‎1 ‏וְהַמֶּ֣לֶךְ שְׁלֹמֹ֗ה אָהַ֞ב נָשִׁ֧ים נָכְרִיּ֛וֹת רַבּ֖וֹת וְאֶת־בַּת־פַּרְעֹ֑ה מוֹאֲבִיּ֤וֹת עַמֳּנִיּוֹת֙ אֲדֹ֣מִיֹּ֔ת צֵדְנִיֹּ֖ת חִתִּיֹּֽת׃

‎2 ‏מִן־הַגּוֹיִ֗ם אֲשֶׁ֣ר אָֽמַר־יְהוָה֩ אֶל־בְּנֵ֨י יִשְׂרָאֵ֜ל לֹֽא־תָבֹ֣אוּ בָהֶ֗ם וְהֵם֙ לֹא־יָבֹ֣אוּ בָכֶ֔ם אָכֵן֙ יַטּ֣וּ אֶת־לְבַבְכֶ֔ם אַחֲרֵ֖י אֱלֹהֵיהֶ֑ם בָּהֶ֛ם דָּבַ֥ק שְׁלֹמֹ֖ה לְאַהֲבָֽה׃

‎3 ‏וַיְהִי־ל֣וֹ נָשִׁ֗ים שָׂרוֹת֙ שְׁבַ֣ע מֵא֔וֹת וּפִֽלַגְשִׁ֖ים שְׁלֹ֣שׁ מֵא֑וֹת וַיַּטּ֥וּ נָשָׁ֖יו אֶת־לִבּֽוֹ׃

‎4 ‏וַיְהִ֗י לְעֵת֙ זִקְנַ֣ת שְׁלֹמֹ֔ה נָשָׁיו֙ הִטּ֣וּ אֶת־לְבָב֔וֹ אַחֲרֵ֖י אֱלֹהִ֣ים אֲחֵרִ֑ים וְלֹא־הָיָ֨ה לְבָב֤וֹ שָׁלֵם֙ עִם־יְהוָ֣ה אֱלֹהָ֔יו כִּלְבַ֖ב דָּוִ֥יד אָבִֽיו׃

‎5 ‏וַיֵּ֣לֶךְ שְׁלֹמֹ֔ה אַחֲרֵ֣י עַשְׁתֹּ֔רֶת אֱלֹהֵ֖י צִדֹנִ֑ים וְאַחֲרֵ֣י מִלְכֹּ֔ם שִׁקֻּ֖ץ עַמֹּנִֽים׃

‎6 ‏וַיַּ֧עַשׂ שְׁלֹמֹ֛ה הָרַ֖ע בְּעֵינֵ֣י יְהוָ֑ה וְלֹ֥א מִלֵּ֛א אַחֲרֵ֥י יְהוָ֖ה כְּדָוִ֥ד אָבִֽיו׃ ס

‎7 ‏אָז֩ יִבְנֶ֨ה שְׁלֹמֹ֜ה בָּמָ֗ה לִכְמוֹשׁ֙ שִׁקֻּ֣ץ מוֹאָ֔ב בָּהָ֕ר אֲשֶׁ֖ר עַל־פְּנֵ֣י יְרוּשָׁלִָ֑ם וּלְמֹ֕לֶךְ שִׁקֻּ֖ץ בְּנֵ֥י עַמּֽוֹן׃

‎8 ‏וְכֵ֣ן עָשָׂ֔ה לְכָל־נָשָׁ֖יו הַנָּכְרִיּ֑וֹת מַקְטִיר֥וֹת וּֽמְזַבְּח֖וֹת לֵאלֹהֵיהֶֽן׃

‎9 ‏וַיִּתְאַנַּ֥ף יְהוָ֖ה בִּשְׁלֹמֹ֑ה כִּֽי־נָטָ֣ה לְבָב֗וֹ מֵעִ֤ם יְהוָה֙ אֱלֹהֵ֣י יִשְׂרָאֵ֔ל הַנִּרְאָ֥ה אֵלָ֖יו פַּעֲמָֽיִם׃

‎10 ‏וְצִוָּ֤ה אֵלָיו֙ עַל־הַדָּבָ֣ר הַזֶּ֔ה לְבִ֨לְתִּי־לֶ֔כֶת אַחֲרֵ֖י אֱלֹהִ֣ים אֲחֵרִ֑ים וְלֹ֣א שָׁמַ֔ר אֵ֥ת אֲשֶׁר־צִוָּ֖ה יְהוָֽה׃ פ

‎11 ‏וַיֹּ֨אמֶר יְהוָ֜ה לִשְׁלֹמֹ֗ה יַ֚עַן אֲשֶׁ֣ר הָֽיְתָה־זֹּ֣את עִמָּ֔ךְ וְלֹ֤א שָׁמַ֙רְתָּ֙ בְּרִיתִ֣י וְחֻקֹּתַ֔י אֲשֶׁ֥ר צִוִּ֖יתִי עָלֶ֑יךָ קָרֹ֨עַ אֶקְרַ֤ע אֶת־הַמַּמְלָכָה֙ מֵֽעָלֶ֔יךָ וּנְתַתִּ֖יהָ לְעַבְדֶּֽךָ׃

‎12 ‏אַךְ־בְּיָמֶ֙יךָ֙ לֹ֣א אֶעֱשֶׂ֔נָּה לְמַ֖עַן דָּוִ֣ד אָבִ֑יךָ מִיַּ֥ד בִּנְךָ֖ אֶקְרָעֶֽנָּה׃

‎13 ‏רַ֤ק אֶת־כָּל־הַמַּמְלָכָה֙ לֹ֣א אֶקְרָ֔ע שֵׁ֥בֶט אֶחָ֖ד אֶתֵּ֣ן לִבְנֶ֑ךָ לְמַ֙עַן֙ דָּוִ֣ד עַבְדִּ֔י וּלְמַ֥עַן יְרוּשָׁלִַ֖ם אֲשֶׁ֥ר בָּחָֽרְתִּי׃

‎14 ‏וַיָּ֨קֶם יְהוָ֤ה שָׂטָן֙ לִשְׁלֹמֹ֔ה אֵ֖ת הֲדַ֣ד הָאֲדֹמִ֑י מִזֶּ֧רַע הַמֶּ֛לֶךְ ה֖וּא בֶּאֱדֽוֹם׃

‎15 ‏וַיְהִ֗י בִּֽהְי֤וֹת דָּוִד֙ אֶת־אֱד֔וֹם בַּעֲל֗וֹת יוֹאָב֙ שַׂ֣ר הַצָּבָ֔א לְקַבֵּ֖ר אֶת־הַחֲלָלִ֑ים וַיַּ֥ךְ כָּל־זָכָ֖ר בֶּאֱדֽוֹם׃

‎16 ‏כִּ֣י שֵׁ֧שֶׁת חֳדָשִׁ֛ים יָֽשַׁב־שָׁ֥ם יוֹאָ֖ב וְכָל־יִשְׂרָאֵ֑ל עַד־הִכְרִ֥ית כָּל־זָכָ֖ר בֶּאֱדֽוֹם׃

‎17 ‏וַיִּבְרַ֣ח אֲדַ֡ד הוּא֩ וַאֲנָשִׁ֨ים אֲדֹמִיִּ֜ים מֵעַבְדֵ֥י אָבִ֛יו אִתּ֖וֹ לָב֣וֹא מִצְרָ֑יִם וַהֲדַ֖ד נַ֥עַר קָטָֽן׃

‎18 ‏וַיָּקֻ֙מוּ֙ מִמִּדְיָ֔ן וַיָּבֹ֖אוּ פָּארָ֑ן וַיִּקְחוּ֩ אֲנָשִׁ֨ים עִמָּ֜ם מִפָּארָ֗ן וַיָּבֹ֤אוּ מִצְרַ֙יִם֙ אֶל־פַּרְעֹ֣ה מֶֽלֶךְ־מִצְרַ֔יִם וַיִּתֶּן־ל֣וֹ בַ֗יִת וְלֶ֙חֶם֙ אָ֣מַר ל֔וֹ וְאֶ֖רֶץ נָ֥תַן לֽוֹ׃

‎19 ‏וַיִּמְצָא֙ הֲדַ֥ד חֵ֛ן בְּעֵינֵ֥י פַרְעֹ֖ה מְאֹ֑ד וַיִּתֶּן־ל֤וֹ אִשָּׁה֙ אֶת־אֲח֣וֹת אִשְׁתּ֔וֹ אֲח֖וֹת תַּחְפְּנֵ֥יס הַגְּבִירָֽה׃

‎20 ‏וַתֵּ֨לֶד ל֜וֹ אֲח֣וֹת תַּחְפְּנֵ֗יס אֵ֚ת גְּנֻבַ֣ת בְּנ֔וֹ וַתִּגְמְלֵ֣הוּ תַחְפְּנֵ֔ס בְּת֖וֹךְ בֵּ֣ית פַּרְעֹ֑ה וַיְהִ֤י גְנֻבַת֙ בֵּ֣ית פַּרְעֹ֔ה בְּת֖וֹךְ בְּנֵ֥י פַרְעֹֽה׃

‎21 ‏וַהֲדַ֞ד שָׁמַ֣ע בְּמִצְרַ֗יִם כִּֽי־שָׁכַ֤ב דָּוִד֙ עִם־אֲבֹתָ֔יו וְכִי־מֵ֖ת יוֹאָ֣ב שַֽׂר־הַצָּבָ֑א וַיֹּ֤אמֶר הֲדַד֙ אֶל־פַּרְעֹ֔ה שַׁלְּחֵ֖נִי וְאֵלֵ֥ךְ אֶל־אַרְצִֽי׃

‎22 ‏וַיֹּ֧אמֶר ל֣וֹ פַרְעֹ֗ה כִּ֠י מָה־אַתָּ֤ה חָסֵר֙ עִמִּ֔י וְהִנְּךָ֥ מְבַקֵּ֖שׁ לָלֶ֣כֶת אֶל־אַרְצֶ֑ךָ וַיֹּ֣אמֶר׀ לֹ֔א כִּ֥י שַׁלֵּ֖חַ תְּשַׁלְּחֵֽנִי׃

‎23 ‏וַיָּ֨קֶם אֱלֹהִ֥ים לוֹ֙ שָׂטָ֔ן אֶת־רְז֖וֹן בֶּן־אֶלְיָדָ֑ע אֲשֶׁ֣ר בָּרַ֗ח מֵאֵ֛ת הֲדַדְעֶ֥זֶר מֶֽלֶךְ־צוֹבָ֖ה אֲדֹנָֽיו׃

‎24 ‏וַיִּקְבֹּ֤ץ עָלָיו֙ אֲנָשִׁ֔ים וַיְהִ֣י שַׂר־גְּד֔וּד בַּהֲרֹ֥ג דָּוִ֖ד אֹתָ֑ם וַיֵּלְכ֤וּ דַמֶּ֙שֶׂק֙ וַיֵּ֣שְׁבוּ בָ֔הּ וַֽיִּמְלְכ֖וּ בְּדַמָּֽשֶׂק׃

‎25 ‏וַיְהִ֨י שָׂטָ֤ן לְיִשְׂרָאֵל֙ כָּל־יְמֵ֣י שְׁלֹמֹ֔ה וְאֶת־הָרָעָ֖ה אֲשֶׁ֣ר הֲדָ֑ד וַיָּ֙קָץ֙ בְּיִשְׂרָאֵ֔ל וַיִּמְלֹ֖ךְ עַל־אֲרָֽם׃ פ

‎26 ‏וְיָרָבְעָם֩ בֶּן־נְבָ֨ט אֶפְרָתִ֜י מִן־הַצְּרֵדָ֗ה וְשֵׁ֤ם אִמּוֹ֙ צְרוּעָה֙ אִשָּׁ֣ה אַלְמָנָ֔ה עֶ֖בֶד לִשְׁלֹמֹ֑ה וַיָּ֥רֶם יָ֖ד בַּמֶּֽלֶךְ׃

‎27 ‏וְזֶ֣ה הַדָּבָ֔ר אֲשֶׁר־הֵרִ֥ים יָ֖ד בַּמֶּ֑לֶךְ שְׁלֹמֹה֙ בָּנָ֣ה אֶת־הַמִּלּ֔וֹא סָגַ֕ר אֶת־פֶּ֕רֶץ עִ֖יר דָּוִ֥ד אָבִֽיו׃

‎28 ‏וְהָאִ֥ישׁ יָרָבְעָ֖ם גִּבּ֣וֹר חָ֑יִל וַיַּ֨רְא שְׁלֹמֹ֜ה אֶת־הַנַּ֗עַר כִּֽי־עֹשֵׂ֤ה מְלָאכָה֙ ה֔וּא וַיַּפְקֵ֣ד אֹת֔וֹ לְכָל־סֵ֖בֶל בֵּ֥ית יוֹסֵֽף׃ ס

‎29 ‏וַֽיְהִי֙ בָּעֵ֣ת הַהִ֔יא וְיָֽרָבְעָ֖ם יָצָ֣א מִירוּשָׁלִָ֑ם וַיִּמְצָ֣א אֹת֡וֹ אֲחִיָּה֩ הַשִּׁילֹנִ֨י הַנָּבִ֜יא בַּדֶּ֗רֶךְ וְה֤וּא מִתְכַּסֶּה֙ בְּשַׂלְמָ֣ה חֲדָשָׁ֔ה וּשְׁנֵיהֶ֥ם לְבַדָּ֖ם בַּשָּׂדֶֽה׃

‎30 ‏וַיִּתְפֹּ֣שׂ אֲחִיָּ֔ה בַּשַּׂלְמָ֥ה הַחֲדָשָׁ֖ה אֲשֶׁ֣ר עָלָ֑יו וַיִּ֨קְרָעֶ֔הָ שְׁנֵ֥ים עָשָׂ֖ר קְרָעִֽים׃

‎31 ‏וַיֹּ֙אמֶר֙ לְיָֽרָבְעָ֔ם קַח־לְךָ֖ עֲשָׂרָ֣ה קְרָעִ֑ים כִּ֣י כֹה֩ אָמַ֨ר יְהוָ֜ה אֱלֹהֵ֣י יִשְׂרָאֵ֗ל הִנְנִ֨י קֹרֵ֤עַ אֶת־הַמַּמְלָכָה֙ מִיַּ֣ד שְׁלֹמֹ֔ה וְנָתַתִּ֣י לְךָ֔ אֵ֖ת עֲשָׂרָ֥ה הַשְּׁבָטִֽים׃

‎32 ‏וְהַשֵּׁ֥בֶט הָאֶחָ֖ד יִֽהְיֶה־לּ֑וֹ לְמַ֣עַן׀ עַבְדִּ֣י דָוִ֗ד וּלְמַ֙עַן֙ יְר֣וּשָׁלִַ֔ם הָעִיר֙ אֲשֶׁ֣ר בָּחַ֣רְתִּי בָ֔הּ מִכֹּ֖ל שִׁבְטֵ֥י יִשְׂרָאֵֽל׃

‎33 ‏יַ֣עַן׀ אֲשֶׁ֣ר עֲזָב֗וּנִי וַיִּֽשְׁתַּחֲווּ֮ לְעַשְׁתֹּרֶת֮ אֱלֹהֵ֣י צִֽדֹנִין֒ לִכְמוֹשׁ֙ אֱלֹהֵ֣י מוֹאָ֔ב וּלְמִלְכֹּ֖ם אֱלֹהֵ֣י בְנֵֽי־עַמּ֑וֹן וְלֹֽא־הָלְכ֣וּ בִדְרָכַ֗י לַעֲשׂ֨וֹת הַיָּשָׁ֧ר בְּעֵינַ֛י וְחֻקֹּתַ֥י וּמִשְׁפָּטַ֖י כְּדָוִ֥ד אָבִֽיו׃

‎34 ‏וְלֹֽא־אֶקַּ֥ח אֶת־כָּל־הַמַּמְלָכָ֖ה מִיָּד֑וֹ כִּ֣י׀ נָשִׂ֣יא אֲשִׁתֶ֗נּוּ כֹּ֚ל יְמֵ֣י חַיָּ֔יו לְמַ֨עַן דָּוִ֤ד עַבְדִּי֙ אֲשֶׁ֣ר בָּחַ֣רְתִּי אֹת֔וֹ אֲשֶׁ֥ר שָׁמַ֖ר מִצְוֹתַ֥י וְחֻקֹּתָֽי׃

‎35 ‏וְלָקַחְתִּ֥י הַמְּלוּכָ֖ה מִיַּ֣ד בְּנ֑וֹ וּנְתַתִּ֣יהָ לְּךָ֔ אֵ֖ת עֲשֶׂ֥רֶת הַשְּׁבָטִֽים׃

‎36 ‏וְלִבְנ֖וֹ אֶתֵּ֣ן שֵֽׁבֶט־אֶחָ֑ד לְמַ֣עַן הֱיֽוֹת־נִ֣יר לְדָֽוִיד־עַ֠בְדִּי כָּֽל־הַיָּמִ֤ים׀ לְפָנַי֙ בִּיר֣וּשָׁלִַ֔ם הָעִיר֙ אֲשֶׁ֣ר בָּחַ֣רְתִּי לִ֔י לָשׂ֥וּם שְׁמִ֖י שָֽׁם׃

‎37 ‏וְאֹתְךָ֣ אֶקַּ֔ח וּמָ֣לַכְתָּ֔ בְּכֹ֥ל אֲשֶׁר־תְּאַוֶּ֖ה נַפְשֶׁ֑ךָ וְהָיִ֥יתָ מֶּ֖לֶךְ עַל־יִשְׂרָאֵֽל׃

‎38 ‏וְהָיָ֗ה אִם־תִּשְׁמַע֮ אֶת־כָּל־אֲשֶׁ֣ר אֲצַוֶּךָ֒ וְהָלַכְתָּ֣ בִדְרָכַ֗י וְעָשִׂ֨יתָ הַיָּשָׁ֤ר בְּעֵינַי֙ לִשְׁמ֤וֹר חֻקּוֹתַי֙ וּמִצְוֹתַ֔י כַּאֲשֶׁ֥ר עָשָׂ֖ה דָּוִ֣ד עַבְדִּ֑י וְהָיִ֣יתִי עִמָּ֗ךְ וּבָנִ֨יתִי לְךָ֤ בַֽיִת־נֶאֱמָן֙ כַּאֲשֶׁ֣ר בָּנִ֣יתִי לְדָוִ֔ד וְנָתַתִּ֥י לְךָ֖ אֶת־יִשְׂרָאֵֽל׃

‎39 ‏וַֽאעַנֶּ֛ה אֶת־זֶ֥רַע דָּוִ֖ד לְמַ֣עַן זֹ֑את אַ֖ךְ לֹ֥א כָל־הַיָּמִֽים׃ ס

‎40 ‏וַיְבַקֵּ֥שׁ שְׁלֹמֹ֖ה לְהָמִ֣ית אֶת־יָרָבְעָ֑ם וַיָּ֣קָם יָרָבְעָ֗ם וַיִּבְרַ֤ח מִצְרַ֙יִם֙ אֶל־שִׁישַׁ֣ק מֶֽלֶךְ־מִצְרַ֔יִם וַיְהִ֥י בְמִצְרַ֖יִם עַד־מ֥וֹת שְׁלֹמֹֽה׃

‎41 ‏וְיֶ֨תֶר דִּבְרֵ֧י שְׁלֹמֹ֛ה וְכָל־אֲשֶׁ֥ר עָשָׂ֖ה וְחָכְמָת֑וֹ הֲלֽוֹא־הֵ֣ם כְּתֻבִ֔ים עַל־סֵ֖פֶר דִּבְרֵ֥י שְׁלֹמֹֽה׃

‎42 ‏וְהַיָּמִ֗ים אֲשֶׁר֩ מָלַ֨ךְ שְׁלֹמֹ֤ה בִירוּשָׁלִַ֙ם֙ עַל־כָּל־יִשְׂרָאֵ֔ל אַרְבָּעִ֖ים שָׁנָֽה׃

‎43 ‏וַיִּשְׁכַּ֤ב שְׁלֹמֹה֙ עִם־אֲבֹתָ֔יו וַיִּ֨קָּבֵ֔ר בְּעִ֖יר דָּוִ֣ד אָבִ֑יו וַיִּמְלֹ֛ךְ רְחַבְעָ֥ם בְּנ֖וֹ תַּחְתָּֽיו׃ ס

1 wəhammeleḵə šəlōmōh ’âaḇ nāšîm nāḵərîywōṯ rabwōṯ wə’eṯ-baṯ-parə‘ōh mwō’ăḇîywōṯ ‘ammŏnîywōṯ ’ăḏōmîyōṯ ṣēḏənîyōṯ ḥitîyōṯ:

2 min-hagwōyim ’ăšer ’āmar-yəhwâ ’el-bənê yiśərā’ēl lō’-ṯāḇō’û ḇâem wəhēm lō’-yāḇō’û ḇāḵem ’āḵēn yaṭṭû ’eṯ-ləḇaḇəḵem ’^aḥărê ’ĕlōhêhem bâem dāḇaq šəlōmōh lə’ahăḇâ:

3 wayəhî-lwō nāšîm śārwōṯ šəḇ^a‘ mē’wōṯ ûfilaḡəšîm šəlōš mē’wōṯ wayyaṭṭû nāšāyw ’eṯ-libwō:

4 wayəhî lə‘ēṯ ziqənaṯ šəlōmōh nāšāyw hiṭṭû ’eṯ-ləḇāḇwō ’^aḥărê ’ĕlōhîm ’ăḥērîm wəlō’-hāyâ ləḇāḇwō šālēm ‘im-yəhwâ ’ĕlōhāyw kiləḇaḇ dāwîḏ ’āḇîw:

5 wayyēleḵə šəlōmōh ’^aḥărê ‘ašətōreṯ ’ĕlōhê ṣiḏōnîm wə’^aḥărê miləkōm šiqquṣ ‘ammōnîm:

6 wayy^a‘aś šəlōmōh hār^a‘ bə‘ênê yəhwâ wəlō’ millē’ ’^aḥărê yəhwâ kəḏāwiḏ ’āḇîw: s

7 ’āz yiḇəneh šəlōmōh bāmâ liḵəmwōš šiqquṣ mwō’āḇ bâār ’ăšer ‘al-pənê yərûšālāim ûləmōleḵə šiqquṣ bənê ‘ammwōn:

8 wəḵēn ‘āśâ ləḵāl-nāšāyw hannāḵərîywōṯ maqəṭîrwōṯ ûməzabəḥwōṯ lē’lōhêhen:

9 wayyiṯə’annaf yəhwâ bišəlōmōh kî-nāṭâ ləḇāḇwō mē‘im yəhwâ ’ĕlōhê yiśərā’ēl hannirə’â ’ēlāyw p^a‘ămāyim:

10 wəṣiûâ ’ēlāyw ‘al-hadāḇār hazzeh ləḇilətî-leḵeṯ ’^aḥărê ’ĕlōhîm ’ăḥērîm wəlō’ šāmar ’ēṯ ’ăšer-ṣiûâ yəhwâ: f

11 wayyō’mer yəhwâ lišəlōmōh y^a‘an ’ăšer hāyəṯâ-zzō’ṯ ‘immāḵə wəlō’ šāmarətā bərîṯî wəḥuqqōṯay ’ăšer ṣiûîṯî ‘āleyḵā qārō‘a ’eqər^a‘ ’eṯ-hammaməlāḵâ mē‘āleyḵā ûnəṯatîhā lə‘aḇədeḵā:

12 ’aḵə-bəyāmeyḵā lō’ ’e‘ĕśennâ ləm^a‘an dāwiḏ ’āḇîḵā mîyaḏ binəḵā ’eqərā‘ennâ:

13 raq ’eṯ-kāl-hammaməlāḵâ lō’ ’eqərā‘ šēḇeṭ ’eḥāḏ ’etēn liḇəneḵā ləm^a‘an dāwiḏ ‘aḇədî ûləm^a‘an yərûšālaim ’ăšer bāḥārətî:

14 wayyāqem yəhwâ śāṭān lišəlōmōh ’ēṯ hăḏaḏ hā’ăḏōmî mizzer^a‘ hammeleḵə hû’ be’ĕḏwōm:

15 wayəhî bihəywōṯ dāwiḏ ’eṯ-’ĕḏwōm b^a‘ălwōṯ ywō’āḇ śar haṣṣāḇā’ ləqabēr ’eṯ-h^aḥălālîm wayyaḵə kāl-zāḵār be’ĕḏwōm:

16 kî šēšeṯ ḥŏḏāšîm yāšaḇ-šām ywō’āḇ wəḵāl-yiśərā’ēl ‘aḏ-hiḵərîṯ kāl-zāḵār be’ĕḏwōm:

17 wayyiḇər^aḥ ’ăḏaḏ hû’ wa’ănāšîm ’ăḏōmîyîm mē‘aḇəḏê ’āḇîw ’itwō lāḇwō’ miṣərāyim wahăḏaḏ n^a‘ar qāṭān:

18 wayyāqumû mimmiḏəyān wayyāḇō’û pā’rān wayyiqəḥû ’ănāšîm ‘immām mipā’rān wayyāḇō’û miṣərayim ’el-parə‘ōh meleḵə-miṣərayim wayyiten-lwō ḇayiṯ wəleḥem ’āmar lwō wə’ereṣ nāṯan lwō:

19 wayyiməṣā’ hăḏaḏ ḥēn bə‘ênê farə‘ōh mə’ōḏ wayyiten-lwō ’iššâ ’eṯ-’ăḥwōṯ ’išətwō ’ăḥwōṯ t^aḥəpənês hagəḇîrâ:

20 watēleḏ lwō ’ăḥwōṯ t^aḥəpənês ’ēṯ gənuḇaṯ bənwō watiḡəməlēhû ṯ^aḥəpənēs bəṯwōḵə bêṯ parə‘ōh wayəhî ḡənuḇaṯ bêṯ parə‘ōh bəṯwōḵə bənê farə‘ōh:

21 wahăḏaḏ šām^a‘ bəmiṣərayim kî-šāḵaḇ dāwiḏ ‘im-’ăḇōṯāyw wəḵî-mēṯ ywō’āḇ śar-haṣṣāḇā’ wayyō’mer hăḏaḏ ’el-parə‘ōh šalləḥēnî wə’ēlēḵə ’el-’arəṣî:

22 wayyō’mer lwō farə‘ōh kî mâ-’atâ ḥāsēr ‘immî wəhinnəḵā məḇaqqēš lāleḵeṯ ’el-’arəṣeḵā wayyō’mer| lō’ kî šallēḥa təšalləḥēnî:

23 wayyāqem ’ĕlōhîm lwō śāṭān ’eṯ-rəzwōn ben-’eləyāḏā‘ ’ăšer bār^aḥ mē’ēṯ hăḏaḏə‘ezer meleḵə-ṣwōḇâ ’ăḏōnāyw:

24 wayyiqəbōṣ ‘ālāyw ’ănāšîm wayəhî śar-gəḏûḏ bahărōḡ dāwiḏ ’ōṯām wayyēləḵû ḏammeśeq wayyēšəḇû ḇāh wayyimələḵû bəḏammāśeq:

25 wayəhî śāṭān ləyiśərā’ēl kāl-yəmê šəlōmōh wə’eṯ-hārā‘â ’ăšer hăḏāḏ wayyāqāṣ bəyiśərā’ēl wayyiməlōḵə ‘al-’ărām: f

26 wəyārāḇə‘ām ben-nəḇāṭ ’efərāṯî min-haṣṣərēḏâ wəšēm ’immwō ṣərû‘â ’iššâ ’aləmānâ ‘eḇeḏ lišəlōmōh wayyārem yāḏ bammeleḵə:

27 wəzeh hadāḇār ’ăšer-hērîm yāḏ bammeleḵə šəlōmōh bānâ ’eṯ-hammillwō’ sāḡar ’eṯ-pereṣ ‘îr dāwiḏ ’āḇîw:

28 wəhā’îš yārāḇə‘ām gibwōr ḥāyil wayyarə’ šəlōmōh ’eṯ-hann^a‘ar kî-‘ōśēh məlā’ḵâ hû’ wayyafəqēḏ ’ōṯwō ləḵāl-sēḇel bêṯ ywōsēf: s

29 wayəhî bā‘ēṯ hahî’ wəyārāḇə‘ām yāṣā’ mîrûšālāim wayyiməṣā’ ’ōṯwō ’ăḥîyâ haššîlōnî hannāḇî’ badereḵə wəhû’ miṯəkasseh bəśaləmâ ḥăḏāšâ ûšənêhem ləḇadām baśśāḏeh:

30 wayyiṯəpōś ’ăḥîyâ baśśaləmâ h^aḥăḏāšâ ’ăšer ‘ālāyw wayyiqərā‘ehā šənêm ‘āśār qərā‘îm:

31 wayyō’mer ləyārāḇə‘ām q^aḥ-ləḵā ‘ăśārâ qərā‘îm kî ḵōh ’āmar yəhwâ ’ĕlōhê yiśərā’ēl hinənî qōrē‘a ’eṯ-hammaməlāḵâ mîyaḏ šəlōmōh wənāṯatî ləḵā ’ēṯ ‘ăśārâ haššəḇāṭîm:

32 wəhaššēḇeṭ hā’eḥāḏ yihəyeh-llwō ləm^a‘an| ‘aḇədî ḏāwiḏ ûləm^a‘an yərûšālaim hā‘îr ’ăšer bāḥarətî ḇāh mikōl šiḇəṭê yiśərā’ēl:

33 y^a‘an| ’ăšer ‘ăzāḇûnî wayyišət^aḥăwû lə‘ašətōreṯ ’ĕlōhê ṣiḏōnîn liḵəmwōš ’ĕlōhê mwō’āḇ ûləmiləkōm ’ĕlōhê ḇənê-‘ammwōn wəlō’-hāləḵû ḇiḏərāḵay l^a‘ăśwōṯ hayyāšār bə‘ênay wəḥuqqōṯay ûmišəpāṭay kəḏāwiḏ ’āḇîw:

34 wəlō’-’eqq^aḥ ’eṯ-kāl-hammaməlāḵâ mîyāḏwō kî| nāśî’ ’ăšiṯennû kōl yəmê ḥayyāyw ləm^a‘an dāwiḏ ‘aḇədî ’ăšer bāḥarətî ’ōṯwō ’ăšer šāmar miṣəwōṯay wəḥuqqōṯāy:

35 wəlāq^aḥətî hamməlûḵâ mîyaḏ bənwō ûnəṯatîhā lləḵā ’ēṯ ‘ăśereṯ haššəḇāṭîm:

36 wəliḇənwō ’etēn šēḇeṭ-’eḥāḏ ləm^a‘an hĕywōṯ-nîr ləḏāwîḏ-‘aḇədî kāl-hayyāmîm| ləfānay bîrûšālaim hā‘îr ’ăšer bāḥarətî lî lāśûm šəmî šām:

37 wə’ōṯəḵā ’eqq^aḥ ûmālaḵətā bəḵōl ’ăšer-tə’aûeh nafəšeḵā wəhāyîṯā mmeleḵə ‘al-yiśərā’ēl:

38 wəhāyâ ’im-tišəm^a‘ ’eṯ-kāl-’ăšer ’ăṣaûeḵā wəhālaḵətā ḇiḏərāḵay wə‘āśîṯā hayyāšār bə‘ênay lišəmwōr ḥuqqwōṯay ûmiṣəwōṯay ka’ăšer ‘āśâ dāwiḏ ‘aḇədî wəhāyîṯî ‘immāḵə ûḇānîṯî ləḵā ḇayiṯ-ne’ĕmān ka’ăšer bānîṯî ləḏāwiḏ wənāṯatî ləḵā ’eṯ-yiśərā’ēl:

39 wa’‘anneh ’eṯ-zer^a‘ dāwiḏ ləm^a‘an zō’ṯ ’aḵə lō’ ḵāl-hayyāmîm: s

40 wayəḇaqqēš šəlōmōh ləhāmîṯ ’eṯ-yārāḇə‘ām wayyāqām yārāḇə‘ām wayyiḇər^aḥ miṣərayim ’el-šîšaq meleḵə-miṣərayim wayəhî ḇəmiṣərayim ‘aḏ-mwōṯ šəlōmōh:

41 wəyeṯer diḇərê šəlōmōh wəḵāl-’ăšer ‘āśâ wəḥāḵəmāṯwō hălwō’-hēm kəṯuḇîm ‘al-sēfer diḇərê šəlōmōh:

42 wəhayyāmîm ’ăšer mālaḵə šəlōmōh ḇîrûšālaim ‘al-kāl-yiśərā’ēl ’arəbā‘îm šānâ:

43 wayyišəkaḇ šəlōmōh ‘im-’ăḇōṯāyw wayyiqqāḇēr bə‘îr dāwiḏ ’āḇîw wayyiməlōḵə rəḥaḇə‘ām bənwō t^aḥətāyw: s