Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 52

1 ‏בֶּן־עֶשְׂרִ֨ים וְאַחַ֤ת שָׁנָה֙ צִדְקִיָּ֣הוּ בְמָלְכ֔וֹ וְאַחַ֤ת עֶשְׂרֵה֙ שָׁנָ֔ה מָלַ֖ךְ בִּירֽוּשָׁלִָ֑ם וְשֵׁ֣ם אִמּ֔וֹ חמיטל חֲמוּטַ֥ל בַּֽת־יִרְמְיָ֖הוּ מִלִּבְנָֽה׃

2 ‏וַיַּ֥עַשׂ הָרַ֖ע בְּעֵינֵ֣י יְהוָ֑ה כְּכֹ֥ל אֲשֶׁר־עָשָׂ֖ה יְהוֹיָקִֽים׃

3 ‏כִּ֣י׀ עַל־אַ֣ף יְהוָ֗ה הָֽיְתָה֙ בִּירוּשָׁלִַ֣ם וִֽיהוּדָ֔ה עַד־הִשְׁלִיכ֥וֹ אוֹתָ֖ם מֵעַ֣ל פָּנָ֑יו וַיִּמְרֹ֥ד צִדְקִיָּ֖הוּ בְּמֶ֥לֶךְ בָּבֶֽל׃

4 ‏וַיְהִי֩ בַשָּׁנָ֨ה הַתְּשִׁעִ֜ית לְמָלְכ֗וֹ בַּחֹ֣דֶשׁ הָעֲשִׂירִי֮ בֶּעָשׂ֣וֹר לַחֹדֶשׁ֒ בָּ֠א נְבוּכַדְרֶאצַּ֨ר מֶֽלֶךְ־בָּבֶ֜ל ה֤וּא וְכָל־חֵילוֹ֙ עַל־יְר֣וּשָׁלִַ֔ם וַֽיַּחֲנ֖וּ עָלֶ֑יהָ וַיִּבְנ֥וּ עָלֶ֛יהָ דָּיֵ֖ק סָבִֽיב׃

5 ‏וַתָּבֹ֥א הָעִ֖יר בַּמָּצ֑וֹר עַ֚ד עַשְׁתֵּ֣י עֶשְׂרֵ֣ה שָׁנָ֔ה לַמֶּ֖לֶךְ צִדְקִיָּֽהוּ׃

6 ‏בַּחֹ֤דֶשׁ הָֽרְבִיעִי֙ בְּתִשְׁעָ֣ה לַחֹ֔דֶשׁ וַיֶּחֱזַ֥ק הָרָעָ֖ב בָּעִ֑יר וְלֹא־הָיָ֥ה לֶ֖חֶם לְעַ֥ם הָאָֽרֶץ׃

7 ‏וַתִּבָּקַ֣ע הָעִ֗יר וְכָל־אַנְשֵׁ֣י הַמִּלְחָמָ֡ה יִבְרְחוּ֩ וַיֵּצְא֨וּ מֵהָעִ֜יר לַ֗יְלָה דֶּ֜רֶךְ שַׁ֤עַר בֵּין־הַחֹמֹתַ֙יִם֙ אֲשֶׁר֙ עַל־גַּ֣ן הַמֶּ֔לֶךְ וְכַשְׂדִּ֥ים עַל־הָעִ֖יר סָבִ֑יב וַיֵּלְכ֖וּ דֶּ֥רֶךְ הָעֲרָבָֽה׃

8 ‏וַיִּרְדְּפ֤וּ חֵיל־כַּשְׂדִּים֙ אַחֲרֵ֣י הַמֶּ֔לֶךְ וַיַּשִּׂ֥יגוּ אֶת־צִדְקִיָּ֖הוּ בְּעַֽרְבֹ֣ת יְרֵח֑וֹ וְכָל־חֵיל֔וֹ נָפֹ֖צוּ מֵעָלָֽיו׃

9 ‏וַֽיִּתְפְּשׂוּ֙ אֶת־הַמֶּ֔לֶךְ וַיַּעֲל֨וּ אֹת֜וֹ אֶל־מֶ֧לֶךְ בָּבֶ֛ל רִבְלָ֖תָה בְּאֶ֣רֶץ חֲמָ֑ת וַיְדַבֵּ֥ר אִתּ֖וֹ מִשְׁפָּטִֽים׃

10 ‏וַיִּשְׁחַ֧ט מֶֽלֶךְ־בָּבֶ֛ל אֶת־בְּנֵ֥י צִדְקִיָּ֖הוּ לְעֵינָ֑יו וְגַ֛ם אֶת־כָּל־שָׂרֵ֥י יְהוּדָ֖ה שָׁחַ֥ט בְּרִבְלָֽתָה׃

11 ‏וְאֶת־עֵינֵ֥י צִדְקִיָּ֖הוּ עִוֵּ֑ר וַיַּאַסְרֵ֣הוּ בַֽנְחֻשְׁתַּ֗יִם וַיְבִאֵ֤הוּ מֶֽלֶךְ־בָּבֶל֙ בָּבֶ֔לָה וַיִּתְּנֵ֥הוּ בבית־ בֵֽית־ הַפְּקֻדֹּ֖ת עַד־י֥וֹם מוֹתֽוֹ׃

12 ‏וּבַחֹ֤דֶשׁ הַֽחֲמִישִׁי֙ בֶּעָשׂ֣וֹר לַחֹ֔דֶשׁ הִ֗יא שְׁנַת֙ תְּשַֽׁע־עֶשְׂרֵ֣ה שָׁנָ֔ה לַמֶּ֖לֶךְ נְבוּכַדְרֶאצַּ֣ר מֶֽלֶךְ־בָּבֶ֑ל בָּ֗א נְבֽוּזַרְאֲדָן֙ רַב־טַבָּחִ֔ים עָמַ֛ד לִפְנֵ֥י מֶֽלֶךְ־בָּבֶ֖ל בִּירוּשָׁלִָֽם׃

13 ‏וַיִּשְׂרֹ֥ף אֶת־בֵּית־יְהוָ֖ה וְאֶת־בֵּ֣ית הַמֶּ֑לֶךְ וְאֵ֨ת כָּל־בָּתֵּ֧י יְרוּשָׁלִַ֛ם וְאֶת־כָּל־בֵּ֥ית הַגָּד֖וֹל שָׂרַ֥ף בָּאֵֽשׁ׃

14 ‏וְאֶת־כָּל־חֹמ֥וֹת יְרוּשָׁלִַ֖ם סָבִ֑יב נָֽתְצוּ֙ כָּל־חֵ֣יל כַּשְׂדִּ֔ים אֲשֶׁ֖ר אֶת־רַב־טַבָּחִֽים׃

15 ‏וּמִדַּלּ֨וֹת הָעָ֜ם וְֽאֶת־יֶ֥תֶר הָעָ֣ם׀ הַנִּשְׁאָרִ֣ים בָּעִ֗יר וְאֶת־הַנֹּֽפְלִים֙ אֲשֶׁ֤ר נָֽפְלוּ֙ אֶל־מֶ֣לֶךְ בָּבֶ֔ל וְאֵ֖ת יֶ֣תֶר הָֽאָמ֑וֹן הֶגְלָ֕ה נְבוּזַרְאֲדָ֖ן רַב־טַבָּחִֽים׃

16 ‏וּמִדַּלּ֣וֹת הָאָ֔רֶץ הִשְׁאִ֕יר נְבוּזַרְאֲדָ֖ן רַב־טַבָּחִ֑ים לְכֹרְמִ֖ים וּלְיֹגְבִֽים׃

17 ‏וְאֶת־עַמּוּדֵ֨י הַנְּחֹ֜שֶׁת אֲשֶׁ֣ר לְבֵית־יְהוָ֗ה וְֽאֶת־הַמְּכֹנ֞וֹת וְאֶת־יָ֧ם הַנְּחֹ֛שֶׁת אֲשֶׁ֥ר בְּבֵית־יְהוָ֖ה שִׁבְּר֣וּ כַשְׂדִּ֑ים וַיִּשְׂא֥וּ אֶת־כָּל־נְחֻשְׁתָּ֖ם בָּבֶֽלָה׃

18 ‏וְאֶת־הַ֠סִּרוֹת וְאֶת־הַיָּעִ֨ים וְאֶת־הַֽמְזַמְּר֜וֹת וְאֶת־הַמִּזְרָקֹ֣ת וְאֶת־הַכַּפּ֗וֹת וְאֵ֨ת כָּל־כְּלֵ֧י הַנְּחֹ֛שֶׁת אֲשֶׁר־יְשָׁרְת֥וּ בָהֶ֖ם לָקָֽחוּ׃

19 ‏וְאֶת־הַ֠סִּפִּים וְאֶת־הַמַּחְתּ֨וֹת וְאֶת־הַמִּזְרָק֜וֹת וְאֶת־הַסִּיר֣וֹת וְאֶת־הַמְּנֹר֗וֹת וְאֶת־הַכַּפּוֹת֙ וְאֶת־הַמְּנַקִי֔וֹת אֲשֶׁ֤ר זָהָב֙ זָהָ֔ב וַאֲשֶׁר־כֶּ֖סֶף כָּ֑סֶף לָקַ֖ח רַב־טַבָּחִֽים׃

20 ‏הָעַמּוּדִ֣ים׀ שְׁנַ֗יִם הַיָּ֤ם אֶחָד֙ וְהַבָּקָ֞ר שְׁנֵים־עָשָׂ֤ר נְחֹ֙שֶׁת֙ אֲשֶׁר־תַּ֣חַת הַמְּכֹנ֔וֹת אֲשֶׁ֥ר עָשָׂ֛ה הַמֶּ֥לֶךְ שְׁלֹמֹ֖ה לְבֵ֣ית יְהוָ֑ה לֹא־הָיָ֣ה מִשְׁקָ֔ל לִנְחֻשְׁתָּ֖ם כָּל־הַכֵּלִ֥ים הָאֵֽלֶּה׃

21 ‏וְהָעַמּוּדִ֗ים שְׁמֹנֶ֨ה עֶשְׂרֵ֤ה אַמָּה֙ קומה קוֹמַת֙ הָעַמֻּ֣ד הָאֶחָ֔ד וְח֛וּט שְׁתֵּים־עֶשְׂרֵ֥ה אַמָּ֖ה יְסֻבֶּ֑נּוּ וְעָבְי֛וֹ אַרְבַּ֥ע אַצְבָּע֖וֹת נָבֽוּב׃

22 ‏וְכֹתֶ֨רֶת עָלָ֜יו נְחֹ֗שֶׁת וְקוֹמַ֨ת הַכֹּתֶ֥רֶת הָאַחַת֮ חָמֵ֣שׁ אַמּוֹת֒ וּשְׂבָכָ֨ה וְרִמּוֹנִ֧ים עַֽל־הַכּוֹתֶ֛רֶת סָבִ֖יב הַכֹּ֣ל נְחֹ֑שֶׁת וְכָאֵ֛לֶּה לַֽעַמּ֥וּד הַשֵּׁנִ֖י וְרִמּוֹנִֽים׃

23 ‏וַיִּֽהְיוּ֙ הָֽרִמֹּנִ֔ים תִּשְׁעִ֥ים וְשִׁשָּׁ֖ה ר֑וּחָה כָּל־הָרִמּוֹנִ֥ים מֵאָ֛ה עַל־הַשְּׂבָכָ֖ה סָבִֽיב׃

24 ‏וַיִּקַּ֣ח רַב־טַבָּחִ֗ים אֶת־שְׂרָיָה֙ כֹּהֵ֣ן הָרֹ֔אשׁ וְאֶת־צְפַנְיָ֖ה כֹּהֵ֣ן הַמִּשְׁנֶ֑ה וְאֶת־שְׁלֹ֖שֶׁת שֹׁמְרֵ֥י הַסַּֽף׃

25 ‏וּמִן־הָעִ֡יר לָקַח֩ סָרִ֨יס אֶחָ֜ד אֲ‍ֽשֶׁר־הָיָ֥ה פָקִ֣יד׀ עַל־אַנְשֵׁ֣י הַמִּלְחָמָ֗ה וְשִׁבְעָ֨ה אֲנָשִׁ֜ים מֵרֹאֵ֤י פְנֵי־הַמֶּ֙לֶךְ֙ אֲשֶׁ֣ר נִמְצְא֣וּ בָעִ֔יר וְאֵ֗ת סֹפֵר֙ שַׂ֣ר הַצָּבָ֔א הַמַּצְבִּ֖א אֶת־עַ֣ם הָאָ֑רֶץ וְשִׁשִּׁ֥ים אִישׁ֙ מֵעַ֣ם הָאָ֔רֶץ הַֽנִּמְצְאִ֖ים בְּת֥וֹךְ הָעִֽיר׃

26 ‏וַיִּקַּ֣ח אוֹתָ֔ם נְבוּזַרְאֲדָ֖ן רַב־טַבָּחִ֑ים וַיֹּ֧לֶךְ אוֹתָ֛ם אֶל־מֶ֥לֶךְ בָּבֶ֖ל רִבְלָֽתָה׃

27 ‏וַיַּכֶּ֣ה אוֹתָם֩ מֶ֨לֶךְ בָּבֶ֧ל וַיְמִתֵ֛ם בְּרִבְלָ֖ה בְּאֶ֣רֶץ חֲמָ֑ת וַיִּ֥גֶל יְהוּדָ֖ה מֵעַ֥ל אַדְמָתֽוֹ׃

28 ‏זֶ֣ה הָעָ֔ם אֲשֶׁ֥ר הֶגְלָ֖ה נְבֽוּכַדְרֶאצַּ֑ר בִּשְׁנַת־שֶׁ֕בַע יְהוּדִ֕ים שְׁלֹ֥שֶׁת אֲלָפִ֖ים וְעֶשְׂרִ֥ים וּשְׁלֹשָֽׁה׃

29 ‏בִּשְׁנַ֛ת שְׁמוֹנֶ֥ה עֶשְׂרֵ֖ה לִנְבֽוּכַדְרֶאצַּ֑ר מִיר֣וּשָׁלִַ֔ם נֶ֕פֶשׁ שְׁמֹנֶ֥ה מֵא֖וֹת שְׁלֹשִׁ֥ים וּשְׁנָֽיִם׃

30 ‏בִּשְׁנַ֨ת שָׁלֹ֣שׁ וְעֶשְׂרִים֮ לִנְבֽוּכַדְרֶאצַּר֒ הֶגְלָ֗ה נְבֽוּזַרְאֲדָן֙ רַב־טַבָּחִ֔ים יְהוּדִ֕ים נֶ֕פֶשׁ שְׁבַ֥ע מֵא֖וֹת אַרְבָּעִ֣ים וַחֲמִשָּׁ֑ה כָּל־נֶ֕פֶשׁ אַרְבַּ֥עַת אֲלָפִ֖ים וְשֵׁ֥שׁ מֵאֽוֹת׃ פ

31 ‏וַיְהִי֩ בִשְׁלֹשִׁ֨ים וָשֶׁ֜בַע שָׁנָ֗ה לְגָלוּת֙ יְהוֹיָכִ֣ן מֶֽלֶךְ־יְהוּדָ֔ה בִּשְׁנֵי֤ם עָשָׂר֙ חֹ֔דֶשׁ בְּעֶשְׂרִ֥ים וַחֲמִשָּׁ֖ה לַחֹ֑דֶשׁ נָשָׂ֡א אֱוִ֣יל מְרֹדַךְ֩ מֶ֨לֶךְ בָּבֶ֜ל בִּשְׁנַ֣ת מַלְכֻת֗וֹ אֶת־רֹאשׁ֙ יְהוֹיָכִ֣ין מֶֽלֶךְ־יְהוּדָ֔ה וַיֹּצֵ֥א אוֹת֖וֹ מִבֵּ֥ית הכליא הַכְּלֽוּא׃

32 ‏וַיְדַבֵּ֥ר אִתּ֖וֹ טֹב֑וֹת וַיִּתֵּן֙ אֶת־כִּסְא֔וֹ מִמַּ֗עַל לְכִסֵּ֧א מלכים הַמְּלָכִ֛ים אֲשֶׁ֥ר אִתּ֖וֹ בְּבָבֶֽל׃

33 ‏וְשִׁנָּ֕ה אֵ֖ת בִּגְדֵ֣י כִלְא֑וֹ וְאָכַ֨ל לֶ֧חֶם לְפָנָ֛יו תָּמִ֖יד כָּל־יְמֵ֥י חַיָּֽו׃

34 ‏וַאֲרֻחָת֗וֹ אֲרֻחַת֩ תָּמִ֨יד נִתְּנָה־לּ֜וֹ מֵאֵ֧ת מֶֽלֶךְ־בָּבֶ֛ל דְּבַר־י֥וֹם בְּיוֹמ֖וֹ עַד־י֣וֹם מוֹת֑וֹ כֹּ֖ל יְמֵ֥י חַיָּֽיו׃

1 ben-‘eśərîm wə’aḥaṯ šānâ ṣiḏəqîyâû ḇəmāləḵwō wə’aḥaṯ ‘eśərēh šānâ mālaḵə bîrûšālāim wəšēm ’immwō ḥămîṭal ḥămûṭal baṯ-yirəməyâû milliḇənâ:

2 wayya‘aś hāra‘ bə‘ênê yəhwâ kəḵōl ’ăšer-‘āśâ yəhwōyāqîm:

3 kî| ‘al-’af yəhwâ hāyəṯâ bîrûšālaim wîhûḏâ ‘aḏ-hišəlîḵwō ’wōṯām mē‘al pānāyw wayyimərōḏ ṣiḏəqîyâû bəmeleḵə bāḇel:

4 wayəhî ḇaššānâ hatəši‘îṯ ləmāləḵwō baḥōḏeš hā‘ăśîrî be‘āśwōr laḥōḏeš bā’ nəḇûḵaḏəre’ṣṣar meleḵə-bāḇel hû’ wəḵāl-ḥêlwō ‘al-yərûšālaim wayyaḥănû ‘āleyhā wayyiḇənû ‘āleyhā dāyēq sāḇîḇ:

5 watāḇō’ hā‘îr bammāṣwōr ‘aḏ ‘ašətê ‘eśərēh šānâ lammeleḵə ṣiḏəqîyâû:

6 baḥōḏeš hārəḇî‘î bəṯišə‘â laḥōḏeš wayyeḥĕzaq hārā‘āḇ bā‘îr wəlō’-hāyâ leḥem lə‘am hā’āreṣ:

7 watibāqa‘ hā‘îr wəḵāl-’anəšê hammiləḥāmâ yiḇərəḥû wayyēṣə’û mēhā‘îr layəlâ dereḵə ša‘ar bên-haḥōmōṯayim ’ăšer ‘al-gan hammeleḵə wəḵaśədîm ‘al-hā‘îr sāḇîḇ wayyēləḵû dereḵə hā‘ărāḇâ:

8 wayyirədəfû ḥêl-kaśədîm ’aḥărê hammeleḵə wayyaśśîḡû ’eṯ-ṣiḏəqîyâû bə‘arəḇōṯ yərēḥwō wəḵāl-ḥêlwō nāfōṣû mē‘ālāyw:

9 wayyiṯəpəśû ’eṯ-hammeleḵə wayya‘ălû ’ōṯwō ’el-meleḵə bāḇel riḇəlāṯâ bə’ereṣ ḥămāṯ wayəḏabēr ’itwō mišəpāṭîm:

10 wayyišəḥaṭ meleḵə-bāḇel ’eṯ-bənê ṣiḏəqîyâû lə‘ênāyw wəḡam ’eṯ-kāl-śārê yəhûḏâ šāḥaṭ bəriḇəlāṯâ:

11 wə’eṯ-‘ênê ṣiḏəqîyâû ‘iûēr wayya’asərēhû ḇanəḥušətayim wayəḇi’ēhû meleḵə-bāḇel bāḇelâ wayyitənēhû ḇəḇêṯ- ḇêṯ- hapəqudōṯ ‘aḏ-ywōm mwōṯwō:

12 ûḇaḥōḏeš haḥămîšî be‘āśwōr laḥōḏeš hî’ šənaṯ təša‘-‘eśərēh šānâ lammeleḵə nəḇûḵaḏəre’ṣṣar meleḵə-bāḇel bā’ nəḇûzarə’ăḏān raḇ-ṭabāḥîm ‘āmaḏ lifənê meleḵə-bāḇel bîrûšālāim:

13 wayyiśərōf ’eṯ-bêṯ-yəhwâ wə’eṯ-bêṯ hammeleḵə wə’ēṯ kāl-bātê yərûšālaim wə’eṯ-kāl-bêṯ hagāḏwōl śāraf bā’ēš:

14 wə’eṯ-kāl-ḥōmwōṯ yərûšālaim sāḇîḇ nāṯəṣû kāl-ḥêl kaśədîm ’ăšer ’eṯ-raḇ-ṭabāḥîm:

15 ûmidallwōṯ hā‘ām wə’eṯ-yeṯer hā‘ām| hannišə’ārîm bā‘îr wə’eṯ-hannōfəlîm ’ăšer nāfəlû ’el-meleḵə bāḇel wə’ēṯ yeṯer hā’āmwōn heḡəlâ nəḇûzarə’ăḏān raḇ-ṭabāḥîm:

16 ûmidallwōṯ hā’āreṣ hišə’îr nəḇûzarə’ăḏān raḇ-ṭabāḥîm ləḵōrəmîm ûləyōḡəḇîm:

17 wə’eṯ-‘ammûḏê hannəḥōšeṯ ’ăšer ləḇêṯ-yəhwâ wə’eṯ-hamməḵōnwōṯ wə’eṯ-yām hannəḥōšeṯ ’ăšer bəḇêṯ-yəhwâ šibərû ḵaśədîm wayyiśə’û ’eṯ-kāl-nəḥušətām bāḇelâ:

18 wə’eṯ-hassirwōṯ wə’eṯ-hayyā‘îm wə’eṯ-haməzammərwōṯ wə’eṯ-hammizərāqōṯ wə’eṯ-hakapwōṯ wə’ēṯ kāl-kəlê hannəḥōšeṯ ’ăšer-yəšārəṯû ḇâem lāqāḥû:

19 wə’eṯ-hassipîm wə’eṯ-hammaḥətwōṯ wə’eṯ-hammizərāqwōṯ wə’eṯ-hassîrwōṯ wə’eṯ-hammənōrwōṯ wə’eṯ-hakapwōṯ wə’eṯ-hammənaqîwōṯ ’ăšer zâāḇ zâāḇ wa’ăšer-kesef kāsef lāqaḥ raḇ-ṭabāḥîm:

20 hā‘ammûḏîm| šənayim hayyām ’eḥāḏ wəhabāqār šənêm-‘āśār nəḥōšeṯ ’ăšer-taḥaṯ hamməḵōnwōṯ ’ăšer ‘āśâ hammeleḵə šəlōmōh ləḇêṯ yəhwâ lō’-hāyâ mišəqāl linəḥušətām kāl-hakēlîm hā’ēlleh:

21 wəhā‘ammûḏîm šəmōneh ‘eśərēh ’ammâ qwōmâ qwōmaṯ hā‘ammuḏ hā’eḥāḏ wəḥûṭ šətêm-‘eśərēh ’ammâ yəsubennû wə‘āḇəywō ’arəba‘ ’aṣəbā‘wōṯ nāḇûḇ:

22 wəḵōṯereṯ ‘ālāyw nəḥōšeṯ wəqwōmaṯ hakōṯereṯ hā’aḥaṯ ḥāmēš ’ammwōṯ ûśəḇāḵâ wərimmwōnîm ‘al-hakwōṯereṯ sāḇîḇ hakōl nəḥōšeṯ wəḵā’ēlleh la‘ammûḏ haššēnî wərimmwōnîm:

23 wayyihəyû hārimmōnîm tišə‘îm wəšiššâ rûḥâ kāl-hārimmwōnîm mē’â ‘al-haśśəḇāḵâ sāḇîḇ:

24 wayyiqqaḥ raḇ-ṭabāḥîm ’eṯ-śərāyâ kōhēn hārō’š wə’eṯ-ṣəfanəyâ kōhēn hammišəneh wə’eṯ-šəlōšeṯ šōmərê hassaf:

25 ûmin-hā‘îr lāqaḥ sārîs ’eḥāḏ ’ă‍šer-hāyâ fāqîḏ| ‘al-’anəšê hammiləḥāmâ wəšiḇə‘â ’ănāšîm mērō’ê fənê-hammeleḵə ’ăšer niməṣə’û ḇā‘îr wə’ēṯ sōfēr śar haṣṣāḇā’ hammaṣəbi’ ’eṯ-‘am hā’āreṣ wəšiššîm ’îš mē‘am hā’āreṣ hanniməṣə’îm bəṯwōḵə hā‘îr:

26 wayyiqqaḥ ’wōṯām nəḇûzarə’ăḏān raḇ-ṭabāḥîm wayyōleḵə ’wōṯām ’el-meleḵə bāḇel riḇəlāṯâ:

27 wayyakeh ’wōṯām meleḵə bāḇel wayəmiṯēm bəriḇəlâ bə’ereṣ ḥămāṯ wayyiḡel yəhûḏâ mē‘al ’aḏəmāṯwō:

28 zeh hā‘ām ’ăšer heḡəlâ nəḇûḵaḏəre’ṣṣar bišənaṯ-šeḇa‘ yəhûḏîm šəlōšeṯ ’ălāfîm wə‘eśərîm ûšəlōšâ:

29 bišənaṯ šəmwōneh ‘eśərēh linəḇûḵaḏəre’ṣṣar mîrûšālaim nefeš šəmōneh mē’wōṯ šəlōšîm ûšənāyim:

30 bišənaṯ šālōš wə‘eśərîm linəḇûḵaḏəre’ṣṣar heḡəlâ nəḇûzarə’ăḏān raḇ-ṭabāḥîm yəhûḏîm nefeš šəḇa‘ mē’wōṯ ’arəbā‘îm waḥămiššâ kāl-nefeš ’arəba‘aṯ ’ălāfîm wəšēš mē’wōṯ: f

31 wayəhî ḇišəlōšîm wāšeḇa‘ šānâ ləḡālûṯ yəhwōyāḵin meleḵə-yəhûḏâ bišənêm ‘āśār ḥōḏeš bə‘eśərîm waḥămiššâ laḥōḏeš nāśā’ ’ĕwîl mərōḏaḵə meleḵə bāḇel bišənaṯ maləḵuṯwō ’eṯ-rō’š yəhwōyāḵîn meleḵə-yəhûḏâ wayyōṣē’ ’wōṯwō mibêṯ hakəlî’ hakəlû’:

32 wayəḏabēr ’itwō ṭōḇwōṯ wayyitēn ’eṯ-kisə’wō mimma‘al ləḵissē’ məlāḵîm hamməlāḵîm ’ăšer ’itwō bəḇāḇel:

33 wəšinnâ ’ēṯ biḡəḏê ḵilə’wō wə’āḵal leḥem ləfānāyw tāmîḏ kāl-yəmê ḥayyāw:

34 wa’ăruḥāṯwō ’ăruḥaṯ tāmîḏ nitənâ-llwō mē’ēṯ meleḵə-bāḇel dəḇar-ywōm bəywōmwō ‘aḏ-ywōm mwōṯwō kōl yəmê ḥayyāyw:


Next: Ezekiel (Yechezqel) Chapter 1