Sacred Texts  Bible  Index 
Polyglot  KJV  Sep  Vul 

2 Kings (2 Melakhim) Index
  Previous  Next 

Tanach (Hebrew): 2 Kings (2 Melakhim) Chapter 3

1 ‏וִיהוֹרָ֣ם בֶּן־אַחְאָ֗ב מָלַ֤ךְ עַל־יִשְׂרָאֵל֙ בְּשֹׁ֣מְר֔וֹן בִּשְׁנַת֙ שְׁמֹנֶ֣ה עֶשְׂרֵ֔ה לִיהוֹשָׁפָ֖ט מֶ֣לֶךְ יְהוּדָ֑ה וַיִּמְלֹ֖ךְ שְׁתֵּים־עֶשְׂרֵ֥ה שָׁנָֽה׃

2 ‏וַיַּעֲשֶׂ֤ה הָרַע֙ בְּעֵינֵ֣י יְהוָ֔ה רַ֕ק לֹ֥א כְאָבִ֖יו וּכְאִמּ֑וֹ וַיָּ֙סַר֙ אֶת־מַצְּבַ֣ת הַבַּ֔עַל אֲשֶׁ֥ר עָשָׂ֖ה אָבִֽיו׃

3 ‏רַ֠ק בְּחַטֹּ֞אות יָרָבְעָ֧ם בֶּֽן־נְבָ֛ט אֲשֶׁר־הֶחֱטִ֥יא אֶת־יִשְׂרָאֵ֖ל דָּבֵ֑ק לֹא־סָ֖ר מִמֶּֽנָּה׃ ס

4 ‏וּמֵישַׁ֥ע מֶֽלֶךְ־מוֹאָ֖ב הָיָ֣ה נֹקֵ֑ד וְהֵשִׁ֤יב לְמֶֽלֶךְ־יִשְׂרָאֵל֙ מֵאָה־אֶ֣לֶף כָּרִ֔ים וּמֵ֥אָה אֶ֖לֶף אֵילִ֥ים צָֽמֶר׃

5 ‏וַיְהִ֖י כְּמ֣וֹת אַחְאָ֑ב וַיִּפְשַׁ֥ע מֶֽלֶךְ־מוֹאָ֖ב בְּמֶ֥לֶךְ יִשְׂרָאֵֽל׃

6 ‏וַיֵּצֵ֞א הַמֶּ֧לֶךְ יְהוֹרָ֛ם בַּיּ֥וֹם הַה֖וּא מִשֹּׁמְר֑וֹן וַיִּפְקֹ֖ד אֶת־כָּל־יִשְׂרָאֵֽל׃

7 ‏וַיֵּ֡לֶךְ וַיִּשְׁלַח֩ אֶל־יְהוֹשָׁפָ֨ט מֶֽלֶךְ־יְהוּדָ֜ה לֵאמֹ֗ר מֶ֤לֶךְ מוֹאָב֙ פָּשַׁ֣ע בִּ֔י הֲתֵלֵ֥ךְ אִתִּ֛י אֶל־מוֹאָ֖ב לַמִּלְחָמָ֑ה וַיֹּ֣אמֶר אֶעֱלֶ֔ה כָּמ֧וֹנִי כָמ֛וֹךָ כְּעַמִּ֥י כְעַמֶּ֖ךָ כְּסוּסַ֥י כְּסוּסֶֽיךָ׃

8 ‏וַיֹּ֕אמֶר אֵי־זֶ֥ה הַדֶּ֖רֶךְ נַעֲלֶ֑ה וַיֹּ֕אמֶר דֶּ֖רֶךְ מִדְבַּ֥ר אֱדֽוֹם׃

9 ‏וַיֵּלֶךְ֩ מֶ֨לֶךְ יִשְׂרָאֵ֤ל וּמֶֽלֶך־יְהוּדָה֙1 וּמֶ֣לֶךְ אֱד֔וֹם וַיָּסֹ֕בּוּ דֶּ֖רֶךְ שִׁבְעַ֣ת יָמִ֑ים וְלֹא־הָיָ֨ה מַ֧יִם לַֽמַּחֲנֶ֛ה וְלַבְּהֵמָ֖ה אֲשֶׁ֥ר בְּרַגְלֵיהֶֽם׃

10 ‏וַיֹּ֖אמֶר מֶ֣לֶךְ יִשְׂרָאֵ֑ל אֲהָ֕הּ כִּֽי־קָרָ֣א יְהוָ֗ה לִשְׁלֹ֙שֶׁת֙3 הַמְּלָכִ֣ים הָאֵ֔לֶּה לָתֵ֥ת אוֹתָ֖ם בְּיַד־מוֹאָֽב׃

11 ‏וַיֹּ֣אמֶר יְהוֹשָׁפָ֗ט הַאֵ֨ין פֹּ֤ה נָבִיא֙ לַֽיהוָ֔ה וְנִדְרְשָׁ֥ה אֶת־יְהוָ֖ה מֵאוֹת֑וֹ וַ֠יַּעַן אֶחָ֞ד מֵעַבְדֵ֤י מֶֽלֶךְ־יִשְׂרָאֵל֙ וַיֹּ֔אמֶר פֹּ֚ה אֱלִישָׁ֣ע בֶּן־שָׁפָ֔ט אֲשֶׁר־יָ֥צַק מַ֖יִם עַל־יְדֵ֥י אֵלִיָּֽהוּ׃

12 ‏וַיֹּ֙אמֶר֙ יְה֣וֹשָׁפָ֔ט יֵ֥שׁ אוֹת֖וֹ דְּבַר־יְהוָ֑ה וַיֵּרְד֣וּ אֵלָ֗יו מֶ֧לֶךְ יִשְׂרָאֵ֛ל וִיהוֹשָׁפָ֖ט וּמֶ֥לֶךְ אֱדֽוֹם׃

13 ‏וַיֹּ֨אמֶר אֱלִישָׁ֜ע אֶל־מֶ֤לֶךְ יִשְׂרָאֵל֙ מַה־לִּ֣י וָלָ֔ךְ לֵ֚ךְ אֶל־נְבִיאֵ֣י אָבִ֔יךָ וְאֶל־נְבִיאֵ֖י אִמֶּ֑ךָ וַיֹּ֤אמֶר לוֹ֙ מֶ֣לֶךְ יִשְׂרָאֵ֔ל אַ֗ל כִּֽי־קָרָ֤א יְהוָה֙ לִשְׁלֹ֙שֶׁת֙ הַמְּלָכִ֣ים הָאֵ֔לֶּה לָתֵ֥ת אוֹתָ֖ם בְּיַד־מוֹאָֽב׃

14 ‏וַיֹּ֣אמֶר אֱלִישָׁ֗ע חַי־יְהוָ֤ה צְבָאוֹת֙ אֲשֶׁ֣ר עָמַ֣דְתִּי לְפָנָ֔יו כִּ֗י לוּלֵ֛י פְּנֵ֛י יְהוֹשָׁפָ֥ט מֶֽלֶךְ־יְהוּדָ֖ה אֲנִ֣י נֹשֵׂ֑א אִם־אַבִּ֥יט אֵלֶ֖יךָ וְאִם־אֶרְאֶֽךָּ׃

15 ‏וְעַתָּ֖ה קְחוּ־לִ֣י מְנַגֵּ֑ן וְהָיָה֙ כְּנַגֵּ֣ן הַֽמְנַגֵּ֔ן וַתְּהִ֥י עָלָ֖יו יַד־יְהוָֽה׃

16 ‏וַיֹּ֕אמֶר כֹּ֖ה אָמַ֣ר יְהוָ֑ה עָשֹׂ֛ה הַנַּ֥חַל הַזֶּ֖ה גֵּבִ֥ים׀ גֵּבִֽים׃

17 ‏כִּֽי־כֹ֣ה׀ אָמַ֣ר יְהוָ֗ה לֹֽא־תִרְא֥וּ ר֙וּחַ֙ וְלֹֽא־תִרְא֣וּ גֶ֔שֶׁם וְהַנַּ֥חַל הַה֖וּא יִמָּ֣לֵא מָ֑יִם וּשְׁתִיתֶ֛ם אַתֶּ֥ם וּמִקְנֵיכֶ֖ם וּֽבְהֶמְתְּכֶֽם׃

18 ‏וְנָקַ֥ל זֹ֖את בְּעֵינֵ֣י יְהוָ֑ה וְנָתַ֥ן אֶת־מוֹאָ֖ב בְּיֶדְכֶֽם׃

19 ‏וְהִכִּיתֶ֞ם כָּל־עִ֤יר מִבְצָר֙ וְכָל־עִ֣יר מִבְח֔וֹר וְכָל־עֵ֥ץ טוֹב֙ תַּפִּ֔ילוּ וְכָל־מַעְיְנֵי־מַ֖יִם תִּסְתֹּ֑מוּ וְכֹל֙ הַחֶלְקָ֣ה הַטּוֹבָ֔ה תַּכְאִ֖בוּ בָּאֲבָנִֽים׃

20 ‏וַיְהִ֤י בַבֹּ֙קֶר֙ כַּעֲל֣וֹת הַמִּנְחָ֔ה וְהִנֵּה־מַ֥יִם בָּאִ֖ים מִדֶּ֣רֶךְ אֱד֑וֹם וַתִּמָּלֵ֥א הָאָ֖רֶץ אֶת־הַמָּֽיִם׃

21 ‏וְכָל־מוֹאָב֙ שָֽׁמְע֔וּ כִּֽי־עָל֥וּ הַמְּלָכִ֖ים לְהִלָּ֣חֶם בָּ֑ם וַיִּצָּעֲק֗וּ מִכֹּ֨ל חֹגֵ֤ר חֲגֹרָה֙ וָמַ֔עְלָה וַיַּעַמְד֖וּ עַֽל־הַגְּבֽוּל׃

22 ‏וַיַּשְׁכִּ֣ימוּ בַבֹּ֔קֶר וְהַשֶּׁ֖מֶשׁ זָרְחָ֣ה עַל־הַמָּ֑יִם וַיִּרְא֨וּ מוֹאָ֥ב מִנֶּ֛גֶד אֶת־הַמַּ֖יִם אֲדֻמִּ֥ים כַּדָּֽם׃

23 ‏וַיֹּֽאמְרוּ֙ דָּ֣ם זֶ֔ה הָחֳרֵ֤ב נֶֽחֶרְבוּ֙ הַמְּלָכִ֔ים וַיַּכּ֖וּ אִ֣ישׁ אֶת־רֵעֵ֑הוּ וְעַתָּ֥ה לַשָּׁלָ֖ל מוֹאָֽב׃

24 ‏וַיָּבֹאוּ֮ אֶל־מַחֲנֵ֣ה יִשְׂרָאֵל֒ וַיָּקֻ֤מוּ יִשְׂרָאֵל֙ וַיַּכּ֣וּ אֶת־מוֹאָ֔ב וַיָּנֻ֖סוּ מִפְּנֵיהֶ֑ם ויבו־ וַיַּכּוּ־ בָ֔הּ וְהַכּ֖וֹת אֶת־מוֹאָֽב׃

25 ‏וְהֶעָרִ֣ים יַהֲרֹ֡סוּ וְכָל־חֶלְקָ֣ה ט֠וֹבָה יַשְׁלִ֨יכוּ אִישׁ־אַבְנ֜וֹ וּמִלְא֗וּהָ וְכָל־מַעְיַן־מַ֤יִם יִסְתֹּ֙מוּ֙ וְכָל־עֵֽץ־ט֣וֹב יַפִּ֔ילוּ עַד־הִשְׁאִ֧יר אֲבָנֶ֛יהָ בַּקִּ֖יר חֲרָ֑שֶׂת וַיָּסֹ֥בּוּ הַקַּלָּעִ֖ים וַיַּכּֽוּהָ׃

26 ‏וַיַּרְא֙ מֶ֣לֶךְ מוֹאָ֔ב כִּֽי־חָזַ֥ק מִמֶּ֖נּוּ הַמִּלְחָמָ֑ה וַיִּקַּ֣ח א֠וֹתוֹ שְׁבַע־מֵא֨וֹת אִ֜ישׁ שֹׁ֣לֵֽף חֶ֗רֶב לְהַבְקִ֛יעַ אֶל־מֶ֥לֶךְ אֱד֖וֹם וְלֹ֥א יָכֹֽלוּ׃

27 ‏וַיִּקַּח֩ אֶת־בְּנ֨וֹ הַבְּכ֜וֹר אֲשֶׁר־יִמְלֹ֣ךְ תַּחְתָּ֗יו וַיַּעֲלֵ֤הוּ עֹלָה֙ עַל־הַ֣חֹמָ֔ה וַיְהִ֥י קֶצֶף־גָּד֖וֹל עַל־יִשְׂרָאֵ֑ל וַיִּסְעוּ֙ מֵֽעָלָ֔יו וַיָּשֻׁ֖בוּ לָאָֽרֶץ׃ פ

1 wîhwōrām ben-’aḥə’āḇ mālaḵə ‘al-yiśərā’ēl bəšōmərwōn bišənaṯ šəmōneh ‘eśərēh lîhwōšāfāṭ meleḵə yəhûḏâ wayyiməlōḵə šətêm-‘eśərēh šānâ:

2 wayya‘ăśeh hāra‘ bə‘ênê yəhwâ raq lō’ ḵə’āḇîw ûḵə’immwō wayyāsar ’eṯ-maṣṣəḇaṯ haba‘al ’ăšer ‘āśâ ’āḇîw:

3 raq bəḥaṭṭō’wṯ yārāḇə‘ām ben-nəḇāṭ ’ăšer-heḥĕṭî’ ’eṯ-yiśərā’ēl dāḇēq lō’-sār mimmennâ: s

4 ûmêša‘ meleḵə-mwō’āḇ hāyâ nōqēḏ wəhēšîḇ ləmeleḵə-yiśərā’ēl mē’â-’elef kārîm ûmē’â ’elef ’êlîm ṣāmer:

5 wayəhî kəmwōṯ ’aḥə’āḇ wayyifəša‘ meleḵə-mwō’āḇ bəmeleḵə yiśərā’ēl:

6 wayyēṣē’ hammeleḵə yəhwōrām bayywōm hahû’ miššōmərwōn wayyifəqōḏ ’eṯ-kāl-yiśərā’ēl:

7 wayyēleḵə wayyišəlaḥ ’el-yəhwōšāfāṭ meleḵə-yəhûḏâ lē’mōr meleḵə mwō’āḇ pāša‘ bî hăṯēlēḵə ’itî ’el-mwō’āḇ lammiləḥāmâ wayyō’mer ’e‘ĕleh kāmwōnî ḵāmwōḵā kə‘ammî ḵə‘ammeḵā kəsûsay kəsûseyḵā:

8 wayyō’mer ’ê-zeh hadereḵə na‘ăleh wayyō’mer dereḵə miḏəbar ’ĕḏwōm:

9 wayyēleḵə meleḵə yiśərā’ēl ûmeleḵ-yəhûḏâ1 ûmeleḵə ’ĕḏwōm wayyāsōbû dereḵə šiḇə‘aṯ yāmîm wəlō’-hāyâ mayim lammaḥăneh wəlabəhēmâ ’ăšer bəraḡəlêhem:

10 wayyō’mer meleḵə yiśərā’ēl ’ăhāh kî-qārā’ yəhwâ lišəlōšeṯ3 hamməlāḵîm hā’ēlleh lāṯēṯ ’wōṯām bəyaḏ-mwō’āḇ:

11 wayyō’mer yəhwōšāfāṭ ha’ên pōh nāḇî’ layhwâ wəniḏərəšâ ’eṯ-yəhwâ mē’wōṯwō wayya‘an ’eḥāḏ mē‘aḇəḏê meleḵə-yiśərā’ēl wayyō’mer pōh ’ĕlîšā‘ ben-šāfāṭ ’ăšer-yāṣaq mayim ‘al-yəḏê ’ēlîyâû:

12 wayyō’mer yəhwōšāfāṭ yēš ’wōṯwō dəḇar-yəhwâ wayyērəḏû ’ēlāyw meleḵə yiśərā’ēl wîhwōšāfāṭ ûmeleḵə ’ĕḏwōm:

13 wayyō’mer ’ĕlîšā‘ ’el-meleḵə yiśərā’ēl mah-llî wālāḵə lēḵə ’el-nəḇî’ê ’āḇîḵā wə’el-nəḇî’ê ’immeḵā wayyō’mer lwō meleḵə yiśərā’ēl ’al kî-qārā’ yəhwâ lišəlōšeṯ hamməlāḵîm hā’ēlleh lāṯēṯ ’wōṯām bəyaḏ-mwō’āḇ:

14 wayyō’mer ’ĕlîšā‘ ḥay-yəhwâ ṣəḇā’wōṯ ’ăšer ‘āmaḏətî ləfānāyw kî lûlê pənê yəhwōšāfāṭ meleḵə-yəhûḏâ ’ănî nōśē’ ’im-’abîṭ ’ēleyḵā wə’im-’erə’eḵḵā:

15 wə‘atâ qəḥû-lî mənagēn wəhāyâ kənagēn hamənagēn watəhî ‘ālāyw yaḏ-yəhwâ:

16 wayyō’mer kōh ’āmar yəhwâ ‘āśōh hannaḥal hazzeh gēḇîm| gēḇîm:

17 kî-ḵōh| ’āmar yəhwâ lō’-ṯirə’û rûḥa wəlō’-ṯirə’û ḡešem wəhannaḥal hahû’ yimmālē’ māyim ûšəṯîṯem ’atem ûmiqənêḵem ûḇəhemətəḵem:

18 wənāqal zō’ṯ bə‘ênê yəhwâ wənāṯan ’eṯ-mwō’āḇ bəyeḏəḵem:

19 wəhikîṯem kāl-‘îr miḇəṣār wəḵāl-‘îr miḇəḥwōr wəḵāl-‘ēṣ ṭwōḇ tapîlû wəḵāl-ma‘əyənê-mayim tisətōmû wəḵōl haḥeləqâ haṭṭwōḇâ taḵə’iḇû bā’ăḇānîm:

20 wayəhî ḇabōqer ka‘ălwōṯ hamminəḥâ wəhinnēh-mayim bā’îm midereḵə ’ĕḏwōm watimmālē’ hā’āreṣ ’eṯ-hammāyim:

21 wəḵāl-mwō’āḇ šāmə‘û kî-‘ālû hamməlāḵîm ləhillāḥem bām wayyiṣṣā‘ăqû mikōl ḥōḡēr ḥăḡōrâ wāma‘əlâ wayya‘aməḏû ‘al-hagəḇûl:

22 wayyašəkîmû ḇabōqer wəhaššemeš zārəḥâ ‘al-hammāyim wayyirə’û mwō’āḇ minneḡeḏ ’eṯ-hammayim ’ăḏummîm kadām:

23 wayyō’mərû dām zeh hāḥŏrēḇ neḥerəḇû hamməlāḵîm wayyakû ’îš ’eṯ-rē‘ēhû wə‘atâ laššālāl mwō’āḇ:

24 wayyāḇō’û ’el-maḥănēh yiśərā’ēl wayyāqumû yiśərā’ēl wayyakû ’eṯ-mwō’āḇ wayyānusû mipənêhem wayyāḇwō- wayyakû- ḇāh wəhakwōṯ ’eṯ-mwō’āḇ:

25 wəhe‘ārîm yahărōsû wəḵāl-ḥeləqâ ṭwōḇâ yašəlîḵû ’îš-’aḇənwō ûmilə’ûhā wəḵāl-ma‘əyan-mayim yisətōmû wəḵāl-‘ēṣ-ṭwōḇ yapîlû ‘aḏ-hišə’îr ’ăḇāneyhā baqqîr ḥărāśeṯ wayyāsōbû haqqallā‘îm wayyakûhā:

26 wayyarə’ meleḵə mwō’āḇ kî-ḥāzaq mimmennû hammiləḥāmâ wayyiqqaḥ ’wōṯwō šəḇa‘-mē’wōṯ ’îš šōlēf ḥereḇ ləhaḇəqî‘a ’el-meleḵə ’ĕḏwōm wəlō’ yāḵōlû:

27 wayyiqqaḥ ’eṯ-bənwō habəḵwōr ’ăšer-yiməlōḵə taḥətāyw wayya‘ălēhû ‘ōlâ ‘al-haḥōmâ wayəhî qeṣef-gāḏwōl ‘al-yiśərā’ēl wayyisə‘û mē‘ālāyw wayyāšuḇû lā’āreṣ: f


Next: 2 Kings (2 Melakhim) Chapter 4