‎1 ‏אָ֣ז יַקְהֵ֣ל שְׁלֹמֹ֣ה אֶת־זִקְנֵ֣י יִשְׂרָאֵ֡ל אֶת־כָּל־רָאשֵׁ֣י הַמַּטּוֹת֩ נְשִׂיאֵ֨י הָאָב֜וֹת לִבְנֵ֧י יִשְׂרָאֵ֛ל אֶל־הַמֶּ֥לֶךְ שְׁלֹמֹ֖ה יְרוּשָׁלִָ֑ם לְֽהַעֲל֞וֹת אֶת־אֲר֧וֹן בְּרִית־יְהוָ֛ה מֵעִ֥יר דָּוִ֖ד הִ֥יא צִיּֽוֹן׃

‎2 ‏וַיִּקָּ֨הֲל֜וּ אֶל־הַמֶּ֤לֶךְ שְׁלֹמֹה֙ כָּל־אִ֣ישׁ יִשְׂרָאֵ֔ל בְּיֶ֥רַח הָאֵֽתָנִ֖ים בֶּחָ֑ג ה֖וּא הַחֹ֥דֶשׁ הַשְּׁבִיעִֽי׃

‎3 ‏וַיָּבֹ֕אוּ כֹּ֖ל זִקְנֵ֣י יִשְׂרָאֵ֑ל וַיִּשְׂא֥וּ הַכֹּהֲנִ֖ים אֶת־הָאָרֽוֹן׃

‎4 ‏וַֽיַּעֲל֞וּ אֶת־אֲר֤וֹן יְהוָה֙ וְאֶת־אֹ֣הֶל מוֹעֵ֔ד וְאֶֽת־כָּל־כְּלֵ֥י הַקֹּ֖דֶשׁ אֲשֶׁ֣ר בָּאֹ֑הֶל וַיַּעֲל֣וּ אֹתָ֔ם הַכֹּהֲנִ֖ים וְהַלְוִיִּֽם׃

‎5 ‏וְהַמֶּ֣לֶךְ שְׁלֹמֹ֗ה וְכָל־עֲדַ֤ת יִשְׂרָאֵל֙ הַנּוֹעָדִ֣ים עָלָ֔יו אִתּ֖וֹ לִפְנֵ֣י הָֽאָר֑וֹן מְזַבְּחִים֙ צֹ֣אן וּבָקָ֔ר אֲשֶׁ֧ר לֹֽא־יִסָּפְר֛וּ וְלֹ֥א יִמָּנ֖וּ מֵרֹֽב׃

‎6 ‏וַיָּבִ֣אוּ הַ֠כֹּהֲנִים אֶת־אֲר֨וֹן בְּרִית־יְהוָ֧ה אֶל־מְקוֹמ֛וֹ אֶל־דְּבִ֥יר הַבַּ֖יִת אֶל־קֹ֣דֶשׁ הַקֳּדָשִׁ֑ים אֶל־תַּ֖חַת כַּנְפֵ֥י הַכְּרוּבִֽים׃

‎7 ‏כִּ֤י הַכְּרוּבִים֙ פֹּרְשִׂ֣ים כְּנָפַ֔יִם אֶל־מְק֖וֹם הָֽאָר֑וֹן וַיָּסֹ֧כּוּ הַכְּרֻבִ֛ים עַל־הָאָר֥וֹן וְעַל־בַּדָּ֖יו מִלְמָֽעְלָה׃

‎8 ‏וַֽיַּאֲרִכוּ֮ הַבַּדִּים֒ וַיֵּרָאוּ֩ רָאשֵׁ֨י הַבַּדִּ֤ים מִן־הַקֹּ֙דֶשׁ֙ עַל־פְּנֵ֣י הַדְּבִ֔יר וְלֹ֥א יֵרָא֖וּ הַח֑וּצָה וַיִּ֣הְיוּ שָׁ֔ם עַ֖ד הַיּ֥וֹם הַזֶּֽה׃

‎9 ‏אֵ֚ין בָּֽאָר֔וֹן רַ֗ק שְׁנֵי֙ לֻח֣וֹת הָאֲבָנִ֔ים אֲשֶׁ֨ר הִנִּ֥חַ שָׁ֛ם מֹשֶׁ֖ה בְּחֹרֵ֑ב אֲשֶׁ֨ר כָּרַ֤ת יְהוָה֙ עִם־בְּנֵ֣י יִשְׂרָאֵ֔ל בְּצֵאתָ֖ם מֵאֶ֥רֶץ מִצְרָֽיִם׃

‎10 ‏וַיְהִ֕י בְּצֵ֥את הַכֹּהֲנִ֖ים מִן־הַקֹּ֑דֶשׁ וְהֶעָנָ֥ן מָלֵ֖א אֶת־בֵּ֥ית יְהוָֽה׃

‎11 ‏וְלֹֽא־יָכְל֧וּ הַכֹּהֲנִ֛ים לַעֲמֹ֥ד לְשָׁרֵ֖ת מִפְּנֵ֥י הֶֽעָנָ֑ן כִּי־מָלֵ֥א כְבוֹד־יְהוָ֖ה אֶת־בֵּ֥ית יְהוָֽה׃ פ

‎12 ‏אָ֖ז אָמַ֣ר שְׁלֹמֹ֑ה יְהוָ֣ה אָמַ֔ר לִשְׁכֹּ֖ן בָּעֲרָפֶֽל׃

‎13 ‏בָּנֹ֥ה בָנִ֛יתִי בֵּ֥ית זְבֻ֖ל לָ֑ךְ מָכ֥וֹן לְשִׁבְתְּךָ֖ עוֹלָמִֽים׃

‎14 ‏וַיַּסֵּ֤ב הַמֶּ֙לֶךְ֙ אֶת־פָּנָ֔יו וַיְבָ֕רֶךְ אֵ֖ת כָּל־קְהַ֣ל יִשְׂרָאֵ֑ל וְכָל־קְהַ֥ל יִשְׂרָאֵ֖ל עֹמֵֽד׃

‎15 ‏וַיֹּ֗אמֶר בָּר֤וּךְ יְהוָה֙ אֱלֹהֵ֣י יִשְׂרָאֵ֔ל אֲשֶׁר֙ דִּבֶּ֣ר בְּפִ֔יו אֵ֖ת דָּוִ֣ד אָבִ֑י וּבְיָד֥וֹ מִלֵּ֖א לֵאמֹֽר׃

‎16 ‏מִן־הַיּ֗וֹם אֲשֶׁ֨ר הוֹצֵ֜אתִי אֶת־עַמִּ֣י אֶת־יִשְׂרָאֵל֮ מִמִּצְרַיִם֒ לֹֽא־בָחַ֣רְתִּי בְעִ֗יר מִכֹּל֙ שִׁבְטֵ֣י יִשְׂרָאֵ֔ל לִבְנ֣וֹת בַּ֔יִת לִהְי֥וֹת שְׁמִ֖י שָׁ֑ם וָאֶבְחַ֣ר בְּדָוִ֔ד לִֽהְי֖וֹת עַל־עַמִּ֥י יִשְׂרָאֵֽל׃

‎17 ‏וַיְהִ֕י עִם־לְבַ֖ב דָּוִ֣ד אָבִ֑י לִבְנ֣וֹת בַּ֔יִת לְשֵׁ֥ם יְהוָ֖ה אֱלֹהֵ֥י יִשְׂרָאֵֽל׃

‎18 ‏וַיֹּ֤אמֶר יְהוָה֙ אֶל־דָּוִ֣ד אָבִ֔י יַ֗עַן אֲשֶׁ֤ר הָיָה֙ עִם־לְבָ֣בְךָ֔ לִבְנ֥וֹת בַּ֖יִת לִשְׁמִ֑י הֱטִיבֹ֔תָ כִּ֥י הָיָ֖ה עִם־לְבָבֶֽךָ׃

‎19 ‏רַ֣ק אַתָּ֔ה לֹ֥א תִבְנֶ֖ה הַבָּ֑יִת כִּ֤י אִם־בִּנְךָ֙ הַיֹּצֵ֣א מֵחֲלָצֶ֔יךָ הֽוּא־יִבְנֶ֥ה הַבַּ֖יִת לִשְׁמִֽי׃

‎20 ‏וַיָּ֣קֶם יְהוָ֔ה אֶת־דְּבָר֖וֹ אֲשֶׁ֣ר דִּבֵּ֑ר וָאָקֻ֡ם תַּחַת֩ דָּוִ֨ד אָבִ֜י וָאֵשֵׁ֣ב עַל־כִּסֵּ֣א יִשְׂרָאֵ֗ל כַּֽאֲשֶׁר֙ דִּבֶּ֣ר יְהוָ֔ה וָאֶבְנֶ֣ה הַבַּ֔יִת לְשֵׁ֥ם יְהוָ֖ה אֱלֹהֵ֥י יִשְׂרָאֵֽל׃

‎21 ‏וָאָשִׂ֨ם שָׁ֤ם מָקוֹם֙ לָֽאָר֔וֹן אֲשֶׁר־שָׁ֖ם בְּרִ֣ית יְהוָ֑ה אֲשֶׁ֤ר כָּרַת֙ עִם־אֲבֹתֵ֔ינוּ בְּהוֹצִיא֥וֹ אֹתָ֖ם מֵאֶ֥רֶץ מִצְרָֽיִם׃ ס

‎22 ‏וַיַּעֲמֹ֣ד שְׁלֹמֹ֗ה לִפְנֵי֙ מִזְבַּ֣ח יְהוָ֔ה נֶ֖גֶד כָּל־קְהַ֣ל יִשְׂרָאֵ֑ל וַיִּפְרֹ֥שׂ כַּפָּ֖יו הַשָּׁמָֽיִם׃

‎23 ‏וַיֹּאמַ֗ר יְהוָ֞ה אֱלֹהֵ֤י יִשְׂרָאֵל֙ אֵין־כָּמ֣וֹךָ אֱלֹהִ֔ים בַּשָּׁמַ֣יִם מִמַּ֔עַל וְעַל־הָאָ֖רֶץ מִתָּ֑חַת שֹׁמֵ֤ר הַבְּרִית֙ וְֽהַחֶ֔סֶד לַעֲבָדֶ֕יךָ הַהֹלְכִ֥ים לְפָנֶ֖יךָ בְּכָל־לִבָּֽם׃

‎24 ‏אֲשֶׁ֣ר שָׁמַ֗רְתָּ לְעַבְדְּךָ֙ דָּוִ֣ד אָבִ֔י אֵ֥ת אֲשֶׁר־דִּבַּ֖רְתָּ ל֑וֹ וַתְּדַבֵּ֥ר בְּפִ֛יךָ וּבְיָדְךָ֥ מִלֵּ֖אתָ כַּיּ֥וֹם הַזֶּֽה׃

‎25 ‏וְעַתָּ֞ה יְהוָ֣ה׀ אֱלֹהֵ֣י יִשְׂרָאֵ֗ל שְׁ֠מֹר לְעַבְדְּךָ֙ דָוִ֤ד אָבִי֙ אֵת֩ אֲשֶׁ֨ר דִּבַּ֤רְתָּ לּוֹ֙ לֵאמֹ֔ר לֹא־יִכָּרֵ֨ת לְךָ֥ אִישׁ֙ מִלְּפָנַ֔י יֹשֵׁ֖ב עַל־כִּסֵּ֣א יִשְׂרָאֵ֑ל רַ֠ק אִם־יִשְׁמְר֨וּ בָנֶ֤יךָ אֶת־דַּרְכָּם֙ לָלֶ֣כֶת לְפָנַ֔י כַּאֲשֶׁ֥ר הָלַ֖כְתָּ לְפָנָֽי׃

‎26 ‏וְעַתָּ֖ה אֱלֹהֵ֣י יִשְׂרָאֵ֑ל יֵאָ֤מֶן נָא֙ דבריך דְּבָ֣רְךָ֔ אֲשֶׁ֣ר דִּבַּ֔רְתָּ לְעַבְדְּךָ֖ דָּוִ֥ד אָבִֽי׃

‎27 ‏כִּ֚י הַֽאֻמְנָ֔ם יֵשֵׁ֥ב אֱלֹהִ֖ים עַל־הָאָ֑רֶץ הִ֠נֵּה הַשָּׁמַ֜יִם וּשְׁמֵ֤י הַשָּׁמַ֙יִם֙ לֹ֣א יְכַלְכְּל֔וּךָ אַ֕ף כִּֽי־הַבַּ֥יִת הַזֶּ֖ה אֲשֶׁ֥ר בָּנִֽיתִי׃

‎28 ‏וּפָנִ֜יתָ אֶל־תְּפִלַּ֧ת עַבְדְּךָ֛ וְאֶל־תְּחִנָּת֖וֹ יְהוָ֣ה אֱלֹהָ֑י לִשְׁמֹ֤עַ אֶל־הָֽרִנָּה֙ וְאֶל־הַתְּפִלָּ֔ה אֲשֶׁ֧ר עַבְדְּךָ֛ מִתְפַּלֵּ֥ל לְפָנֶ֖יךָ הַיּֽוֹם׃

‎29 ‏לִהְיוֹת֩ עֵינֶ֨ךָ פְתֻח֜וֹת אֶל־הַבַּ֤יִת הַזֶּה֙ לַ֣יְלָה וָי֔וֹם אֶל־הַ֨מָּק֔וֹם אֲשֶׁ֣ר אָמַ֔רְתָּ יִהְיֶ֥ה שְׁמִ֖י שָׁ֑ם לִשְׁמֹ֙עַ֙ אֶל־הַתְּפִלָּ֔ה אֲשֶׁ֣ר יִתְפַּלֵּ֣ל עַבְדְּךָ֔ אֶל־הַמָּק֖וֹם הַזֶּֽה׃

‎30 ‏וְשָׁ֨מַעְתָּ֜ אֶל־תְּחִנַּ֤ת עַבְדְּךָ֙ וְעַמְּךָ֣ יִשְׂרָאֵ֔ל אֲשֶׁ֥ר יִֽתְפַּֽלְל֖וּ אֶל־הַמָּק֣וֹם הַזֶּ֑ה וְ֠אַתָּה תִּשְׁמַ֞ע אֶל־מְק֤וֹם שִׁבְתְּךָ֙ אֶל־הַשָּׁמַ֔יִם וְשָׁמַעְתָּ֖ וְסָלָֽחְתָּ׃

‎31 ‏אֵת֩ אֲשֶׁ֨ר יֶחֱטָ֥א אִישׁ֙ לְרֵעֵ֔הוּ וְנָֽשָׁא־ב֥וֹ אָלָ֖ה לְהַֽאֲלֹת֑וֹ וּבָ֗א אָלָ֛ה לִפְנֵ֥י מִֽזְבַּחֲךָ֖ בַּבַּ֥יִת הַזֶּֽה׃

‎32 ‏וְאַתָּ֣ה׀ תִּשְׁמַ֣ע הַשָּׁמַ֗יִם וְעָשִׂ֙יתָ֙ וְשָׁפַטְתָּ֣ אֶת־עֲבָדֶ֔יךָ לְהַרְשִׁ֣יעַ רָשָׁ֔ע לָתֵ֥ת דַּרְכּ֖וֹ בְּרֹאשׁ֑וֹ וּלְהַצְדִּ֣יק צַדִּ֔יק לָ֥תֶת ל֖וֹ כְּצִדְקָתֽוֹ׃ ס

‎33 ‏בְּֽהִנָּגֵ֞ף עַמְּךָ֧ יִשְׂרָאֵ֛ל לִפְנֵ֥י אוֹיֵ֖ב אֲשֶׁ֣ר יֶחֶטְאוּ־לָ֑ךְ וְשָׁ֤בוּ אֵלֶ֙יךָ֙ וְהוֹד֣וּ אֶת־שְׁמֶ֔ךָ וְהִֽתְפַּֽלְל֧וּ וְהִֽתְחַנְּנ֛וּ אֵלֶ֖יךָ בַּבַּ֥יִת הַזֶּֽה׃

‎34 ‏וְאַתָּה֙ תִּשְׁמַ֣ע הַשָּׁמַ֔יִם וְסָ֣לַחְתָּ֔ לְחַטַּ֖את עַמְּךָ֣ יִשְׂרָאֵ֑ל וַהֲשֵֽׁבֹתָם֙ אֶל־הָ֣אֲדָמָ֔ה אֲשֶׁ֥ר נָתַ֖תָּ לַאֲבוֹתָֽם׃ ס

‎35 ‏בְּהֵעָצֵ֥ר שָׁמַ֛יִם וְלֹא־יִהְיֶ֥ה מָטָ֖ר כִּ֣י יֶחֶטְאוּ־לָ֑ךְ וְהִֽתְפַּֽלְל֞וּ אֶל־הַמָּק֤וֹם הַזֶּה֙ וְהוֹד֣וּ אֶת־שְׁמֶ֔ךָ וּמֵחַטָּאתָ֥ם יְשׁוּב֖וּן כִּ֥י תַעֲנֵֽם׃

‎36 ‏וְאַתָּ֣ה׀ תִּשְׁמַ֣ע הַשָּׁמַ֗יִם וְסָ֨לַחְתָּ֜ לְחַטַּ֤את עֲבָדֶ֙יךָ֙ וְעַמְּךָ֣ יִשְׂרָאֵ֔ל כִּ֥י תוֹרֵ֛ם אֶת־הַדֶּ֥רֶךְ הַטּוֹבָ֖ה אֲשֶׁ֣ר יֵֽלְכוּ־בָ֑הּ וְנָתַתָּ֤ה מָטָר֙ עַל־אַרְצְךָ֔ אֲשֶׁר־נָתַ֥תָּה לְעַמְּךָ֖ לְנַחֲלָֽה׃ ס

‎37 ‏רָעָ֞ב כִּֽי־יִהְיֶ֣ה בָאָ֗רֶץ דֶּ֣בֶר כִּֽי־יִ֠הְיֶה שִׁדָּפ֨וֹן יֵרָק֜וֹן אַרְבֶּ֤ה חָסִיל֙ כִּ֣י יִהְיֶ֔ה כִּ֧י יָֽצַר־ל֛וֹ אֹיְב֖וֹ בְּאֶ֣רֶץ שְׁעָרָ֑יו כָּל־נֶ֖גַע כָּֽל־מַחֲלָֽה׃

‎38 ‏כָּל־תְּפִלָּ֣ה כָל־תְּחִנָּ֗ה אֲשֶׁ֤ר תִֽהְיֶה֙ לְכָל־הָ֣אָדָ֔ם לְכֹ֖ל עַמְּךָ֣ יִשְׂרָאֵ֑ל אֲשֶׁ֣ר יֵדְע֗וּן אִ֚ישׁ נֶ֣גַע לְבָב֔וֹ וּפָרַ֥שׂ כַּפָּ֖יו אֶל־הַבַּ֥יִת הַזֶּֽה׃

‎39 ‏וְ֠אַתָּה תִּשְׁמַ֨ע הַשָּׁמַ֜יִם מְכ֤וֹן שִׁבְתֶּ֙ךָ֙ וְסָלַחְתָּ֣ וְעָשִׂ֔יתָ וְנָתַתָּ֤ לָאִישׁ֙ כְּכָל־דְּרָכָ֔יו אֲשֶׁ֥ר תֵּדַ֖ע אֶת־לְבָב֑וֹ כִּֽי־אַתָּ֤ה יָדַ֙עְתָּ֙ לְבַדְּךָ֔ אֶת־לְבַ֖ב כָּל־בְּנֵ֥י הָאָדָֽם׃

‎40 ‏לְמַ֙עַן֙ יִֽרָא֔וּךָ כָּל־הַ֨יָּמִ֔ים אֲשֶׁר־הֵ֥ם חַיִּ֖ים עַל־פְּנֵ֣י הָאֲדָמָ֑ה אֲשֶׁ֥ר נָתַ֖תָּה לַאֲבֹתֵֽינוּ׃

‎41 ‏וְגַם֙ אֶל־הַנָּכְרִ֔י אֲשֶׁ֛ר לֹא־מֵעַמְּךָ֥ יִשְׂרָאֵ֖ל ה֑וּא וּבָ֛א מֵאֶ֥רֶץ רְחוֹקָ֖ה לְמַ֥עַן שְׁמֶֽךָ׃

‎42 ‏כִּ֤י יִשְׁמְעוּן֙ אֶת־שִׁמְךָ֣ הַגָּד֔וֹל וְאֶת־יָֽדְךָ֙ הַֽחֲזָקָ֔ה וּֽזְרֹעֲךָ֖ הַנְּטוּיָ֑ה וּבָ֥א וְהִתְפַּלֵּ֖ל אֶל־הַבַּ֥יִת הַזֶּֽה׃

‎43 ‏אַתָּ֞ה תִּשְׁמַ֤ע הַשָּׁמַ֙יִם֙ מְכ֣וֹן שִׁבְתֶּ֔ךָ וְעָשִׂ֕יתָ כְּכֹ֛ל אֲשֶׁר־יִקְרָ֥א אֵלֶ֖יךָ הַנָּכְרִ֑י לְמַ֣עַן יֵדְעוּן֩ כָּל־עַמֵּ֨י הָאָ֜רֶץ אֶת־שְׁמֶ֗ךָ לְיִרְאָ֤ה אֹֽתְךָ֙ כְּעַמְּךָ֣ יִשְׂרָאֵ֔ל וְלָדַ֕עַת כִּי־שִׁמְךָ֣ נִקְרָ֔א עַל־הַבַּ֥יִת הַזֶּ֖ה אֲשֶׁ֥ר בָּנִֽיתִי׃

‎44 ‏כִּי־יֵצֵ֨א עַמְּךָ֤ לַמִּלְחָמָה֙ עַל־אֹ֣יְב֔וֹ בַּדֶּ֖רֶךְ אֲשֶׁ֣ר תִּשְׁלָחֵ֑ם וְהִתְפַּֽלְל֣וּ אֶל־יְהוָ֗ה דֶּ֤רֶךְ הָעִיר֙ אֲשֶׁ֣ר בָּחַ֣רְתָּ בָּ֔הּ וְהַבַּ֖יִת אֲשֶׁר־בָּנִ֥תִי לִשְׁמֶֽךָ׃

‎45 ‏וְשָׁמַעְתָּ֙ הַשָּׁמַ֔יִם אֶת־תְּפִלָּתָ֖ם וְאֶת־תְּחִנָּתָ֑ם וְעָשִׂ֖יתָ מִשְׁפָּטָֽם׃

‎46 ‏כִּ֣י יֶֽחֶטְאוּ־לָ֗ךְ כִּ֣י אֵ֤ין אָדָם֙ אֲשֶׁ֣ר לֹא־יֶחֱטָ֔א וְאָנַפְתָּ֣ בָ֔ם וּנְתַתָּ֖ם לִפְנֵ֣י אוֹיֵ֑ב וְשָׁב֤וּם שֹֽׁבֵיהֶם֙ אֶל־אֶ֣רֶץ הָאוֹיֵ֔ב רְחוֹקָ֖ה א֥וֹ קְרוֹבָֽה׃

‎47 ‏וְהֵשִׁ֙יבוּ֙ אֶל־לִבָּ֔ם בָּאָ֖רֶץ אֲשֶׁ֣ר נִשְׁבּוּ־שָׁ֑ם וְשָׁ֣בוּ׀ וְהִֽתְחַנְּנ֣וּ אֵלֶ֗יךָ בְּאֶ֤רֶץ שֹֽׁבֵיהֶם֙ לֵאמֹ֔ר חָטָ֥אנוּ וְהֶעֱוִ֖ינוּ רָשָֽׁעְנוּ׃

‎48 ‏וְשָׁ֣בוּ אֵלֶ֗יךָ בְּכָל־לְבָבָם֙ וּבְכָל־נַפְשָׁ֔ם בְּאֶ֥רֶץ אֹיְבֵיהֶ֖ם אֲשֶׁר־שָׁב֣וּ אֹתָ֑ם וְהִֽתְפַּֽלְל֣וּ אֵלֶ֗יךָ דֶּ֤רֶךְ אַרְצָם֙ אֲשֶׁ֣ר נָתַ֣תָּה לַאֲבוֹתָ֔ם הָעִיר֙ אֲשֶׁ֣ר בָּחַ֔רְתָּ וְהַבַּ֖יִת אֲשֶׁר־בנית בָּנִ֥יתִי לִשְׁמֶֽךָ׃

‎49 ‏וְשָׁמַעְתָּ֤ הַשָּׁמַ֙יִם֙ מְכ֣וֹן שִׁבְתְּךָ֔ אֶת־תְּפִלָּתָ֖ם וְאֶת־תְּחִנָּתָ֑ם וְעָשִׂ֖יתָ מִשְׁפָּטָֽם׃

‎50 ‏וְסָלַחְתָּ֤ לְעַמְּךָ֙ אֲשֶׁ֣ר חָֽטְאוּ־לָ֔ךְ וּלְכָל־פִּשְׁעֵיהֶ֖ם אֲשֶׁ֣ר פָּשְׁעוּ־בָ֑ךְ וּנְתַתָּ֧ם לְרַחֲמִ֛ים לִפְנֵ֥י שֹׁבֵיהֶ֖ם וְרִֽחֲמֽוּם׃

‎51 ‏כִּֽי־עַמְּךָ֥ וְנַחֲלָתְךָ֖ הֵ֑ם אֲשֶׁ֤ר הוֹצֵ֙אתָ֙ מִמִּצְרַ֔יִם מִתּ֖וֹךְ כּ֥וּר הַבַּרְזֶֽל׃

‎52 ‏לִהְי֨וֹת עֵינֶ֤יךָ פְתֻחוֹת֙ אֶל־תְּחִנַּ֣ת עַבְדְּךָ֔ וְאֶל־תְּחִנַּ֖ת עַמְּךָ֣ יִשְׂרָאֵ֑ל לִשְׁמֹ֣עַ אֲלֵיהֶ֔ם בְּכֹ֖ל קָרְאָ֥ם אֵלֶֽיךָ׃

‎53 ‏כִּֽי־אַתָּ֞ה הִבְדַּלְתָּ֤ם לְךָ֙ לְֽנַחֲלָ֔ה מִכֹּ֖ל עַמֵּ֣י הָאָ֑רֶץ כַּאֲשֶׁ֨ר דִּבַּ֜רְתָּ בְּיַ֣ד׀ מֹשֶׁ֣ה עַבְדֶּ֗ךָ בְּהוֹצִיאֲךָ֧ אֶת־אֲבֹתֵ֛ינוּ מִמִּצְרַ֖יִם אֲדֹנָ֥י יְהוִֽה׃ פ

‎54 ‏וַיְהִ֣י׀ כְּכַלּ֣וֹת שְׁלֹמֹ֗ה לְהִתְפַּלֵּל֙ אֶל־יְהוָ֔ה אֵ֛ת כָּל־הַתְּפִלָּ֥ה וְהַתְּחִנָּ֖ה הַזֹּ֑את קָ֞ם מִלִּפְנֵ֨י מִזְבַּ֤ח יְהוָה֙ מִכְּרֹ֣עַ עַל־בִּרְכָּ֔יו וְכַפָּ֖יו פְּרֻשׂ֥וֹת הַשָּׁמָֽיִם׃

‎55 ‏וַֽיַּעְמֹ֕ד וַיְבָ֕רֶךְ אֵ֖ת כָּל־קְהַ֣ל יִשְׂרָאֵ֑ל ק֥וֹל גָּד֖וֹל לֵאמֹֽר׃

‎56 ‏בָּר֣וּךְ יְהוָ֗ה אֲשֶׁ֨ר נָתַ֤ן מְנוּחָה֙ לְעַמּ֣וֹ יִשְׂרָאֵ֔ל כְּכֹ֖ל אֲשֶׁ֣ר דִּבֵּ֑ר לֹֽא־נָפַ֞ל דָּבָ֣ר אֶחָ֗ד מִכֹּל֙ דְּבָר֣וֹ הַטּ֔וֹב אֲשֶׁ֣ר דִּבֶּ֔ר בְּיַ֖ד מֹשֶׁ֥ה עַבְדּֽוֹ׃

‎57 ‏יְהִ֨י יְהוָ֤ה אֱלֹהֵ֙ינוּ֙ עִמָּ֔נוּ כַּאֲשֶׁ֥ר הָיָ֖ה עִם־אֲבֹתֵ֑ינוּ אַל־יַעַזְבֵ֖נוּ וְאַֽל־יִטְּשֵֽׁנוּ׃

‎58 ‏לְהַטּ֥וֹת לְבָבֵ֖נוּ אֵלָ֑יו לָלֶ֣כֶת בְּכָל־דְּרָכָ֗יו וְלִשְׁמֹ֨ר מִצְוֹתָ֤יו וְחֻקָּיו֙ וּמִשְׁפָּטָ֔יו אֲשֶׁ֥ר צִוָּ֖ה אֶת־אֲבֹתֵֽינוּ׃

‎59 ‏וְיִֽהְי֨וּ דְבָרַ֜י אֵ֗לֶּה אֲשֶׁ֤ר הִתְחַנַּ֙נְתִּי֙ לִפְנֵ֣י יְהוָ֔ה קְרֹבִ֛ים אֶל־יְהוָ֥ה אֱלֹהֵ֖ינוּ יוֹמָ֣ם וָלָ֑יְלָה לַעֲשׂ֣וֹת׀ מִשְׁפַּ֣ט עַבְדּ֗וֹ וּמִשְׁפַּ֛ט עַמּ֥וֹ יִשְׂרָאֵ֖ל דְּבַר־י֥וֹם בְּיוֹמֽוֹ׃

‎60 ‏לְמַ֗עַן דַּ֚עַת כָּל־עַמֵּ֣י הָאָ֔רֶץ כִּ֥י יְהוָ֖ה ה֣וּא הָאֱלֹהִ֑ים אֵ֖ין עֽוֹד׃

‎61 ‏וְהָיָ֤ה לְבַבְכֶם֙ שָׁלֵ֔ם עִ֖ם יְהוָ֣ה אֱלֹהֵ֑ינוּ לָלֶ֧כֶת בְּחֻקָּ֛יו וְלִשְׁמֹ֥ר מִצְוֹתָ֖יו כַּיּ֥וֹם הַזֶּֽה׃

‎62 ‏וְֽהַמֶּ֔לֶךְ וְכָל־יִשְׂרָאֵ֖ל עִמּ֑וֹ זֹבְחִ֥ים זֶ֖בַח לִפְנֵ֥י יְהוָֽה׃

‎63 ‏וַיִּזְבַּ֣ח שְׁלֹמֹ֗ה אֵ֣ת זֶ֣בַח הַשְּׁלָמִים֮ אֲשֶׁ֣ר זָבַ֣ח לַיהוָה֒ בָּקָ֗ר עֶשְׂרִ֤ים וּשְׁנַ֙יִם֙ אֶ֔לֶף וְצֹ֕אן מֵאָ֥ה וְעֶשְׂרִ֖ים אָ֑לֶף וַֽיַּחְנְכוּ֙ אֶת־בֵּ֣ית יְהוָ֔ה הַמֶּ֖לֶךְ וְכָל־בְּנֵ֥י יִשְׂרָאֵֽל׃

‎64 ‏בַּיּ֣וֹם הַה֗וּא קִדַּ֨שׁ הַמֶּ֜לֶךְ אֶת־תּ֣וֹךְ הֶחָצֵ֗ר אֲשֶׁר֙ לִפְנֵ֣י בֵית־יְהוָ֔ה כִּי־עָ֣שָׂה שָׁ֗ם אֶת־הָֽעֹלָה֙ וְאֶת־הַמִּנְחָ֔ה וְאֵ֖ת חֶלְבֵ֣י הַשְּׁלָמִ֑ים כִּֽי־מִזְבַּ֤ח הַנְּחֹ֙שֶׁת֙ אֲשֶׁ֣ר לִפְנֵ֣י יְהוָ֔ה קָטֹ֗ן מֵֽהָכִיל֙ אֶת־הָעֹלָ֣ה וְאֶת־הַמִּנְחָ֔ה וְאֵ֖ת חֶלְבֵ֥י הַשְּׁלָמִֽים׃

‎65 ‏וַיַּ֣עַשׂ שְׁלֹמֹ֣ה בָֽעֵת־הַהִ֣יא׀ אֶת־הֶחָ֡ג וְכָל־יִשְׂרָאֵ֣ל עִמּוֹ֩ קָהָ֨ל גָּד֜וֹל מִלְּב֥וֹא חֲמָ֣ת׀ עַד־נַ֣חַל מִצְרַ֗יִם לִפְנֵי֙ יְהוָ֣ה אֱלֹהֵ֔ינוּ שִׁבְעַ֥ת יָמִ֖ים וְשִׁבְעַ֣ת יָמִ֑ים אַרְבָּעָ֥ה עָשָׂ֖ר יֽוֹם׃

‎66 ‏בַּיּ֤וֹם הַשְּׁמִינִי֙ שִׁלַּ֣ח אֶת־הָעָ֔ם וַֽיְבָרֲכ֖וּ אֶת־הַמֶּ֑לֶךְ וַיֵּלְכ֣וּ לְאָהֳלֵיהֶ֗ם שְׂמֵחִים֙ וְט֣וֹבֵי לֵ֔ב עַ֣ל כָּל־הַטּוֹבָ֗ה אֲשֶׁ֨ר עָשָׂ֤ה יְהוָה֙ לְדָוִ֣ד עַבְדּ֔וֹ וּלְיִשְׂרָאֵ֖ל עַמּֽוֹ׃

1 ’āz yaqəhēl šəlōmōh ’eṯ-ziqənê yiśərā’ēl ’eṯ-kāl-rā’šê hammaṭṭwōṯ nəśî’ê hā’āḇwōṯ liḇənê yiśərā’ēl ’el-hammeleḵə šəlōmōh yərûšālāim ləh^a‘ălwōṯ ’eṯ-’ărwōn bərîṯ-yəhwâ mē‘îr dāwiḏ hî’ ṣîywōn:

2 wayyiqqâălû ’el-hammeleḵə šəlōmōh kāl-’îš yiśərā’ēl bəyer^aḥ hā’ēṯānîm beḥāḡ hû’ h^aḥōḏeš haššəḇî‘î:

3 wayyāḇō’û kōl ziqənê yiśərā’ēl wayyiśə’û hakōhănîm ’eṯ-hā’ārwōn:

4 wayy^a‘ălû ’eṯ-’ărwōn yəhwâ wə’eṯ-’ōhel mwō‘ēḏ wə’eṯ-kāl-kəlê haqqōḏeš ’ăšer bā’ōhel wayy^a‘ălû ’ōṯām hakōhănîm wəhaləwîyim:

5 wəhammeleḵə šəlōmōh wəḵāl-‘ăḏaṯ yiśərā’ēl hannwō‘āḏîm ‘ālāyw ’itwō lifənê hā’ārwōn məzabəḥîm ṣō’n ûḇāqār ’ăšer lō’-yissāfərû wəlō’ yimmānû mērōḇ:

6 wayyāḇi’û hakōhănîm ’eṯ-’ărwōn bərîṯ-yəhwâ ’el-məqwōmwō ’el-dəḇîr habayiṯ ’el-qōḏeš haqqŏḏāšîm ’el-t^aḥaṯ kanəfê hakərûḇîm:

7 kî hakərûḇîm pōrəśîm kənāfayim ’el-məqwōm hā’ārwōn wayyāsōkû hakəruḇîm ‘al-hā’ārwōn wə‘al-badāyw miləmā‘əlâ:

8 wayya’ăriḵû habadîm wayyērā’û rā’šê habadîm min-haqqōḏeš ‘al-pənê hadəḇîr wəlō’ yērā’û h^aḥûṣâ wayyihəyû šām ‘aḏ hayywōm hazzeh:

9 ’ên bā’ārwōn raq šənê luḥwōṯ hā’ăḇānîm ’ăšer hinniḥa šām mōšeh bəḥōrēḇ ’ăšer kāraṯ yəhwâ ‘im-bənê yiśərā’ēl bəṣē’ṯām mē’ereṣ miṣərāyim:

10 wayəhî bəṣē’ṯ hakōhănîm min-haqqōḏeš wəhe‘ānān mālē’ ’eṯ-bêṯ yəhwâ:

11 wəlō’-yāḵəlû hakōhănîm l^a‘ămōḏ ləšārēṯ mipənê he‘ānān kî-mālē’ ḵəḇwōḏ-yəhwâ ’eṯ-bêṯ yəhwâ: f

12 ’āz ’āmar šəlōmōh yəhwâ ’āmar lišəkōn bā‘ărāfel:

13 bānōh ḇānîṯî bêṯ zəḇul lāḵə māḵwōn ləšiḇətəḵā ‘wōlāmîm:

14 wayyassēḇ hammeleḵə ’eṯ-pānāyw wayəḇāreḵə ’ēṯ kāl-qəhal yiśərā’ēl wəḵāl-qəhal yiśərā’ēl ‘ōmēḏ:

15 wayyō’mer bārûḵə yəhwâ ’ĕlōhê yiśərā’ēl ’ăšer diber bəfîw ’ēṯ dāwiḏ ’āḇî ûḇəyāḏwō millē’ lē’mōr:

16 min-hayywōm ’ăšer hwōṣē’ṯî ’eṯ-‘ammî ’eṯ-yiśərā’ēl mimmiṣərayim lō’-ḇāḥarətî ḇə‘îr mikōl šiḇəṭê yiśərā’ēl liḇənwōṯ bayiṯ lihəywōṯ šəmî šām wā’eḇəḥar bəḏāwiḏ lihəywōṯ ‘al-‘ammî yiśərā’ēl:

17 wayəhî ‘im-ləḇaḇ dāwiḏ ’āḇî liḇənwōṯ bayiṯ ləšēm yəhwâ ’ĕlōhê yiśərā’ēl:

18 wayyō’mer yəhwâ ’el-dāwiḏ ’āḇî y^a‘an ’ăšer hāyâ ‘im-ləḇāḇəḵā liḇənwōṯ bayiṯ lišəmî hĕṭîḇōṯā kî hāyâ ‘im-ləḇāḇeḵā:

19 raq ’atâ lō’ ṯiḇəneh habāyiṯ kî ’im-binəḵā hayyōṣē’ mēḥălāṣeyḵā hû’-yiḇəneh habayiṯ lišəmî:

20 wayyāqem yəhwâ ’eṯ-dəḇārwō ’ăšer dibēr wā’āqum t^aḥaṯ dāwiḏ ’āḇî wā’ēšēḇ ‘al-kissē’ yiśərā’ēl ka’ăšer diber yəhwâ wā’eḇəneh habayiṯ ləšēm yəhwâ ’ĕlōhê yiśərā’ēl:

21 wā’āśim šām māqwōm lā’ārwōn ’ăšer-šām bərîṯ yəhwâ ’ăšer kāraṯ ‘im-’ăḇōṯênû bəhwōṣî’wō ’ōṯām mē’ereṣ miṣərāyim: s

22 wayy^a‘ămōḏ šəlōmōh lifənê mizəb^aḥ yəhwâ neḡeḏ kāl-qəhal yiśərā’ēl wayyifərōś kapāyw haššāmāyim:

23 wayyō’mar yəhwâ ’ĕlōhê yiśərā’ēl ’ên-kāmwōḵā ’ĕlōhîm baššāmayim mimm^a‘al wə‘al-hā’āreṣ mitāḥaṯ šōmēr habərîṯ wəh^aḥeseḏ l^a‘ăḇāḏeyḵā hahōləḵîm ləfāneyḵā bəḵāl-libām:

24 ’ăšer šāmarətā lə‘aḇədəḵā dāwiḏ ’āḇî ’ēṯ ’ăšer-dibarətā lwō watəḏabēr bəfîḵā ûḇəyāḏəḵā millē’ṯā kayywōm hazzeh:

25 wə‘atâ yəhwâ| ’ĕlōhê yiśərā’ēl šəmōr lə‘aḇədəḵā ḏāwiḏ ’āḇî ’ēṯ ’ăšer dibarətā llwō lē’mōr lō’-yikārēṯ ləḵā ’îš milləfānay yōšēḇ ‘al-kissē’ yiśərā’ēl raq ’im-yišəmərû ḇāneyḵā ’eṯ-darəkām lāleḵeṯ ləfānay ka’ăšer hālaḵətā ləfānāy:

26 wə‘atâ ’ĕlōhê yiśərā’ēl yē’āmen nā’ dəḇāreyḵā dəḇārəḵā ’ăšer dibarətā lə‘aḇədəḵā dāwiḏ ’āḇî:

27 kî ha’umənām yēšēḇ ’ĕlōhîm ‘al-hā’āreṣ hinnēh haššāmayim ûšəmê haššāmayim lō’ yəḵaləkəlûḵā ’af kî-habayiṯ hazzeh ’ăšer bānîṯî:

28 ûfānîṯā ’el-təfillaṯ ‘aḇədəḵā wə’el-təḥinnāṯwō yəhwâ ’ĕlōhāy lišəmō‘a ’el-hārinnâ wə’el-hatəfillâ ’ăšer ‘aḇədəḵā miṯəpallēl ləfāneyḵā hayywōm:

29 lihəywōṯ ‘êneḵā fəṯuḥwōṯ ’el-habayiṯ hazzeh layəlâ wāywōm ’el-hammāqwōm ’ăšer ’āmarətā yihəyeh šəmî šām lišəmō‘a ’el-hatəfillâ ’ăšer yiṯəpallēl ‘aḇədəḵā ’el-hammāqwōm hazzeh:

30 wəšām^a‘ətā ’el-təḥinnaṯ ‘aḇədəḵā wə‘amməḵā yiśərā’ēl ’ăšer yiṯəpaləlû ’el-hammāqwōm hazzeh wə’atâ tišəm^a‘ ’el-məqwōm šiḇətəḵā ’el-haššāmayim wəšām^a‘ətā wəsālāḥətā:

31 ’ēṯ ’ăšer yeḥĕṭā’ ’îš lərē‘ēhû wənāšā’-ḇwō ’ālâ ləha’ălōṯwō ûḇā’ ’ālâ lifənê mizəb^aḥăḵā babayiṯ hazzeh:

32 wə’atâ| tišəm^a‘ haššāmayim wə‘āśîṯā wəšāfaṭətā ’eṯ-‘ăḇāḏeyḵā ləharəšî‘a rāšā‘ lāṯēṯ darəkwō bərō’šwō ûləhaṣədîq ṣadîq lāṯeṯ lwō kəṣiḏəqāṯwō: s

33 bəhinnāḡēf ‘amməḵā yiśərā’ēl lifənê ’wōyēḇ ’ăšer yeḥeṭə’û-lāḵə wəšāḇû ’ēleyḵā wəhwōḏû ’eṯ-šəmeḵā wəhiṯəpaləlû wəhiṯəḥannənû ’ēleyḵā babayiṯ hazzeh:

34 wə’atâ tišəm^a‘ haššāmayim wəsāl^aḥətā ləḥaṭṭa’ṯ ‘amməḵā yiśərā’ēl wahăšēḇōṯām ’el-hā’ăḏāmâ ’ăšer nāṯatā la’ăḇwōṯām: s

35 bəhē‘āṣēr šāmayim wəlō’-yihəyeh māṭār kî yeḥeṭə’û-lāḵə wəhiṯəpaləlû ’el-hammāqwōm hazzeh wəhwōḏû ’eṯ-šəmeḵā ûmēḥaṭṭā’ṯām yəšûḇûn kî ṯ^a‘ănēm:

36 wə’atâ| tišəm^a‘ haššāmayim wəsāl^aḥətā ləḥaṭṭa’ṯ ‘ăḇāḏeyḵā wə‘amməḵā yiśərā’ēl kî ṯwōrēm ’eṯ-hadereḵə haṭṭwōḇâ ’ăšer yēləḵû-ḇāh wənāṯatâ māṭār ‘al-’arəṣəḵā ’ăšer-nāṯatâ lə‘amməḵā lən^aḥălâ: s

37 rā‘āḇ kî-yihəyeh ḇā’āreṣ deḇer kî-yihəyeh šidāfwōn yērāqwōn ’arəbeh ḥāsîl kî yihəyeh kî yāṣar-lwō ’ōyəḇwō bə’ereṣ šə‘ārāyw kāl-neḡ^a‘ kāl-m^aḥălâ:

38 kāl-təfillâ ḵāl-təḥinnâ ’ăšer ṯihəyeh ləḵāl-hā’āḏām ləḵōl ‘amməḵā yiśərā’ēl ’ăšer yēḏə‘ûn ’îš neḡ^a‘ ləḇāḇwō ûfāraś kapāyw ’el-habayiṯ hazzeh:

39 wə’atâ tišəm^a‘ haššāmayim məḵwōn šiḇəteḵā wəsāl^aḥətā wə‘āśîṯā wənāṯatā lā’îš kəḵāl-dərāḵāyw ’ăšer tēḏ^a‘ ’eṯ-ləḇāḇwō kî-’atâ yāḏ^a‘ətā ləḇadəḵā ’eṯ-ləḇaḇ kāl-bənê hā’āḏām:

40 ləm^a‘an yirā’ûḵā kāl-hayyāmîm ’ăšer-hēm ḥayyîm ‘al-pənê hā’ăḏāmâ ’ăšer nāṯatâ la’ăḇōṯênû:

41 wəḡam ’el-hannāḵərî ’ăšer lō’-mē‘amməḵā yiśərā’ēl hû’ ûḇā’ mē’ereṣ rəḥwōqâ ləm^a‘an šəmeḵā:

42 kî yišəmə‘ûn ’eṯ-šiməḵā hagāḏwōl wə’eṯ-yāḏəḵā h^aḥăzāqâ ûzərō‘ăḵā hannəṭûyâ ûḇā’ wəhiṯəpallēl ’el-habayiṯ hazzeh:

43 ’atâ tišəm^a‘ haššāmayim məḵwōn šiḇəteḵā wə‘āśîṯā kəḵōl ’ăšer-yiqərā’ ’ēleyḵā hannāḵərî ləm^a‘an yēḏə‘ûn kāl-‘ammê hā’āreṣ ’eṯ-šəmeḵā ləyirə’â ’ōṯəḵā kə‘amməḵā yiśərā’ēl wəlāḏ^a‘aṯ kî-šiməḵā niqərā’ ‘al-habayiṯ hazzeh ’ăšer bānîṯî:

44 kî-yēṣē’ ‘amməḵā lammiləḥāmâ ‘al-’ōyəḇwō badereḵə ’ăšer tišəlāḥēm wəhiṯəpaləlû ’el-yəhwâ dereḵə hā‘îr ’ăšer bāḥarətā bāh wəhabayiṯ ’ăšer-bāniṯî lišəmeḵā:

45 wəšām^a‘ətā haššāmayim ’eṯ-təfillāṯām wə’eṯ-təḥinnāṯām wə‘āśîṯā mišəpāṭām:

46 kî yeḥeṭə’û-lāḵə kî ’ên ’āḏām ’ăšer lō’-yeḥĕṭā’ wə’ānafətā ḇām ûnəṯatām lifənê ’wōyēḇ wəšāḇûm šōḇêhem ’el-’ereṣ hā’wōyēḇ rəḥwōqâ ’wō qərwōḇâ:

47 wəhēšîḇû ’el-libām bā’āreṣ ’ăšer nišəbû-šām wəšāḇû| wəhiṯəḥannənû ’ēleyḵā bə’ereṣ šōḇêhem lē’mōr ḥāṭā’nû wəhe‘ĕwînû rāšā‘ənû:

48 wəšāḇû ’ēleyḵā bəḵāl-ləḇāḇām ûḇəḵāl-nafəšām bə’ereṣ ’ōyəḇêhem ’ăšer-šāḇû ’ōṯām wəhiṯəpaləlû ’ēleyḵā dereḵə ’arəṣām ’ăšer nāṯatâ la’ăḇwōṯām hā‘îr ’ăšer bāḥarətā wəhabayiṯ ’ăšer-bānîṯā bānîṯî lišəmeḵā:

49 wəšām^a‘ətā haššāmayim məḵwōn šiḇətəḵā ’eṯ-təfillāṯām wə’eṯ-təḥinnāṯām wə‘āśîṯā mišəpāṭām:

50 wəsāl^aḥətā lə‘amməḵā ’ăšer ḥāṭə’û-lāḵə ûləḵāl-pišə‘êhem ’ăšer pāšə‘û-ḇāḵə ûnəṯatām lər^aḥămîm lifənê šōḇêhem wəriḥămûm:

51 kî-‘amməḵā wən^aḥălāṯəḵā hēm ’ăšer hwōṣē’ṯā mimmiṣərayim mitwōḵə kûr habarəzel:

52 lihəywōṯ ‘êneyḵā fəṯuḥwōṯ ’el-təḥinnaṯ ‘aḇədəḵā wə’el-təḥinnaṯ ‘amməḵā yiśərā’ēl lišəmō‘a ’ălêhem bəḵōl qārə’ām ’ēleyḵā:

53 kî-’atâ hiḇədalətām ləḵā lən^aḥălâ mikōl ‘ammê hā’āreṣ ka’ăšer dibarətā bəyaḏ| mōšeh ‘aḇədeḵā bəhwōṣî’ăḵā ’eṯ-’ăḇōṯênû mimmiṣərayim ’ăḏōnāy yəhwih: f

54 wayəhî| kəḵallwōṯ šəlōmōh ləhiṯəpallēl ’el-yəhwâ ’ēṯ kāl-hatəfillâ wəhatəḥinnâ hazzō’ṯ qām millifənê mizəb^aḥ yəhwâ mikərō‘a ‘al-birəkāyw wəḵapāyw pəruśwōṯ haššāmāyim:

55 wayy^a‘əmōḏ wayəḇāreḵə ’ēṯ kāl-qəhal yiśərā’ēl qwōl gāḏwōl lē’mōr:

56 bārûḵə yəhwâ ’ăšer nāṯan mənûḥâ lə‘ammwō yiśərā’ēl kəḵōl ’ăšer dibēr lō’-nāfal dāḇār ’eḥāḏ mikōl dəḇārwō haṭṭwōḇ ’ăšer diber bəyaḏ mōšeh ‘aḇədwō:

57 yəhî yəhwâ ’ĕlōhênû ‘immānû ka’ăšer hāyâ ‘im-’ăḇōṯênû ’al-y^a‘azəḇēnû wə’al-yiṭṭəšēnû:

58 ləhaṭṭwōṯ ləḇāḇēnû ’ēlāyw lāleḵeṯ bəḵāl-dərāḵāyw wəlišəmōr miṣəwōṯāyw wəḥuqqāyw ûmišəpāṭāyw ’ăšer ṣiûâ ’eṯ-’ăḇōṯênû:

59 wəyihəyû ḏəḇāray ’ēlleh ’ăšer hiṯəḥannanətî lifənê yəhwâ qərōḇîm ’el-yəhwâ ’ĕlōhênû ywōmām wālāyəlâ l^a‘ăśwōṯ| mišəpaṭ ‘aḇədwō ûmišəpaṭ ‘ammwō yiśərā’ēl dəḇar-ywōm bəywōmwō:

60 ləm^a‘an d^a‘aṯ kāl-‘ammê hā’āreṣ kî yəhwâ hû’ hā’ĕlōhîm ’ên ‘wōḏ:

61 wəhāyâ ləḇaḇəḵem šālēm ‘im yəhwâ ’ĕlōhênû lāleḵeṯ bəḥuqqāyw wəlišəmōr miṣəwōṯāyw kayywōm hazzeh:

62 wəhammeleḵə wəḵāl-yiśərā’ēl ‘immwō zōḇəḥîm zeḇ^aḥ lifənê yəhwâ:

63 wayyizəb^aḥ šəlōmōh ’ēṯ zeḇ^aḥ haššəlāmîm ’ăšer zāḇ^aḥ layhwâ bāqār ‘eśərîm ûšənayim ’elef wəṣō’n mē’â wə‘eśərîm ’ālef wayy^aḥənəḵû ’eṯ-bêṯ yəhwâ hammeleḵə wəḵāl-bənê yiśərā’ēl:

64 bayywōm hahû’ qidaš hammeleḵə ’eṯ-twōḵə heḥāṣēr ’ăšer lifənê ḇêṯ-yəhwâ kî-‘āśâ šām ’eṯ-hā‘ōlâ wə’eṯ-hamminəḥâ wə’ēṯ ḥeləḇê haššəlāmîm kî-mizəb^aḥ hannəḥōšeṯ ’ăšer lifənê yəhwâ qāṭōn mēhāḵîl ’eṯ-hā‘ōlâ wə’eṯ-hamminəḥâ wə’ēṯ ḥeləḇê haššəlāmîm:

65 wayy^a‘aś šəlōmōh ḇā‘ēṯ-hahî’| ’eṯ-heḥāḡ wəḵāl-yiśərā’ēl ‘immwō qâāl gāḏwōl milləḇwō’ ḥămāṯ| ‘aḏ-n^aḥal miṣərayim lifənê yəhwâ ’ĕlōhênû šiḇə‘aṯ yāmîm wəšiḇə‘aṯ yāmîm ’arəbā‘â ‘āśār ywōm:

66 bayywōm haššəmînî šill^aḥ ’eṯ-hā‘ām wayəḇārăḵû ’eṯ-hammeleḵə wayyēləḵû lə’âŏlêhem śəmēḥîm wəṭwōḇê lēḇ ‘al kāl-haṭṭwōḇâ ’ăšer ‘āśâ yəhwâ ləḏāwiḏ ‘aḇədwō ûləyiśərā’ēl ‘ammwō: