‎1 ‏וְהָיָה֙ כִּֽי־תָב֣וֹא אֶל־הָאָ֔רֶץ אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ נַחֲלָ֑ה וִֽירִשְׁתָּ֖הּ וְיָשַׁ֥בְתָּ בָּֽהּ׃

‎2 ‏וְלָקַחְתָּ֞ מֵרֵאשִׁ֣ית׀ כָּל־פְּרִ֣י הָאֲדָמָ֗ה אֲשֶׁ֨ר תָּבִ֧יא מֵֽאַרְצְךָ֛ אֲשֶׁ֨ר יְהוָ֧ה אֱלֹהֶ֛יךָ נֹתֵ֥ן לָ֖ךְ וְשַׂמְתָּ֣ בַטֶּ֑נֶא וְהָֽלַכְתָּ֙ אֶל־הַמָּק֔וֹם אֲשֶׁ֤ר יִבְחַר֙ יְהוָ֣ה אֱלֹהֶ֔יךָ לְשַׁכֵּ֥ן שְׁמ֖וֹ שָֽׁם׃

‎3 ‏וּבָאתָ֙ אֶל־הַכֹּהֵ֔ן אֲשֶׁ֥ר יִהְיֶ֖ה בַּיָּמִ֣ים הָהֵ֑ם וְאָמַרְתָּ֣ אֵלָ֗יו הִגַּ֤דְתִּי הַיּוֹם֙ לַיהוָ֣ה אֱלֹהֶ֔יךָ כִּי־בָ֙אתִי֙ אֶל־הָאָ֔רֶץ אֲשֶׁ֨ר נִשְׁבַּ֧ע יְהוָ֛ה לַאֲבֹתֵ֖ינוּ לָ֥תֶת לָֽנוּ׃

‎4 ‏וְלָקַ֧ח הַכֹּהֵ֛ן הַטֶּ֖נֶא מִיָּדֶ֑ךָ וְהִ֨נִּיח֔וֹ לִפְנֵ֕י מִזְבַּ֖ח יְהוָ֥ה אֱלֹהֶֽיךָ׃

‎5 ‏וְעָנִ֨יתָ וְאָמַרְתָּ֜ לִפְנֵ֣י׀ יְהוָ֣ה אֱלֹהֶ֗יךָ אֲרַמִּי֙ אֹבֵ֣ד אָבִ֔י וַיֵּ֣רֶד מִצְרַ֔יְמָה וַיָּ֥גָר שָׁ֖ם בִּמְתֵ֣י מְעָ֑ט וַֽיְהִי־שָׁ֕ם לְג֥וֹי גָּד֖וֹל עָצ֥וּם וָרָֽב׃

‎6 ‏וַיָּרֵ֧עוּ אֹתָ֛נוּ הַמִּצְרִ֖ים וַיְעַנּ֑וּנוּ וַיִּתְּנ֥וּ עָלֵ֖ינוּ עֲבֹדָ֥ה קָשָֽׁה׃

‎7 ‏וַנִּצְעַ֕ק אֶל־יְהוָ֖ה אֱלֹהֵ֣י אֲבֹתֵ֑ינוּ וַיִּשְׁמַ֤ע יְהוָה֙ אֶת־קֹלֵ֔נוּ וַיַּ֧רְא אֶת־עָנְיֵ֛נוּ וְאֶת־עֲמָלֵ֖נוּ וְאֶת־לַחֲצֵֽנוּ׃

‎8 ‏וַיּוֹצִאֵ֤נוּ יְהוָה֙ מִמִּצְרַ֔יִם בְּיָ֤ד חֲזָקָה֙ וּבִזְרֹ֣עַ נְטוּיָ֔ה וּבְמֹרָ֖א גָּדֹ֑ל וּבְאֹת֖וֹת וּבְמֹפְתִֽים׃

‎9 ‏וַיְבִאֵ֖נוּ אֶל־הַמָּק֣וֹם הַזֶּ֑ה וַיִּתֶּן־לָ֙נוּ֙ אֶת־הָאָ֣רֶץ הַזֹּ֔את אֶ֛רֶץ זָבַ֥ת חָלָ֖ב וּדְבָֽשׁ׃

‎10 ‏וְעַתָּ֗ה הִנֵּ֤ה הֵבֵ֙אתִי֙ אֶת־רֵאשִׁית֙ פְּרִ֣י הָאֲדָמָ֔ה אֲשֶׁר־נָתַ֥תָּה לִּ֖י יְהוָ֑ה וְהִנַּחְתּ֗וֹ לִפְנֵי֙ יְהוָ֣ה אֱלֹהֶ֔יךָ וְהִֽשְׁתַּחֲוִ֔יתָ לִפְנֵ֖י יְהוָ֥ה אֱלֹהֶֽיךָ׃

‎11 ‏וְשָׂמַחְתָּ֣ בְכָל־הַטּ֗וֹב אֲשֶׁ֧ר נָֽתַן־לְךָ֛ יְהוָ֥ה אֱלֹהֶ֖יךָ וּלְבֵיתֶ֑ךָ אַתָּה֙ וְהַלֵּוִ֔י וְהַגֵּ֖ר אֲשֶׁ֥ר בְּקִרְבֶּֽךָ׃ ס

‎12 ‏כִּ֣י תְכַלֶּ֞ה לַ֠עְשֵׂר אֶת־כָּל־מַעְשַׂ֧ר תְּבוּאָתְךָ֛ בַּשָּׁנָ֥ה הַשְּׁלִישִׁ֖ת שְׁנַ֣ת הַֽמַּעֲשֵׂ֑ר וְנָתַתָּ֣ה לַלֵּוִ֗י לַגֵּר֙ לַיָּת֣וֹם וְלָֽאַלְמָנָ֔ה וְאָכְל֥וּ בִשְׁעָרֶ֖יךָ וְשָׂבֵֽעוּ׃

‎13 ‏וְאָמַרְתָּ֡ לִפְנֵי֩ יְהוָ֨ה אֱלֹהֶ֜יךָ בִּעַ֧רְתִּי הַקֹּ֣דֶשׁ מִן־הַבַּ֗יִת וְגַ֨ם נְתַתִּ֤יו לַלֵּוִי֙ וְלַגֵּר֙ לַיָּת֣וֹם וְלָאַלְמָנָ֔ה כְּכָל־מִצְוָתְךָ֖ אֲשֶׁ֣ר צִוִּיתָ֑נִי לֹֽא־עָבַ֥רְתִּי מִמִּצְוֹתֶ֖יךָ וְלֹ֥א שָׁכָֽחְתִּי׃

‎14 ‏לֹא־אָכַ֨לְתִּי בְאֹנִ֜י מִמֶּ֗נּוּ וְלֹא־בִעַ֤רְתִּי מִמֶּ֙נּוּ֙ בְּטָמֵ֔א וְלֹא־נָתַ֥תִּי מִמֶּ֖נּוּ לְמֵ֑ת שָׁמַ֗עְתִּי בְּקוֹל֙ יְהוָ֣ה אֱלֹהָ֔י עָשִׂ֕יתִי כְּכֹ֖ל אֲשֶׁ֥ר צִוִּיתָֽנִי׃

‎15 ‏הַשְׁקִיפָה֩ מִמְּע֨וֹן קָדְשְׁךָ֜ מִן־הַשָּׁמַ֗יִם וּבָרֵ֤ךְ אֶֽת־עַמְּךָ֙ אֶת־יִשְׂרָאֵ֔ל וְאֵת֙ הָאֲדָמָ֔ה אֲשֶׁ֥ר נָתַ֖תָּה לָ֑נוּ כַּאֲשֶׁ֤ר נִשְׁבַּ֙עְתָּ֙ לַאֲבֹתֵ֔ינוּ אֶ֛רֶץ זָבַ֥ת חָלָ֖ב וּדְבָֽשׁ׃ ס

‎16 ‏הַיּ֣וֹם הַזֶּ֗ה יְהוָ֨ה אֱלֹהֶ֜יךָ מְצַוְּךָ֧ לַעֲשׂ֛וֹת אֶת־הַחֻקִּ֥ים הָאֵ֖לֶּה וְאֶת־הַמִּשְׁפָּטִ֑ים וְשָׁמַרְתָּ֤ וְעָשִׂ֙יתָ֙ אוֹתָ֔ם בְּכָל־לְבָבְךָ֖ וּבְכָל־נַפְשֶֽׁךָ׃

‎17 ‏אֶת־יְהוָ֥ה הֶאֱמַ֖רְתָּ הַיּ֑וֹם לִהְיוֹת֩ לְךָ֨ לֵֽאלֹהִ֜ים וְלָלֶ֣כֶת בִּדְרָכָ֗יו וְלִשְׁמֹ֨ר חֻקָּ֧יו וּמִצְוֹתָ֛יו וּמִשְׁפָּטָ֖יו וְלִשְׁמֹ֥עַ בְּקֹלֽוֹ׃

‎18 ‏וַֽיהוָ֞ה הֶאֱמִֽירְךָ֣ הַיּ֗וֹם לִהְי֥וֹת לוֹ֙ לְעַ֣ם סְגֻלָּ֔ה כַּאֲשֶׁ֖ר דִּבֶּר־לָ֑ךְ וְלִשְׁמֹ֖ר כָּל־מִצְוֹתָֽיו׃

‎19 ‏וּֽלְתִתְּךָ֣ עֶלְי֗וֹן עַ֤ל כָּל־הַגּוֹיִם֙ אֲשֶׁ֣ר עָשָׂ֔ה לִתְהִלָּ֖ה וּלְשֵׁ֣ם וּלְתִפְאָ֑רֶת וְלִֽהְיֹתְךָ֧ עַם־קָדֹ֛שׁ לַיהוָ֥ה אֱלֹהֶ֖יךָ כַּאֲשֶׁ֥ר דִּבֵּֽר׃ ס

1 wəhāyâ kî-ṯāḇwō’ ’el-hā’āreṣ ’ăšer yəhwâ ’ĕlōheyḵā nōṯēn ləḵā n^aḥălâ wîrišətāh wəyāšaḇətā bāh:

2 wəlāq^aḥətā mērē’šîṯ| kāl-pərî hā’ăḏāmâ ’ăšer tāḇî’ mē’arəṣəḵā ’ăšer yəhwâ ’ĕlōheyḵā nōṯēn lāḵə wəśamətā ḇaṭṭene’ wəhālaḵətā ’el-hammāqwōm ’ăšer yiḇəḥar yəhwâ ’ĕlōheyḵā ləšakēn šəmwō šām:

3 ûḇā’ṯā ’el-hakōhēn ’ăšer yihəyeh bayyāmîm hâēm wə’āmarətā ’ēlāyw higaḏətî hayywōm layhwâ ’ĕlōheyḵā kî-ḇā’ṯî ’el-hā’āreṣ ’ăšer nišəb^a‘ yəhwâ la’ăḇōṯênû lāṯeṯ lānû:

4 wəlāq^aḥ hakōhēn haṭṭene’ mîyāḏeḵā wəhinnîḥwō lifənê mizəb^aḥ yəhwâ ’ĕlōheyḵā:

5 wə‘ānîṯā wə’āmarətā lifənê| yəhwâ ’ĕlōheyḵā ’ărammî ’ōḇēḏ ’āḇî wayyēreḏ miṣərayəmâ wayyāḡār šām biməṯê mə‘āṭ wayəhî-šām ləḡwōy gāḏwōl ‘āṣûm wārāḇ:

6 wayyārē‘û ’ōṯānû hammiṣərîm wayə‘annûnû wayyitənû ‘ālênû ‘ăḇōḏâ qāšâ:

7 wanniṣə‘aq ’el-yəhwâ ’ĕlōhê ’ăḇōṯênû wayyišəm^a‘ yəhwâ ’eṯ-qōlēnû wayyarə’ ’eṯ-‘ānəyēnû wə’eṯ-‘ămālēnû wə’eṯ-l^aḥăṣēnû:

8 wayywōṣi’ēnû yəhwâ mimmiṣərayim bəyāḏ ḥăzāqâ ûḇizərō‘a nəṭûyâ ûḇəmōrā’ gāḏōl ûḇə’ōṯwōṯ ûḇəmōfəṯîm:

9 wayəḇi’ēnû ’el-hammāqwōm hazzeh wayyiten-lānû ’eṯ-hā’āreṣ hazzō’ṯ ’ereṣ zāḇaṯ ḥālāḇ ûḏəḇāš:

10 wə‘atâ hinnēh hēḇē’ṯî ’eṯ-rē’šîṯ pərî hā’ăḏāmâ ’ăšer-nāṯatâ llî yəhwâ wəhinn^aḥətwō lifənê yəhwâ ’ĕlōheyḵā wəhišət^aḥăwîṯā lifənê yəhwâ ’ĕlōheyḵā:

11 wəśām^aḥətā ḇəḵāl-haṭṭwōḇ ’ăšer nāṯan-ləḵā yəhwâ ’ĕlōheyḵā ûləḇêṯeḵā ’atâ wəhallēwî wəhagēr ’ăšer bəqirəbeḵā: s

12 kî ṯəḵalleh l^a‘əśēr ’eṯ-kāl-m^a‘əśar təḇû’āṯəḵā baššānâ haššəlîšiṯ šənaṯ hamm^a‘ăśēr wənāṯatâ lallēwî lagēr layyāṯwōm wəlā’aləmānâ wə’āḵəlû ḇišə‘āreyḵā wəśāḇē‘û:

13 wə’āmarətā lifənê yəhwâ ’ĕlōheyḵā bi‘arətî haqqōḏeš min-habayiṯ wəḡam nəṯatîw lallēwî wəlagēr layyāṯwōm wəlā’aləmānâ kəḵāl-miṣəwāṯəḵā ’ăšer ṣiûîṯānî lō’-‘āḇarətî mimmiṣəwōṯeyḵā wəlō’ šāḵāḥətî:

14 lō’-’āḵalətî ḇə’ōnî mimmennû wəlō’-ḇi‘arətî mimmennû bəṭāmē’ wəlō’-nāṯatî mimmennû ləmēṯ šām^a‘ətî bəqwōl yəhwâ ’ĕlōhāy ‘āśîṯî kəḵōl ’ăšer ṣiûîṯānî:

15 hašəqîfâ mimmə‘wōn qāḏəšəḵā min-haššāmayim ûḇārēḵə ’eṯ-‘amməḵā ’eṯ-yiśərā’ēl wə’ēṯ hā’ăḏāmâ ’ăšer nāṯatâ lānû ka’ăšer nišəb^a‘ətā la’ăḇōṯênû ’ereṣ zāḇaṯ ḥālāḇ ûḏəḇāš: s

16 hayywōm hazzeh yəhwâ ’ĕlōheyḵā məṣaûəḵā l^a‘ăśwōṯ ’eṯ-h^aḥuqqîm hā’ēlleh wə’eṯ-hammišəpāṭîm wəšāmarətā wə‘āśîṯā ’wōṯām bəḵāl-ləḇāḇəḵā ûḇəḵāl-nafəšeḵā:

17 ’eṯ-yəhwâ he’ĕmarətā hayywōm lihəywōṯ ləḵā lē’lōhîm wəlāleḵeṯ biḏərāḵāyw wəlišəmōr ḥuqqāyw ûmiṣəwōṯāyw ûmišəpāṭāyw wəlišəmō‘a bəqōlwō:

18 wayhwâ he’ĕmîrəḵā hayywōm lihəywōṯ lwō lə‘am səḡullâ ka’ăšer diber-lāḵə wəlišəmōr kāl-miṣəwōṯāyw:

19 ûləṯitəḵā ‘eləywōn ‘al kāl-hagwōyim ’ăšer ‘āśâ liṯəhillâ ûləšēm ûləṯifə’āreṯ wəlihəyōṯəḵā ‘am-qāḏōš layhwâ ’ĕlōheyḵā ka’ăšer dibēr: s