Sacred Texts  Bible  Index 
Polyglot  KJV  Sep  Vul 

Exodus (Shemot) Index
  Previous  Next 

Tanach (Hebrew): Exodus (Shemot) Chapter 5

1 ‏וְאַחַ֗ר בָּ֚אוּ מֹשֶׁ֣ה וְאַהֲרֹ֔ן וַיֹּאמְר֖וּ אֶל־פַּרְעֹ֑ה כֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל שַׁלַּח֙ אֶת־עַמִּ֔י וְיָחֹ֥גּוּ לִ֖י בַּמִּדְבָּֽר׃

2 ‏וַיֹּ֣אמֶר פַּרְעֹ֔ה מִ֤י יְהוָה֙ אֲשֶׁ֣ר אֶשְׁמַ֣ע בְּקֹל֔וֹ לְשַׁלַּ֖ח אֶת־יִשְׂרָאֵ֑ל לֹ֤א יָדַ֙עְתִּי֙ אֶת־יְהוָ֔ה וְגַ֥ם אֶת־יִשְׂרָאֵ֖ל לֹ֥א אֲשַׁלֵּֽחַ׃

3 ‏וַיֹּ֣אמְר֔וּ אֱלֹהֵ֥י הָעִבְרִ֖ים נִקְרָ֣א עָלֵ֑ינוּ נֵ֣לֲכָה נָּ֡א דֶּרֶךְ֩ שְׁלֹ֨שֶׁת יָמִ֜ים בַּמִּדְבָּ֗ר וְנִזְבְּחָה֙ לַֽיהוָ֣ה אֱלֹהֵ֔ינוּ פֶּ֨ן־יִפְגָּעֵ֔נוּ בַּדֶּ֖בֶר א֥וֹ בֶחָֽרֶב׃

4 ‏וַיֹּ֤אמֶר אֲלֵהֶם֙ מֶ֣לֶךְ מִצְרַ֔יִם לָ֚מָּה מֹשֶׁ֣ה וְאַהֲרֹ֔ן תַּפְרִ֥יעוּ אֶת־הָעָ֖ם מִמַּֽעֲשָׂ֑יו לְכ֖וּ לְסִבְלֹתֵיכֶֽם׃

5 ‏וַיֹּ֣אמֶר פַּרְעֹ֔ה הֵן־רַבִּ֥ים עַתָּ֖ה עַ֣ם הָאָ֑רֶץ וְהִשְׁבַּתֶּ֥ם אֹתָ֖ם מִסִּבְלֹתָֽם׃

6 ‏וַיְצַ֥ו פַּרְעֹ֖ה בַּיּ֣וֹם הַה֑וּא אֶת־הַנֹּגְשִׂ֣ים בָּעָ֔ם וְאֶת־שֹׁטְרָ֖יו לֵאמֹֽר׃

7 ‏לֹ֣א תֹאסִפ֞וּן לָתֵ֨ת תֶּ֧בֶן לָעָ֛ם לִלְבֹּ֥ן הַלְּבֵנִ֖ים כִּתְמ֣וֹל שִׁלְשֹׁ֑ם הֵ֚ם יֵֽלְכ֔וּ וְקֹשְׁשׁ֥וּ לָהֶ֖ם תֶּֽבֶן׃

8 ‏וְאֶת־מַתְכֹּ֨נֶת הַלְּבֵנִ֜ים אֲשֶׁ֣ר הֵם֩ עֹשִׂ֨ים תְּמ֤וֹל שִׁלְשֹׁם֙ תָּשִׂ֣ימוּ עֲלֵיהֶ֔ם לֹ֥א תִגְרְע֖וּ מִמֶּ֑נּוּ כִּֽי־נִרְפִּ֣ים הֵ֔ם עַל־כֵּ֗ן הֵ֤ם צֹֽעֲקִים֙ לֵאמֹ֔ר נֵלְכָ֖ה נִזְבְּחָ֥ה לֵאלֹהֵֽינוּ׃

9 ‏תִּכְבַּ֧ד הָעֲבֹדָ֛ה עַל־הָאֲנָשִׁ֖ים וְיַעֲשׂוּ־בָ֑הּ וְאַל־יִשְׁע֖וּ בְּדִבְרֵי־שָֽׁקֶר׃

10 ‏וַיֵּ֨צְא֜וּ נֹגְשֵׂ֤י3 הָעָם֙ וְשֹׁ֣טְרָ֔יו וַיֹּאמְר֥וּ אֶל־הָעָ֖ם לֵאמֹ֑ר כֹּ֚ה אָמַ֣ר פַּרְעֹ֔ה אֵינֶ֛נִּי נֹתֵ֥ן לָכֶ֖ם תֶּֽבֶן׃

11 ‏אַתֶּ֗ם לְכ֨וּ קְח֤וּ לָכֶם֙ תֶּ֔בֶן מֵאֲשֶׁ֖ר תִּמְצָ֑אוּ כִּ֣י אֵ֥ין נִגְרָ֛ע מֵעֲבֹדַתְכֶ֖ם דָּבָֽר׃

12 ‏וַיָּ֥פֶץ הָעָ֖ם בְּכָל־אֶ֣רֶץ מִצְרָ֑יִם לְקֹשֵׁ֥שׁ קַ֖שׁ לַתֶּֽבֶן׃

13 ‏וְהַנֹּגְשִׂ֖ים אָצִ֣ים לֵאמֹ֑ר כַּלּ֤וּ מַעֲשֵׂיכֶם֙ דְּבַר־י֣וֹם בְּיוֹמ֔וֹ כַּאֲשֶׁ֖ר בִּהְי֥וֹת הַתֶּֽבֶן׃

14 ‏וַיֻּכּ֗וּ שֹֽׁטְרֵי֙ בְּנֵ֣י יִשְׂרָאֵ֔ל אֲשֶׁר־שָׂ֣מוּ עֲלֵהֶ֔ם נֹגְשֵׂ֥י פַרְעֹ֖ה לֵאמֹ֑ר מַדּ֡וּעַ לֹא֩ כִלִּיתֶ֨ם חָקְכֶ֤ם לִלְבֹּן֙ כִּתְמ֣וֹל שִׁלְשֹׁ֔ם גַּם־תְּמ֖וֹל גַּם־הַיּֽוֹם׃

15 ‏וַיָּבֹ֗אוּ שֹֽׁטְרֵי֙ בְּנֵ֣י יִשְׂרָאֵ֔ל וַיִּצְעֲק֥וּ אֶל־פַּרְעֹ֖ה לֵאמֹ֑ר לָ֧מָּה תַעֲשֶׂ֦ה כֹ֖ה לַעֲבָדֶֽיךָ׃

16 ‏תֶּ֗בֶן אֵ֤ין נִתָּן֙ לַעֲבָדֶ֔יךָ וּלְבֵנִ֛ים אֹמְרִ֥ים לָ֖נוּ עֲשׂ֑וּ וְהִנֵּ֧ה עֲבָדֶ֛יךָ מֻכִּ֖ים וְחָטָ֥את עַמֶּֽךָ׃

17 ‏וַיֹּ֛אמֶר נִרְפִּ֥ים אַתֶּ֖ם נִרְפִּ֑ים עַל־כֵּן֙ אַתֶּ֣ם אֹֽמְרִ֔ים נֵלְכָ֖ה נִזְבְּחָ֥ה לַֽיהוָֽה׃

18 ‏וְעַתָּה֙ לְכ֣וּ עִבְד֔וּ וְתֶ֖בֶן לֹא־יִנָּתֵ֣ן לָכֶ֑ם וְתֹ֥כֶן לְבֵנִ֖ים תִּתֵּֽנּוּ׃

19 ‏וַיִּרְא֞וּ שֹֽׁטְרֵ֧י בְנֵֽי־יִשְׂרָאֵ֛ל אֹתָ֖ם בְּרָ֣ע לֵאמֹ֑ר לֹא־תִגְרְע֥וּ מִלִּבְנֵיכֶ֖ם דְּבַר־י֥וֹם בְּיוֹמֽוֹ׃

20 ‏וַֽיִּפְגְּעוּ֙ אֶת־מֹשֶׁ֣ה וְאֶֽת־אַהֲרֹ֔ן נִצָּבִ֖ים לִקְרָאתָ֑ם בְּצֵאתָ֖ם מֵאֵ֥ת פַּרְעֹֽה׃

21 ‏וַיֹּאמְר֣וּ אֲלֵהֶ֔ם יֵ֧רֶא יְהוָ֛ה עֲלֵיכֶ֖ם וְיִשְׁפֹּ֑ט אֲשֶׁ֧ר הִבְאַשְׁתֶּ֣ם אֶת־רֵיחֵ֗נוּ בְּעֵינֵ֤י פַרְעֹה֙ וּבְעֵינֵ֣י עֲבָדָ֔יו לָֽתֶת־חֶ֥רֶב בְּיָדָ֖ם לְהָרְגֵֽנוּ׃

22 ‏וַיָּ֧שָׁב מֹשֶׁ֛ה אֶל־יְהוָ֖ה וַיֹּאמַ֑ר אֲדֹנָ֗י לָמָ֤ה הֲרֵעֹ֙תָה֙ לָעָ֣ם הַזֶּ֔ה לָ֥מָּה זֶּ֖ה שְׁלַחְתָּֽנִי׃

23 ‏וּמֵאָ֞ז בָּ֤אתִי אֶל־פַּרְעֹה֙ לְדַבֵּ֣ר בִּשְׁמֶ֔ךָ הֵרַ֖ע לָעָ֣ם הַזֶּ֑ה וְהַצֵּ֥ל לֹא־הִצַּ֖לְתָּ אֶת־עַמֶּֽךָ׃

1 wə’aḥar bā’û mōšeh wə’ahărōn wayyō’mərû ’el-parə‘ōh kōh-’āmar yəhwâ ’ĕlōhê yiśərā’ēl šallaḥ ’eṯ-‘ammî wəyāḥōgû lî bammiḏəbār:

2 wayyō’mer parə‘ōh mî yəhwâ ’ăšer ’ešəma‘ bəqōlwō ləšallaḥ ’eṯ-yiśərā’ēl lō’ yāḏa‘ətî ’eṯ-yəhwâ wəḡam ’eṯ-yiśərā’ēl lō’ ’ăšallēḥa:

3 wayyō’mərû ’ĕlōhê hā‘iḇərîm niqərā’ ‘ālênû nēlăḵâ nnā’ dereḵə šəlōšeṯ yāmîm bammiḏəbār wənizəbəḥâ layhwâ ’ĕlōhênû pen-yifəgā‘ēnû badeḇer ’wō ḇeḥāreḇ:

4 wayyō’mer ’ălēhem meleḵə miṣərayim lāmmâ mōšeh wə’ahărōn tafərî‘û ’eṯ-hā‘ām mimma‘ăśāyw ləḵû ləsiḇəlōṯêḵem:

5 wayyō’mer parə‘ōh hēn-rabîm ‘atâ ‘am hā’āreṣ wəhišəbatem ’ōṯām missiḇəlōṯām:

6 wayəṣaw parə‘ōh bayywōm hahû’ ’eṯ-hannōḡəśîm bā‘ām wə’eṯ-šōṭərāyw lē’mōr:

7 lō’ ṯō’sifûn lāṯēṯ teḇen lā‘ām liləbōn halləḇēnîm kiṯəmwōl šiləšōm hēm yēləḵû wəqōšəšû lâem teḇen:

8 wə’eṯ-maṯəkōneṯ halləḇēnîm ’ăšer hēm ‘ōśîm təmwōl šiləšōm tāśîmû ‘ălêhem lō’ ṯiḡərə‘û mimmennû kî-nirəpîm hēm ‘al-kēn hēm ṣō‘ăqîm lē’mōr nēləḵâ nizəbəḥâ lē’lōhênû:

9 tiḵəbaḏ hā‘ăḇōḏâ ‘al-hā’ănāšîm wəya‘ăśû-ḇāh wə’al-yišə‘û bəḏiḇərê-šāqer:

10 wayyēṣə’û nōḡəśê3 hā‘ām wəšōṭərāyw wayyō’mərû ’el-hā‘ām lē’mōr kōh ’āmar parə‘ōh ’ênennî nōṯēn lāḵem teḇen:

11 ’atem ləḵû qəḥû lāḵem teḇen mē’ăšer timəṣā’û kî ’ên niḡərā‘ mē‘ăḇōḏaṯəḵem dāḇār:

12 wayyāfeṣ hā‘ām bəḵāl-’ereṣ miṣərāyim ləqōšēš qaš lateḇen:

13 wəhannōḡəśîm ’āṣîm lē’mōr kallû ma‘ăśêḵem dəḇar-ywōm bəywōmwō ka’ăšer bihəywōṯ hateḇen:

14 wayyukû šōṭərê bənê yiśərā’ēl ’ăšer-śāmû ‘ălēhem nōḡəśê farə‘ōh lē’mōr madû‘a lō’ ḵillîṯem ḥāqəḵem liləbōn kiṯəmwōl šiləšōm gam-təmwōl gam-hayywōm:

15 wayyāḇō’û šōṭərê bənê yiśərā’ēl wayyiṣə‘ăqû ’el-parə‘ōh lē’mōr lāmmâ ṯa‘ăśeh ḵōh la‘ăḇāḏeyḵā:

16 teḇen ’ên nitān la‘ăḇāḏeyḵā ûləḇēnîm ’ōmərîm lānû ‘ăśû wəhinnēh ‘ăḇāḏeyḵā mukîm wəḥāṭā’ṯ ‘ammeḵā:

17 wayyō’mer nirəpîm ’atem nirəpîm ‘al-kēn ’atem ’ōmərîm nēləḵâ nizəbəḥâ layhwâ:

18 wə‘atâ ləḵû ‘iḇəḏû wəṯeḇen lō’-yinnāṯēn lāḵem wəṯōḵen ləḇēnîm titēnnû:

19 wayyirə’û šōṭərê ḇənê-yiśərā’ēl ’ōṯām bərā‘ lē’mōr lō’-ṯiḡərə‘û milliḇənêḵem dəḇar-ywōm bəywōmwō:

20 wayyifəgə‘û ’eṯ-mōšeh wə’eṯ-’ahărōn niṣṣāḇîm liqərā’ṯām bəṣē’ṯām mē’ēṯ parə‘ōh:

21 wayyō’mərû ’ălēhem yēre’ yəhwâ ‘ălêḵem wəyišəpōṭ ’ăšer hiḇə’ašətem ’eṯ-rêḥēnû bə‘ênê farə‘ōh ûḇə‘ênê ‘ăḇāḏāyw lāṯeṯ-ḥereḇ bəyāḏām ləhārəḡēnû:

22 wayyāšāḇ mōšeh ’el-yəhwâ wayyō’mar ’ăḏōnāy lāmâ hărē‘ōṯâ lā‘ām hazzeh lāmmâ zzeh šəlaḥətānî:

23 ûmē’āz bā’ṯî ’el-parə‘ōh ləḏabēr bišəmeḵā hēra‘ lā‘ām hazzeh wəhaṣṣēl lō’-hiṣṣalətā ’eṯ-‘ammeḵā:


Next: Exodus (Shemot) Chapter 6