Sacred Texts  Bible  Index 
Polyglot  KJV  Sep  Vul 

1 Samuel (1 Shmuel) Index
  Previous  Next 

Tanach (Hebrew): 1 Samuel (1 Shmuel) Chapter 24

1 ‏וַיַּ֥עַל דָּוִ֖ד מִשָּׁ֑ם וַיֵּ֖שֶׁב בִּמְצָד֥וֹת עֵֽין־גֶּֽדִי׃

2 ‏וַיְהִ֗י כַּֽאֲשֶׁר֙ שָׁ֣ב שָׁא֔וּל מֵאַחֲרֵ֖י פְּלִשְׁתִּ֑ים וַיַּגִּ֤דוּ לוֹ֙ לֵאמֹ֔ר הִנֵּ֣ה דָוִ֔ד בְּמִדְבַּ֖ר עֵ֥ין גֶּֽדִי׃ ס

3 ‏וַיִּקַּ֣ח שָׁא֗וּל שְׁלֹ֧שֶׁת אֲלָפִ֛ים אִ֥ישׁ בָּח֖וּר מִכָּל־יִשְׂרָאֵ֑ל וַיֵּ֗לֶךְ לְבַקֵּ֤שׁ אֶת־דָּוִד֙ וַֽאֲנָשָׁ֔יו עַל־פְּנֵ֖י צוּרֵ֥י הַיְּעֵלִֽים׃

4 ‏וַ֠יָּבֹא אֶל־גִּדְר֨וֹת הַצֹּ֤אן עַל־הַדֶּ֙רֶךְ֙ וְשָׁ֣ם מְעָרָ֔ה וַיָּבֹ֥א שָׁא֖וּל לְהָסֵ֣ךְ אֶת־רַגְלָ֑יו וְדָוִד֙ וַאֲנָשָׁ֔יו בְּיַרְכְּתֵ֥י הַמְּעָרָ֖ה יֹשְׁבִֽים׃

5 ‏וַיֹּאמְרוּ֩ אַנְשֵׁ֨י דָוִ֜ד אֵלָ֗יו הִנֵּ֨ה הַיּ֜וֹם אֲ‍ֽשֶׁר־אָמַ֧ר יְהוָ֣ה אֵלֶ֗יךָ הִנֵּ֨ה אָנֹכִ֜י נֹתֵ֤ן אֶת־איביך אֹֽיִבְךָ֙ בְּיָדֶ֔ךָ וְעָשִׂ֣יתָ לּ֔וֹ כַּאֲשֶׁ֖ר יִטַ֣ב בְּעֵינֶ֑יךָ וַיָּ֣קָם דָּוִ֗ד וַיִּכְרֹ֛ת אֶת־כְּנַֽף־הַמְּעִ֥יל אֲשֶׁר־לְשָׁא֖וּל בַּלָּֽט׃

6 ‏וַֽיְהִי֙ אַֽחֲרֵי־כֵ֔ן וַיַּ֥ךְ לֵב־דָּוִ֖ד אֹת֑וֹ עַ֚ל אֲשֶׁ֣ר כָּרַ֔ת אֶת־כָּנָ֖ף אֲשֶׁ֥ר לְשָׁאֽוּל׃ ס

7 ‏וַיֹּ֨אמֶר לַאֲנָשָׁ֜יו חָלִ֧ילָה לִּ֣י מֵֽיהוָ֗ה אִם־אֶעֱשֶׂה֩ אֶת־הַדָּבָ֨ר הַזֶּ֤ה לַֽאדֹנִי֙ לִמְשִׁ֣יחַ יְהוָ֔ה לִשְׁלֹ֥חַ יָדִ֖י בּ֑וֹ כִּֽי־מְשִׁ֥יחַ יְהוָ֖ה הֽוּא׃

8 ‏וַיְשַׁסַּ֨ע דָּוִ֤ד אֶת־אֲנָשָׁיו֙ בַּדְּבָרִ֔ים וְלֹ֥א נְתָנָ֖ם לָק֣וּם אֶל־שָׁא֑וּל וְשָׁא֛וּל קָ֥ם מֵהַמְּעָרָ֖ה וַיֵּ֥לֶךְ בַּדָּֽרֶךְ׃ ס

9 ‏וַיָּ֨קָם דָּוִ֜ד אַחֲרֵי־כֵ֗ן וַיֵּצֵא֙ מן־ המערה מֵֽהַמְּעָרָ֔ה וַיִּקְרָ֧א אַֽחֲרֵי־שָׁא֛וּל לֵאמֹ֖ר אֲדֹנִ֣י הַמֶּ֑לֶךְ וַיַּבֵּ֤ט שָׁאוּל֙ אַֽחֲרָ֔יו וַיִּקֹּ֨ד דָּוִ֥ד אַפַּ֛יִם אַ֖רְצָה וַיִּשְׁתָּֽחוּ׃ ס

10 ‏וַיֹּ֤אמֶר דָּוִד֙ לְשָׁא֔וּל לָ֧מָּה תִשְׁמַ֛ע אֶת־דִּבְרֵ֥י אָדָ֖ם לֵאמֹ֑ר הִנֵּ֣ה דָוִ֔ד מְבַקֵּ֖שׁ רָעָתֶֽךָ׃

11 ‏הִנֵּה֩ הַיּ֨וֹם הַזֶּ֜ה רָא֣וּ עֵינֶ֗יךָ אֵ֣ת אֲשֶׁר־נְתָנְךָ֩ יְהוָ֨ה׀ הַיּ֤וֹם׀ בְּיָדִי֙ בַּמְּעָרָ֔ה וְאָמַ֥ר לַהֲרָגֲךָ֖ וַתָּ֣חָס עָלֶ֑יךָ וָאֹמַ֗ר לֹא־אֶשְׁלַ֤ח יָדִי֙ בַּֽאדֹנִ֔י כִּי־מְשִׁ֥יחַ יְהוָ֖ה הֽוּא׃

12 ‏וְאָבִ֣י רְאֵ֔ה גַּ֗ם רְאֵ֛ה אֶת־כְּנַ֥ף מְעִילְךָ֖ בְּיָדִ֑י כִּ֡י בְּכָרְתִי֩ אֶת־כְּנַ֨ף מְעִֽילְךָ֜ וְלֹ֣א הֲרַגְתִּ֗יךָ דַּ֤ע וּרְאֵה֙ כִּי֩ אֵ֨ין בְּיָדִ֜י רָעָ֤ה וָפֶ֙שַׁע֙ וְלֹא־חָטָ֣אתִי לָ֔ךְ וְאַתָּ֛ה צֹדֶ֥ה אֶת־נַפְשִׁ֖י לְקַחְתָּֽהּ׃

13 ‏יִשְׁפֹּ֤ט יְהוָה֙ בֵּינִ֣י וּבֵינֶ֔ךָ וּנְקָמַ֥נִי יְהוָ֖ה מִמֶּ֑ךָּ וְיָדִ֖י לֹ֥א תִֽהְיֶה־בָּֽךְ׃

14 ‏כַּאֲשֶׁ֣ר יֹאמַ֗ר מְשַׁל֙ הַקַּדְמֹנִ֔י מֵרְשָׁעִ֖ים יֵ֣צֵא רֶ֑שַׁע וְיָדִ֖י לֹ֥א תִֽהְיֶה־בָּֽךְ׃

15 ‏אַחֲרֵ֨י מִ֤י יָצָא֙ מֶ֣לֶךְ יִשְׂרָאֵ֔ל אַחֲרֵ֥י מִ֖י אַתָּ֣ה רֹדֵ֑ף אַֽחֲרֵי֙ כֶּ֣לֶב מֵ֔ת אַחֲרֵ֖י פַּרְעֹ֥שׁ אֶחָֽד׃

16 ‏וְהָיָ֤ה יְהוָה֙ לְדַיָּ֔ן וְשָׁפַ֖ט בֵּינִ֣י וּבֵינֶ֑ךָ וְיֵ֙רֶא֙ וְיָרֵ֣ב אֶת־רִיבִ֔י וְיִשְׁפְּטֵ֖נִי מִיָּדֶֽךָ׃ פ

17 ‏וַיְהִ֣י׀ כְּכַלּ֣וֹת דָּוִ֗ד לְדַבֵּ֞ר אֶת־הַדְּבָרִ֤ים הָאֵ֙לֶּה֙ אֶל־שָׁא֔וּל וַיֹּ֣אמֶר שָׁא֔וּל הֲקֹלְךָ֥ זֶ֖ה בְּנִ֣י דָוִ֑ד וַיִּשָּׂ֥א שָׁא֛וּל קֹל֖וֹ וַיֵּֽבְךְּ׃

18 ‏וַיֹּ֙אמֶר֙ אֶל־דָּוִ֔ד צַדִּ֥יק אַתָּ֖ה מִמֶּ֑נִּי כִּ֤י אַתָּה֙ גְּמַלְתַּ֣נִי הַטּוֹבָ֔ה וַאֲנִ֖י גְּמַלְתִּ֥יךָ הָרָעָֽה׃

19 ‏ואת וְאַתָּה֙ הִגַּ֣דְתָּ הַיּ֔וֹם אֵ֛ת אֲשֶׁר־עָשִׂ֥יתָה אִתִּ֖י טוֹבָ֑ה אֵת֩ אֲשֶׁ֨ר סִגְּרַ֧נִי יְהוָ֛ה בְּיָדְךָ֖ וְלֹ֥א הֲרַגְתָּֽנִי׃

20 ‏וְכִֽי־יִמְצָ֥א אִישׁ֙ אֶת־אֹ֣יְב֔וֹ וְשִׁלְּח֖וֹ בְּדֶ֣רֶךְ טוֹבָ֑ה וַֽיהוָה֙ יְשַׁלֶּמְךָ֣ טוֹבָ֔ה תַּ֚חַת הַיּ֣וֹם הַזֶּ֔ה אֲשֶׁ֥ר עָשִׂ֖יתָה לִֽי׃

21 ‏וְעַתָּה֙ הִנֵּ֣ה יָדַ֔עְתִּי כִּ֥י מָלֹ֖ךְ תִּמְל֑וֹךְ וְקָ֙מָה֙ בְּיָ֣דְךָ֔ מַמְלֶ֖כֶת יִשְׂרָאֵֽל׃

22 ‏וְעַתָּ֗ה הִשָּׁ֤בְעָה לִּי֙ בַּֽיהוָ֔ה אִם־תַּכְרִ֥ית אֶת־זַרְעִ֖י אַֽחֲרָ֑י וְאִם־תַּשְׁמִ֥יד אֶת־שְׁמִ֖י מִבֵּ֥ית אָבִֽי׃

23 ‏וַיִּשָּׁבַ֥ע דָּוִ֖ד לְשָׁא֑וּל וַיֵּ֤לֶךְ שָׁאוּל֙ אֶל־בֵּית֔וֹ וְדָוִד֙ וַֽאֲנָשָׁ֔יו עָל֖וּ עַל־הַמְּצוּדָֽה׃ פ

1 wayya‘al dāwiḏ miššām wayyēšeḇ biməṣāḏwōṯ ‘ên-geḏî:

2 wayəhî ka’ăšer šāḇ šā’ûl mē’aḥărê pəlišətîm wayyagiḏû lwō lē’mōr hinnēh ḏāwiḏ bəmiḏəbar ‘ên geḏî: s

3 wayyiqqaḥ šā’ûl šəlōšeṯ ’ălāfîm ’îš bāḥûr mikāl-yiśərā’ēl wayyēleḵə ləḇaqqēš ’eṯ-dāwiḏ wa’ănāšāyw ‘al-pənê ṣûrê hayyə‘ēlîm:

4 wayyāḇō’ ’el-giḏərwōṯ haṣṣō’n ‘al-hadereḵə wəšām mə‘ārâ wayyāḇō’ šā’ûl ləhāsēḵə ’eṯ-raḡəlāyw wəḏāwiḏ wa’ănāšāyw bəyarəkəṯê hammə‘ārâ yōšəḇîm:

5 wayyō’mərû ’anəšê ḏāwiḏ ’ēlāyw hinnēh hayywōm ’ă‍šer-’āmar yəhwâ ’ēleyḵā hinnēh ’ānōḵî nōṯēn ’eṯ-’ōyəḇeyḵā ’ōyiḇəḵā bəyāḏeḵā wə‘āśîṯā llwō ka’ăšer yiṭaḇ bə‘êneyḵā wayyāqām dāwiḏ wayyiḵərōṯ ’eṯ-kənaf-hammə‘îl ’ăšer-ləšā’ûl ballāṭ:

6 wayəhî ’aḥărê-ḵēn wayyaḵə lēḇ-dāwiḏ ’ōṯwō ‘al ’ăšer kāraṯ ’eṯ-kānāf ’ăšer ləšā’ûl: s

7 wayyō’mer la’ănāšāyw ḥālîlâ llî mêhwâ ’im-’e‘ĕśeh ’eṯ-hadāḇār hazzeh la’ḏōnî liməšîḥa yəhwâ lišəlōḥa yāḏî bwō kî-məšîḥa yəhwâ hû’:

8 wayəšassa‘ dāwiḏ ’eṯ-’ănāšāyw badəḇārîm wəlō’ nəṯānām lāqûm ’el-šā’ûl wəšā’ûl qām mēhammə‘ārâ wayyēleḵə badāreḵə: s

9 wayyāqām dāwiḏ ’aḥărê-ḵēn wayyēṣē’ min- hammə‘ārâ mēhammə‘ārâ wayyiqərā’ ’aḥărê-šā’ûl lē’mōr ’ăḏōnî hammeleḵə wayyabēṭ šā’ûl ’aḥărāyw wayyiqqōḏ dāwiḏ ’apayim ’arəṣâ wayyišətāḥû: s

10 wayyō’mer dāwiḏ ləšā’ûl lāmmâ ṯišəma‘ ’eṯ-diḇərê ’āḏām lē’mōr hinnēh ḏāwiḏ məḇaqqēš rā‘āṯeḵā:

11 hinnēh hayywōm hazzeh rā’û ‘êneyḵā ’ēṯ ’ăšer-nəṯānəḵā yəhwâ| hayywōm| bəyāḏî bammə‘ārâ wə’āmar lahărāḡăḵā watāḥās ‘āleyḵā wā’ōmar lō’-’ešəlaḥ yāḏî ba’ḏōnî kî-məšîḥa yəhwâ hû’:

12 wə’āḇî rə’ēh gam rə’ēh ’eṯ-kənaf mə‘îləḵā bəyāḏî kî bəḵārəṯî ’eṯ-kənaf mə‘îləḵā wəlō’ hăraḡətîḵā da‘ ûrə’ēh kî ’ên bəyāḏî rā‘â wāfeša‘ wəlō’-ḥāṭā’ṯî lāḵə wə’atâ ṣōḏeh ’eṯ-nafəšî ləqaḥətāh:

13 yišəpōṭ yəhwâ bênî ûḇêneḵā ûnəqāmanî yəhwâ mimmeḵḵā wəyāḏî lō’ ṯihəyeh-bāḵə:

14 ka’ăšer yō’mar məšal haqqaḏəmōnî mērəšā‘îm yēṣē’ reša‘ wəyāḏî lō’ ṯihəyeh-bāḵə:

15 ’aḥărê mî yāṣā’ meleḵə yiśərā’ēl ’aḥărê mî ’atâ rōḏēf ’aḥărê keleḇ mēṯ ’aḥărê parə‘ōš ’eḥāḏ:

16 wəhāyâ yəhwâ ləḏayyān wəšāfaṭ bênî ûḇêneḵā wəyēre’ wəyārēḇ ’eṯ-rîḇî wəyišəpəṭēnî mîyāḏeḵā: f

17 wayəhî| kəḵallwōṯ dāwiḏ ləḏabēr ’eṯ-hadəḇārîm hā’ēlleh ’el-šā’ûl wayyō’mer šā’ûl hăqōləḵā zeh bənî ḏāwiḏ wayyiśśā’ šā’ûl qōlwō wayyēḇəḵḵə:

18 wayyō’mer ’el-dāwiḏ ṣadîq ’atâ mimmennî kî ’atâ gəmalətanî haṭṭwōḇâ wa’ănî gəmalətîḵā hārā‘â:

19 wə’atə wə’atâ higaḏətā hayywōm ’ēṯ ’ăšer-‘āśîṯâ ’itî ṭwōḇâ ’ēṯ ’ăšer sigəranî yəhwâ bəyāḏəḵā wəlō’ hăraḡətānî:

20 wəḵî-yiməṣā’ ’îš ’eṯ-’ōyəḇwō wəšilləḥwō bəḏereḵə ṭwōḇâ wayhwâ yəšalleməḵā ṭwōḇâ taḥaṯ hayywōm hazzeh ’ăšer ‘āśîṯâ lî:

21 wə‘atâ hinnēh yāḏa‘ətî kî mālōḵə timəlwōḵə wəqāmâ bəyāḏəḵā maməleḵeṯ yiśərā’ēl:

22 wə‘atâ hiššāḇə‘â llî bayhwâ ’im-taḵərîṯ ’eṯ-zarə‘î ’aḥărāy wə’im-tašəmîḏ ’eṯ-šəmî mibêṯ ’āḇî:

23 wayyiššāḇa‘ dāwiḏ ləšā’ûl wayyēleḵə šā’ûl ’el-bêṯwō wəḏāwiḏ wa’ănāšāyw ‘ālû ‘al-hamməṣûḏâ: f


Next: 1 Samuel (1 Shmuel) Chapter 25