Sacred Texts  Bible  Index 
Polyglot  KJV  Sep  Vul 

Zephaniah (Tsephanyah) Index
  Previous  Next 

Tanach (Hebrew): Zephaniah (Tsephanyah) Chapter 1

1 ‏דְּבַר־יְהוָ֣ה׀ אֲשֶׁ֣ר הָיָ֗ה אֶל־צְפַנְיָה֙ בֶּן־כּוּשִׁ֣י בֶן־גְּדַלְיָ֔ה בֶּן־אֲמַרְיָ֖ה בֶּן־חִזְקִיָּ֑ה בִּימֵ֛י יֹאשִׁיָּ֥הוּ בֶן־אָמ֖וֹן מֶ֥לֶךְ יְהוּדָֽה׃

2 ‏אָסֹ֨ף אָסֵ֜ף כֹּ֗ל מֵעַ֛ל פְּנֵ֥י הָאֲדָמָ֖ה נְאֻם־יְהוָֽה׃

3 ‏אָסֵ֨ף אָדָ֜ם וּבְהֵמָ֗ה אָסֵ֤ף עוֹף־הַשָּׁמַ֙יִם֙ וּדְגֵ֣י הַיָּ֔ם וְהַמַּכְשֵׁל֖וֹת אֶת־הָרְשָׁעִ֑ים וְהִכְרַתִּ֣י אֶת־הָאָדָ֗ם מֵעַ֛ל פְּנֵ֥י הָאֲדָמָ֖ה נְאֻם־יְהוָֽה׃

4 ‏וְנָטִ֤יתִי יָדִי֙ עַל־יְהוּדָ֔ה וְעַ֖ל כָּל־יוֹשְׁבֵ֣י יְרוּשָׁלִָ֑ם וְהִכְרַתִּ֞י מִן־הַמָּק֤וֹם הַזֶּה֙ אֶת־שְׁאָ֣ר הַבַּ֔עַל אֶת־שֵׁ֥ם הַכְּמָרִ֖ים עִם־הַכֹּהֲנִֽים׃

5 ‏וְאֶת־הַמִּשְׁתַּחֲוִ֥ים עַל־הַגַּגּ֖וֹת לִצְבָ֣א הַשָּׁמָ֑יִם וְאֶת־הַמִּֽשְׁתַּחֲוִים֙ הַנִּשְׁבָּעִ֣ים לַֽיהוָ֔ה וְהַנִּשְׁבָּעִ֖ים בְּמַלְכָּֽם׃

6 ‏וְאֶת־הַנְּסוֹגִ֖ים מֵאַחֲרֵ֣י יְהוָ֑ה וַאֲשֶׁ֛ר לֹֽא־בִקְשׁ֥וּ אֶת־יְהוָ֖ה וְלֹ֥א דְרָשֻֽׁהוּ׃

7 ‏הַ֕ס מִפְּנֵ֖י אֲדֹנָ֣י יְהוִ֑ה כִּ֤י קָרוֹב֙ י֣וֹם יְהוָ֔ה כִּֽי־הֵכִ֧ין יְהוָ֛ה זֶ֖בַח הִקְדִּ֥ישׁ קְרֻאָֽיו׃

8 ‏וְהָיָ֗ה בְּיוֹם֙ זֶ֣בַח יְהוָ֔ה וּפָקַדְתִּ֥י עַל־הַשָּׂרִ֖ים וְעַל־בְּנֵ֣י הַמֶּ֑לֶךְ וְעַ֥ל כָּל־הַלֹּבְשִׁ֖ים מַלְבּ֥וּשׁ נָכְרִֽי׃

9 ‏וּפָקַדְתִּ֗י עַ֧ל כָּל־הַדּוֹלֵ֛ג עַל־הַמִּפְתָּ֖ן בַּיּ֣וֹם הַה֑וּא הַֽמְמַלְאִ֛ים בֵּ֥ית אֲדֹנֵיהֶ֖ם חָמָ֥ס וּמִרְמָֽה׃ ס

10 ‏וְהָיָה֩ בַיּ֨וֹם הַה֜וּא נְאֻם־יְהוָ֗ה ק֤וֹל צְעָקָה֙ מִשַּׁ֣עַר הַדָּגִ֔ים וִֽילָלָ֖ה מִן־הַמִּשְׁנֶ֑ה וְשֶׁ֥בֶר גָּד֖וֹל מֵהַגְּבָעֽוֹת׃

11 ‏הֵילִ֖ילוּ יֹשְׁבֵ֣י הַמַּכְתֵּ֑שׁ כִּ֤י נִדְמָה֙ כָּל־עַ֣ם כְּנַ֔עַן נִכְרְת֖וּ כָּל־נְטִ֥ילֵי כָֽסֶף׃

12 ‏וְהָיָה֙ בָּעֵ֣ת הַהִ֔יא אֲחַפֵּ֥שׂ אֶת־יְרוּשָׁלִַ֖ם בַּנֵּר֑וֹת וּפָקַדְתִּ֣י עַל־הָאֲנָשִׁ֗ים הַקֹּֽפְאִים֙ עַל־שִׁמְרֵיהֶ֔ם הָאֹֽמְרִים֙ בִּלְבָבָ֔ם לֹֽא־יֵיטִ֥יב יְהוָ֖ה וְלֹ֥א יָרֵֽעַ׃

13 ‏וְהָיָ֤ה חֵילָם֙ לִמְשִׁסָּ֔ה וּבָתֵּיהֶ֖ם לִשְׁמָמָ֑ה וּבָנ֤וּ בָתִּים֙ וְלֹ֣א יֵשֵׁ֔בוּ וְנָטְע֣וּ כְרָמִ֔ים וְלֹ֥א יִשְׁתּ֖וּ אֶת־יֵינָֽם׃

14 ‏קָר֤וֹב יוֹם־יְהוָה֙ הַגָּד֔וֹל קָר֖וֹב וּמַהֵ֣ר מְאֹ֑ד ק֚וֹל י֣וֹם יְהוָ֔ה מַ֥ר צֹרֵ֖חַ שָׁ֥ם גִּבּֽוֹר׃

15 ‏י֥וֹם עֶבְרָ֖ה הַיּ֣וֹם הַה֑וּא י֧וֹם צָרָ֣ה וּמְצוּקָ֗ה י֤וֹם שֹׁאָה֙ וּמְשׁוֹאָ֔ה י֥וֹם חֹ֙שֶׁךְ֙ וַאֲפֵלָ֔ה י֥וֹם עָנָ֖ן וַעֲרָפֶֽל׃

16 ‏י֥וֹם שׁוֹפָ֖ר וּתְרוּעָ֑ה עַ֚ל הֶעָרִ֣ים הַבְּצֻר֔וֹת וְעַ֖ל הַפִּנּ֥וֹת הַגְּבֹהֽוֹת׃

17 ‏וַהֲצֵרֹ֣תִי לָאָדָ֗ם וְהָֽלְכוּ֙ כַּֽעִוְרִ֔ים כִּ֥י לַֽיהוָ֖ה חָטָ֑אוּ וְשֻׁפַּ֤ךְ דָּמָם֙ כֶּֽעָפָ֔ר וּלְחֻמָ֖ם כַּגְּלָלִֽים׃

18 ‏גַּם־כַּסְפָּ֨ם גַּם־זְהָבָ֜ם לֹֽא־יוּכַ֣ל לְהַצִּילָ֗ם בְּיוֹם֙ עֶבְרַ֣ת יְהוָ֔ה וּבְאֵשׁ֙ קִנְאָת֔וֹ תֵּאָכֵ֖ל כָּל־הָאָ֑רֶץ כִּֽי־כָלָ֤ה אַךְ־נִבְהָלָה֙ יַֽעֲשֶׂ֔ה אֵ֥ת כָּל־יֹשְׁבֵ֖י הָאָֽרֶץ׃ ס

1 dəḇar-yəhwâ| ’ăšer hāyâ ’el-ṣəfanəyâ ben-kûšî ḇen-gəḏaləyâ ben-’ămarəyâ ben-ḥizəqîyâ bîmê yō’šîyâû ḇen-’āmwōn meleḵə yəhûḏâ:

2 ’āsōf ’āsēf kōl mē‘al pənê hā’ăḏāmâ nə’um-yəhwâ:

3 ’āsēf ’āḏām ûḇəhēmâ ’āsēf ‘wōf-haššāmayim ûḏəḡê hayyām wəhammaḵəšēlwōṯ ’eṯ-hārəšā‘îm wəhiḵəratî ’eṯ-hā’āḏām mē‘al pənê hā’ăḏāmâ nə’um-yəhwâ:

4 wənāṭîṯî yāḏî ‘al-yəhûḏâ wə‘al kāl-ywōšəḇê yərûšālāim wəhiḵəratî min-hammāqwōm hazzeh ’eṯ-šə’ār haba‘al ’eṯ-šēm hakəmārîm ‘im-hakōhănîm:

5 wə’eṯ-hammišətaḥăwîm ‘al-hagagwōṯ liṣəḇā’ haššāmāyim wə’eṯ-hammišətaḥăwîm hannišəbā‘îm layhwâ wəhannišəbā‘îm bəmaləkām:

6 wə’eṯ-hannəswōḡîm mē’aḥărê yəhwâ wa’ăšer lō’-ḇiqəšû ’eṯ-yəhwâ wəlō’ ḏərāšuhû:

7 has mipənê ’ăḏōnāy yəhwih kî qārwōḇ ywōm yəhwâ kî-hēḵîn yəhwâ zeḇaḥ hiqədîš qəru’āyw:

8 wəhāyâ bəywōm zeḇaḥ yəhwâ ûfāqaḏətî ‘al-haśśārîm wə‘al-bənê hammeleḵə wə‘al kāl-hallōḇəšîm maləbûš nāḵərî:

9 ûfāqaḏətî ‘al kāl-hadwōlēḡ ‘al-hammifətān bayywōm hahû’ haməmalə’îm bêṯ ’ăḏōnêhem ḥāmās ûmirəmâ: s

10 wəhāyâ ḇayywōm hahû’ nə’um-yəhwâ qwōl ṣə‘āqâ mišša‘ar hadāḡîm wîlālâ min-hammišəneh wəšeḇer gāḏwōl mēhagəḇā‘wōṯ:

11 hêlîlû yōšəḇê hammaḵətēš kî niḏəmâ kāl-‘am kəna‘an niḵərəṯû kāl-nəṭîlê ḵāsef:

12 wəhāyâ bā‘ēṯ hahî’ ’ăḥapēś ’eṯ-yərûšālaim bannērwōṯ ûfāqaḏətî ‘al-hā’ănāšîm haqqōfə’îm ‘al-šimərêhem hā’ōmərîm biləḇāḇām lō’-yêṭîḇ yəhwâ wəlō’ yārē‘a:

13 wəhāyâ ḥêlām liməšissâ ûḇātêhem lišəmāmâ ûḇānû ḇātîm wəlō’ yēšēḇû wənāṭə‘û ḵərāmîm wəlō’ yišətû ’eṯ-yênām:

14 qārwōḇ ywōm-yəhwâ hagāḏwōl qārwōḇ ûmahēr mə’ōḏ qwōl ywōm yəhwâ mar ṣōrēḥa šām gibwōr:

15 ywōm ‘eḇərâ hayywōm hahû’ ywōm ṣārâ ûməṣûqâ ywōm šō’â ûməšwō’â ywōm ḥōšeḵə wa’ăfēlâ ywōm ‘ānān wa‘ărāfel:

16 ywōm šwōfār ûṯərû‘â ‘al he‘ārîm habəṣurwōṯ wə‘al hapinnwōṯ hagəḇōhwōṯ:

17 wahăṣērōṯî lā’āḏām wəhāləḵû ka‘iwərîm kî layhwâ ḥāṭā’û wəšupaḵə dāmām ke‘āfār ûləḥumām kagəlālîm:

18 gam-kasəpām gam-zəhāḇām lō’-yûḵal ləhaṣṣîlām bəywōm ‘eḇəraṯ yəhwâ ûḇə’ēš qinə’āṯwō tē’āḵēl kāl-hā’āreṣ kî-ḵālâ ’aḵə-niḇəhālâ ya‘ăśeh ’ēṯ kāl-yōšəḇê hā’āreṣ: s


Next: Zephaniah (Tsephanyah) Chapter 2