‎1 ‏וַֽיְהִי֙ דְּבַר־יְהוָ֔ה אֶל־יוֹנָ֥ה בֶן־אֲמִתַּ֖י לֵאמֹֽר׃

‎2 ‏ק֠וּם לֵ֧ךְ אֶל־נִֽינְוֵ֛ה הָעִ֥יר הַגְּדוֹלָ֖ה וּקְרָ֣א עָלֶ֑יהָ כִּֽי־עָלְתָ֥ה רָעָתָ֖ם לְפָנָֽי׃

‎3 ‏וַיָּ֤קָם יוֹנָה֙ לִבְרֹ֣חַ תַּרְשִׁ֔ישָׁה מִלִּפְנֵ֖י יְהוָ֑ה וַיֵּ֨רֶד יָפ֜וֹ וַיִּמְצָ֥א אָנִיָּ֣ה׀¹ בָּאָ֣ה תַרְשִׁ֗ישׁ וַיִּתֵּ֨ן שְׂכָרָ֜הּ וַיֵּ֤רֶד בָּהּ֙ לָב֤וֹא עִמָּהֶם֙ תַּרְשִׁ֔ישָׁה מִלִּפְנֵ֖י יְהוָֽה׃

‎4 ‏וַֽיהוָ֗ה הֵטִ֤יל רֽוּחַ־גְּדוֹלָה֙ אֶל־הַיָּ֔ם וַיְהִ֥י סַֽעַר־גָּד֖וֹל בַּיָּ֑ם וְהָ֣אֳנִיָּ֔ה חִשְּׁבָ֖ה לְהִשָּׁבֵֽר׃

‎5 ‏וַיִּֽירְא֣וּ הַמַּלָּחִ֗ים וַֽיִּזְעֲקוּ֮ אִ֣ישׁ אֶל־אֱלֹהָיו֒ וַיָּטִ֨לוּ אֶת־הַכֵּלִ֜ים אֲשֶׁ֤ר בָּֽאֳנִיָּה֙ אֶל־הַיָּ֔ם לְהָקֵ֖ל מֵֽעֲלֵיהֶ֑ם וְיוֹנָ֗ה יָרַד֙ אֶל־יַרְכְּתֵ֣י הַסְּפִינָ֔ה וַיִּשְׁכַּ֖ב וַיֵּרָדַֽם׃

‎6 ‏וַיִּקְרַ֤ב אֵלָיו֙ רַ֣ב הַחֹבֵ֔ל וַיֹּ֥אמֶר ל֖וֹ מַה־לְּךָ֣ נִרְדָּ֑ם ק֚וּם קְרָ֣א אֶל־אֱלֹהֶ֔יךָ אוּלַ֞י יִתְעַשֵּׁ֧ת הָאֱלֹהִ֛ים לָ֖נוּ וְלֹ֥א נֹאבֵֽד׃

‎7 ‏וַיֹּאמְר֞וּ אִ֣ישׁ אֶל־רֵעֵ֗הוּ לְכוּ֙ וְנַפִּ֣ילָה גֽוֹרָל֔וֹת וְנֵ֣דְעָ֔ה בְּשֶׁלְּמִ֛י הָרָעָ֥ה הַזֹּ֖את לָ֑נוּ וַיַּפִּ֙לוּ֙ גּֽוֹרָל֔וֹת וַיִּפֹּ֥ל הַגּוֹרָ֖ל עַל־יוֹנָֽה׃

‎8 ‏וַיֹּאמְר֣וּ אֵלָ֔יו הַגִּידָה־נָּ֣א לָ֔נוּ בַּאֲשֶׁ֛ר לְמִי־הָרָעָ֥ה הַזֹּ֖את לָ֑נוּ מַה־מְּלַאכְתְּךָ֙ וּמֵאַ֣יִן תָּב֔וֹא מָ֣ה אַרְצֶ֔ךָ וְאֵֽי־מִזֶּ֥ה עַ֖ם אָֽתָּה׃

‎9 ‏וַיֹּ֥אמֶר אֲלֵיהֶ֖ם עִבְרִ֣י אָנֹ֑כִי וְאֶת־יְהוָ֞ה אֱלֹהֵ֤י הַשָּׁמַ֙יִם֙ אֲנִ֣י יָרֵ֔א אֲשֶׁר־עָשָׂ֥ה אֶת־הַיָּ֖ם וְאֶת־הַיַּבָּשָֽׁה׃

‎10 ‏וַיִּֽירְא֤וּ הָֽאֲנָשִׁים֙ יִרְאָ֣ה גְדוֹלָ֔ה וַיֹּאמְר֥וּ אֵלָ֖יו מַה־זֹּ֣את עָשִׂ֑יתָ כִּֽי־יָדְע֣וּ הָאֲנָשִׁ֗ים כִּֽי־מִלִּפְנֵ֤י יְהוָה֙ ה֣וּא בֹרֵ֔חַ כִּ֥י הִגִּ֖יד לָהֶֽם׃

‎11 ‏וַיֹּאמְר֤וּ אֵלָיו֙ מַה־נַּ֣עֲשֶׂה לָּ֔ךְ וְיִשְׁתֹּ֥ק הַיָּ֖ם מֵֽעָלֵ֑ינוּ כִּ֥י הַיָּ֖ם הוֹלֵ֥ךְ וְסֹעֵֽר׃

‎12 ‏וַיֹּ֣אמֶר אֲלֵיהֶ֗ם שָׂא֙וּנִי֙ וַהֲטִילֻ֣נִי אֶל־הַיָּ֔ם וְיִשְׁתֹּ֥ק הַיָּ֖ם מֵֽעֲלֵיכֶ֑ם כִּ֚י יוֹדֵ֣עַ אָ֔נִי כִּ֣י בְשֶׁלִּ֔י הַסַּ֧עַר הַגָּד֛וֹל הַזֶּ֖ה עֲלֵיכֶֽם׃

‎13 ‏וַיַּחְתְּר֣וּ הָאֲנָשִׁ֗ים לְהָשִׁ֛יב אֶל־הַיַּבָּשָׁ֖ה וְלֹ֣א יָכֹ֑לוּ כִּ֣י הַיָּ֔ם הוֹלֵ֥ךְ וְסֹעֵ֖ר עֲלֵיהֶֽם׃

‎14 ‏וַיִּקְרְא֨וּ אֶל־יְהוָ֜ה וַיֹּאמְר֗וּ אָנָּ֤ה יְהוָה֙ אַל־נָ֣א נֹאבְדָ֗ה בְּנֶ֙פֶשׁ֙ הָאִ֣ישׁ הַזֶּ֔ה וְאַל־תִּתֵּ֥ן עָלֵ֖ינוּ דָּ֣ם נָקִ֑יא כִּֽי־אַתָּ֣ה יְהוָ֔ה כַּאֲשֶׁ֥ר חָפַ֖צְתָּ עָשִֽׂיתָ׃

‎15 ‏וַיִּשְׂאוּ֙ אֶת־יוֹנָ֔ה וַיְטִלֻ֖הוּ אֶל־הַיָּ֑ם וַיַּעֲמֹ֥ד הַיָּ֖ם מִזַּעְפּֽוֹ׃

‎16 ‏וַיִּֽירְא֧וּ הָאֲנָשִׁ֛ים יִרְאָ֥ה גְדוֹלָ֖ה אֶת־יְהוָ֑ה וַיִּֽזְבְּחוּ־זֶ֙בַח֙ לַֽיהוָ֔ה וַֽיִּדְּר֖וּ נְדָרִֽים׃

1 wayəhî dəḇar-yəhwâ ’el-ywōnâ ḇen-’ămitay lē’mōr:

2 qûm lēḵə ’el-nînəwēh hā‘îr hagəḏwōlâ ûqərā’ ‘āleyhā kî-‘āləṯâ rā‘āṯām ləfānāy:

3 wayyāqām ywōnâ liḇərōḥa tarəšîšâ millifənê yəhwâ wayyēreḏ yāfwō wayyiməṣā’ ’ānîyâ|¹ bā’â ṯarəšîš wayyitēn śəḵārāh wayyēreḏ bāh lāḇwō’ ‘immâem tarəšîšâ millifənê yəhwâ:

4 wayhwâ hēṭîl rûḥa-gəḏwōlâ ’el-hayyām wayəhî s^a‘ar-gāḏwōl bayyām wəhā’ŏnîyâ ḥiššəḇâ ləhiššāḇēr:

5 wayyîrə’û hammallāḥîm wayyizə‘ăqû ’îš ’el-’ĕlōhāyw wayyāṭilû ’eṯ-hakēlîm ’ăšer bā’ŏnîyâ ’el-hayyām ləhāqēl mē‘ălêhem wəywōnâ yāraḏ ’el-yarəkəṯê hassəfînâ wayyišəkaḇ wayyērāḏam:

6 wayyiqəraḇ ’ēlāyw raḇ h^aḥōḇēl wayyō’mer lwō mah-lləḵā nirədām qûm qərā’ ’el-’ĕlōheyḵā ’ûlay yiṯə‘aššēṯ hā’ĕlōhîm lānû wəlō’ nō’ḇēḏ:

7 wayyō’mərû ’îš ’el-rē‘ēhû ləḵû wənapîlâ ḡwōrālwōṯ wənēḏə‘â bəšelləmî hārā‘â hazzō’ṯ lānû wayyapilû gwōrālwōṯ wayyipōl hagwōrāl ‘al-ywōnâ:

8 wayyō’mərû ’ēlāyw hagîḏâ-nnā’ lānû ba’ăšer ləmî-hārā‘â hazzō’ṯ lānû mah-mməla’ḵətəḵā ûmē’ayin tāḇwō’ mâ ’arəṣeḵā wə’ê-mizzeh ‘am ’ātâ:

9 wayyō’mer ’ălêhem ‘iḇərî ’ānōḵî wə’eṯ-yəhwâ ’ĕlōhê haššāmayim ’ănî yārē’ ’ăšer-‘āśâ ’eṯ-hayyām wə’eṯ-hayyabāšâ:

10 wayyîrə’û hā’ănāšîm yirə’â ḡəḏwōlâ wayyō’mərû ’ēlāyw mah-zzō’ṯ ‘āśîṯā kî-yāḏə‘û hā’ănāšîm kî-millifənê yəhwâ hû’ ḇōrēḥa kî higîḏ lâem:

11 wayyō’mərû ’ēlāyw mah-nn^a‘ăśeh llāḵə wəyišətōq hayyām mē‘ālênû kî hayyām hwōlēḵə wəsō‘ēr:

12 wayyō’mer ’ălêhem śā’ûnî wahăṭîlunî ’el-hayyām wəyišətōq hayyām mē‘ălêḵem kî ywōḏē‘a ’ānî kî ḇəšellî hass^a‘ar hagāḏwōl hazzeh ‘ălêḵem:

13 wayy^aḥətərû hā’ănāšîm ləhāšîḇ ’el-hayyabāšâ wəlō’ yāḵōlû kî hayyām hwōlēḵə wəsō‘ēr ‘ălêhem:

14 wayyiqərə’û ’el-yəhwâ wayyō’mərû ’ānnâ yəhwâ ’al-nā’ nō’ḇəḏâ bənefeš hā’îš hazzeh wə’al-titēn ‘ālênû dām nāqî’ kî-’atâ yəhwâ ka’ăšer ḥāfaṣətā ‘āśîṯā:

15 wayyiśə’û ’eṯ-ywōnâ wayəṭiluhû ’el-hayyām wayy^a‘ămōḏ hayyām mizz^a‘əpwō:

16 wayyîrə’û hā’ănāšîm yirə’â ḡəḏwōlâ ’eṯ-yəhwâ wayyizəbəḥû-zeḇ^aḥ layhwâ wayyidərû nəḏārîm: