‎1 ‏נִדְרַ֙שְׁתִּי֙ לְל֣וֹא שָׁאָ֔לוּ נִמְצֵ֖אתִי לְלֹ֣א בִקְשֻׁ֑נִי אָמַ֙רְתִּי֙ הִנֵּ֣נִי הִנֵּ֔נִי אֶל־גּ֖וֹי לֹֽא־קֹרָ֥א בִשְׁמִֽי׃

‎2 ‏פֵּרַ֧שְׂתִּי יָדַ֛י כָּל־הַיּ֖וֹם אֶל־עַ֣ם סוֹרֵ֑ר הַהֹלְכִים֙ הַדֶּ֣רֶךְ לֹא־ט֔וֹב אַחַ֖ר מַחְשְׁבֹתֵיהֶֽם׃

‎3 ‏הָעָ֗ם הַמַּכְעִיסִ֥ים אוֹתִ֛י עַל־פָּנַ֖י תָּמִ֑יד זֹֽבְחִים֙ בַּגַּנּ֔וֹת וּֽמְקַטְּרִ֖ים עַל־הַלְּבֵנִֽים׃

‎4 ‏הַיֹּֽשְׁבִים֙ בַּקְּבָרִ֔ים וּבַנְּצוּרִ֖ים יָלִ֑ינוּ הָאֹֽכְלִים֙³ בְּשַׂ֣ר הַחֲזִ֔יר ופרק וּמְרַ֥ק פִּגֻּלִ֖ים כְּלֵיהֶֽם׃

‎5 ‏הָאֹֽמְרִים֙ קְרַ֣ב אֵלֶ֔יךָ אַל־תִּגַּשׁ־בִּ֖י כִּ֣י קְדַשְׁתִּ֑יךָ אֵ֚לֶּה עָשָׁ֣ן בְּאַפִּ֔י אֵ֥שׁ יֹקֶ֖דֶת כָּל־הַיּֽוֹם׃

‎6 ‏הִנֵּ֥ה כְתוּבָ֖ה לְפָנָ֑י לֹ֤א אֶחֱשֶׂה֙ כִּ֣י אִם־שִׁלַּ֔מְתִּי וְשִׁלַּמְתִּ֖י עַל־חֵיקָֽם׃

‎7 ‏עֲ֠וֹנֹתֵיכֶם וַעֲוֹנֹ֨ת אֲבוֹתֵיכֶ֤ם יַחְדָּו֙ אָמַ֣ר יְהוָ֔ה אֲשֶׁ֤ר קִטְּרוּ֙ עַל־הֶ֣הָרִ֔ים וְעַל־הַגְּבָע֖וֹת חֵרְפ֑וּנִי וּמַדֹּתִ֧י פְעֻלָּתָ֛ם רִֽאשֹׁנָ֖ה על־ אֶל־ חֵיקָֽם׃ ס

‎8 ‏כֹּ֣ה׀ אָמַ֣ר יְהוָ֗ה כַּאֲשֶׁ֨ר יִמָּצֵ֤א הַתִּירוֹשׁ֙ בָּֽאֶשְׁכּ֔וֹל וְאָמַר֙ אַל־תַּשְׁחִיתֵ֔הוּ כִּ֥י בְרָכָ֖ה בּ֑וֹ כֵּ֤ן אֶֽעֱשֶׂה֙ לְמַ֣עַן עֲבָדַ֔י לְבִלְתִּ֖י הַֽשְׁחִ֥ית הַכֹּֽל׃

‎9 ‏וְהוֹצֵאתִ֤י מִֽיַּעֲקֹב֙ זֶ֔רַע וּמִיהוּדָ֖ה יוֹרֵ֣שׁ הָרָ֑י וִירֵשׁ֣וּהָ בְחִירַ֔י וַעֲבָדַ֖י יִשְׁכְּנוּ־שָֽׁמָּה׃

‎10 ‏וְהָיָ֤ה הַשָּׁרוֹן֙ לִנְוֵה־צֹ֔אן וְעֵ֥מֶק עָכ֖וֹר לְרֵ֣בֶץ בָּקָ֑ר לְעַמִּ֖י אֲשֶׁ֥ר דְּרָשֽׁוּנִי׃

‎11 ‏וְאַתֶּם֙ עֹזְבֵ֣י יְהוָ֔ה הַשְּׁכֵחִ֖ים אֶת־הַ֣ר קָדְשִׁ֑י הַֽעֹרְכִ֤ים לַגַּד֙ שֻׁלְחָ֔ן וְהַֽמְמַלְאִ֖ים לַמְנִ֥י מִמְסָֽךְ׃

‎12 ‏וּמָנִ֨יתִי אֶתְכֶ֜ם לַחֶ֗רֶב וְכֻלְּכֶם֙ לַטֶּ֣בַח תִּכְרָ֔עוּ יַ֤עַן קָרָ֙אתִי֙ וְלֹ֣א עֲנִיתֶ֔ם דִּבַּ֖רְתִּי וְלֹ֣א שְׁמַעְתֶּ֑ם וַתַּעֲשׂ֤וּ הָרַע֙ בְּעֵינַ֔י וּבַאֲשֶׁ֥ר לֹֽא־חָפַ֖צְתִּי בְּחַרְתֶּֽם׃ פ

‎13 ‏לָכֵ֞ן כֹּה־אָמַ֣ר׀ אֲדֹנָ֣י יְהוִ֗ה הִנֵּ֨ה עֲבָדַ֤י׀ יֹאכֵ֙לוּ֙ וְאַתֶּ֣ם תִּרְעָ֔בוּ הִנֵּ֧ה עֲבָדַ֛י יִשְׁתּ֖וּ וְאַתֶּ֣ם תִּצְמָ֑אוּ הִנֵּ֧ה עֲבָדַ֛י יִשְׂמָ֖חוּ וְאַתֶּ֥ם תֵּבֹֽשׁוּ׃

‎14 ‏הִנֵּ֧ה עֲבָדַ֛י יָרֹ֖נּוּ מִטּ֣וּב לֵ֑ב וְאַתֶּ֤ם תִּצְעֲקוּ֙ מִכְּאֵ֣ב לֵ֔ב וּמִשֵּׁ֥בֶר ר֖וּחַ תְּיֵלִֽילוּ׃

‎15 ‏וְהִנַּחְתֶּ֨ם שִׁמְכֶ֤ם לִשְׁבוּעָה֙ לִבְחִירַ֔י וֶהֱמִיתְךָ֖ אֲדֹנָ֣י יְהוִ֑ה וְלַעֲבָדָ֥יו יִקְרָ֖א שֵׁ֥ם אַחֵֽר׃

‎16 ‏אֲשֶׁ֨ר הַמִּתְבָּרֵ֜ךְ בָּאָ֗רֶץ יִתְבָּרֵךְ֙ בֵּאלֹהֵ֣י אָמֵ֔ן וְהַנִּשְׁבָּ֣ע בָּאָ֔רֶץ יִשָּׁבַ֖ע בֵּאלֹהֵ֣י אָמֵ֑ן כִּ֣י נִשְׁכְּח֗וּ הַצָּרוֹת֙ הָרִ֣אשֹׁנ֔וֹת וְכִ֥י נִסְתְּר֖וּ מֵעֵינָֽי׃

‎17 ‏כִּֽי־הִנְנִ֥י בוֹרֵ֛א שָׁמַ֥יִם חֲדָשִׁ֖ים וָאָ֣רֶץ חֲדָשָׁ֑ה וְלֹ֤א תִזָּכַ֙רְנָה֙ הָרִ֣אשֹׁנ֔וֹת וְלֹ֥א תַעֲלֶ֖ינָה עַל־לֵֽב׃

‎18 ‏כִּֽי־אִם־שִׂ֤ישׂוּ וְגִ֙ילוּ֙ עֲדֵי־עַ֔ד אֲשֶׁ֖ר אֲנִ֣י בוֹרֵ֑א כִּי֩ הִנְנִ֨י בוֹרֵ֧א אֶת־יְרוּשָׁלִַ֛ם גִּילָ֖ה וְעַמָּ֥הּ מָשֽׂוֹשׂ׃

‎19 ‏וְגַלְתִּ֥י בִירוּשָׁלִַ֖ם וְשַׂשְׂתִּ֣י בְעַמִּ֑י וְלֹֽא־יִשָּׁמַ֥ע בָּהּ֙ ע֔וֹד ק֥וֹל בְּכִ֖י וְק֥וֹל זְעָקָֽה׃

‎20 ‏לֹא־יִֽהְיֶ֨ה מִשָּׁ֜ם ע֗וֹד ע֤וּל יָמִים֙ וְזָקֵ֔ן אֲשֶׁ֥ר לֹֽא־יְמַלֵּ֖א אֶת־יָמָ֑יו כִּ֣י הַנַּ֗עַר בֶּן־מֵאָ֤ה שָׁנָה֙ יָמ֔וּת וְהַ֣חוֹטֶ֔א בֶּן־מֵאָ֥ה שָׁנָ֖ה יְקֻלָּֽל׃

‎21 ‏וּבָנ֥וּ בָתִּ֖ים וְיָשָׁ֑בוּ וְנָטְע֣וּ כְרָמִ֔ים וְאָכְל֖וּ פִּרְיָֽם׃

‎22 ‏לֹ֤א יִבְנוּ֙ וְאַחֵ֣ר יֵשֵׁ֔ב לֹ֥א יִטְּע֖וּ וְאַחֵ֣ר יֹאכֵ֑ל כִּֽי־כִימֵ֤י הָעֵץ֙ יְמֵ֣י עַמִּ֔י וּמַעֲשֵׂ֥ה יְדֵיהֶ֖ם יְבַלּ֥וּ בְחִירָֽי׃

‎23 ‏לֹ֤א יִֽיגְעוּ֙ לָרִ֔יק וְלֹ֥א יֵלְד֖וּ לַבֶּהָלָ֑ה כִּ֣י זֶ֜רַע בְּרוּכֵ֤י יְהוָה֙ הֵ֔מָּה וְצֶאֱצָאֵיהֶ֖ם אִתָּֽם׃

‎24 ‏וְהָיָ֥ה טֶֽרֶם־יִקְרָ֖אוּ וַאֲנִ֣י אֶעֱנֶ֑ה ע֛וֹד הֵ֥ם מְדַבְּרִ֖ים וַאֲנִ֥י אֶשְׁמָֽע׃

‎25 ‏זְאֵ֨ב וְטָלֶ֜ה יִרְע֣וּ כְאֶחָ֗ד וְאַרְיֵה֙ כַּבָּקָ֣ר יֹֽאכַל־תֶּ֔בֶן וְנָחָ֖שׁ עָפָ֣ר לַחְמ֑וֹ לֹֽא־יָרֵ֧עוּ וְלֹֽא־יַשְׁחִ֛יתוּ בְּכָל־הַ֥ר קָדְשִׁ֖י אָמַ֥ר יְהוָֽה׃ ס

1 niḏərašətî ləlwō’ šā’ālû niməṣē’ṯî ləlō’ ḇiqəšunî ’āmarətî hinnēnî hinnēnî ’el-gwōy lō’-qōrā’ ḇišəmî:

2 pēraśətî yāḏay kāl-hayywōm ’el-‘am swōrēr hahōləḵîm hadereḵə lō’-ṭwōḇ ’^aḥar m^aḥəšəḇōṯêhem:

3 hā‘ām hammaḵə‘îsîm ’wōṯî ‘al-pānay tāmîḏ zōḇəḥîm bagannwōṯ ûməqaṭṭərîm ‘al-halləḇēnîm:

4 hayyōšəḇîm baqqəḇārîm ûḇannəṣûrîm yālînû hā’ōḵəlîm³ bəśar h^aḥăzîr ûfəraq ûməraq pigulîm kəlêhem:

5 hā’ōmərîm qəraḇ ’ēleyḵā ’al-tigaš-bî kî qəḏašətîḵā ’ēlleh ‘āšān bə’apî ’ēš yōqeḏeṯ kāl-hayywōm:

6 hinnēh ḵəṯûḇâ ləfānāy lō’ ’eḥĕśeh kî ’im-šillamətî wəšillamətî ‘al-ḥêqām:

7 ‘ăwōnōṯêḵem w^a‘ăwōnōṯ ’ăḇwōṯêḵem y^aḥədāw ’āmar yəhwâ ’ăšer qiṭṭərû ‘al-hehārîm wə‘al-hagəḇā‘wōṯ ḥērəfûnî ûmadōṯî fə‘ullāṯām ri’šōnâ ‘al- ’el- ḥêqām: s

8 kōh| ’āmar yəhwâ ka’ăšer yimmāṣē’ hatîrwōš bā’ešəkwōl wə’āmar ’al-tašəḥîṯēhû kî ḇərāḵâ bwō kēn ’e‘ĕśeh ləm^a‘an ‘ăḇāḏay ləḇilətî hašəḥîṯ hakōl:

9 wəhwōṣē’ṯî mîy^a‘ăqōḇ zer^a‘ ûmîhûḏâ ywōrēš hārāy wîrēšûhā ḇəḥîray w^a‘ăḇāḏay yišəkənû-šāmmâ:

10 wəhāyâ haššārwōn linəwēh-ṣō’n wə‘ēmeq ‘āḵwōr lərēḇeṣ bāqār lə‘ammî ’ăšer dərāšûnî:

11 wə’atem ‘ōzəḇê yəhwâ haššəḵēḥîm ’eṯ-har qāḏəšî h^a‘ōrəḵîm lagaḏ šuləḥān wəhaməmalə’îm lamənî miməsāḵə:

12 ûmānîṯî ’eṯəḵem l^aḥereḇ wəḵulləḵem laṭṭeḇ^aḥ tiḵərā‘û y^a‘an qārā’ṯî wəlō’ ‘ănîṯem dibarətî wəlō’ šəm^a‘ətem wat^a‘ăśû hār^a‘ bə‘ênay ûḇa’ăšer lō’-ḥāfaṣətî bəḥarətem: f

13 lāḵēn kōh-’āmar| ’ăḏōnāy yəhwih hinnēh ‘ăḇāḏay| yō’ḵēlû wə’atem tirə‘āḇû hinnēh ‘ăḇāḏay yišətû wə’atem tiṣəmā’û hinnēh ‘ăḇāḏay yiśəmāḥû wə’atem tēḇōšû:

14 hinnēh ‘ăḇāḏay yārōnnû miṭṭûḇ lēḇ wə’atem tiṣə‘ăqû mikə’ēḇ lēḇ ûmiššēḇer rûḥa təyēlîlû:

15 wəhinn^aḥətem šiməḵem lišəḇû‘â liḇəḥîray wehĕmîṯəḵā ’ăḏōnāy yəhwih wəl^a‘ăḇāḏāyw yiqərā’ šēm ’^aḥēr:

16 ’ăšer hammiṯəbārēḵə bā’āreṣ yiṯəbārēḵə bē’lōhê ’āmēn wəhannišəbā‘ bā’āreṣ yiššāḇ^a‘ bē’lōhê ’āmēn kî nišəkəḥû haṣṣārwōṯ hāri’šōnwōṯ wəḵî nisətərû mē‘ênāy:

17 kî-hinənî ḇwōrē’ šāmayim ḥăḏāšîm wā’āreṣ ḥăḏāšâ wəlō’ ṯizzāḵarənâ hāri’šōnwōṯ wəlō’ ṯ^a‘ăleynâ ‘al-lēḇ:

18 kî-’im-śîśû wəḡîlû ‘ăḏê-‘aḏ ’ăšer ’ănî ḇwōrē’ kî hinənî ḇwōrē’ ’eṯ-yərûšālaim gîlâ wə‘ammāh māśwōś:

19 wəḡalətî ḇîrûšālaim wəśaśətî ḇə‘ammî wəlō’-yiššām^a‘ bāh ‘wōḏ qwōl bəḵî wəqwōl zə‘āqâ:

20 lō’-yihəyeh miššām ‘wōḏ ‘ûl yāmîm wəzāqēn ’ăšer lō’-yəmallē’ ’eṯ-yāmāyw kî hann^a‘ar ben-mē’â šānâ yāmûṯ wəh^aḥwōṭe’ ben-mē’â šānâ yəqullāl:

21 ûḇānû ḇātîm wəyāšāḇû wənāṭə‘û ḵərāmîm wə’āḵəlû pirəyām:

22 lō’ yiḇənû wə’^aḥēr yēšēḇ lō’ yiṭṭə‘û wə’^aḥēr yō’ḵēl kî-ḵîmê hā‘ēṣ yəmê ‘ammî ûm^a‘ăśēh yəḏêhem yəḇallû ḇəḥîrāy:

23 lō’ yîḡə‘û lārîq wəlō’ yēləḏû labehālâ kî zer^a‘ bərûḵê yəhwâ hēmmâ wəṣe’ĕṣā’êhem ’itām:

24 wəhāyâ ṭerem-yiqərā’û wa’ănî ’e‘ĕneh ‘wōḏ hēm məḏabərîm wa’ănî ’ešəmā‘:

25 zə’ēḇ wəṭāleh yirə‘û ḵə’eḥāḏ wə’arəyēh kabāqār yō’ḵal-teḇen wənāḥāš ‘āfār l^aḥəmwō lō’-yārē‘û wəlō’-yašəḥîṯû bəḵāl-har qāḏəšî ’āmar yəhwâ: s