‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏בֶּן־אָדָ֕ם הוֹדַ֥ע אֶת־יְרוּשָׁלִַ֖ם אֶת־תּוֹעֲבֹתֶֽיהָ׃

‎3 ‏וְאָמַרְתָּ֞ כֹּה־אָמַ֨ר אֲדֹנָ֤י יְהוִה֙ לִיר֣וּשָׁלִַ֔ם מְכֹרֹתַ֙יִךְ֙ וּמֹ֣לְדֹתַ֔יִךְ מֵאֶ֖רֶץ הַֽכְּנַעֲנִ֑י אָבִ֥יךְ הָאֱמֹרִ֖י וְאִמֵּ֥ךְ חִתִּֽית׃

‎4 ‏וּמוֹלְדוֹתַ֗יִךְ בְּי֨וֹם הוּלֶּ֤דֶת אֹתָךְ֙ לֹֽא־כָרַּ֣ת שָׁרֵּ֔ךְ וּבְמַ֥יִם לֹֽא־רֻחַ֖צְתְּ לְמִשְׁעִ֑י וְהָמְלֵ֙חַ֙ לֹ֣א הֻמְלַ֔חַתְּ וְהָחְתֵּ֖ל לֹ֥א חֻתָּֽלְתְּ׃

‎5 ‏לֹא־חָ֨סָה עָלַ֜יִךְ עַ֗יִן לַעֲשׂ֥וֹת לָ֛ךְ אַחַ֥ת מֵאֵ֖לֶּה לְחֻמְלָ֣ה עָלָ֑יִךְ וַֽתֻּשְׁלְכִ֞י אֶל־פְּנֵ֤י הַשָּׂדֶה֙ בְּגֹ֣עַל נַפְשֵׁ֔ךְ בְּי֖וֹם הֻלֶּ֥דֶת אֹתָֽךְ׃

‎6 ‏וָאֶעֱבֹ֤ר עָלַ֙יִךְ֙ וָֽאֶרְאֵ֔ךְ מִתְבּוֹסֶ֖סֶת בְּדָמָ֑יִךְ וָאֹ֤מַר לָךְ֙ בְּדָמַ֣יִךְ חֲיִ֔י וָאֹ֥מַר לָ֖ךְ בְּדָמַ֥יִךְ חֲיִֽי׃

‎7 ‏רְבָבָ֗ה כְּצֶ֤מַח הַשָּׂדֶה֙ נְתַתִּ֔יךְ וַתִּרְבִּי֙ וַֽתִּגְדְּלִ֔י וַתָּבֹ֖אִי בַּעֲדִ֣י עֲדָיִ֑ים שָׁדַ֤יִם נָכֹ֙נוּ֙ וּשְׂעָרֵ֣ךְ צִמֵּ֔חַ וְאַ֖תְּ עֵרֹ֥ם וְעֶרְיָֽה׃

‎8 ‏וָאֶעֱבֹ֨ר עָלַ֜יִךְ וָאֶרְאֵ֗ךְ וְהִנֵּ֤ה עִתֵּךְ֙ עֵ֣ת דֹּדִ֔ים וָאֶפְרֹ֤שׂ כְּנָפִי֙ עָלַ֔יִךְ וָאֲכַסֶּ֖ה עֶרְוָתֵ֑ךְ וָאֶשָּׁ֣בַֽע לָ֠ךְ וָאָב֨וֹא בִבְרִ֜ית אֹתָ֗ךְ נְאֻ֛ם אֲדֹנָ֥י יְהוִ֖ה וַתִּ֥הְיִי לִֽי׃

‎9 ‏וָאֶרְחָצֵ֣ךְ בַּמַּ֔יִם וָאֶשְׁטֹ֥ף דָּמַ֖יִךְ מֵֽעָלָ֑יִךְ וָאֲסֻכֵ֖ךְ בַּשָּֽׁמֶן׃

‎10 ‏וָאַלְבִּישֵׁ֣ךְ רִקְמָ֔ה וָאֶנְעֲלֵ֖ךְ תָּ֑חַשׁ וָאֶחְבְּשֵׁ֣ךְ בַּשֵּׁ֔שׁ וַאֲכַסֵּ֖ךְ מֶֽשִׁי׃

‎11 ‏וָאֶעְדֵּ֖ךְ עֶ֑דִי וָאֶתְּנָ֤ה צְמִידִים֙ עַל־יָדַ֔יִךְ וְרָבִ֖יד עַל־גְּרוֹנֵֽךְ׃

‎12 ‏וָאֶתֵּ֥ן נֶ֙זֶם֙ עַל־אַפֵּ֔ךְ וַעֲגִילִ֖ים עַל־אָזְנָ֑יִךְ וַעֲטֶ֥רֶת תִּפְאֶ֖רֶת בְּרֹאשֵֽׁךְ׃

‎13 ‏וַתַּעְדִּ֞י זָהָ֣ב וָכֶ֗סֶף וּמַלְבּוּשֵׁךְ֙ ששי שֵׁ֤שׁ וָמֶ֙שִׁי֙ וְרִקְמָ֔ה סֹ֧לֶת וּדְבַ֛שׁ וָשֶׁ֖מֶן אכלתי אָכָ֑לְתְּ וַתִּ֙יפִי֙ בִּמְאֹ֣ד מְאֹ֔ד וַֽתִּצְלְחִ֖י לִמְלוּכָֽה׃

‎14 ‏וַיֵּ֨צֵא לָ֥ךְ שֵׁ֛ם בַּגּוֹיִ֖ם בְּיָפְיֵ֑ךְ כִּ֣י׀ כָּלִ֣יל ה֗וּא בַּֽהֲדָרִי֙ אֲשֶׁר־שַׂ֣מְתִּי עָלַ֔יִךְ נְאֻ֖ם אֲדֹנָ֥י יְהוִֽה׃

‎15 ‏וַתִּבְטְחִ֣י בְיָפְיֵ֔ךְ וַתִּזְנִ֖י עַל־שְׁמֵ֑ךְ וַתִּשְׁפְּכִ֧י אֶת־תַּזְנוּתַ֛יִךְ עַל־כָּל־עוֹבֵ֖ר לוֹ־יֶֽהִי׃

‎16 ‏וַתִּקְחִ֣י מִבְּגָדַ֗יִךְ וַתַּֽעֲשִׂי־לָךְ֙ בָּמ֣וֹת טְלֻא֔וֹת וַתִּזְנִ֖י עֲלֵיהֶ֑ם לֹ֥א בָא֖וֹת וְלֹ֥א יִהְיֶֽה׃

‎17 ‏וַתִּקְחִ֞י כְּלֵ֣י תִפְאַרְתֵּ֗ךְ מִזְּהָבִ֤י וּמִכַּסְפִּי֙ אֲשֶׁ֣ר נָתַ֣תִּי לָ֔ךְ וַתַּעֲשִׂי־לָ֖ךְ צַלְמֵ֣י זָכָ֑ר וַתִּזְנִי־בָֽם׃

‎18 ‏וַתִּקְחִ֛י אֶת־בִּגְדֵ֥י רִקְמָתֵ֖ךְ וַתְּכַסִּ֑ים וְשַׁמְנִי֙ וּקְטָרְתִּ֔י נתתי נָתַ֖תְּ לִפְנֵיהֶֽם׃

‎19 ‏וְלַחְמִי֩ אֲשֶׁר־נָתַ֨תִּי לָ֜ךְ סֹ֣לֶת וָשֶׁ֤מֶן וּדְבַשׁ֙ הֶֽאֱכַלְתִּ֔יךְ וּנְתַתִּ֧יהוּ לִפְנֵיהֶ֛ם לְרֵ֥יחַ נִיחֹ֖חַ וַיֶּ֑הִי נְאֻ֖ם אֲדֹנָ֥י יְהוִֽה׃

‎20 ‏וַתִּקְחִ֞י אֶת־בָּנַ֤יִךְ וְאֶת־בְּנוֹתַ֙יִךְ֙ אֲשֶׁ֣ר יָלַ֣דְתְּ לִ֔י וַתִּזְבָּחִ֥ים לָהֶ֖ם לֶאֱכ֑וֹל הַמְעַ֖ט מתזנתך מִתַּזְנוּתָֽיִךְ׃

‎21 ‏וַֽתִּשְׁחֲטִ֖י אֶת־בָּנָ֑י וַֽתִּתְּנִ֔ים בְּהַעֲבִ֥יר אוֹתָ֖ם לָהֶֽם׃

‎22 ‏וְאֵ֤ת כָּל־תּוֹעֲבֹתַ֙יִךְ֙ וְתַזְנֻתַ֔יִךְ לֹ֥א זכרתי זָכַ֖רְתְּ אֶת־יְמֵ֣י נְעוּרָ֑יִךְ בִּֽהְיוֹתֵךְ֙ עֵרֹ֣ם וְעֶרְיָ֔ה מִתְבּוֹסֶ֥סֶת בְּדָמֵ֖ךְ הָיִֽית׃

‎23 ‏וַיְהִ֕י אַחֲרֵ֖י כָּל־רָעָתֵ֑ךְ א֣וֹי א֣וֹי לָ֔ךְ נְאֻ֖ם אֲדֹנָ֥י יְהוִֽה׃

‎24 ‏וַתִּבְנִי־לָ֖ךְ גֶּ֑ב¹ וַתַּעֲשִׂי־לָ֥ךְ רָמָ֖ה בְּכָל־רְחֽוֹב׃

‎25 ‏אֶל־כָּל־רֹ֣אשׁ דֶּ֗רֶךְ בָּנִית֙ רָֽמָתֵ֔ךְ וַתְּתַֽעֲבִי֙ אֶת־יָפְיֵ֔ךְ וַתְּפַשְּׂקִ֥י אֶת־רַגְלַ֖יִךְ לְכָל־עוֹבֵ֑ר וַתַּרְבִּ֖י אֶת־תזנתך תַּזְנוּתָֽיִךְ׃

‎26 ‏וַתִּזְנִ֧י אֶל־בְּנֵֽי־מִצְרַ֛יִם שְׁכֵנַ֖יִךְ גִּדְלֵ֣י בָשָׂ֑ר וַתַּרְבִּ֥י אֶת־תַּזְנֻתֵ֖ךְ לְהַכְעִיסֵֽנִי׃

‎27 ‏וְהִנֵּ֨ה נָטִ֤יתִי יָדִי֙ עָלַ֔יִךְ וָאֶגְרַ֖ע חֻקֵּ֑ךְ וָאֶתְּנֵ֞ךְ בְּנֶ֤פֶשׁ שֹׂנְאוֹתַ֙יִךְ֙ בְּנ֣וֹת פְּלִשְׁתִּ֔ים הַנִּכְלָמ֖וֹת מִדַּרְכֵּ֥ךְ זִמָּֽה׃

‎28 ‏וַתִּזְנִי֙ אֶל־בְּנֵ֣י אַשּׁ֔וּר מִבִּלְתִּ֖י שָׂבְעָתֵ֑ךְ וַתִּזְנִ֕ים וְגַ֖ם לֹ֥א שָׂבָֽעַתְּ׃

‎29 ‏וַתַּרְבִּ֧י אֶת־תַּזְנוּתֵ֛ךְ אֶל־אֶ֥רֶץ כְּנַ֖עַן כַּשְׂדִּ֑ימָה וְגַם־בְּזֹ֖את לֹ֥א שָׂבָֽעַתְּ׃

‎30 ‏מָ֤ה אֲמֻלָה֙ לִבָּתֵ֔ךְ נְאֻ֖ם אֲדֹנָ֣י יְהוִ֑ה בַּעֲשׂוֹתֵךְ֙ אֶת־כָּל־אֵ֔לֶּה מַעֲשֵׂ֥ה אִשָּֽׁה־זוֹנָ֖ה שַׁלָּֽטֶת׃

‎31 ‏בִּבְנוֹתַ֤יִךְ גַּבֵּךְ֙ בְּרֹ֣אשׁ כָּל־דֶּ֔רֶךְ וְרָמָתֵ֥ךְ עשיתי עָשִׂ֖ית בְּכָל־רְח֑וֹב וְלֹא־הייתי הָיִ֥ית כַּזּוֹנָ֖ה לְקַלֵּ֥ס אֶתְנָֽן׃

‎32 ‏הָאִשָּׁ֖ה הַמְּנָאָ֑פֶת תַּ֣חַת אִישָׁ֔הּ תִּקַּ֖ח אֶת־זָרִֽים׃

‎33 ‏לְכָל־זֹנ֖וֹת יִתְּנוּ־נֵ֑דֶה וְאַ֨תְּ נָתַ֤תְּ אֶת־נְדָנַ֙יִךְ֙ לְכָל־מְאַֽהֲבַ֔יִךְ וַתִּשְׁחֳדִ֣י אוֹתָ֗ם לָב֥וֹא אֵלַ֛יִךְ מִסָּבִ֖יב בְּתַזְנוּתָֽיִךְ׃

‎34 ‏וַיְהִי־בָ֨ךְ הֵ֤פֶךְ מִן־הַנָּשִׁים֙ בְּתַזְנוּתַ֔יִךְ וְאַחֲרַ֖יִךְ לֹ֣א זוּנָּ֑ה וּבְתִתֵּ֣ךְ אֶתְנָ֗ן וְאֶתְנַ֛ן לֹ֥א נִתַּן־לָ֖ךְ וַתְּהִ֥י לְהֶֽפֶךְ׃

‎35 ‏לָכֵ֣ן זוֹנָ֔ה שִׁמְעִ֖י דְּבַר־יְהוָֽה׃ פ

‎36 ‏כֹּֽה־אָמַ֞ר אֲדֹנָ֣י יְהוִֹ֗ה יַ֣עַן הִשָּׁפֵ֤ךְ נְחֻשְׁתֵּךְ֙ וַתִּגָּלֶ֣ה עֶרְוָתֵ֔ךְ בְּתַזְנוּתַ֖יִךְ עַל־מְאַהֲבָ֑יִךְ וְעַל֙ כָּל־גִּלּוּלֵ֣י תוֹעֲבוֹתַ֔יִךְ וְכִדְמֵ֣י בָנַ֔יִךְ אֲשֶׁ֥ר נָתַ֖תְּ לָהֶֽם׃

‎37 ‏לָ֠כֵן הִנְנִ֨י מְקַבֵּ֤ץ אֶת־כָּל־מְאַהֲבַ֙יִךְ֙ אֲשֶׁ֣ר עָרַ֣בְתְּ עֲלֵיהֶ֔ם וְאֵת֙ כָּל־אֲשֶׁ֣ר אָהַ֔בְתְּ עַ֖ל כָּל־אֲשֶׁ֣ר שָׂנֵ֑את וְקִבַּצְתִּי֩ אֹתָ֨ם עָלַ֜יִךְ מִסָּבִ֗יב וְגִלֵּיתִ֤י עֶרְוָתֵךְ֙ אֲלֵהֶ֔ם וְרָא֖וּ אֶת־כָּל־עֶרְוָתֵֽךְ׃

‎38 ‏וּשְׁפַטְתִּיךְ֙ מִשְׁפְּטֵ֣י נֹאֲפ֔וֹת וְשֹׁפְכֹ֖ת דָּ֑ם וּנְתַתִּ֕יךְ דַּ֥ם חֵמָ֖ה וְקִנְאָֽה׃

‎39 ‏וְנָתַתִּ֨י אוֹתָ֜ךְ בְּיָדָ֗ם וְהָרְס֤וּ גַבֵּךְ֙ וְנִתְּצ֣וּ רָמֹתַ֔יִךְ וְהִפְשִׁ֤יטוּ אוֹתָךְ֙ בְּגָדַ֔יִךְ וְלָקְח֖וּ כְּלֵ֣י תִפְאַרְתֵּ֑ךְ וְהִנִּיח֖וּךְ עֵירֹ֥ם וְעֶרְיָֽה׃

‎40 ‏וְהֶעֱל֤וּ עָלַ֙יִךְ֙ קָהָ֔ל וְרָגְמ֥וּ אוֹתָ֖ךְ בָּאָ֑בֶן וּבִתְּק֖וּךְ בְּחַרְבוֹתָֽם׃

‎41 ‏וְשָׂרְפ֤וּ בָתַּ֙יִךְ֙ בָּאֵ֔שׁ וְעָשׂוּ־בָ֣ךְ שְׁפָטִ֔ים לְעֵינֵ֖י נָשִׁ֣ים רַבּ֑וֹת וְהִשְׁבַּתִּיךְ֙ מִזּוֹנָ֔ה וְגַם־אֶתְנַ֖ן לֹ֥א תִתְּנִי־עֽוֹד׃

‎42 ‏וַהֲנִחֹתִ֤י חֲמָתִי֙ בָּ֔ךְ וְסָ֥רָה קִנְאָתִ֖י מִמֵּ֑ךְ וְשָׁ֣קַטְתִּ֔י וְלֹ֥א אֶכְעַ֖ס עֽוֹד׃

‎43 ‏יַ֗עַן אֲשֶׁ֤ר לֹֽא־זכרתי זָכַרְתְּ֙ אֶת־יְמֵ֣י נְעוּרַ֔יִךְ וַתִּרְגְּזִי־לִ֖י בְּכָל־אֵ֑לֶּה וְגַם־אֲנִ֨י הֵ֜א דַּרְכֵּ֣ךְ׀ בְּרֹ֣אשׁ נָתַ֗תִּי נְאֻם֙ אֲדֹנָ֣י יְהוִ֔ה וְלֹ֤א עשיתי עָשִׂית֙ אֶת־הַזִּמָּ֔ה עַ֖ל כָּל־תּוֹעֲבֹתָֽיִךְ׃

‎44 ‏הִנֵּה֙ כָּל־הַמֹּשֵׁ֔ל עָלַ֥יִךְ יִמְשֹׁ֖ל לֵאמֹ֑ר כְּאִמָּ֖ה בִּתָּֽהּ׃

‎45 ‏בַּת־אִמֵּ֣ךְ אַ֔תְּ גֹּעֶ֥לֶת אִישָׁ֖הּ וּבָנֶ֑יהָ וַאֲח֨וֹת אֲחוֹתֵ֜ךְ אַ֗תְּ אֲשֶׁ֤ר גָּֽעֲ֙לוּ֙ אַנְשֵׁיהֶ֣ן וּבְנֵיהֶ֔ן אִמְּכֶ֣ן חִתִּ֔ית וַאֲבִיכֶ֖ן אֱמֹרִֽי׃

‎46 ‏וַאֲחוֹתֵ֨ךְ הַגְּדוֹלָ֤ה שֹֽׁמְרוֹן֙ הִ֣יא וּבְנוֹתֶ֔יהָ הַיּוֹשֶׁ֖בֶת עַל־שְׂמֹאולֵ֑ךְ וַאֲחוֹתֵ֞ךְ הַקְּטַנָּ֣ה מִמֵּ֗ךְ הַיּוֹשֶׁ֙בֶת֙ מִֽימִינֵ֔ךְ סְדֹ֖ם וּבְנוֹתֶֽיהָ׃

‎47 ‏וְלֹ֤א בְדַרְכֵיהֶן֙ הָלַ֔כְתְּ וּבְתוֹעֲבֽוֹתֵיהֶ֖ן עשיתי עָשִׂ֑ית כִּמְעַ֣ט קָ֔ט וַתַּשְׁחִ֥תִי מֵהֵ֖ן בְּכָל־דְּרָכָֽיִךְ׃

‎48 ‏חַי־אָ֗נִי נְאֻם֙ אֲדֹנָ֣י יְהוִ֔ה אִם־עָֽשְׂתָה֙ סְדֹ֣ם אֲחוֹתֵ֔ךְ הִ֖יא וּבְנוֹתֶ֑יהָ כַּאֲשֶׁ֣ר עָשִׂ֔ית אַ֖תְּ וּבְנוֹתָֽיִךְ׃

‎49 ‏הִנֵּה־זֶ֣ה הָיָ֔ה עֲוֹ֖ן סְדֹ֣ם אֲחוֹתֵ֑ךְ גָּא֨וֹן שִׂבְעַת־לֶ֜חֶם וְשַׁלְוַ֣ת הַשְׁקֵ֗ט הָ֤יָה לָהּ֙ וְלִבְנוֹתֶ֔יהָ וְיַד־עָנִ֥י וְאֶבְי֖וֹן לֹ֥א הֶחֱזִֽיקָה׃

‎50 ‏וַֽתִּגְבְּהֶ֔ינָה וַתַּעֲשֶׂ֥ינָה תוֹעֵבָ֖ה לְפָנָ֑י וָאָסִ֥יר אֶתְהֶ֖ן כַּאֲשֶׁ֥ר רָאִֽיתִי׃ ס

‎51 ‏וְשֹׁ֣מְר֔וֹן כַּחֲצִ֥י חַטֹּאתַ֖יִךְ לֹ֣א חָטָ֑אָה וַתַּרְבִּ֤י אֶת־תּוֹעֲבוֹתַ֙יִךְ֙ מֵהֵ֔נָּה וַתְּצַדְּקִי֙ אֶת־אחותך אֲחוֹתַ֔יִךְ בְּכָל־תּוֹעֲבוֹתַ֖יִךְ אֲשֶׁ֥ר עשיתי עָשִֽׂית׃

‎52 ‏גַּם־אַ֣תְּ׀ שְׂאִ֣י כְלִמָּתֵ֗ךְ אֲשֶׁ֤ר פִּלַּלְתְּ֙ לַֽאֲחוֹתֵ֔ךְ בְּחַטֹּאתַ֛יִךְ אֲשֶׁר־הִתְעַ֥בְתְּ מֵהֵ֖ן תִּצְדַּ֣קְנָה מִמֵּ֑ךְ וְגַם־אַ֥תְּ בּ֙וֹשִׁי֙ וּשְׂאִ֣י כְלִמָּתֵ֔ךְ בְּצַדֶּקְתֵּ֖ךְ אַחְיוֹתֵֽךְ׃

‎53 ‏וְשַׁבְתִּי֙ אֶת־שְׁבִ֣יתְהֶ֔ן אֶת־שבית שְׁב֤וּת סְדֹם֙ וּבְנוֹתֶ֔יהָ וְאֶת־שבית שְׁב֥וּת שֹׁמְר֖וֹן וּבְנוֹתֶ֑יהָ ושבית וּשְׁב֥וּת שְׁבִיתַ֖יִךְ בְּתוֹכָֽהְנָה׃

‎54 ‏לְמַ֙עַן֙ תִּשְׂאִ֣י כְלִמָּתֵ֔ךְ וְנִכְלַ֕מְתְּ³ מִכֹּ֖ל אֲשֶׁ֣ר עָשִׂ֑ית בְּנַחֲמֵ֖ךְ אֹתָֽן׃

‎55 ‏וַאֲחוֹתַ֗יִךְ סְדֹ֤ם וּבְנוֹתֶ֙יהָ֙ תָּשֹׁ֣בְןָ לְקַדְמָתָ֔ן וְשֹֽׁמְרוֹן֙ וּבְנוֹתֶ֔יהָ תָּשֹׁ֖בְןָ לְקַדְמָתָ֑ן וְאַתְּ֙ וּבְנוֹתַ֔יִךְ תְּשֻׁבֶ֖ינָה לְקַדְמַתְכֶֽן׃

‎56 ‏וְל֤וֹא הָֽיְתָה֙ סְדֹ֣ם אֲחוֹתֵ֔ךְ לִשְׁמוּעָ֖ה בְּפִ֑יךְ בְּי֖וֹם גְּאוֹנָֽיִךְ׃

‎57 ‏בְּטֶרֶם֮ תִּגָּלֶ֣ה רָעָתֵךְ֒ כְּמ֗וֹ עֵ֚ת חֶרְפַּ֣ת בְּנוֹת־אֲרָ֔ם וְכָל־סְבִיבוֹתֶ֖יהָ בְּנ֣וֹת פְּלִשְׁתִּ֑ים הַשָּׁאט֥וֹת אוֹתָ֖ךְ מִסָּבִֽיב׃

‎58 ‏אֶת־זִמָּתֵ֥ךְ וְאֶת־תּוֹעֲבוֹתַ֖יִךְ אַ֣תְּ נְשָׂאתִ֑ים נְאֻ֖ם יְהוָֽה׃ ס

‎59 ‏כִּ֣י כֹ֤ה אָמַר֙ אֲדֹנָ֣י יְהוִ֔ה ועשית וְעָשִׂ֥יתִי אוֹתָ֖ךְ כַּאֲשֶׁ֣ר עָשִׂ֑ית אֲשֶׁר־בָּזִ֥ית אָלָ֖ה לְהָפֵ֥ר בְּרִֽית׃

‎60 ‏וְזָכַרְתִּ֨י אֲנִ֧י אֶת־בְּרִיתִ֛י אוֹתָ֖ךְ בִּימֵ֣י נְעוּרָ֑יִךְ וַהֲקִמוֹתִ֥י לָ֖ךְ בְּרִ֥ית עוֹלָֽם׃

‎61 ‏וְזָכַ֣רְתְּ אֶת־דְּרָכַיִךְ֮ וְנִכְלַמְתְּ֒ בְּקַחְתֵּ֗ךְ אֶת־אֲחוֹתַ֙יִךְ֙ הַגְּדֹל֣וֹת מִמֵּ֔ךְ אֶל־הַקְּטַנּ֖וֹת מִמֵּ֑ךְ וְנָתַתִּ֨י אֶתְהֶ֥ן לָ֛ךְ לְבָנ֖וֹת וְלֹ֥א מִבְּרִיתֵֽךְ׃

‎62 ‏וַהֲקִימוֹתִ֥י אֲנִ֛י אֶת־בְּרִיתִ֖י אִתָּ֑ךְ וְיָדַ֖עַתְּ כִּֽי־אֲנִ֥י יְהוָֽה׃

‎63 ‏לְמַ֤עַן תִּזְכְּרִי֙ וָבֹ֔שְׁתְּ וְלֹ֨א יִֽהְיֶה־לָּ֥ךְ עוֹד֙ פִּתְח֣וֹן פֶּ֔ה מִפְּנֵ֖י כְּלִמָּתֵ֑ךְ בְּכַפְּרִי־לָךְ֙ לְכָל־אֲשֶׁ֣ר עָשִׂ֔ית נְאֻ֖ם אֲדֹנָ֥י יְהוִֽה׃ ס

1 wayəhî ḏəḇar-yəhwâ ’ēlay lē’mōr:

2 ben-’āḏām hwōḏ^a‘ ’eṯ-yərûšālaim ’eṯ-twō‘ăḇōṯeyhā:

3 wə’āmarətā kōh-’āmar ’ăḏōnāy yəhwih lîrûšālaim məḵōrōṯayiḵə ûmōləḏōṯayiḵə mē’ereṣ hakən^a‘ănî ’āḇîḵə hā’ĕmōrî wə’immēḵə ḥitîṯ:

4 ûmwōləḏwōṯayiḵə bəywōm hûlleḏeṯ ’ōṯāḵə lō’-ḵārraṯ šārrēḵə ûḇəmayim lō’-ruḥaṣətə ləmišə‘î wəhāməlēḥa lō’ huməl^aḥatə wəhāḥətēl lō’ ḥutālətə:

5 lō’-ḥāsâ ‘ālayiḵə ‘ayin l^a‘ăśwōṯ lāḵə ’^aḥaṯ mē’ēlleh ləḥuməlâ ‘ālāyiḵə watušələḵî ’el-pənê haśśāḏeh bəḡō‘al nafəšēḵə bəywōm hulleḏeṯ ’ōṯāḵə:

6 wā’e‘ĕḇōr ‘ālayiḵə wā’erə’ēḵə miṯəbwōseseṯ bəḏāmāyiḵə wā’ōmar lāḵə bəḏāmayiḵə ḥăyî wā’ōmar lāḵə bəḏāmayiḵə ḥăyî:

7 rəḇāḇâ kəṣem^aḥ haśśāḏeh nəṯatîḵə watirəbî watiḡədəlî watāḇō’î b^a‘ăḏî ‘ăḏāyîm šāḏayim nāḵōnû ûśə‘ārēḵə ṣimmēḥa wə’atə ‘ērōm wə‘erəyâ:

8 wā’e‘ĕḇōr ‘ālayiḵə wā’erə’ēḵə wəhinnēh ‘itēḵə ‘ēṯ dōḏîm wā’efərōś kənāfî ‘ālayiḵə wā’ăḵasseh ‘erəwāṯēḵə wā’eššāḇ^a‘ lāḵə wā’āḇwō’ ḇiḇərîṯ ’ōṯāḵə nə’um ’ăḏōnāy yəhwih watihəyî lî:

9 wā’erəḥāṣēḵə bammayim wā’ešəṭōf dāmayiḵə mē‘ālāyiḵə wā’ăsuḵēḵə baššāmen:

10 wā’aləbîšēḵə riqəmâ wā’enə‘ălēḵə tāḥaš wā’eḥəbəšēḵə baššēš wa’ăḵassēḵə mešî:

11 wā’e‘ədēḵə ‘eḏî wā’etənâ ṣəmîḏîm ‘al-yāḏayiḵə wərāḇîḏ ‘al-gərwōnēḵə:

12 wā’etēn nezem ‘al-’apēḵə w^a‘ăḡîlîm ‘al-’āzənāyiḵə w^a‘ăṭereṯ tifə’ereṯ bərō’šēḵə:

13 wat^a‘ədî zâāḇ wāḵesef ûmaləbûšēḵə šēšî šēš wāmešî wəriqəmâ sōleṯ ûḏəḇaš wāšemen ’āḵālətî ’āḵālətə watîfî bimə’ōḏ mə’ōḏ watiṣələḥî liməlûḵâ:

14 wayyēṣē’ lāḵə šēm bagwōyim bəyāfəyēḵə kî| kālîl hû’ bahăḏārî ’ăšer-śamətî ‘ālayiḵə nə’um ’ăḏōnāy yəhwih:

15 watiḇəṭəḥî ḇəyāfəyēḵə watizənî ‘al-šəmēḵə watišəpəḵî ’eṯ-tazənûṯayiḵə ‘al-kāl-‘wōḇēr lwō-yehî:

16 watiqəḥî mibəḡāḏayiḵə wat^a‘ăśî-lāḵə bāmwōṯ ṭəlu’wōṯ watizənî ‘ălêhem lō’ ḇā’wōṯ wəlō’ yihəyeh:

17 watiqəḥî kəlê ṯifə’arətēḵə mizzəhāḇî ûmikasəpî ’ăšer nāṯatî lāḵə wat^a‘ăśî-lāḵə ṣaləmê zāḵār watizənî-ḇām:

18 watiqəḥî ’eṯ-biḡəḏê riqəmāṯēḵə watəḵassîm wəšamənî ûqəṭārətî nāṯatî nāṯatə lifənêhem:

19 wəl^aḥəmî ’ăšer-nāṯatî lāḵə sōleṯ wāšemen ûḏəḇaš he’ĕḵalətîḵə ûnəṯatîhû lifənêhem lərêḥa nîḥōḥa wayyehî nə’um ’ăḏōnāy yəhwih:

20 watiqəḥî ’eṯ-bānayiḵə wə’eṯ-bənwōṯayiḵə ’ăšer yālaḏətə lî watizəbāḥîm lâem le’ĕḵwōl hamə‘aṭ mitazənuṯēḵə mitazənûṯāyiḵə:

21 watišəḥăṭî ’eṯ-bānāy watitənîm bəh^a‘ăḇîr ’wōṯām lâem:

22 wə’ēṯ kāl-twō‘ăḇōṯayiḵə wəṯazənuṯayiḵə lō’ zāḵarətî zāḵarətə ’eṯ-yəmê nə‘ûrāyiḵə bihəywōṯēḵə ‘ērōm wə‘erəyâ miṯəbwōseseṯ bəḏāmēḵə hāyîṯ:

23 wayəhî ’^aḥărê kāl-rā‘āṯēḵə ’wōy ’wōy lāḵə nə’um ’ăḏōnāy yəhwih:

24 watiḇənî-lāḵə geḇ¹ wat^a‘ăśî-lāḵə rāmâ bəḵāl-rəḥwōḇ:

25 ’el-kāl-rō’š dereḵə bānîṯ rāmāṯēḵə watəṯ^a‘ăḇî ’eṯ-yāfəyēḵə watəfaśśəqî ’eṯ-raḡəlayiḵə ləḵāl-‘wōḇēr watarəbî ’eṯ-tazənuṯēḵə tazənûṯāyiḵə:

26 watizənî ’el-bənê-miṣərayim šəḵēnayiḵə giḏəlê ḇāśār watarəbî ’eṯ-tazənuṯēḵə ləhaḵə‘îsēnî:

27 wəhinnēh nāṭîṯî yāḏî ‘ālayiḵə wā’eḡər^a‘ ḥuqqēḵə wā’etənēḵə bənefeš śōnə’wōṯayiḵə bənwōṯ pəlišətîm hanniḵəlāmwōṯ midarəkēḵə zimmâ:

28 watizənî ’el-bənê ’aššûr mibilətî śāḇə‘āṯēḵə watizənîm wəḡam lō’ śāḇā‘atə:

29 watarəbî ’eṯ-tazənûṯēḵə ’el-’ereṣ kən^a‘an kaśədîmâ wəḡam-bəzō’ṯ lō’ śāḇā‘atə:

30 mâ ’ămulâ libāṯēḵə nə’um ’ăḏōnāy yəhwih b^a‘ăśwōṯēḵə ’eṯ-kāl-’ēlleh m^a‘ăśēh ’iššâ-zwōnâ šallāṭeṯ:

31 biḇənwōṯayiḵə gabēḵə bərō’š kāl-dereḵə wərāmāṯēḵə ‘āśîṯî ‘āśîṯ bəḵāl-rəḥwōḇ wəlō’-hāyîṯy hāyîṯ kazzwōnâ ləqallēs ’eṯənān:

32 hā’iššâ hammənā’āfeṯ t^aḥaṯ ’îšāh tiqq^aḥ ’eṯ-zārîm:

33 ləḵāl-zōnwōṯ yitənû-nēḏeh wə’atə nāṯatə ’eṯ-nəḏānayiḵə ləḵāl-mə’ahăḇayiḵə watišəḥŏḏî ’wōṯām lāḇwō’ ’ēlayiḵə missāḇîḇ bəṯazənûṯāyiḵə:

34 wayəhî-ḇāḵə hēfeḵə min-hannāšîm bəṯazənûṯayiḵə wə’^aḥărayiḵə lō’ zûnnâ ûḇəṯitēḵə ’eṯənān wə’eṯənan lō’ nitan-lāḵə watəhî ləhefeḵə:

35 lāḵēn zwōnâ šimə‘î dəḇar-yəhwâ: f

36 kōh-’āmar ’ăḏōnāy yəhwōih y^a‘an hiššāfēḵə nəḥušətēḵə watigāleh ‘erəwāṯēḵə bəṯazənûṯayiḵə ‘al-mə’ahăḇāyiḵə wə‘al kāl-gillûlê ṯwō‘ăḇwōṯayiḵə wəḵiḏəmê ḇānayiḵə ’ăšer nāṯatə lâem:

37 lāḵēn hinənî məqabēṣ ’eṯ-kāl-mə’ahăḇayiḵə ’ăšer ‘āraḇətə ‘ălêhem wə’ēṯ kāl-’ăšer ’âaḇətə ‘al kāl-’ăšer śānē’ṯ wəqibaṣətî ’ōṯām ‘ālayiḵə missāḇîḇ wəḡillêṯî ‘erəwāṯēḵə ’ălēhem wərā’û ’eṯ-kāl-‘erəwāṯēḵə:

38 ûšəfaṭətîḵə mišəpəṭê nō’ăfwōṯ wəšōfəḵōṯ dām ûnəṯatîḵə dam ḥēmâ wəqinə’â:

39 wənāṯatî ’wōṯāḵə bəyāḏām wəhārəsû ḡabēḵə wənitəṣû rāmōṯayiḵə wəhifəšîṭû ’wōṯāḵə bəḡāḏayiḵə wəlāqəḥû kəlê ṯifə’arətēḵə wəhinnîḥûḵə ‘êrōm wə‘erəyâ:

40 wəhe‘ĕlû ‘ālayiḵə qâāl wərāḡəmû ’wōṯāḵə bā’āḇen ûḇitəqûḵə bəḥarəḇwōṯām:

41 wəśārəfû ḇātayiḵə bā’ēš wə‘āśû-ḇāḵə šəfāṭîm lə‘ênê nāšîm rabwōṯ wəhišəbatîḵə mizzwōnâ wəḡam-’eṯənan lō’ ṯitənî-‘wōḏ:

42 wahăniḥōṯî ḥămāṯî bāḵə wəsārâ qinə’āṯî mimmēḵə wəšāqaṭətî wəlō’ ’eḵə‘as ‘wōḏ:

43 y^a‘an ’ăšer lō’-zāḵarətî zāḵarətə ’eṯ-yəmê nə‘ûrayiḵə watirəgəzî-lî bəḵāl-’ēlleh wəḡam-’ănî hē’ darəkēḵə| bərō’š nāṯatî nə’um ’ăḏōnāy yəhwih wəlō’ ‘āśîṯî ‘āśîṯ ’eṯ-hazzimmâ ‘al kāl-twō‘ăḇōṯāyiḵə:

44 hinnēh kāl-hammōšēl ‘ālayiḵə yiməšōl lē’mōr kə’immâ bitāh:

45 baṯ-’immēḵə ’atə gō‘eleṯ ’îšāh ûḇāneyhā wa’ăḥwōṯ ’ăḥwōṯēḵə ’atə ’ăšer gā‘ălû ’anəšêhen ûḇənêhen ’imməḵen ḥitîṯ wa’ăḇîḵen ’ĕmōrî:

46 wa’ăḥwōṯēḵə hagəḏwōlâ šōmərwōn hî’ ûḇənwōṯeyhā hayywōšeḇeṯ ‘al-śəmō’wlēḵə wa’ăḥwōṯēḵə haqqəṭannâ mimmēḵə hayywōšeḇeṯ mîmînēḵə səḏōm ûḇənwōṯeyhā:

47 wəlō’ ḇəḏarəḵêhen hālaḵətə ûḇəṯwō‘ăḇwōṯêhen ‘āśîṯî ‘āśîṯ kimə‘aṭ qāṭ watašəḥiṯî mēhēn bəḵāl-dərāḵāyiḵə:

48 ḥay-’ānî nə’um ’ăḏōnāy yəhwih ’im-‘āśəṯâ səḏōm ’ăḥwōṯēḵə hî’ ûḇənwōṯeyhā ka’ăšer ‘āśîṯ ’atə ûḇənwōṯāyiḵə:

49 hinnēh-zeh hāyâ ‘ăwōn səḏōm ’ăḥwōṯēḵə gā’wōn śiḇə‘aṯ-leḥem wəšaləwaṯ hašəqēṭ hāyâ lāh wəliḇənwōṯeyhā wəyaḏ-‘ānî wə’eḇəywōn lō’ heḥĕzîqâ:

50 watiḡəbəheynâ wat^a‘ăśeynâ ṯwō‘ēḇâ ləfānāy wā’āsîr ’eṯəhen ka’ăšer rā’îṯî: s

51 wəšōmərwōn k^aḥăṣî ḥaṭṭō’ṯayiḵə lō’ ḥāṭā’â watarəbî ’eṯ-twō‘ăḇwōṯayiḵə mēhēnnâ watəṣadəqî ’eṯ-’ăḥwōṯēḵə ’ăḥwōṯayiḵə bəḵāl-twō‘ăḇwōṯayiḵə ’ăšer ‘āśîṯy ‘āśîṯ:

52 gam-’atə| śə’î ḵəlimmāṯēḵə ’ăšer pillalətə la’ăḥwōṯēḵə bəḥaṭṭō’ṯayiḵə ’ăšer-hiṯə‘aḇətə mēhēn tiṣədaqənâ mimmēḵə wəḡam-’atə bwōšî ûśə’î ḵəlimmāṯēḵə bəṣadeqətēḵə ’^aḥəywōṯēḵə:

53 wəšaḇətî ’eṯ-šəḇîṯəhen ’eṯ-šəḇîṯ šəḇûṯ səḏōm ûḇənwōṯeyhā wə’eṯ-šəḇîṯ šəḇûṯ šōmərwōn ûḇənwōṯeyhā ûšəḇîṯ ûšəḇûṯ šəḇîṯayiḵə bəṯwōḵâənâ:

54 ləm^a‘an tiśə’î ḵəlimmāṯēḵə wəniḵəlamətə³ mikōl ’ăšer ‘āśîṯ bən^aḥămēḵə ’ōṯān:

55 wa’ăḥwōṯayiḵə səḏōm ûḇənwōṯeyhā tāšōḇənā ləqaḏəmāṯān wəšōmərwōn ûḇənwōṯeyhā tāšōḇənā ləqaḏəmāṯān wə’atə ûḇənwōṯayiḵə təšuḇeynâ ləqaḏəmaṯəḵen:

56 wəlwō’ hāyəṯâ səḏōm ’ăḥwōṯēḵə lišəmû‘â bəfîḵə bəywōm gə’wōnāyiḵə:

57 bəṭerem tigāleh rā‘āṯēḵə kəmwō ‘ēṯ ḥerəpaṯ bənwōṯ-’ărām wəḵāl-səḇîḇwōṯeyhā bənwōṯ pəlišətîm haššā’ṭwōṯ ’wōṯāḵə missāḇîḇ:

58 ’eṯ-zimmāṯēḵə wə’eṯ-twō‘ăḇwōṯayiḵə ’atə nəśā’ṯîm nə’um yəhwâ: s

59 kî ḵōh ’āmar ’ăḏōnāy yəhwih wə‘āśîṯ wə‘āśîṯî ’wōṯāḵə ka’ăšer ‘āśîṯ ’ăšer-bāzîṯ ’ālâ ləhāfēr bərîṯ:

60 wəzāḵarətî ’ănî ’eṯ-bərîṯî ’wōṯāḵə bîmê nə‘ûrāyiḵə wahăqimwōṯî lāḵə bərîṯ ‘wōlām:

61 wəzāḵarətə ’eṯ-dərāḵayiḵə wəniḵəlamətə bəq^aḥətēḵə ’eṯ-’ăḥwōṯayiḵə hagəḏōlwōṯ mimmēḵə ’el-haqqəṭannwōṯ mimmēḵə wənāṯatî ’eṯəhen lāḵə ləḇānwōṯ wəlō’ mibərîṯēḵə:

62 wahăqîmwōṯî ’ănî ’eṯ-bərîṯî ’itāḵə wəyāḏ^a‘atə kî-’ănî yəhwâ:

63 ləm^a‘an tizəkərî wāḇōšətə wəlō’ yihəyeh-llāḵə ‘wōḏ piṯəḥwōn peh mipənê kəlimmāṯēḵə bəḵapərî-lāḵə ləḵāl-’ăšer ‘āśîṯ nə’um ’ăḏōnāy yəhwih: s