‎1 ‏אַ֣לְלַי לִ֗י כִּ֤י הָיִ֙יתִי֙ כְּאָסְפֵּי־קַ֔יִץ כְּעֹלְלֹ֖ת בָּצִ֑יר אֵין־אֶשְׁכּ֣וֹל לֶאֱכ֔וֹל בִּכּוּרָ֖ה אִוְּתָ֥ה נַפְשִֽׁי׃

‎2 ‏אָבַ֤ד חָסִיד֙ מִן־הָאָ֔רֶץ וְיָשָׁ֥ר בָּאָדָ֖ם אָ֑יִן כֻּלָּם֙ לְדָמִ֣ים יֶאֱרֹ֔בוּ אִ֥ישׁ אֶת־אָחִ֖יהוּ יָצ֥וּדוּ חֵֽרֶם׃

‎3 ‏עַל־הָרַ֤ע כַּפַּ֙יִם֙ לְהֵיטִ֔יב הַשַּׂ֣ר שֹׁאֵ֔ל וְהַשֹּׁפֵ֖ט בַּשִּׁלּ֑וּם וְהַגָּד֗וֹל דֹּבֵ֨ר הַוַּ֥ת נַפְשׁ֛וֹ ה֖וּא וַֽיְעַבְּתֽוּהָ׃

‎4 ‏טוֹבָ֣ם כְּחֵ֔דֶק יָשָׁ֖ר מִמְּסוּכָ֑ה י֤וֹם מְצַפֶּ֙יךָ֙ פְּקֻדָּתְךָ֣ בָ֔אָה עַתָּ֥ה תִהְיֶ֖ה מְבוּכָתָֽם׃

‎5 ‏אַל־תַּאֲמִ֣ינוּ בְרֵ֔עַ אַֽל־תִּבְטְח֖וּ בְּאַלּ֑וּף מִשֹּׁכֶ֣בֶת חֵיקֶ֔ךָ שְׁמֹ֖ר פִּתְחֵי־פִֽיךָ׃

‎6 ‏כִּֽי־בֵן֙ מְנַבֵּ֣ל אָ֔ב בַּ֚ת קָמָ֣ה בְאִמָּ֔הּ כַּלָּ֖ה בַּחֲמֹתָ֑הּ אֹיְבֵ֥י אִ֖ישׁ אַנְשֵׁ֥י בֵיתֽוֹ׃

‎7 ‏וַאֲנִי֙ בַּיהוָ֣ה אֲצַפֶּ֔ה אוֹחִ֖ילָה לֵאלֹהֵ֣י יִשְׁעִ֑י יִשְׁמָעֵ֖נִי אֱלֹהָֽי׃

‎8 ‏אַֽל־תִּשְׂמְחִ֤י אֹיַ֙בְתִּי֙ לִ֔י כִּ֥י נָפַ֖לְתִּי קָ֑מְתִּי כִּֽי־אֵשֵׁ֣ב בַּחֹ֔שֶׁךְ יְהוָ֖ה א֥וֹר לִֽי׃ ס

‎9 ‏זַ֤עַף יְהוָה֙ אֶשָּׂ֔א כִּ֥י חָטָ֖אתִי ל֑וֹ עַד֩ אֲשֶׁ֨ר יָרִ֤יב רִיבִי֙ וְעָשָׂ֣ה מִשְׁפָּטִ֔י יוֹצִיאֵ֣נִי לָא֔וֹר אֶרְאֶ֖ה בְּצִדְקָתֽוֹ׃

‎10 ‏וְתֵרֶ֤א אֹיַ֙בְתִּי֙ וּתְכַסֶּ֣הָ בוּשָׁ֔ה הָאֹמְרָ֣ה אֵלַ֔י אַיּ֖וֹ יְהוָ֣ה אֱלֹהָ֑יִךְ עֵינַי֙ תִּרְאֶ֣ינָּה בָּ֔הּ עַתָּ֛ה תִּֽהְיֶ֥ה לְמִרְמָ֖ס כְּטִ֥יט חוּצֽוֹת׃

‎11 ‏י֖וֹם לִבְנ֣וֹת גְּדֵרָ֑יִךְ י֥וֹם הַה֖וּא יִרְחַק־חֹֽק׃

‎12 ‏י֥וֹם הוּא֙ וְעָדֶ֣יךָ יָב֔וֹא לְמִנִּ֥י אַשּׁ֖וּר וְעָרֵ֣י מָצ֑וֹר וּלְמִנִּ֤י מָצוֹר֙ וְעַד־נָהָ֔ר וְיָ֥ם מִיָּ֖ם וְהַ֥ר הָהָֽר׃

‎13 ‏וְהָיְתָ֥ה הָאָ֛רֶץ לִשְׁמָמָ֖ה עַל־יֹֽשְׁבֶ֑יהָ מִפְּרִ֖י מַֽעַלְלֵיהֶֽם׃ ס

‎14 ‏רְעֵ֧ה עַמְּךָ֣ בְשִׁבְטֶ֗ךָ צֹ֚אן נַֽחֲלָתֶ֔ךָ שֹׁכְנִ֣י לְבָדָ֔ד יַ֖עַר בְּת֣וֹךְ כַּרְמֶ֑ל יִרְע֥וּ בָשָׁ֛ן וְגִלְעָ֖ד כִּימֵ֥י עוֹלָֽם׃

‎15 ‏כִּימֵ֥י צֵאתְךָ֖ מֵאֶ֣רֶץ מִצְרָ֑יִם אַרְאֶ֖נּוּ נִפְלָאֽוֹת׃

‎16 ‏יִרְא֤וּ גוֹיִם֙ וְיֵבֹ֔שׁוּ מִכֹּ֖ל גְּבֽוּרָתָ֑ם יָשִׂ֤ימוּ יָד֙ עַל־פֶּ֔ה אָזְנֵיהֶ֖ם תֶּחֱרַֽשְׁנָה׃

‎17 ‏יְלַחֲכ֤וּ עָפָר֙ כַּנָּחָ֔שׁ כְּזֹחֲלֵ֣י אֶ֔רֶץ יִרְגְּז֖וּ מִמִּסְגְּרֹֽתֵיהֶ֑ם אֶל־יְהוָ֤ה אֱלֹהֵ֙ינוּ֙ יִפְחָ֔דוּ וְיִֽרְא֖וּ מִמֶּֽךָּ׃

‎18 ‏מִי־אֵ֣ל כָּמ֗וֹךָ נֹשֵׂ֤א עָוֹן֙ וְעֹבֵ֣ר עַל־פֶּ֔שַׁע לִשְׁאֵרִ֖ית נַחֲלָת֑וֹ לֹא־הֶחֱזִ֤יק לָעַד֙ אַפּ֔וֹ כִּֽי־חָפֵ֥ץ חֶ֖סֶד הֽוּא׃

‎19 ‏יָשׁ֣וּב יְרַֽחֲמֵ֔נוּ יִכְבֹּ֖שׁ עֲוֹֽנֹתֵ֑ינוּ וְתַשְׁלִ֛יךְ בִּמְצֻל֥וֹת יָ֖ם כָּל־חַטֹּאותָֽם׃

‎20 ‏תִּתֵּ֤ן אֱמֶת֙ לְיַֽעֲקֹ֔ב חֶ֖סֶד לְאַבְרָהָ֑ם אֲשֶׁר־נִשְׁבַּ֥עְתָּ לַאֲבֹתֵ֖ינוּ מִ֥ימֵי קֶֽדֶם׃

1 ’aləlay lî kî hāyîṯî kə’āsəpê-qayiṣ kə‘ōləlōṯ bāṣîr ’ên-’ešəkwōl le’ĕḵwōl bikûrâ ’iûəṯâ nafəšî:

2 ’āḇaḏ ḥāsîḏ min-hā’āreṣ wəyāšār bā’āḏām ’āyin kullām ləḏāmîm ye’ĕrōḇû ’îš ’eṯ-’āḥîhû yāṣûḏû ḥērem:

3 ‘al-hār^a‘ kapayim ləhêṭîḇ haśśar šō’ēl wəhaššōfēṭ baššillûm wəhagāḏwōl dōḇēr haûaṯ nafəšwō hû’ wayə‘abəṯûhā:

4 ṭwōḇām kəḥēḏeq yāšār mimməsûḵâ ywōm məṣapeyḵā pəqudāṯəḵā ḇā’â ‘atâ ṯihəyeh məḇûḵāṯām:

5 ’al-ta’ămînû ḇərē‘a ’al-tiḇəṭəḥû bə’allûf miššōḵeḇeṯ ḥêqeḵā šəmōr piṯəḥê-fîḵā:

6 kî-ḇēn mənabēl ’āḇ baṯ qāmâ ḇə’immāh kallâ b^aḥămōṯāh ’ōyəḇê ’îš ’anəšê ḇêṯwō:

7 wa’ănî bayhwâ ’ăṣapeh ’wōḥîlâ lē’lōhê yišə‘î yišəmā‘ēnî ’ĕlōhāy:

8 ’al-tiśəməḥî ’ōyaḇətî lî kî nāfalətî qāmətî kî-’ēšēḇ b^aḥōšeḵə yəhwâ ’wōr lî: s

9 z^a‘af yəhwâ ’eśśā’ kî ḥāṭā’ṯî lwō ‘aḏ ’ăšer yārîḇ rîḇî wə‘āśâ mišəpāṭî ywōṣî’ēnî lā’wōr ’erə’eh bəṣiḏəqāṯwō:

10 wəṯēre’ ’ōyaḇətî ûṯəḵassehā ḇûšâ hā’ōmərâ ’ēlay ’ayywō yəhwâ ’ĕlōhāyiḵə ‘ênay tirə’eynnâ bāh ‘atâ tihəyeh ləmirəmās kəṭîṭ ḥûṣwōṯ:

11 ywōm liḇənwōṯ gəḏērāyiḵə ywōm hahû’ yirəḥaq-ḥōq:

12 ywōm hû’ wə‘āḏeyḵā yāḇwō’ ləminnî ’aššûr wə‘ārê māṣwōr ûləminnî māṣwōr wə‘aḏ-nâār wəyām mîyām wəhar hâār:

13 wəhāyəṯâ hā’āreṣ lišəmāmâ ‘al-yōšəḇeyhā mipərî m^a‘aləlêhem: s

14 rə‘ēh ‘amməḵā ḇəšiḇəṭeḵā ṣō’n n^aḥălāṯeḵā šōḵənî ləḇāḏāḏ y^a‘ar bəṯwōḵə karəmel yirə‘û ḇāšān wəḡilə‘āḏ kîmê ‘wōlām:

15 kîmê ṣē’ṯəḵā mē’ereṣ miṣərāyim ’arə’ennû nifəlā’wōṯ:

16 yirə’û ḡwōyim wəyēḇōšû mikōl gəḇûrāṯām yāśîmû yāḏ ‘al-peh ’āzənêhem teḥĕrašənâ:

17 yəl^aḥăḵû ‘āfār kannāḥāš kəzōḥălê ’ereṣ yirəgəzû mimmisəgərōṯêhem ’el-yəhwâ ’ĕlōhênû yifəḥāḏû wəyirə’û mimmeḵḵā:

18 mî-’ēl kāmwōḵā nōśē’ ‘āwōn wə‘ōḇēr ‘al-peš^a‘ lišə’ērîṯ n^aḥălāṯwō lō’-heḥĕzîq lā‘aḏ ’apwō kî-ḥāfēṣ ḥeseḏ hû’:

19 yāšûḇ yər^aḥămēnû yiḵəbōš ‘ăwōnōṯênû wəṯašəlîḵə biməṣulwōṯ yām kāl-ḥaṭṭō’wṯām:

20 titēn ’ĕmeṯ ləy^a‘ăqōḇ ḥeseḏ lə’aḇərâām ’ăšer-nišəb^a‘ətā la’ăḇōṯênû mîmê qeḏem: