‎1 ‏וַיֹּ֤אמֶר יְהוָה֙ אֶל־מֹשֶׁ֔ה רְאֵ֛ה נְתַתִּ֥יךָ אֱלֹהִ֖ים לְפַרְעֹ֑ה וְאַהֲרֹ֥ן אָחִ֖יךָ יִהְיֶ֥ה נְבִיאֶֽךָ׃

‎2 ‏אַתָּ֣ה תְדַבֵּ֔ר אֵ֖ת כָּל־אֲשֶׁ֣ר אֲצַוֶּ֑ךָּ וְאַהֲרֹ֤ן אָחִ֙יךָ֙ יְדַבֵּ֣ר אֶל־פַּרְעֹ֔ה וְשִׁלַּ֥ח אֶת־בְּנֵֽי־יִשְׂרָאֵ֖ל מֵאַרְצֽוֹ׃

‎3 ‏וַאֲנִ֥י אַקְשֶׁ֖ה אֶת־לֵ֣ב פַּרְעֹ֑ה וְהִרְבֵּיתִ֧י אֶת־אֹתֹתַ֛י וְאֶת־מוֹפְתַ֖י בְּאֶ֥רֶץ מִצְרָֽיִם׃

‎4 ‏וְלֹֽא־יִשְׁמַ֤ע אֲלֵכֶם֙ פַּרְעֹ֔ה וְנָתַתִּ֥י אֶת־יָדִ֖י בְּמִצְרָ֑יִם וְהוֹצֵאתִ֨י אֶת־צִבְאֹתַ֜י אֶת־עַמִּ֤י בְנֵֽי־יִשְׂרָאֵל֙ מֵאֶ֣רֶץ מִצְרַ֔יִם בִּשְׁפָטִ֖ים גְּדֹלִֽים׃

‎5 ‏וְיָדְע֤וּ מִצְרַ֙יִם֙ כִּֽי־אֲנִ֣י יְהוָ֔ה בִּנְטֹתִ֥י אֶת־יָדִ֖י עַל־מִצְרָ֑יִם וְהוֹצֵאתִ֥י אֶת־בְּנֵֽי־יִשְׂרָאֵ֖ל מִתּוֹכָֽם׃

‎6 ‏וַיַּ֥עַשׂ מֹשֶׁ֖ה וְאַהֲרֹ֑ן כַּאֲשֶׁ֨ר צִוָּ֧ה יְהוָ֛ה אֹתָ֖ם כֵּ֥ן עָשֽׂוּ׃

‎7 ‏וּמֹשֶׁה֙ בֶּן־שְׁמֹנִ֣ים שָׁנָ֔ה וְאַֽהֲרֹ֔ן בֶּן־שָׁלֹ֥שׁ וּשְׁמֹנִ֖ים שָׁנָ֑ה בְּדַבְּרָ֖ם אֶל־פַּרְעֹֽה׃ פ

‎8 ‏וַיֹּ֣אמֶר יְהוָ֔ה אֶל־מֹשֶׁ֥ה וְאֶֽל־אַהֲרֹ֖ן לֵאמֹֽר׃

‎9 ‏כִּי֩ יְדַבֵּ֨ר אֲלֵכֶ֤ם פַּרְעֹה֙ לֵאמֹ֔ר תְּנ֥וּ לָכֶ֖ם מוֹפֵ֑ת וְאָמַרְתָּ֣ אֶֽל־אַהֲרֹ֗ן קַ֧ח אֶֽת־מַטְּךָ֛ וְהַשְׁלֵ֥ךְ לִפְנֵֽי־פַרְעֹ֖ה יְהִ֥י לְתַנִּֽין׃

‎10 ‏וַיָּבֹ֨א מֹשֶׁ֤ה וְאַהֲרֹן֙ אֶל־פַּרְעֹ֔ה וַיַּ֣עַשׂוּ¹ כֵ֔ן כַּאֲשֶׁ֖ר צִוָּ֣ה יְהוָ֑ה וַיַּשְׁלֵ֨ךְ אַהֲרֹ֜ן אֶת־מַטֵּ֗הוּ לִפְנֵ֥י פַרְעֹ֛ה וְלִפְנֵ֥י עֲבָדָ֖יו וַיְהִ֥י לְתַנִּֽין׃

‎11 ‏וַיִּקְרָא֙ גַּם־פַּרְעֹ֔ה לַֽחֲכָמִ֖ים וְלַֽמְכַשְּׁפִ֑ים וַיַּֽעֲשׂ֨וּ גַם־הֵ֜ם חַרְטֻמֵּ֥י מִצְרַ֛יִם בְּלַהֲטֵיהֶ֖ם כֵּֽן׃

‎12 ‏וַיַּשְׁלִ֙יכוּ֙ אִ֣ישׁ מַטֵּ֔הוּ וַיִּהְי֖וּ לְתַנִּינִ֑ם וַיִּבְלַ֥ע מַטֵּֽה־אַהֲרֹ֖ן אֶת־מַטֹּתָֽם׃

‎13 ‏וַיֶּחֱזַק֙ לֵ֣ב פַּרְעֹ֔ה וְלֹ֥א שָׁמַ֖ע אֲלֵהֶ֑ם כַּאֲשֶׁ֖ר דִּבֶּ֥ר יְהוָֽה׃ פ

‎14 ‏וַיֹּ֤אמֶר יְהוָה֙ אֶל־מֹשֶׁ֔ה כָּבֵ֖ד לֵ֣ב פַּרְעֹ֑ה מֵאֵ֖ן לְשַׁלַּ֥ח הָעָֽם׃

‎15 ‏לֵ֣ךְ אֶל־פַּרְעֹ֞ה בַּבֹּ֗קֶר הִנֵּה֙ יֹצֵ֣א הַמַּ֔יְמָה וְנִצַּבְתָּ֥ לִקְרָאת֖וֹ עַל־שְׂפַ֣ת הַיְאֹ֑ר וְהַמַּטֶּ֛ה אֲשֶׁר־נֶהְפַּ֥ךְ לְנָחָ֖שׁ תִּקַּ֥ח בְּיָדֶֽךָ׃

‎16 ‏וְאָמַרְתָּ֣ אֵלָ֗יו יְהוָ֞ה אֱלֹהֵ֤י הָעִבְרִים֙ שְׁלָחַ֤נִי אֵלֶ֙יךָ֙ לֵאמֹ֔ר שַׁלַּח֙ אֶת־עַמִּ֔י וְיַֽעַבְדֻ֖נִי בַּמִּדְבָּ֑ר וְהִנֵּ֥ה לֹא־שָׁמַ֖עְתָּ עַד־כֹּֽה׃

‎17 ‏כֹּ֚ה אָמַ֣ר יְהוָ֔ה בְּזֹ֣את תֵּדַ֔ע כִּ֖י אֲנִ֣י יְהוָ֑ה הִנֵּ֨ה אָנֹכִ֜י מַכֶּ֣ה׀ בַּמַּטֶּ֣ה אֲשֶׁר־בְּיָדִ֗י עַל־הַמַּ֛יִם אֲשֶׁ֥ר בַּיְאֹ֖ר וְנֶהֶפְכ֥וּ לְדָֽם׃

‎18 ‏וְהַדָּגָ֧ה אֲשֶׁר־בַּיְאֹ֛ר תָּמ֖וּת וּבָאַ֣שׁ הַיְאֹ֑ר וְנִלְא֣וּ מִצְרַ֔יִם לִשְׁתּ֥וֹת מַ֖יִם מִן־הַיְאֹֽר׃ ס

‎19 ‏וַיֹּ֨אמֶר יְהוָ֜ה אֶל־מֹשֶׁ֗ה אֱמֹ֣ר אֶֽל־אַהֲרֹ֡ן קַ֣ח מַטְּךָ֣ וּנְטֵֽה־יָדְךָ֩ עַל־מֵימֵ֨י מִצְרַ֜יִם עַֽל־נַהֲרֹתָ֣ם׀ עַל־יְאֹרֵיהֶ֣ם וְעַל־אַגְמֵיהֶ֗ם וְעַ֛ל כָּל־מִקְוֵ֥ה מֵימֵיהֶ֖ם וְיִֽהְיוּ־דָ֑ם וְהָ֤יָה דָם֙ בְּכָל־אֶ֣רֶץ מִצְרַ֔יִם וּבָעֵצִ֖ים וּבָאֲבָנִֽים׃

‎20 ‏וַיַּֽעֲשׂוּ־כֵן֩ מֹשֶׁ֨ה וְאַהֲרֹ֜ן כַּאֲשֶׁ֣ר׀ צִוָּ֣ה יְהוָ֗ה וַיָּ֤רֶם בַּמַּטֶּה֙ וַיַּ֤ךְ אֶת־הַמַּ֙יִם֙ אֲשֶׁ֣ר בַּיְאֹ֔ר לְעֵינֵ֣י פַרְעֹ֔ה וּלְעֵינֵ֖י עֲבָדָ֑יו וַיֵּהָֽפְכ֛וּ כָּל־הַמַּ֥יִם אֲשֶׁר־בַּיְאֹ֖ר לְדָֽם׃

‎21 ‏וְהַדָּגָ֨ה אֲשֶׁר־בַּיְאֹ֥ר מֵ֙תָה֙ וַיִּבְאַ֣שׁ הַיְאֹ֔ר וְלֹא־יָכְל֣וּ מִצְרַ֔יִם לִשְׁתּ֥וֹת מַ֖יִם מִן־הַיְאֹ֑ר וַיְהִ֥י הַדָּ֖ם בְּכָל־אֶ֥רֶץ מִצְרָֽיִם׃

‎22 ‏וַיַּֽעֲשׂוּ־כֵ֛ן חַרְטֻמֵּ֥י מִצְרַ֖יִם בְּלָטֵיהֶ֑ם וַיֶּחֱזַ֤ק לֵב־פַּרְעֹה֙ וְלֹא־שָׁמַ֣ע אֲלֵהֶ֔ם כַּאֲשֶׁ֖ר דִּבֶּ֥ר יְהוָֽה׃

‎23 ‏וַיִּ֣פֶן פַּרְעֹ֔ה וַיָּבֹ֖א אֶל־בֵּית֑וֹ וְלֹא־שָׁ֥ת לִבּ֖וֹ גַּם־לָזֹֽאת׃

‎24 ‏וַיַּחְפְּר֧וּ כָל־מִצְרַ֛יִם סְבִיבֹ֥ת הַיְאֹ֖ר מַ֣יִם לִשְׁתּ֑וֹת כִּ֣י לֹ֤א יָֽכְלוּ֙ לִשְׁתֹּ֔ת מִמֵּימֵ֖י הַיְאֹֽר׃

‎25 ‏וַיִּמָּלֵ֖א שִׁבְעַ֣ת יָמִ֑ים אַחֲרֵ֥י הַכּוֹת־יְהוָ֖ה אֶת־הַיְאֹֽר׃ פ

‎26 ‏וַיֹּ֤אמֶר יְהוָה֙ אֶל־מֹשֶׁ֔ה בֹּ֖א אֶל־פַּרְעֹ֑ה וְאָמַרְתָּ֣ אֵלָ֗יו כֹּ֚ה אָמַ֣ר יְהוָ֔ה שַׁלַּ֥ח אֶת־עַמִּ֖י וְיַֽעַבְדֻֽנִי׃

‎27 ‏וְאִם־מָאֵ֥ן אַתָּ֖ה לְשַׁלֵּ֑חַ הִנֵּ֣ה אָנֹכִ֗י נֹגֵ֛ף אֶת־כָּל־גְּבוּלְךָ֖ בַּֽצְפַרְדְּעִֽים׃

‎28 ‏וְשָׁרַ֣ץ הַיְאֹר֮ צְפַרְדְּעִים֒ וְעָלוּ֙ וּבָ֣אוּ בְּבֵיתֶ֔ךָ וּבַחֲדַ֥ר מִשְׁכָּבְךָ֖ וְעַל־מִטָּתֶ֑ךָ וּבְבֵ֤ית עֲבָדֶ֙יךָ֙ וּבְעַמֶּ֔ךָ וּבְתַנּוּרֶ֖יךָ וּבְמִשְׁאֲרוֹתֶֽיךָ׃

‎29 ‏וּבְכָ֥ה וּֽבְעַמְּךָ֖ וּבְכָל־עֲבָדֶ֑יךָ יַעֲל֖וּ הַֽצְפַרְדְּעִֽים׃

1 wayyō’mer yəhwâ ’el-mōšeh rə’ēh nəṯatîḵā ’ĕlōhîm ləfarə‘ōh wə’ahărōn ’āḥîḵā yihəyeh nəḇî’eḵā:

2 ’atâ ṯəḏabēr ’ēṯ kāl-’ăšer ’ăṣaûeḵḵā wə’ahărōn ’āḥîḵā yəḏabēr ’el-parə‘ōh wəšill^aḥ ’eṯ-bənê-yiśərā’ēl mē’arəṣwō:

3 wa’ănî ’aqəšeh ’eṯ-lēḇ parə‘ōh wəhirəbêṯî ’eṯ-’ōṯōṯay wə’eṯ-mwōfəṯay bə’ereṣ miṣərāyim:

4 wəlō’-yišəm^a‘ ’ălēḵem parə‘ōh wənāṯatî ’eṯ-yāḏî bəmiṣərāyim wəhwōṣē’ṯî ’eṯ-ṣiḇə’ōṯay ’eṯ-‘ammî ḇənê-yiśərā’ēl mē’ereṣ miṣərayim bišəfāṭîm gəḏōlîm:

5 wəyāḏə‘û miṣərayim kî-’ănî yəhwâ binəṭōṯî ’eṯ-yāḏî ‘al-miṣərāyim wəhwōṣē’ṯî ’eṯ-bənê-yiśərā’ēl mitwōḵām:

6 wayy^a‘aś mōšeh wə’ahărōn ka’ăšer ṣiûâ yəhwâ ’ōṯām kēn ‘āśû:

7 ûmōšeh ben-šəmōnîm šānâ wə’ahărōn ben-šālōš ûšəmōnîm šānâ bəḏabərām ’el-parə‘ōh: f

8 wayyō’mer yəhwâ ’el-mōšeh wə’el-’ahărōn lē’mōr:

9 kî yəḏabēr ’ălēḵem parə‘ōh lē’mōr tənû lāḵem mwōfēṯ wə’āmarətā ’el-’ahărōn q^aḥ ’eṯ-maṭṭəḵā wəhašəlēḵə lifənê-farə‘ōh yəhî ləṯannîn:

10 wayyāḇō’ mōšeh wə’ahărōn ’el-parə‘ōh wayy^a‘aśû¹ ḵēn ka’ăšer ṣiûâ yəhwâ wayyašəlēḵə ’ahărōn ’eṯ-maṭṭēhû lifənê farə‘ōh wəlifənê ‘ăḇāḏāyw wayəhî ləṯannîn:

11 wayyiqərā’ gam-parə‘ōh l^aḥăḵāmîm wəlaməḵaššəfîm wayy^a‘ăśû ḡam-hēm ḥarəṭummê miṣərayim bəlahăṭêhem kēn:

12 wayyašəlîḵû ’îš maṭṭēhû wayyihəyû ləṯannînim wayyiḇəl^a‘ maṭṭēh-’ahărōn ’eṯ-maṭṭōṯām:

13 wayyeḥĕzaq lēḇ parə‘ōh wəlō’ šām^a‘ ’ălēhem ka’ăšer diber yəhwâ: f

14 wayyō’mer yəhwâ ’el-mōšeh kāḇēḏ lēḇ parə‘ōh mē’ēn ləšall^aḥ hā‘ām:

15 lēḵə ’el-parə‘ōh babōqer hinnēh yōṣē’ hammayəmâ wəniṣṣaḇətā liqərā’ṯwō ‘al-śəfaṯ hayə’ōr wəhammaṭṭeh ’ăšer-nehəpaḵə lənāḥāš tiqq^aḥ bəyāḏeḵā:

16 wə’āmarətā ’ēlāyw yəhwâ ’ĕlōhê hā‘iḇərîm šəlāḥanî ’ēleyḵā lē’mōr šall^aḥ ’eṯ-‘ammî wəy^a‘aḇəḏunî bammiḏəbār wəhinnēh lō’-šām^a‘ətā ‘aḏ-kōh:

17 kōh ’āmar yəhwâ bəzō’ṯ tēḏ^a‘ kî ’ănî yəhwâ hinnēh ’ānōḵî makeh| bammaṭṭeh ’ăšer-bəyāḏî ‘al-hammayim ’ăšer bayə’ōr wənehefəḵû ləḏām:

18 wəhadāḡâ ’ăšer-bayə’ōr tāmûṯ ûḇā’aš hayə’ōr wənilə’û miṣərayim lišətwōṯ mayim min-hayə’ōr: s

19 wayyō’mer yəhwâ ’el-mōšeh ’ĕmōr ’el-’ahărōn q^aḥ maṭṭəḵā ûnəṭēh-yāḏəḵā ‘al-mêmê miṣərayim ‘al-nahărōṯām| ‘al-yə’ōrêhem wə‘al-’aḡəmêhem wə‘al kāl-miqəwēh mêmêhem wəyihəyû-ḏām wəhāyâ ḏām bəḵāl-’ereṣ miṣərayim ûḇā‘ēṣîm ûḇā’ăḇānîm:

20 wayy^a‘ăśû-ḵēn mōšeh wə’ahărōn ka’ăšer| ṣiûâ yəhwâ wayyārem bammaṭṭeh wayyaḵə ’eṯ-hammayim ’ăšer bayə’ōr lə‘ênê farə‘ōh ûlə‘ênê ‘ăḇāḏāyw wayyēhāfəḵû kāl-hammayim ’ăšer-bayə’ōr ləḏām:

21 wəhadāḡâ ’ăšer-bayə’ōr mēṯâ wayyiḇə’aš hayə’ōr wəlō’-yāḵəlû miṣərayim lišətwōṯ mayim min-hayə’ōr wayəhî hadām bəḵāl-’ereṣ miṣərāyim:

22 wayy^a‘ăśû-ḵēn ḥarəṭummê miṣərayim bəlāṭêhem wayyeḥĕzaq lēḇ-parə‘ōh wəlō’-šām^a‘ ’ălēhem ka’ăšer diber yəhwâ:

23 wayyifen parə‘ōh wayyāḇō’ ’el-bêṯwō wəlō’-šāṯ libwō gam-lāzō’ṯ:

24 wayy^aḥəpərû ḵāl-miṣərayim səḇîḇōṯ hayə’ōr mayim lišətwōṯ kî lō’ yāḵəlû lišətōṯ mimmêmê hayə’ōr:

25 wayyimmālē’ šiḇə‘aṯ yāmîm ’^aḥărê hakwōṯ-yəhwâ ’eṯ-hayə’ōr: f

26 wayyō’mer yəhwâ ’el-mōšeh bō’ ’el-parə‘ōh wə’āmarətā ’ēlāyw kōh ’āmar yəhwâ šall^aḥ ’eṯ-‘ammî wəy^a‘aḇəḏunî:

27 wə’im-mā’ēn ’atâ ləšallēḥa hinnēh ’ānōḵî nōḡēf ’eṯ-kāl-gəḇûləḵā baṣəfarədə‘îm:

28 wəšāraṣ hayə’ōr ṣəfarədə‘îm wə‘ālû ûḇā’û bəḇêṯeḵā ûḇ^aḥăḏar mišəkāḇəḵā wə‘al-miṭṭāṯeḵā ûḇəḇêṯ ‘ăḇāḏeyḵā ûḇə‘ammeḵā ûḇəṯannûreyḵā ûḇəmišə’ărwōṯeyḵā:

29 ûḇəḵâ ûḇə‘amməḵā ûḇəḵāl-‘ăḇāḏeyḵā y^a‘ălû haṣəfarədə‘îm: