‎1 ‏מִ֚י כְּהֶ֣חָכָ֔ם וּמִ֥י יוֹדֵ֖עַ פֵּ֣שֶׁר דָּבָ֑ר חָכְמַ֤ת אָדָם֙ תָּאִ֣יר פָּנָ֔יו וְעֹ֥ז פָּנָ֖יו יְשֻׁנֶּֽא׃

‎2 ‏אֲנִי֙ פִּי־מֶ֣לֶךְ שְׁמ֔וֹר וְעַ֕ל דִּבְרַ֖ת שְׁבוּעַ֥ת אֱלֹהִֽים׃

‎3 ‏אַל־תִּבָּהֵ֤ל מִפָּנָיו֙ תֵּלֵ֔ךְ אַֽל־תַּעֲמֹ֖ד בְּדָבָ֣ר רָ֑ע כִּ֛י כָּל־אֲשֶׁ֥ר יַחְפֹּ֖ץ יַעֲשֶֽׂה׃

‎4 ‏בַּאֲשֶׁ֥ר דְּבַר־מֶ֖לֶךְ שִׁלְט֑וֹן וּמִ֥י יֹֽאמַר־ל֖וֹ מַֽה־תַּעֲשֶֽׂה׃

‎5 ‏שׁוֹמֵ֣ר מִצְוָ֔ה לֹ֥א יֵדַ֖ע דָּבָ֣ר רָ֑ע וְעֵ֣ת וּמִשְׁפָּ֔ט יֵדַ֖ע לֵ֥ב חָכָֽם׃

‎6 ‏כִּ֣י לְכָל־חֵ֔פֶץ יֵ֖שׁ עֵ֣ת וּמִשְׁפָּ֑ט כִּֽי־רָעַ֥ת הָאָדָ֖ם רַבָּ֥ה עָלָֽיו׃

‎7 ‏כִּֽי־אֵינֶ֥נּוּ יֹדֵ֖עַ מַה־שֶּׁיִּֽהְיֶ֑ה כִּ֚י כַּאֲשֶׁ֣ר יִֽהְיֶ֔ה מִ֖י יַגִּ֥יד לֽוֹ׃

‎8 ‏אֵ֣ין אָדָ֞ם שַׁלִּ֤יט בָּר֙וּחַ֙ לִכְל֣וֹא אֶת־הָר֔וּחַ וְאֵ֤ין שִׁלְטוֹן֙ בְּי֣וֹם הַמָּ֔וֶת וְאֵ֥ין מִשְׁלַ֖חַת בַּמִּלְחָמָ֑ה וְלֹֽא־יְמַלֵּ֥ט רֶ֖שַׁע אֶת־בְּעָלָֽיו׃

‎9 ‏אֶת־כָּל־זֶ֤ה רָאִ֙יתִי֙ וְנָת֣וֹן אֶת־לִבִּ֔י לְכָֽל־מַעֲשֶׂ֔ה אֲשֶׁ֥ר נַעֲשָׂ֖ה תַּ֣חַת הַשָּׁ֑מֶשׁ עֵ֗ת אֲשֶׁ֨ר שָׁלַ֧ט הָאָדָ֛ם בְּאָדָ֖ם לְרַ֥ע לֽוֹ׃

‎10 ‏וּבְכֵ֡ן רָאִיתִי֩ רְשָׁעִ֨ים קְבֻרִ֜ים וָבָ֗אוּ וּמִמְּק֤וֹם קָדוֹשׁ֙ יְהַלֵּ֔כוּ וְיִֽשְׁתַּכְּח֥וּ בָעִ֖יר אֲשֶׁ֣ר כֵּן־עָשׂ֑וּ גַּם־זֶ֖ה הָֽבֶל׃

‎11 ‏אֲשֶׁר֙ אֵין־נַעֲשָׂ֣ה פִתְגָ֔ם מַעֲשֵׂ֥ה הָרָעָ֖ה מְהֵרָ֑ה עַל־כֵּ֡ן מָלֵ֞א לֵ֧ב בְּֽנֵי־הָאָדָ֛ם בָּהֶ֖ם לַעֲשׂ֥וֹת רָֽע׃

‎12 ‏אֲשֶׁ֣ר חֹטֶ֗א עֹשֶׂ֥ה רָ֛ע מְאַ֖ת וּמַאֲרִ֣יךְ ל֑וֹ כִּ֚י גַּם־יוֹדֵ֣עַ אָ֔נִי אֲשֶׁ֤ר יִהְיֶה־טּוֹב֙ לְיִרְאֵ֣י הָאֱלֹהִ֔ים אֲשֶׁ֥ר יִֽירְא֖וּ מִלְּפָנָֽיו׃

‎13 ‏וְטוֹב֙ לֹֽא־יִהְיֶ֣ה לָֽרָשָׁ֔ע וְלֹֽא־יַאֲרִ֥יךְ יָמִ֖ים כַּצֵּ֑ל אֲשֶׁ֛ר אֵינֶ֥נּוּ יָרֵ֖א מִלִּפְנֵ֥י אֱלֹהִֽים׃

‎14 ‏יֶשׁ־הֶבֶל֮ אֲשֶׁ֣ר נַעֲשָׂ֣ה עַל־הָאָרֶץ֒ אֲשֶׁ֣ר׀ יֵ֣שׁ צַדִּיקִ֗ים אֲשֶׁ֨ר מַגִּ֤יעַ אֲלֵהֶם֙ כְּמַעֲשֵׂ֣ה הָרְשָׁעִ֔ים וְיֵ֣שׁ רְשָׁעִ֔ים שֶׁמַּגִּ֥יעַ אֲלֵהֶ֖ם כְּמַעֲשֵׂ֣ה הַצַּדִּיקִ֑ים אָמַ֕רְתִּי שֶׁגַּם־זֶ֖ה הָֽבֶל׃

‎15 ‏וְשִׁבַּ֤חְתִּֽי אֲנִי֙ אֶת־הַשִּׂמְחָ֔ה אֲשֶׁ֨ר אֵֽין־ט֤וֹב לָֽאָדָם֙ תַּ֣חַת הַשֶּׁ֔מֶשׁ כִּ֛י אִם־לֶאֱכ֥וֹל וְלִשְׁתּ֖וֹת וְלִשְׂמ֑וֹחַ וְה֞וּא יִלְוֶ֣נּוּ בַעֲמָל֗וֹ יְמֵ֥י חַיָּ֛יו אֲשֶׁר־נָֽתַן־ל֥וֹ הָאֱלֹהִ֖ים תַּ֥חַת הַשָּֽׁמֶשׁ׃

‎16 ‏כַּאֲשֶׁ֨ר נָתַ֤תִּי אֶת־לִבִּי֙ לָדַ֣עַת חָכְמָ֔ה וְלִרְאוֹת֙ אֶת־הָ֣עִנְיָ֔ן אֲשֶׁ֥ר נַעֲשָׂ֖ה עַל־הָאָ֑רֶץ כִּ֣י גַ֤ם בַּיּוֹם֙ וּבַלַּ֔יְלָה שֵׁנָ֕ה בְּעֵינָ֖יו אֵינֶ֥נּוּ רֹאֶֽה׃

‎17 ‏וְרָאִיתִי֮ אֶת־כָּל־מַעֲשֵׂ֣ה הָאֱלֹהִים֒ כִּי֩ לֹ֨א יוּכַ֜ל הָאָדָ֗ם לִמְצוֹא֙ אֶת־הַֽמַּעֲשֶׂה֙ אֲשֶׁ֣ר נַעֲשָׂ֣ה תַֽחַת־הַשֶּׁ֔מֶשׁ בְּ֠שֶׁל אֲשֶׁ֨ר יַעֲמֹ֧ל הָאָדָ֛ם לְבַקֵּ֖שׁ וְלֹ֣א יִמְצָ֑א וְגַ֨ם אִם־יֹאמַ֤ר הֶֽחָכָם֙ לָדַ֔עַת לֹ֥א יוּכַ֖ל לִמְצֹֽא׃

1 mî kəheḥāḵām ûmî ywōḏē‘a pēšer dāḇār ḥāḵəmaṯ ’āḏām tā’îr pānāyw wə‘ōz pānāyw yəšunne’:

2 ’ănî pî-meleḵə šəmwōr wə‘al diḇəraṯ šəḇû‘aṯ ’ĕlōhîm:

3 ’al-tibâēl mipānāyw tēlēḵə ’al-t^a‘ămōḏ bəḏāḇār rā‘ kî kāl-’ăšer y^aḥəpōṣ y^a‘ăśeh:

4 ba’ăšer dəḇar-meleḵə šiləṭwōn ûmî yō’mar-lwō mah-t^a‘ăśeh:

5 šwōmēr miṣəwâ lō’ yēḏ^a‘ dāḇār rā‘ wə‘ēṯ ûmišəpāṭ yēḏ^a‘ lēḇ ḥāḵām:

6 kî ləḵāl-ḥēfeṣ yēš ‘ēṯ ûmišəpāṭ kî-rā‘aṯ hā’āḏām rabâ ‘ālāyw:

7 kî-’ênennû yōḏē‘a mah-ššeyyihəyeh kî ka’ăšer yihəyeh mî yagîḏ lwō:

8 ’ên ’āḏām šallîṭ bārûḥa liḵəlwō’ ’eṯ-hārûḥa wə’ên šiləṭwōn bəywōm hammāweṯ wə’ên mišəl^aḥaṯ bammiləḥāmâ wəlō’-yəmallēṭ reš^a‘ ’eṯ-bə‘ālāyw:

9 ’eṯ-kāl-zeh rā’îṯî wənāṯwōn ’eṯ-libî ləḵāl-m^a‘ăśeh ’ăšer n^a‘ăśâ t^aḥaṯ haššāmeš ‘ēṯ ’ăšer šālaṭ hā’āḏām bə’āḏām lər^a‘ lwō:

10 ûḇəḵēn rā’îṯî rəšā‘îm qəḇurîm wāḇā’û ûmimməqwōm qāḏwōš yəhallēḵû wəyišətakəḥû ḇā‘îr ’ăšer kēn-‘āśû gam-zeh hāḇel:

11 ’ăšer ’ên-n^a‘ăśâ fiṯəḡām m^a‘ăśēh hārā‘â məhērâ ‘al-kēn mālē’ lēḇ bənê-hā’āḏām bâem l^a‘ăśwōṯ rā‘:

12 ’ăšer ḥōṭe’ ‘ōśeh rā‘ mə’aṯ ûma’ărîḵə lwō kî gam-ywōḏē‘a ’ānî ’ăšer yihəyeh-ṭṭwōḇ ləyirə’ê hā’ĕlōhîm ’ăšer yîrə’û milləfānāyw:

13 wəṭwōḇ lō’-yihəyeh lārāšā‘ wəlō’-ya’ărîḵə yāmîm kaṣṣēl ’ăšer ’ênennû yārē’ millifənê ’ĕlōhîm:

14 yeš-heḇel ’ăšer n^a‘ăśâ ‘al-hā’āreṣ ’ăšer| yēš ṣadîqîm ’ăšer magî‘a ’ălēhem kəm^a‘ăśēh hārəšā‘îm wəyēš rəšā‘îm šemmagî‘a ’ălēhem kəm^a‘ăśēh haṣṣadîqîm ’āmarətî šegam-zeh hāḇel:

15 wəšib^aḥətî ’ănî ’eṯ-haśśiməḥâ ’ăšer ’ên-ṭwōḇ lā’āḏām t^aḥaṯ haššemeš kî ’im-le’ĕḵwōl wəlišətwōṯ wəliśəmwōḥa wəhû’ yiləwennû ḇ^a‘ămālwō yəmê ḥayyāyw ’ăšer-nāṯan-lwō hā’ĕlōhîm t^aḥaṯ haššāmeš:

16 ka’ăšer nāṯatî ’eṯ-libî lāḏ^a‘aṯ ḥāḵəmâ wəlirə’wōṯ ’eṯ-hā‘inəyān ’ăšer n^a‘ăśâ ‘al-hā’āreṣ kî ḡam bayywōm ûḇallayəlâ šēnâ bə‘ênāyw ’ênennû rō’eh:

17 wərā’îṯî ’eṯ-kāl-m^a‘ăśēh hā’ĕlōhîm kî lō’ yûḵal hā’āḏām liməṣwō’ ’eṯ-hamm^a‘ăśeh ’ăšer n^a‘ăśâ ṯ^aḥaṯ-haššemeš bəšel ’ăšer y^a‘ămōl hā’āḏām ləḇaqqēš wəlō’ yiməṣā’ wəḡam ’im-yō’mar heḥāḵām lāḏ^a‘aṯ lō’ yûḵal liməṣō’: