‎1 ‏וַיְהִ֤י דְבַר־יְהוָה֙ אֶל־יֵה֣וּא בֶן־חֲנָ֔נִי עַל־בַּעְשָׁ֖א לֵאמֹֽר׃

‎2 ‏יַ֗עַן אֲשֶׁ֤ר הֲרִימֹתִ֙יךָ֙ מִן־הֶ֣עָפָ֔ר וָאֶתֶּנְךָ֣ נָגִ֔יד עַ֖ל עַמִּ֣י יִשְׂרָאֵ֑ל וַתֵּ֣לֶךְ׀ בְּדֶ֣רֶךְ יָרָבְעָ֗ם וַֽתַּחֲטִא֙ אֶת־עַמִּ֣י יִשְׂרָאֵ֔ל לְהַכְעִיסֵ֖נִי בְּחַטֹּאתָֽם׃

‎3 ‏הִנְנִ֥י מַבְעִ֛יר אַחֲרֵ֥י בַעְשָׁ֖א וְאַחֲרֵ֣י בֵית֑וֹ וְנָֽתַתִּי֙ אֶת־בֵּ֣יתְךָ֔ כְּבֵ֖ית יָרָבְעָ֥ם בֶּן־נְבָֽט׃

‎4 ‏הַמֵּ֤ת לְבַעְשָׁא֙ בָּעִ֔יר יֹֽאכְל֖וּ הַכְּלָבִ֑ים וְהַמֵּ֥ת לוֹ֙ בַּשָּׂדֶ֔ה יֹאכְל֖וּ ע֥וֹף הַשָּׁמָֽיִם׃

‎5 ‏וְיֶ֨תֶר דִּבְרֵ֥י בַעְשָׁ֛א וַאֲשֶׁ֥ר עָשָׂ֖ה וּגְבֽוּרָת֑וֹ הֲלֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃

‎6 ‏וַיִּשְׁכַּ֤ב בַּעְשָׁא֙ עִם־אֲבֹתָ֔יו וַיִּקָּבֵ֖ר בְּתִרְצָ֑ה וַיִּמְלֹ֛ךְ אֵלָ֥ה בְנ֖וֹ תַּחְתָּֽיו׃

‎7 ‏וְגַ֡ם בְּיַד־יֵה֨וּא בֶן־חֲנָ֜נִי הַנָּבִ֗יא דְּבַר־יְהוָ֡ה הָיָה֩ אֶל־בַּעְשָׁ֨א וְאֶל־בֵּית֜וֹ וְעַ֥ל כָּל־הָרָעָ֣ה׀ אֲשֶׁר־עָשָׂ֣ה׀ בְּעֵינֵ֣י יְהוָ֗ה לְהַכְעִיסוֹ֙ בְּמַעֲשֵׂ֣ה יָדָ֔יו לִהְי֖וֹת כְּבֵ֣ית יָרָבְעָ֑ם וְעַ֥ל אֲשֶׁר־הִכָּ֖ה אֹתֽוֹ׃ פ

‎8 ‏בִּשְׁנַ֨ת עֶשְׂרִ֤ים וָשֵׁשׁ֙ שָׁנָ֔ה לְאָסָ֖א מֶ֣לֶךְ יְהוּדָ֑ה מָ֠לַךְ אֵלָ֨ה בֶן־בַּעְשָׁ֧א עַל־יִשְׂרָאֵ֛ל בְּתִרְצָ֖ה שְׁנָתָֽיִם׃

‎9 ‏וַיִּקְשֹׁ֤ר עָלָיו֙ עַבְדּ֣וֹ זִמְרִ֔י שַׂ֖ר מַחֲצִ֣ית הָרָ֑כֶב וְה֤וּא בְתִרְצָה֙ שֹׁתֶ֣ה שִׁכּ֔וֹר בֵּ֣ית אַרְצָ֔א אֲשֶׁ֥ר עַל־הַבַּ֖יִת בְּתִרְצָֽה׃

‎10 ‏וַיָּבֹ֤א זִמְרִי֙ וַיַּכֵּ֣הוּ וַיְמִיתֵ֔הוּ בִּשְׁנַת֙ עֶשְׂרִ֣ים וָשֶׁ֔בַע לְאָסָ֖א מֶ֣לֶךְ יְהוּדָ֑ה וַיִּמְלֹ֖ךְ תַּחְתָּֽיו׃

‎11 ‏וַיְהִ֨י בְמָלְכ֜וֹ כְּשִׁבְתּ֣וֹ עַל־כִּסְא֗וֹ הִכָּה֙ אֶת־כָּל־בֵּ֣ית בַּעְשָׁ֔א לֹֽא־הִשְׁאִ֥יר ל֖וֹ מַשְׁתִּ֣ין בְּקִ֑יר וְגֹאֲלָ֖יו וְרֵעֵֽהוּ׃

‎12 ‏וַיַּשְׁמֵ֣ד זִמְרִ֔י אֵ֖ת כָּל־בֵּ֣ית בַּעְשָׁ֑א כִּדְבַ֤ר יְהוָה֙ אֲשֶׁ֣ר דִּבֶּ֣ר אֶל־בַּעְשָׁ֔א בְּיַ֖ד יֵה֥וּא הַנָּבִֽיא׃

‎13 ‏אֶ֚ל כָּל־חַטֹּ֣אות בַּעְשָׁ֔א וְחַטֹּ֖אות אֵלָ֣ה בְנ֑וֹ אֲשֶׁ֣ר חָטְא֗וּ וַאֲשֶׁ֤ר הֶחֱטִ֙יאוּ֙ אֶת־יִשְׂרָאֵ֔ל לְהַכְעִ֗יס אֶת־יְהוָ֛ה אֱלֹהֵ֥י יִשְׂרָאֵ֖ל בְּהַבְלֵיהֶֽם׃

‎14 ‏וְיֶ֛תֶר דִּבְרֵ֥י אֵלָ֖ה וְכָל־אֲשֶׁ֣ר עָשָׂ֑ה הֲלֽוֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃ פ

‎15 ‏בִּשְׁנַת֩ עֶשְׂרִ֨ים וָשֶׁ֜בַע שָׁנָ֗ה לְאָסָא֙ מֶ֣לֶךְ יְהוּדָ֔ה מָלַ֥ךְ זִמְרִ֛י שִׁבְעַ֥ת יָמִ֖ים בְּתִרְצָ֑ה וְהָעָ֣ם חֹנִ֔ים עַֽל־גִּבְּת֖וֹן אֲשֶׁ֥ר לַפְּלִשְׁתִּֽים׃

‎16 ‏וַיִּשְׁמַ֤ע הָעָם֙ הַחֹנִ֣ים לֵאמֹ֔ר קָשַׁ֣ר זִמְרִ֔י וְגַ֖ם הִכָּ֣ה אֶת־הַמֶּ֑לֶךְ וַיַּמְלִ֣כוּ כָֽל־יִ֠שְׂרָאֵל אֶת־עָמְרִ֨י שַׂר־צָבָ֧א עַל־יִשְׂרָאֵ֛ל בַּיּ֥וֹם הַה֖וּא בַּֽמַּחֲנֶֽה׃

‎17 ‏וַיַּעֲלֶ֥ה עָמְרִ֛י וְכָל־יִשְׂרָאֵ֥ל עִמּ֖וֹ מִֽגִּבְּת֑וֹן וַיָּצֻ֖רוּ עַל־תִּרְצָֽה׃

‎18 ‏וַיְהִ֞י כִּרְא֤וֹת זִמְרִי֙ כִּֽי־נִלְכְּדָ֣ה הָעִ֔יר וַיָּבֹ֖א אֶל־אַרְמ֣וֹן בֵּית־הַמֶּ֑לֶךְ וַיִּשְׂרֹ֨ף עָלָ֧יו אֶת־בֵּֽית־מֶ֛לֶךְ בָּאֵ֖שׁ וַיָּמֹֽת׃

‎19 ‏עַל־חטאתו חַטֹּאתָיו֙ אֲשֶׁ֣ר חָטָ֔א לַעֲשׂ֥וֹת הָרַ֖ע בְּעֵינֵ֣י יְהוָ֑ה לָלֶ֙כֶת֙ בְּדֶ֣רֶךְ יָרָבְעָ֔ם וּבְחַטָּאתוֹ֙ אֲשֶׁ֣ר עָשָׂ֔ה לְהַחֲטִ֖יא אֶת־יִשְׂרָאֵֽל׃

‎20 ‏וְיֶ֙תֶר֙ דִּבְרֵ֣י זִמְרִ֔י וְקִשְׁר֖וֹ אֲשֶׁ֣ר קָשָׁ֑ר הֲלֹֽא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃ פ

‎21 ‏אָ֧ז יֵחָלֵ֛ק הָעָ֥ם יִשְׂרָאֵ֖ל לַחֵ֑צִי חֲצִ֨י הָעָ֜ם הָ֠יָה אַחֲרֵ֨י תִבְנִ֤י בֶן־גִּינַת֙ לְהַמְלִיכ֔וֹ וְהַחֲצִ֖י אַחֲרֵ֥י עָמְרִֽי׃

‎22 ‏וַיֶּחֱזַ֤ק הָעָם֙ אֲשֶׁ֣ר אַחֲרֵ֣י עָמְרִ֔י אֶת־הָעָ֕ם אֲשֶׁ֥ר אַחֲרֵ֖י תִּבְנִ֣י בֶן־גִּינַ֑ת וַיָּ֣מָת תִּבְנִ֔י וַיִּמְלֹ֖ךְ עָמְרִֽי׃ פ

‎23 ‏בִּשְׁנַת֩ שְׁלֹשִׁ֨ים וְאַחַ֜ת שָׁנָ֗ה לְאָסָא֙ מֶ֣לֶךְ יְהוּדָ֔ה מָלַ֤ךְ עָמְרִי֙ עַל־יִשְׂרָאֵ֔ל שְׁתֵּ֥ים עֶשְׂרֵ֖ה שָׁנָ֑ה בְּתִרְצָ֖ה מָלַ֥ךְ שֵׁשׁ־שָׁנִֽים׃

‎24 ‏וַיִּ֜קֶן אֶת־הָהָ֥ר שֹׁמְר֛וֹן מֵ֥אֶת שֶׁ֖מֶר בְּכִכְּרַ֣יִם כָּ֑סֶף וַיִּ֙בֶן֙ אֶת־הָהָ֔ר וַיִּקְרָ֗א אֶת־שֵׁ֤ם הָעִיר֙ אֲשֶׁ֣ר בָּנָ֔ה עַ֣ל שֶׁם־שֶׁ֔מֶר אֲדֹנֵ֖י הָהָ֥ר שֹׁמְרֽוֹן׃

‎25 ‏וַיַּעֲשֶׂ֥ה עָמְרִ֛י הָרַ֖ע בְּעֵינֵ֣י יְהוָ֑ה וַיָּ֕רַע מִכֹּ֖ל אֲשֶׁ֥ר לְפָנָֽיו׃

‎26 ‏וַיֵּ֗לֶךְ בְּכָל־דֶּ֙רֶךְ֙ יָרָבְעָ֣ם בֶּן־נְבָ֔ט ובחטאתיו וּבְחַטָּאת֔וֹ אֲשֶׁ֥ר הֶחֱטִ֖יא אֶת־יִשְׂרָאֵ֑ל לְהַכְעִ֗יס אֶת־יְהוָ֛ה אֱלֹהֵ֥י יִשְׂרָאֵ֖ל בְּהַבְלֵיהֶֽם׃³

‎27 ‏וְיֶ֨תֶר דִּבְרֵ֤י עָמְרִי֙ אֲשֶׁ֣ר עָשָׂ֔ה וּגְבוּרָת֖וֹ אֲשֶׁ֣ר עָשָׂ֑ה הֲלֹֽא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃

‎28 ‏וַיִּשְׁכַּ֤ב עָמְרִי֙ עִם־אֲבֹתָ֔יו וַיִּקָּבֵ֖ר בְּשֹׁמְר֑וֹן וַיִּמְלֹ֛ךְ אַחְאָ֥ב בְּנ֖וֹ תַּחְתָּֽיו׃ פ

‎29 ‏וְאַחְאָ֣ב בֶּן־עָמְרִ֗י מָלַךְ֙ עַל־יִשְׂרָאֵ֔ל בִּשְׁנַ֨ת שְׁלֹשִׁ֤ים וּשְׁמֹנֶה֙ שָׁנָ֔ה לְאָסָ֖א מֶ֣לֶךְ יְהוּדָ֑ה וַ֠יִּמְלֹךְ אַחְאָ֨ב בֶּן־עָמְרִ֤י עַל־יִשְׂרָאֵל֙ בְּשֹׁ֣מְר֔וֹן עֶשְׂרִ֥ים וּשְׁתַּ֖יִם שָׁנָֽה׃

‎30 ‏וַיַּ֨עַשׂ אַחְאָ֧ב בֶּן־עָמְרִ֛י הָרַ֖ע בְּעֵינֵ֣י יְהוָ֑ה מִכֹּ֖ל אֲשֶׁ֥ר לְפָנָֽיו׃

‎31 ‏וַיְהִי֙ הֲנָקֵ֣ל לֶכְתּ֔וֹ בְּחַטֹּ֖אות יָרָבְעָ֣ם בֶּן־נְבָ֑ט וַיִּקַּ֨ח אִשָּׁ֜ה אֶת־אִיזֶ֗בֶל בַּת־אֶתְבַּ֙עַל֙ מֶ֣לֶךְ צִידֹנִ֔ים וַיֵּ֙לֶךְ֙ וַֽיַּעֲבֹ֣ד אֶת־הַבַּ֔עַל וַיִּשְׁתַּ֖חוּ לֽוֹ׃

‎32 ‏וַיָּ֥קֶם מִזְבֵּ֖חַ לַבָּ֑עַל בֵּ֣ית הַבַּ֔עַל אֲשֶׁ֥ר בָּנָ֖ה בְּשֹׁמְרֽוֹן׃

‎33 ‏וַיַּ֥עַשׂ אַחְאָ֖ב אֶת־הָאֲשֵׁרָ֑ה וַיּ֨וֹסֶף אַחְאָ֜ב לַעֲשׂ֗וֹת לְהַכְעִיס֙ אֶת־יְהוָֹה֙ אֱלֹהֵ֣י יִשְׂרָאֵ֔ל מִכֹּ֨ל מַלְכֵ֣י יִשְׂרָאֵ֔ל אֲשֶׁ֥ר הָי֖וּ לְפָנָֽיו׃

‎34 ‏בְּיָמָ֞יו בָּנָ֥ה חִיאֵ֛ל בֵּ֥ית הָאֱלִ֖י אֶת־יְרִיחֹ֑ה בַּאֲבִירָ֨ם בְּכֹר֜וֹ יִסְּדָ֗הּ ובשגיב וּבִשְׂג֤וּב צְעִירוֹ֙ הִצִּ֣יב דְּלָתֶ֔יהָ כִּדְבַ֣ר יְהוָ֔ה אֲשֶׁ֣ר דִּבֶּ֔ר בְּיַ֖ד יְהוֹשֻׁ֥עַ בִּן־נֽוּן׃ ס

1 wayəhî ḏəḇar-yəhwâ ’el-yēhû’ ḇen-ḥănānî ‘al-b^a‘əšā’ lē’mōr:

2 y^a‘an ’ăšer hărîmōṯîḵā min-he‘āfār wā’etenəḵā nāḡîḏ ‘al ‘ammî yiśərā’ēl watēleḵə| bəḏereḵə yārāḇə‘ām wat^aḥăṭi’ ’eṯ-‘ammî yiśərā’ēl ləhaḵə‘îsēnî bəḥaṭṭō’ṯām:

3 hinənî maḇə‘îr ’^aḥărê ḇ^a‘əšā’ wə’^aḥărê ḇêṯwō wənāṯatî ’eṯ-bêṯəḵā kəḇêṯ yārāḇə‘ām ben-nəḇāṭ:

4 hammēṯ ləḇ^a‘əšā’ bā‘îr yō’ḵəlû hakəlāḇîm wəhammēṯ lwō baśśāḏeh yō’ḵəlû ‘wōf haššāmāyim:

5 wəyeṯer diḇərê ḇ^a‘əšā’ wa’ăšer ‘āśâ ûḡəḇûrāṯwō hălō’-hēm kəṯûḇîm ‘al-sēfer diḇərê hayyāmîm ləmaləḵê yiśərā’ēl:

6 wayyišəkaḇ b^a‘əšā’ ‘im-’ăḇōṯāyw wayyiqqāḇēr bəṯirəṣâ wayyiməlōḵə ’ēlâ ḇənwō t^aḥətāyw:

7 wəḡam bəyaḏ-yēhû’ ḇen-ḥănānî hannāḇî’ dəḇar-yəhwâ hāyâ ’el-b^a‘əšā’ wə’el-bêṯwō wə‘al kāl-hārā‘â| ’ăšer-‘āśâ| bə‘ênê yəhwâ ləhaḵə‘îswō bəm^a‘ăśēh yāḏāyw lihəywōṯ kəḇêṯ yārāḇə‘ām wə‘al ’ăšer-hikâ ’ōṯwō: f

8 bišənaṯ ‘eśərîm wāšēš šānâ lə’āsā’ meleḵə yəhûḏâ mālaḵə ’ēlâ ḇen-b^a‘əšā’ ‘al-yiśərā’ēl bəṯirəṣâ šənāṯāyim:

9 wayyiqəšōr ‘ālāyw ‘aḇədwō zimərî śar m^aḥăṣîṯ hārāḵeḇ wəhû’ ḇəṯirəṣâ šōṯeh šikwōr bêṯ ’arəṣā’ ’ăšer ‘al-habayiṯ bəṯirəṣâ:

10 wayyāḇō’ zimərî wayyakēhû wayəmîṯēhû bišənaṯ ‘eśərîm wāšeḇ^a‘ lə’āsā’ meleḵə yəhûḏâ wayyiməlōḵə t^aḥətāyw:

11 wayəhî ḇəmāləḵwō kəšiḇətwō ‘al-kisə’wō hikâ ’eṯ-kāl-bêṯ b^a‘əšā’ lō’-hišə’îr lwō mašətîn bəqîr wəḡō’ălāyw wərē‘ēhû:

12 wayyašəmēḏ zimərî ’ēṯ kāl-bêṯ b^a‘əšā’ kiḏəḇar yəhwâ ’ăšer diber ’el-b^a‘əšā’ bəyaḏ yēhû’ hannāḇî’:

13 ’el kāl-ḥaṭṭō’wṯ b^a‘əšā’ wəḥaṭṭō’wṯ ’ēlâ ḇənwō ’ăšer ḥāṭə’û wa’ăšer heḥĕṭî’û ’eṯ-yiśərā’ēl ləhaḵə‘îs ’eṯ-yəhwâ ’ĕlōhê yiśərā’ēl bəhaḇəlêhem:

14 wəyeṯer diḇərê ’ēlâ wəḵāl-’ăšer ‘āśâ hălwō’-hēm kəṯûḇîm ‘al-sēfer diḇərê hayyāmîm ləmaləḵê yiśərā’ēl: f

15 bišənaṯ ‘eśərîm wāšeḇ^a‘ šānâ lə’āsā’ meleḵə yəhûḏâ mālaḵə zimərî šiḇə‘aṯ yāmîm bəṯirəṣâ wəhā‘ām ḥōnîm ‘al-gibəṯwōn ’ăšer lapəlišətîm:

16 wayyišəm^a‘ hā‘ām h^aḥōnîm lē’mōr qāšar zimərî wəḡam hikâ ’eṯ-hammeleḵə wayyaməliḵû ḵāl-yiśərā’ēl ’eṯ-‘āmərî śar-ṣāḇā’ ‘al-yiśərā’ēl bayywōm hahû’ bamm^aḥăneh:

17 wayy^a‘ăleh ‘āmərî wəḵāl-yiśərā’ēl ‘immwō migibəṯwōn wayyāṣurû ‘al-tirəṣâ:

18 wayəhî kirə’wōṯ zimərî kî-niləkəḏâ hā‘îr wayyāḇō’ ’el-’arəmwōn bêṯ-hammeleḵə wayyiśərōf ‘ālāyw ’eṯ-bêṯ-meleḵə bā’ēš wayyāmōṯ:

19 ‘al-ḥaṭṭā’ṯwō ḥaṭṭō’ṯāyw ’ăšer ḥāṭā’ l^a‘ăśwōṯ hār^a‘ bə‘ênê yəhwâ lāleḵeṯ bəḏereḵə yārāḇə‘ām ûḇəḥaṭṭā’ṯwō ’ăšer ‘āśâ ləh^aḥăṭî’ ’eṯ-yiśərā’ēl:

20 wəyeṯer diḇərê zimərî wəqišərwō ’ăšer qāšār hălō’-hēm kəṯûḇîm ‘al-sēfer diḇərê hayyāmîm ləmaləḵê yiśərā’ēl: f

21 ’āz yēḥālēq hā‘ām yiśərā’ēl l^aḥēṣî ḥăṣî hā‘ām hāyâ ’^aḥărê ṯiḇənî ḇen-gînaṯ ləhaməlîḵwō wəh^aḥăṣî ’^aḥărê ‘āmərî:

22 wayyeḥĕzaq hā‘ām ’ăšer ’^aḥărê ‘āmərî ’eṯ-hā‘ām ’ăšer ’^aḥărê tiḇənî ḇen-gînaṯ wayyāmāṯ tiḇənî wayyiməlōḵə ‘āmərî: f

23 bišənaṯ šəlōšîm wə’^aḥaṯ šānâ lə’āsā’ meleḵə yəhûḏâ mālaḵə ‘āmərî ‘al-yiśərā’ēl šətêm ‘eśərēh šānâ bəṯirəṣâ mālaḵə šēš-šānîm:

24 wayyiqen ’eṯ-hâār šōmərwōn mē’eṯ šemer bəḵikərayim kāsef wayyiḇen ’eṯ-hâār wayyiqərā’ ’eṯ-šēm hā‘îr ’ăšer bānâ ‘al šem-šemer ’ăḏōnê hâār šōmərwōn:

25 wayy^a‘ăśeh ‘āmərî hār^a‘ bə‘ênê yəhwâ wayyār^a‘ mikōl ’ăšer ləfānāyw:

26 wayyēleḵə bəḵāl-dereḵə yārāḇə‘ām ben-nəḇāṭ ûḇəḥaṭṭō’ṯāyw ûḇəḥaṭṭā’ṯwō ’ăšer heḥĕṭî’ ’eṯ-yiśərā’ēl ləhaḵə‘îs ’eṯ-yəhwâ ’ĕlōhê yiśərā’ēl bəhaḇəlêhem:³

27 wəyeṯer diḇərê ‘āmərî ’ăšer ‘āśâ ûḡəḇûrāṯwō ’ăšer ‘āśâ hălō’-hēm kəṯûḇîm ‘al-sēfer diḇərê hayyāmîm ləmaləḵê yiśərā’ēl:

28 wayyišəkaḇ ‘āmərî ‘im-’ăḇōṯāyw wayyiqqāḇēr bəšōmərwōn wayyiməlōḵə ’^aḥə’āḇ bənwō t^aḥətāyw: f

29 wə’^aḥə’āḇ ben-‘āmərî mālaḵə ‘al-yiśərā’ēl bišənaṯ šəlōšîm ûšəmōneh šānâ lə’āsā’ meleḵə yəhûḏâ wayyiməlōḵə ’^aḥə’āḇ ben-‘āmərî ‘al-yiśərā’ēl bəšōmərwōn ‘eśərîm ûšətayim šānâ:

30 wayy^a‘aś ’^aḥə’āḇ ben-‘āmərî hār^a‘ bə‘ênê yəhwâ mikōl ’ăšer ləfānāyw:

31 wayəhî hănāqēl leḵətwō bəḥaṭṭō’wṯ yārāḇə‘ām ben-nəḇāṭ wayyiqq^aḥ ’iššâ ’eṯ-’îzeḇel baṯ-’eṯəb^a‘al meleḵə ṣîḏōnîm wayyēleḵə wayy^a‘ăḇōḏ ’eṯ-hab^a‘al wayyišət^aḥû lwō:

32 wayyāqem mizəbēḥa labā‘al bêṯ hab^a‘al ’ăšer bānâ bəšōmərwōn:

33 wayy^a‘aś ’^aḥə’āḇ ’eṯ-hā’ăšērâ wayywōsef ’^aḥə’āḇ l^a‘ăśwōṯ ləhaḵə‘îs ’eṯ-yəhwōâ ’ĕlōhê yiśərā’ēl mikōl maləḵê yiśərā’ēl ’ăšer hāyû ləfānāyw:

34 bəyāmāyw bānâ ḥî’ēl bêṯ hā’ĕlî ’eṯ-yərîḥōh ba’ăḇîrām bəḵōrwō yissəḏāh ûḇiśəḡîḇ ûḇiśəḡûḇ ṣə‘îrwō hiṣṣîḇ dəlāṯeyhā kiḏəḇar yəhwâ ’ăšer diber bəyaḏ yəhwōšu‘a bin-nûn: s