‎1 ‏וַיֹּ֨אמֶר יְהוָ֜ה אֶל־שְׁמוּאֵ֗ל עַד־מָתַי֙ אַתָּה֙ מִתְאַבֵּ֣ל אֶל־שָׁא֔וּל וַאֲנִ֣י מְאַסְתִּ֔יו מִמְּלֹ֖ךְ עַל־יִשְׂרָאֵ֑ל מַלֵּ֨א קַרְנְךָ֜ שֶׁ֗מֶן וְלֵ֤ךְ אֶֽשְׁלָחֲךָ֙ אֶל־יִשַׁ֣י בֵּֽית־הַלַּחְמִ֔י כִּֽי־רָאִ֧יתִי בְּבָנָ֛יו לִ֖י מֶֽלֶךְ׃

‎2 ‏וַיֹּ֤אמֶר שְׁמוּאֵל֙ אֵ֣יךְ אֵלֵ֔ךְ וְשָׁמַ֥ע שָׁא֖וּל וַהֲרָגָ֑נִי סוַיֹּ֣אמֶר יְהוָ֗ה עֶגְלַ֤ת בָּקָר֙ תִּקַּ֣ח בְּיָדֶ֔ךָ וְאָ֣מַרְתָּ֔ לִזְבֹּ֥חַ לַֽיהוָ֖ה בָּֽאתִי׃

‎3 ‏וְקָרָ֥אתָ לְיִשַׁ֖י בַּזָּ֑בַח וְאָֽנֹכִ֗י אוֹדִֽיעֲךָ֙ אֵ֣ת אֲשֶֽׁר־תַּעֲשֶׂ֔ה וּמָשַׁחְתָּ֣ לִ֔י אֵ֥ת אֲשֶׁר־אֹמַ֖ר אֵלֶֽיךָ׃

‎4 ‏וַיַּ֣עַשׂ שְׁמוּאֵ֗ל אֵ֚ת אֲשֶׁ֣ר דִּבֶּ֣ר יְהוָ֔ה וַיָּבֹ֖א בֵּ֣ית לָ֑חֶם וַיֶּחֶרְד֞וּ זִקְנֵ֤י הָעִיר֙ לִקְרָאת֔וֹ וַיֹּ֖אמֶר שָׁלֹ֥ם בּוֹאֶֽךָ׃

‎5 ‏וַיֹּ֣אמֶר׀ שָׁל֗וֹם לִזְבֹּ֤חַ לַֽיהוָה֙ בָּ֔אתִי הִֽתְקַדְּשׁ֔וּ וּבָאתֶ֥ם אִתִּ֖י בַּזָּ֑בַח וַיְקַדֵּ֤שׁ אֶת־יִשַׁי֙ וְאֶת־בָּנָ֔יו וַיִּקְרָ֥א לָהֶ֖ם לַזָּֽבַח׃

‎6 ‏וַיְהִ֣י בְּבוֹאָ֔ם וַיַּ֖רְא אֶת־אֱלִיאָ֑ב וַיֹּ֕אמֶר אַ֛ךְ נֶ֥גֶד יְהוָ֖ה מְשִׁיחֽוֹ׃

‎7 ‏וַיֹּ֨אמֶר יְהוָ֜ה אֶל־שְׁמוּאֵ֗ל אַל־תַּבֵּ֧ט אֶל־מַרְאֵ֛הוּ וְאֶל־גְּבֹ֥הַּ קוֹמָת֖וֹ כִּ֣י מְאַסְתִּ֑יהוּ כִּ֣י׀ לֹ֗א אֲשֶׁ֤ר יִרְאֶה֙ הָאָדָ֔ם כִּ֤י הָֽאָדָם֙ יִרְאֶ֣ה לַעֵינַ֔יִם וַיהוָ֖ה יִרְאֶ֥ה לַלֵּבָֽב׃

‎8 ‏וַיִּקְרָ֤א יִשַׁי֙ אֶל־אֲבִ֣ינָדָ֔ב וַיַּעֲבִרֵ֖הוּ לִפְנֵ֣י שְׁמוּאֵ֑ל וַיֹּ֕אמֶר גַּם־בָּזֶ֖ה לֹֽא־בָחַ֥ר יְהוָֽה׃

‎9 ‏וַיַּעֲבֵ֥ר יִשַׁ֖י שַׁמָּ֑ה וַיֹּ֕אמֶר גַּם־בָּזֶ֖ה לֹא־בָחַ֥ר יְהוָֽה׃

‎10 ‏וַיַּעֲבֵ֥ר יִשַׁ֛י שִׁבְעַ֥ת בָּנָ֖יו לִפְנֵ֣י שְׁמוּאֵ֑ל וַיֹּ֤אמֶר שְׁמוּאֵל֙ אֶל־יִשַׁ֔י לֹא־בָחַ֥ר יְהוָ֖ה בָּאֵֽלֶּה׃

‎11 ‏וַיֹּ֨אמֶר שְׁמוּאֵ֣ל אֶל־יִשַׁי֮ הֲתַ֣מּוּ הַנְּעָרִים֒ וַיֹּ֗אמֶר ע֚וֹד שָׁאַ֣ר הַקָּטָ֔ן וְהִנֵּ֥ה רֹעֶ֖ה בַּצֹּ֑אן וַיֹּ֨אמֶר שְׁמוּאֵ֤ל אֶל־יִשַׁי֙ שִׁלְחָ֣ה וְקָחֶ֔נּוּ כִּ֥י לֹא־נָסֹ֖ב עַד־בֹּא֥וֹ פֹֽה׃

‎12 ‏וַיִּשְׁלַ֤ח וַיְבִיאֵ֙הוּ֙ וְה֣וּא אַדְמוֹנִ֔י עִם־יְפֵ֥ה עֵינַ֖יִם וְט֣וֹב רֹ֑אִי פוַיֹּ֧אמֶר יְהוָ֛ה ק֥וּם מְשָׁחֵ֖הוּ כִּֽי־זֶ֥ה הֽוּא׃

‎13 ‏וַיִּקַּ֨ח שְׁמוּאֵ֜ל אֶת־קֶ֣רֶן הַשֶּׁ֗מֶן וַיִּמְשַׁ֣ח אֹתוֹ֮ בְּקֶ֣רֶב אֶחָיו֒ וַתִּצְלַ֤ח רֽוּחַ־יְהוָה֙ אֶל־דָּוִ֔ד מֵהַיּ֥וֹם הַה֖וּא וָמָ֑עְלָה וַיָּ֣קָם שְׁמוּאֵ֔ל וַיֵּ֖לֶךְ הָרָמָֽתָה׃ ס

‎14 ‏וְר֧וּחַ יְהוָ֛ה סָ֖רָה מֵעִ֣ם שָׁא֑וּל וּבִֽעֲתַ֥תּוּ רֽוּחַ־רָעָ֖ה מֵאֵ֥ת יְהוָֽה׃

‎15 ‏וַיֹּאמְר֥וּ עַבְדֵֽי־שָׁא֖וּל אֵלָ֑יו הִנֵּה־נָ֧א רֽוּחַ־אֱלֹהִ֛ים רָעָ֖ה מְבַעִתֶּֽךָ׃

‎16 ‏יֹאמַר־נָ֤א אֲדֹנֵ֙נוּ֙ עֲבָדֶ֣יךָ לְפָנֶ֔יךָ יְבַקְשׁ֕וּ אִ֕ישׁ יֹדֵ֖עַ מְנַגֵּ֣ן בַּכִּנּ֑וֹר וְהָיָ֗ה בִּֽהְי֨וֹת עָלֶ֤יךָ רֽוּחַ־אֱלֹהִים֙ רָעָ֔ה וְנִגֵּ֥ן בְּיָד֖וֹ וְט֥וֹב לָֽךְ׃ פ

‎17 ‏וַיֹּ֥אמֶר שָׁא֖וּל אֶל־עֲבָדָ֑יו רְאוּ־נָ֣א לִ֗י אִ֚ישׁ מֵיטִ֣יב לְנַגֵּ֔ן וַהֲבִיאוֹתֶ֖ם אֵלָֽי׃

‎18 ‏וַיַּעַן֩ אֶחָ֨ד מֵהַנְּעָרִ֜ים וַיֹּ֗אמֶר הִנֵּ֨ה רָאִ֜יתִי בֵּ֣ן לְיִשַׁי֮ בֵּ֣ית הַלַּחְמִי֒ יֹדֵ֣עַ נַ֠גֵּן וְגִבּ֨וֹר חַ֜יִל וְאִ֧ישׁ מִלְחָמָ֛ה וּנְב֥וֹן דָּבָ֖ר וְאִ֣ישׁ תֹּ֑אַר וַיהוָ֖ה עִמּֽוֹ׃

‎19 ‏וַיִּשְׁלַ֥ח שָׁא֛וּל מַלְאָכִ֖ים אֶל־יִשָׁ֑י וַיֹּ֕אמֶר שִׁלְחָ֥ה אֵלַ֛י אֶת־דָּוִ֥ד בִּנְךָ֖ אֲשֶׁ֥ר בַּצֹּֽאן׃

‎20 ‏וַיִּקַּ֨ח יִשַׁ֜י חֲמ֥וֹר לֶ֙חֶם֙ וְנֹ֣אד יַ֔יִן וּגְדִ֥י עִזִּ֖ים אֶחָ֑ד וַיִּשְׁלַ֛ח בְּיַד־דָּוִ֥ד בְּנ֖וֹ אֶל־שָׁאֽוּל׃

‎21 ‏וַיָּבֹ֤א דָוִד֙ אֶל־שָׁא֔וּל וַֽיַּעֲמֹ֖ד לְפָנָ֑יו וַיֶּאֱהָבֵ֣הֽוּ מְאֹ֔ד וַֽיְהִי־ל֖וֹ נֹשֵׂ֥א כֵלִֽים׃

‎22 ‏וַיִּשְׁלַ֣ח שָׁא֔וּל אֶל־יִשַׁ֖י לֵאמֹ֑ר יַעֲמָד־נָ֤א דָוִד֙ לְפָנַ֔י כִּֽי־מָ֥צָא חֵ֖ן בְּעֵינָֽי׃

‎23 ‏וְהָיָ֗ה בִּֽהְי֤וֹת רֽוּחַ־אֱלֹהִים֙ אֶל־שָׁא֔וּל וְלָקַ֥ח דָּוִ֛ד אֶת־הַכִּנּ֖וֹר וְנִגֵּ֣ן בְּיָד֑וֹ וְרָוַ֤ח לְשָׁאוּל֙ וְט֣וֹב ל֔וֹ וְסָ֥רָה מֵעָלָ֖יו ר֥וּחַ הָרָעָֽה׃ פ

1 wayyō’mer yəhwâ ’el-šəmû’ēl ‘aḏ-māṯay ’atâ miṯə’abēl ’el-šā’ûl wa’ănî mə’asətîw mimməlōḵə ‘al-yiśərā’ēl mallē’ qarənəḵā šemen wəlēḵə ’ešəlāḥăḵā ’el-yišay bêṯ-hall^aḥəmî kî-rā’îṯî bəḇānāyw lî meleḵə:

2 wayyō’mer šəmû’ēl ’êḵə ’ēlēḵə wəšām^a‘ šā’ûl wahărāḡānî swayyō’mer yəhwâ ‘eḡəlaṯ bāqār tiqq^aḥ bəyāḏeḵā wə’āmarətā lizəbōḥa layhwâ bā’ṯî:

3 wəqārā’ṯā ləyišay bazzāḇ^aḥ wə’ānōḵî ’wōḏî‘ăḵā ’ēṯ ’ăšer-t^a‘ăśeh ûmāš^aḥətā lî ’ēṯ ’ăšer-’ōmar ’ēleyḵā:

4 wayy^a‘aś šəmû’ēl ’ēṯ ’ăšer diber yəhwâ wayyāḇō’ bêṯ lāḥem wayyeḥerəḏû ziqənê hā‘îr liqərā’ṯwō wayyō’mer šālōm bwō’eḵā:

5 wayyō’mer| šālwōm lizəbōḥa layhwâ bā’ṯî hiṯəqadəšû ûḇā’ṯem ’itî bazzāḇ^aḥ wayəqadēš ’eṯ-yišay wə’eṯ-bānāyw wayyiqərā’ lâem lazzāḇ^aḥ:

6 wayəhî bəḇwō’ām wayyarə’ ’eṯ-’ĕlî’āḇ wayyō’mer ’aḵə neḡeḏ yəhwâ məšîḥwō:

7 wayyō’mer yəhwâ ’el-šəmû’ēl ’al-tabēṭ ’el-marə’ēhû wə’el-gəḇōhha qwōmāṯwō kî mə’asətîhû kî| lō’ ’ăšer yirə’eh hā’āḏām kî hā’āḏām yirə’eh l^a‘ênayim wayhwâ yirə’eh lallēḇāḇ:

8 wayyiqərā’ yišay ’el-’ăḇînāḏāḇ wayy^a‘ăḇirēhû lifənê šəmû’ēl wayyō’mer gam-bāzeh lō’-ḇāḥar yəhwâ:

9 wayy^a‘ăḇēr yišay šammâ wayyō’mer gam-bāzeh lō’-ḇāḥar yəhwâ:

10 wayy^a‘ăḇēr yišay šiḇə‘aṯ bānāyw lifənê šəmû’ēl wayyō’mer šəmû’ēl ’el-yišay lō’-ḇāḥar yəhwâ bā’ēlleh:

11 wayyō’mer šəmû’ēl ’el-yišay hăṯammû hannə‘ārîm wayyō’mer ‘wōḏ šā’ar haqqāṭān wəhinnēh rō‘eh baṣṣō’n wayyō’mer šəmû’ēl ’el-yišay šiləḥâ wəqāḥennû kî lō’-nāsōḇ ‘aḏ-bō’wō fōh:

12 wayyišəl^aḥ wayəḇî’ēhû wəhû’ ’aḏəmwōnî ‘im-yəfēh ‘ênayim wəṭwōḇ rō’î fwayyō’mer yəhwâ qûm məšāḥēhû kî-zeh hû’:

13 wayyiqq^aḥ šəmû’ēl ’eṯ-qeren haššemen wayyiməš^aḥ ’ōṯwō bəqereḇ ’eḥāyw watiṣəl^aḥ rûḥa-yəhwâ ’el-dāwiḏ mēhayywōm hahû’ wāmā‘əlâ wayyāqām šəmû’ēl wayyēleḵə hārāmāṯâ: s

14 wərûḥa yəhwâ sārâ mē‘im šā’ûl ûḇi‘ăṯatû rûḥa-rā‘â mē’ēṯ yəhwâ:

15 wayyō’mərû ‘aḇəḏê-šā’ûl ’ēlāyw hinnēh-nā’ rûḥa-’ĕlōhîm rā‘â məḇ^a‘iteḵā:

16 yō’mar-nā’ ’ăḏōnēnû ‘ăḇāḏeyḵā ləfāneyḵā yəḇaqəšû ’îš yōḏē‘a mənagēn bakinnwōr wəhāyâ bihəywōṯ ‘āleyḵā rûḥa-’ĕlōhîm rā‘â wənigēn bəyāḏwō wəṭwōḇ lāḵə: f

17 wayyō’mer šā’ûl ’el-‘ăḇāḏāyw rə’û-nā’ lî ’îš mêṭîḇ lənagēn wahăḇî’wōṯem ’ēlāy:

18 wayy^a‘an ’eḥāḏ mēhannə‘ārîm wayyō’mer hinnēh rā’îṯî bēn ləyišay bêṯ hall^aḥəmî yōḏē‘a nagēn wəḡibwōr ḥayil wə’îš miləḥāmâ ûnəḇwōn dāḇār wə’îš tō’ar wayhwâ ‘immwō:

19 wayyišəl^aḥ šā’ûl malə’āḵîm ’el-yišāy wayyō’mer šiləḥâ ’ēlay ’eṯ-dāwiḏ binəḵā ’ăšer baṣṣō’n:

20 wayyiqq^aḥ yišay ḥămwōr leḥem wənō’ḏ yayin ûḡəḏî ‘izzîm ’eḥāḏ wayyišəl^aḥ bəyaḏ-dāwiḏ bənwō ’el-šā’ûl:

21 wayyāḇō’ ḏāwiḏ ’el-šā’ûl wayy^a‘ămōḏ ləfānāyw wayye’ĕhāḇēhû mə’ōḏ wayəhî-lwō nōśē’ ḵēlîm:

22 wayyišəl^aḥ šā’ûl ’el-yišay lē’mōr y^a‘ămāḏ-nā’ ḏāwiḏ ləfānay kî-māṣā’ ḥēn bə‘ênāy:

23 wəhāyâ bihəywōṯ rûḥa-’ĕlōhîm ’el-šā’ûl wəlāq^aḥ dāwiḏ ’eṯ-hakinnwōr wənigēn bəyāḏwō wərāw^aḥ ləšā’ûl wəṭwōḇ lwō wəsārâ mē‘ālāyw rûḥa hārā‘â: f