‎1 ‏תִּקְע֨וּ שׁוֹפָ֜ר בְּצִיּ֗וֹן וְהָרִ֙יעוּ֙ בְּהַ֣ר קָדְשִׁ֔י יִרְגְּז֕וּ כֹּ֖ל יֹשְׁבֵ֣י הָאָ֑רֶץ כִּֽי־בָ֥א יוֹם־יְהוָ֖ה כִּ֥י קָרֽוֹב׃

‎2 ‏י֧וֹם חֹ֣שֶׁךְ וַאֲפֵלָ֗ה י֤וֹם עָנָן֙ וַעֲרָפֶ֔ל כְּשַׁ֖חַר פָּרֻ֣שׂ עַל־הֶֽהָרִ֑ים עַ֚ם רַ֣ב וְעָצ֔וּם כָּמֹ֗הוּ לֹ֤א נִֽהְיָה֙ מִן־הָ֣עוֹלָ֔ם וְאַֽחֲרָיו֙ לֹ֣א יוֹסֵ֔ף עַד־שְׁנֵ֖י דּ֥וֹר וָדֽוֹר׃

‎3 ‏לְפָנָיו֙ אָ֣כְלָה אֵ֔שׁ וְאַחֲרָ֖יו תְּלַהֵ֣ט לֶֽהָבָ֑ה כְּגַן־עֵ֨דֶן הָאָ֜רֶץ לְפָנָ֗יו וְאַֽחֲרָיו֙ מִדְבַּ֣ר שְׁמָמָ֔ה וְגַם־פְּלֵיטָ֖ה לֹא־הָ֥יְתָה לּֽוֹ׃

‎4 ‏כְּמַרְאֵ֥ה סוּסִ֖ים מַרְאֵ֑הוּ וּכְפָרָשִׁ֖ים כֵּ֥ן יְרוּצֽוּן׃

‎5 ‏כְּק֣וֹל מַרְכָּב֗וֹת עַל־רָאשֵׁ֤י הֶֽהָרִים֙ יְרַקֵּד֔וּן כְּקוֹל֙ לַ֣הַב אֵ֔שׁ אֹכְלָ֖ה קָ֑שׁ כְּעַ֣ם עָצ֔וּם עֱר֖וּךְ מִלְחָמָֽה׃

‎6 ‏מִפָּנָ֖יו יָחִ֣ילוּ עַמִּ֑ים כָּל־פָּנִ֖ים קִבְּצ֥וּ פָארֽוּר׃

‎7 ‏כְּגִבּוֹרִ֣ים יְרֻצ֔וּן כְּאַנְשֵׁ֥י מִלְחָמָ֖ה יַעֲל֣וּ חוֹמָ֑ה וְאִ֤ישׁ בִּדְרָכָיו֙ יֵֽלֵכ֔וּן וְלֹ֥א יְעַבְּט֖וּן אֹרְחוֹתָֽם׃

‎8 ‏וְאִ֤ישׁ אָחִיו֙ לֹ֣א יִדְחָק֔וּן גֶּ֥בֶר בִּמְסִלָּת֖וֹ יֵֽלֵכ֑וּן וּבְעַ֥ד הַשֶּׁ֛לַח יִפֹּ֖לוּ לֹ֥א יִבְצָֽעוּ׃

‎9 ‏בָּעִ֣יר יָשֹׁ֗קּוּ בַּֽחוֹמָה֙ יְרֻצ֔וּן בַּבָּתִּ֖ים יַעֲל֑וּ בְּעַ֧ד הַחַלּוֹנִ֛ים יָבֹ֖אוּ כַּגַּנָּֽב׃

‎10 ‏לְפָנָיו֙ רָ֣גְזָה אֶ֔רֶץ רָעֲשׁ֖וּ שָׁמָ֑יִם שֶׁ֤מֶשׁ וְיָרֵ֙חַ֙ קָדָ֔רוּ וְכוֹכָבִ֖ים אָסְפ֥וּ נָגְהָֽם׃

‎11 ‏וַֽיהוָ֗ה נָתַ֤ן קוֹלוֹ֙ לִפְנֵ֣י חֵיל֔וֹ כִּ֣י רַ֤ב מְאֹד֙ מַחֲנֵ֔הוּ כִּ֥י עָצ֖וּם עֹשֵׂ֣ה דְבָר֑וֹ כִּֽי־גָד֧וֹל יוֹם־יְהוָ֛ה וְנוֹרָ֥א מְאֹ֖ד וּמִ֥י יְכִילֶֽנּוּ׃

‎12 ‏וְגַם־עַתָּה֙ נְאֻם־יְהוָ֔ה שֻׁ֥בוּ עָדַ֖י בְּכָל־לְבַבְכֶ֑ם וּבְצ֥וֹם וּבְבְכִ֖י וּבְמִסְפֵּֽד׃

‎13 ‏וְקִרְע֤וּ לְבַבְכֶם֙ וְאַל־בִּגְדֵיכֶ֔ם וְשׁ֖וּבוּ אֶל־יְהוָ֣ה אֱלֹֽהֵיכֶ֑ם כִּֽי־חַנּ֤וּן וְרַחוּם֙ ה֔וּא אֶ֤רֶךְ אַפַּ֙יִם֙ וְרַב־חֶ֔סֶד וְנִחָ֖ם עַל־הָרָעָֽה׃

‎14 ‏מִ֥י יוֹדֵ֖עַ יָשׁ֣וּב וְנִחָ֑ם וְהִשְׁאִ֤יר אַֽחֲרָיו֙ בְּרָכָ֔ה מִנְחָ֣ה וָנֶ֔סֶךְ לַיהוָ֖ה אֱלֹהֵיכֶֽם׃ פ

‎15 ‏תִּקְע֥וּ שׁוֹפָ֖ר בְּצִיּ֑וֹן קַדְּשׁוּ־צ֖וֹם קִרְא֥וּ עֲצָרָֽה׃

‎16 ‏אִסְפוּ־עָ֞ם קַדְּשׁ֤וּ קָהָל֙ קִבְצ֣וּ זְקֵנִ֔ים אִסְפוּ֙ עֽוֹלָלִ֔ים וְיֹנְקֵ֖י שָׁדָ֑יִם יֵצֵ֤א חָתָן֙ מֵֽחֶדְר֔וֹ וְכַלָּ֖ה מֵחֻפָּתָֽהּ׃

‎17 ‏בֵּ֤ין הָאוּלָם֙ וְלַמִּזְבֵּ֔חַ יִבְכּוּ֙ הַכֹּ֣הֲנִ֔ים מְשָׁרְתֵ֖י יְהוָ֑ה וְֽיֹאמְר֞וּ ח֧וּסָה יְהוָ֣ה עַל־עַמֶּ֗ךָ וְאַל־תִּתֵּ֨ן נַחֲלָתְךָ֤ לְחֶרְפָּה֙ לִמְשָׁל־בָּ֣ם גּוֹיִ֔ם לָ֚מָּה יֹאמְר֣וּ בָֽעַמִּ֔ים אַיֵּ֖ה אֱלֹהֵיהֶֽם׃

‎18 ‏וַיְקַנֵּ֥א יְהוָ֖ה לְאַרְצ֑וֹ וַיַּחְמֹ֖ל עַל־עַמּֽוֹ׃

‎19 ‏וַיַּ֨עַן יְהוָ֜ה וַיֹּ֣אמֶר לְעַמּ֗וֹ הִנְנִ֨י שֹׁלֵ֤חַ לָכֶם֙ אֶת־הַדָּגָן֙ וְהַתִּיר֣וֹשׁ וְהַיִּצְהָ֔ר וּשְׂבַעְתֶּ֖ם אֹת֑וֹ וְלֹא־אֶתֵּ֨ן אֶתְכֶ֥ם ע֛וֹד חֶרְפָּ֖ה בַּגּוֹיִֽם׃

‎20 ‏וְֽאֶת־הַצְּפוֹנִ֞י אַרְחִ֣יק מֵעֲלֵיכֶ֗ם וְהִדַּחְתִּיו֮ אֶל־אֶ֣רֶץ צִיָּ֣ה וּשְׁמָמָה֒ אֶת־פָּנָ֗יו אֶל־הַיָּם֙ הַקַּדְמֹנִ֔י וְסֹפ֖וֹ אֶל־הַיָּ֣ם הָאַֽחֲר֑וֹן וְעָלָ֣ה בָאְשׁ֗וֹ וְתַ֙עַל֙ צַחֲנָת֔וֹ כִּ֥י הִגְדִּ֖יל לַעֲשֽׂוֹת׃

‎21 ‏אַל־תִּֽירְאִ֖י אֲדָמָ֑ה גִּ֣ילִי וּשְׂמָ֔חִי כִּֽי־הִגְדִּ֥יל יְהוָ֖ה לַעֲשֽׂוֹת׃

‎22 ‏אַל־תִּֽירְאוּ֙ בַּהֲמ֣וֹת שָׂדַ֔י כִּ֥י דָשְׁא֖וּ נְא֣וֹת מִדְבָּ֑ר כִּֽי־עֵץ֙ נָשָׂ֣א פִרְי֔וֹ תְּאֵנָ֥ה וָגֶ֖פֶן נָתְנ֥וּ חֵילָֽם׃

‎23 ‏וּבְנֵ֣י צִיּ֗וֹן גִּ֤ילוּ וְשִׂמְחוּ֙ בַּיהוָ֣ה אֱלֹֽהֵיכֶ֔ם כִּֽי־נָתַ֥ן לָכֶ֛ם אֶת־הַמּוֹרֶ֖ה לִצְדָקָ֑ה וַיּ֣וֹרֶד לָכֶ֗ם גֶּ֛שֶׁם מוֹרֶ֥ה וּמַלְק֖וֹשׁ בָּרִאשֽׁוֹן׃

‎24 ‏וּמָלְא֥וּ הַגֳּרָנ֖וֹת בָּ֑ר וְהֵשִׁ֥יקוּ הַיְקָבִ֖ים תִּיר֥וֹשׁ וְיִצְהָֽר׃

‎25 ‏וְשִׁלַּמְתִּ֤י לָכֶם֙ אֶת־הַשָּׁנִ֔ים אֲשֶׁר֙ אָכַ֣ל הָֽאַרְבֶּ֔ה הַיֶּ֖לֶק וְהֶחָסִ֣יל וְהַגָּזָ֑ם חֵילִי֙ הַגָּד֔וֹל אֲשֶׁ֥ר שִׁלַּ֖חְתִּי בָּכֶֽם׃

‎26 ‏וַאֲכַלְתֶּ֤ם אָכוֹל֙ וְשָׂב֔וֹעַ וְהִלַּלְתֶּ֗ם אֶת־שֵׁ֤ם יְהוָה֙ אֱלֹ֣הֵיכֶ֔ם אֲשֶׁר־עָשָׂ֥ה עִמָּכֶ֖ם לְהַפְלִ֑יא וְלֹא־יֵבֹ֥שׁוּ עַמִּ֖י לְעוֹלָֽם׃

‎27 ‏וִידַעְתֶּ֗ם כִּ֣י בְקֶ֤רֶב יִשְׂרָאֵל֙ אָ֔נִי וַאֲנִ֛י יְהוָ֥ה אֱלֹהֵיכֶ֖ם וְאֵ֣ין ע֑וֹד וְלֹא־יֵבֹ֥שׁוּ עַמִּ֖י לְעוֹלָֽם׃ ס

1 tiqə‘û šwōfār bəṣîywōn wəhārî‘û bəhar qāḏəšî yirəgəzû kōl yōšəḇê hā’āreṣ kî-ḇā’ ywōm-yəhwâ kî qārwōḇ:

2 ywōm ḥōšeḵə wa’ăfēlâ ywōm ‘ānān w^a‘ărāfel kəš^aḥar pāruś ‘al-hehārîm ‘am raḇ wə‘āṣûm kāmōhû lō’ nihəyâ min-hā‘wōlām wə’^aḥărāyw lō’ ywōsēf ‘aḏ-šənê dwōr wāḏwōr:

3 ləfānāyw ’āḵəlâ ’ēš wə’^aḥărāyw təlahēṭ lehāḇâ kəḡan-‘ēḏen hā’āreṣ ləfānāyw wə’^aḥărāyw miḏəbar šəmāmâ wəḡam-pəlêṭâ lō’-hāyəṯâ llwō:

4 kəmarə’ēh sûsîm marə’ēhû ûḵəfārāšîm kēn yərûṣûn:

5 kəqwōl marəkāḇwōṯ ‘al-rā’šê hehārîm yəraqqēḏûn kəqwōl lahaḇ ’ēš ’ōḵəlâ qāš kə‘am ‘āṣûm ‘ĕrûḵə miləḥāmâ:

6 mipānāyw yāḥîlû ‘ammîm kāl-pānîm qibəṣû fā’rûr:

7 kəḡibwōrîm yəruṣûn kə’anəšê miləḥāmâ y^a‘ălû ḥwōmâ wə’îš biḏərāḵāyw yēlēḵûn wəlō’ yə‘abəṭûn ’ōrəḥwōṯām:

8 wə’îš ’āḥîw lō’ yiḏəḥāqûn geḇer biməsillāṯwō yēlēḵûn ûḇə‘aḏ haššel^aḥ yipōlû lō’ yiḇəṣā‘û:

9 bā‘îr yāšōqqû b^aḥwōmâ yəruṣûn babātîm y^a‘ălû bə‘aḏ h^aḥallwōnîm yāḇō’û kagannāḇ:

10 ləfānāyw rāḡəzâ ’ereṣ rā‘ăšû šāmāyim šemeš wəyārēḥa qāḏārû wəḵwōḵāḇîm ’āsəfû nāḡəhām:

11 wayhwâ nāṯan qwōlwō lifənê ḥêlwō kî raḇ mə’ōḏ m^aḥănēhû kî ‘āṣûm ‘ōśēh ḏəḇārwō kî-ḡāḏwōl ywōm-yəhwâ wənwōrā’ mə’ōḏ ûmî yəḵîlennû:

12 wəḡam-‘atâ nə’um-yəhwâ šuḇû ‘āḏay bəḵāl-ləḇaḇəḵem ûḇəṣwōm ûḇəḇəḵî ûḇəmisəpēḏ:

13 wəqirə‘û ləḇaḇəḵem wə’al-biḡəḏêḵem wəšûḇû ’el-yəhwâ ’ĕlōhêḵem kî-ḥannûn wər^aḥûm hû’ ’ereḵə ’apayim wəraḇ-ḥeseḏ wəniḥām ‘al-hārā‘â:

14 mî ywōḏē‘a yāšûḇ wəniḥām wəhišə’îr ’^aḥărāyw bərāḵâ minəḥâ wāneseḵə layhwâ ’ĕlōhêḵem: f

15 tiqə‘û šwōfār bəṣîywōn qadəšû-ṣwōm qirə’û ‘ăṣārâ:

16 ’isəfû-‘ām qadəšû qâāl qiḇəṣû zəqēnîm ’isəfû ‘wōlālîm wəyōnəqê šāḏāyim yēṣē’ ḥāṯān mēḥeḏərwō wəḵallâ mēḥupāṯāh:

17 bên hā’ûlām wəlammizəbēḥa yiḇəkû hakōhănîm məšārəṯê yəhwâ wəyō’mərû ḥûsâ yəhwâ ‘al-‘ammeḵā wə’al-titēn n^aḥălāṯəḵā ləḥerəpâ liməšāl-bām gwōyim lāmmâ yō’mərû ḇā‘ammîm ’ayyēh ’ĕlōhêhem:

18 wayəqannē’ yəhwâ lə’arəṣwō wayy^aḥəmōl ‘al-‘ammwō:

19 wayy^a‘an yəhwâ wayyō’mer lə‘ammwō hinənî šōlēḥa lāḵem ’eṯ-hadāḡān wəhatîrwōš wəhayyiṣəhār ûśəḇ^a‘ətem ’ōṯwō wəlō’-’etēn ’eṯəḵem ‘wōḏ ḥerəpâ bagwōyim:

20 wə’eṯ-haṣṣəfwōnî ’arəḥîq mē‘ălêḵem wəhid^aḥətîw ’el-’ereṣ ṣîyâ ûšəmāmâ ’eṯ-pānāyw ’el-hayyām haqqaḏəmōnî wəsōfwō ’el-hayyām hā’^aḥărwōn wə‘ālâ ḇā’əšwō wəṯ^a‘al ṣ^aḥănāṯwō kî hiḡədîl l^a‘ăśwōṯ:

21 ’al-tîrə’î ’ăḏāmâ gîlî ûśəmāḥî kî-hiḡədîl yəhwâ l^a‘ăśwōṯ:

22 ’al-tîrə’û bahămwōṯ śāḏay kî ḏāšə’û nə’wōṯ miḏəbār kî-‘ēṣ nāśā’ firəywō tə’ēnâ wāḡefen nāṯənû ḥêlām:

23 ûḇənê ṣîywōn gîlû wəśiməḥû bayhwâ ’ĕlōhêḵem kî-nāṯan lāḵem ’eṯ-hammwōreh liṣəḏāqâ wayywōreḏ lāḵem gešem mwōreh ûmaləqwōš bāri’šwōn:

24 ûmālə’û hagŏrānwōṯ bār wəhēšîqû hayəqāḇîm tîrwōš wəyiṣəhār:

25 wəšillamətî lāḵem ’eṯ-haššānîm ’ăšer ’āḵal hā’arəbeh hayyeleq wəheḥāsîl wəhagāzām ḥêlî hagāḏwōl ’ăšer šill^aḥətî bāḵem:

26 wa’ăḵalətem ’āḵwōl wəśāḇwō‘a wəhillalətem ’eṯ-šēm yəhwâ ’ĕlōhêḵem ’ăšer-‘āśâ ‘immāḵem ləhafəlî’ wəlō’-yēḇōšû ‘ammî lə‘wōlām:

27 wîḏ^a‘ətem kî ḇəqereḇ yiśərā’ēl ’ānî wa’ănî yəhwâ ’ĕlōhêḵem wə’ên ‘wōḏ wəlō’-yēḇōšû ‘ammî lə‘wōlām: s