Sacred Texts  Bible  Index 
Polyglot  KJV  Sep  Vul 

Genesis (Bereshit) Index
  Previous  Next 

Tanach (Hebrew): Genesis (Bereshit) Chapter 21

1 ‏וַֽיהוָ֛ה פָּקַ֥ד אֶת־שָׂרָ֖ה כַּאֲשֶׁ֣ר אָמָ֑ר וַיַּ֧עַשׂ יְהוָ֛ה לְשָׂרָ֖ה כַּאֲשֶׁ֥ר דִּבֵּֽר׃

2 ‏וַתַּהַר֩ וַתֵּ֨לֶד שָׂרָ֧ה לְאַבְרָהָ֛ם בֵּ֖ן לִזְקֻנָ֑יו לַמּוֹעֵ֕ד אֲשֶׁר־דִּבֶּ֥ר אֹת֖וֹ אֱלֹהִֽים׃

3 ‏וַיִּקְרָ֨א אַבְרָהָ֜ם אֶֽת־שֶׁם־בְּנ֧וֹ הַנּֽוֹלַד־ל֛וֹ אֲשֶׁר־יָלְדָה־לּ֥וֹ שָׂרָ֖ה יִצְחָֽק׃

4 ‏וַיָּ֤מָל אַבְרָהָם֙ אֶת־יִצְחָ֣ק בְּנ֔וֹ בֶּן־שְׁמֹנַ֖ת יָמִ֑ים כַּאֲשֶׁ֛ר צִוָּ֥ה אֹת֖וֹ אֱלֹהִֽים׃

5 ‏וְאַבְרָהָ֖ם בֶּן־מְאַ֣ת שָׁנָ֑ה בְּהִוָּ֣לֶד ל֔וֹ אֵ֖ת יִצְחָ֥ק בְּנֽוֹ׃

6 ‏וַתֹּ֣אמֶר שָׂרָ֔ה צְחֹ֕ק עָ֥שָׂה לִ֖י אֱלֹהִ֑ים כָּל־הַשֹּׁמֵ֖עַ יִֽצְחַק־לִֽי׃

7 ‏וַתֹּ֗אמֶר מִ֤י מִלֵּל֙ לְאַבְרָהָ֔ם הֵינִ֥יקָה בָנִ֖ים שָׂרָ֑ה כִּֽי־יָלַ֥דְתִּי בֵ֖ן לִזְקֻנָֽיו׃

8 ‏וַיִּגְדַּ֥ל הַיֶּ֖לֶד וַיִּגָּמַ֑ל וַיַּ֤עַשׂ אַבְרָהָם֙ מִשְׁתֶּ֣ה גָד֔וֹל בְּי֖וֹם הִגָּמֵ֥ל אֶת־יִצְחָֽק׃

9 ‏וַתֵּ֨רֶא שָׂרָ֜ה אֶֽת־בֶּן־הָגָ֧ר הַמִּצְרִ֛ית אֲשֶׁר־יָלְדָ֥ה לְאַבְרָהָ֖ם מְצַחֵֽק׃

10 ‏וַתֹּ֙אמֶר֙ לְאַבְרָהָ֔ם גָּרֵ֛שׁ הָאָמָ֥ה הַזֹּ֖את וְאֶת־בְּנָ֑הּ כִּ֣י לֹ֤א יִירַשׁ֙ בֶּן־הָאָמָ֣ה הַזֹּ֔את עִם־בְּנִ֖י עִם־יִצְחָֽק׃

11 ‏וַיֵּ֧רַע הַדָּבָ֛ר מְאֹ֖ד בְּעֵינֵ֣י אַבְרָהָ֑ם עַ֖ל אוֹדֹ֥ת בְּנֽוֹ׃

12 ‏וַיֹּ֨אמֶר אֱלֹהִ֜ים אֶל־אַבְרָהָ֗ם אַל־יֵרַ֤ע בְּעֵינֶ֙יךָ֙ עַל־הַנַּ֣עַר וְעַל־אֲמָתֶ֔ךָ כֹּל֩ אֲשֶׁ֨ר תֹּאמַ֥ר אֵלֶ֛יךָ שָׂרָ֖ה שְׁמַ֣ע בְּקֹלָ֑הּ כִּ֣י בְיִצְחָ֔ק יִקָּרֵ֥א לְךָ֖ זָֽרַע׃

13 ‏וְגַ֥ם אֶת־בֶּן־הָאָמָ֖ה לְג֣וֹי אֲשִׂימֶ֑נּוּ כִּ֥י זַרְעֲךָ֖ הֽוּא׃

14 ‏וַיַּשְׁכֵּ֣ם אַבְרָהָ֣ם׀ בַּבֹּ֡קֶר וַיִּֽקַּֽח־לֶחֶם֩ וְחֵ֨מַת מַ֜יִם וַיִּתֵּ֣ן אֶל־הָ֠גָר שָׂ֧ם עַל־שִׁכְמָ֛הּ וְאֶת־הַיֶּ֖לֶד וַֽיְשַׁלְּחֶ֑הָ וַתֵּ֣לֶךְ וַתֵּ֔תַע בְּמִדְבַּ֖ר בְּאֵ֥ר שָֽׁבַע׃

15 ‏וַיִּכְל֥וּ הַמַּ֖יִם מִן־הַחֵ֑מֶת וַתַּשְׁלֵ֣ךְ אֶת־הַיֶּ֔לֶד תַּ֖חַת אַחַ֥ד הַשִּׂיחִֽם׃

16 ‏וַתֵּלֶךְ֩ וַתֵּ֨שֶׁב לָ֜הּ מִנֶּ֗גֶד הַרְחֵק֙ כִּמְטַחֲוֵ֣י קֶ֔שֶׁת כִּ֣י אָֽמְרָ֔ה אַל־אֶרְאֶ֖ה בְּמ֣וֹת הַיָּ֑לֶד וַתֵּ֣שֶׁב מִנֶּ֔גֶד וַתִּשָּׂ֥א אֶת־קֹלָ֖הּ וַתֵּֽבְךְּ׃

17 ‏וַיִּשְׁמַ֣ע אֱלֹהִים֮ אֶת־ק֣וֹל הַנַּעַר֒ וַיִּקְרָא֩ מַלְאַ֨ךְ אֱלֹהִ֤ים׀ אֶל־הָגָר֙ מִן־הַשָּׁמַ֔יִם וַיֹּ֥אמֶר לָ֖הּ מַה־לָּ֣ךְ הָגָ֑ר אַל־תִּ֣ירְאִ֔י כִּֽי־שָׁמַ֧ע אֱלֹהִ֛ים אֶל־ק֥וֹל הַנַּ֖עַר בַּאֲשֶׁ֥ר הוּא־שָֽׁם׃

18 ‏ק֚וּמִי שְׂאִ֣י אֶת־הַנַּ֔עַר וְהַחֲזִ֥יקִי אֶת־יָדֵ֖ךְ בּ֑וֹ כִּֽי־לְג֥וֹי גָּד֖וֹל אֲשִׂימֶֽנּוּ׃

19 ‏וַיִּפְקַ֤ח אֱלֹהִים֙ אֶת־עֵינֶ֔יהָ וַתֵּ֖רֶא בְּאֵ֣ר מָ֑יִם וַתֵּ֜לֶךְ וַתְּמַלֵּ֤א אֶת־הַחֵ֙מֶת֙ מַ֔יִם וַתַּ֖שְׁקְ אֶת־הַנָּֽעַר׃

20 ‏וַיְהִ֧י אֱלֹהִ֛ים אֶת־הַנַּ֖עַר וַיִּגְדָּ֑ל וַיֵּ֙שֶׁב֙ בַּמִּדְבָּ֔ר וַיְהִ֖י רֹבֶ֥ה קַשָּֽׁת׃

21 ‏וַיֵּ֖שֶׁב בְּמִדְבַּ֣ר פָּארָ֑ן וַתִּֽקַּֽח־ל֥וֹ אִמּ֛וֹ אִשָּׁ֖ה מֵאֶ֥רֶץ מִצְרָֽיִם׃ פ

22 ‏וַֽיְהִי֙ בָּעֵ֣ת הַהִ֔וא וַיֹּ֣אמֶר אֲבִימֶ֗לֶךְ וּפִיכֹל֙ שַׂר־צְבָא֔וֹ אֶל־אַבְרָהָ֖ם לֵאמֹ֑ר אֱלֹהִ֣ים עִמְּךָ֔ בְּכֹ֥ל אֲשֶׁר־אַתָּ֖ה עֹשֶֽׂה׃

23 ‏וְעַתָּ֗ה הִשָּׁ֨בְעָה לִּ֤י בֵֽאלֹהִים֙ הֵ֔נָּה אִם־תִּשְׁקֹ֣ר לִ֔י וּלְנִינִ֖י וּלְנֶכְדִּ֑י כַּחֶ֜סֶד אֲשֶׁר־עָשִׂ֤יתִי עִמְּךָ֙ תַּעֲשֶׂ֣ה עִמָּדִ֔י וְעִם־הָאָ֖רֶץ אֲשֶׁר־גַּ֥רְתָּה בָּֽהּ׃

24 ‏וַיֹּ֙אמֶר֙ אַבְרָהָ֔ם אָנֹכִ֖י אִשָּׁבֵֽעַ׃

25 ‏וְהוֹכִ֥חַ אַבְרָהָ֖ם אֶת־אֲבִימֶ֑לֶךְ עַל־אֹדוֹת֙ בְּאֵ֣ר הַמַּ֔יִם אֲשֶׁ֥ר גָּזְל֖וּ עַבְדֵ֥י אֲבִימֶֽלֶךְ׃

26 ‏וַיֹּ֣אמֶר אֲבִימֶ֔לֶךְ לֹ֣א יָדַ֔עְתִּי מִ֥י עָשָׂ֖ה אֶת־הַדָּבָ֣ר הַזֶּ֑ה וְגַם־אַתָּ֞ה לֹא־הִגַּ֣דְתָּ לִּ֗י וְגַ֧ם אָנֹכִ֛י לֹ֥א שָׁמַ֖עְתִּי בִּלְתִּ֥י הַיּֽוֹם׃

27 ‏וַיִּקַּ֤ח אַבְרָהָם֙ צֹ֣אן וּבָקָ֔ר וַיִּתֵּ֖ן לַאֲבִימֶ֑לֶךְ וַיִּכְרְת֥וּ שְׁנֵיהֶ֖ם בְּרִֽית׃

28 ‏וַיַּצֵּ֣ב אַבְרָהָ֗ם אֶת־שֶׁ֛בַע כִּבְשֹׂ֥ת הַצֹּ֖אן לְבַדְּהֶֽן׃

29 ‏וַיֹּ֥אמֶר אֲבִימֶ֖לֶךְ אֶל־אַבְרָהָ֑ם מָ֣ה הֵ֗נָּה שֶׁ֤בַע כְּבָשֹׂת֙ הָאֵ֔לֶּה אֲשֶׁ֥ר הִצַּ֖בְתָּ לְבַדָּֽנָה׃

30 ‏וַיֹּ֕אמֶר כִּ֚י אֶת־שֶׁ֣בַע כְּבָשֹׂ֔ת תִּקַּ֖ח מִיָּדִ֑י בַּעֲבוּר֙ תִּֽהְיֶה־לִּ֣י לְעֵדָ֔ה כִּ֥י חָפַ֖רְתִּי אֶת־הַבְּאֵ֥ר הַזֹּֽאת׃

31 ‏עַל־כֵּ֗ן קָרָ֛א לַמָּק֥וֹם הַה֖וּא בְּאֵ֣ר שָׁ֑בַע כִּ֛י שָׁ֥ם נִשְׁבְּע֖וּ שְׁנֵיהֶֽם׃

32 ‏וַיִּכְרְת֥וּ בְרִ֖ית בִּבְאֵ֣ר שָׁ֑בַע וַיָּ֣קָם אֲבִימֶ֗לֶךְ וּפִיכֹל֙ שַׂר־צְבָא֔וֹ וַיָּשֻׁ֖בוּ אֶל־אֶ֥רֶץ פְּלִשְׁתִּֽים׃

33 ‏וַיִּטַּ֥ע אֶ֖שֶׁל בִּבְאֵ֣ר שָׁ֑בַע וַיִּ֨קְרָא־שָׁ֔ם בְּשֵׁ֥ם יְהוָ֖ה אֵ֥ל עוֹלָֽם׃

34 ‏וַיָּ֧גָר אַבְרָהָ֛ם בְּאֶ֥רֶץ פְּלִשְׁתִּ֖ים יָמִ֥ים רַבִּֽים׃ פ

1 wayhwâ pāqaḏ ’eṯ-śārâ ka’ăšer ’āmār wayya‘aś yəhwâ ləśārâ ka’ăšer dibēr:

2 watahar watēleḏ śārâ lə’aḇərâām bēn lizəqunāyw lammwō‘ēḏ ’ăšer-diber ’ōṯwō ’ĕlōhîm:

3 wayyiqərā’ ’aḇərâām ’eṯ-šem-bənwō hannwōlaḏ-lwō ’ăšer-yāləḏâ-llwō śārâ yiṣəḥāq:

4 wayyāmāl ’aḇərâām ’eṯ-yiṣəḥāq bənwō ben-šəmōnaṯ yāmîm ka’ăšer ṣiûâ ’ōṯwō ’ĕlōhîm:

5 wə’aḇərâām ben-mə’aṯ šānâ bəhiûāleḏ lwō ’ēṯ yiṣəḥāq bənwō:

6 watō’mer śārâ ṣəḥōq ‘āśâ lî ’ĕlōhîm kāl-haššōmē‘a yiṣəḥaq-lî:

7 watō’mer mî millēl lə’aḇərâām hênîqâ ḇānîm śārâ kî-yālaḏətî ḇēn lizəqunāyw:

8 wayyiḡədal hayyeleḏ wayyigāmal wayya‘aś ’aḇərâām mišəteh ḡāḏwōl bəywōm higāmēl ’eṯ-yiṣəḥāq:

9 watēre’ śārâ ’eṯ-ben-hāḡār hammiṣərîṯ ’ăšer-yāləḏâ lə’aḇərâām məṣaḥēq:

10 watō’mer lə’aḇərâām gārēš hā’āmâ hazzō’ṯ wə’eṯ-bənāh kî lō’ yîraš ben-hā’āmâ hazzō’ṯ ‘im-bənî ‘im-yiṣəḥāq:

11 wayyēra‘ hadāḇār mə’ōḏ bə‘ênê ’aḇərâām ‘al ’wōḏōṯ bənwō:

12 wayyō’mer ’ĕlōhîm ’el-’aḇərâām ’al-yēra‘ bə‘êneyḵā ‘al-hanna‘ar wə‘al-’ămāṯeḵā kōl ’ăšer tō’mar ’ēleyḵā śārâ šəma‘ bəqōlāh kî ḇəyiṣəḥāq yiqqārē’ ləḵā zāra‘:

13 wəḡam ’eṯ-ben-hā’āmâ ləḡwōy ’ăśîmennû kî zarə‘ăḵā hû’:

14 wayyašəkēm ’aḇərâām| babōqer wayyiqqaḥ-leḥem wəḥēmaṯ mayim wayyitēn ’el-hāḡār śām ‘al-šiḵəmāh wə’eṯ-hayyeleḏ wayəšalləḥehā watēleḵə watēṯa‘ bəmiḏəbar bə’ēr šāḇa‘:

15 wayyiḵəlû hammayim min-haḥēmeṯ watašəlēḵə ’eṯ-hayyeleḏ taḥaṯ ’aḥaḏ haśśîḥim:

16 watēleḵə watēšeḇ lāh minneḡeḏ harəḥēq kiməṭaḥăwê qešeṯ kî ’āmərâ ’al-’erə’eh bəmwōṯ hayyāleḏ watēšeḇ minneḡeḏ watiśśā’ ’eṯ-qōlāh watēḇəḵḵə:

17 wayyišəma‘ ’ĕlōhîm ’eṯ-qwōl hanna‘ar wayyiqərā’ malə’aḵə ’ĕlōhîm| ’el-hāḡār min-haššāmayim wayyō’mer lāh mah-llāḵə hāḡār ’al-tîrə’î kî-šāma‘ ’ĕlōhîm ’el-qwōl hanna‘ar ba’ăšer hû’-šām:

18 qûmî śə’î ’eṯ-hanna‘ar wəhaḥăzîqî ’eṯ-yāḏēḵə bwō kî-ləḡwōy gāḏwōl ’ăśîmennû:

19 wayyifəqaḥ ’ĕlōhîm ’eṯ-‘êneyhā watēre’ bə’ēr māyim watēleḵə watəmallē’ ’eṯ-haḥēmeṯ mayim watašəqə ’eṯ-hannā‘ar:

20 wayəhî ’ĕlōhîm ’eṯ-hanna‘ar wayyiḡədāl wayyēšeḇ bammiḏəbār wayəhî rōḇeh qaššāṯ:

21 wayyēšeḇ bəmiḏəbar pā’rān watiqqaḥ-lwō ’immwō ’iššâ mē’ereṣ miṣərāyim: f

22 wayəhî bā‘ēṯ hahiw’ wayyō’mer ’ăḇîmeleḵə ûfîḵōl śar-ṣəḇā’wō ’el-’aḇərâām lē’mōr ’ĕlōhîm ‘imməḵā bəḵōl ’ăšer-’atâ ‘ōśeh:

23 wə‘atâ hiššāḇə‘â llî ḇē’lōhîm hēnnâ ’im-tišəqōr lî ûlənînî ûləneḵədî kaḥeseḏ ’ăšer-‘āśîṯî ‘imməḵā ta‘ăśeh ‘immāḏî wə‘im-hā’āreṣ ’ăšer-garətâ bāh:

24 wayyō’mer ’aḇərâām ’ānōḵî ’iššāḇē‘a:

25 wəhwōḵiḥa ’aḇərâām ’eṯ-’ăḇîmeleḵə ‘al-’ōḏwōṯ bə’ēr hammayim ’ăšer gāzəlû ‘aḇəḏê ’ăḇîmeleḵə:

26 wayyō’mer ’ăḇîmeleḵə lō’ yāḏa‘ətî mî ‘āśâ ’eṯ-hadāḇār hazzeh wəḡam-’atâ lō’-higaḏətā llî wəḡam ’ānōḵî lō’ šāma‘ətî bilətî hayywōm:

27 wayyiqqaḥ ’aḇərâām ṣō’n ûḇāqār wayyitēn la’ăḇîmeleḵə wayyiḵərəṯû šənêhem bərîṯ:

28 wayyaṣṣēḇ ’aḇərâām ’eṯ-šeḇa‘ kiḇəśōṯ haṣṣō’n ləḇadəhen:

29 wayyō’mer ’ăḇîmeleḵə ’el-’aḇərâām mâ hēnnâ šeḇa‘ kəḇāśōṯ hā’ēlleh ’ăšer hiṣṣaḇətā ləḇadānâ:

30 wayyō’mer kî ’eṯ-šeḇa‘ kəḇāśōṯ tiqqaḥ mîyāḏî ba‘ăḇûr tihəyeh-llî lə‘ēḏâ kî ḥāfarətî ’eṯ-habə’ēr hazzō’ṯ:

31 ‘al-kēn qārā’ lammāqwōm hahû’ bə’ēr šāḇa‘ kî šām nišəbə‘û šənêhem:

32 wayyiḵərəṯû ḇərîṯ biḇə’ēr šāḇa‘ wayyāqām ’ăḇîmeleḵə ûfîḵōl śar-ṣəḇā’wō wayyāšuḇû ’el-’ereṣ pəlišətîm:

33 wayyiṭṭa‘ ’ešel biḇə’ēr šāḇa‘ wayyiqərā’-šām bəšēm yəhwâ ’ēl ‘wōlām:

34 wayyāḡār ’aḇərâām bə’ereṣ pəlišətîm yāmîm rabîm: f


Next: Genesis (Bereshit) Chapter 22