‎1 ‏וְאֵ֙לֶּה֙ הַמִּשְׁפָּטִ֔ים אֲשֶׁ֥ר תָּשִׂ֖ים לִפְנֵיהֶֽם׃

‎2 ‏כִּ֤י תִקְנֶה֙ עֶ֣בֶד עִבְרִ֔י שֵׁ֥שׁ שָׁנִ֖ים יַעֲבֹ֑ד וּבַ֨שְּׁבִעִ֔ת יֵצֵ֥א לַֽחָפְשִׁ֖י חִנָּֽם׃

‎3 ‏אִם־בְּגַפּ֥וֹ יָבֹ֖א בְּגַפּ֣וֹ יֵצֵ֑א אִם־בַּ֤עַל אִשָּׁה֙ ה֔וּא וְיָצְאָ֥ה אִשְׁתּ֖וֹ עִמּֽוֹ׃

‎4 ‏אִם־אֲדֹנָיו֙ יִתֶּן־ל֣וֹ אִשָּׁ֔ה וְיָלְדָה־ל֥וֹ בָנִ֖ים א֣וֹ בָנ֑וֹת הָאִשָּׁ֣ה וִילָדֶ֗יהָ תִּהְיֶה֙ לַֽאדֹנֶ֔יהָ וְה֖וּא יֵצֵ֥א בְגַפּֽוֹ׃

‎5 ‏וְאִם־אָמֹ֤ר יֹאמַר֙ הָעֶ֔בֶד אָהַ֙בְתִּי֙ אֶת־אֲדֹנִ֔י אֶת־אִשְׁתִּ֖י וְאֶת־בָּנָ֑י לֹ֥א אֵצֵ֖א חָפְשִֽׁי׃

‎6 ‏וְהִגִּישׁ֤וֹ אֲדֹנָיו֙ אֶל־הָ֣אֱלֹהִ֔ים וְהִגִּישׁוֹ֙ אֶל־הַדֶּ֔לֶת א֖וֹ אֶל־הַמְּזוּזָ֑ה וְרָצַ֨ע אֲדֹנָ֤יו אֶת־אָזְנוֹ֙ בַּמַּרְצֵ֔עַ וַעֲבָד֖וֹ לְעֹלָֽם׃ ס

‎7 ‏וְכִֽי־יִמְכֹּ֥ר אִ֛ישׁ אֶת־בִּתּ֖וֹ לְאָמָ֑ה לֹ֥א תֵצֵ֖א כְּצֵ֥את הָעֲבָדִֽים׃

‎8 ‏אִם־רָעָ֞ה בְּעֵינֵ֧י אֲדֹנֶ֛יהָ אֲשֶׁר־לא ל֥וֹ יְעָדָ֖הּ וְהֶפְדָּ֑הּ לְעַ֥ם נָכְרִ֛י לֹא־יִמְשֹׁ֥ל לְמָכְרָ֖הּ בְּבִגְדוֹ־בָֽהּ׃

‎9 ‏וְאִם־לִבְנ֖וֹ יִֽיעָדֶ֑נָּה כְּמִשְׁפַּ֥ט הַבָּנ֖וֹת יַעֲשֶׂה־לָּֽהּ׃

‎10 ‏אִם־אַחֶ֖רֶת יִֽקַּֽח־ל֑וֹ שְׁאֵרָ֛הּ כְּסוּתָ֥הּ וְעֹנָתָ֖הּ לֹ֥א יִגְרָֽע׃

‎11 ‏וְאִם־שְׁלָ֨שׁ־אֵ֔לֶּה לֹ֥א יַעֲשֶׂ֖ה לָ֑הּ וְיָצְאָ֥ה חִנָּ֖ם אֵ֥ין כָּֽסֶף׃ ס

‎12 ‏מַכֵּ֥ה אִ֛ישׁ וָמֵ֖ת מ֥וֹת יוּמָֽת׃

‎13 ‏וַאֲשֶׁר֙ לֹ֣א צָדָ֔ה וְהָאֱלֹהִ֖ים אִנָּ֣ה לְיָד֑וֹ וְשַׂמְתִּ֤י לְךָ֙ מָק֔וֹם אֲשֶׁ֥ר יָנ֖וּס שָֽׁמָּה׃ ס

‎14 ‏וְכִי־יָזִ֥ד³ אִ֛ישׁ עַל־רֵעֵ֖הוּ לְהָרְג֣וֹ בְעָרְמָ֑ה מֵעִ֣ם מִזְבְּחִ֔י תִּקָּחֶ֖נּוּ לָמֽוּת׃ ס

‎15 ‏וּמַכֵּ֥ה אָבִ֛יו וְאִמּ֖וֹ מ֥וֹת יוּמָֽת׃

‎16 ‏וְגֹנֵ֨ב אִ֧ישׁ וּמְכָר֛וֹ וְנִמְצָ֥א בְיָד֖וֹ מ֥וֹת יוּמָֽת׃ ס

‎17 ‏וּמְקַלֵּ֥ל אָבִ֛יו וְאִמּ֖וֹ מ֥וֹת יוּמָֽת׃ ס

‎18 ‏וְכִֽי־יְרִיבֻ֣ן אֲנָשִׁ֔ים וְהִכָּה־אִישׁ֙ אֶת־רֵעֵ֔הוּ בְּאֶ֖בֶן א֣וֹ בְאֶגְרֹ֑ף וְלֹ֥א יָמ֖וּת וְנָפַ֥ל לְמִשְׁכָּֽב׃

‎19 ‏אִם־יָק֞וּם וְהִתְהַלֵּ֥ךְ בַּח֛וּץ עַל־מִשְׁעַנְתּ֖וֹ וְנִקָּ֣ה הַמַּכֶּ֑ה רַ֥ק שִׁבְתּ֛וֹ יִתֵּ֖ן וְרַפֹּ֥א יְרַפֵּֽא׃ ס

‎20 ‏וְכִֽי־יַכֶּה֩ אִ֨ישׁ אֶת־עַבְדּ֜וֹ א֤וֹ אֶת־אֲמָתוֹ֙ בַּשֵּׁ֔בֶט וּמֵ֖ת תַּ֣חַת יָד֑וֹ נָקֹ֖ם יִנָּקֵֽם׃

‎21 ‏אַ֥ךְ אִם־י֛וֹם א֥וֹ יוֹמַ֖יִם יַעֲמֹ֑ד לֹ֣א יֻקַּ֔ם כִּ֥י כַסְפּ֖וֹ הֽוּא׃ ס

‎22 ‏וְכִֽי־יִנָּצ֣וּ אֲנָשִׁ֗ים וְנָ֨גְפ֜וּ אִשָּׁ֤ה הָרָה֙ וְיָצְא֣וּ יְלָדֶ֔יהָ וְלֹ֥א יִהְיֶ֖ה אָס֑וֹן עָנ֣וֹשׁ יֵעָנֵ֗שׁ כַּֽאֲשֶׁ֨ר יָשִׁ֤ית עָלָיו֙ בַּ֣עַל הָֽאִשָּׁ֔ה וְנָתַ֖ן בִּפְלִלִֽים׃

‎23 ‏וְאִם־אָס֖וֹן יִהְיֶ֑ה וְנָתַתָּ֥ה נֶ֖פֶשׁ תַּ֥חַת נָֽפֶשׁ׃

‎24 ‏עַ֚יִן תַּ֣חַת עַ֔יִן שֵׁ֖ן תַּ֣חַת שֵׁ֑ן יָ֚ד תַּ֣חַת יָ֔ד רֶ֖גֶל תַּ֥חַת רָֽגֶל׃

‎25 ‏כְּוִיָּה֙ תַּ֣חַת כְּוִיָּ֔ה פֶּ֖צַע תַּ֣חַת פָּ֑צַע חַבּוּרָ֕ה תַּ֖חַת חַבּוּרָֽה׃ ס

‎26 ‏וְכִֽי־יַכֶּ֨ה אִ֜ישׁ אֶת־עֵ֥ין עַבְדּ֛וֹ אֽוֹ־אֶת־עֵ֥ין אֲמָת֖וֹ וְשִֽׁחֲתָ֑הּ לַֽחָפְשִׁ֥י יְשַׁלְּחֶ֖נּוּ תַּ֥חַת עֵינֽוֹ׃ ס

‎27 ‏וְאִם־שֵׁ֥ן עַבְדּ֛וֹ אֽוֹ־שֵׁ֥ן אֲמָת֖וֹ יַפִּ֑יל לַֽחָפְשִׁ֥י יְשַׁלְּחֶ֖נּוּ תַּ֥חַת שִׁנּֽוֹ׃ פ

‎28 ‏וְכִֽי־יִגַּ֨ח שׁ֥וֹר אֶת־אִ֛ישׁ א֥וֹ אֶת־אִשָּׁ֖ה וָמֵ֑ת סָק֨וֹל יִסָּקֵ֜ל הַשּׁ֗וֹר וְלֹ֤א יֵאָכֵל֙ אֶת־בְּשָׂר֔וֹ וּבַ֥עַל הַשּׁ֖וֹר נָקִֽי׃

‎29 ‏וְאִ֡ם שׁוֹר֩ נַגָּ֨ח ה֜וּא מִתְּמֹ֣ל שִׁלְשֹׁ֗ם וְהוּעַ֤ד בִּבְעָלָיו֙ וְלֹ֣א יִשְׁמְרֶ֔נּוּ וְהֵמִ֥ית אִ֖ישׁ א֣וֹ אִשָּׁ֑ה הַשּׁוֹר֙ יִסָּקֵ֔ל וְגַם־בְּעָלָ֖יו יוּמָֽת׃

‎30 ‏אִם־כֹּ֖פֶר יוּשַׁ֣ת עָלָ֑יו וְנָתַן֙ פִּדְיֹ֣ן נַפְשׁ֔וֹ כְּכֹ֥ל אֲשֶׁר־יוּשַׁ֖ת עָלָֽיו׃

‎31 ‏אוֹ־בֵ֥ן יִגָּ֖ח אוֹ־בַ֣ת יִגָּ֑ח כַּמִּשְׁפָּ֥ט הַזֶּ֖ה יֵעָ֥שֶׂה לּֽוֹ׃

‎32 ‏אִם־עֶ֛בֶד יִגַּ֥ח הַשּׁ֖וֹר א֣וֹ אָמָ֑ה כֶּ֣סֶף׀ שְׁלֹשִׁ֣ים שְׁקָלִ֗ים יִתֵּן֙ לַֽאדֹנָ֔יו וְהַשּׁ֖וֹר יִסָּקֵֽל׃ ס

‎33 ‏וְכִֽי־יִפְתַּ֨ח אִ֜ישׁ בּ֗וֹר א֠וֹ כִּֽי־יִכְרֶ֥ה אִ֛ישׁ בֹּ֖ר וְלֹ֣א יְכַסֶּ֑נּוּ וְנָֽפַל־שָׁ֥מָּה שּׁ֖וֹר א֥וֹ חֲמֽוֹר׃

‎34 ‏בַּ֤עַל הַבּוֹר֙ יְשַׁלֵּ֔ם כֶּ֖סֶף יָשִׁ֣יב לִבְעָלָ֑יו וְהַמֵּ֖ת יִֽהְיֶה־לּֽוֹ׃ ס

‎35 ‏וְכִֽי־יִגֹּ֧ף שֽׁוֹר־אִ֛ישׁ אֶת־שׁ֥וֹר רֵעֵ֖הוּ וָמֵ֑ת וּמָ֨כְר֜וּ אֶת־הַשּׁ֤וֹר הַחַי֙ וְחָצ֣וּ אֶת־כַּסְפּ֔וֹ וְגַ֥ם אֶת־הַמֵּ֖ת יֶֽחֱצֽוּן׃

‎36 ‏א֣וֹ נוֹדַ֗ע כִּ֠י שׁ֣וֹר נַגָּ֥ח הוּא֙ מִתְּמ֣וֹל שִׁלְשֹׁ֔ם וְלֹ֥א יִשְׁמְרֶ֖נּוּ בְּעָלָ֑יו שַׁלֵּ֨ם יְשַׁלֵּ֥ם שׁוֹר֙ תַּ֣חַת הַשּׁ֔וֹר וְהַמֵּ֖ת יִֽהְיֶה־לּֽוֹ׃ ס

‎37 ‏כִּ֤י יִגְנֹֽב־אִישׁ֙ שׁ֣וֹר אוֹ־שֶׂ֔ה וּטְבָח֖וֹ א֣וֹ מְכָר֑וֹ חֲמִשָּׁ֣ה בָקָ֗ר יְשַׁלֵּם֙ תַּ֣חַת הַשּׁ֔וֹר וְאַרְבַּע־צֹ֖אן תַּ֥חַת הַשֶּֽׂה׃

1 wə’ēlleh hammišəpāṭîm ’ăšer tāśîm lifənêhem:

2 kî ṯiqəneh ‘eḇeḏ ‘iḇərî šēš šānîm y^a‘ăḇōḏ ûḇaššəḇi‘iṯ yēṣē’ l^aḥāfəšî ḥinnām:

3 ’im-bəḡapwō yāḇō’ bəḡapwō yēṣē’ ’im-b^a‘al ’iššâ hû’ wəyāṣə’â ’išətwō ‘immwō:

4 ’im-’ăḏōnāyw yiten-lwō ’iššâ wəyāləḏâ-lwō ḇānîm ’wō ḇānwōṯ hā’iššâ wîlāḏeyhā tihəyeh la’ḏōneyhā wəhû’ yēṣē’ ḇəḡapwō:

5 wə’im-’āmōr yō’mar hā‘eḇeḏ ’âaḇətî ’eṯ-’ăḏōnî ’eṯ-’išətî wə’eṯ-bānāy lō’ ’ēṣē’ ḥāfəšî:

6 wəhigîšwō ’ăḏōnāyw ’el-hā’ĕlōhîm wəhigîšwō ’el-hadeleṯ ’wō ’el-hamməzûzâ wərāṣ^a‘ ’ăḏōnāyw ’eṯ-’āzənwō bammarəṣē‘a w^a‘ăḇāḏwō lə‘ōlām: s

7 wəḵî-yiməkōr ’îš ’eṯ-bitwō lə’āmâ lō’ ṯēṣē’ kəṣē’ṯ hā‘ăḇāḏîm:

8 ’im-rā‘â bə‘ênê ’ăḏōneyhā ’ăšer-lō’ lwō yə‘āḏāh wəhefədāh lə‘am nāḵərî lō’-yiməšōl ləmāḵərāh bəḇiḡəḏwō-ḇāh:

9 wə’im-liḇənwō yî‘āḏennâ kəmišəpaṭ habānwōṯ y^a‘ăśeh-llāh:

10 ’im-’^aḥereṯ yiqq^aḥ-lwō šə’ērāh kəsûṯāh wə‘ōnāṯāh lō’ yiḡərā‘:

11 wə’im-šəlāš-’ēlleh lō’ y^a‘ăśeh lāh wəyāṣə’â ḥinnām ’ên kāsef: s

12 makēh ’îš wāmēṯ mwōṯ yûmāṯ:

13 wa’ăšer lō’ ṣāḏâ wəhā’ĕlōhîm ’innâ ləyāḏwō wəśamətî ləḵā māqwōm ’ăšer yānûs šāmmâ: s

14 wəḵî-yāziḏ³ ’îš ‘al-rē‘ēhû ləhārəḡwō ḇə‘ārəmâ mē‘im mizəbəḥî tiqqāḥennû lāmûṯ: s

15 ûmakēh ’āḇîw wə’immwō mwōṯ yûmāṯ:

16 wəḡōnēḇ ’îš ûməḵārwō wəniməṣā’ ḇəyāḏwō mwōṯ yûmāṯ: s

17 ûməqallēl ’āḇîw wə’immwō mwōṯ yûmāṯ: s

18 wəḵî-yərîḇun ’ănāšîm wəhikâ-’îš ’eṯ-rē‘ēhû bə’eḇen ’wō ḇə’eḡərōf wəlō’ yāmûṯ wənāfal ləmišəkāḇ:

19 ’im-yāqûm wəhiṯəhallēḵə b^aḥûṣ ‘al-mišə‘anətwō wəniqqâ hammakeh raq šiḇətwō yitēn wərapō’ yərapē’: s

20 wəḵî-yakeh ’îš ’eṯ-‘aḇədwō ’wō ’eṯ-’ămāṯwō baššēḇeṭ ûmēṯ t^aḥaṯ yāḏwō nāqōm yinnāqēm:

21 ’aḵə ’im-ywōm ’wō ywōmayim y^a‘ămōḏ lō’ yuqqam kî ḵasəpwō hû’: s

22 wəḵî-yinnāṣû ’ănāšîm wənāḡəfû ’iššâ hārâ wəyāṣə’û yəlāḏeyhā wəlō’ yihəyeh ’āswōn ‘ānwōš yē‘ānēš ka’ăšer yāšîṯ ‘ālāyw b^a‘al hā’iššâ wənāṯan bifəlilîm:

23 wə’im-’āswōn yihəyeh wənāṯatâ nefeš t^aḥaṯ nāfeš:

24 ‘ayin t^aḥaṯ ‘ayin šēn t^aḥaṯ šēn yāḏ t^aḥaṯ yāḏ reḡel t^aḥaṯ rāḡel:

25 kəwîyâ t^aḥaṯ kəwîyâ peṣ^a‘ t^aḥaṯ pāṣ^a‘ ḥabûrâ t^aḥaṯ ḥabûrâ: s

26 wəḵî-yakeh ’îš ’eṯ-‘ên ‘aḇədwō ’wō-’eṯ-‘ên ’ămāṯwō wəšiḥăṯāh l^aḥāfəšî yəšalləḥennû t^aḥaṯ ‘ênwō: s

27 wə’im-šēn ‘aḇədwō ’wō-šēn ’ămāṯwō yapîl l^aḥāfəšî yəšalləḥennû t^aḥaṯ šinnwō: f

28 wəḵî-yig^aḥ šwōr ’eṯ-’îš ’wō ’eṯ-’iššâ wāmēṯ sāqwōl yissāqēl haššwōr wəlō’ yē’āḵēl ’eṯ-bəśārwō ûḇ^a‘al haššwōr nāqî:

29 wə’im šwōr nagāḥ hû’ mitəmōl šiləšōm wəhû‘aḏ biḇə‘ālāyw wəlō’ yišəmərennû wəhēmîṯ ’îš ’wō ’iššâ haššwōr yissāqēl wəḡam-bə‘ālāyw yûmāṯ:

30 ’im-kōfer yûšaṯ ‘ālāyw wənāṯan piḏəyōn nafəšwō kəḵōl ’ăšer-yûšaṯ ‘ālāyw:

31 ’wō-ḇēn yigāḥ ’wō-ḇaṯ yigāḥ kammišəpāṭ hazzeh yē‘āśeh llwō:

32 ’im-‘eḇeḏ yig^aḥ haššwōr ’wō ’āmâ kesef| šəlōšîm šəqālîm yitēn la’ḏōnāyw wəhaššwōr yissāqēl: s

33 wəḵî-yifət^aḥ ’îš bwōr ’wō kî-yiḵəreh ’îš bōr wəlō’ yəḵassennû wənāfal-šāmmâ ššwōr ’wō ḥămwōr:

34 b^a‘al habwōr yəšallēm kesef yāšîḇ liḇə‘ālāyw wəhammēṯ yihəyeh-llwō: s

35 wəḵî-yigōf šwōr-’îš ’eṯ-šwōr rē‘ēhû wāmēṯ ûmāḵərû ’eṯ-haššwōr h^aḥay wəḥāṣû ’eṯ-kasəpwō wəḡam ’eṯ-hammēṯ yeḥĕṣûn:

36 ’wō nwōḏ^a‘ kî šwōr nagāḥ hû’ mitəmwōl šiləšōm wəlō’ yišəmərennû bə‘ālāyw šallēm yəšallēm šwōr t^aḥaṯ haššwōr wəhammēṯ yihəyeh-llwō: s

37 kî yiḡənōḇ-’îš šwōr ’wō-śeh ûṭəḇāḥwō ’wō məḵārwō ḥămiššâ ḇāqār yəšallēm t^aḥaṯ haššwōr wə’arəb^a‘-ṣō’n t^aḥaṯ haśśeh: