Sacred Texts  Bible  Index 
Polyglot  KJV  Sep  Vul 

Isaiah (Yisheyah) Index
  Previous  Next 

Tanach (Hebrew): Isaiah (Yisheyah) Chapter 55

1 ‏ה֤וֹי כָּל־צָמֵא֙ לְכ֣וּ לַמַּ֔יִם וַאֲשֶׁ֥ר אֵֽין־ל֖וֹ כָּ֑סֶף לְכ֤וּ שִׁבְרוּ֙ וֶֽאֱכֹ֔לוּ וּלְכ֣וּ שִׁבְר֗וּ בְּלוֹא־כֶ֛סֶף וּבְל֥וֹא מְחִ֖יר יַ֥יִן וְחָלָֽב׃

2 ‏לָ֤מָּה תִשְׁקְלוּ־כֶ֙סֶף֙ בְּֽלוֹא־לֶ֔חֶם וִיגִיעֲכֶ֖ם בְּל֣וֹא לְשָׂבְעָ֑ה שִׁמְע֨וּ שָׁמ֤וֹעַ אֵלַי֙ וְאִכְלוּ־ט֔וֹב וְתִתְעַנַּ֥ג בַּדֶּ֖שֶׁן נַפְשְׁכֶֽם׃

3 ‏הַטּ֤וּ אָזְנְכֶם֙ וּלְכ֣וּ אֵלַ֔י שִׁמְע֖וּ וּתְחִ֣י נַפְשְׁכֶ֑ם וְאֶכְרְתָ֤ה לָכֶם֙ בְּרִ֣ית עוֹלָ֔ם חַֽסְדֵ֥י דָוִ֖ד הַנֶּאֱמָנִֽים׃

4 ‏הֵ֛ן עֵ֥ד לְאוּמִּ֖ים נְתַתִּ֑יו נָגִ֥יד וּמְצַוֵּ֖ה לְאֻמִּֽים׃

5 ‏הֵ֣ן גּ֤וֹי לֹֽא־תֵדַע֙ תִּקְרָ֔א וְג֥וֹי לֹֽא־יְדָע֖וּךָ אֵלֶ֣יךָ יָר֑וּצוּ לְמַ֙עַן֙ יְהוָ֣ה אֱלֹהֶ֔יךָ וְלִקְד֥וֹשׁ יִשְׂרָאֵ֖ל כִּ֥י פֵאֲרָֽךְ׃ ס

6 ‏דִּרְשׁ֥וּ יְהוָ֖ה בְּהִמָּצְא֑וֹ קְרָאֻ֖הוּ בִּֽהְיוֹת֥וֹ קָרֽוֹב׃

7 ‏יַעֲזֹ֤ב רָשָׁע֙ דַּרְכּ֔וֹ וְאִ֥ישׁ אָ֖וֶן מַחְשְׁבֹתָ֑יו וְיָשֹׁ֤ב אֶל־יְהוָה֙ וִֽירַחֲמֵ֔הוּ וְאֶל־אֱלֹהֵ֖ינוּ כִּֽי־יַרְבֶּ֥ה לִסְלֽוֹחַ׃

8 ‏כִּ֣י לֹ֤א מַחְשְׁבוֹתַי֙ מַחְשְׁב֣וֹתֵיכֶ֔ם וְלֹ֥א דַרְכֵיכֶ֖ם דְּרָכָ֑י נְאֻ֖ם יְהוָֽה׃

9 ‏כִּֽי־גָבְה֥וּ שָׁמַ֖יִם מֵאָ֑רֶץ כֵּ֣ן גָּבְה֤וּ דְרָכַי֙ מִדַּרְכֵיכֶ֔ם וּמַחְשְׁבֹתַ֖י מִמַּחְשְׁבֹתֵיכֶֽם׃

10 ‏כִּ֡י כַּאֲשֶׁ֣ר יֵרֵד֩ הַגֶּ֨שֶׁם וְהַשֶּׁ֜לֶג מִן־הַשָּׁמַ֗יִם וְשָׁ֙מָּה֙ לֹ֣א יָשׁ֔וּב כִּ֚י אִם־הִרְוָ֣ה אֶת־הָאָ֔רֶץ וְהוֹלִידָ֖הּ וְהִצְמִיחָ֑הּ וְנָ֤תַן זֶ֙רַע֙ לַזֹּרֵ֔עַ וְלֶ֖חֶם לָאֹכֵֽל׃

11 ‏כֵּ֣ן יִֽהְיֶ֤ה דְבָרִי֙ אֲשֶׁ֣ר יֵצֵ֣א מִפִּ֔י לֹֽא־יָשׁ֥וּב אֵלַ֖י רֵיקָ֑ם כִּ֤י אִם־עָשָׂה֙ אֶת־אֲשֶׁ֣ר חָפַ֔צְתִּי וְהִצְלִ֖יחַ אֲשֶׁ֥ר שְׁלַחְתִּֽיו׃

12 ‏כִּֽי־בְשִׂמְחָ֣ה תֵצֵ֔אוּ וּבְשָׁל֖וֹם תּֽוּבָל֑וּן הֶהָרִ֣ים וְהַגְּבָע֗וֹת יִפְצְח֤וּ לִפְנֵיכֶם֙ רִנָּ֔ה וְכָל־עֲצֵ֥י הַשָּׂדֶ֖ה יִמְחֲאוּ־כָֽף׃

13 ‏תַּ֤חַת הַֽנַּעֲצוּץ֙ יַעֲלֶ֣ה בְר֔וֹשׁ תחת וְתַ֥חַת הַסִּרְפַּ֖ד יַעֲלֶ֣ה הֲדַ֑ס וְהָיָ֤ה לַֽיהוָה֙ לְשֵׁ֔ם לְא֥וֹת עוֹלָ֖ם לֹ֥א יִכָּרֵֽת׃ ס

1 hwōy kāl-ṣāmē’ ləḵû lammayim wa’ăšer ’ên-lwō kāsef ləḵû šiḇərû we’ĕḵōlû ûləḵû šiḇərû bəlwō’-ḵesef ûḇəlwō’ məḥîr yayin wəḥālāḇ:

2 lāmmâ ṯišəqəlû-ḵesef bəlwō’-leḥem wîḡî‘ăḵem bəlwō’ ləśāḇə‘â šimə‘û šāmwō‘a ’ēlay wə’iḵəlû-ṭwōḇ wəṯiṯə‘annaḡ badešen nafəšəḵem:

3 haṭṭû ’āzənəḵem ûləḵû ’ēlay šimə‘û ûṯəḥî nafəšəḵem wə’eḵərəṯâ lāḵem bərîṯ ‘wōlām ḥasəḏê ḏāwiḏ hanne’ĕmānîm:

4 hēn ‘ēḏ lə’ûmmîm nəṯatîw nāḡîḏ ûməṣaûēh lə’ummîm:

5 hēn gwōy lō’-ṯēḏa‘ tiqərā’ wəḡwōy lō’-yəḏā‘ûḵā ’ēleyḵā yārûṣû ləma‘an yəhwâ ’ĕlōheyḵā wəliqəḏwōš yiśərā’ēl kî fē’ărāḵə: s

6 dirəšû yəhwâ bəhimmāṣə’wō qərā’uhû bihəywōṯwō qārwōḇ:

7 ya‘ăzōḇ rāšā‘ darəkwō wə’îš ’āwen maḥəšəḇōṯāyw wəyāšōḇ ’el-yəhwâ wîraḥămēhû wə’el-’ĕlōhênû kî-yarəbeh lisəlwōḥa:

8 kî lō’ maḥəšəḇwōṯay maḥəšəḇwōṯêḵem wəlō’ ḏarəḵêḵem dərāḵāy nə’um yəhwâ:

9 kî-ḡāḇəhû šāmayim mē’āreṣ kēn gāḇəhû ḏərāḵay midarəḵêḵem ûmaḥəšəḇōṯay mimmaḥəšəḇōṯêḵem:

10 kî ka’ăšer yērēḏ hagešem wəhaššeleḡ min-haššāmayim wəšāmmâ lō’ yāšûḇ kî ’im-hirəwâ ’eṯ-hā’āreṣ wəhwōlîḏāh wəhiṣəmîḥāh wənāṯan zera‘ lazzōrē‘a wəleḥem lā’ōḵēl:

11 kēn yihəyeh ḏəḇārî ’ăšer yēṣē’ mipî lō’-yāšûḇ ’ēlay rêqām kî ’im-‘āśâ ’eṯ-’ăšer ḥāfaṣətî wəhiṣəlîḥa ’ăšer šəlaḥətîw:

12 kî-ḇəśiməḥâ ṯēṣē’û ûḇəšālwōm tûḇālûn hehārîm wəhagəḇā‘wōṯ yifəṣəḥû lifənêḵem rinnâ wəḵāl-‘ăṣê haśśāḏeh yiməḥă’û-ḵāf:

13 taḥaṯ hanna‘ăṣûṣ ya‘ăleh ḇərwōš taḥaṯ wəṯaḥaṯ hassirəpaḏ ya‘ăleh hăḏas wəhāyâ layhwâ ləšēm lə’wōṯ ‘wōlām lō’ yikārēṯ: s


Next: Isaiah (Yisheyah) Chapter 56