Sacred Texts  Bible  Index 
Polyglot  KJV  Sep  Vul 

1 Kings (1 Melakhim) Index
  Previous  Next 

Tanach (Hebrew): 1 Kings (1 Melakhim) Chapter 14

1 ‏בָּעֵ֣ת הַהִ֔יא חָלָ֖ה אֲבִיָּ֥ה בֶן־יָרָבְעָֽם׃

2 ‏וַיֹּ֨אמֶר יָרָבְעָ֜ם לְאִשְׁתּ֗וֹ ק֤וּמִי נָא֙ וְהִשְׁתַּנִּ֔ית וְלֹ֣א יֵֽדְע֔וּ כִּי־אתי אַ֖תְּ אֵ֣שֶׁת יָרָבְעָ֑ם וְהָלַ֣כְתְּ שִׁלֹ֗ה הִנֵּה־שָׁם֙ אֲחִיָּ֣ה הַנָּבִ֔יא הֽוּא־דִבֶּ֥ר עָלַ֛י לְמֶ֖לֶךְ עַל־הָעָ֥ם הַזֶּֽה׃

3 ‏וְלָקַ֣חַתְּ בְּ֠יָדֵךְ עֲשָׂרָ֨ה לֶ֧חֶם וְנִקֻּדִ֛ים וּבַקְבֻּ֥ק דְּבַ֖שׁ וּבָ֣את אֵלָ֑יו ה֚וּא יַגִּ֣יד לָ֔ךְ מַה־יִּֽהְיֶ֖ה לַנָּֽעַר׃

4 ‏וַתַּ֤עַשׂ כֵּן֙ אֵ֣שֶׁת יָרָבְעָ֔ם וַתָּ֙קָם֙ וַתֵּ֣לֶךְ שִׁלֹ֔ה וַתָּבֹ֖א בֵּ֣ית אֲחִיָּ֑ה וַאֲחִיָּ֙הוּ֙ לֹֽא־יָכֹ֣ל לִרְא֔וֹת כִּ֛י קָ֥מוּ עֵינָ֖יו מִשֵּׂיבֽוֹ׃ ס

5 ‏וַיהוָ֞ה אָמַ֣ר אֶל־אֲחִיָּ֗הוּ הִנֵּ֣ה אֵ֣שֶׁת יָרָבְעָ֡ם בָּאָ֣ה לִדְרֹשׁ֩ דָּבָ֨ר מֵעִמְּךָ֤ אֶל־בְּנָהּ֙ כִּֽי־חֹלֶ֣ה ה֔וּא כָּזֹ֥ה וְכָזֶ֖ה תְּדַבֵּ֣ר אֵלֶ֑יהָ וִיהִ֣י כְבֹאָ֔הּ וְהִ֖יא מִתְנַכֵּרָֽה׃

6 ‏וַיְהִי֩ כִשְׁמֹ֨עַ אֲחִיָּ֜הוּ אֶת־ק֤וֹל רַגְלֶ֙יהָ֙ בָּאָ֣ה בַפֶּ֔תַח וַיֹּ֕אמֶר בֹּ֖אִי אֵ֣שֶׁת יָרָבְעָ֑ם לָ֣מָּה זֶּ֗ה אַ֚תְּ מִתְנַכֵּרָ֔ה וְאָ֣נֹכִ֔י שָׁל֥וּחַ אֵלַ֖יִךְ קָשָֽׁה׃

7 ‏לְכִ֞י אִמְרִ֣י לְיָרָבְעָ֗ם כֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל יַ֛עַן אֲשֶׁ֥ר הֲרִימֹתִ֖יךָ מִתּ֣וֹךְ הָעָ֑ם וָאֶתֶּנְךָ֣ נָגִ֔יד עַ֖ל עַמִּ֥י יִשְׂרָאֵֽל׃

8 ‏וָאֶקְרַ֤ע אֶת־הַמַּמְלָכָה֙ מִבֵּ֣ית דָּוִ֔ד וָאֶתְּנֶ֖הָ לָ֑ךְ וְלֹֽא־הָיִ֜יתָ כְּעַבְדִּ֣י דָוִ֗ד אֲשֶׁר֩ שָׁמַ֨ר מִצְוֹתַ֜י וַאֲשֶׁר־הָלַ֤ךְ אַחֲרַי֙ בְּכָל־לְבָב֔וֹ לַעֲשׂ֕וֹת רַ֖ק הַיָּשָׁ֥ר בְּעֵינָֽי׃

9 ‏וַתָּ֣רַע לַעֲשׂ֔וֹת מִכֹּ֖ל אֲשֶׁר־הָי֣וּ לְפָנֶ֑יךָ וַתֵּ֡לֶךְ וַתַּעֲשֶׂה־לְּךָ֩ אֱלֹהִ֨ים אֲחֵרִ֤ים וּמַסֵּכוֹת֙ לְהַכְעִיסֵ֔נִי וְאֹתִ֥י הִשְׁלַ֖כְתָּ אַחֲרֵ֥י גַוֶּֽךָ׃ ס

10 ‏לָכֵ֗ן הִנְנִ֨י מֵבִ֤יא רָעָה֙ אֶל־בֵּ֣ית יָרָבְעָ֔ם וְהִכְרַתִּ֤י לְיָֽרָבְעָם֙ מַשְׁתִּ֣ין בְּקִ֔יר עָצ֥וּר וְעָז֖וּב בְּיִשְׂרָאֵ֑ל וּבִֽעַרְתִּי֙ אַחֲרֵ֣י בֵית־יָרָבְעָ֔ם כַּאֲשֶׁ֛ר יְבַעֵ֥ר הַגָּלָ֖ל עַד־תֻּמּֽוֹ׃

11 ‏הַמֵּ֨ת לְיָֽרָבְעָ֤ם בָּעִיר֙ יֹאכְל֣וּ הַכְּלָבִ֔ים וְהַמֵּת֙ בַּשָּׂדֶ֔ה יֹאכְל֖וּ ע֣וֹף הַשָּׁמָ֑יִם כִּ֥י יְהוָ֖ה דִּבֵּֽר׃

12 ‏וְאַ֥תְּ ק֖וּמִי לְכִ֣י לְבֵיתֵ֑ךְ בְּבֹאָ֥ה רַגְלַ֛יִךְ הָעִ֖ירָה וּמֵ֥ת הַיָּֽלֶד׃

13 ‏וְסָֽפְדוּ־ל֤וֹ כָל־יִשְׂרָאֵל֙ וְקָבְר֣וּ אֹת֔וֹ כִּֽי־זֶ֣ה לְבַדּ֔וֹ יָבֹ֥א לְיָרָבְעָ֖ם אֶל־קָ֑בֶר יַ֣עַן נִמְצָא־ב֞וֹ דָּבָ֣ר ט֗וֹב אֶל־יְהוָ֛ה אֱלֹהֵ֥י יִשְׂרָאֵ֖ל בְּבֵ֥ית יָרָבְעָֽם׃

14 ‏וְהֵקִים֩ יְהוָ֨ה ל֥וֹ מֶ֙לֶךְ֙ עַל־יִשְׂרָאֵ֔ל אֲשֶׁ֥ר יַכְרִ֛ית אֶת־בֵּ֥ית יָרָבְעָ֖ם זֶ֣ה הַיּ֑וֹם וּמֶ֖ה גַּם־עָֽתָּה׃

15 ‏וְהִכָּ֨ה יְהוָ֜ה אֶת־יִשְׂרָאֵ֗ל כַּאֲשֶׁ֨ר יָנ֣וּד הַקָּנֶה֮ בַּמַּיִם֒ וְנָתַ֣שׁ אֶת־יִשְׂרָאֵ֗ל מֵ֠עַל הָאֲדָמָ֨ה הַטּוֹבָ֤ה הַזֹּאת֙ אֲשֶׁ֤ר נָתַן֙ לַאֲב֣וֹתֵיהֶ֔ם וְזֵרָ֖ם מֵעֵ֣בֶר לַנָּהָ֑ר יַ֗עַן אֲשֶׁ֤ר עָשׂוּ֙ אֶת־אֲשֵׁ֣רֵיהֶ֔ם מַכְעִיסִ֖ים אֶת־יְהוָֽה׃

16 ‏וְיִתֵּ֖ן אֶת־יִשְׂרָאֵ֑ל בִּגְלַ֞ל חַטֹּ֤אות יָֽרָבְעָם֙ אֲשֶׁ֣ר חָטָ֔א וַאֲשֶׁ֥ר הֶחֱטִ֖יא אֶת־יִשְׂרָאֵֽל׃

17 ‏וַתָּ֙קָם֙ אֵ֣שֶׁת יָרָבְעָ֔ם וַתֵּ֖לֶךְ וַתָּבֹ֣א תִרְצָ֑תָה הִ֛יא בָּאָ֥ה בְסַף־הַבַּ֖יִת וְהַנַּ֥עַר מֵֽת׃

18 ‏וַיִּקְבְּר֥וּ אֹת֛וֹ וַיִּסְפְּדוּ־ל֖וֹ כָּל־יִשְׂרָאֵ֑ל כִּדְבַ֤ר יְהוָה֙ אֲשֶׁ֣ר דִּבֶּ֔ר בְּיַד־עַבְדּ֖וֹ אֲחִיָּ֥הוּ הַנָּבִֽיא׃

19 ‏וְיֶ֙תֶר֙ דִּבְרֵ֣י יָֽרָבְעָ֔ם אֲשֶׁ֥ר נִלְחַ֖ם וַאֲשֶׁ֣ר מָלָ֑ךְ הִנָּ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃

20 ‏וְהַיָּמִים֙ אֲשֶׁ֣ר מָלַ֣ךְ יָרָבְעָ֔ם עֶשְׂרִ֥ים וּשְׁתַּ֖יִם שָׁנָ֑ה וַיִּשְׁכַּב֙ עִם־אֲבֹתָ֔יו וַיִּמְלֹ֛ךְ נָדָ֥ב בְּנ֖וֹ תַּחְתָּֽיו׃ פ

21 ‏וּרְחַבְעָם֙ בֶּן־שְׁלֹמֹ֔ה מָלַ֖ךְ בִּֽיהוּדָ֑ה בֶּן־אַרְבָּעִ֣ים וְאַחַ֣ת שָׁנָה֩ רְחַבְעָ֨ם בְּמָלְכ֜וֹ וּֽשֲׁבַ֨ע עֶשְׂרֵ֥ה שָׁנָ֣ה׀ מָלַ֣ךְ בִּירוּשָׁלִַ֗ם הָ֠עִיר אֲשֶׁר־בָּחַ֨ר יְהוָ֜ה לָשׂ֨וּם אֶת־שְׁמ֥וֹ שָׁם֙ מִכֹּל֙ שִׁבְטֵ֣י יִשְׂרָאֵ֔ל וְשֵׁ֣ם אִמּ֔וֹ נַעֲמָ֖ה הָעַמֹּנִֽית׃

22 ‏וַיַּ֧עַשׂ יְהוּדָ֛ה הָרַ֖ע בְּעֵינֵ֣י יְהוָ֑ה וַיְקַנְא֣וּ אֹת֗וֹ מִכֹּל֙ אֲשֶׁ֣ר עָשׂ֣וּ אֲבֹתָ֔ם בְּחַטֹּאתָ֖ם אֲשֶׁ֥ר חָטָֽאוּ׃

23 ‏וַיִּבְנ֨וּ גַם־הֵ֧מָּה לָהֶ֛ם בָּמ֥וֹת וּמַצֵּב֖וֹת וַאֲשֵׁרִ֑ים עַ֚ל כָּל־גִּבְעָ֣ה גְבֹהָ֔ה וְתַ֖חַת כָּל־עֵ֥ץ רַעֲנָֽן׃

24 ‏וְגַם־קָדֵ֖שׁ הָיָ֣ה בָאָ֑רֶץ עָשׂ֗וּ כְּכֹל֙ הַתּוֹעֲבֹ֣ת הַגּוֹיִ֔ם אֲשֶׁר֙ הוֹרִ֣ישׁ יְהוָ֔ה מִפְּנֵ֖י בְּנֵ֥י יִשְׂרָאֵֽל׃ פ

25 ‏וַיְהִ֛י בַּשָּׁנָ֥ה הַחֲמִישִׁ֖ית לַמֶּ֣לֶךְ רְחַבְעָ֑ם עָלָ֛ה שושק שִׁישַׁ֥ק מֶֽלֶךְ־מִצְרַ֖יִם עַל־יְרוּשָׁלִָֽם׃

26 ‏וַיִּקַּ֞ח אֶת־אֹצְר֣וֹת בֵּית־יְהוָ֗ה וְאֶת־אֽוֹצְרוֹת֙ בֵּ֣ית הַמֶּ֔לֶךְ וְאֶת־הַכֹּ֖ל לָקָ֑ח וַיִּקַּח֙ אֶת־כָּל־מָגִנֵּ֣י הַזָּהָ֔ב אֲשֶׁ֥ר עָשָׂ֖ה שְׁלֹמֹֽה׃

27 ‏וַיַּ֨עַשׂ הַמֶּ֤לֶךְ רְחַבְעָם֙ תַּחְתָּ֔ם מָגִנֵּ֖י נְחֹ֑שֶׁת וְהִפְקִ֗יד עַל־יַד֙ שָׂרֵ֣י הָרָצִ֔ים הַשֹּׁ֣מְרִ֔ים פֶּ֖תַח בֵּ֥ית הַמֶּֽלֶךְ׃

28 ‏וַיְהִ֛י מִדֵּי־בֹ֥א הַמֶּ֖לֶךְ בֵּ֣ית יְהוָ֑ה יִשָּׂאוּם֙ הָֽרָצִ֔ים וֶהֱשִׁיב֖וּם אֶל־תָּ֥א הָרָצִֽים׃

29 ‏וְיֶ֛תֶר דִּבְרֵ֥י רְחַבְעָ֖ם וְכָל־אֲשֶׁ֣ר עָשָׂ֑ה הֲלֹא־הֵ֣מָּה כְתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יְהוּדָֽה׃

30 ‏וּמִלְחָמָ֨ה הָיְתָ֧ה בֵין־רְחַבְעָ֛ם וּבֵ֥ין יָרָבְעָ֖ם כָּל־הַיָּמִֽים׃

31 ‏וַיִּשְׁכַּ֨ב רְחַבְעָ֜ם עִם־אֲבֹתָ֗יו וַיִּקָּבֵ֤ר עִם־אֲבֹתָיו֙ בְּעִ֣יר דָּוִ֔ד וְשֵׁ֣ם אִמּ֔וֹ נַעֲמָ֖ה הָעַמֹּנִ֑ית וַיִּמְלֹ֛ךְ אֲבִיָּ֥ם בְּנ֖וֹ תַּחְתָּֽיו׃ פ

1 bā‘ēṯ hahî’ ḥālâ ’ăḇîyâ ḇen-yārāḇə‘ām:

2 wayyō’mer yārāḇə‘ām lə’išətwō qûmî nā’ wəhišətannîṯ wəlō’ yēḏə‘û kî-’atî ’atə ’ēšeṯ yārāḇə‘ām wəhālaḵətə šilōh hinnēh-šām ’ăḥîyâ hannāḇî’ hû’-ḏiber ‘ālay ləmeleḵə ‘al-hā‘ām hazzeh:

3 wəlāqaḥatə bəyāḏēḵə ‘ăśārâ leḥem wəniqquḏîm ûḇaqəbuq dəḇaš ûḇā’ṯ ’ēlāyw hû’ yagîḏ lāḵə mah-yyihəyeh lannā‘ar:

4 wata‘aś kēn ’ēšeṯ yārāḇə‘ām watāqām watēleḵə šilōh watāḇō’ bêṯ ’ăḥîyâ wa’ăḥîyâû lō’-yāḵōl lirə’wōṯ kî qāmû ‘ênāyw miśśêḇwō: s

5 wayhwâ ’āmar ’el-’ăḥîyâû hinnēh ’ēšeṯ yārāḇə‘ām bā’â liḏərōš dāḇār mē‘imməḵā ’el-bənāh kî-ḥōleh hû’ kāzōh wəḵāzeh təḏabēr ’ēleyhā wîhî ḵəḇō’āh wəhî’ miṯənakērâ:

6 wayəhî ḵišəmō‘a ’ăḥîyâû ’eṯ-qwōl raḡəleyhā bā’â ḇapeṯaḥ wayyō’mer bō’î ’ēšeṯ yārāḇə‘ām lāmmâ zzeh ’atə miṯənakērâ wə’ānōḵî šālûḥa ’ēlayiḵə qāšâ:

7 ləḵî ’imərî ləyārāḇə‘ām kōh-’āmar yəhwâ ’ĕlōhê yiśərā’ēl ya‘an ’ăšer hărîmōṯîḵā mitwōḵə hā‘ām wā’etenəḵā nāḡîḏ ‘al ‘ammî yiśərā’ēl:

8 wā’eqəra‘ ’eṯ-hammaməlāḵâ mibêṯ dāwiḏ wā’etənehā lāḵə wəlō’-hāyîṯā kə‘aḇədî ḏāwiḏ ’ăšer šāmar miṣəwōṯay wa’ăšer-hālaḵə ’aḥăray bəḵāl-ləḇāḇwō la‘ăśwōṯ raq hayyāšār bə‘ênāy:

9 watāra‘ la‘ăśwōṯ mikōl ’ăšer-hāyû ləfāneyḵā watēleḵə wata‘ăśeh-lləḵā ’ĕlōhîm ’ăḥērîm ûmassēḵwōṯ ləhaḵə‘îsēnî wə’ōṯî hišəlaḵətā ’aḥărê ḡaûeḵā: s

10 lāḵēn hinənî mēḇî’ rā‘â ’el-bêṯ yārāḇə‘ām wəhiḵəratî ləyārāḇə‘ām mašətîn bəqîr ‘āṣûr wə‘āzûḇ bəyiśərā’ēl ûḇi‘arətî ’aḥărê ḇêṯ-yārāḇə‘ām ka’ăšer yəḇa‘ēr hagālāl ‘aḏ-tummwō:

11 hammēṯ ləyārāḇə‘ām bā‘îr yō’ḵəlû hakəlāḇîm wəhammēṯ baśśāḏeh yō’ḵəlû ‘wōf haššāmāyim kî yəhwâ dibēr:

12 wə’atə qûmî ləḵî ləḇêṯēḵə bəḇō’â raḡəlayiḵə hā‘îrâ ûmēṯ hayyāleḏ:

13 wəsāfəḏû-lwō ḵāl-yiśərā’ēl wəqāḇərû ’ōṯwō kî-zeh ləḇadwō yāḇō’ ləyārāḇə‘ām ’el-qāḇer ya‘an niməṣā’-ḇwō dāḇār ṭwōḇ ’el-yəhwâ ’ĕlōhê yiśərā’ēl bəḇêṯ yārāḇə‘ām:

14 wəhēqîm yəhwâ lwō meleḵə ‘al-yiśərā’ēl ’ăšer yaḵərîṯ ’eṯ-bêṯ yārāḇə‘ām zeh hayywōm ûmeh gam-‘ātâ:

15 wəhikâ yəhwâ ’eṯ-yiśərā’ēl ka’ăšer yānûḏ haqqāneh bammayim wənāṯaš ’eṯ-yiśərā’ēl mē‘al hā’ăḏāmâ haṭṭwōḇâ hazzō’ṯ ’ăšer nāṯan la’ăḇwōṯêhem wəzērām mē‘ēḇer lannâār ya‘an ’ăšer ‘āśû ’eṯ-’ăšērêhem maḵə‘îsîm ’eṯ-yəhwâ:

16 wəyitēn ’eṯ-yiśərā’ēl biḡəlal ḥaṭṭō’wṯ yārāḇə‘ām ’ăšer ḥāṭā’ wa’ăšer heḥĕṭî’ ’eṯ-yiśərā’ēl:

17 watāqām ’ēšeṯ yārāḇə‘ām watēleḵə watāḇō’ ṯirəṣāṯâ hî’ bā’â ḇəsaf-habayiṯ wəhanna‘ar mēṯ:

18 wayyiqəbərû ’ōṯwō wayyisəpəḏû-lwō kāl-yiśərā’ēl kiḏəḇar yəhwâ ’ăšer diber bəyaḏ-‘aḇədwō ’ăḥîyâû hannāḇî’:

19 wəyeṯer diḇərê yārāḇə‘ām ’ăšer niləḥam wa’ăšer mālāḵə hinnām kəṯûḇîm ‘al-sēfer diḇərê hayyāmîm ləmaləḵê yiśərā’ēl:

20 wəhayyāmîm ’ăšer mālaḵə yārāḇə‘ām ‘eśərîm ûšətayim šānâ wayyišəkaḇ ‘im-’ăḇōṯāyw wayyiməlōḵə nāḏāḇ bənwō taḥətāyw: f

21 ûrəḥaḇə‘ām ben-šəlōmōh mālaḵə bîhûḏâ ben-’arəbā‘îm wə’aḥaṯ šānâ rəḥaḇə‘ām bəmāləḵwō ûšăḇa‘ ‘eśərēh šānâ| mālaḵə bîrûšālaim hā‘îr ’ăšer-bāḥar yəhwâ lāśûm ’eṯ-šəmwō šām mikōl šiḇəṭê yiśərā’ēl wəšēm ’immwō na‘ămâ hā‘ammōnîṯ:

22 wayya‘aś yəhûḏâ hāra‘ bə‘ênê yəhwâ wayəqanə’û ’ōṯwō mikōl ’ăšer ‘āśû ’ăḇōṯām bəḥaṭṭō’ṯām ’ăšer ḥāṭā’û:

23 wayyiḇənû ḡam-hēmmâ lâem bāmwōṯ ûmaṣṣēḇwōṯ wa’ăšērîm ‘al kāl-giḇə‘â ḡəḇōhâ wəṯaḥaṯ kāl-‘ēṣ ra‘ănān:

24 wəḡam-qāḏēš hāyâ ḇā’āreṣ ‘āśû kəḵōl hatwō‘ăḇōṯ hagwōyim ’ăšer hwōrîš yəhwâ mipənê bənê yiśərā’ēl: f

25 wayəhî baššānâ haḥămîšîṯ lammeleḵə rəḥaḇə‘ām ‘ālâ šûšaq šîšaq meleḵə-miṣərayim ‘al-yərûšālāim:

26 wayyiqqaḥ ’eṯ-’ōṣərwōṯ bêṯ-yəhwâ wə’eṯ-’wōṣərwōṯ bêṯ hammeleḵə wə’eṯ-hakōl lāqāḥ wayyiqqaḥ ’eṯ-kāl-māḡinnê hazzâāḇ ’ăšer ‘āśâ šəlōmōh:

27 wayya‘aś hammeleḵə rəḥaḇə‘ām taḥətām māḡinnê nəḥōšeṯ wəhifəqîḏ ‘al-yaḏ śārê hārāṣîm haššōmərîm peṯaḥ bêṯ hammeleḵə:

28 wayəhî midê-ḇō’ hammeleḵə bêṯ yəhwâ yiśśā’ûm hārāṣîm wehĕšîḇûm ’el-tā’ hārāṣîm:

29 wəyeṯer diḇərê rəḥaḇə‘ām wəḵāl-’ăšer ‘āśâ hălō’-hēmmâ ḵəṯûḇîm ‘al-sēfer diḇərê hayyāmîm ləmaləḵê yəhûḏâ:

30 ûmiləḥāmâ hāyəṯâ ḇên-rəḥaḇə‘ām ûḇên yārāḇə‘ām kāl-hayyāmîm:

31 wayyišəkaḇ rəḥaḇə‘ām ‘im-’ăḇōṯāyw wayyiqqāḇēr ‘im-’ăḇōṯāyw bə‘îr dāwiḏ wəšēm ’immwō na‘ămâ hā‘ammōnîṯ wayyiməlōḵə ’ăḇîyām bənwō taḥətāyw: f


Next: 1 Kings (1 Melakhim) Chapter 15