Sacred Texts  Bible  Index 
Polyglot  KJV  Sep  Vul 

2 Kings (2 Melakhim) Index
  Previous  Next 

Tanach (Hebrew): 2 Kings (2 Melakhim) Chapter 12

1 ‏בֶּן־שֶׁ֥בַע שָׁנִ֖ים יְהוֹאָ֥שׁ בְּמָלְכֽוֹ׃ פ

2 ‏בִּשְׁנַת־שֶׁ֤בַע לְיֵהוּא֙ מָלַ֣ךְ יְהוֹאָ֔שׁ וְאַרְבָּעִ֣ים שָׁנָ֔ה מָלַ֖ךְ בִּירֽוּשָׁלִָ֑ם וְשֵׁ֣ם אִמּ֔וֹ צִבְיָ֖ה מִבְּאֵ֥ר שָֽׁבַע׃

3 ‏וַיַּ֨עַשׂ יְהוֹאָ֧שׁ הַיָּשָׁ֛ר בְּעֵינֵ֥י יְהוָ֖ה כָּל־יָמָ֑יו אֲשֶׁ֣ר הוֹרָ֔הוּ יְהוֹיָדָ֖ע הַכֹּהֵֽן׃

4 ‏רַ֥ק הַבָּמ֖וֹת לֹא־סָ֑רוּ ע֥וֹד הָעָ֛ם מְזַבְּחִ֥ים וּֽמְקַטְּרִ֖ים בַּבָּמֽוֹת׃

5 ‏וַיֹּ֨אמֶר יְהוֹאָ֜שׁ אֶל־הַכֹּהֲנִ֗ים כֹּל֩ כֶּ֨סֶף הַקֳּדָשִׁ֜ים אֲשֶׁר־יוּבָ֤א בֵית־יְהוָה֙ כֶּ֣סֶף עוֹבֵ֔ר אִ֕ישׁ כֶּ֥סֶף נַפְשׁ֖וֹת עֶרְכּ֑וֹ כָּל־כֶּ֗סֶף אֲשֶׁ֤ר יַֽעֲלֶה֙ עַ֣ל לֶב־אִ֔ישׁ לְהָבִ֖יא בֵּ֥ית יְהוָֽה׃

6 ‏יִקְח֤וּ לָהֶם֙ הַכֹּ֣הֲנִ֔ים אִ֖ישׁ מֵאֵ֣ת מַכָּר֑וֹ וְהֵ֗ם יְחַזְּקוּ֙ אֶת־בֶּ֣דֶק הַבַּ֔יִת לְכֹ֛ל אֲשֶׁר־יִמָּצֵ֥א שָׁ֖ם בָּֽדֶק׃ פ

7 ‏וַיְהִ֗י בִּשְׁנַ֨ת עֶשְׂרִ֧ים וְשָׁלֹ֛שׁ שָׁנָ֖ה לַמֶּ֣לֶךְ יְהוֹאָ֑שׁ לֹֽא־חִזְּק֥וּ הַכֹּהֲנִ֖ים אֶת־בֶּ֥דֶק הַבָּֽיִת׃

8 ‏וַיִּקְרָא֩ הַמֶּ֨לֶךְ יְהוֹאָ֜שׁ לִיהוֹיָדָ֤ע הַכֹּהֵן֙ וְלַכֹּ֣הֲנִ֔ים וַיֹּ֣אמֶר אֲלֵהֶ֔ם מַדּ֛וּעַ אֵינְכֶ֥ם מְחַזְּקִ֖ים אֶת־בֶּ֣דֶק הַבָּ֑יִת וְעַתָּ֗ה אַל־תִּקְחוּ־כֶ֙סֶף֙ מֵאֵ֣ת מַכָּֽרֵיכֶ֔ם כִּֽי־לְבֶ֥דֶק הַבַּ֖יִת תִּתְּנֻֽהוּ׃

9 ‏וַיֵּאֹ֖תוּ הַכֹּֽהֲנִ֑ים לְבִלְתִּ֤י קְחַת־כֶּ֙סֶף֙ מֵאֵ֣ת הָעָ֔ם וּלְבִלְתִּ֥י חַזֵּ֖ק אֶת־בֶּ֥דֶק הַבָּֽיִת׃

10 ‏וַיִּקַּ֞ח יְהוֹיָדָ֤ע הַכֹּהֵן֙ אֲר֣וֹן אֶחָ֔ד וַיִּקֹּ֥ב חֹ֖ר בְּדַלְתּ֑וֹ וַיִּתֵּ֣ן אֹתוֹ֩ אֵ֨צֶל הַמִּזְבֵּ֜חַ בימין מִיָּמִ֗ין בְּבֽוֹא־אִישׁ֙ בֵּ֣ית יְהוָ֔ה וְנָֽתְנוּ־שָׁ֤מָּה הַכֹּֽהֲנִים֙ שֹׁמְרֵ֣י הַסַּ֔ף אֶת־כָּל־הַכֶּ֖סֶף הַמּוּבָ֥א בֵית־יְהוָֽה׃

11 ‏וַֽיְהִי֙ כִּרְאוֹתָ֔ם כִּֽי־רַ֥ב הַכֶּ֖סֶף בָּֽאָר֑וֹן וַיַּ֨עַל סֹפֵ֤ר הַמֶּ֙לֶךְ֙ וְהַכֹּהֵ֣ן הַגָּד֔וֹל וַיָּצֻ֙רוּ֙ וַיִּמְנ֔וּ אֶת־הַכֶּ֖סֶף הַנִּמְצָ֥א בֵית־יְהוָֽה׃

12 ‏וְנָתְנוּ֙ אֶת־הַכֶּ֣סֶף הַֽמְתֻכָּ֔ן עַל־יד יְדֵי֙ עֹשֵׂ֣י הַמְּלָאכָ֔ה הפקדים הַמֻּפְקָדִ֖ים בֵּ֣ית יְהוָ֑ה וַיּוֹצִיאֻ֜הוּ לְחָרָשֵׁ֤י הָעֵץ֙ וְלַבֹּנִ֔ים הָעֹשִׂ֖ים בֵּ֥ית יְהוָֽה׃

13 ‏וְלַגֹּֽדְרִים֙ וּלְחֹצְבֵ֣י הָאֶ֔בֶן וְלִקְנ֤וֹת עֵצִים֙ וְאַבְנֵ֣י מַחְצֵ֔ב לְחַזֵּ֖ק אֶת־בֶּ֣דֶק בֵּית־יְהוָ֑ה וּלְכֹ֛ל אֲשֶׁר־יֵצֵ֥א עַל־הַבַּ֖יִת לְחָזְקָֽה׃

14 ‏אַךְ֩ לֹ֨א יֵעָשֶׂ֜ה בֵּ֣ית יְהוָ֗ה סִפּ֥וֹת כֶּ֙סֶף֙ מְזַמְּר֤וֹת מִזְרָקוֹת֙ חֲצֹ֣צְר֔וֹת כָּל־כְּלִ֥י זָהָ֖ב וּכְלִי־כָ֑סֶף מִן־הַכֶּ֖סֶף הַמּוּבָ֥א בֵית־יְהוָֽה׃

15 ‏כִּֽי־לְעֹשֵׂ֥י הַמְּלָאכָ֖ה יִתְּנֻ֑הוּ וְחִזְּקוּ־ב֖וֹ אֶת־בֵּ֥ית יְהוָֽה׃

16 ‏וְלֹ֧א יְחַשְּׁב֣וּ אֶת־הָאֲנָשִׁ֗ים אֲשֶׁ֨ר יִתְּנ֤וּ אֶת־הַכֶּ֙סֶף֙ עַל־יָדָ֔ם לָתֵ֖ת לְעֹשֵׂ֣י הַמְּלָאכָ֑ה כִּ֥י בֶאֱמֻנָ֖ה הֵ֥ם עֹשִֽׂים׃

17 ‏כֶּ֤סֶף אָשָׁם֙ וְכֶ֣סֶף חַטָּא֔וֹת לֹ֥א יוּבָ֖א בֵּ֣ית יְהוָ֑ה לַכֹּהֲנִ֖ים יִהְיֽוּ׃ פ

18 ‏אָ֣ז יַעֲלֶ֗ה חֲזָאֵל֙ מֶ֣לֶךְ אֲרָ֔ם וַיִּלָּ֥חֶם עַל־גַּ֖ת וַֽיִּלְכְּדָ֑הּ וַיָּ֤שֶׂם חֲזָאֵל֙ פָּנָ֔יו לַעֲל֖וֹת עַל־יְרוּשָׁלִָֽם׃

19 ‏וַיִּקַּ֞ח יְהוֹאָ֣שׁ מֶֽלֶךְ־יְהוּדָ֗ה אֵ֣ת כָּל־הַקֳּדָשִׁ֡ים אֲשֶׁר־הִקְדִּ֣ישׁוּ יְהוֹשָׁפָ֣ט וִיהוֹרָם֩ וַאֲחַזְיָ֨הוּ אֲבֹתָ֜יו מַלְכֵ֤י יְהוּדָה֙ וְאֶת־קֳדָשָׁ֔יו וְאֵ֣ת כָּל־הַזָּהָ֗ב הַנִּמְצָ֛א בְּאֹצְר֥וֹת בֵּית־יְהוָ֖ה וּבֵ֣ית הַמֶּ֑לֶךְ וַיִּשְׁלַ֗ח לַֽחֲזָאֵל֙ מֶ֣לֶךְ אֲרָ֔ם וַיַּ֖עַל מֵעַ֥ל יְרוּשָׁלִָֽם׃

20 ‏וְיֶ֛תֶר דִּבְרֵ֥י יוֹאָ֖שׁ וְכָל־אֲשֶׁ֣ר עָשָׂ֑ה הֲלוֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יְהוּדָֽה׃

21 ‏וַיָּקֻ֥מוּ עֲבָדָ֖יו וַיִּקְשְׁרֽוּ־קָ֑שֶׁר וַיַּכּוּ֙ אֶת־יוֹאָ֔שׁ בֵּ֥ית מִלֹּ֖א הַיּוֹרֵ֥ד סִלָּֽא׃

22 ‏וְיוֹזָבָ֣ד בֶּן־שִׁ֠מְעָת וִיהוֹזָבָ֨ד בֶּן־שֹׁמֵ֤ר׀ עֲבָדָיו֙ הִכֻּ֣הוּ וַיָּמֹ֔ת וַיִּקְבְּר֥וּ אֹת֛וֹ עִם־אֲבֹתָ֖יו בְּעִ֣יר דָּוִ֑ד וַיִּמְלֹ֛ךְ אֲמַצְיָ֥ה בְנ֖וֹ תַּחְתָּֽיו׃ פ

1 ben-šeḇa‘ šānîm yəhwō’āš bəmāləḵwō: f

2 bišənaṯ-šeḇa‘ ləyēhû’ mālaḵə yəhwō’āš wə’arəbā‘îm šānâ mālaḵə bîrûšālāim wəšēm ’immwō ṣiḇəyâ mibə’ēr šāḇa‘:

3 wayya‘aś yəhwō’āš hayyāšār bə‘ênê yəhwâ kāl-yāmāyw ’ăšer hwōrâû yəhwōyāḏā‘ hakōhēn:

4 raq habāmwōṯ lō’-sārû ‘wōḏ hā‘ām məzabəḥîm ûməqaṭṭərîm babāmwōṯ:

5 wayyō’mer yəhwō’āš ’el-hakōhănîm kōl kesef haqqŏḏāšîm ’ăšer-yûḇā’ ḇêṯ-yəhwâ kesef ‘wōḇēr ’îš kesef nafəšwōṯ ‘erəkwō kāl-kesef ’ăšer ya‘ăleh ‘al leḇ-’îš ləhāḇî’ bêṯ yəhwâ:

6 yiqəḥû lâem hakōhănîm ’îš mē’ēṯ makārwō wəhēm yəḥazzəqû ’eṯ-beḏeq habayiṯ ləḵōl ’ăšer-yimmāṣē’ šām bāḏeq: f

7 wayəhî bišənaṯ ‘eśərîm wəšālōš šānâ lammeleḵə yəhwō’āš lō’-ḥizzəqû hakōhănîm ’eṯ-beḏeq habāyiṯ:

8 wayyiqərā’ hammeleḵə yəhwō’āš lîhwōyāḏā‘ hakōhēn wəlakōhănîm wayyō’mer ’ălēhem madû‘a ’ênəḵem məḥazzəqîm ’eṯ-beḏeq habāyiṯ wə‘atâ ’al-tiqəḥû-ḵesef mē’ēṯ makārêḵem kî-ləḇeḏeq habayiṯ titənuhû:

9 wayyē’ōṯû hakōhănîm ləḇilətî qəḥaṯ-kesef mē’ēṯ hā‘ām ûləḇilətî ḥazzēq ’eṯ-beḏeq habāyiṯ:

10 wayyiqqaḥ yəhwōyāḏā‘ hakōhēn ’ărwōn ’eḥāḏ wayyiqqōḇ ḥōr bəḏalətwō wayyitēn ’ōṯwō ’ēṣel hammizəbēḥa bayyāmîn mîyāmîn bəḇwō’-’îš bêṯ yəhwâ wənāṯənû-šāmmâ hakōhănîm šōmərê hassaf ’eṯ-kāl-hakesef hammûḇā’ ḇêṯ-yəhwâ:

11 wayəhî kirə’wōṯām kî-raḇ hakesef bā’ārwōn wayya‘al sōfēr hammeleḵə wəhakōhēn hagāḏwōl wayyāṣurû wayyimənû ’eṯ-hakesef hanniməṣā’ ḇêṯ-yəhwâ:

12 wənāṯənû ’eṯ-hakesef haməṯukān ‘al-yaḏ yəḏê ‘ōśê hamməlā’ḵâ hapəquḏîm hammufəqāḏîm bêṯ yəhwâ wayywōṣî’uhû ləḥārāšê hā‘ēṣ wəlabōnîm hā‘ōśîm bêṯ yəhwâ:

13 wəlagōḏərîm ûləḥōṣəḇê hā’eḇen wəliqənwōṯ ‘ēṣîm wə’aḇənê maḥəṣēḇ ləḥazzēq ’eṯ-beḏeq bêṯ-yəhwâ ûləḵōl ’ăšer-yēṣē’ ‘al-habayiṯ ləḥāzəqâ:

14 ’aḵə lō’ yē‘āśeh bêṯ yəhwâ sipwōṯ kesef məzammərwōṯ mizərāqwōṯ ḥăṣōṣərwōṯ kāl-kəlî zâāḇ ûḵəlî-ḵāsef min-hakesef hammûḇā’ ḇêṯ-yəhwâ:

15 kî-lə‘ōśê hamməlā’ḵâ yitənuhû wəḥizzəqû-ḇwō ’eṯ-bêṯ yəhwâ:

16 wəlō’ yəḥaššəḇû ’eṯ-hā’ănāšîm ’ăšer yitənû ’eṯ-hakesef ‘al-yāḏām lāṯēṯ lə‘ōśê hamməlā’ḵâ kî ḇe’ĕmunâ hēm ‘ōśîm:

17 kesef ’āšām wəḵesef ḥaṭṭā’wōṯ lō’ yûḇā’ bêṯ yəhwâ lakōhănîm yihəyû: f

18 ’āz ya‘ăleh ḥăzā’ēl meleḵə ’ărām wayyillāḥem ‘al-gaṯ wayyiləkəḏāh wayyāśem ḥăzā’ēl pānāyw la‘ălwōṯ ‘al-yərûšālāim:

19 wayyiqqaḥ yəhwō’āš meleḵə-yəhûḏâ ’ēṯ kāl-haqqŏḏāšîm ’ăšer-hiqədîšû yəhwōšāfāṭ wîhwōrām wa’ăḥazəyâû ’ăḇōṯāyw maləḵê yəhûḏâ wə’eṯ-qŏḏāšāyw wə’ēṯ kāl-hazzâāḇ hanniməṣā’ bə’ōṣərwōṯ bêṯ-yəhwâ ûḇêṯ hammeleḵə wayyišəlaḥ laḥăzā’ēl meleḵə ’ărām wayya‘al mē‘al yərûšālāim:

20 wəyeṯer diḇərê ywō’āš wəḵāl-’ăšer ‘āśâ hălwō’-hēm kəṯûḇîm ‘al-sēfer diḇərê hayyāmîm ləmaləḵê yəhûḏâ:

21 wayyāqumû ‘ăḇāḏāyw wayyiqəšərû-qāšer wayyakû ’eṯ-ywō’āš bêṯ millō’ hayywōrēḏ sillā’:

22 wəywōzāḇāḏ ben-šimə‘āṯ wîhwōzāḇāḏ ben-šōmēr| ‘ăḇāḏāyw hikuhû wayyāmōṯ wayyiqəbərû ’ōṯwō ‘im-’ăḇōṯāyw bə‘îr dāwiḏ wayyiməlōḵə ’ămaṣəyâ ḇənwō taḥətāyw: f


Next: 2 Kings (2 Melakhim) Chapter 13