Sacred Texts  Bible  Index 
Polyglot  KJV  Sep  Vul 

Ecclesiastes (Qohelet) Index
  Previous  Next 

Tanach (Hebrew): Ecclesiastes (Qohelet) Chapter 3

1 ‏לַכֹּ֖ל זְמָ֑ן וְעֵ֥ת לְכָל־חֵ֖פֶץ תַּ֥חַת הַשָּׁמָֽיִם׃ ס

2 ‏עֵ֥ת לָלֶ֖דֶת וְעֵ֣ת לָמ֑וּת עֵ֣ת לָטַ֔עַת וְעֵ֖ת לַעֲק֥וֹר נָטֽוּעַ׃

3 ‏עֵ֤ת לַהֲרוֹג֙ וְעֵ֣ת לִרְפּ֔וֹא עֵ֥ת לִפְר֖וֹץ וְעֵ֥ת לִבְנֽוֹת׃

4 ‏עֵ֤ת לִבְכּוֹת֙ וְעֵ֣ת לִשְׂח֔וֹק עֵ֥ת סְפ֖וֹד וְעֵ֥ת רְקֽוֹד׃

5 ‏עֵ֚ת לְהַשְׁלִ֣יךְ אֲבָנִ֔ים וְעֵ֖ת כְּנ֣וֹס אֲבָנִ֑ים עֵ֣ת לַחֲב֔וֹק וְעֵ֖ת לִרְחֹ֥ק מֵחַבֵּֽק׃

6 ‏עֵ֤ת לְבַקֵּשׁ֙ וְעֵ֣ת לְאַבֵּ֔ד עֵ֥ת לִשְׁמ֖וֹר וְעֵ֥ת לְהַשְׁלִֽיךְ׃

7 ‏עֵ֤ת לִקְר֙וֹעַ֙ וְעֵ֣ת לִתְפּ֔וֹר עֵ֥ת לַחֲשׁ֖וֹת וְעֵ֥ת לְדַבֵּֽר׃

8 ‏עֵ֤ת לֶֽאֱהֹב֙ וְעֵ֣ת לִשְׂנֹ֔א עֵ֥ת מִלְחָמָ֖ה וְעֵ֥ת שָׁלֽוֹם׃ ס

9 ‏מַה־יִּתְרוֹן֙ הָֽעוֹשֶׂ֔ה בַּאֲשֶׁ֖ר ה֥וּא עָמֵֽל׃

10 ‏רָאִ֣יתִי אֶת־הָֽעִנְיָ֗ן אֲשֶׁ֨ר נָתַ֧ן אֱלֹהִ֛ים לִבְנֵ֥י הָאָדָ֖ם לַעֲנ֥וֹת בּֽוֹ׃

11 ‏אֶת־הַכֹּ֥ל עָשָׂ֖ה יָפֶ֣ה בְעִתּ֑וֹ גַּ֤ם אֶת־הָעֹלָם֙ נָתַ֣ן בְּלִבָּ֔ם מִבְּלִ֞י אֲשֶׁ֧ר לֹא־יִמְצָ֣א הָאָדָ֗ם אֶת־הַֽמַּעֲשֶׂ֛ה אֲשֶׁר־עָשָׂ֥ה הָאֱלֹהִ֖ים מֵרֹ֥אשׁ וְעַד־סֽוֹף׃

12 ‏יָדַ֕עְתִּי כִּ֛י אֵ֥ין ט֖וֹב בָּ֑ם כִּ֣י אִם־לִשְׂמ֔וֹחַ וְלַעֲשׂ֥וֹת ט֖וֹב בְּחַיָּֽיו׃

13 ‏וְגַ֤ם כָּל־הָאָדָם֙ שֶׁיֹּאכַ֣ל וְשָׁתָ֔ה וְרָאָ֥ה ט֖וֹב בְּכָל־עֲמָל֑וֹ מַתַּ֥ת אֱלֹהִ֖ים הִֽיא׃

14 ‏יָדַ֗עְתִּי כִּ֠י כָּל־אֲשֶׁ֨ר יַעֲשֶׂ֤ה הָאֱלֹהִים֙ ה֚וּא יִהְיֶ֣ה לְעוֹלָ֔ם עָלָיו֙ אֵ֣ין לְהוֹסִ֔יף וּמִמֶּ֖נּוּ אֵ֣ין לִגְרֹ֑עַ וְהָאֱלֹהִ֣ים עָשָׂ֔ה שֶׁיִּֽרְא֖וּ מִלְּפָנָֽיו׃

15 ‏מַה־שֶּֽׁהָיָה֙ כְּבָ֣ר ה֔וּא וַאֲשֶׁ֥ר לִהְי֖וֹת כְּבָ֣ר הָיָ֑ה וְהָאֱלֹהִ֖ים יְבַקֵּ֥שׁ אֶת־נִרְדָּֽף׃

16 ‏וְע֥וֹד רָאִ֖יתִי תַּ֣חַת הַשָּׁ֑מֶשׁ מְק֤וֹם הַמִּשְׁפָּט֙ שָׁ֣מָּה הָרֶ֔שַׁע וּמְק֥וֹם הַצֶּ֖דֶק שָׁ֥מָּה הָרָֽשַׁע׃

17 ‏אָמַ֤רְתִּֽי אֲנִי֙ בְּלִבִּ֔י אֶת־הַצַּדִּיק֙ וְאֶת־הָ֣רָשָׁ֔ע יִשְׁפֹּ֖ט הָאֱלֹהִ֑ים כִּי־עֵ֣ת לְכָל־חֵ֔פֶץ וְעַ֥ל כָּל־הַֽמַּעֲשֶׂ֖ה שָֽׁם׃

18 ‏אָמַ֤רְתִּֽי אֲנִי֙ בְּלִבִּ֔י עַל־דִּבְרַת֙ בְּנֵ֣י הָאָדָ֔ם לְבָרָ֖ם הָאֱלֹהִ֑ים וְלִרְא֕וֹת שְׁהֶם־בְּהֵמָ֥ה הֵ֖מָּה לָהֶֽם׃

19 ‏כִּי֩ מִקְרֶ֨ה בְֽנֵי־הָאָדָ֜ם וּמִקְרֶ֣ה הַבְּהֵמָ֗ה וּמִקְרֶ֤ה אֶחָד֙ לָהֶ֔ם כְּמ֥וֹת זֶה֙ כֵּ֣ן מ֣וֹת זֶ֔ה וְר֥וּחַ אֶחָ֖ד לַכֹּ֑ל וּמוֹתַ֨ר הָאָדָ֤ם מִן־הַבְּהֵמָה֙ אָ֔יִן כִּ֥י הַכֹּ֖ל הָֽבֶל׃

20 ‏הַכֹּ֥ל הוֹלֵ֖ךְ אֶל־מָק֣וֹם אֶחָ֑ד הַכֹּל֙ הָיָ֣ה מִן־הֶֽעָפָ֔ר וְהַכֹּ֖ל שָׁ֥ב אֶל־הֶעָפָֽר׃

21 ‏מִ֣י יוֹדֵ֗עַ ר֚וּחַ בְּנֵ֣י הָאָדָ֔ם הָעֹלָ֥ה הִ֖יא לְמָ֑עְלָה וְר֙וּחַ֙ הַבְּהֵמָ֔ה הַיֹּרֶ֥דֶת הִ֖יא לְמַ֥טָּה לָאָֽרֶץ׃

22 ‏וְרָאִ֗יתִי כִּ֣י אֵ֥ין טוֹב֙ מֵאֲשֶׁ֨ר יִשְׂמַ֤ח הָאָדָם֙ בְּֽמַעֲשָׂ֔יו כִּי־ה֖וּא חֶלְק֑וֹ כִּ֣י מִ֤י יְבִיאֶ֙נּוּ֙ לִרְא֔וֹת בְּמֶ֖ה שֶׁיִּהְיֶ֥ה אַחֲרָֽיו׃

1 lakōl zəmān wə‘ēṯ ləḵāl-ḥēfeṣ taḥaṯ haššāmāyim: s

2 ‘ēṯ lāleḏeṯ wə‘ēṯ lāmûṯ ‘ēṯ lāṭa‘aṯ wə‘ēṯ la‘ăqwōr nāṭû‘a:

3 ‘ēṯ lahărwōḡ wə‘ēṯ lirəpwō’ ‘ēṯ lifərwōṣ wə‘ēṯ liḇənwōṯ:

4 ‘ēṯ liḇəkwōṯ wə‘ēṯ liśəḥwōq ‘ēṯ səfwōḏ wə‘ēṯ rəqwōḏ:

5 ‘ēṯ ləhašəlîḵə ’ăḇānîm wə‘ēṯ kənwōs ’ăḇānîm ‘ēṯ laḥăḇwōq wə‘ēṯ lirəḥōq mēḥabēq:

6 ‘ēṯ ləḇaqqēš wə‘ēṯ lə’abēḏ ‘ēṯ lišəmwōr wə‘ēṯ ləhašəlîḵə:

7 ‘ēṯ liqərwō‘a wə‘ēṯ liṯəpwōr ‘ēṯ laḥăšwōṯ wə‘ēṯ ləḏabēr:

8 ‘ēṯ le’ĕhōḇ wə‘ēṯ liśənō’ ‘ēṯ miləḥāmâ wə‘ēṯ šālwōm: s

9 mah-yyiṯərwōn hā‘wōśeh ba’ăšer hû’ ‘āmēl:

10 rā’îṯî ’eṯ-hā‘inəyān ’ăšer nāṯan ’ĕlōhîm liḇənê hā’āḏām la‘ănwōṯ bwō:

11 ’eṯ-hakōl ‘āśâ yāfeh ḇə‘itwō gam ’eṯ-hā‘ōlām nāṯan bəlibām mibəlî ’ăšer lō’-yiməṣā’ hā’āḏām ’eṯ-hamma‘ăśeh ’ăšer-‘āśâ hā’ĕlōhîm mērō’š wə‘aḏ-swōf:

12 yāḏa‘ətî kî ’ên ṭwōḇ bām kî ’im-liśəmwōḥa wəla‘ăśwōṯ ṭwōḇ bəḥayyāyw:

13 wəḡam kāl-hā’āḏām šeyyō’ḵal wəšāṯâ wərā’â ṭwōḇ bəḵāl-‘ămālwō mataṯ ’ĕlōhîm hî’:

14 yāḏa‘ətî kî kāl-’ăšer ya‘ăśeh hā’ĕlōhîm hû’ yihəyeh lə‘wōlām ‘ālāyw ’ên ləhwōsîf ûmimmennû ’ên liḡərō‘a wəhā’ĕlōhîm ‘āśâ šeyyirə’û milləfānāyw:

15 mah-ššehāyâ kəḇār hû’ wa’ăšer lihəywōṯ kəḇār hāyâ wəhā’ĕlōhîm yəḇaqqēš ’eṯ-nirədāf:

16 wə‘wōḏ rā’îṯî taḥaṯ haššāmeš məqwōm hammišəpāṭ šāmmâ hāreša‘ ûməqwōm haṣṣeḏeq šāmmâ hārāša‘:

17 ’āmarətî ’ănî bəlibî ’eṯ-haṣṣadîq wə’eṯ-hārāšā‘ yišəpōṭ hā’ĕlōhîm kî-‘ēṯ ləḵāl-ḥēfeṣ wə‘al kāl-hamma‘ăśeh šām:

18 ’āmarətî ’ănî bəlibî ‘al-diḇəraṯ bənê hā’āḏām ləḇārām hā’ĕlōhîm wəlirə’wōṯ šəhem-bəhēmâ hēmmâ lâem:

19 kî miqəreh ḇənê-hā’āḏām ûmiqəreh habəhēmâ ûmiqəreh ’eḥāḏ lâem kəmwōṯ zeh kēn mwōṯ zeh wərûḥa ’eḥāḏ lakōl ûmwōṯar hā’āḏām min-habəhēmâ ’āyin kî hakōl hāḇel:

20 hakōl hwōlēḵə ’el-māqwōm ’eḥāḏ hakōl hāyâ min-he‘āfār wəhakōl šāḇ ’el-he‘āfār:

21 mî ywōḏē‘a rûḥa bənê hā’āḏām hā‘ōlâ hî’ ləmā‘əlâ wərûḥa habəhēmâ hayyōreḏeṯ hî’ ləmaṭṭâ lā’āreṣ:

22 wərā’îṯî kî ’ên ṭwōḇ mē’ăšer yiśəmaḥ hā’āḏām bəma‘ăśāyw kî-hû’ ḥeləqwō kî mî yəḇî’ennû lirə’wōṯ bəmeh šeyyihəyeh ’aḥărāyw:


Next: Ecclesiastes (Qohelet) Chapter 4