‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר²

‎2 ‏דַּבֵּ֞ר אֶל־כָּל־עֲדַ֧ת בְּנֵי־יִשְׂרָאֵ֛ל וְאָמַרְתָּ֥ אֲלֵהֶ֖ם קְדֹשִׁ֣ים תִּהְי֑וּ כִּ֣י קָד֔וֹשׁ אֲנִ֖י יְהוָ֥ה אֱלֹהֵיכֶֽם׃

‎3 ‏אִ֣ישׁ אִמּ֤וֹ וְאָבִיו֙ תִּירָ֔אוּ וְאֶת־שַׁבְּתֹתַ֖י תִּשְׁמֹ֑רוּ אֲנִ֖י יְהוָ֥ה אֱלֹהֵיכֶֽם׃

‎4 ‏אַל־תִּפְנוּ֙ אֶל־הָ֣אֱלִילִ֔ים וֵֽאלֹהֵי֙ מַסֵּכָ֔ה לֹ֥א תַעֲשׂ֖וּ לָכֶ֑ם אֲנִ֖י יְהוָ֥ה אֱלֹהֵיכֶֽם׃

‎5 ‏וְכִ֧י תִזְבְּח֛וּ זֶ֥בַח שְׁלָמִ֖ים לַיהוָ֑ה לִֽרְצֹנְכֶ֖ם תִּזְבָּחֻֽהוּ׃

‎6 ‏בְּי֧וֹם זִבְחֲכֶ֛ם יֵאָכֵ֖ל וּמִֽמָּחֳרָ֑ת וְהַנּוֹתָר֙ עַד־י֣וֹם הַשְּׁלִישִׁ֔י בָּאֵ֖שׁ יִשָּׂרֵֽף׃

‎7 ‏וְאִ֛ם הֵאָכֹ֥ל יֵאָכֵ֖ל בַּיּ֣וֹם הַשְּׁלִישִׁ֑י פִּגּ֥וּל ה֖וּא לֹ֥א יֵרָצֶֽה׃

‎8 ‏וְאֹֽכְלָיו֙ עֲוֹנ֣וֹ יִשָּׂ֔א כִּֽי־אֶת־קֹ֥דֶשׁ יְהוָ֖ה חִלֵּ֑ל וְנִכְרְתָ֛ה הַנֶּ֥פֶשׁ הַהִ֖וא מֵעַמֶּֽיהָ׃

‎9 ‏וּֽבְקֻצְרְכֶם֙ אֶת־קְצִ֣יר אַרְצְכֶ֔ם לֹ֧א תְכַלֶּ֛ה פְּאַ֥ת שָׂדְךָ֖ לִקְצֹ֑ר וְלֶ֥קֶט קְצִֽירְךָ֖ לֹ֥א תְלַקֵּֽט׃

‎10 ‏וְכַרְמְךָ֙ לֹ֣א תְעוֹלֵ֔ל וּפֶ֥רֶט כַּרְמְךָ֖ לֹ֣א תְלַקֵּ֑ט לֶֽעָנִ֤י וְלַגֵּר֙ תַּעֲזֹ֣ב אֹתָ֔ם אֲנִ֖י יְהוָ֥ה אֱלֹהֵיכֶֽם׃

‎11 ‏לֹ֖א תִּגְנֹ֑בוּ וְלֹא־תְכַחֲשׁ֥וּ וְלֹֽא־תְשַׁקְּר֖וּ אִ֥ישׁ בַּעֲמִיתֽוֹ׃

‎12 ‏וְלֹֽא־תִשָּׁבְע֥וּ בִשְׁמִ֖י לַשָּׁ֑קֶר וְחִלַּלְתָּ֛ אֶת־שֵׁ֥ם אֱלֹהֶ֖יךָ אֲנִ֥י יְהוָֽה׃

‎13 ‏לֹֽא־תַעֲשֹׁ֥ק אֶת־רֵֽעֲךָ֖ וְלֹ֣א תִגְזֹ֑ל לֹֽא־תָלִ֞ין פְּעֻלַּ֥ת שָׂכִ֛יר אִתְּךָ֖ עַד־בֹּֽקֶר׃

‎14 ‏לֹא־תְקַלֵּ֣ל חֵרֵ֔שׁ וְלִפְנֵ֣י עִוֵּ֔ר לֹ֥א תִתֵּ֖ן מִכְשֹׁ֑ל וְיָרֵ֥אתָ מֵּאֱלֹהֶ֖יךָ אֲנִ֥י יְהוָֽה׃

‎15 ‏לֹא־תַעֲשׂ֥וּ עָ֙וֶל֙ בַּמִּשְׁפָּ֔ט לֹא־תִשָּׂ֣א פְנֵי־דָ֔ל וְלֹ֥א תֶהְדַּ֖ר פְּנֵ֣י גָד֑וֹל בְּצֶ֖דֶק תִּשְׁפֹּ֥ט עֲמִיתֶֽךָ׃

‎16 ‏לֹא־תֵלֵ֤ךְ רָכִיל֙ בְּעַמֶּ֔יךָ לֹ֥א תַעֲמֹ֖ד עַל־דַּ֣ם רֵעֶ֑ךָ אֲנִ֖י יְהוָֽה׃

‎17 ‏לֹֽא־תִשְׂנָ֥א אֶת־אָחִ֖יךָ בִּלְבָבֶ֑ךָ הוֹכֵ֤חַ תּוֹכִ֙יחַ֙ אֶת־עֲמִיתֶ֔ךָ וְלֹא־תִשָּׂ֥א עָלָ֖יו חֵֽטְא׃

‎18 ‏לֹֽא־תִקֹּ֤ם וְלֹֽא־תִטֹּר֙ אֶת־בְּנֵ֣י עַמֶּ֔ךָ וְאָֽהַבְתָּ֥ לְרֵעֲךָ֖ כָּמ֑וֹךָ אֲנִ֖י יְהוָֽה׃

‎19 ‏אֶֽת־חֻקֹּתַי֮ תִּשְׁמֹרוּ֒ בְּהֶמְתְּךָ֙ לֹא־תַרְבִּ֣יעַ כִּלְאַ֔יִם שָׂדְךָ֖ לֹא־תִזְרַ֣ע כִּלְאָ֑יִם וּבֶ֤גֶד כִּלְאַ֙יִם֙ שַֽׁעַטְנֵ֔ז לֹ֥א יַעֲלֶ֖ה עָלֶֽיךָ׃ פ

‎20 ‏וְ֠אִישׁ כִּֽי־יִשְׁכַּ֨ב אֶת־אִשָּׁ֜ה שִׁכְבַת־זֶ֗רַע וְהִ֤וא שִׁפְחָה֙ נֶחֱרֶ֣פֶת לְאִ֔ישׁ וְהָפְדֵּה֙ לֹ֣א נִפְדָּ֔תָה א֥וֹ חֻפְשָׁ֖ה לֹ֣א נִתַּן־לָ֑הּ בִּקֹּ֧רֶת תִּהְיֶ֛ה לֹ֥א יוּמְת֖וּ כִּי־לֹ֥א חֻפָּֽשָׁה׃

‎21 ‏וְהֵבִ֤יא אֶת־אֲשָׁמוֹ֙ לַֽיהוָ֔ה אֶל־פֶּ֖תַח אֹ֣הֶל מוֹעֵ֑ד אֵ֖יל אָשָֽׁם׃

‎22 ‏וְכִפֶּר֩ עָלָ֨יו הַכֹּהֵ֜ן בְּאֵ֤יל הָֽאָשָׁם֙ לִפְנֵ֣י יְהוָ֔ה עַל־חַטָּאת֖וֹ אֲשֶׁ֣ר חָטָ֑א וְנִסְלַ֣ח ל֔וֹ מֵחַטָּאת֖וֹ אֲשֶׁ֥ר חָטָֽא׃ פ

‎23 ‏וְכִי־תָבֹ֣אוּ אֶל־הָאָ֗רֶץ וּנְטַעְתֶּם֙ כָּל־עֵ֣ץ מַאֲכָ֔ל וַעֲרַלְתֶּ֥ם עָרְלָת֖וֹ אֶת־פִּרְי֑וֹ שָׁלֹ֣שׁ שָׁנִ֗ים יִהְיֶ֥ה לָכֶ֛ם עֲרֵלִ֖ים לֹ֥א יֵאָכֵֽל׃

‎24 ‏וּבַשָּׁנָה֙ הָרְבִיעִ֔ת יִהְיֶ֖ה כָּל־פִּרְי֑וֹ קֹ֥דֶשׁ הִלּוּלִ֖ים לַיהוָֽה׃

‎25 ‏וּבַשָּׁנָ֣ה הַחֲמִישִׁ֗ת תֹּֽאכְלוּ֙ אֶת־פִּרְי֔וֹ לְהוֹסִ֥יף לָכֶ֖ם תְּבוּאָת֑וֹ אֲנִ֖י יְהוָ֥ה אֱלֹהֵיכֶֽם׃

‎26 ‏לֹ֥א תֹאכְל֖וּ עַל־הַדָּ֑ם לֹ֥א תְנַחֲשׁ֖וּ וְלֹ֥א תְעוֹנֵֽנוּ׃

‎27 ‏לֹ֣א תַקִּ֔פוּ פְּאַ֖ת רֹאשְׁכֶ֑ם וְלֹ֣א תַשְׁחִ֔ית אֵ֖ת פְּאַ֥ת זְקָנֶֽךָ׃

‎28 ‏וְשֶׂ֣רֶט לָנֶ֗פֶשׁ³ לֹ֤א תִתְּנוּ֙ בִּבְשַׂרְכֶ֔ם וּכְתֹ֣בֶת קַֽעֲקַ֔ע לֹ֥א תִתְּנ֖וּ בָּכֶ֑ם אֲנִ֖י יְהוָֽה׃

‎29 ‏אַל־תְּחַלֵּ֥ל אֶֽת־בִּתְּךָ֖ לְהַזְנוֹתָ֑הּ וְלֹא־תִזְנֶ֣ה הָאָ֔רֶץ וּמָלְאָ֥ה הָאָ֖רֶץ זִמָּֽה׃

‎30 ‏אֶת־שַׁבְּתֹתַ֣י תִּשְׁמֹ֔רוּ וּמִקְדָּשִׁ֖י תִּירָ֑אוּ אֲנִ֖י יְהוָֽה׃

‎31 ‏אַל־תִּפְנ֤וּ אֶל־הָאֹבֹת֙ וְאֶל־הַיִּדְּעֹנִ֔ים אַל־תְּבַקְשׁ֖וּ לְטָמְאָ֣ה בָהֶ֑ם אֲנִ֖י יְהוָ֥ה אֱלֹהֵיכֶֽם׃

‎32 ‏מִפְּנֵ֤י שֵׂיבָה֙ תָּק֔וּם וְהָדַרְתָּ֖ פְּנֵ֣י זָקֵ֑ן וְיָרֵ֥אתָ מֵּאֱלֹהֶ֖יךָ אֲנִ֥י יְהוָֽה׃ פ

‎33 ‏וְכִֽי־יָג֧וּר אִתְּךָ֛ גֵּ֖ר בְּאַרְצְכֶ֑ם לֹ֥א תוֹנ֖וּ אֹתֽוֹ׃

‎34 ‏כְּאֶזְרָ֣ח מִכֶּם֩ יִהְיֶ֨ה לָכֶ֜ם הַגֵּ֣ר׀ הַגָּ֣ר אִתְּכֶ֗ם וְאָהַבְתָּ֥ לוֹ֙ כָּמ֔וֹךָ כִּֽי־גֵרִ֥ים הֱיִיתֶ֖ם בְּאֶ֣רֶץ מִצְרָ֑יִם אֲנִ֖י יְהוָ֥ה אֱלֹהֵיכֶֽם׃

‎35 ‏לֹא־תַעֲשׂ֥וּ עָ֖וֶל בַּמִּשְׁפָּ֑ט בַּמִּדָּ֕ה בַּמִּשְׁקָ֖ל וּבַמְּשׂוּרָֽה׃

‎36 ‏מֹ֧אזְנֵי צֶ֣דֶק אַבְנֵי־צֶ֗דֶק אֵ֥יפַת צֶ֛דֶק וְהִ֥ין צֶ֖דֶק יִהְיֶ֣ה לָכֶ֑ם אֲנִי֙ יְהוָ֣ה אֱלֹֽהֵיכֶ֔ם אֲשֶׁר־הוֹצֵ֥אתִי אֶתְכֶ֖ם מֵאֶ֥רֶץ מִצְרָֽיִם׃

‎37 ‏וּשְׁמַרְתֶּ֤ם אֶת־כָּל־חֻקֹּתַי֙ וְאֶת־כָּל־מִשְׁפָּטַ֔י וַעֲשִׂיתֶ֖ם³ אֹתָ֑ם אֲנִ֖י יְהוָֽה׃ פ

1 wayəḏabēr yəhwâ ’el-mōšeh llē’mōr²

2 dabēr ’el-kāl-‘ăḏaṯ bənê-yiśərā’ēl wə’āmarətā ’ălēhem qəḏōšîm tihəyû kî qāḏwōš ’ănî yəhwâ ’ĕlōhêḵem:

3 ’îš ’immwō wə’āḇîw tîrā’û wə’eṯ-šabəṯōṯay tišəmōrû ’ănî yəhwâ ’ĕlōhêḵem:

4 ’al-tifənû ’el-hā’ĕlîlîm wē’lōhê massēḵâ lō’ ṯ^a‘ăśû lāḵem ’ănî yəhwâ ’ĕlōhêḵem:

5 wəḵî ṯizəbəḥû zeḇ^aḥ šəlāmîm layhwâ lirəṣōnəḵem tizəbāḥuhû:

6 bəywōm ziḇəḥăḵem yē’āḵēl ûmimmāḥŏrāṯ wəhannwōṯār ‘aḏ-ywōm haššəlîšî bā’ēš yiśśārēf:

7 wə’im hē’āḵōl yē’āḵēl bayywōm haššəlîšî pigûl hû’ lō’ yērāṣeh:

8 wə’ōḵəlāyw ‘ăwōnwō yiśśā’ kî-’eṯ-qōḏeš yəhwâ ḥillēl wəniḵərəṯâ hannefeš hahiw’ mē‘ammeyhā:

9 ûḇəquṣərəḵem ’eṯ-qəṣîr ’arəṣəḵem lō’ ṯəḵalleh pə’aṯ śāḏəḵā liqəṣōr wəleqeṭ qəṣîrəḵā lō’ ṯəlaqqēṭ:

10 wəḵarəməḵā lō’ ṯə‘wōlēl ûfereṭ karəməḵā lō’ ṯəlaqqēṭ le‘ānî wəlagēr t^a‘ăzōḇ ’ōṯām ’ănî yəhwâ ’ĕlōhêḵem:

11 lō’ tiḡənōḇû wəlō’-ṯəḵ^aḥăšû wəlō’-ṯəšaqqərû ’îš b^a‘ămîṯwō:

12 wəlō’-ṯiššāḇə‘û ḇišəmî laššāqer wəḥillalətā ’eṯ-šēm ’ĕlōheyḵā ’ănî yəhwâ:

13 lō’-ṯ^a‘ăšōq ’eṯ-rē‘ăḵā wəlō’ ṯiḡəzōl lō’-ṯālîn pə‘ullaṯ śāḵîr ’itəḵā ‘aḏ-bōqer:

14 lō’-ṯəqallēl ḥērēš wəlifənê ‘iûēr lō’ ṯitēn miḵəšōl wəyārē’ṯā mmē’ĕlōheyḵā ’ănî yəhwâ:

15 lō’-ṯ^a‘ăśû ‘āwel bammišəpāṭ lō’-ṯiśśā’ fənê-ḏāl wəlō’ ṯehədar pənê ḡāḏwōl bəṣeḏeq tišəpōṭ ‘ămîṯeḵā:

16 lō’-ṯēlēḵə rāḵîl bə‘ammeyḵā lō’ ṯ^a‘ămōḏ ‘al-dam rē‘eḵā ’ănî yəhwâ:

17 lō’-ṯiśənā’ ’eṯ-’āḥîḵā biləḇāḇeḵā hwōḵēḥa twōḵîḥa ’eṯ-‘ămîṯeḵā wəlō’-ṯiśśā’ ‘ālāyw ḥēṭə’:

18 lō’-ṯiqqōm wəlō’-ṯiṭṭōr ’eṯ-bənê ‘ammeḵā wə’âaḇətā lərē‘ăḵā kāmwōḵā ’ănî yəhwâ:

19 ’eṯ-ḥuqqōṯay tišəmōrû bəhemətəḵā lō’-ṯarəbî‘a kilə’ayim śāḏəḵā lō’-ṯizər^a‘ kilə’āyim ûḇeḡeḏ kilə’ayim š^a‘aṭənēz lō’ y^a‘ăleh ‘āleyḵā: f

20 wə’îš kî-yišəkaḇ ’eṯ-’iššâ šiḵəḇaṯ-zer^a‘ wəhiw’ šifəḥâ neḥĕrefeṯ lə’îš wəhāfədēh lō’ nifədāṯâ ’wō ḥufəšâ lō’ nitan-lāh biqqōreṯ tihəyeh lō’ yûməṯû kî-lō’ ḥupāšâ:

21 wəhēḇî’ ’eṯ-’ăšāmwō layhwâ ’el-peṯ^aḥ ’ōhel mwō‘ēḏ ’êl ’āšām:

22 wəḵiper ‘ālāyw hakōhēn bə’êl hā’āšām lifənê yəhwâ ‘al-ḥaṭṭā’ṯwō ’ăšer ḥāṭā’ wənisəl^aḥ lwō mēḥaṭṭā’ṯwō ’ăšer ḥāṭā’: f

23 wəḵî-ṯāḇō’û ’el-hā’āreṣ ûnəṭ^a‘ətem kāl-‘ēṣ ma’ăḵāl w^a‘ăralətem ‘ārəlāṯwō ’eṯ-pirəywō šālōš šānîm yihəyeh lāḵem ‘ărēlîm lō’ yē’āḵēl:

24 ûḇaššānâ hārəḇî‘iṯ yihəyeh kāl-pirəywō qōḏeš hillûlîm layhwâ:

25 ûḇaššānâ h^aḥămîšiṯ tō’ḵəlû ’eṯ-pirəywō ləhwōsîf lāḵem təḇû’āṯwō ’ănî yəhwâ ’ĕlōhêḵem:

26 lō’ ṯō’ḵəlû ‘al-hadām lō’ ṯən^aḥăšû wəlō’ ṯə‘wōnēnû:

27 lō’ ṯaqqifû pə’aṯ rō’šəḵem wəlō’ ṯašəḥîṯ ’ēṯ pə’aṯ zəqāneḵā:

28 wəśereṭ lānefeš³ lō’ ṯitənû biḇəśarəḵem ûḵəṯōḇeṯ q^a‘ăq^a‘ lō’ ṯitənû bāḵem ’ănî yəhwâ:

29 ’al-təḥallēl ’eṯ-bitəḵā ləhazənwōṯāh wəlō’-ṯizəneh hā’āreṣ ûmālə’â hā’āreṣ zimmâ:

30 ’eṯ-šabəṯōṯay tišəmōrû ûmiqədāšî tîrā’û ’ănî yəhwâ:

31 ’al-tifənû ’el-hā’ōḇōṯ wə’el-hayyidə‘ōnîm ’al-təḇaqəšû ləṭāmə’â ḇâem ’ănî yəhwâ ’ĕlōhêḵem:

32 mipənê śêḇâ tāqûm wəhāḏarətā pənê zāqēn wəyārē’ṯā mmē’ĕlōheyḵā ’ănî yəhwâ: f

33 wəḵî-yāḡûr ’itəḵā gēr bə’arəṣəḵem lō’ ṯwōnû ’ōṯwō:

34 kə’ezərāḥ mikem yihəyeh lāḵem hagēr| hagār ’itəḵem wə’âaḇətā lwō kāmwōḵā kî-ḡērîm hĕyîṯem bə’ereṣ miṣərāyim ’ănî yəhwâ ’ĕlōhêḵem:

35 lō’-ṯ^a‘ăśû ‘āwel bammišəpāṭ bammidâ bammišəqāl ûḇamməśûrâ:

36 mō’zənê ṣeḏeq ’aḇənê-ṣeḏeq ’êfaṯ ṣeḏeq wəhîn ṣeḏeq yihəyeh lāḵem ’ănî yəhwâ ’ĕlōhêḵem ’ăšer-hwōṣē’ṯî ’eṯəḵem mē’ereṣ miṣərāyim:

37 ûšəmarətem ’eṯ-kāl-ḥuqqōṯay wə’eṯ-kāl-mišəpāṭay w^a‘ăśîṯem³ ’ōṯām ’ănî yəhwâ: f