Sacred Texts  Bible  Index 
Polyglot  KJV  Sep  Vul 

Numbers (Bemidbar) Index
  Previous  Next 

Tanach (Hebrew): Numbers (Bemidbar) Chapter 14

1 ‏וַתִּשָּׂא֙ כָּל־הָ֣עֵדָ֔ה וַֽיִּתְּנ֖וּ אֶת־קוֹלָ֑ם וַיִּבְכּ֥וּ הָעָ֖ם בַּלַּ֥יְלָה הַהֽוּא׃

2 ‏וַיִּלֹּ֙נוּ֙ עַל־מֹשֶׁ֣ה וְעַֽל־אַהֲרֹ֔ן כֹּ֖ל בְּנֵ֣י יִשְׂרָאֵ֑ל וַֽיֹּאמְר֨וּ אֲלֵהֶ֜ם כָּל־הָעֵדָ֗ה לוּ־מַ֙תְנוּ֙ בְּאֶ֣רֶץ מִצְרַ֔יִם א֛וֹ בַּמִּדְבָּ֥ר הַזֶּ֖ה לוּ־מָֽתְנוּ׃

3 ‏וְלָמָ֣ה יְ֠הוָה מֵבִ֨יא אֹתָ֜נוּ אֶל־הָאָ֤רֶץ הַזֹּאת֙ לִנְפֹּ֣ל בַּחֶ֔רֶב נָשֵׁ֥ינוּ וְטַפֵּ֖נוּ יִהְי֣וּ לָבַ֑ז הֲל֧וֹא ט֦וֹב לָ֖נוּ שׁ֥וּב מִצְרָֽיְמָה׃

4 ‏וַיֹּאמְר֖וּ אִ֣ישׁ אֶל־אָחִ֑יו נִתְּנָ֥ה רֹ֖אשׁ וְנָשׁ֥וּבָה מִצְרָֽיְמָה׃

5 ‏וַיִּפֹּ֥ל מֹשֶׁ֛ה וְאַהֲרֹ֖ן עַל־פְּנֵיהֶ֑ם לִפְנֵ֕י כָּל־קְהַ֥ל עֲדַ֖ת בְּנֵ֥י יִשְׂרָאֵֽל׃

6 ‏וִיהוֹשֻׁ֣עַ בִּן־נ֗וּן וְכָלֵב֙ בֶּן־יְפֻנֶּ֔ה מִן־הַתָּרִ֖ים אֶת־הָאָ֑רֶץ קָרְע֖וּ בִּגְדֵיהֶֽם׃

7 ‏וַיֹּ֣אמְר֔וּ אֶל־כָּל־עֲדַ֥ת בְּנֵֽי־יִשְׂרָאֵ֖ל לֵאמֹ֑ר הָאָ֗רֶץ אֲשֶׁ֨ר עָבַ֤רְנוּ בָהּ֙ לָת֣וּר אֹתָ֔הּ טוֹבָ֥ה הָאָ֖רֶץ מְאֹ֥ד מְאֹֽד׃

8 ‏אִם־חָפֵ֥ץ בָּ֙נוּ֙ יְהוָ֔ה וְהֵבִ֤יא אֹתָ֙נוּ֙ אֶל־הָאָ֣רֶץ הַזֹּ֔את וּנְתָנָ֖הּ לָ֑נוּ אֶ֕רֶץ אֲשֶׁר־הִ֛וא זָבַ֥ת חָלָ֖ב וּדְבָֽשׁ׃

9 ‏אַ֣ךְ בַּֽיהוָה֮ אַל־תִּמְרֹדוּ֒ וְאַתֶּ֗ם אַל־תִּֽירְאוּ֙ אֶת־עַ֣ם הָאָ֔רֶץ כִּ֥י לַחְמֵ֖נוּ הֵ֑ם סָ֣ר צִלָּ֧ם מֵעֲלֵיהֶ֛ם וַֽיהוָ֥ה אִתָּ֖נוּ אַל־תִּירָאֻֽם׃

10 ‏וַיֹּֽאמְרוּ֙ כָּל־הָ֣עֵדָ֔ה לִרְגּ֥וֹם אֹתָ֖ם בָּאֲבָנִ֑ים וּכְב֣וֹד יְהוָ֗ה נִרְאָה֙ בְּאֹ֣הֶל מוֹעֵ֔ד אֶֽל־כָּל־בְּנֵ֖י יִשְׂרָאֵֽל׃ פ

11 ‏וַיֹּ֤אמֶר יְהוָה֙ אֶל־מֹשֶׁ֔ה עַד־אָ֥נָה יְנַאֲצֻ֖נִי הָעָ֣ם הַזֶּ֑ה וְעַד־אָ֙נָה֙ לֹא־יַאֲמִ֣ינוּ בִ֔י בְּכֹל֙ הָֽאֹת֔וֹת אֲשֶׁ֥ר עָשִׂ֖יתִי בְּקִרְבּֽוֹ׃

12 ‏אַכֶּ֥נּוּ בַדֶּ֖בֶר וְאוֹרִשֶׁ֑נּוּ וְאֶֽעֱשֶׂה֙ אֹֽתְךָ֔ לְגוֹי־גָּד֥וֹל וְעָצ֖וּם מִמֶּֽנּוּ׃

13 ‏וַיֹּ֥אמֶר מֹשֶׁ֖ה אֶל־יְהוָ֑ה וְשָׁמְע֣וּ מִצְרַ֔יִם כִּֽי־הֶעֱלִ֧יתָ בְכֹחֲךָ֛ אֶת־הָעָ֥ם הַזֶּ֖ה מִקִּרְבּֽוֹ׃

14 ‏וְאָמְר֗וּ אֶל־יוֹשֵׁב֮ הָאָ֣רֶץ הַזֹּאת֒ שָֽׁמְעוּ֙ כִּֽי־אַתָּ֣ה יְהוָ֔ה בְּקֶ֖רֶב הָעָ֣ם הַזֶּ֑ה אֲשֶׁר־עַ֨יִן בְּעַ֜יִן נִרְאָ֣ה׀ אַתָּ֣ה יְהוָ֗ה וַעֲנָֽנְךָ֙ עֹמֵ֣ד עֲלֵהֶ֔ם וּבְעַמֻּ֣ד עָנָ֗ן אַתָּ֨ה הֹלֵ֤ךְ לִפְנֵיהֶם֙ יוֹמָ֔ם וּבְעַמּ֥וּד אֵ֖שׁ לָֽיְלָה׃

15 ‏וְהֵמַתָּ֛ה אֶת־הָעָ֥ם הַזֶּ֖ה כְּאִ֣ישׁ אֶחָ֑ד וְאָֽמְרוּ֙ הַגּוֹיִ֔ם אֲשֶׁר־שָׁמְע֥וּ אֶֽת־שִׁמְעֲךָ֖ לֵאמֹֽר׃

16 ‏מִבִּלְתִּ֞י יְכֹ֣לֶת יְהוָ֗ה לְהָבִיא֙ אֶת־הָעָ֣ם הַזֶּ֔ה אֶל־הָאָ֖רֶץ אֲשֶׁר־נִשְׁבַּ֣ע לָהֶ֑ם וַיִּשְׁחָטֵ֖ם בַּמִּדְבָּֽר׃

17 ‏וְעַתָּ֕ה יִגְדַּל־נָ֖א כֹּ֣חַ אֲדֹנָ֑י כַּאֲשֶׁ֥ר דִּבַּ֖רְתָּ לֵאמֹֽר׃

18 ‏יְהוָ֗ה אֶ֤רֶךְ אַפַּ֙יִם֙ וְרַב־חֶ֔סֶד נֹשֵׂ֥א עָוֹ֖ן וָפָ֑שַׁע וְנַקֵּה֙ לֹ֣א יְנַקֶּ֔ה פֹּקֵ֞ד עֲוֹ֤ן אָבוֹת֙ עַל־בָּנִ֔ים עַל־שִׁלֵּשִׁ֖ים וְעַל־רִבֵּעִֽים׃

19 ‏סְלַֽח־נָ֗א לַעֲוֹ֛ן הָעָ֥ם הַזֶּ֖ה כְּגֹ֣דֶל חַסְדֶּ֑ךָ וְכַאֲשֶׁ֤ר נָשָׂ֙אתָה֙ לָעָ֣ם הַזֶּ֔ה מִמִּצְרַ֖יִם וְעַד־הֵֽנָּה׃

20 ‏וַיֹּ֣אמֶר יְהוָ֔ה סָלַ֖חְתִּי כִּדְבָרֶֽךָ׃

21 ‏וְאוּלָ֖ם חַי־אָ֑נִי וְיִמָּלֵ֥א כְבוֹד־יְהוָ֖ה אֶת־כָּל־הָאָֽרֶץ׃

22 ‏כִּ֣י כָל־הָאֲנָשִׁ֗ים הָרֹאִ֤ים אֶת־כְּבֹדִי֙ וְאֶת־אֹ֣תֹתַ֔י אֲשֶׁר־עָשִׂ֥יתִי בְמִצְרַ֖יִם וּבַמִּדְבָּ֑ר וַיְנַסּ֣וּ אֹתִ֗י זֶ֚ה עֶ֣שֶׂר פְּעָמִ֔ים וְלֹ֥א שָׁמְע֖וּ בְּקוֹלִֽי׃

23 ‏אִם־יִרְאוּ֙ אֶת־הָאָ֔רֶץ אֲשֶׁ֥ר נִשְׁבַּ֖עְתִּי לַאֲבֹתָ֑ם וְכָל־מְנַאֲצַ֖י לֹ֥א יִרְאֽוּהָ׃

24 ‏וְעַבְדִּ֣י כָלֵ֗ב עֵ֣קֶב הָֽיְתָ֞ה ר֤וּחַ אַחֶ֙רֶת֙ עִמּ֔וֹ וַיְמַלֵּ֖א אַחֲרָ֑י וַהֲבִֽיאֹתִ֗יו אֶל־הָאָ֙רֶץ֙ אֲשֶׁר־בָּ֣א שָׁ֔מָּה וְזַרְע֖וֹ יוֹרִשֶֽׁנָּה׃

25 ‏וְהָֽעֲמָלֵקִ֥י וְהַֽכְּנַעֲנִ֖י יוֹשֵׁ֣ב בָּעֵ֑מֶק מָחָ֗ר פְּנ֨וּ וּסְע֥וּ לָכֶ֛ם הַמִּדְבָּ֖ר דֶּ֥רֶךְ יַם־סֽוּף׃ פ

26 ‏וַיְדַבֵּ֣ר יְהוָ֔ה אֶל־מֹשֶׁ֥ה וְאֶֽל־אַהֲרֹ֖ן לֵאמֹֽר׃

27 ‏עַד־מָתַ֗י לָעֵדָ֤ה הָֽרָעָה֙ הַזֹּ֔את אֲשֶׁ֛ר הֵ֥מָּה מַלִּינִ֖ים עָלָ֑י אֶת־תְּלֻנּ֞וֹת בְּנֵ֣י יִשְׂרָאֵ֗ל אֲשֶׁ֨ר הֵ֧מָּה מַלִּינִ֛ים עָלַ֖י שָׁמָֽעְתִּי׃

28 ‏אֱמֹ֣ר אֲלֵהֶ֗ם חַי־אָ֙נִי֙ נְאֻם־יְהוָ֔ה אִם־לֹ֕א כַּאֲשֶׁ֥ר דִּבַּרְתֶּ֖ם בְּאָזְנָ֑י כֵּ֖ן אֶֽעֱשֶׂ֥ה לָכֶֽם׃

29 ‏בַּמִּדְבָּ֣ר הַ֠זֶּה יִפְּל֨וּ פִגְרֵיכֶ֜ם וְכָל־פְּקֻדֵיכֶם֙ לְכָל־מִסְפַּרְכֶ֔ם מִבֶּ֛ן עֶשְׂרִ֥ים שָׁנָ֖ה וָמָ֑עְלָה אֲשֶׁ֥ר הֲלִֽינֹתֶ֖ם עָלָֽי׃

30 ‏אִם־אַתֶּם֙ תָּבֹ֣אוּ אֶל־הָאָ֔רֶץ אֲשֶׁ֤ר נָשָׂ֙אתִי֙ אֶת־יָדִ֔י לְשַׁכֵּ֥ן אֶתְכֶ֖ם בָּ֑הּ כִּ֚י אִם־כָּלֵ֣ב בֶּן־יְפֻנֶּ֔ה וִיהוֹשֻׁ֖עַ בִּן־נֽוּן׃

31 ‏וְטַ֨פְּכֶ֔ם אֲשֶׁ֥ר אֲמַרְתֶּ֖ם לָבַ֣ז יִהְיֶ֑ה וְהֵבֵיאתִ֣י אֹתָ֔ם וְיָֽדְעוּ֙ אֶת־הָאָ֔רֶץ אֲשֶׁ֥ר מְאַסְתֶּ֖ם בָּֽהּ׃

32 ‏וּפִגְרֵיכֶ֖ם אַתֶּ֑ם יִפְּל֖וּ בַּמִּדְבָּ֥ר הַזֶּֽה׃

33 ‏וּ֠בְנֵיכֶם יִהְי֨וּ רֹעִ֤ים בַּמִּדְבָּר֙ אַרְבָּעִ֣ים שָׁנָ֔ה וְנָשְׂא֖וּ אֶת־זְנוּתֵיכֶ֑ם עַד־תֹּ֥ם פִּגְרֵיכֶ֖ם בַּמִּדְבָּֽר׃

34 ‏בְּמִסְפַּ֨ר הַיָּמִ֜ים אֲשֶׁר־תַּרְתֶּ֣ם אֶת־הָאָרֶץ֮ אַרְבָּעִ֣ים יוֹם֒ י֣וֹם לַשָּׁנָ֞ה י֣וֹם לַשָּׁנָ֗ה תִּשְׂאוּ֙ אֶת־עֲוֹנֹ֣תֵיכֶ֔ם אַרְבָּעִ֖ים שָׁנָ֑ה וִֽידַעְתֶּ֖ם אֶת־תְּנוּאָתִֽי׃

35 ‏אֲנִ֣י יְהוָה֮ דִּבַּרְתִּי֒ אִם־לֹ֣א׀ זֹ֣את אֶֽעֱשֶׂ֗ה לְכָל־הָעֵדָ֤ה הָֽרָעָה֙ הַזֹּ֔את הַנּוֹעָדִ֖ים עָלָ֑י בַּמִּדְבָּ֥ר הַזֶּ֛ה יִתַּ֖מּוּ וְשָׁ֥ם יָמֻֽתוּ׃

36 ‏וְהָ֣אֲנָשִׁ֔ים אֲשֶׁר־שָׁלַ֥ח מֹשֶׁ֖ה לָת֣וּר אֶת־הָאָ֑רֶץ וַיָּשֻׁ֗בוּ וילונו וַיַּלִּ֤ינוּ עָלָיו֙ אֶת־כָּל־הָ֣עֵדָ֔ה לְהוֹצִ֥יא דִבָּ֖ה עַל־הָאָֽרֶץ׃

37 ‏וַיָּמֻ֙תוּ֙ הָֽאֲנָשִׁ֔ים מוֹצִאֵ֥י דִבַּת־הָאָ֖רֶץ רָעָ֑ה בַּמַּגֵּפָ֖ה לִפְנֵ֥י יְהוָֽה׃

38 ‏וִיהוֹשֻׁ֣עַ בִּן־נ֔וּן וְכָלֵ֖ב בֶּן־יְפֻנֶּ֑ה חָיוּ֙ מִן־הָאֲנָשִׁ֣ים הָהֵ֔ם הַֽהֹלְכִ֖ים לָת֥וּר אֶת־הָאָֽרֶץ׃

39 ‏וַיְדַבֵּ֤ר מֹשֶׁה֙ אֶת־הַדְּבָרִ֣ים הָאֵ֔לֶּה אֶֽל־כָּל־בְּנֵ֖י יִשְׂרָאֵ֑ל וַיִּֽתְאַבְּל֥וּ הָעָ֖ם מְאֹֽד׃

40 ‏וַיַּשְׁכִּ֣מוּ בַבֹּ֔קֶר וַיַּֽעֲל֥וּ אֶל־רֹאשׁ־הָהָ֖ר לֵאמֹ֑ר הִנֶּ֗נּוּ וְעָלִ֛ינוּ אֶל־הַמָּק֛וֹם אֲשֶׁר־אָמַ֥ר יְהוָ֖ה כִּ֥י חָטָֽאנוּ׃

41 ‏וַיֹּ֣אמֶר מֹשֶׁ֔ה לָ֥מָּה זֶּ֛ה אַתֶּ֥ם עֹבְרִ֖ים אֶת־פִּ֣י יְהוָ֑ה וְהִ֖וא לֹ֥א תִצְלָֽח׃

42 ‏אַֽל־תַּעֲל֔וּ כִּ֛י אֵ֥ין יְהוָ֖ה בְּקִרְבְּכֶ֑ם וְלֹא֙ תִּנָּ֣גְפ֔וּ לִפְנֵ֖י אֹיְבֵיכֶֽם׃

43 ‏כִּי֩ הָעֲמָלֵקִ֨י וְהַכְּנַעֲנִ֥י שָׁם֙ לִפְנֵיכֶ֔ם וּנְפַלְתֶּ֖ם בֶּחָ֑רֶב כִּֽי־עַל־כֵּ֤ן שַׁבְתֶּם֙ מֵאַחֲרֵ֣י יְהוָ֔ה וְלֹא־יִהְיֶ֥ה יְהוָ֖ה עִמָּכֶֽם׃

44 ‏וַיַּעְפִּ֕לוּ לַעֲל֖וֹת אֶל־רֹ֣אשׁ הָהָ֑ר וַאֲר֤וֹן בְּרִית־יְהוָה֙ וּמֹשֶׁ֔ה לֹא־מָ֖שׁוּ מִקֶּ֥רֶב הַֽמַּחֲנֶֽה׃

45 ‏וַיֵּ֤רֶד הָעֲמָלֵקִי֙ וְהַֽכְּנַעֲנִ֔י הַיֹּשֵׁ֖ב בָּהָ֣ר הַה֑וּא וַיַּכּ֥וּם וַֽיַּכְּת֖וּם עַד־הַֽחָרְמָֽה׃ פ

1 watiśśā’ kāl-hā‘ēḏâ wayyitənû ’eṯ-qwōlām wayyiḇəkû hā‘ām ballayəlâ hahû’:

2 wayyillōnû ‘al-mōšeh wə‘al-’ahărōn kōl bənê yiśərā’ēl wayyō’mərû ’ălēhem kāl-hā‘ēḏâ lû-maṯənû bə’ereṣ miṣərayim ’wō bammiḏəbār hazzeh lû-māṯənû:

3 wəlāmâ yəhwâ mēḇî’ ’ōṯānû ’el-hā’āreṣ hazzō’ṯ linəpōl baḥereḇ nāšênû wəṭapēnû yihəyû lāḇaz hălwō’ ṭwōḇ lānû šûḇ miṣərāyəmâ:

4 wayyō’mərû ’îš ’el-’āḥîw nitənâ rō’š wənāšûḇâ miṣərāyəmâ:

5 wayyipōl mōšeh wə’ahărōn ‘al-pənêhem lifənê kāl-qəhal ‘ăḏaṯ bənê yiśərā’ēl:

6 wîhwōšu‘a bin-nûn wəḵālēḇ ben-yəfunneh min-hatārîm ’eṯ-hā’āreṣ qārə‘û biḡəḏêhem:

7 wayyō’mərû ’el-kāl-‘ăḏaṯ bənê-yiśərā’ēl lē’mōr hā’āreṣ ’ăšer ‘āḇarənû ḇāh lāṯûr ’ōṯāh ṭwōḇâ hā’āreṣ mə’ōḏ mə’ōḏ:

8 ’im-ḥāfēṣ bānû yəhwâ wəhēḇî’ ’ōṯānû ’el-hā’āreṣ hazzō’ṯ ûnəṯānāh lānû ’ereṣ ’ăšer-hiw’ zāḇaṯ ḥālāḇ ûḏəḇāš:

9 ’aḵə bayhwâ ’al-timərōḏû wə’atem ’al-tîrə’û ’eṯ-‘am hā’āreṣ kî laḥəmēnû hēm sār ṣillām mē‘ălêhem wayhwâ ’itānû ’al-tîrā’um:

10 wayyō’mərû kāl-hā‘ēḏâ lirəgwōm ’ōṯām bā’ăḇānîm ûḵəḇwōḏ yəhwâ nirə’â bə’ōhel mwō‘ēḏ ’el-kāl-bənê yiśərā’ēl: f

11 wayyō’mer yəhwâ ’el-mōšeh ‘aḏ-’ānâ yəna’ăṣunî hā‘ām hazzeh wə‘aḏ-’ānâ lō’-ya’ămînû ḇî bəḵōl hā’ōṯwōṯ ’ăšer ‘āśîṯî bəqirəbwō:

12 ’akennû ḇadeḇer wə’wōrišennû wə’e‘ĕśeh ’ōṯəḵā ləḡwōy-gāḏwōl wə‘āṣûm mimmennû:

13 wayyō’mer mōšeh ’el-yəhwâ wəšāmə‘û miṣərayim kî-he‘ĕlîṯā ḇəḵōḥăḵā ’eṯ-hā‘ām hazzeh miqqirəbwō:

14 wə’āmərû ’el-ywōšēḇ hā’āreṣ hazzō’ṯ šāmə‘û kî-’atâ yəhwâ bəqereḇ hā‘ām hazzeh ’ăšer-‘ayin bə‘ayin nirə’â| ’atâ yəhwâ wa‘ănānəḵā ‘ōmēḏ ‘ălēhem ûḇə‘ammuḏ ‘ānān ’atâ hōlēḵə lifənêhem ywōmām ûḇə‘ammûḏ ’ēš lāyəlâ:

15 wəhēmatâ ’eṯ-hā‘ām hazzeh kə’îš ’eḥāḏ wə’āmərû hagwōyim ’ăšer-šāmə‘û ’eṯ-šimə‘ăḵā lē’mōr:

16 mibilətî yəḵōleṯ yəhwâ ləhāḇî’ ’eṯ-hā‘ām hazzeh ’el-hā’āreṣ ’ăšer-nišəba‘ lâem wayyišəḥāṭēm bammiḏəbār:

17 wə‘atâ yiḡədal-nā’ kōḥa ’ăḏōnāy ka’ăšer dibarətā lē’mōr:

18 yəhwâ ’ereḵə ’apayim wəraḇ-ḥeseḏ nōśē’ ‘āwōn wāfāša‘ wənaqqēh lō’ yənaqqeh pōqēḏ ‘ăwōn ’āḇwōṯ ‘al-bānîm ‘al-šillēšîm wə‘al-ribē‘îm:

19 səlaḥ-nā’ la‘ăwōn hā‘ām hazzeh kəḡōḏel ḥasədeḵā wəḵa’ăšer nāśā’ṯâ lā‘ām hazzeh mimmiṣərayim wə‘aḏ-hēnnâ:

20 wayyō’mer yəhwâ sālaḥətî kiḏəḇāreḵā:

21 wə’ûlām ḥay-’ānî wəyimmālē’ ḵəḇwōḏ-yəhwâ ’eṯ-kāl-hā’āreṣ:

22 kî ḵāl-hā’ănāšîm hārō’îm ’eṯ-kəḇōḏî wə’eṯ-’ōṯōṯay ’ăšer-‘āśîṯî ḇəmiṣərayim ûḇammiḏəbār wayənassû ’ōṯî zeh ‘eśer pə‘āmîm wəlō’ šāmə‘û bəqwōlî:

23 ’im-yirə’û ’eṯ-hā’āreṣ ’ăšer nišəba‘ətî la’ăḇōṯām wəḵāl-məna’ăṣay lō’ yirə’ûhā:

24 wə‘aḇədî ḵālēḇ ‘ēqeḇ hāyəṯâ rûḥa ’aḥereṯ ‘immwō wayəmallē’ ’aḥărāy wahăḇî’ōṯîw ’el-hā’āreṣ ’ăšer-bā’ šāmmâ wəzarə‘wō ywōrišennâ:

25 wəhā‘ămālēqî wəhakəna‘ănî ywōšēḇ bā‘ēmeq māḥār pənû ûsə‘û lāḵem hammiḏəbār dereḵə yam-sûf: f

26 wayəḏabēr yəhwâ ’el-mōšeh wə’el-’ahărōn lē’mōr:

27 ‘aḏ-māṯay lā‘ēḏâ hārā‘â hazzō’ṯ ’ăšer hēmmâ mallînîm ‘ālāy ’eṯ-təlunnwōṯ bənê yiśərā’ēl ’ăšer hēmmâ mallînîm ‘ālay šāmā‘ətî:

28 ’ĕmōr ’ălēhem ḥay-’ānî nə’um-yəhwâ ’im-lō’ ka’ăšer dibarətem bə’āzənāy kēn ’e‘ĕśeh lāḵem:

29 bammiḏəbār hazzeh yipəlû fiḡərêḵem wəḵāl-pəquḏêḵem ləḵāl-misəparəḵem miben ‘eśərîm šānâ wāmā‘əlâ ’ăšer hălînōṯem ‘ālāy:

30 ’im-’atem tāḇō’û ’el-hā’āreṣ ’ăšer nāśā’ṯî ’eṯ-yāḏî ləšakēn ’eṯəḵem bāh kî ’im-kālēḇ ben-yəfunneh wîhwōšu‘a bin-nûn:

31 wəṭapəḵem ’ăšer ’ămarətem lāḇaz yihəyeh wəhēḇê’ṯî ’ōṯām wəyāḏə‘û ’eṯ-hā’āreṣ ’ăšer mə’asətem bāh:

32 ûfiḡərêḵem ’atem yipəlû bammiḏəbār hazzeh:

33 ûḇənêḵem yihəyû rō‘îm bammiḏəbār ’arəbā‘îm šānâ wənāśə’û ’eṯ-zənûṯêḵem ‘aḏ-tōm piḡərêḵem bammiḏəbār:

34 bəmisəpar hayyāmîm ’ăšer-tarətem ’eṯ-hā’āreṣ ’arəbā‘îm ywōm ywōm laššānâ ywōm laššānâ tiśə’û ’eṯ-‘ăwōnōṯêḵem ’arəbā‘îm šānâ wîḏa‘ətem ’eṯ-tənû’āṯî:

35 ’ănî yəhwâ dibarətî ’im-lō’| zō’ṯ ’e‘ĕśeh ləḵāl-hā‘ēḏâ hārā‘â hazzō’ṯ hannwō‘āḏîm ‘ālāy bammiḏəbār hazzeh yitammû wəšām yāmuṯû:

36 wəhā’ănāšîm ’ăšer-šālaḥ mōšeh lāṯûr ’eṯ-hā’āreṣ wayyāšuḇû wayyillwōnû wayyallînû ‘ālāyw ’eṯ-kāl-hā‘ēḏâ ləhwōṣî’ ḏibâ ‘al-hā’āreṣ:

37 wayyāmuṯû hā’ănāšîm mwōṣi’ê ḏibaṯ-hā’āreṣ rā‘â bammagēfâ lifənê yəhwâ:

38 wîhwōšu‘a bin-nûn wəḵālēḇ ben-yəfunneh ḥāyû min-hā’ănāšîm hâēm hahōləḵîm lāṯûr ’eṯ-hā’āreṣ:

39 wayəḏabēr mōšeh ’eṯ-hadəḇārîm hā’ēlleh ’el-kāl-bənê yiśərā’ēl wayyiṯə’abəlû hā‘ām mə’ōḏ:

40 wayyašəkimû ḇabōqer wayya‘ălû ’el-rō’š-hâār lē’mōr hinnennû wə‘ālînû ’el-hammāqwōm ’ăšer-’āmar yəhwâ kî ḥāṭā’nû:

41 wayyō’mer mōšeh lāmmâ zzeh ’atem ‘ōḇərîm ’eṯ-pî yəhwâ wəhiw’ lō’ ṯiṣəlāḥ:

42 ’al-ta‘ălû kî ’ên yəhwâ bəqirəbəḵem wəlō’ tinnāḡəfû lifənê ’ōyəḇêḵem:

43 kî hā‘ămālēqî wəhakəna‘ănî šām lifənêḵem ûnəfalətem beḥāreḇ kî-‘al-kēn šaḇətem mē’aḥărê yəhwâ wəlō’-yihəyeh yəhwâ ‘immāḵem:

44 wayya‘əpilû la‘ălwōṯ ’el-rō’š hâār wa’ărwōn bərîṯ-yəhwâ ûmōšeh lō’-māšû miqqereḇ hammaḥăneh:

45 wayyēreḏ hā‘ămālēqî wəhakəna‘ănî hayyōšēḇ bâār hahû’ wayyakûm wayyakəṯûm ‘aḏ-haḥārəmâ: f


Next: Numbers (Bemidbar) Chapter 15