Sacred Texts  Bible  Index 
Polyglot  KJV  Sep  Vul 

Leviticus (Vayikra) Index
  Previous  Next 

Tanach (Hebrew): Leviticus (Vayikra) Chapter 7

1 ‏וְזֹ֥את תּוֹרַ֖ת הָאָשָׁ֑ם קֹ֥דֶשׁ קָֽדָשִׁ֖ים הֽוּא׃

2 ‏בִּמְק֗וֹם אֲשֶׁ֤ר יִשְׁחֲטוּ֙ אֶת־הָ֣עֹלָ֔ה יִשְׁחֲט֖וּ אֶת־הָאָשָׁ֑ם וְאֶת־דָּמ֛וֹ יִזְרֹ֥ק עַל־הַמִּזְבֵּ֖חַ סָבִֽיב׃

3 ‏וְאֵ֥ת כָּל־חֶלְבּ֖וֹ יַקְרִ֣יב מִמֶּ֑נּוּ אֵ֚ת הָֽאַלְיָ֔ה וְאֶת־הַחֵ֖לֶב הַֽמְכַסֶּ֥ה אֶת־הַקֶּֽרֶב׃

4 ‏וְאֵת֙ שְׁתֵּ֣י הַכְּלָיֹ֔ת וְאֶת־הַחֵ֙לֶב֙ אֲשֶׁ֣ר עֲלֵיהֶ֔ן אֲשֶׁ֖ר עַל־הַכְּסָלִ֑ים וְאֶת־הַיֹּתֶ֙רֶת֙ עַל־הַכָּבֵ֔ד עַל־הַכְּלָיֹ֖ת יְסִירֶֽנָּה׃

5 ‏וְהִקְטִ֨יר אֹתָ֤ם הַכֹּהֵן֙ הַמִּזְבֵּ֔חָה אִשֶּׁ֖ה לַיהוָ֑ה אָשָׁ֖ם הֽוּא׃

6 ‏כָּל־זָכָ֥ר בַּכֹּהֲנִ֖ים יֹאכְלֶ֑נּוּ בְּמָק֤וֹם קָדוֹשׁ֙ יֵאָכֵ֔ל קֹ֥דֶשׁ קָֽדָשִׁ֖ים הֽוּא׃

7 ‏כַּֽחַטָּאת֙ כָּֽאָשָׁ֔ם תּוֹרָ֥ה אַחַ֖ת לָהֶ֑ם הַכֹּהֵ֛ן אֲשֶׁ֥ר יְכַפֶּר־בּ֖וֹ ל֥וֹ יִהְיֶֽה׃

8 ‏וְהַ֨כֹּהֵ֔ן הַמַּקְרִ֖יב אֶת־עֹ֣לַת אִ֑ישׁ ע֤וֹר הָֽעֹלָה֙ אֲשֶׁ֣ר הִקְרִ֔יב לַכֹּהֵ֖ן ל֥וֹ יִהְיֶֽה׃

9 ‏וְכָל־מִנְחָ֗ה אֲשֶׁ֤ר תֵּֽאָפֶה֙ בַּתַּנּ֔וּר וְכָל־נַעֲשָׂ֥ה בַמַּרְחֶ֖שֶׁת וְעַֽל־מַחֲבַ֑ת לַכֹּהֵ֛ן הַמַּקְרִ֥יב אֹתָ֖הּ ל֥וֹ תִֽהְיֶֽה׃

10 ‏וְכָל־מִנְחָ֥ה בְלוּלָֽה־בַשֶּׁ֖מֶן וַחֲרֵבָ֑ה לְכָל־בְּנֵ֧י אַהֲרֹ֛ן תִּהְיֶ֖ה אִ֥ישׁ כְּאָחִֽיו׃ פ

11 ‏וְזֹ֥את תּוֹרַ֖ת זֶ֣בַח הַשְּׁלָמִ֑ים אֲשֶׁ֥ר יַקְרִ֖יב לַיהוָֽה׃

12 ‏אִ֣ם עַל־תּוֹדָה֮ יַקְרִיבֶנּוּ֒ וְהִקְרִ֣יב׀ עַל־זֶ֣בַח הַתּוֹדָ֗ה חַלּ֤וֹת מַצּוֹת֙ בְּלוּלֹ֣ת בַּשֶּׁ֔מֶן וּרְקִיקֵ֥י מַצּ֖וֹת מְשֻׁחִ֣ים בַּשָּׁ֑מֶן וְסֹ֣לֶת מֻרְבֶּ֔כֶת חַלֹּ֖ת בְּלוּלֹ֥ת בַּשָּֽׁמֶן׃

13 ‏עַל־חַלֹּת֙ לֶ֣חֶם חָמֵ֔ץ יַקְרִ֖יב קָרְבָּנ֑וֹ עַל־זֶ֖בַח תּוֹדַ֥ת שְׁלָמָֽיו׃

14 ‏וְהִקְרִ֨יב מִמֶּ֤נּוּ אֶחָד֙ מִכָּל־קָרְבָּ֔ן תְּרוּמָ֖ה לַיהוָ֑ה לַכֹּהֵ֗ן הַזֹּרֵ֛ק אֶת־דַּ֥ם הַשְּׁלָמִ֖ים ל֥וֹ יִהְיֶֽה׃

15 ‏וּבְשַׂ֗ר זֶ֚בַח תּוֹדַ֣ת שְׁלָמָ֔יו בְּי֥וֹם קָרְבָּנ֖וֹ יֵאָכֵ֑ל לֹֽא־יַנִּ֥יחַ מִמֶּ֖נּוּ עַד־בֹּֽקֶר׃

16 ‏וְאִם־נֶ֣דֶר׀ א֣וֹ נְדָבָ֗ה זֶ֚בַח קָרְבָּנ֔וֹ בְּי֛וֹם הַקְרִיב֥וֹ אֶת־זִבְח֖וֹ יֵאָכֵ֑ל וּמִֽמָּחֳרָ֔ת וְהַנּוֹתָ֥ר מִמֶּ֖נּוּ יֵאָכֵֽל׃

17 ‏וְהַנּוֹתָ֖ר מִבְּשַׂ֣ר הַזָּ֑בַח בַּיּוֹם֙ הַשְּׁלִישִׁ֔י בָּאֵ֖שׁ יִשָּׂרֵֽף׃

18 ‏וְאִ֣ם הֵאָכֹ֣ל יֵ֠אָכֵל מִבְּשַׂר־זֶ֨בַח שְׁלָמָ֜יו בַּיּ֣וֹם הַשְּׁלִישִׁי֮ לֹ֣א יֵרָצֶה֒ הַמַּקְרִ֣יב אֹת֗וֹ לֹ֧א יֵחָשֵׁ֛ב ל֖וֹ פִּגּ֣וּל יִהְיֶ֑ה וְהַנֶּ֛פֶשׁ הָאֹכֶ֥לֶת מִמֶּ֖נּוּ עֲוֹנָ֥הּ תִּשָּֽׂא׃

19 ‏וְהַבָּשָׂ֞ר אֲשֶׁר־יִגַּ֤ע בְּכָל־טָמֵא֙ לֹ֣א יֵֽאָכֵ֔ל בָּאֵ֖שׁ יִשָּׂרֵ֑ף וְהַ֨בָּשָׂ֔ר כָּל־טָה֖וֹר יֹאכַ֥ל בָּשָֽׂר׃

20 ‏וְהַנֶּ֜פֶשׁ אֲשֶׁר־תֹּאכַ֣ל בָּשָׂ֗ר מִזֶּ֤בַח הַשְּׁלָמִים֙ אֲשֶׁ֣ר לַיהוָ֔ה וְטֻמְאָת֖וֹ עָלָ֑יו וְנִכְרְתָ֛ה הַנֶּ֥פֶשׁ הַהִ֖וא מֵעַמֶּֽיהָ׃

21 ‏וְנֶ֜פֶשׁ כִּֽי־תִגַּ֣ע בְּכָל־טָמֵ֗א בְּטֻמְאַ֤ת אָדָם֙ א֣וֹ׀ בִּבְהֵמָ֣ה טְמֵאָ֗ה א֚וֹ בְּכָל־שֶׁ֣קֶץ טָמֵ֔א וְאָכַ֛ל מִבְּשַׂר־זֶ֥בַח הַשְּׁלָמִ֖ים אֲשֶׁ֣ר לַיהוָ֑ה וְנִכְרְתָ֛ה הַנֶּ֥פֶשׁ הַהִ֖וא מֵעַמֶּֽיהָ׃ פ

22 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

23 ‏דַּבֵּ֛ר אֶל־בְּנֵ֥י יִשְׂרָאֵ֖ל לֵאמֹ֑ר כָּל־חֵ֜לֶב שׁ֥וֹר וְכֶ֛שֶׂב וָעֵ֖ז לֹ֥א תֹאכֵֽלוּ׃

24 ‏וְחֵ֤לֶב נְבֵלָה֙ וְחֵ֣לֶב טְרֵפָ֔ה יֵעָשֶׂ֖ה לְכָל־מְלָאכָ֑ה וְאָכֹ֖ל לֹ֥א תֹאכְלֻֽהוּ׃

25 ‏כִּ֚י כָּל־אֹכֵ֣ל חֵ֔לֶב מִן־הַ֨בְּהֵמָ֔ה אֲשֶׁ֨ר יַקְרִ֥יב מִמֶּ֛נָּה אִשֶּׁ֖ה לַיהוָ֑ה וְנִכְרְתָ֛ה הַנֶּ֥פֶשׁ הָאֹכֶ֖לֶת מֵֽעַמֶּֽיהָ׃

26 ‏וְכָל־דָּם֙ לֹ֣א תֹאכְל֔וּ בְּכֹ֖ל מוֹשְׁבֹתֵיכֶ֑ם לָע֖וֹף וְלַבְּהֵמָֽה׃

27 ‏כָּל־נֶ֖פֶשׁ אֲשֶׁר־תֹּאכַ֣ל כָּל־דָּ֑ם וְנִכְרְתָ֛ה הַנֶּ֥פֶשׁ הַהִ֖וא מֵֽעַמֶּֽיהָ׃ פ

28 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

29 ‏דַּבֵּ֛ר אֶל־בְּנֵ֥י יִשְׂרָאֵ֖ל לֵאמֹ֑ר הַמַּקְרִ֞יב אֶת־זֶ֤בַח שְׁלָמָיו֙ לַיהוָ֔ה יָבִ֧יא אֶת־קָרְבָּנ֛וֹ לַיהוָ֖ה מִזֶּ֥בַח שְׁלָמָֽיו׃

30 ‏יָדָ֣יו תְּבִיאֶ֔ינָה אֵ֖ת אִשֵּׁ֣י יְהוָ֑ה אֶת־הַחֵ֤לֶב עַל־הֶֽחָזֶה֙ יְבִיאֶ֔נּוּ אֵ֣ת הֶחָזֶ֗ה לְהָנִ֥יף אֹת֛וֹ תְּנוּפָ֖ה לִפְנֵ֥י יְהוָֽה׃

31 ‏וְהִקְטִ֧יר הַכֹּהֵ֛ן אֶת־הַחֵ֖לֶב הַמִּזְבֵּ֑חָה וְהָיָה֙ הֶֽחָזֶ֔ה לְאַהֲרֹ֖ן וּלְבָנָֽיו׃

32 ‏וְאֵת֙ שׁ֣וֹק הַיָּמִ֔ין תִּתְּנ֥וּ תְרוּמָ֖ה לַכֹּהֵ֑ן מִזִּבְחֵ֖י שַׁלְמֵיכֶֽם׃

33 ‏הַמַּקְרִ֞יב אֶת־דַּ֧ם הַשְּׁלָמִ֛ים וְאֶת־הַחֵ֖לֶב מִבְּנֵ֣י אַהֲרֹ֑ן ל֧וֹ תִהְיֶ֛ה שׁ֥וֹק הַיָּמִ֖ין לְמָנָֽה׃

34 ‏כִּי֩ אֶת־חֲזֵ֨ה הַתְּנוּפָ֜ה וְאֵ֣ת׀ שׁ֣וֹק הַתְּרוּמָ֗ה לָקַ֙חְתִּי֙ מֵאֵ֣ת בְּנֵֽי־יִשְׂרָאֵ֔ל מִזִּבְחֵ֖י שַׁלְמֵיהֶ֑ם וָאֶתֵּ֣ן אֹ֠תָם לְאַהֲרֹ֨ן הַכֹּהֵ֤ן וּלְבָנָיו֙ לְחָק־עוֹלָ֔ם מֵאֵ֖ת בְּנֵ֥י יִשְׂרָאֵֽל׃

35 ‏זֹ֣את מִשְׁחַ֤ת אַהֲרֹן֙ וּמִשְׁחַ֣ת בָּנָ֔יו מֵאִשֵּׁ֖י יְהוָ֑ה בְּיוֹם֙ הִקְרִ֣יב אֹתָ֔ם לְכַהֵ֖ן לַיהוָֽה׃

36 ‏אֲשֶׁר֩ צִוָּ֨ה יְהוָ֜ה לָתֵ֣ת לָהֶ֗ם בְּיוֹם֙ מָשְׁח֣וֹ אֹתָ֔ם מֵאֵ֖ת בְּנֵ֣י יִשְׂרָאֵ֑ל חֻקַּ֥ת עוֹלָ֖ם לְדֹרֹתָֽם׃

37 ‏זֹ֣את הַתּוֹרָ֗ה לָֽעֹלָה֙ לַמִּנְחָ֔ה וְלַֽחַטָּ֖את וְלָאָשָׁ֑ם וְלַ֨מִּלּוּאִ֔ים וּלְזֶ֖בַח הַשְּׁלָמִֽים׃

38 ‏אֲשֶׁ֨ר צִוָּ֧ה3 יְהוָ֛ה אֶת־מֹשֶׁ֖ה בְּהַ֣ר סִינָ֑י בְּי֨וֹם צַוֹּת֜וֹ אֶת־בְּנֵ֣י יִשְׂרָאֵ֗ל לְהַקְרִ֧יב אֶת־קָרְבְּנֵיהֶ֛ם לַיהוָ֖ה בְּמִדְבַּ֥ר סִינָֽי׃ פ

1 wəzō’ṯ twōraṯ hā’āšām qōḏeš qāḏāšîm hû’:

2 biməqwōm ’ăšer yišəḥăṭû ’eṯ-hā‘ōlâ yišəḥăṭû ’eṯ-hā’āšām wə’eṯ-dāmwō yizərōq ‘al-hammizəbēḥa sāḇîḇ:

3 wə’ēṯ kāl-ḥeləbwō yaqərîḇ mimmennû ’ēṯ hā’aləyâ wə’eṯ-haḥēleḇ haməḵasseh ’eṯ-haqqereḇ:

4 wə’ēṯ šətê hakəlāyōṯ wə’eṯ-haḥēleḇ ’ăšer ‘ălêhen ’ăšer ‘al-hakəsālîm wə’eṯ-hayyōṯereṯ ‘al-hakāḇēḏ ‘al-hakəlāyōṯ yəsîrennâ:

5 wəhiqəṭîr ’ōṯām hakōhēn hammizəbēḥâ ’iššeh layhwâ ’āšām hû’:

6 kāl-zāḵār bakōhănîm yō’ḵəlennû bəmāqwōm qāḏwōš yē’āḵēl qōḏeš qāḏāšîm hû’:

7 kaḥaṭṭā’ṯ kā’āšām twōrâ ’aḥaṯ lâem hakōhēn ’ăšer yəḵaper-bwō lwō yihəyeh:

8 wəhakōhēn hammaqərîḇ ’eṯ-‘ōlaṯ ’îš ‘wōr hā‘ōlâ ’ăšer hiqərîḇ lakōhēn lwō yihəyeh:

9 wəḵāl-minəḥâ ’ăšer tē’āfeh batannûr wəḵāl-na‘ăśâ ḇammarəḥešeṯ wə‘al-maḥăḇaṯ lakōhēn hammaqərîḇ ’ōṯāh lwō ṯihəyeh:

10 wəḵāl-minəḥâ ḇəlûlâ-ḇaššemen waḥărēḇâ ləḵāl-bənê ’ahărōn tihəyeh ’îš kə’āḥîw: f

11 wəzō’ṯ twōraṯ zeḇaḥ haššəlāmîm ’ăšer yaqərîḇ layhwâ:

12 ’im ‘al-twōḏâ yaqərîḇennû wəhiqərîḇ| ‘al-zeḇaḥ hatwōḏâ ḥallwōṯ maṣṣwōṯ bəlûlōṯ baššemen ûrəqîqê maṣṣwōṯ məšuḥîm baššāmen wəsōleṯ murəbeḵeṯ ḥallōṯ bəlûlōṯ baššāmen:

13 ‘al-ḥallōṯ leḥem ḥāmēṣ yaqərîḇ qārəbānwō ‘al-zeḇaḥ twōḏaṯ šəlāmāyw:

14 wəhiqərîḇ mimmennû ’eḥāḏ mikāl-qārəbān tərûmâ layhwâ lakōhēn hazzōrēq ’eṯ-dam haššəlāmîm lwō yihəyeh:

15 ûḇəśar zeḇaḥ twōḏaṯ šəlāmāyw bəywōm qārəbānwō yē’āḵēl lō’-yannîḥa mimmennû ‘aḏ-bōqer:

16 wə’im-neḏer| ’wō nəḏāḇâ zeḇaḥ qārəbānwō bəywōm haqərîḇwō ’eṯ-ziḇəḥwō yē’āḵēl ûmimmāḥŏrāṯ wəhannwōṯār mimmennû yē’āḵēl:

17 wəhannwōṯār mibəśar hazzāḇaḥ bayywōm haššəlîšî bā’ēš yiśśārēf:

18 wə’im hē’āḵōl yē’āḵēl mibəśar-zeḇaḥ šəlāmāyw bayywōm haššəlîšî lō’ yērāṣeh hammaqərîḇ ’ōṯwō lō’ yēḥāšēḇ lwō pigûl yihəyeh wəhannefeš hā’ōḵeleṯ mimmennû ‘ăwōnāh tiśśā’:

19 wəhabāśār ’ăšer-yiga‘ bəḵāl-ṭāmē’ lō’ yē’āḵēl bā’ēš yiśśārēf wəhabāśār kāl-ṭâwōr yō’ḵal bāśār:

20 wəhannefeš ’ăšer-tō’ḵal bāśār mizzeḇaḥ haššəlāmîm ’ăšer layhwâ wəṭumə’āṯwō ‘ālāyw wəniḵərəṯâ hannefeš hahiw’ mē‘ammeyhā:

21 wənefeš kî-ṯiga‘ bəḵāl-ṭāmē’ bəṭumə’aṯ ’āḏām ’wō| biḇəhēmâ ṭəmē’â ’wō bəḵāl-šeqeṣ ṭāmē’ wə’āḵal mibəśar-zeḇaḥ haššəlāmîm ’ăšer layhwâ wəniḵərəṯâ hannefeš hahiw’ mē‘ammeyhā: f

22 wayəḏabēr yəhwâ ’el-mōšeh llē’mōr:

23 dabēr ’el-bənê yiśərā’ēl lē’mōr kāl-ḥēleḇ šwōr wəḵeśeḇ wā‘ēz lō’ ṯō’ḵēlû:

24 wəḥēleḇ nəḇēlâ wəḥēleḇ ṭərēfâ yē‘āśeh ləḵāl-məlā’ḵâ wə’āḵōl lō’ ṯō’ḵəluhû:

25 kî kāl-’ōḵēl ḥēleḇ min-habəhēmâ ’ăšer yaqərîḇ mimmennâ ’iššeh layhwâ wəniḵərəṯâ hannefeš hā’ōḵeleṯ mē‘ammeyhā:

26 wəḵāl-dām lō’ ṯō’ḵəlû bəḵōl mwōšəḇōṯêḵem lā‘wōf wəlabəhēmâ:

27 kāl-nefeš ’ăšer-tō’ḵal kāl-dām wəniḵərəṯâ hannefeš hahiw’ mē‘ammeyhā: f

28 wayəḏabēr yəhwâ ’el-mōšeh llē’mōr:

29 dabēr ’el-bənê yiśərā’ēl lē’mōr hammaqərîḇ ’eṯ-zeḇaḥ šəlāmāyw layhwâ yāḇî’ ’eṯ-qārəbānwō layhwâ mizzeḇaḥ šəlāmāyw:

30 yāḏāyw təḇî’eynâ ’ēṯ ’iššê yəhwâ ’eṯ-haḥēleḇ ‘al-heḥāzeh yəḇî’ennû ’ēṯ heḥāzeh ləhānîf ’ōṯwō tənûfâ lifənê yəhwâ:

31 wəhiqəṭîr hakōhēn ’eṯ-haḥēleḇ hammizəbēḥâ wəhāyâ heḥāzeh lə’ahărōn ûləḇānāyw:

32 wə’ēṯ šwōq hayyāmîn titənû ṯərûmâ lakōhēn mizziḇəḥê šaləmêḵem:

33 hammaqərîḇ ’eṯ-dam haššəlāmîm wə’eṯ-haḥēleḇ mibənê ’ahărōn lwō ṯihəyeh šwōq hayyāmîn ləmānâ:

34 kî ’eṯ-ḥăzēh hatənûfâ wə’ēṯ| šwōq hatərûmâ lāqaḥətî mē’ēṯ bənê-yiśərā’ēl mizziḇəḥê šaləmêhem wā’etēn ’ōṯām lə’ahărōn hakōhēn ûləḇānāyw ləḥāq-‘wōlām mē’ēṯ bənê yiśərā’ēl:

35 zō’ṯ mišəḥaṯ ’ahărōn ûmišəḥaṯ bānāyw mē’iššê yəhwâ bəywōm hiqərîḇ ’ōṯām ləḵahēn layhwâ:

36 ’ăšer ṣiûâ yəhwâ lāṯēṯ lâem bəywōm māšəḥwō ’ōṯām mē’ēṯ bənê yiśərā’ēl ḥuqqaṯ ‘wōlām ləḏōrōṯām:

37 zō’ṯ hatwōrâ lā‘ōlâ lamminəḥâ wəlaḥaṭṭā’ṯ wəlā’āšām wəlammillû’îm ûləzeḇaḥ haššəlāmîm:

38 ’ăšer ṣiûâ3 yəhwâ ’eṯ-mōšeh bəhar sînāy bəywōm ṣaûōṯwō ’eṯ-bənê yiśərā’ēl ləhaqərîḇ ’eṯ-qārəbənêhem layhwâ bəmiḏəbar sînāy: f


Next: Leviticus (Vayikra) Chapter 8