Sacred Texts  Bible  Index 
Polyglot  KJV  Sep  Vul 

Isaiah (Yisheyah) Index
  Previous  Next 

Tanach (Hebrew): Isaiah (Yisheyah) Chapter 38

1 ‏בַּיָּמִ֣ים הָהֵ֔ם חָלָ֥ה חִזְקִיָּ֖הוּ לָמ֑וּת וַיָּב֣וֹא אֵ֠לָיו יְשַׁעְיָ֨הוּ בֶן־אָמ֜וֹץ הַנָּבִ֗יא וַיֹּ֨אמֶר אֵלָ֜יו כֹּֽה־אָמַ֤ר יְהוָה֙ צַ֣ו לְבֵיתֶ֔ךָ כִּ֛י מֵ֥ת אַתָּ֖ה וְלֹ֥א תִֽחְיֶֽה׃

2 ‏וַיַּסֵּ֧ב חִזְקִיָּ֛הוּ פָּנָ֖יו אֶל־הַקִּ֑יר וַיִּתְפַּלֵּ֖ל אֶל־יְהוָֽה׃

3 ‏וַיֹּאמַ֗ר אָנָּ֤ה יְהוָה֙ זְכָר־נָ֞א אֵ֣ת אֲשֶׁ֧ר הִתְהַלַּ֣כְתִּי לְפָנֶ֗יךָ בֶּֽאֱמֶת֙ וּבְלֵ֣ב שָׁלֵ֔ם וְהַטּ֥וֹב בְּעֵינֶ֖יךָ עָשִׂ֑יתִי וַיֵּ֥בְךְּ חִזְקִיָּ֖הוּ בְּכִ֥י גָדֽוֹל׃ ס

4 ‏וַֽיְהִי֙ דְּבַר־יְהוָ֔ה אֶֽל־יְשַׁעְיָ֖הוּ לֵאמֹֽר׃

5 ‏הָל֞וֹךְ וְאָמַרְתָּ֣ אֶל־חִזְקִיָּ֗הוּ כֹּֽה־אָמַ֤ר יְהוָה֙ אֱלֹהֵי֙ דָּוִ֣ד אָבִ֔יךָ שָׁמַ֙עְתִּי֙ אֶת־תְּפִלָּתֶ֔ךָ רָאִ֖יתִי אֶת־דִּמְעָתֶ֑ךָ הִנְנִי֙ יוֹסִ֣ף עַל־יָמֶ֔יךָ חֲמֵ֥שׁ עֶשְׂרֵ֖ה שָׁנָֽה׃

6 ‏וּמִכַּ֤ף מֶֽלֶךְ־אַשּׁוּר֙ אַצִּ֣ילְךָ֔ וְאֵ֖ת הָעִ֣יר הַזֹּ֑את וְגַנּוֹתִ֖י עַל־הָעִ֥יר הַזֹּֽאת׃

7 ‏וְזֶה־לְּךָ֥ הָא֖וֹת מֵאֵ֣ת יְהוָ֑ה אֲשֶׁר֙ יַעֲשֶׂ֣ה יְהוָ֔ה אֶת־הַדָּבָ֥ר הַזֶּ֖ה אֲשֶׁ֥ר דִּבֵּֽר׃

8 ‏הִנְנִ֣י מֵשִׁ֣יב אֶת־צֵ֣ל הַֽמַּעֲל֡וֹת אֲשֶׁ֣ר יָרְדָה֩ בְמַעֲל֨וֹת אָחָ֥ז בַּשֶּׁ֛מֶשׁ אֲחֹרַנִּ֖ית עֶ֣שֶׂר מַעֲל֑וֹת וַתָּ֤שָׁב הַשֶּׁ֙מֶשׁ֙ עֶ֣שֶׂר מַעֲל֔וֹת בַּֽמַּעֲל֖וֹת אֲשֶׁ֥ר יָרָֽדָה׃ ס

9 ‏מִכְתָּ֖ב לְחִזְקִיָּ֣הוּ מֶֽלֶךְ־יְהוּדָ֑ה בַּחֲלֹת֕וֹ וַיְחִ֖י מֵחָלְיֽוֹ׃

10 ‏אֲנִ֣י אָמַ֗רְתִּי בִּדְמִ֥י יָמַ֛י אֵלֵ֖כָה בְּשַׁעֲרֵ֣י שְׁא֑וֹל פֻּקַּ֖דְתִּי יֶ֥תֶר שְׁנוֹתָֽי׃

11 ‏אָמַ֙רְתִּי֙ לֹא־אֶרְאֶ֣ה יָ֔הּ יָ֖הּ בְּאֶ֣רֶץ הַחַיִּ֑ים לֹא־אַבִּ֥יט אָדָ֛ם ע֖וֹד עִם־י֥וֹשְׁבֵי חָֽדֶל׃

12 ‏דּוֹרִ֗י נִסַּ֧ע וְנִגְלָ֛ה מִנִּ֖י כְּאֹ֣הֶל רֹעִ֑י קִפַּ֨דְתִּי כָאֹרֵ֤ג חַיַּי֙ מִדַּלָּ֣ה יְבַצְּעֵ֔נִי מִיּ֥וֹם עַד־לַ֖יְלָה תַּשְׁלִימֵֽנִי׃

13 ‏שִׁוִּ֤יתִי עַד־בֹּ֙קֶר֙ כָּֽאֲרִ֔י כֵּ֥ן יְשַׁבֵּ֖ר כָּל־עַצְמוֹתָ֑י מִיּ֥וֹם עַד־לַ֖יְלָה תַּשְׁלִימֵֽנִי׃

14 ‏כְּס֤וּס עָגוּר֙ כֵּ֣ן אֲצַפְצֵ֔ף אֶהְגֶּ֖ה כַּיּוֹנָ֑ה דַּלּ֤וּ עֵינַי֙ לַמָּר֔וֹם אֲדֹנָ֖י עָֽשְׁקָה־לִּ֥י עָרְבֵֽנִי׃

15 ‏מָֽה־אֲדַבֵּ֥ר וְאָֽמַר־לִ֖י וְה֣וּא עָשָׂ֑ה אֶדַּדֶּ֥ה כָל־שְׁנוֹתַ֖י עַל־מַ֥ר נַפְשִֽׁי׃

16 ‏אֲדֹנָ֖י עֲלֵיהֶ֣ם יִֽחְי֑וּ וּלְכָל־בָּהֶן֙ חַיֵּ֣י רוּחִ֔י וְתַחֲלִימֵ֖נִי וְהַחֲיֵֽנִי׃

17 ‏הִנֵּ֥ה לְשָׁל֖וֹם מַר־לִ֣י מָ֑ר וְאַתָּ֞ה חָשַׁ֤קְתָּ נַפְשִׁי֙ מִשַּׁ֣חַת בְּלִ֔י כִּ֥י הִשְׁלַ֛כְתָּ אַחֲרֵ֥י גֵוְךָ֖ כָּל־חֲטָאָֽי׃

18 ‏כִּ֣י לֹ֥א שְׁא֛וֹל תּוֹדֶ֖ךָּ מָ֣וֶת יְהַלְלֶ֑ךָּ לֹֽא־יְשַׂבְּר֥וּ יֽוֹרְדֵי־ב֖וֹר אֶל־אֲמִתֶּֽךָ׃

19 ‏חַ֥י חַ֛י ה֥וּא יוֹדֶ֖ךָ כָּמ֣וֹנִי הַיּ֑וֹם אָ֣ב לְבָנִ֔ים יוֹדִ֖יעַ אֶל־אֲמִתֶּֽךָ׃

20 ‏יְהוָ֖ה לְהוֹשִׁיעֵ֑נִי וּנְגִנוֹתַ֧י נְנַגֵּ֛ן כָּל־יְמֵ֥י חַיֵּ֖ינוּ עַל־בֵּ֥ית יְהוָֽה׃

21 ‏וַיֹּ֣אמֶר יְשַׁעְיָ֔הוּ יִשְׂא֖וּ דְּבֶ֣לֶת תְּאֵנִ֑ים וְיִמְרְח֥וּ עַֽל־הַשְּׁחִ֖ין וְיֶֽחִי׃

22 ‏וַיֹּ֥אמֶר חִזְקִיָּ֖הוּ מָ֣ה א֑וֹת כִּ֥י אֶעֱלֶ֖ה בֵּ֥ית יְהוָֽה׃ ס

1 bayyāmîm hâēm ḥālâ ḥizəqîyâû lāmûṯ wayyāḇwō’ ’ēlāyw yəša‘əyâû ḇen-’āmwōṣ hannāḇî’ wayyō’mer ’ēlāyw kōh-’āmar yəhwâ ṣaw ləḇêṯeḵā kî mēṯ ’atâ wəlō’ ṯiḥəyeh:

2 wayyassēḇ ḥizəqîyâû pānāyw ’el-haqqîr wayyiṯəpallēl ’el-yəhwâ:

3 wayyō’mar ’ānnâ yəhwâ zəḵār-nā’ ’ēṯ ’ăšer hiṯəhallaḵətî ləfāneyḵā be’ĕmeṯ ûḇəlēḇ šālēm wəhaṭṭwōḇ bə‘êneyḵā ‘āśîṯî wayyēḇəḵḵə ḥizəqîyâû bəḵî ḡāḏwōl: s

4 wayəhî dəḇar-yəhwâ ’el-yəša‘əyâû lē’mōr:

5 hālwōḵə wə’āmarətā ’el-ḥizəqîyâû kōh-’āmar yəhwâ ’ĕlōhê dāwiḏ ’āḇîḵā šāma‘ətî ’eṯ-təfillāṯeḵā rā’îṯî ’eṯ-dimə‘āṯeḵā hinənî ywōsif ‘al-yāmeyḵā ḥămēš ‘eśərēh šānâ:

6 ûmikaf meleḵə-’aššûr ’aṣṣîləḵā wə’ēṯ hā‘îr hazzō’ṯ wəḡannwōṯî ‘al-hā‘îr hazzō’ṯ:

7 wəzeh-lləḵā hā’wōṯ mē’ēṯ yəhwâ ’ăšer ya‘ăśeh yəhwâ ’eṯ-hadāḇār hazzeh ’ăšer dibēr:

8 hinənî mēšîḇ ’eṯ-ṣēl hamma‘ălwōṯ ’ăšer yārəḏâ ḇəma‘ălwōṯ ’āḥāz baššemeš ’ăḥōrannîṯ ‘eśer ma‘ălwōṯ watāšāḇ haššemeš ‘eśer ma‘ălwōṯ bamma‘ălwōṯ ’ăšer yārāḏâ: s

9 miḵətāḇ ləḥizəqîyâû meleḵə-yəhûḏâ baḥălōṯwō wayəḥî mēḥāləywō:

10 ’ănî ’āmarətî biḏəmî yāmay ’ēlēḵâ bəša‘ărê šə’wōl puqqaḏətî yeṯer šənwōṯāy:

11 ’āmarətî lō’-’erə’eh yāh yāh bə’ereṣ haḥayyîm lō’-’abîṭ ’āḏām ‘wōḏ ‘im-ywōšəḇê ḥāḏel:

12 dwōrî nissa‘ wəniḡəlâ minnî kə’ōhel rō‘î qipaḏətî ḵā’ōrēḡ ḥayyay midallâ yəḇaṣṣə‘ēnî mîywōm ‘aḏ-layəlâ tašəlîmēnî:

13 šiûîṯî ‘aḏ-bōqer kā’ărî kēn yəšabēr kāl-‘aṣəmwōṯāy mîywōm ‘aḏ-layəlâ tašəlîmēnî:

14 kəsûs ‘āḡûr kēn ’ăṣafəṣēf ’ehəgeh kayywōnâ dallû ‘ênay lammārwōm ’ăḏōnāy ‘āšəqâ-llî ‘ārəḇēnî:

15 mâ-’ăḏabēr wə’āmar-lî wəhû’ ‘āśâ ’edadeh ḵāl-šənwōṯay ‘al-mar nafəšî:

16 ’ăḏōnāy ‘ălêhem yiḥəyû ûləḵāl-bâen ḥayyê rûḥî wəṯaḥălîmēnî wəhaḥăyēnî:

17 hinnēh ləšālwōm mar-lî mār wə’atâ ḥāšaqətā nafəšî miššaḥaṯ bəlî kî hišəlaḵətā ’aḥărê ḡēwəḵā kāl-ḥăṭā’āy:

18 kî lō’ šə’wōl twōḏeḵḵā māweṯ yəhaləleḵḵā lō’-yəśabərû ywōrəḏê-ḇwōr ’el-’ămiteḵā:

19 ḥay ḥay hû’ ywōḏeḵā kāmwōnî hayywōm ’āḇ ləḇānîm ywōḏî‘a ’el-’ămiteḵā:

20 yəhwâ ləhwōšî‘ēnî ûnəḡinwōṯay nənagēn kāl-yəmê ḥayyênû ‘al-bêṯ yəhwâ:

21 wayyō’mer yəša‘əyâû yiśə’û dəḇeleṯ tə’ēnîm wəyimərəḥû ‘al-haššəḥîn wəyeḥî:

22 wayyō’mer ḥizəqîyâû mâ ’wōṯ kî ’e‘ĕleh bêṯ yəhwâ: s


Next: Isaiah (Yisheyah) Chapter 39