Sacred Texts  Bible  Index 
Polyglot  KJV  Sep  Vul 

Song of Solomon (Shir Hashirim) Index
  Previous  Next 

Tanach (Hebrew): Song of Solomon (Shir Hashirim) Chapter 3

1 ‏עַל־מִשְׁכָּבִי֙ בַּלֵּיל֔וֹת בִּקַּ֕שְׁתִּי אֵ֥ת שֶׁאָהֲבָ֖ה נַפְשִׁ֑י בִּקַּשְׁתִּ֖יו וְלֹ֥א מְצָאתִֽיו׃

2 ‏אָק֨וּמָה נָּ֜א וַאֲסוֹבְבָ֣ה בָעִ֗יר בַּשְּׁוָקִים֙ וּבָ֣רְחֹב֔וֹת אֲבַקְשָׁ֕ה אֵ֥ת שֶׁאָהֲבָ֖ה נַפְשִׁ֑י בִּקַּשְׁתִּ֖יו וְלֹ֥א מְצָאתִֽיו׃

3 ‏מְצָא֙וּנִי֙ הַשֹּׁ֣מְרִ֔ים הַסֹּבְבִ֖ים בָּעִ֑יר אֵ֛ת שֶׁאָהֲבָ֥ה נַפְשִׁ֖י רְאִיתֶֽם׃

4 ‏כִּמְעַט֙ שֶׁעָבַ֣רְתִּי מֵהֶ֔ם עַ֣ד שֶֽׁמָּצָ֔אתִי אֵ֥ת שֶׁאָהֲבָ֖ה נַפְשִׁ֑י אֲחַזְתִּיו֙ וְלֹ֣א אַרְפֶּ֔נּוּ עַד־שֶׁ֤הֲבֵיאתִיו֙ אֶל־בֵּ֣ית אִמִּ֔י וְאֶל־חֶ֖דֶר הוֹרָתִֽי׃

5 ‏הִשְׁבַּ֨עְתִּי אֶתְכֶ֜ם בְּנ֤וֹת יְרוּשָׁלִַ֙ם֙ בִּצְבָא֔וֹת א֖וֹ בְּאַיְל֣וֹת הַשָּׂדֶ֑ה אִם־תָּעִ֧ירוּ׀ וְֽאִם־תְּעֽוֹרְר֛וּ אֶת־הָאַהֲבָ֖ה עַ֥ד שֶׁתֶּחְפָּֽץ׃ ס

6 ‏מִ֣י זֹ֗את עֹלָה֙ מִן־הַמִּדְבָּ֔ר כְּתִֽימֲר֖וֹת עָשָׁ֑ן מְקֻטֶּ֤רֶת מוֹר֙ וּלְבוֹנָ֔ה מִכֹּ֖ל אַבְקַ֥ת רוֹכֵֽל׃

7 ‏הִנֵּ֗ה מִטָּתוֹ֙ שֶׁלִּשְׁלֹמֹ֔ה שִׁשִּׁ֥ים גִּבֹּרִ֖ים סָבִ֣יב לָ֑הּ מִגִּבֹּרֵ֖י יִשְׂרָאֵֽל׃

8 ‏כֻּלָּם֙3 אֲחֻ֣זֵי חֶ֔רֶב מְלֻמְּדֵ֖י מִלְחָמָ֑ה אִ֤ישׁ חַרְבּוֹ֙ עַל־יְרֵכ֔וֹ מִפַּ֖חַד בַּלֵּילֽוֹת׃ ס

9 ‏אַפִּרְי֗וֹן עָ֤שָׂה לוֹ֙ הַמֶּ֣לֶךְ שְׁלֹמֹ֔ה מֵעֲצֵ֖י הַלְּבָנֽוֹן׃

10 ‏עַמּוּדָיו֙ עָ֣שָׂה כֶ֔סֶף רְפִידָת֣וֹ זָהָ֔ב מֶרְכָּב֖וֹ אַרְגָּמָ֑ן תּוֹכוֹ֙ רָצ֣וּף אַהֲבָ֔ה מִבְּנ֖וֹת יְרוּשָׁלִָֽם׃

11 ‏צְאֶ֧ינָה׀ וּֽרְאֶ֛ינָה בְּנ֥וֹת צִיּ֖וֹן בַּמֶּ֣לֶךְ שְׁלֹמֹ֑ה בָּעֲטָרָ֗ה שֶׁעִטְּרָה־לּ֤וֹ אִמּוֹ֙ בְּי֣וֹם חֲתֻנָּת֔וֹ וּבְי֖וֹם שִׂמְחַ֥ת לִבּֽוֹ׃ ס

1 ‘al-mišəkāḇî ballêlwōṯ biqqašətî ’ēṯ še’âăḇâ nafəšî biqqašətîw wəlō’ məṣā’ṯîw:

2 ’āqûmâ nnā’ wa’ăswōḇəḇâ ḇā‘îr baššəwāqîm ûḇārəḥōḇwōṯ ’ăḇaqəšâ ’ēṯ še’âăḇâ nafəšî biqqašətîw wəlō’ məṣā’ṯîw:

3 məṣā’ûnî haššōmərîm hassōḇəḇîm bā‘îr ’ēṯ še’âăḇâ nafəšî rə’îṯem:

4 kimə‘aṭ še‘āḇarətî mēhem ‘aḏ šemmāṣā’ṯî ’ēṯ še’âăḇâ nafəšî ’ăḥazətîw wəlō’ ’arəpennû ‘aḏ-šehăḇê’ṯîw ’el-bêṯ ’immî wə’el-ḥeḏer hwōrāṯî:

5 hišəba‘ətî ’eṯəḵem bənwōṯ yərûšālaim biṣəḇā’wōṯ ’wō bə’ayəlwōṯ haśśāḏeh ’im-tā‘îrû| wə’im-tə‘wōrərû ’eṯ-hā’ahăḇâ ‘aḏ šeteḥəpāṣ: s

6 mî zō’ṯ ‘ōlâ min-hammiḏəbār kəṯîmărwōṯ ‘āšān məquṭṭereṯ mwōr ûləḇwōnâ mikōl ’aḇəqaṯ rwōḵēl:

7 hinnēh miṭṭāṯwō šellišəlōmōh šiššîm gibōrîm sāḇîḇ lāh migibōrê yiśərā’ēl:

8 kullām3 ’ăḥuzê ḥereḇ məlumməḏê miləḥāmâ ’îš ḥarəbwō ‘al-yərēḵwō mipaḥaḏ ballêlwōṯ: s

9 ’apirəywōn ‘āśâ lwō hammeleḵə šəlōmōh mē‘ăṣê halləḇānwōn:

10 ‘ammûḏāyw ‘āśâ ḵesef rəfîḏāṯwō zâāḇ merəkāḇwō ’arəgāmān twōḵwō rāṣûf ’ahăḇâ mibənwōṯ yərûšālāim:

11 ṣə’eynâ| ûrə’eynâ bənwōṯ ṣîywōn bammeleḵə šəlōmōh bā‘ăṭārâ še‘iṭṭərâ-llwō ’immwō bəywōm ḥăṯunnāṯwō ûḇəywōm śiməḥaṯ libwō: s


Next: Song of Solomon (Shir Hashirim) Chapter 4