‎1 ‏וִֽירִיחוֹ֙ סֹגֶ֣רֶת וּמְסֻגֶּ֔רֶת מִפְּנֵ֖י בְּנֵ֣י יִשְׂרָאֵ֑ל אֵ֥ין יוֹצֵ֖א וְאֵ֥ין בָּֽא׃ ס

‎2 ‏וַיֹּ֤אמֶר יְהוָה֙ אֶל־יְהוֹשֻׁ֔עַ רְאֵה֙ נָתַ֣תִּי בְיָֽדְךָ֔ אֶת־יְרִיח֖וֹ וְאֶת־מַלְכָּ֑הּ גִּבּוֹרֵ֖י הֶחָֽיִל׃

‎3 ‏וְסַבֹּתֶ֣ם אֶת־הָעִ֗יר כֹּ֚ל³ אַנְשֵׁ֣י הַמִּלְחָמָ֔ה הַקֵּ֥יף אֶת־הָעִ֖יר פַּ֣עַם אֶחָ֑ת כֹּ֥ה תַעֲשֶׂ֖ה שֵׁ֥שֶׁת יָמִֽים׃

‎4 ‏וְשִׁבְעָ֣ה כֹהֲנִ֡ים יִשְׂאוּ֩ שִׁבְעָ֨ה שׁוֹפְר֤וֹת הַיּֽוֹבְלִים֙ לִפְנֵ֣י הָאָר֔וֹן וּבַיּוֹם֙ הַשְּׁבִיעִ֔י תָּסֹ֥בּוּ אֶת־הָעִ֖יר שֶׁ֣בַע פְּעָמִ֑ים וְהַכֹּ֣הֲנִ֔ים יִתְקְע֖וּ בַּשּׁוֹפָרֽוֹת׃

‎5 ‏וְהָיָ֞ה בִּמְשֹׁ֣ךְ׀ בְּקֶ֣רֶן הַיּוֹבֵ֗ל בשמעכם כְּשָׁמְעֲכֶם֙ אֶת־ק֣וֹל הַשּׁוֹפָ֔ר יָרִ֥יעוּ כָל־הָעָ֖ם תְּרוּעָ֣ה גְדוֹלָ֑ה וְנָ֨פְלָ֜ה חוֹמַ֤ת הָעִיר֙ תַּחְתֶּ֔יהָ וְעָל֥וּ הָעָ֖ם אִ֥ישׁ נֶגְדּֽוֹ׃

‎6 ‏וַיִּקְרָ֞א יְהוֹשֻׁ֤עַ בִּן־נוּן֙ אֶל־הַכֹּ֣הֲנִ֔ים וַיֹּ֣אמֶר אֲלֵהֶ֔ם שְׂא֖וּ אֶת־אֲר֣וֹן הַבְּרִ֑ית וְשִׁבְעָ֣ה כֹֽהֲנִ֗ים יִשְׂאוּ֙ שִׁבְעָ֤ה שֽׁוֹפְרוֹת֙ יוֹבְלִ֔ים לִפְנֵ֖י אֲר֥וֹן יְהוָֽה׃

‎7 ‏ויאמרו וַיֹּ֙אמֶר֙ אֶל־הָעָ֔ם עִבְר֖וּ וְסֹ֣בּוּ אֶת־הָעִ֑יר וְהֶ֣חָל֔וּץ יַעֲבֹ֕ר לִפְנֵ֖י אֲר֥וֹן יְהוָֽה׃

‎8 ‏וַיְהִ֗י כֶּאֱמֹ֣ר יְהוֹשֻׁעַ֮ אֶל־הָעָם֒ וְשִׁבְעָ֣ה הַכֹּהֲנִ֡ים נֹשְׂאִים֩ שִׁבְעָ֨ה שׁוֹפְר֤וֹת הַיּֽוֹבְלִים֙ לִפְנֵ֣י יְהוָ֔ה עָבְר֕וּ וְתָקְע֖וּ בַּשּֽׁוֹפָר֑וֹת וַֽאֲרוֹן֙ בְּרִ֣ית יְהוָ֔ה הֹלֵ֖ךְ אַחֲרֵיהֶֽם׃

‎9 ‏וְהֶחָל֣וּץ הֹלֵ֔ךְ לִפְנֵי֙ הַכֹּ֣הֲנִ֔ים תקעו תֹּקְעֵ֖י הַשּֽׁוֹפָר֑וֹת וְהַֽמְאַסֵּ֗ף הֹלֵךְ֙ אַחֲרֵ֣י הָאָר֔וֹן הָל֖וֹךְ וְתָק֥וֹעַ בַּשּׁוֹפָרֽוֹת׃

‎10 ‏וְאֶת־הָעָם֩ צִוָּ֨ה יְהוֹשֻׁ֜עַ לֵאמֹ֗ר לֹ֤א תָרִ֙יעוּ֙ וְלֹֽא־תַשְׁמִ֣יעוּ אֶת־קוֹלְכֶ֔ם וְלֹא־יֵצֵ֥א מִפִּיכֶ֖ם דָּבָ֑ר עַ֠ד י֣וֹם אָמְרִ֧י אֲלֵיכֶ֛ם הָרִ֖יעוּ וַהֲרִיעֹתֶֽם׃

‎11 ‏וַיַּסֵּ֤ב אֲרוֹן־יְהוָה֙ אֶת־הָעִ֔יר הַקֵּ֖ף פַּ֣עַם אֶחָ֑ת וַיָּבֹ֙אוּ֙ הַֽמַּחֲנֶ֔ה וַיָּלִ֖ינוּ בַּֽמַּחֲנֶֽה׃ פ

‎12 ‏וַיַּשְׁכֵּ֥ם יְהוֹשֻׁ֖עַ בַּבֹּ֑קֶר וַיִּשְׂא֥וּ הַכֹּהֲנִ֖ים אֶת־אֲר֥וֹן יְהוָֽה׃

‎13 ‏וְשִׁבְעָ֣ה הַכֹּהֲנִ֡ים נֹשְׂאִים֩ שִׁבְעָ֨ה שׁוֹפְר֜וֹת הַיֹּבְלִ֗ים לִפְנֵי֙ אֲר֣וֹן יְהוָ֔ה הֹלְכִ֣ים הָל֔וֹךְ וְתָקְע֖וּ בַּשּׁוֹפָר֑וֹת וְהֶחָלוּץ֙ הֹלֵ֣ךְ לִפְנֵיהֶ֔ם וְהַֽמְאַסֵּ֗ף הֹלֵךְ֙ אַֽחֲרֵי֙ אֲר֣וֹן יְהוָ֔ה הולך הָל֖וֹךְ וְתָק֥וֹעַ בַּשּׁוֹפָרֽוֹת׃

‎14 ‏וַיָּסֹ֨בּוּ אֶת־הָעִ֜יר בַּיּ֤וֹם הַשֵּׁנִי֙ פַּ֣עַם אַחַ֔ת וַיָּשֻׁ֖בוּ הַֽמַּחֲנֶ֑ה כֹּ֥ה עָשׂ֖וּ שֵׁ֥שֶׁת יָמִֽים׃

‎15 ‏וַיְהִ֣י׀ בַּיּ֣וֹם הַשְּׁבִיעִ֗י וַיַּשְׁכִּ֙מוּ֙ כַּעֲל֣וֹת הַשַּׁ֔חַר וַיָּסֹ֧בּוּ אֶת־הָעִ֛יר כַּמִּשְׁפָּ֥ט הַזֶּ֖ה שֶׁ֣בַע פְּעָמִ֑ים רַ֚ק בַּיּ֣וֹם הַה֔וּא סָבְב֥וּ אֶת־הָעִ֖יר שֶׁ֥בַע פְּעָמִֽים׃

‎16 ‏וַיְהִי֙ בַּפַּ֣עַם הַשְּׁבִיעִ֔ית תָּקְע֥וּ הַכֹּהֲנִ֖ים בַּשּׁוֹפָר֑וֹת וַיֹּ֨אמֶר יְהוֹשֻׁ֤עַ אֶל־הָעָם֙ הָרִ֔יעוּ כִּֽי־נָתַ֧ן יְהוָ֛ה לָכֶ֖ם אֶת־הָעִֽיר׃

‎17 ‏וְהָיְתָ֨ה הָעִ֥יר חֵ֛רֶם הִ֥יא וְכָל־אֲשֶׁר־בָּ֖הּ לַֽיהוָ֑ה רַק֩ רָחָ֨ב הַזּוֹנָ֜ה תִּֽחְיֶ֗ה הִ֚יא וְכָל־אֲשֶׁ֣ר אִתָּ֣הּ בַּבַּ֔יִת כִּ֣י הֶחְבְּאַ֔תָה אֶת־הַמַּלְאָכִ֖ים אֲשֶׁ֥ר שָׁלָֽחְנוּ׃

‎18 ‏וְרַק־אַתֶּם֙ שִׁמְר֣וּ מִן־הַחֵ֔רֶם פֶּֽן־תַּחֲרִ֖ימוּ וּלְקַחְתֶּ֣ם מִן־הַחֵ֑רֶם וְשַׂמְתֶּ֞ם אֶת־מַחֲנֵ֤ה יִשְׂרָאֵל֙ לְחֵ֔רֶם וַעֲכַרְתֶּ֖ם אוֹתֽוֹ׃

‎19 ‏וְכֹ֣ל׀ כֶּ֣סֶף וְזָהָ֗ב וּכְלֵ֤י נְחֹ֙שֶׁת֙ וּבַרְזֶ֔ל קֹ֥דֶשׁ ה֖וּא לַֽיהוָ֑ה אוֹצַ֥ר יְהוָ֖ה יָבֽוֹא׃

‎20 ‏וַיָּ֣רַע הָעָ֔ם וַֽיִּתְקְע֖וּ בַּשֹּֽׁפָר֑וֹת וַיְהִי֩ כִשְׁמֹ֨עַ הָעָ֜ם אֶת־ק֣וֹל הַשּׁוֹפָ֗ר וַיָּרִ֤יעוּ הָעָם֙ תְּרוּעָ֣ה גְדוֹלָ֔ה וַתִּפֹּ֨ל הַֽחוֹמָ֜ה תַּחְתֶּ֗יהָ וַיַּ֨עַל הָעָ֤ם הָעִ֙ירָה֙ אִ֣ישׁ נֶגְדּ֔וֹ וַֽיִּלְכְּד֖וּ אֶת־הָעִֽיר׃

‎21 ‏וַֽיַּחֲרִ֙ימוּ֙ אֶת־כָּל־אֲשֶׁ֣ר בָּעִ֔יר מֵאִישׁ֙ וְעַד־אִשָּׁ֔ה מִנַּ֖עַר וְעַד־זָקֵ֑ן וְעַ֨ד שׁ֥וֹר וָשֶׂ֛ה וַחֲמ֖וֹר לְפִי־חָֽרֶב׃

‎22 ‏וְלִשְׁנַ֨יִם הָאֲנָשִׁ֜ים הַֽמְרַגְּלִ֤ים אֶת־הָאָ֙רֶץ֙ אָמַ֣ר יְהוֹשֻׁ֔עַ בֹּ֖אוּ בֵּית־הָאִשָּׁ֣ה הַזּוֹנָ֑ה וְהוֹצִ֨יאוּ מִשָּׁ֤ם אֶת־הָֽאִשָּׁה֙ וְאֶת־כָּל־אֲשֶׁר־לָ֔הּ כַּאֲשֶׁ֥ר נִשְׁבַּעְתֶּ֖ם לָֽהּ׃

‎23 ‏וַיָּבֹ֜אוּ הַנְּעָרִ֣ים הַֽמְרַגְּלִ֗ים וַיֹּצִ֡יאוּ אֶת־רָ֠חָב וְאֶת־אָבִ֨יהָ וְאֶת־אִמָּ֤הּ וְאֶת־אַחֶ֙יהָ֙ וְאֶת־כָּל־אֲשֶׁר־לָ֔הּ וְאֵ֥ת כָּל־מִשְׁפְּחוֹתֶ֖יהָ הוֹצִ֑יאוּ וַיַּ֨נִּיח֔וּם מִח֖וּץ לְמַחֲנֵ֥ה יִשְׂרָאֵֽל׃

‎24 ‏וְהָעִ֛יר שָׂרְפ֥וּ בָאֵ֖שׁ וְכָל־אֲשֶׁר־בָּ֑הּ רַ֣ק׀ הַכֶּ֣סֶף וְהַזָּהָ֗ב וּכְלֵ֤י הַנְּחֹ֙שֶׁת֙ וְהַבַּרְזֶ֔ל נָתְנ֖וּ אוֹצַ֥ר בֵּית־יְהוָֽה׃

‎25 ‏וְֽאֶת־רָחָ֣ב הַ֠זּוֹנָה וְאֶת־בֵּ֨ית אָבִ֤יהָ וְאֶת־כָּל־אֲשֶׁר־לָהּ֙ הֶחֱיָ֣ה יְהוֹשֻׁ֔עַ וַתֵּ֙שֶׁב֙ בְּקֶ֣רֶב יִשְׂרָאֵ֔ל עַ֖ד הַיּ֣וֹם הַזֶּ֑ה כִּ֤י הֶחְבִּ֙יאָה֙ אֶת־הַמַּלְאָכִ֔ים אֲשֶׁר־שָׁלַ֥ח יְהוֹשֻׁ֖עַ לְרַגֵּ֥ל אֶת־יְרִיחֽוֹ׃ פ

‎26 ‏וַיַּשְׁבַּ֣ע יְהוֹשֻׁ֔עַ בָּעֵ֥ת הַהִ֖יא לֵאמֹ֑ר אָר֨וּר הָאִ֜ישׁ לִפְנֵ֣י יְהוָ֗ה אֲשֶׁ֤ר יָקוּם֙ וּבָנָ֞ה אֶת־הָעִ֤יר הַזֹּאת֙ אֶת־יְרִיח֔וֹ בִּבְכֹר֣וֹ יְיַסְּדֶ֔נָּה וּבִצְעִיר֖וֹ יַצִּ֥יב דְּלָתֶֽיהָ׃

‎27 ‏וַיְהִ֥י יְהוָ֖ה אֶת־יְהוֹשֻׁ֑עַ וַיְהִ֥י שָׁמְע֖וֹ בְּכָל־הָאָֽרֶץ׃

1 wîrîḥwō sōḡereṯ ûməsugereṯ mipənê bənê yiśərā’ēl ’ên ywōṣē’ wə’ên bā’: s

2 wayyō’mer yəhwâ ’el-yəhwōšu‘a rə’ēh nāṯatî ḇəyāḏəḵā ’eṯ-yərîḥwō wə’eṯ-maləkāh gibwōrê heḥāyil:

3 wəsabōṯem ’eṯ-hā‘îr kōl³ ’anəšê hammiləḥāmâ haqqêf ’eṯ-hā‘îr p^a‘am ’eḥāṯ kōh ṯ^a‘ăśeh šēšeṯ yāmîm:

4 wəšiḇə‘â ḵōhănîm yiśə’û šiḇə‘â šwōfərwōṯ hayywōḇəlîm lifənê hā’ārwōn ûḇayywōm haššəḇî‘î tāsōbû ’eṯ-hā‘îr šeḇ^a‘ pə‘āmîm wəhakōhănîm yiṯəqə‘û baššwōfārwōṯ:

5 wəhāyâ biməšōḵə| bəqeren hayywōḇēl bəšāmə‘ăḵem kəšāmə‘ăḵem ’eṯ-qwōl haššwōfār yārî‘û ḵāl-hā‘ām tərû‘â ḡəḏwōlâ wənāfəlâ ḥwōmaṯ hā‘îr t^aḥəteyhā wə‘ālû hā‘ām ’îš neḡədwō:

6 wayyiqərā’ yəhwōšu‘a bin-nûn ’el-hakōhănîm wayyō’mer ’ălēhem śə’û ’eṯ-’ărwōn habərîṯ wəšiḇə‘â ḵōhănîm yiśə’û šiḇə‘â šwōfərwōṯ ywōḇəlîm lifənê ’ărwōn yəhwâ:

7 wayyō’mərû wayyō’mer ’el-hā‘ām ‘iḇərû wəsōbû ’eṯ-hā‘îr wəheḥālûṣ y^a‘ăḇōr lifənê ’ărwōn yəhwâ:

8 wayəhî ke’ĕmōr yəhwōšu‘a ’el-hā‘ām wəšiḇə‘â hakōhănîm nōśə’îm šiḇə‘â šwōfərwōṯ hayywōḇəlîm lifənê yəhwâ ‘āḇərû wəṯāqə‘û baššwōfārwōṯ wa’ărwōn bərîṯ yəhwâ hōlēḵə ’^aḥărêhem:

9 wəheḥālûṣ hōlēḵə lifənê hakōhănîm tāqə‘û tōqə‘ê haššwōfārwōṯ wəhamə’assēf hōlēḵə ’^aḥărê hā’ārwōn hālwōḵə wəṯāqwō‘a baššwōfārwōṯ:

10 wə’eṯ-hā‘ām ṣiûâ yəhwōšu‘a lē’mōr lō’ ṯārî‘û wəlō’-ṯašəmî‘û ’eṯ-qwōləḵem wəlō’-yēṣē’ mipîḵem dāḇār ‘aḏ ywōm ’āmərî ’ălêḵem hārî‘û wahărî‘ōṯem:

11 wayyassēḇ ’ărwōn-yəhwâ ’eṯ-hā‘îr haqqēf p^a‘am ’eḥāṯ wayyāḇō’û hamm^aḥăneh wayyālînû bamm^aḥăneh: f

12 wayyašəkēm yəhwōšu‘a babōqer wayyiśə’û hakōhănîm ’eṯ-’ărwōn yəhwâ:

13 wəšiḇə‘â hakōhănîm nōśə’îm šiḇə‘â šwōfərwōṯ hayyōḇəlîm lifənê ’ărwōn yəhwâ hōləḵîm hālwōḵə wəṯāqə‘û baššwōfārwōṯ wəheḥālûṣ hōlēḵə lifənêhem wəhamə’assēf hōlēḵə ’^aḥărê ’ărwōn yəhwâ hwōlēḵə hālwōḵə wəṯāqwō‘a baššwōfārwōṯ:

14 wayyāsōbû ’eṯ-hā‘îr bayywōm haššēnî p^a‘am ’^aḥaṯ wayyāšuḇû hamm^aḥăneh kōh ‘āśû šēšeṯ yāmîm:

15 wayəhî| bayywōm haššəḇî‘î wayyašəkimû k^a‘ălwōṯ hašš^aḥar wayyāsōbû ’eṯ-hā‘îr kammišəpāṭ hazzeh šeḇ^a‘ pə‘āmîm raq bayywōm hahû’ sāḇəḇû ’eṯ-hā‘îr šeḇ^a‘ pə‘āmîm:

16 wayəhî bap^a‘am haššəḇî‘îṯ tāqə‘û hakōhănîm baššwōfārwōṯ wayyō’mer yəhwōšu‘a ’el-hā‘ām hārî‘û kî-nāṯan yəhwâ lāḵem ’eṯ-hā‘îr:

17 wəhāyəṯâ hā‘îr ḥērem hî’ wəḵāl-’ăšer-bāh layhwâ raq rāḥāḇ hazzwōnâ tiḥəyeh hî’ wəḵāl-’ăšer ’itāh babayiṯ kî heḥəbə’aṯâ ’eṯ-hammalə’āḵîm ’ăšer šālāḥənû:

18 wəraq-’atem šimərû min-h^aḥērem pen-t^aḥărîmû ûləq^aḥətem min-h^aḥērem wəśamətem ’eṯ-m^aḥănēh yiśərā’ēl ləḥērem w^a‘ăḵarətem ’wōṯwō:

19 wəḵōl| kesef wəzâāḇ ûḵəlê nəḥōšeṯ ûḇarəzel qōḏeš hû’ layhwâ ’wōṣar yəhwâ yāḇwō’:

20 wayyār^a‘ hā‘ām wayyiṯəqə‘û baššōfārwōṯ wayəhî ḵišəmō‘a hā‘ām ’eṯ-qwōl haššwōfār wayyārî‘û hā‘ām tərû‘â ḡəḏwōlâ watipōl h^aḥwōmâ t^aḥəteyhā wayy^a‘al hā‘ām hā‘îrâ ’îš neḡədwō wayyiləkəḏû ’eṯ-hā‘îr:

21 wayy^aḥărîmû ’eṯ-kāl-’ăšer bā‘îr mē’îš wə‘aḏ-’iššâ minn^a‘ar wə‘aḏ-zāqēn wə‘aḏ šwōr wāśeh w^aḥămwōr ləfî-ḥāreḇ:

22 wəlišənayim hā’ănāšîm haməragəlîm ’eṯ-hā’āreṣ ’āmar yəhwōšu‘a bō’û bêṯ-hā’iššâ hazzwōnâ wəhwōṣî’û miššām ’eṯ-hā’iššâ wə’eṯ-kāl-’ăšer-lāh ka’ăšer nišəb^a‘ətem lāh:

23 wayyāḇō’û hannə‘ārîm haməragəlîm wayyōṣî’û ’eṯ-rāḥāḇ wə’eṯ-’āḇîhā wə’eṯ-’immāh wə’eṯ-’^aḥeyhā wə’eṯ-kāl-’ăšer-lāh wə’ēṯ kāl-mišəpəḥwōṯeyhā hwōṣî’û wayyannîḥûm miḥûṣ ləm^aḥănēh yiśərā’ēl:

24 wəhā‘îr śārəfû ḇā’ēš wəḵāl-’ăšer-bāh raq| hakesef wəhazzâāḇ ûḵəlê hannəḥōšeṯ wəhabarəzel nāṯənû ’wōṣar bêṯ-yəhwâ:

25 wə’eṯ-rāḥāḇ hazzwōnâ wə’eṯ-bêṯ ’āḇîhā wə’eṯ-kāl-’ăšer-lāh heḥĕyâ yəhwōšu‘a watēšeḇ bəqereḇ yiśərā’ēl ‘aḏ hayywōm hazzeh kî heḥəbî’â ’eṯ-hammalə’āḵîm ’ăšer-šāl^aḥ yəhwōšu‘a ləragēl ’eṯ-yərîḥwō: f

26 wayyašəb^a‘ yəhwōšu‘a bā‘ēṯ hahî’ lē’mōr ’ārûr hā’îš lifənê yəhwâ ’ăšer yāqûm ûḇānâ ’eṯ-hā‘îr hazzō’ṯ ’eṯ-yərîḥwō biḇəḵōrwō yəyassəḏennâ ûḇiṣə‘îrwō yaṣṣîḇ dəlāṯeyhā:

27 wayəhî yəhwâ ’eṯ-yəhwōšu‘a wayəhî šāmə‘wō bəḵāl-hā’āreṣ: