Sacred Texts  Bible  Index 
Polyglot  KJV  Sep  Vul 

2 Kings (2 Melakhim) Index
  Previous  Next 

Tanach (Hebrew): 2 Kings (2 Melakhim) Chapter 5

1 ‏וְ֠נַעֲמָן שַׂר־צְבָ֨א מֶֽלֶךְ־אֲרָ֜ם הָיָ֣ה אִישׁ֩ גָּד֨וֹל לִפְנֵ֤י אֲדֹנָיו֙ וּנְשֻׂ֣א פָנִ֔ים כִּֽי־ב֛וֹ נָֽתַן־יְהוָ֥ה תְּשׁוּעָ֖ה לַאֲרָ֑ם וְהָאִ֗ישׁ הָיָ֛ה גִּבּ֥וֹר חַ֖יִל מְצֹרָֽע׃

2 ‏וַאֲרָם֙ יָצְא֣וּ גְדוּדִ֔ים וַיִּשְׁבּ֛וּ מֵאֶ֥רֶץ יִשְׂרָאֵ֖ל נַעֲרָ֣ה קְטַנָּ֑ה וַתְּהִ֕י לִפְנֵ֖י אֵ֥שֶׁת נַעֲמָֽן׃

3 ‏וַתֹּ֙אמֶר֙ אֶל־גְּבִרְתָּ֔הּ אַחֲלֵ֣י אֲדֹנִ֔י לִפְנֵ֥י הַנָּבִ֖יא אֲשֶׁ֣ר בְּשֹׁמְר֑וֹן אָ֛ז יֶאֱסֹ֥ף אֹת֖וֹ מִצָּרַעְתּֽוֹ׃

4 ‏וַיָּבֹ֕א וַיַּגֵּ֥ד לַאדֹנָ֖יו לֵאמֹ֑ר כָּזֹ֤את וְכָזֹאת֙ דִּבְּרָ֣ה הַֽנַּעֲרָ֔ה אֲשֶׁ֖ר מֵאֶ֥רֶץ יִשְׂרָאֵֽל׃

5 ‏וַיֹּ֤אמֶר מֶֽלֶךְ־אֲרָם֙ לֶךְ־בֹּ֔א וְאֶשְׁלְחָ֥ה סֵ֖פֶר אֶל־מֶ֣לֶךְ יִשְׂרָאֵ֑ל וַיֵּלֶךְ֩ וַיִּקַּ֨ח בְּיָד֜וֹ עֶ֣שֶׂר כִּכְּרֵי־כֶ֗סֶף וְשֵׁ֤שֶׁת אֲלָפִים֙ זָהָ֔ב וְעֶ֖שֶׂר חֲלִיפ֥וֹת בְּגָדִֽים׃

6 ‏וַיָּבֵ֣א הַסֵּ֔פֶר אֶל־מֶ֥לֶךְ יִשְׂרָאֵ֖ל לֵאמֹ֑ר וְעַתָּ֗ה כְּב֨וֹא הַסֵּ֤פֶר הַזֶּה֙ אֵלֶ֔יךָ הִנֵּ֨ה שָׁלַ֤חְתִּי אֵלֶ֙יךָ֙ אֶת־נַעֲמָ֣ן עַבְדִּ֔י וַאֲסַפְתּ֖וֹ מִצָּרַעְתּֽוֹ׃

7 ‏וַיְהִ֡י כִּקְרֹא֩ מֶֽלֶךְ־יִשְׂרָאֵ֨ל אֶת־הַסֵּ֜פֶר וַיִּקְרַ֣ע בְּגָדָ֗יו וַיֹּ֙אמֶר֙ הַאֱלֹהִ֥ים אָ֙נִי֙ לְהָמִ֣ית וּֽלְהַחֲי֔וֹת כִּֽי־זֶה֙ שֹׁלֵ֣חַ אֵלַ֔י לֶאֱסֹ֥ף אִ֖ישׁ מִצָּֽרַעְתּ֑וֹ כִּ֤י אַךְ־דְּעֽוּ־נָא֙ וּרְא֔וּ כִּֽי־מִתְאַנֶּ֥ה ה֖וּא לִֽי׃

8 ‏וַיְהִ֞י כִּשְׁמֹ֣עַ׀ אֱלִישָׁ֣ע אִישׁ־הָאֱלֹהִ֗ים כִּֽי־קָרַ֤ע מֶֽלֶךְ־יִשְׂרָאֵל֙ אֶת־בְּגָדָ֔יו וַיִּשְׁלַח֙ אֶל־הַמֶּ֣לֶךְ לֵאמֹ֔ר לָ֥מָּה קָרַ֖עְתָּ בְּגָדֶ֑יךָ יָבֹֽא־נָ֣א אֵלַ֔י וְיֵדַ֕ע כִּ֛י יֵ֥שׁ נָבִ֖יא בְּיִשְׂרָאֵֽל׃

9 ‏וַיָּבֹ֥א נַעֲמָ֖ן בסוסו בְּסוּסָ֣יו וּבְרִכְבּ֑וֹ וַיַּעֲמֹ֥ד פֶּֽתַח־הַבַּ֖יִת לֶאֱלִישָֽׁע׃

10 ‏וַיִּשְׁלַ֥ח אֵלָ֛יו אֱלִישָׁ֖ע מַלְאָ֣ךְ לֵאמֹ֑ר הָל֗וֹךְ וְרָחַצְתָּ֤ שֶֽׁבַע־פְּעָמִים֙ בַּיַּרְדֵּ֔ן וְיָשֹׁ֧ב בְּשָׂרְךָ֛ לְךָ֖ וּטְהָֽר׃

11 ‏וַיִּקְצֹ֥ף נַעֲמָ֖ן וַיֵּלַ֑ךְ וַיֹּאמֶר֩ הִנֵּ֨ה אָמַ֜רְתִּי אֵלַ֣י׀ יֵצֵ֣א יָצ֗וֹא וְעָמַד֙ וְקָרָא֙ בְּשֵׁם־יְהוָ֣ה אֱלֹהָ֔יו וְהֵנִ֥יף יָד֛וֹ אֶל־הַמָּק֖וֹם וְאָסַ֥ף הַמְּצֹרָֽע׃

12 ‏הֲלֹ֡א טוֹב֩ אבנה אֲמָנָ֨ה וּפַרְפַּ֜ר נַהֲר֣וֹת דַּמֶּ֗שֶׂק מִכֹּל֙ מֵימֵ֣י יִשְׂרָאֵ֔ל הֲלֹֽא־אֶרְחַ֥ץ בָּהֶ֖ם וְטָהָ֑רְתִּי וַיִּ֖פֶן וַיֵּ֥לֶךְ בְּחֵמָֽה׃

13 ‏וַיִּגְּשׁ֣וּ עֲבָדָיו֮ וַיְדַבְּר֣וּ אֵלָיו֒ וַיֹּאמְר֗וּ אָבִי֙ דָּבָ֣ר גָּד֗וֹל הַנָּבִ֛יא דִּבֶּ֥ר אֵלֶ֖יךָ הֲל֣וֹא תַעֲשֶׂ֑ה וְאַ֛ף כִּֽי־אָמַ֥ר אֵלֶ֖יךָ רְחַ֥ץ וּטְהָֽר׃

14 ‏וַיֵּ֗רֶד וַיִּטְבֹּ֤ל בַּיַּרְדֵּן֙ שֶׁ֣בַע פְּעָמִ֔ים כִּדְבַ֖ר אִ֣ישׁ הָאֱלֹהִ֑ים וַיָּ֣שָׁב בְּשָׂר֗וֹ כִּבְשַׂ֛ר נַ֥עַר קָטֹ֖ן וַיִּטְהָֽר׃

15 ‏וַיָּשָׁב֩ אֶל־אִ֨ישׁ הָאֱלֹהִ֜ים ה֣וּא וְכָֽל־מַחֲנֵ֗הוּ וַיָּבֹא֮ וַיַּעֲמֹ֣ד לְפָנָיו֒ וַיֹּ֗אמֶר הִנֵּה־נָ֤א יָדַ֙עְתִּי֙ כִּ֣י אֵ֤ין אֱלֹהִים֙ בְּכָל־הָאָ֔רֶץ כִּ֖י אִם־בְּיִשְׂרָאֵ֑ל וְעַתָּ֛ה קַח־נָ֥א בְרָכָ֖ה מֵאֵ֥ת עַבְדֶּֽךָ׃

16 ‏וַיֹּ֕אמֶר חַי־יְהוָ֛ה אֲשֶׁר־עָמַ֥דְתִּי לְפָנָ֖יו אִם־אֶקָּ֑ח וַיִּפְצַר־בּ֥וֹ לָקַ֖חַת וַיְמָאֵֽן׃

17 ‏וַיֹּאמֶר֮ נַעֲמָן֒ וָלֹ֕א יֻתַּן־נָ֣א לְעַבְדְּךָ֔ מַשָּׂ֥א צֶֽמֶד־פְּרָדִ֖ים אֲדָמָ֑ה כִּ֡י לֽוֹא־יַעֲשֶׂה֩ ע֨וֹד עַבְדְּךָ֜ עֹלָ֤ה וָזֶ֙בַח֙ לֵאלֹהִ֣ים אֲחֵרִ֔ים כִּ֖י אִם־לַיהוָֽה׃

18 ‏לַדָּבָ֣ר הַזֶּ֔ה יִסְלַ֥ח יְהוָ֖ה לְעַבְדֶּ֑ךָ בְּב֣וֹא אֲדֹנִ֣י בֵית־רִמּוֹן֩ לְהִשְׁתַּחֲוֹ֨ת שָׁ֜מָּה וְה֣וּא׀ נִשְׁעָ֣ן עַל־יָדִ֗י וְהִֽשְׁתַּחֲוֵ֙יתִי֙ בֵּ֣ית רִמֹּ֔ן בְּהִשְׁתַּחֲוָיָ֙תִי֙ בֵּ֣ית רִמֹּ֔ן יִסְלַח־נא יְהוָ֥ה לְעַבְדְּךָ֖ בַּדָּבָ֥ר הַזֶּֽה׃

19 ‏וַיֹּ֥אמֶר ל֖וֹ לֵ֣ךְ לְשָׁל֑וֹם וַיֵּ֥לֶךְ מֵאִתּ֖וֹ כִּבְרַת־אָֽרֶץ׃ ס

20 ‏וַיֹּ֣אמֶר גֵּיחֲזִ֗י נַעַר֮ אֱלִישָׁ֣ע אִישׁ־הָאֱלֹהִים֒ הִנֵּ֣ה׀ חָשַׂ֣ךְ אֲדֹנִ֗י אֶֽת־נַעֲמָ֤ן הָֽאֲרַמִּי֙ הַזֶּ֔ה מִקַּ֥חַת מִיָּד֖וֹ אֵ֣ת אֲשֶׁר־הֵבִ֑יא חַי־יְהוָה֙ כִּֽי־אִם־רַ֣צְתִּי אַחֲרָ֔יו וְלָקַחְתִּ֥י מֵאִתּ֖וֹ מְאֽוּמָה׃

21 ‏וַיִּרְדֹּ֥ף גֵּיחֲזִ֖י אַחֲרֵ֣י נַֽעֲמָ֑ן וַיִּרְאֶ֤ה נַֽעֲמָן֙ רָ֣ץ אַחֲרָ֔יו וַיִּפֹּ֞ל מֵעַ֧ל הַמֶּרְכָּבָ֛ה לִקְרָאת֖וֹ וַיֹּ֥אמֶר הֲשָׁלֽוֹם׃

22 ‏וַיֹּ֣אמֶר׀ שָׁל֗וֹם אֲדֹנִי֮ שְׁלָחַ֣נִי לֵאמֹר֒ הִנֵּ֣ה עַתָּ֡ה זֶ֠ה בָּ֣אוּ אֵלַ֧י שְׁנֵֽי־נְעָרִ֛ים מֵהַ֥ר אֶפְרַ֖יִם מִבְּנֵ֣י הַנְּבִיאִ֑ים תְּנָה־נָּ֤א לָהֶם֙ כִּכַּר־כֶּ֔סֶף וּשְׁתֵּ֖י חֲלִפ֥וֹת בְּגָדִֽים׃

23 ‏וַיֹּ֣אמֶר נַעֲמָ֔ן הוֹאֵ֖ל קַ֣ח כִּכָּרָ֑יִם וַיִּפְרָץ־בּ֗וֹ וַיָּצַר֩ כִּכְּרַ֨יִם כֶּ֜סֶף בִּשְׁנֵ֣י חֲרִטִ֗ים וּשְׁתֵּי֙ חֲלִפ֣וֹת בְּגָדִ֔ים וַיִּתֵּן֙ אֶל־שְׁנֵ֣י נְעָרָ֔יו וַיִּשְׂא֖וּ לְפָנָֽיו׃

24 ‏וַיָּבֹא֙ אֶל־הָעֹ֔פֶל וַיִּקַּ֥ח מִיָּדָ֖ם וַיִּפְקֹ֣ד בַּבָּ֑יִת וַיְשַׁלַּ֥ח אֶת־הָאֲנָשִׁ֖ים וַיֵּלֵֽכוּ׃

25 ‏וְהוּא־בָא֙ וַיַּעֲמֹ֣ד אֶל־אֲדֹנָ֔יו וַיֹּ֤אמֶר אֵלָיו֙ אֱלִישָׁ֔ע מאן מֵאַ֖יִן גֵּחֲזִ֑י וַיֹּ֕אמֶר לֹֽא־הָלַ֥ךְ עַבְדְּךָ֖ אָ֥נֶה וָאָֽנָה׃

26 ‏וַיֹּ֤אמֶר אֵלָיו֙ לֹא־לִבִּ֣י הָלַ֔ךְ כַּאֲשֶׁ֧ר הָֽפַךְ־אִ֛ישׁ מֵעַ֥ל מֶרְכַּבְתּ֖וֹ לִקְרָאתֶ֑ךָ הַעֵ֞ת לָקַ֤חַת אֶת־הַכֶּ֙סֶף֙ וְלָקַ֣חַת בְּגָדִ֔ים וְזֵיתִ֤ים וּכְרָמִים֙ וְצֹ֣אן וּבָקָ֔ר וַעֲבָדִ֖ים וּשְׁפָחֽוֹת׃

27 ‏וְצָרַ֤עַת נַֽעֲמָן֙ תִּֽדְבַּק־בְּךָ֔ וּֽבְזַרְעֲךָ לְעוֹלָ֑ם וַיֵּצֵ֥א מִלְּפָנָ֖יו מְצֹרָ֥ע כַּשָּֽׁלֶג׃ ס

1 wəna‘ămān śar-ṣəḇā’ meleḵə-’ărām hāyâ ’îš gāḏwōl lifənê ’ăḏōnāyw ûnəśu’ fānîm kî-ḇwō nāṯan-yəhwâ təšû‘â la’ărām wəhā’îš hāyâ gibwōr ḥayil məṣōrā‘:

2 wa’ărām yāṣə’û ḡəḏûḏîm wayyišəbû mē’ereṣ yiśərā’ēl na‘ărâ qəṭannâ watəhî lifənê ’ēšeṯ na‘ămān:

3 watō’mer ’el-gəḇirətāh ’aḥălê ’ăḏōnî lifənê hannāḇî’ ’ăšer bəšōmərwōn ’āz ye’ĕsōf ’ōṯwō miṣṣāra‘ətwō:

4 wayyāḇō’ wayyagēḏ la’ḏōnāyw lē’mōr kāzō’ṯ wəḵāzō’ṯ dibərâ hanna‘ărâ ’ăšer mē’ereṣ yiśərā’ēl:

5 wayyō’mer meleḵə-’ărām leḵə-bō’ wə’ešələḥâ sēfer ’el-meleḵə yiśərā’ēl wayyēleḵə wayyiqqaḥ bəyāḏwō ‘eśer kikərê-ḵesef wəšēšeṯ ’ălāfîm zâāḇ wə‘eśer ḥălîfwōṯ bəḡāḏîm:

6 wayyāḇē’ hassēfer ’el-meleḵə yiśərā’ēl lē’mōr wə‘atâ kəḇwō’ hassēfer hazzeh ’ēleyḵā hinnēh šālaḥətî ’ēleyḵā ’eṯ-na‘ămān ‘aḇədî wa’ăsafətwō miṣṣāra‘ətwō:

7 wayəhî kiqərō’ meleḵə-yiśərā’ēl ’eṯ-hassēfer wayyiqəra‘ bəḡāḏāyw wayyō’mer ha’ĕlōhîm ’ānî ləhāmîṯ ûləhaḥăywōṯ kî-zeh šōlēḥa ’ēlay le’ĕsōf ’îš miṣṣāra‘ətwō kî ’aḵə-də‘û-nā’ ûrə’û kî-miṯə’anneh hû’ lî:

8 wayəhî kišəmō‘a| ’ĕlîšā‘ ’îš-hā’ĕlōhîm kî-qāra‘ meleḵə-yiśərā’ēl ’eṯ-bəḡāḏāyw wayyišəlaḥ ’el-hammeleḵə lē’mōr lāmmâ qāra‘ətā bəḡāḏeyḵā yāḇō’-nā’ ’ēlay wəyēḏa‘ kî yēš nāḇî’ bəyiśərā’ēl:

9 wayyāḇō’ na‘ămān bəsûsāw bəsûsāyw ûḇəriḵəbwō wayya‘ămōḏ peṯaḥ-habayiṯ le’ĕlîšā‘:

10 wayyišəlaḥ ’ēlāyw ’ĕlîšā‘ malə’āḵə lē’mōr hālwōḵə wərāḥaṣətā šeḇa‘-pə‘āmîm bayyarədēn wəyāšōḇ bəśārəḵā ləḵā ûṭəhār:

11 wayyiqəṣōf na‘ămān wayyēlaḵə wayyō’mer hinnēh ’āmarətî ’ēlay| yēṣē’ yāṣwō’ wə‘āmaḏ wəqārā’ bəšēm-yəhwâ ’ĕlōhāyw wəhēnîf yāḏwō ’el-hammāqwōm wə’āsaf hamməṣōrā‘:

12 hălō’ ṭwōḇ ’ăḇānâ ’ămānâ ûfarəpar nahărwōṯ dammeśeq mikōl mêmê yiśərā’ēl hălō’-’erəḥaṣ bâem wəṭâārətî wayyifen wayyēleḵə bəḥēmâ:

13 wayyigəšû ‘ăḇāḏāyw wayəḏabərû ’ēlāyw wayyō’mərû ’āḇî dāḇār gāḏwōl hannāḇî’ diber ’ēleyḵā hălwō’ ṯa‘ăśeh wə’af kî-’āmar ’ēleyḵā rəḥaṣ ûṭəhār:

14 wayyēreḏ wayyiṭəbōl bayyarədēn šeḇa‘ pə‘āmîm kiḏəḇar ’îš hā’ĕlōhîm wayyāšāḇ bəśārwō kiḇəśar na‘ar qāṭōn wayyiṭəhār:

15 wayyāšāḇ ’el-’îš hā’ĕlōhîm hû’ wəḵāl-maḥănēhû wayyāḇō’ wayya‘ămōḏ ləfānāyw wayyō’mer hinnēh-nā’ yāḏa‘ətî kî ’ên ’ĕlōhîm bəḵāl-hā’āreṣ kî ’im-bəyiśərā’ēl wə‘atâ qaḥ-nā’ ḇərāḵâ mē’ēṯ ‘aḇədeḵā:

16 wayyō’mer ḥay-yəhwâ ’ăšer-‘āmaḏətî ləfānāyw ’im-’eqqāḥ wayyifəṣar-bwō lāqaḥaṯ wayəmā’ēn:

17 wayyō’mer na‘ămān wālō’ yutan-nā’ lə‘aḇədəḵā maśśā’ ṣemeḏ-pərāḏîm ’ăḏāmâ kî lwō’-ya‘ăśeh ‘wōḏ ‘aḇədəḵā ‘ōlâ wāzeḇaḥ lē’lōhîm ’ăḥērîm kî ’im-layhwâ:

18 ladāḇār hazzeh yisəlaḥ yəhwâ lə‘aḇədeḵā bəḇwō’ ’ăḏōnî ḇêṯ-rimmwōn ləhišətaḥăwōṯ šāmmâ wəhû’| nišə‘ān ‘al-yāḏî wəhišətaḥăwêṯî bêṯ rimmōn bəhišətaḥăwāyāṯî bêṯ rimmōn yisəlaḥ-nā’ yəhwâ lə‘aḇədəḵā badāḇār hazzeh:

19 wayyō’mer lwō lēḵə ləšālwōm wayyēleḵə mē’itwō kiḇəraṯ-’āreṣ: s

20 wayyō’mer gêḥăzî na‘ar ’ĕlîšā‘ ’îš-hā’ĕlōhîm hinnēh| ḥāśaḵə ’ăḏōnî ’eṯ-na‘ămān hā’ărammî hazzeh miqqaḥaṯ mîyāḏwō ’ēṯ ’ăšer-hēḇî’ ḥay-yəhwâ kî-’im-raṣətî ’aḥărāyw wəlāqaḥətî mē’itwō mə’ûmâ:

21 wayyirədōf gêḥăzî ’aḥărê na‘ămān wayyirə’eh na‘ămān rāṣ ’aḥărāyw wayyipōl mē‘al hammerəkāḇâ liqərā’ṯwō wayyō’mer hăšālwōm:

22 wayyō’mer| šālwōm ’ăḏōnî šəlāḥanî lē’mōr hinnēh ‘atâ zeh bā’û ’ēlay šənê-nə‘ārîm mēhar ’efərayim mibənê hannəḇî’îm tənâ-nnā’ lâem kikar-kesef ûšətê ḥălifwōṯ bəḡāḏîm:

23 wayyō’mer na‘ămān hwō’ēl qaḥ kikārāyim wayyifərāṣ-bwō wayyāṣar kikərayim kesef bišənê ḥăriṭîm ûšətê ḥălifwōṯ bəḡāḏîm wayyitēn ’el-šənê nə‘ārāyw wayyiśə’û ləfānāyw:

24 wayyāḇō’ ’el-hā‘ōfel wayyiqqaḥ mîyāḏām wayyifəqōḏ babāyiṯ wayəšallaḥ ’eṯ-hā’ănāšîm wayyēlēḵû:

25 wəhû’-ḇā’ wayya‘ămōḏ ’el-’ăḏōnāyw wayyō’mer ’ēlāyw ’ĕlîšā‘ mē’ān mē’ayin gēḥăzî wayyō’mer lō’-hālaḵə ‘aḇədəḵā ’āneh wā’ānâ:

26 wayyō’mer ’ēlāyw lō’-libî hālaḵə ka’ăšer hāfaḵə-’îš mē‘al merəkaḇətwō liqərā’ṯeḵā ha‘ēṯ lāqaḥaṯ ’eṯ-hakesef wəlāqaḥaṯ bəḡāḏîm wəzêṯîm ûḵərāmîm wəṣō’n ûḇāqār wa‘ăḇāḏîm ûšəfāḥwōṯ:

27 wəṣāra‘aṯ na‘ămān tiḏəbaq-bəḵā ûḇəzarə‘ăḵā lə‘wōlām wayyēṣē’ milləfānāyw məṣōrā‘ kaššāleḡ: s


Next: 2 Kings (2 Melakhim) Chapter 6