ

1 wayyō’mer dāwiḏ ’el-libwō ‘atâ ’essāfeh ywōm-’eḥāḏ bəyaḏ-šā’ûl ’ên-lî ṭwōḇ kî himmālēṭ ’immālēṭ| ’el-’ereṣ pəlišətîm wənwō’aš mimmennî šā’ûl ləḇaqəšēnî ‘wōḏ bəḵāl-gəḇûl yiśərā’ēl wəniməlaṭətî mîyāḏwō:

2 wayyāqām dāwiḏ wayy^a‘ăḇōr hû’ wəšēš-mē’wōṯ ’îš ’ăšer ‘immwō ’el-’āḵîš ben-mā‘wōḵə meleḵə gaṯ:

3 wayyēšeḇ dāwiḏ ‘im-’āḵîš bəḡaṯ hû’ wa’ănāšāyw ’îš ûḇêṯwō dāwiḏ ûšətê nāšāyw ’ăḥînō‘am hayyizərə‘ē’lîṯ wa’ăḇîḡayil ’ēšeṯ-nāḇāl hakarəməlîṯ:

4 wayyugaḏ ləšā’ûl kî-ḇār^aḥ dāwiḏ gaṯ wəlō’-ywōsēf yāsaf ‘wōḏ ləḇaqəšwō: s

5 wayyō’mer dāwiḏ ’el-’āḵîš ’im-nā’ māṣā’ṯî ḥēn bə‘êneyḵā yitənû-lî māqwōm bə’^aḥaṯ ‘ārê haśśāḏeh wə’ēšəḇâ ššām wəlāmmâ yēšēḇ ‘aḇədəḵā bə‘îr hammaməlāḵâ ‘immāḵə:

6 wayyiten-lwō ’āḵîš bayywōm hahû’ ’eṯ-ṣiqəlāḡ lāḵēn hāyəṯâ ṣiqəlaḡ ləmaləḵê yəhûḏâ ‘aḏ hayywōm hazzeh: f

7 wayəhî misəpar hayyāmîm ’ăšer-yāšaḇ dāwiḏ biśəḏēh fəlišətîm yāmîm wə’arəbā‘â ḥŏḏāšîm:

8 wayy^a‘al dāwiḏ wa’ănāšāyw wayyifəšəṭû ’el-hagəšûrî wəhagirəzî wəhagizərî wəhā‘ămālēqî kî hēnnâ yōšəḇwōṯ hā’āreṣ ’ăšer mē‘wōlām bwō’ăḵā šûrâ wə‘aḏ-’ereṣ miṣərāyim:

9 wəhikâ ḏāwiḏ ’eṯ-hā’āreṣ wəlō’ yəḥayyeh ’îš wə’iššâ wəlāq^aḥ ṣō’n ûḇāqār w^aḥămōrîm ûḡəmallîm ûḇəḡāḏîm wayyāšāḇ wayyāḇō’ ’el-’āḵîš:

10 wayyō’mer ’āḵîš ’al-pəšaṭətem hayywōm wayyō’mer dāwiḏ ‘al-neḡeḇ yəhûḏâ wə‘al-neḡeḇ hayyarəḥəmə’ēlî wə’el-neḡeḇ haqqênî:

11 wə’îš wə’iššâ lō’-yəḥayyeh ḏāwiḏ ləhāḇî’ ḡaṯ lē’mōr pen-yagiḏû ‘ālênû lē’mōr kōh-‘āśâ ḏāwiḏ wəḵōh mišəpāṭwō kāl-hayyāmîm ’ăšer yāšaḇ biśəḏēh fəlišətîm:

12 wayya’ămēn ’āḵîš bəḏāwiḏ lē’mōr haḇə’ēš hiḇə’îš bə‘ammwō ḇəyiśərā’ēl wəhāyâ lî lə‘eḇeḏ ‘wōlām: f