Sacred Texts  Bible  Index 
Polyglot  KJV  Sep  Vul 

Genesis (Bereshit) Index
  Previous  Next 

Tanach (Hebrew): Genesis (Bereshit) Chapter 4

1 ‏וְהָ֣אָדָ֔ם יָדַ֖ע אֶת־חַוָּ֣ה אִשְׁתּ֑וֹ וַתַּ֙הַר֙ וַתֵּ֣לֶד אֶת־קַ֔יִן וַתֹּ֕אמֶר קָנִ֥יתִי אִ֖ישׁ אֶת־יְהוָֽה׃

2 ‏וַתֹּ֣סֶף לָלֶ֔דֶת אֶת־אָחִ֖יו אֶת־הָ֑בֶל וַֽיְהִי־הֶ֙בֶל֙ רֹ֣עֵה צֹ֔אן וְקַ֕יִן הָיָ֖ה עֹבֵ֥ד אֲדָמָֽה׃

3 ‏וַֽיְהִ֖י מִקֵּ֣ץ יָמִ֑ים וַיָּבֵ֨א קַ֜יִן מִפְּרִ֧י הָֽאֲדָמָ֛ה מִנְחָ֖ה לַֽיהוָֽה׃

4 ‏וְהֶ֨בֶל הֵבִ֥יא גַם־ה֛וּא מִבְּכֹר֥וֹת צֹאנ֖וֹ וּמֵֽחֶלְבֵהֶ֑ן וַיִּ֣שַׁע יְהוָ֔ה אֶל־הֶ֖בֶל וְאֶל־מִנְחָתֽוֹ׃

5 ‏וְאֶל־קַ֥יִן וְאֶל־מִנְחָת֖וֹ לֹ֣א שָׁעָ֑ה וַיִּ֤חַר לְקַ֙יִן֙ מְאֹ֔ד וַֽיִּפְּל֖וּ פָּנָֽיו׃

6 ‏וַיֹּ֥אמֶר יְהוָ֖ה אֶל־קָ֑יִן לָ֚מָּה חָ֣רָה לָ֔ךְ וְלָ֖מָּה נָפְל֥וּ פָנֶֽיךָ׃

7 ‏הֲל֤וֹא אִם־תֵּיטִיב֙ שְׂאֵ֔ת וְאִם֙ לֹ֣א תֵיטִ֔יב לַפֶּ֖תַח חַטָּ֣את רֹבֵ֑ץ וְאֵלֶ֙יךָ֙ תְּשׁ֣וּקָת֔וֹ וְאַתָּ֖ה תִּמְשָׁל־בּֽוֹ׃

8 ‏וַיֹּ֥אמֶר קַ֖יִן אֶל־הֶ֣בֶל אָחִ֑יו וַֽיְהִי֙ בִּהְיוֹתָ֣ם בַּשָּׂדֶ֔ה וַיָּ֥קָם קַ֛יִן אֶל־הֶ֥בֶל אָחִ֖יו וַיַּהַרְגֵֽהוּ׃

9 ‏וַיֹּ֤אמֶר יְהוָה֙ אֶל־קַ֔יִן אֵ֖י הֶ֣בֶל אָחִ֑יךָ וַיֹּ֙אמֶר֙ לֹ֣א יָדַ֔עְתִּי הֲשֹׁמֵ֥ר אָחִ֖י אָנֹֽכִי׃

10 ‏וַיֹּ֖אמֶר מֶ֣ה עָשִׂ֑יתָ ק֚וֹל דְּמֵ֣י אָחִ֔יךָ צֹעֲקִ֥ים אֵלַ֖י מִן־הָֽאֲדָמָֽה׃

11 ‏וְעַתָּ֖ה אָר֣וּר אָ֑תָּה מִן־הָֽאֲדָמָה֙ אֲשֶׁ֣ר פָּצְתָ֣ה אֶת־פִּ֔יהָ לָקַ֛חַת אֶת־דְּמֵ֥י אָחִ֖יךָ מִיָּדֶֽךָ׃

12 ‏כִּ֤י תַֽעֲבֹד֙ אֶת־הָ֣אֲדָמָ֔ה לֹֽא־תֹסֵ֥ף תֵּת־כֹּחָ֖הּ לָ֑ךְ נָ֥ע וָנָ֖ד תִּֽהְיֶ֥ה בָאָֽרֶץ׃

13 ‏וַיֹּ֥אמֶר קַ֖יִן אֶל־יְהוָ֑ה גָּד֥וֹל עֲוֹנִ֖י מִנְּשֹֽׂא׃

14 ‏הֵן֩ גֵּרַ֨שְׁתָּ אֹתִ֜י הַיּ֗וֹם מֵעַל֙ פְּנֵ֣י הָֽאֲדָמָ֔ה וּמִפָּנֶ֖יךָ אֶסָּתֵ֑ר וְהָיִ֜יתִי נָ֤ע וָנָד֙ בָּאָ֔רֶץ וְהָיָ֥ה כָל־מֹצְאִ֖י יַֽהַרְגֵֽנִי׃

15 ‏וַיֹּ֧אמֶר ל֣וֹ יְהוָ֗ה לָכֵן֙ כָּל־הֹרֵ֣ג קַ֔יִן שִׁבְעָתַ֖יִם יֻקָּ֑ם וַיָּ֨שֶׂם יְהוָ֤ה לְקַ֙יִן֙ א֔וֹת לְבִלְתִּ֥י הַכּוֹת־אֹת֖וֹ כָּל־מֹצְאֽוֹ׃

16 ‏וַיֵּ֥צֵא קַ֖יִן מִלִּפְנֵ֣י יְהוָ֑ה וַיֵּ֥שֶׁב בְּאֶֽרֶץ־נ֖וֹד קִדְמַת־עֵֽדֶן׃

17 ‏וַיֵּ֤דַע קַ֙יִן֙ אֶת־אִשְׁתּ֔וֹ וַתַּ֖הַר וַתֵּ֣לֶד אֶת־חֲנ֑וֹךְ וַֽיְהִי֙ בֹּ֣נֶה עִ֔יר וַיִּקְרָא֙ שֵׁ֣ם הָעִ֔יר כְּשֵׁ֖ם בְּנ֥וֹ חֲנֽוֹךְ׃

18 ‏וַיִּוָּלֵ֤ד לַֽחֲנוֹךְ֙ אֶת־עִירָ֔ד וְעִירָ֕ד יָלַ֖ד אֶת־מְחֽוּיָאֵ֑ל וּמְחִיּיָאֵ֗ל יָלַד֙ אֶת־מְת֣וּשָׁאֵ֔ל וּמְתוּשָׁאֵ֖ל יָלַ֥ד אֶת־לָֽמֶךְ׃

19 ‏וַיִּֽקַּֽח־ל֥וֹ לֶ֖מֶךְ שְׁתֵּ֣י נָשִׁ֑ים שֵׁ֤ם הָֽאַחַת֙ עָדָ֔ה וְשֵׁ֥ם הַשֵּׁנִ֖ית צִלָּֽה׃

20 ‏וַתֵּ֥לֶד עָדָ֖ה אֶת־יָבָ֑ל ה֣וּא הָיָ֔ה אֲבִ֕י יֹשֵׁ֥ב אֹ֖הֶל וּמִקְנֶֽה׃

21 ‏וְשֵׁ֥ם אָחִ֖יו יוּבָ֑ל ה֣וּא הָיָ֔ה אֲבִ֕י כָּל־תֹּפֵ֥שׂ כִּנּ֖וֹר וְעוּגָֽב׃

22 ‏וְצִלָּ֣ה גַם־הִ֗וא יָֽלְדָה֙ אֶת־תּ֣וּבַל קַ֔יִן לֹטֵ֕שׁ כָּל־חֹרֵ֥שׁ נְחֹ֖שֶׁת וּבַרְזֶ֑ל וַֽאֲח֥וֹת תּֽוּבַל־קַ֖יִן נַֽעֲמָֽה׃

23 ‏וַיֹּ֨אמֶר לֶ֜מֶךְ לְנָשָׁ֗יו עָדָ֤ה וְצִלָּה֙ שְׁמַ֣עַן קוֹלִ֔י נְשֵׁ֣י לֶ֔מֶךְ הַאְזֵ֖נָּה אִמְרָתִ֑י כִּ֣י אִ֤ישׁ הָרַ֙גְתִּי֙ לְפִצְעִ֔י וְיֶ֖לֶד לְחַבֻּרָתִֽי׃

24 ‏כִּ֥י שִׁבְעָתַ֖יִם יֻקַּם־קָ֑יִן וְלֶ֖מֶךְ שִׁבְעִ֥ים וְשִׁבְעָֽה׃

25 ‏וַיֵּ֨דַע אָדָ֥ם עוֹד֙ אֶת־אִשְׁתּ֔וֹ וַתֵּ֣לֶד בֵּ֔ן וַתִּקְרָ֥א אֶת־שְׁמ֖וֹ שֵׁ֑ת כִּ֣י שָֽׁת־לִ֤י אֱלֹהִים֙ זֶ֣רַע אַחֵ֔ר תַּ֣חַת הֶ֔בֶל כִּ֥י הֲרָג֖וֹ קָֽיִן׃

26 ‏וּלְשֵׁ֤ת גַּם־הוּא֙ יֻלַּד־בֵּ֔ן וַיִּקְרָ֥א אֶת־שְׁמ֖וֹ אֱנ֑וֹשׁ אָ֣ז הוּחַ֔ל לִקְרֹ֖א בְּשֵׁ֥ם יְהוָֽה׃ פ

1 wəhā’āḏām yāḏa‘ ’eṯ-ḥaûâ ’išətwō watahar watēleḏ ’eṯ-qayin watō’mer qānîṯî ’îš ’eṯ-yəhwâ:

2 watōsef lāleḏeṯ ’eṯ-’āḥîw ’eṯ-hāḇel wayəhî-heḇel rō‘ēh ṣō’n wəqayin hāyâ ‘ōḇēḏ ’ăḏāmâ:

3 wayəhî miqqēṣ yāmîm wayyāḇē’ qayin mipərî hā’ăḏāmâ minəḥâ layhwâ:

4 wəheḇel hēḇî’ ḡam-hû’ mibəḵōrwōṯ ṣō’nwō ûmēḥeləḇēhen wayyiša‘ yəhwâ ’el-heḇel wə’el-minəḥāṯwō:

5 wə’el-qayin wə’el-minəḥāṯwō lō’ šā‘â wayyiḥar ləqayin mə’ōḏ wayyipəlû pānāyw:

6 wayyō’mer yəhwâ ’el-qāyin lāmmâ ḥārâ lāḵə wəlāmmâ nāfəlû fāneyḵā:

7 hălwō’ ’im-têṭîḇ śə’ēṯ wə’im lō’ ṯêṭîḇ lapeṯaḥ ḥaṭṭā’ṯ rōḇēṣ wə’ēleyḵā təšûqāṯwō wə’atâ timəšāl-bwō:

8 wayyō’mer qayin ’el-heḇel ’āḥîw wayəhî bihəywōṯām baśśāḏeh wayyāqām qayin ’el-heḇel ’āḥîw wayyaharəḡēhû:

9 wayyō’mer yəhwâ ’el-qayin ’ê heḇel ’āḥîḵā wayyō’mer lō’ yāḏa‘ətî hăšōmēr ’āḥî ’ānōḵî:

10 wayyō’mer meh ‘āśîṯā qwōl dəmê ’āḥîḵā ṣō‘ăqîm ’ēlay min-hā’ăḏāmâ:

11 wə‘atâ ’ārûr ’ātâ min-hā’ăḏāmâ ’ăšer pāṣəṯâ ’eṯ-pîhā lāqaḥaṯ ’eṯ-dəmê ’āḥîḵā mîyāḏeḵā:

12 kî ṯa‘ăḇōḏ ’eṯ-hā’ăḏāmâ lō’-ṯōsēf tēṯ-kōḥāh lāḵə nā‘ wānāḏ tihəyeh ḇā’āreṣ:

13 wayyō’mer qayin ’el-yəhwâ gāḏwōl ‘ăwōnî minnəśō’:

14 hēn gērašətā ’ōṯî hayywōm mē‘al pənê hā’ăḏāmâ ûmipāneyḵā ’essāṯēr wəhāyîṯî nā‘ wānāḏ bā’āreṣ wəhāyâ ḵāl-mōṣə’î yaharəḡēnî:

15 wayyō’mer lwō yəhwâ lāḵēn kāl-hōrēḡ qayin šiḇə‘āṯayim yuqqām wayyāśem yəhwâ ləqayin ’wōṯ ləḇilətî hakwōṯ-’ōṯwō kāl-mōṣə’wō:

16 wayyēṣē’ qayin millifənê yəhwâ wayyēšeḇ bə’ereṣ-nwōḏ qiḏəmaṯ-‘ēḏen:

17 wayyēḏa‘ qayin ’eṯ-’išətwō watahar watēleḏ ’eṯ-ḥănwōḵə wayəhî bōneh ‘îr wayyiqərā’ šēm hā‘îr kəšēm bənwō ḥănwōḵə:

18 wayyiûālēḏ laḥănwōḵə ’eṯ-‘îrāḏ wə‘îrāḏ yālaḏ ’eṯ-məḥûyā’ēl ûməḥîyyā’ēl yālaḏ ’eṯ-məṯûšā’ēl ûməṯûšā’ēl yālaḏ ’eṯ-lāmeḵə:

19 wayyiqqaḥ-lwō lemeḵə šətê nāšîm šēm hā’aḥaṯ ‘āḏâ wəšēm haššēnîṯ ṣillâ:

20 watēleḏ ‘āḏâ ’eṯ-yāḇāl hû’ hāyâ ’ăḇî yōšēḇ ’ōhel ûmiqəneh:

21 wəšēm ’āḥîw yûḇāl hû’ hāyâ ’ăḇî kāl-tōfēś kinnwōr wə‘ûḡāḇ:

22 wəṣillâ ḡam-hiw’ yāləḏâ ’eṯ-tûḇal qayin lōṭēš kāl-ḥōrēš nəḥōšeṯ ûḇarəzel wa’ăḥwōṯ tûḇal-qayin na‘ămâ:

23 wayyō’mer lemeḵə lənāšāyw ‘āḏâ wəṣillâ šəma‘an qwōlî nəšê lemeḵə ha’əzēnnâ ’imərāṯî kî ’îš hāraḡətî ləfiṣə‘î wəyeleḏ ləḥaburāṯî:

24 kî šiḇə‘āṯayim yuqqam-qāyin wəlemeḵə šiḇə‘îm wəšiḇə‘â:

25 wayyēḏa‘ ’āḏām ‘wōḏ ’eṯ-’išətwō watēleḏ bēn watiqərā’ ’eṯ-šəmwō šēṯ kî šāṯ-lî ’ĕlōhîm zera‘ ’aḥēr taḥaṯ heḇel kî hărāḡwō qāyin:

26 ûləšēṯ gam-hû’ yullaḏ-bēn wayyiqərā’ ’eṯ-šəmwō ’ĕnwōš ’āz hûḥal liqərō’ bəšēm yəhwâ: f


Next: Genesis (Bereshit) Chapter 5