Sacred Texts  Bible  Index 
Polyglot  KJV  Sep  Vul 

Genesis (Bereshit) Index
  Previous  Next 

Tanach (Hebrew): Genesis (Bereshit) Chapter 34

1 ‏וַתֵּצֵ֤א דִינָה֙ בַּת־לֵאָ֔ה אֲשֶׁ֥ר יָלְדָ֖ה לְיַעֲקֹ֑ב לִרְא֖וֹת בִּבְנ֥וֹת הָאָֽרֶץ׃

2 ‏וַיַּ֨רְא אֹתָ֜הּ שְׁכֶ֧ם בֶּן־חֲמ֛וֹר הַֽחִוִּ֖י נְשִׂ֣יא הָאָ֑רֶץ וַיִּקַּ֥ח אֹתָ֛הּ וַיִּשְׁכַּ֥ב אֹתָ֖הּ וַיְעַנֶּֽהָ׃

3 ‏וַתִּדְבַּ֣ק נַפְשׁ֔וֹ בְּדִינָ֖ה בַּֽת־יַעֲקֹ֑ב וַיֶּֽאֱהַב֙ אֶת־הַֽנַּעֲרָ֔ וַיְדַבֵּ֖ר עַל־לֵ֥ב הַֽנַּעֲרָֽ׃

4 ‏וַיֹּ֣אמֶר שְׁכֶ֔ם אֶל־חֲמ֥וֹר אָבִ֖יו לֵאמֹ֑ר קַֽח־לִ֛י אֶת־הַיַּלְדָּ֥ה הַזֹּ֖את לְאִשָּֽׁה׃

5 ‏וְיַעֲקֹ֣ב שָׁמַ֗ע כִּ֤י טִמֵּא֙ אֶת־דִּינָ֣ה בִתּ֔וֹ וּבָנָ֛יו הָי֥וּ אֶת־מִקְנֵ֖הוּ בַּשָּׂדֶ֑ה וְהֶחֱרִ֥שׁ יַעֲקֹ֖ב עַד־בֹּאָֽם׃

6 ‏וַיֵּצֵ֛א חֲמ֥וֹר אֲבִֽי־שְׁכֶ֖ם אֶֽל־יַעֲקֹ֑ב לְדַבֵּ֖ר אִתּֽוֹ׃

7 ‏וּבְנֵ֨י יַעֲקֹ֜ב בָּ֤אוּ מִן־הַשָּׂדֶה֙ כְּשָׁמְעָ֔ם וַיִּֽתְעַצְּבוּ֙ הָֽאֲנָשִׁ֔ים וַיִּ֥חַר לָהֶ֖ם מְאֹ֑ד כִּֽי־נְבָלָ֞ה עָשָׂ֣ה בְיִשְׂרָאֵ֗ל לִשְׁכַּב֙ אֶת־בַּֽת־יַעֲקֹ֔ב וְכֵ֖ן לֹ֥א יֵעָשֶֽׂה׃

8 ‏וַיְדַבֵּ֥ר חֲמ֖וֹר אִתָּ֣ם לֵאמֹ֑ר שְׁכֶ֣ם בְּנִ֗י חָֽשְׁקָ֤ה נַפְשׁוֹ֙ בְּבִתְּכֶ֔ם תְּנ֨וּ נָ֥א אֹתָ֛הּ ל֖וֹ לְאִשָּֽׁה׃

9 ‏וְהִֽתְחַתְּנ֖וּ אֹתָ֑נוּ בְּנֹֽתֵיכֶם֙ תִּתְּנוּ־לָ֔נוּ וְאֶת־בְּנֹתֵ֖ינוּ תִּקְח֥וּ לָכֶֽם׃

10 ‏וְאִתָּ֖נוּ תֵּשֵׁ֑בוּ וְהָאָ֙רֶץ֙ תִּהְיֶ֣ה לִפְנֵיכֶ֔ם שְׁבוּ֙ וּסְחָר֔וּהָ וְהֵֽאָחֲז֖וּ בָּֽהּ׃

11 ‏וַיֹּ֤אמֶר שְׁכֶם֙ אֶל־אָבִ֣יה1 וְאֶל־אַחֶ֔יהָ אֶמְצָא־חֵ֖ן בְּעֵינֵיכֶ֑ם וַאֲשֶׁ֥ר תֹּאמְר֛וּ אֵלַ֖י אֶתֵּֽן׃

12 ‏הַרְבּ֨וּ עָלַ֤י מְאֹד֙ מֹ֣הַר וּמַתָּ֔ן וְאֶ֨תְּנָ֔ה כַּאֲשֶׁ֥ר תֹּאמְר֖וּ אֵלָ֑י וּתְנוּ־לִ֥י אֶת־הַֽנַּעֲרָ֖ לְאִשָּֽׁה׃

13 ‏וַיַּעֲנ֨וּ בְנֵֽי־יַעֲקֹ֜ב אֶת־שְׁכֶ֨ם וְאֶת־חֲמ֥וֹר אָבִ֛יו בְּמִרְמָ֖ה וַיְדַבֵּ֑רוּ אֲשֶׁ֣ר טִמֵּ֔א אֵ֖ת דִּינָ֥ה אֲחֹתָֽם׃

14 ‏וַיֹּאמְר֣וּ אֲלֵיהֶ֗ם לֹ֤א נוּכַל֙ לַעֲשׂוֹת֙ הַדָּבָ֣ר הַזֶּ֔ה לָתֵת֙ אֶת־אֲחֹתֵ֔נוּ לְאִ֖ישׁ אֲשֶׁר־ל֣וֹ עָרְלָ֑ה כִּֽי־חֶרְפָּ֥ה הִ֖וא לָֽנוּ׃

15 ‏אַךְ־בְּזֹ֖את נֵא֣וֹת לָכֶ֑ם אִ֚ם תִּהְי֣וּ כָמֹ֔נוּ לְהִמֹּ֥ל לָכֶ֖ם כָּל־זָכָֽר׃

16 ‏וְנָתַ֤נּוּ אֶת־בְּנֹתֵ֙ינוּ֙ לָכֶ֔ם וְאֶת־בְּנֹתֵיכֶ֖ם נִֽקַּֽח־לָ֑נוּ וְיָשַׁ֣בְנוּ אִתְּכֶ֔ם וְהָיִ֖ינוּ לְעַ֥ם אֶחָֽד׃

17 ‏וְאִם־לֹ֧א תִשְׁמְע֛וּ אֵלֵ֖ינוּ לְהִמּ֑וֹל וְלָקַ֥חְנוּ אֶת־בִּתֵּ֖נוּ וְהָלָֽכְנוּ׃

18 ‏וַיִּֽיטְב֥וּ דִבְרֵיהֶ֖ם בְּעֵינֵ֣י חֲמ֑וֹר וּבְעֵינֵ֖י שְׁכֶ֥ם בֶּן־חֲמֽוֹר׃

19 ‏וְלֹֽא־אֵחַ֤ר הַנַּ֙עַר֙ לַעֲשׂ֣וֹת הַדָּבָ֔ר כִּ֥י חָפֵ֖ץ בְּבַֽת־יַעֲקֹ֑ב וְה֣וּא נִכְבָּ֔ד מִכֹּ֖ל בֵּ֥ית אָבִֽיו׃

20 ‏וַיָּבֹ֥א חֲמ֛וֹר וּשְׁכֶ֥ם בְּנ֖וֹ אֶל־שַׁ֣עַר עִירָ֑ם וַֽיְדַבְּר֛וּ אֶל־אַנְשֵׁ֥י עִירָ֖ם לֵאמֹֽר׃

21 ‏הָאֲנָשִׁ֨ים הָאֵ֜לֶּה שְֽׁלֵמִ֧ים הֵ֣ם אִתָּ֗נוּ וְיֵשְׁב֤וּ בָאָ֙רֶץ֙ וְיִסְחֲר֣וּ אֹתָ֔הּ וְהָאָ֛רֶץ הִנֵּ֥ה רַֽחֲבַת־יָדַ֖יִם לִפְנֵיהֶ֑ם אֶת־בְּנֹתָם֙ נִקַּֽח־לָ֣נוּ לְנָשִׁ֔ים וְאֶת־בְּנֹתֵ֖ינוּ נִתֵּ֥ן לָהֶֽם׃

22 ‏אַךְ־בְּ֠זֹאת יֵאֹ֨תוּ לָ֤נוּ הָאֲנָשִׁים֙ לָשֶׁ֣בֶת אִתָּ֔נוּ לִהְי֖וֹת לְעַ֣ם אֶחָ֑ד בְּהִמּ֥וֹל לָ֙נוּ֙ כָּל־זָכָ֔ר כַּאֲשֶׁ֖ר הֵ֥ם נִמֹּלִֽים׃

23 ‏מִקְנֵהֶ֤ם וְקִנְיָנָם֙ וְכָל־בְּהֶמְתָּ֔ם הֲל֥וֹא לָ֖נוּ הֵ֑ם אַ֚ךְ נֵא֣וֹתָה לָהֶ֔ם וְיֵשְׁב֖וּ אִתָּֽנוּ׃

24 ‏וַיִּשְׁמְע֤וּ אֶל־חֲמוֹר֙ וְאֶל־שְׁכֶ֣ם בְּנ֔וֹ כָּל־יֹצְאֵ֖י שַׁ֣עַר עִיר֑וֹ וַיִּמֹּ֙לוּ֙ כָּל־זָכָ֔ר כָּל־יֹצְאֵ֖י שַׁ֥עַר עִירֽוֹ׃

25 ‏וַיְהִי֩ בַיּ֨וֹם הַשְּׁלִישִׁ֜י בִּֽהְיוֹתָ֣ם כֹּֽאֲבִ֗ים וַיִּקְח֣וּ שְׁנֵֽי־בְנֵי־יַ֠עֲקֹב שִׁמְע֨וֹן וְלֵוִ֜י אֲחֵ֤י דִינָה֙ אִ֣ישׁ חַרְבּ֔וֹ וַיָּבֹ֥אוּ עַל־הָעִ֖יר בֶּ֑טַח וַיַּֽהַרְג֖וּ כָּל־זָכָֽר׃

26 ‏וְאֶת־חֲמוֹר֙ וְאֶת־שְׁכֶ֣ם בְּנ֔וֹ הָרְג֖וּ לְפִי־חָ֑רֶב וַיִּקְח֧וּ אֶת־דִּינָ֛ה מִבֵּ֥ית שְׁכֶ֖ם וַיֵּצֵֽאוּ׃

27 ‏בְּנֵ֣י יַעֲקֹ֗ב בָּ֚אוּ עַל־הַ֣חֲלָלִ֔ים וַיָּבֹ֖זּוּ הָעִ֑יר אֲשֶׁ֥ר טִמְּא֖וּ אֲחוֹתָֽם׃

28 ‏אֶת־צֹאנָ֥ם וְאֶת־בְּקָרָ֖ם וְאֶת־חֲמֹרֵיהֶּ֑ם1 וְאֵ֧ת אֲשֶׁר־בָּעִ֛יר וְאֶת־אֲשֶׁ֥ר בַּשָּׂדֶ֖ה לָקָֽחוּ׃

29 ‏וְאֶת־כָּל־חֵילָ֤ם וְאֶת־כָּל־טַפָּם֙ וְאֶת־נְשֵׁיהֶ֔ם שָׁב֖וּ וַיָּבֹ֑זּוּ וְאֵ֖ת כָּל־אֲשֶׁ֥ר בַּבָּֽיִת׃

30 ‏וַיֹּ֨אמֶר יַעֲקֹ֜ב אֶל־שִׁמְע֣וֹן וְאֶל־לֵוִי֮ עֲכַרְתֶּ֣ם אֹתִי֒ לְהַבְאִישֵׁ֙נִי֙ בְּיֹשֵׁ֣ב הָאָ֔רֶץ בַּֽכְּנַעֲנִ֖י וּבַפְּרִזִּ֑י וַאֲנִי֙ מְתֵ֣י מִסְפָּ֔ר וְנֶאֶסְפ֤וּ עָלַי֙ וְהִכּ֔וּנִי וְנִשְׁמַדְתִּ֖י אֲנִ֥י וּבֵיתִֽי׃

31 ‏וַיֹּאמְר֑וּ הַכְזוֹנָ֕ה יַעֲשֶׂ֖ה אֶת־אֲחוֹתֵֽנוּ׃ פ

1 watēṣē’ ḏînâ baṯ-lē’â ’ăšer yāləḏâ ləya‘ăqōḇ lirə’wōṯ biḇənwōṯ hā’āreṣ:

2 wayyarə’ ’ōṯāh šəḵem ben-ḥămwōr haḥiûî nəśî’ hā’āreṣ wayyiqqaḥ ’ōṯāh wayyišəkaḇ ’ōṯāh wayə‘annehā:

3 watiḏəbaq nafəšwō bəḏînâ baṯ-ya‘ăqōḇ wayye’ĕhaḇ ’eṯ-hanna‘ărā wayəḏabēr ‘al-lēḇ hanna‘ărā:

4 wayyō’mer šəḵem ’el-ḥămwōr ’āḇîw lē’mōr qaḥ-lî ’eṯ-hayyalədâ hazzō’ṯ lə’iššâ:

5 wəya‘ăqōḇ šāma‘ kî ṭimmē’ ’eṯ-dînâ ḇitwō ûḇānāyw hāyû ’eṯ-miqənēhû baśśāḏeh wəheḥĕriš ya‘ăqōḇ ‘aḏ-bō’ām:

6 wayyēṣē’ ḥămwōr ’ăḇî-šəḵem ’el-ya‘ăqōḇ ləḏabēr ’itwō:

7 ûḇənê ya‘ăqōḇ bā’û min-haśśāḏeh kəšāmə‘ām wayyiṯə‘aṣṣəḇû hā’ănāšîm wayyiḥar lâem mə’ōḏ kî-nəḇālâ ‘āśâ ḇəyiśərā’ēl lišəkaḇ ’eṯ-baṯ-ya‘ăqōḇ wəḵēn lō’ yē‘āśeh:

8 wayəḏabēr ḥămwōr ’itām lē’mōr šəḵem bənî ḥāšəqâ nafəšwō bəḇitəḵem tənû nā’ ’ōṯāh lwō lə’iššâ:

9 wəhiṯəḥatənû ’ōṯānû bənōṯêḵem titənû-lānû wə’eṯ-bənōṯênû tiqəḥû lāḵem:

10 wə’itānû tēšēḇû wəhā’āreṣ tihəyeh lifənêḵem šəḇû ûsəḥārûhā wəhē’āḥăzû bāh:

11 wayyō’mer šəḵem ’el-’āḇîh1 wə’el-’aḥeyhā ’eməṣā’-ḥēn bə‘ênêḵem wa’ăšer tō’mərû ’ēlay ’etēn:

12 harəbû ‘ālay mə’ōḏ mōhar ûmatān wə’etənâ ka’ăšer tō’mərû ’ēlāy ûṯənû-lî ’eṯ-hanna‘ărā lə’iššâ:

13 wayya‘ănû ḇənê-ya‘ăqōḇ ’eṯ-šəḵem wə’eṯ-ḥămwōr ’āḇîw bəmirəmâ wayəḏabērû ’ăšer ṭimmē’ ’ēṯ dînâ ’ăḥōṯām:

14 wayyō’mərû ’ălêhem lō’ nûḵal la‘ăśwōṯ hadāḇār hazzeh lāṯēṯ ’eṯ-’ăḥōṯēnû lə’îš ’ăšer-lwō ‘ārəlâ kî-ḥerəpâ hiw’ lānû:

15 ’aḵə-bəzō’ṯ nē’wōṯ lāḵem ’im tihəyû ḵāmōnû ləhimmōl lāḵem kāl-zāḵār:

16 wənāṯannû ’eṯ-bənōṯênû lāḵem wə’eṯ-bənōṯêḵem niqqaḥ-lānû wəyāšaḇənû ’itəḵem wəhāyînû lə‘am ’eḥāḏ:

17 wə’im-lō’ ṯišəmə‘û ’ēlênû ləhimmwōl wəlāqaḥənû ’eṯ-bitēnû wəhālāḵənû:

18 wayyîṭəḇû ḏiḇərêhem bə‘ênê ḥămwōr ûḇə‘ênê šəḵem ben-ḥămwōr:

19 wəlō’-’ēḥar hanna‘ar la‘ăśwōṯ hadāḇār kî ḥāfēṣ bəḇaṯ-ya‘ăqōḇ wəhû’ niḵəbāḏ mikōl bêṯ ’āḇîw:

20 wayyāḇō’ ḥămwōr ûšəḵem bənwō ’el-ša‘ar ‘îrām wayəḏabərû ’el-’anəšê ‘îrām lē’mōr:

21 hā’ănāšîm hā’ēlleh šəlēmîm hēm ’itānû wəyēšəḇû ḇā’āreṣ wəyisəḥărû ’ōṯāh wəhā’āreṣ hinnēh raḥăḇaṯ-yāḏayim lifənêhem ’eṯ-bənōṯām niqqaḥ-lānû lənāšîm wə’eṯ-bənōṯênû nitēn lâem:

22 ’aḵə-bəzō’ṯ yē’ōṯû lānû hā’ănāšîm lāšeḇeṯ ’itānû lihəywōṯ lə‘am ’eḥāḏ bəhimmwōl lānû kāl-zāḵār ka’ăšer hēm nimmōlîm:

23 miqənēhem wəqinəyānām wəḵāl-bəhemətām hălwō’ lānû hēm ’aḵə nē’wōṯâ lâem wəyēšəḇû ’itānû:

24 wayyišəmə‘û ’el-ḥămwōr wə’el-šəḵem bənwō kāl-yōṣə’ê ša‘ar ‘îrwō wayyimmōlû kāl-zāḵār kāl-yōṣə’ê ša‘ar ‘îrwō:

25 wayəhî ḇayywōm haššəlîšî bihəywōṯām kō’ăḇîm wayyiqəḥû šənê-ḇənê-ya‘ăqōḇ šimə‘wōn wəlēwî ’ăḥê ḏînâ ’îš ḥarəbwō wayyāḇō’û ‘al-hā‘îr beṭaḥ wayyaharəḡû kāl-zāḵār:

26 wə’eṯ-ḥămwōr wə’eṯ-šəḵem bənwō hārəḡû ləfî-ḥāreḇ wayyiqəḥû ’eṯ-dînâ mibêṯ šəḵem wayyēṣē’û:

27 bənê ya‘ăqōḇ bā’û ‘al-haḥălālîm wayyāḇōzzû hā‘îr ’ăšer ṭimmə’û ’ăḥwōṯām:

28 ’eṯ-ṣō’nām wə’eṯ-bəqārām wə’eṯ-ḥămōrêhhem1 wə’ēṯ ’ăšer-bā‘îr wə’eṯ-’ăšer baśśāḏeh lāqāḥû:

29 wə’eṯ-kāl-ḥêlām wə’eṯ-kāl-ṭapām wə’eṯ-nəšêhem šāḇû wayyāḇōzzû wə’ēṯ kāl-’ăšer babāyiṯ:

30 wayyō’mer ya‘ăqōḇ ’el-šimə‘wōn wə’el-lēwî ‘ăḵarətem ’ōṯî ləhaḇə’îšēnî bəyōšēḇ hā’āreṣ bakəna‘ănî ûḇapərizzî wa’ănî məṯê misəpār wəne’esəfû ‘ālay wəhikûnî wənišəmaḏətî ’ănî ûḇêṯî:

31 wayyō’mərû haḵəzwōnâ ya‘ăśeh ’eṯ-’ăḥwōṯēnû: f


Next: Genesis (Bereshit) Chapter 35