Sacred Texts  Bible  Index 
Polyglot  KJV  Sep  Vul 

1 Chronicles (1 Divrey Yamim) Index
  Previous  Next 

Tanach (Hebrew): 1 Chronicles (1 Divrey Yamim) Chapter 18

1 ‏וַיְהִי֙ אַחֲרֵי־כֵ֔ן וַיַּ֥ךְ דָּוִ֛יד אֶת־פְּלִשְׁתִּ֖ים וַיַּכְנִיעֵ֑ם וַיִּקַּ֛ח אֶת־גַּ֥ת וּבְנֹתֶ֖יהָ מִיַּ֥ד פְּלִשְׁתִּֽים׃

2 ‏וַיַּ֖ךְ אֶת־מוֹאָ֑ב וַיִּהְי֤וּ מוֹאָב֙ עֲבָדִ֣ים לְדָוִ֔יד נֹשְׂאֵ֖י מִנְחָֽה׃

3 ‏וַיַּ֥ךְ דָּוִ֛יד אֶת־הֲדַדְעֶ֥זֶר מֶֽלֶךְ־צוֹבָ֖ה חֲמָ֑תָה בְּלֶכְתּ֕וֹ לְהַצִּ֥יב יָד֖וֹ בִּֽנְהַר־פְּרָֽת׃

4 ‏וַיִּלְכֹּד֩ דָּוִ֨יד מִמֶּ֜נּוּ אֶ֣לֶף רֶ֗כֶב וְשִׁבְעַ֤ת אֲלָפִים֙ פָּֽרָשִׁ֔ים וְעֶשְׂרִ֥ים אֶ֖לֶף אִ֣ישׁ רַגְלִ֑י וַיְעַקֵּ֤ר דָּוִיד֙ אֶת־כָּל־הָרֶ֔כֶב וַיּוֹתֵ֥ר מִמֶּ֖נּוּ מֵ֥אָה רָֽכֶב׃

5 ‏וַיָּבֹא֙ אֲרַ֣ם דַּרְמֶ֔שֶׂק לַעְז֕וֹר לַהֲדַדְעֶ֖זֶר מֶ֣לֶךְ צוֹבָ֑ה וַיַּ֤ךְ דָּוִיד֙ בַּאֲרָ֔ם עֶשְׂרִֽים־וּשְׁנַ֥יִם אֶ֖לֶף אִֽישׁ׃

6 ‏וַיָּ֤שֶׂם דָּוִיד֙ בַּאֲרַ֣ם דַּרְמֶ֔שֶׂק וַיְהִ֤י אֲרָם֙ לְדָוִ֔יד עֲבָדִ֖ים נֹשְׂאֵ֣י מִנְחָ֑ה וַיּ֤וֹשַׁע יְהוָה֙ לְדָוִ֔יד בְּכֹ֖ל אֲשֶׁ֥ר הָלָֽךְ׃

7 ‏וַיִּקַּ֣ח דָּוִ֗יד אֵ֚ת שִׁלְטֵ֣י הַזָּהָ֔ב אֲשֶׁ֣ר הָי֔וּ עַ֖ל עַבְדֵ֣י הֲדַדְעָ֑זֶר וַיְבִיאֵ֖ם יְרוּשָׁלִָֽם׃

8 ‏וּמִטִּבְחַ֤ת וּמִכּוּן֙ עָרֵ֣י הֲדַדְעֶ֔זֶר לָקַ֥ח דָּוִ֛יד נְחֹ֖שֶׁת רַבָּ֣ה מְאֹ֑ד בָּ֣הּ׀ עָשָׂ֣ה שְׁלֹמֹ֗ה אֶת־יָ֤ם הַנְּחֹ֙שֶׁת֙ וְאֶת־הָֽעַמּוּדִ֔ים וְאֵ֖ת כְּלֵ֥י הַנְּחֹֽשֶׁת׃ פ

9 ‏וַיִּשְׁמַ֕ע תֹּ֖עוּ מֶ֣לֶךְ חֲמָ֑ת כִּ֚י הִכָּ֣ה דָוִ֔יד אֶת־כָּל־חֵ֖יל הֲדַדְעֶ֥זֶר מֶֽלֶךְ־צוֹבָֽה׃

10 ‏וַיִּשְׁלַ֣ח אֶת־הֲדֽוֹרָם־בְּנ֣וֹ אֶל־הַמֶּֽלֶךְ־דָּ֠וִיד לשאול־ לִשְׁאָל־ ל֨וֹ לְשָׁל֜וֹם וּֽלְבָרֲכ֗וֹ עַל֩ אֲשֶׁ֨ר נִלְחַ֤ם בַּהֲדַדְעֶ֙זֶר֙ וַיַּכֵּ֔הוּ כִּי־אִ֛ישׁ מִלְחֲמ֥וֹת תֹּ֖עוּ הָיָ֣ה הֲדַדְעָ֑זֶר וְכֹ֗ל כְּלֵ֛י זָהָ֥ב וָכֶ֖סֶף וּנְחֹֽשֶׁת׃

11 ‏גַּם־אֹתָ֗ם הִקְדִּ֞ישׁ הַמֶּ֤לֶךְ דָּוִיד֙ לַיהוָ֔ה עִם־הַכֶּ֙סֶף֙ וְהַזָּהָ֔ב אֲשֶׁ֥ר נָשָׂ֖א מִכָּל־הַגּוֹיִ֑ם מֵֽאֱד֤וֹם וּמִמּוֹאָב֙ וּמִבְּנֵ֣י עַמּ֔וֹן וּמִפְּלִשְׁתִּ֖ים וּמֵֽעֲמָלֵֽק׃

12 ‏וְאַבְשַׁ֣י בֶּן־צְרוּיָ֗ה הִכָּ֤ה אֶת־אֱדוֹם֙ בְּגֵ֣יא הַמֶּ֔לַח שְׁמוֹנָ֥ה עָשָׂ֖ר אָֽלֶף׃

13 ‏וַיָּ֤שֶׂם בֶּֽאֱדוֹם֙ נְצִיבִ֔ים וַיִּהְי֥וּ כָל־אֱד֖וֹם עֲבָדִ֣ים לְדָוִ֑יד וַיּ֤וֹשַׁע יְהוָה֙ אֶת־דָּוִ֔יד בְּכֹ֖ל אֲשֶׁ֥ר הָלָֽךְ׃

14 ‏וַיִּמְלֹ֥ךְ דָּוִ֖יד עַל־כָּל־יִשְׂרָאֵ֑ל וַיְהִ֗י עֹשֶׂ֛ה מִשְׁפָּ֥ט וּצְדָקָ֖ה לְכָל־עַמּֽוֹ׃

15 ‏וְיוֹאָ֥ב בֶּן־צְרוּיָ֖ה עַל־הַצָּבָ֑א וִיהוֹשָׁפָ֥ט בֶּן־אֲחִיל֖וּד מַזְכִּֽיר׃

16 ‏וְצָד֧וֹק בֶּן־אֲחִיט֛וּב וַאֲבִימֶ֥לֶךְ בֶּן־אֶבְיָתָ֖ר כֹּהֲנִ֑ים וְשַׁוְשָׁ֖א סוֹפֵֽר׃

17 ‏וּבְנָיָ֙הוּ֙ בֶּן־יְה֣וֹיָדָ֔ע עַל־הַכְּרֵתִ֖י וְהַפְּלֵתִ֑י וּבְנֵי־דָוִ֥יד הָרִאשֹׁנִ֖ים לְיַ֥ד הַמֶּֽלֶךְ׃ פ

1 wayəhî ’aḥărê-ḵēn wayyaḵə dāwîḏ ’eṯ-pəlišətîm wayyaḵənî‘ēm wayyiqqaḥ ’eṯ-gaṯ ûḇənōṯeyhā mîyaḏ pəlišətîm:

2 wayyaḵə ’eṯ-mwō’āḇ wayyihəyû mwō’āḇ ‘ăḇāḏîm ləḏāwîḏ nōśə’ê minəḥâ:

3 wayyaḵə dāwîḏ ’eṯ-hăḏaḏə‘ezer meleḵə-ṣwōḇâ ḥămāṯâ bəleḵətwō ləhaṣṣîḇ yāḏwō binəhar-pərāṯ:

4 wayyiləkōḏ dāwîḏ mimmennû ’elef reḵeḇ wəšiḇə‘aṯ ’ălāfîm pārāšîm wə‘eśərîm ’elef ’îš raḡəlî wayə‘aqqēr dāwîḏ ’eṯ-kāl-hāreḵeḇ wayywōṯēr mimmennû mē’â rāḵeḇ:

5 wayyāḇō’ ’ăram darəmeśeq la‘əzwōr lahăḏaḏə‘ezer meleḵə ṣwōḇâ wayyaḵə dāwîḏ ba’ărām ‘eśərîm-ûšənayim ’elef ’îš:

6 wayyāśem dāwîḏ ba’ăram darəmeśeq wayəhî ’ărām ləḏāwîḏ ‘ăḇāḏîm nōśə’ê minəḥâ wayywōša‘ yəhwâ ləḏāwîḏ bəḵōl ’ăšer hālāḵə:

7 wayyiqqaḥ dāwîḏ ’ēṯ šiləṭê hazzâāḇ ’ăšer hāyû ‘al ‘aḇəḏê hăḏaḏə‘āzer wayəḇî’ēm yərûšālāim:

8 ûmiṭṭiḇəḥaṯ ûmikûn ‘ārê hăḏaḏə‘ezer lāqaḥ dāwîḏ nəḥōšeṯ rabâ mə’ōḏ bāh| ‘āśâ šəlōmōh ’eṯ-yām hannəḥōšeṯ wə’eṯ-hā‘ammûḏîm wə’ēṯ kəlê hannəḥōšeṯ: f

9 wayyišəma‘ tō‘û meleḵə ḥămāṯ kî hikâ ḏāwîḏ ’eṯ-kāl-ḥêl hăḏaḏə‘ezer meleḵə-ṣwōḇâ:

10 wayyišəlaḥ ’eṯ-hăḏwōrām-bənwō ’el-hammeleḵə-dāwîḏ lišə’wōl- lišə’āl- lwō ləšālwōm ûləḇārăḵwō ‘al ’ăšer niləḥam bahăḏaḏə‘ezer wayyakēhû kî-’îš miləḥămwōṯ tō‘û hāyâ hăḏaḏə‘āzer wəḵōl kəlê zâāḇ wāḵesef ûnəḥōšeṯ:

11 gam-’ōṯām hiqədîš hammeleḵə dāwîḏ layhwâ ‘im-hakesef wəhazzâāḇ ’ăšer nāśā’ mikāl-hagwōyim mē’ĕḏwōm ûmimmwō’āḇ ûmibənê ‘ammwōn ûmipəlišətîm ûmē‘ămālēq:

12 wə’aḇəšay ben-ṣərûyâ hikâ ’eṯ-’ĕḏwōm bəḡê’ hammelaḥ šəmwōnâ ‘āśār ’ālef:

13 wayyāśem be’ĕḏwōm nəṣîḇîm wayyihəyû ḵāl-’ĕḏwōm ‘ăḇāḏîm ləḏāwîḏ wayywōša‘ yəhwâ ’eṯ-dāwîḏ bəḵōl ’ăšer hālāḵə:

14 wayyiməlōḵə dāwîḏ ‘al-kāl-yiśərā’ēl wayəhî ‘ōśeh mišəpāṭ ûṣəḏāqâ ləḵāl-‘ammwō:

15 wəywō’āḇ ben-ṣərûyâ ‘al-haṣṣāḇā’ wîhwōšāfāṭ ben-’ăḥîlûḏ mazəkîr:

16 wəṣāḏwōq ben-’ăḥîṭûḇ wa’ăḇîmeleḵə ben-’eḇəyāṯār kōhănîm wəšawəšā’ swōfēr:

17 ûḇənāyâû ben-yəhwōyāḏā‘ ‘al-hakərēṯî wəhapəlēṯî ûḇənê-ḏāwîḏ hāri’šōnîm ləyaḏ hammeleḵə: f


Next: 1 Chronicles (1 Divrey Yamim) Chapter 19