‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏וְאַתָּ֣ה בֶן־אָדָ֗ם כֹּה־אָמַ֞ר אֲדֹנָ֧י יְהוִ֛ה לְאַדְמַ֥ת יִשְׂרָאֵ֖ל קֵ֑ץ בָּ֣א הַקֵּ֔ץ עַל־ארבעת אַרְבַּ֖ע כַּנְפ֥וֹת הָאָֽרֶץ׃

‎3 ‏עַתָּה֙ הַקֵּ֣ץ עָלַ֔יִךְ וְשִׁלַּחְתִּ֤י אַפִּי֙ בָּ֔ךְ וּשְׁפַטְתִּ֖יךְ כִּדְרָכָ֑יִךְ וְנָתַתִּ֣י עָלַ֔יִךְ אֵ֖ת כָּל־תּוֹעֲבֹתָֽיִךְ׃

‎4 ‏וְלֹא־תָח֥וֹס עֵינִ֛י עָלַ֖יִךְ וְלֹ֣א אֶחְמ֑וֹל כִּ֣י דְרָכַ֜יִךְ עָלַ֣יִךְ אֶתֵּ֗ן וְתוֹעֲבוֹתַ֙יִךְ֙ בְּתוֹכֵ֣ךְ תִּֽהְיֶ֔יןָ וִידַעְתֶּ֖ם כִּֽי־אֲנִ֥י יְהוָֽה׃ פ

‎5 ‏כֹּ֥ה אָמַ֖ר אֲדֹנָ֣י יְהוִ֑ה רָעָ֛ה אַחַ֥ת רָעָ֖ה הִנֵּ֥ה בָאָֽה׃

‎6 ‏קֵ֣ץ בָּ֔א בָּ֥א הַקֵּ֖ץ הֵקִ֣יץ אֵלָ֑יִךְ הִנֵּ֖ה בָּאָֽה׃

‎7 ‏בָּ֧אָה הַצְּפִירָ֛ה אֵלֶ֖יךָ יוֹשֵׁ֣ב הָאָ֑רֶץ בָּ֣א הָעֵ֗ת קָר֛וֹב הַיּ֥וֹם מְהוּמָ֖ה וְלֹא־הֵ֥ד הָרִֽים׃

‎8 ‏עַתָּ֣ה מִקָּר֗וֹב אֶשְׁפּ֤וֹךְ חֲמָתִי֙ עָלַ֔יִךְ וְכִלֵּיתִ֤י אַפִּי֙ בָּ֔ךְ וּשְׁפַטְתִּ֖יךְ כִּדְרָכָ֑יִךְ וְנָתַתִּ֣י עָלַ֔יִךְ אֵ֖ת כָּל־תּוֹעֲבוֹתָֽיִךְ׃

‎9 ‏וְלֹא־תָח֥וֹס עֵינִ֖י וְלֹ֣א אֶחְמ֑וֹל כִּדְרָכַ֜יִךְ עָלַ֣יִךְ אֶתֵּ֗ן וְתוֹעֲבוֹתַ֙יִךְ֙ בְּתוֹכֵ֣ךְ תִּֽהְיֶ֔יןָ וִֽידַעְתֶּ֕ם כִּ֛י אֲנִ֥י יְהוָ֖ה מַכֶּֽה׃

‎10 ‏הִנֵּ֥ה הַיּ֖וֹם הִנֵּ֣ה בָאָ֑ה יָֽצְאָה֙ הַצְּפִרָ֔ה צָ֚ץ הַמַּטֶּ֔ה פָּרַ֖ח הַזָּדֽוֹן׃

‎11 ‏הֶחָמָ֥ס׀ קָ֖ם לְמַטֵּה־רֶ֑שַׁע לֹא־מֵהֶ֞ם וְלֹ֧א מֵהֲמוֹנָ֛ם וְלֹ֥א מֶהֱמֵהֶ֖ם וְלֹא־נֹ֥הַּ בָּהֶֽם׃

‎12 ‏בָּ֤א הָעֵת֙ הִגִּ֣יעַ הַיּ֔וֹם הַקּוֹנֶה֙ אַל־יִשְׂמָ֔ח וְהַמּוֹכֵ֖ר אַל־יִתְאַבָּ֑ל כִּ֥י חָר֖וֹן אֶל־כָּל־הֲמוֹנָֽהּ׃

‎13 ‏כִּ֣י הַמּוֹכֵ֗ר אֶל־הַמִּמְכָּר֙ לֹ֣א יָשׁ֔וּב וְע֥וֹד בַּחַיִּ֖ים חַיָּתָ֑ם כִּֽי־חָז֤וֹן אֶל־כָּל־הֲמוֹנָהּ֙ לֹ֣א יָשׁ֔וּב וְאִ֧ישׁ בַּעֲוֹנ֛וֹ חַיָּת֖וֹ לֹ֥א יִתְחַזָּֽקוּ׃

‎14 ‏תָּקְע֤וּ בַתָּק֙וֹעַ֙ וְהָכִ֣ין הַכֹּ֔ל וְאֵ֥ין הֹלֵ֖ךְ לַמִּלְחָמָ֑ה כִּ֥י חֲרוֹנִ֖י אֶל־כָּל־הֲמוֹנָֽהּ׃

‎15 ‏הַחֶ֣רֶב בַּח֔וּץ וְהַדֶּ֥בֶר וְהָרָעָ֖ב מִבָּ֑יִת אֲשֶׁ֤ר בַּשָּׂדֶה֙ בַּחֶ֣רֶב יָמ֔וּת וַאֲשֶׁ֣ר בָּעִ֔יר רָעָ֥ב וָדֶ֖בֶר יֹאכֲלֶֽנּוּ׃

‎16 ‏וּפָֽלְטוּ֙ פְּלִ֣יטֵיהֶ֔ם וְהָי֣וּ אֶל־הֶהָרִ֗ים כְּיוֹנֵ֧י הַגֵּאָי֛וֹת כֻּלָּ֖ם הֹמ֑וֹת אִ֖ישׁ בַּעֲוֹנֽוֹ׃

‎17 ‏כָּל־הַיָּדַ֖יִם תִּרְפֶּ֑ינָה וְכָל־בִּרְכַּ֖יִם תֵּלַ֥כְנָה מָּֽיִם׃

‎18 ‏וְחָגְר֣וּ שַׂקִּ֔ים וְכִסְּתָ֥ה אוֹתָ֖ם פַּלָּצ֑וּת וְאֶ֤ל כָּל־פָּנִים֙ בּוּשָׁ֔ה וּבְכָל־רָאשֵׁיהֶ֖ם קָרְחָֽה׃

‎19 ‏כַּסְפָּ֞ם בַּחוּצ֣וֹת יַשְׁלִ֗יכוּ וּזְהָבָם֮ לְנִדָּ֣ה יִֽהְיֶה֒ כַּסְפָּ֨ם וּזְהָבָ֜ם לֹֽא־יוּכַ֣ל לְהַצִּילָ֗ם בְּיוֹם֙ עֶבְרַ֣ת יְהוָ֔ה נַפְשָׁם֙ לֹ֣א יְשַׂבֵּ֔עוּ וּמֵעֵיהֶ֖ם לֹ֣א יְמַלֵּ֑אוּ כִּֽי־מִכְשׁ֥וֹל עֲוֹנָ֖ם הָיָֽה׃

‎20 ‏וּצְבִ֤י עֶדְיוֹ֙ לְגָא֣וֹן שָׂמָ֔הוּ וְצַלְמֵ֧י תוֹעֲבֹתָ֛ם שִׁקּוּצֵיהֶ֖ם עָ֣שׂוּ ב֑וֹ עַל־כֵּ֛ן נְתַתִּ֥יו לָהֶ֖ם לְנִדָּֽה׃

‎21 ‏וּנְתַתִּ֤יו בְּיַֽד־הַזָּרִים֙ לָבַ֔ז וּלְרִשְׁעֵ֥י הָאָ֖רֶץ לְשָׁלָ֑ל וחללה וְחִלְּלֽוּהוּ׃

‎22 ‏וַהֲסִבּוֹתִ֤י פָנַי֙ מֵהֶ֔ם וְחִלְּל֖וּ אֶת־צְפוּנִ֑י וּבָאוּ־בָ֥הּ פָּרִיצִ֖ים וְחִלְּלֽוּהָ׃ פ

‎23 ‏עֲשֵׂ֖ה הָֽרַתּ֑וֹק כִּ֣י הָאָ֗רֶץ מָֽלְאָה֙ מִשְׁפַּ֣ט דָּמִ֔ים וְהָעִ֖יר מָלְאָ֥ה חָמָֽס׃

‎24 ‏וְהֵֽבֵאתִי֙ רָעֵ֣י גוֹיִ֔ם וְיָרְשׁ֖וּ אֶת־בָּֽתֵּיהֶ֑ם וְהִשְׁבַּתִּי֙ גְּא֣וֹן עַזִּ֔ים וְנִחֲל֖וּ מְקַֽדְשֵׁיהֶֽם׃

‎25 ‏קְפָ֖דָה־בָ֑א וּבִקְשׁ֥וּ שָׁל֖וֹם וָאָֽיִן׃

‎26 ‏הוָֹ֤ה עַל־הוָֹה֙ תָּב֔וֹא וּשְׁמֻעָ֥ה אֶל־שְׁמוּעָ֖ה תִּֽהְיֶ֑ה וּבִקְשׁ֤וּ חָזוֹן֙ מִנָּבִ֔יא וְתוֹרָה֙ תֹּאבַ֣ד מִכֹּהֵ֔ן וְעֵצָ֖ה מִזְּקֵנִֽים׃

‎27 ‏הַמֶּ֣לֶךְ יִתְאַבָּ֗ל וְנָשִׂיא֙ יִלְבַּ֣שׁ שְׁמָמָ֔ה וִידֵ֥י עַם־הָאָ֖רֶץ תִּבָּהַ֑לְנָה מִדַּרְכָּ֞ם אֶעֱשֶׂ֤ה אוֹתָם֙ וּבְמִשְׁפְּטֵיהֶ֣ם אֶשְׁפְּטֵ֔ם וְיָדְע֖וּ כִּֽי־אֲנִ֥י יְהוָֽה׃ פ

1 wayəhî ḏəḇar-yəhwâ ’ēlay lē’mōr:

2 wə’atâ ḇen-’āḏām kōh-’āmar ’ăḏōnāy yəhwih lə’aḏəmaṯ yiśərā’ēl qēṣ bā’ haqqēṣ ‘al-’arəb^a‘aṯ ’arəb^a‘ kanəfwōṯ hā’āreṣ:

3 ‘atâ haqqēṣ ‘ālayiḵə wəšill^aḥətî ’apî bāḵə ûšəfaṭətîḵə kiḏərāḵāyiḵə wənāṯatî ‘ālayiḵə ’ēṯ kāl-twō‘ăḇōṯāyiḵə:

4 wəlō’-ṯāḥwōs ‘ênî ‘ālayiḵə wəlō’ ’eḥəmwōl kî ḏərāḵayiḵə ‘ālayiḵə ’etēn wəṯwō‘ăḇwōṯayiḵə bəṯwōḵēḵə tihəyeynā wîḏ^a‘ətem kî-’ănî yəhwâ: f

5 kōh ’āmar ’ăḏōnāy yəhwih rā‘â ’^aḥaṯ rā‘â hinnēh ḇā’â:

6 qēṣ bā’ bā’ haqqēṣ hēqîṣ ’ēlāyiḵə hinnēh bā’â:

7 bā’â haṣṣəfîrâ ’ēleyḵā ywōšēḇ hā’āreṣ bā’ hā‘ēṯ qārwōḇ hayywōm məhûmâ wəlō’-hēḏ hārîm:

8 ‘atâ miqqārwōḇ ’ešəpwōḵə ḥămāṯî ‘ālayiḵə wəḵillêṯî ’apî bāḵə ûšəfaṭətîḵə kiḏərāḵāyiḵə wənāṯatî ‘ālayiḵə ’ēṯ kāl-twō‘ăḇwōṯāyiḵə:

9 wəlō’-ṯāḥwōs ‘ênî wəlō’ ’eḥəmwōl kiḏərāḵayiḵə ‘ālayiḵə ’etēn wəṯwō‘ăḇwōṯayiḵə bəṯwōḵēḵə tihəyeynā wîḏ^a‘ətem kî ’ănî yəhwâ makeh:

10 hinnēh hayywōm hinnēh ḇā’â yāṣə’â haṣṣəfirâ ṣāṣ hammaṭṭeh pār^aḥ hazzāḏwōn:

11 heḥāmās| qām ləmaṭṭēh-reš^a‘ lō’-mēhem wəlō’ mēhămwōnām wəlō’ mehĕmēhem wəlō’-nōhha bâem:

12 bā’ hā‘ēṯ higî‘a hayywōm haqqwōneh ’al-yiśəmāḥ wəhammwōḵēr ’al-yiṯə’abāl kî ḥārwōn ’el-kāl-hămwōnāh:

13 kî hammwōḵēr ’el-hammiməkār lō’ yāšûḇ wə‘wōḏ b^aḥayyîm ḥayyāṯām kî-ḥāzwōn ’el-kāl-hămwōnāh lō’ yāšûḇ wə’îš b^a‘ăwōnwō ḥayyāṯwō lō’ yiṯəḥazzāqû:

14 tāqə‘û ḇatāqwō‘a wəhāḵîn hakōl wə’ên hōlēḵə lammiləḥāmâ kî ḥărwōnî ’el-kāl-hămwōnāh:

15 h^aḥereḇ b^aḥûṣ wəhadeḇer wəhārā‘āḇ mibāyiṯ ’ăšer baśśāḏeh b^aḥereḇ yāmûṯ wa’ăšer bā‘îr rā‘āḇ wāḏeḇer yō’ḵălennû:

16 ûfāləṭû pəlîṭêhem wəhāyû ’el-hehārîm kəywōnê hagē’āywōṯ kullām hōmwōṯ ’îš b^a‘ăwōnwō:

17 kāl-hayyāḏayim tirəpeynâ wəḵāl-birəkayim tēlaḵənâ mmāyim:

18 wəḥāḡərû śaqqîm wəḵissəṯâ ’wōṯām pallāṣûṯ wə’el kāl-pānîm bûšâ ûḇəḵāl-rā’šêhem qārəḥâ:

19 kasəpām b^aḥûṣwōṯ yašəlîḵû ûzəhāḇām lənidâ yihəyeh kasəpām ûzəhāḇām lō’-yûḵal ləhaṣṣîlām bəywōm ‘eḇəraṯ yəhwâ nafəšām lō’ yəśabē‘û ûmē‘êhem lō’ yəmallē’û kî-miḵəšwōl ‘ăwōnām hāyâ:

20 ûṣəḇî ‘eḏəywō ləḡā’wōn śāmâû wəṣaləmê ṯwō‘ăḇōṯām šiqqûṣêhem ‘āśû ḇwō ‘al-kēn nəṯatîw lâem lənidâ:

21 ûnəṯatîw bəyaḏ-hazzārîm lāḇaz ûlərišə‘ê hā’āreṣ ləšālāl wəḥilləluhā wəḥilləlûhû:

22 wahăsibwōṯî fānay mēhem wəḥilləlû ’eṯ-ṣəfûnî ûḇā’û-ḇāh pārîṣîm wəḥilləlûhā: f

23 ‘ăśēh hāratwōq kî hā’āreṣ mālə’â mišəpaṭ dāmîm wəhā‘îr mālə’â ḥāmās:

24 wəhēḇē’ṯî rā‘ê ḡwōyim wəyārəšû ’eṯ-bātêhem wəhišəbatî gə’wōn ‘azzîm wəniḥălû məqaḏəšêhem:

25 qəfāḏâ-ḇā’ ûḇiqəšû šālwōm wā’āyin:

26 hwōâ ‘al-hwōâ tāḇwō’ ûšəmu‘â ’el-šəmû‘â tihəyeh ûḇiqəšû ḥāzwōn minnāḇî’ wəṯwōrâ tō’ḇaḏ mikōhēn wə‘ēṣâ mizzəqēnîm:

27 hammeleḵə yiṯə’abāl wənāśî’ yiləbaš šəmāmâ wîḏê ‘am-hā’āreṣ tibâalənâ midarəkām ’e‘ĕśeh ’wōṯām ûḇəmišəpəṭêhem ’ešəpəṭēm wəyāḏə‘û kî-’ănî yəhwâ: f