‎1 ‏וַיְהִ֣י׀ בִּשְׁלֹשִׁ֣ים שָׁנָ֗ה בָּֽרְבִיעִי֙ בַּחֲמִשָּׁ֣ה לַחֹ֔דֶשׁ וַאֲנִ֥י בְתֽוֹךְ־הַגּוֹלָ֖ה עַל־נְהַר־כְּבָ֑ר נִפְתְּחוּ֙ הַשָּׁמַ֔יִם וָאֶרְאֶ֖ה מַרְא֥וֹת אֱלֹהִֽים׃

‎2 ‏בַּחֲמִשָּׁ֖ה לַחֹ֑דֶשׁ הִ֚יא הַשָּׁנָ֣ה הַחֲמִישִׁ֔ית לְגָל֖וּת הַמֶּ֥לֶךְ יוֹיָכִֽין׃

‎3 ‏הָיֹ֣ה הָיָ֣ה דְבַר־יְ֠הוָה אֶל־יְחֶזְקֵ֨אל בֶּן־בּוּזִ֧י הַכֹּהֵ֛ן בְּאֶ֥רֶץ כַּשְׂדִּ֖ים עַל־נְהַר־כְּבָ֑ר וַתְּהִ֥י עָלָ֛יו שָׁ֖ם יַד־יְהוָֽה׃

‎4 ‏וָאֵ֡רֶא וְהִנֵּה֩ ר֨וּחַ סְעָרָ֜ה בָּאָ֣ה מִן־הַצָּפ֗וֹן עָנָ֤ן גָּדוֹל֙ וְאֵ֣שׁ מִתְלַקַּ֔חַת וְנֹ֥גַֽהּ ל֖וֹ סָבִ֑יב וּמִ֨תּוֹכָ֔הּ כְּעֵ֥ין הַחַשְׁמַ֖ל מִתּ֥וֹךְ הָאֵֽשׁ׃

‎5 ‏וּמִ֨תּוֹכָ֔הּ דְּמ֖וּת אַרְבַּ֣ע חַיּ֑וֹת וְזֶה֙ מַרְאֵֽיהֶ֔ן דְּמ֥וּת אָדָ֖ם לָהֵֽנָּה׃

‎6 ‏וְאַרְבָּעָ֥ה פָנִ֖ים לְאֶחָ֑ת וְאַרְבַּ֥ע כְּנָפַ֖יִם לְאַחַ֥ת לָהֶֽם׃

‎7 ‏וְרַגְלֵיהֶ֖ם רֶ֣גֶל יְשָׁרָ֑ה וְכַ֣ף רַגְלֵיהֶ֗ם כְּכַף֙ רֶ֣גֶל עֵ֔גֶל וְנֹ֣צְצִ֔ים כְּעֵ֖ין נְחֹ֥שֶׁת קָלָֽל׃

‎8 ‏וידו וִידֵ֣י אָדָ֗ם מִתַּ֙חַת֙ כַּנְפֵיהֶ֔ם עַ֖ל אַרְבַּ֣עַת רִבְעֵיהֶ֑ם וּפְנֵיהֶ֥ם וְכַנְפֵיהֶ֖ם לְאַרְבַּעְתָּֽם׃

‎9 ‏חֹֽבְרֹ֛ת אִשָּׁ֥ה אֶל־אֲחוֹתָ֖הּ כַּנְפֵיהֶ֑ם לֹא־יִסַּ֣בּוּ בְלֶכְתָּ֔ן אִ֛ישׁ אֶל־עֵ֥בֶר פָּנָ֖יו יֵלֵֽכוּ׃

‎10 ‏וּדְמ֣וּת פְּנֵיהֶם֮ פְּנֵ֣י אָדָם֒ וּפְנֵ֨י אַרְיֵ֤ה אֶל־הַיָּמִין֙ לְאַרְבַּעְתָּ֔ם וּפְנֵי־שׁ֥וֹר מֵֽהַשְּׂמֹ֖אול לְאַרְבַּעְתָּ֑ן וּפְנֵי־נֶ֖שֶׁר לְאַרְבַּעְתָּֽן׃

‎11 ‏וּפְנֵיהֶ֕ם וְכַנְפֵיהֶ֥ם פְּרֻד֖וֹת מִלְמָ֑עְלָה לְאִ֗ישׁ שְׁ֚תַּיִם חֹבְר֣וֹת אִ֔ישׁ וּשְׁתַּ֣יִם מְכַסּ֔וֹת אֵ֖ת גְּוִיֹתֵיהֶֽנָה׃¹

‎12 ‏וְאִ֛ישׁ אֶל־עֵ֥בֶר פָּנָ֖יו יֵלֵ֑כוּ אֶ֣ל אֲשֶׁר֩ יִֽהְיֶה־שָׁ֨מָּה הָר֤וּחַ לָלֶ֙כֶת֙ יֵלֵ֔כוּ לֹ֥א יִסַּ֖בּוּ בְּלֶכְתָּֽן׃

‎13 ‏וּדְמ֨וּת הַחַיּ֜וֹת מַרְאֵיהֶ֣ם כְּגַחֲלֵי־אֵ֗שׁ בֹּֽעֲרוֹת֙ כְּמַרְאֵ֣ה הַלַּפִּדִ֔ים הִ֕יא מִתְהַלֶּ֖כֶת בֵּ֣ין הַחַיּ֑וֹת וְנֹ֣גַהּ לָאֵ֔שׁ וּמִן־הָאֵ֖שׁ יוֹצֵ֥א בָרָֽק׃

‎14 ‏וְהַחַיּ֖וֹת רָצ֣וֹא וָשׁ֑וֹב כְּמַרְאֵ֖ה הַבָּזָֽק׃

‎15 ‏וָאֵ֖רֶא הַחַיּ֑וֹת וְהִנֵּה֩ אוֹפַ֨ן אֶחָ֥ד בָּאָ֛רֶץ אֵ֥צֶל הַחַיּ֖וֹת לְאַרְבַּ֥עַת פָּנָֽיו׃

‎16 ‏מַרְאֵ֨ה הָאוֹפַנִּ֤ים וּמַעֲשֵׂיהֶם֙ כְּעֵ֣ין תַּרְשִׁ֔ישׁ וּדְמ֥וּת אֶחָ֖ד לְאַרְבַּעְתָּ֑ן וּמַרְאֵיהֶם֙ וּמַ֣עֲשֵׂיהֶ֔ם כַּאֲשֶׁ֛ר יִהְיֶ֥ה הָאוֹפַ֖ן בְּת֥וֹךְ הָאוֹפָֽן׃

‎17 ‏עַל־אַרְבַּ֥עַת רִבְעֵיהֶ֖ן בְּלֶכְתָּ֣ם יֵלֵ֑כוּ לֹ֥א יִסַּ֖בּוּ בְּלֶכְתָּֽן׃

‎18 ‏וְגַ֨בֵּיהֶ֔ן וְגֹ֥בַהּ לָהֶ֖ם וְיִרְאָ֣ה לָהֶ֑ם וְגַבֹּתָ֗ם מְלֵאֹ֥ת עֵינַ֛יִם סָבִ֖יב לְאַרְבַּעְתָּֽן׃

‎19 ‏וּבְלֶ֙כֶת֙ הַֽחַיּ֔וֹת יֵלְכ֥וּ הָאוֹפַנִּ֖ים אֶצְלָ֑ם וּבְהִנָּשֵׂ֤א הַֽחַיּוֹת֙ מֵעַ֣ל הָאָ֔רֶץ יִנָּשְׂא֖וּ הָאוֹפַנִּֽים׃

‎20 ‏עַ֣ל אֲשֶׁר֩ יִֽהְיֶה־שָּׁ֨ם הָר֤וּחַ לָלֶ֙כֶת֙ יֵלֵ֔כוּ שָׁ֥מָּה הָר֖וּחַ לָלֶ֑כֶת וְהָאוֹפַנִּ֗ים יִנָּשְׂאוּ֙ לְעֻמָּתָ֔ם כִּ֛י ר֥וּחַ הַחַיָּ֖ה בָּאוֹפַנִּֽים׃

‎21 ‏בְּלֶכְתָּ֣ם יֵלֵ֔כוּ וּבְעָמְדָ֖ם יַֽעֲמֹ֑דוּ וּֽבְהִנָּשְׂאָ֞ם מֵעַ֣ל הָאָ֗רֶץ יִנָּשְׂא֤וּ הָאֽוֹפַנִּים֙ לְעֻמָּתָ֔ם כִּ֛י ר֥וּחַ הַחַיָּ֖ה בָּאוֹפַנִּֽים׃

‎22 ‏וּדְמ֞וּת עַל־רָאשֵׁ֤י הַחַיָּה֙ רָקִ֔יעַ כְּעֵ֖ין הַקֶּ֣רַח הַנּוֹרָ֑א נָט֥וּי עַל־רָאשֵׁיהֶ֖ם מִלְמָֽעְלָה׃

‎23 ‏וְתַ֙חַת֙ הָרָקִ֔יעַ כַּנְפֵיהֶ֣ם יְשָׁר֔וֹת אִשָּׁ֖ה אֶל־אֲחוֹתָ֑הּ לְאִ֗ישׁ שְׁתַּ֤יִם מְכַסּוֹת֙ לָהֵ֔נָּה וּלְאִ֗ישׁ שְׁתַּ֤יִם מְכַסּוֹת֙ לָהֵ֔נָּה אֵ֖ת גְּוִיֹּתֵיהֶֽם׃

‎24 ‏וָאֶשְׁמַ֣ע אֶת־ק֣וֹל כַּנְפֵיהֶ֡ם כְּקוֹל֩ מַ֨יִם רַבִּ֤ים כְּקוֹל־שַׁדַּי֙ בְּלֶכְתָּ֔ם ק֥וֹל הֲמֻלָּ֖ה כְּק֣וֹל מַחֲנֶ֑ה בְּעָמְדָ֖ם תְּרַפֶּ֥ינָה כַנְפֵיהֶֽן׃

‎25 ‏וַיְהִי־ק֕וֹל מֵעַ֕ל לָרָקִ֖יעַ אֲשֶׁ֣ר עַל־רֹאשָׁ֑ם בְּעָמְדָ֖ם תְּרַפֶּ֥ינָה כַנְפֵיהֶֽן׃

‎26 ‏וּמִמַּ֗עַל לָרָקִ֙יעַ֙ אֲשֶׁ֣ר עַל־רֹאשָׁ֔ם כְּמַרְאֵ֥ה אֶֽבֶן־סַפִּ֖יר דְּמ֣וּת כִּסֵּ֑א וְעַל֙ דְּמ֣וּת הַכִּסֵּ֔א דְּמ֞וּת כְּמַרְאֵ֥ה אָדָ֛ם עָלָ֖יו מִלְמָֽעְלָה׃

‎27 ‏וָאֵ֣רֶא׀ כְּעֵ֣ין חַשְׁמַ֗ל כְּמַרְאֵה־אֵ֤שׁ בֵּֽית־לָהּ֙ סָבִ֔יב מִמַּרְאֵ֥ה מָתְנָ֖יו וּלְמָ֑עְלָה וּמִמַּרְאֵ֤ה מָתְנָיו֙ וּלְמַ֔טָּה רָאִ֙יתִי֙ כְּמַרְאֵה־אֵ֔שׁ וְנֹ֥גַֽהּ ל֖וֹ סָבִֽיב׃

‎28 ‏כְּמַרְאֵ֣ה הַקֶּ֡שֶׁת אֲשֶׁר֩ יִֽהְיֶ֨ה בֶעָנָ֜ן בְּי֣וֹם הַגֶּ֗שֶׁם כֵּ֣ן מַרְאֵ֤ה הַנֹּ֙גַהּ֙ סָבִ֔יב ה֕וּא מַרְאֵ֖ה דְּמ֣וּת כְּבוֹד־יְהוָ֑ה וָֽאֶרְאֶה֙ וָאֶפֹּ֣ל עַל־פָּנַ֔י וָאֶשְׁמַ֖ע ק֥וֹל מְדַבֵּֽר׃ ס

1 wayəhî| bišəlōšîm šānâ bārəḇî‘î b^aḥămiššâ l^aḥōḏeš wa’ănî ḇəṯwōḵə-hagwōlâ ‘al-nəhar-kəḇār nifətəḥû haššāmayim wā’erə’eh marə’wōṯ ’ĕlōhîm:

2 b^aḥămiššâ l^aḥōḏeš hî’ haššānâ h^aḥămîšîṯ ləḡālûṯ hammeleḵə ywōyāḵîn:

3 hāyōh hāyâ ḏəḇar-yəhwâ ’el-yəḥezəqē’l ben-bûzî hakōhēn bə’ereṣ kaśədîm ‘al-nəhar-kəḇār watəhî ‘ālāyw šām yaḏ-yəhwâ:

4 wā’ēre’ wəhinnēh rûḥa sə‘ārâ bā’â min-haṣṣāfwōn ‘ānān gāḏwōl wə’ēš miṯəlaqq^aḥaṯ wənōḡ^ah lwō sāḇîḇ ûmitwōḵāh kə‘ên h^aḥašəmal mitwōḵə hā’ēš:

5 ûmitwōḵāh dəmûṯ ’arəb^a‘ ḥayywōṯ wəzeh marə’êhen dəmûṯ ’āḏām lâēnnâ:

6 wə’arəbā‘â fānîm lə’eḥāṯ wə’arəb^a‘ kənāfayim lə’^aḥaṯ lâem:

7 wəraḡəlêhem reḡel yəšārâ wəḵaf raḡəlêhem kəḵaf reḡel ‘ēḡel wənōṣəṣîm kə‘ên nəḥōšeṯ qālāl:

8 wəyāḏwō wîḏê ’āḏām mit^aḥaṯ kanəfêhem ‘al ’arəb^a‘aṯ riḇə‘êhem ûfənêhem wəḵanəfêhem lə’arəb^a‘ətām:

9 ḥōḇərōṯ ’iššâ ’el-’ăḥwōṯāh kanəfêhem lō’-yissabû ḇəleḵətān ’îš ’el-‘ēḇer pānāyw yēlēḵû:

10 ûḏəmûṯ pənêhem pənê ’āḏām ûfənê ’arəyēh ’el-hayyāmîn lə’arəb^a‘ətām ûfənê-šwōr mēhaśśəmō’wl lə’arəb^a‘ətān ûfənê-nešer lə’arəb^a‘ətān:

11 ûfənêhem wəḵanəfêhem pəruḏwōṯ miləmā‘əlâ lə’îš šətayim ḥōḇərwōṯ ’îš ûšətayim məḵasswōṯ ’ēṯ gəwîōṯêhenâ:¹

12 wə’îš ’el-‘ēḇer pānāyw yēlēḵû ’el ’ăšer yihəyeh-šāmmâ hārûḥa lāleḵeṯ yēlēḵû lō’ yissabû bəleḵətān:

13 ûḏəmûṯ h^aḥayywōṯ marə’êhem kəḡ^aḥălê-’ēš bō‘ărwōṯ kəmarə’ēh hallapiḏîm hî’ miṯəhalleḵeṯ bên h^aḥayywōṯ wənōḡ^ah lā’ēš ûmin-hā’ēš ywōṣē’ ḇārāq:

14 wəh^aḥayywōṯ rāṣwō’ wāšwōḇ kəmarə’ēh habāzāq:

15 wā’ēre’ h^aḥayywōṯ wəhinnēh ’wōfan ’eḥāḏ bā’āreṣ ’ēṣel h^aḥayywōṯ lə’arəb^a‘aṯ pānāyw:

16 marə’ēh hā’wōfannîm ûm^a‘ăśêhem kə‘ên tarəšîš ûḏəmûṯ ’eḥāḏ lə’arəb^a‘ətān ûmarə’êhem ûm^a‘ăśêhem ka’ăšer yihəyeh hā’wōfan bəṯwōḵə hā’wōfān:

17 ‘al-’arəb^a‘aṯ riḇə‘êhen bəleḵətām yēlēḵû lō’ yissabû bəleḵətān:

18 wəḡabêhen wəḡōḇ^ah lâem wəyirə’â lâem wəḡabōṯām məlē’ōṯ ‘ênayim sāḇîḇ lə’arəb^a‘ətān:

19 ûḇəleḵeṯ h^aḥayywōṯ yēləḵû hā’wōfannîm ’eṣəlām ûḇəhinnāśē’ h^aḥayywōṯ mē‘al hā’āreṣ yinnāśə’û hā’wōfannîm:

20 ‘al ’ăšer yihəyeh-ššām hārûḥa lāleḵeṯ yēlēḵû šāmmâ hārûḥa lāleḵeṯ wəhā’wōfannîm yinnāśə’û lə‘ummāṯām kî rûḥa h^aḥayyâ bā’wōfannîm:

21 bəleḵətām yēlēḵû ûḇə‘āməḏām y^a‘ămōḏû ûḇəhinnāśə’ām mē‘al hā’āreṣ yinnāśə’û hā’wōfannîm lə‘ummāṯām kî rûḥa h^aḥayyâ bā’wōfannîm:

22 ûḏəmûṯ ‘al-rā’šê h^aḥayyâ rāqî‘a kə‘ên haqqer^aḥ hannwōrā’ nāṭûy ‘al-rā’šêhem miləmā‘əlâ:

23 wəṯ^aḥaṯ hārāqî‘a kanəfêhem yəšārwōṯ ’iššâ ’el-’ăḥwōṯāh lə’îš šətayim məḵasswōṯ lâēnnâ ûlə’îš šətayim məḵasswōṯ lâēnnâ ’ēṯ gəwîyōṯêhem:

24 wā’ešəm^a‘ ’eṯ-qwōl kanəfêhem kəqwōl mayim rabîm kəqwōl-šaday bəleḵətām qwōl hămullâ kəqwōl m^aḥăneh bə‘āməḏām tərapeynâ ḵanəfêhen:

25 wayəhî-qwōl mē‘al lārāqî‘a ’ăšer ‘al-rō’šām bə‘āməḏām tərapeynâ ḵanəfêhen:

26 ûmimm^a‘al lārāqî‘a ’ăšer ‘al-rō’šām kəmarə’ēh ’eḇen-sapîr dəmûṯ kissē’ wə‘al dəmûṯ hakissē’ dəmûṯ kəmarə’ēh ’āḏām ‘ālāyw miləmā‘əlâ:

27 wā’ēre’| kə‘ên ḥašəmal kəmarə’ēh-’ēš bêṯ-lāh sāḇîḇ mimmarə’ēh māṯənāyw ûləmā‘əlâ ûmimmarə’ēh māṯənāyw ûləmaṭṭâ rā’îṯî kəmarə’ēh-’ēš wənōḡ^ah lwō sāḇîḇ:

28 kəmarə’ēh haqqešeṯ ’ăšer yihəyeh ḇe‘ānān bəywōm hagešem kēn marə’ēh hannōḡ^ah sāḇîḇ hû’ marə’ēh dəmûṯ kəḇwōḏ-yəhwâ wā’erə’eh wā’epōl ‘al-pānay wā’ešəm^a‘ qwōl məḏabēr: s