Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 49

1 ‏לִבְנֵ֣י עַמּ֗וֹן כֹּ֚ה אָמַ֣ר יְהוָ֔ה הֲבָנִ֥ים אֵין֙ לְיִשְׂרָאֵ֔ל אִם־יוֹרֵ֖שׁ אֵ֣ין ל֑וֹ מַדּ֗וּעַ יָרַ֤שׁ מַלְכָּם֙ אֶת־גָּ֔ד וְעַמּ֖וֹ בְּעָרָ֥יו יָשָֽׁב׃

2 ‏לָכֵ֡ן הִנֵּה֩ יָמִ֨ים בָּאִ֜ים נְאֻם־יְהוָ֗ה וְ֠הִשְׁמַעְתִּי אֶל־רַבַּ֨ת בְּנֵי־עַמּ֜וֹן תְּרוּעַ֣ת מִלְחָמָ֗ה וְהָֽיְתָה֙ לְתֵ֣ל שְׁמָמָ֔ה וּבְנֹתֶ֖יהָ בָּאֵ֣שׁ תִּצַּ֑תְנָה וְיָרַ֧שׁ יִשְׂרָאֵ֛ל אֶת־יֹרְשָׁ֖יו אָמַ֥ר יְהוָֽה׃

3 ‏הֵילִ֨ילִי חֶשְׁבּ֜וֹן כִּ֣י שֻׁדְּדָה־עַ֗י צְעַקְנָה֮ בְּנ֣וֹת רַבָּה֒ חֲגֹ֣רְנָה שַׂקִּ֔ים סְפֹ֕דְנָה וְהִתְשׁוֹטַ֖טְנָה בַּגְּדֵר֑וֹת כִּ֤י מַלְכָּם֙ בַּגּוֹלָ֣ה יֵלֵ֔ךְ כֹּהֲנָ֥יו וְשָׂרָ֖יו יַחְדָּֽיו׃

4 ‏מַה־תִּתְהַֽלְלִי֙ בָּֽעֲמָקִ֔ים זָ֣ב עִמְקֵ֔ךְ הַבַּ֖ת הַשּֽׁוֹבֵבָ֑ה הַבֹּֽטְחָה֙ בְּאֹ֣צְרֹתֶ֔יהָ מִ֖י יָב֥וֹא אֵלָֽי׃

5 ‏הִנְנִי֩ מֵבִ֨יא עָלַ֜יִךְ פַּ֗חַד נְאֻם־אֲדֹנָ֧י יְהוִ֛ה צְבָא֖וֹת מִכָּל־סְבִיבָ֑יִךְ וְנִדַּחְתֶּם֙ אִ֣ישׁ לְפָנָ֔יו וְאֵ֥ין מְקַבֵּ֖ץ לַנֹּדֵֽד׃

6 ‏וְאַחֲרֵי־כֵ֗ן אָשִׁ֛יב אֶת־שְׁב֥וּת בְּנֵֽי־עַמּ֖וֹן נְאֻם־יְהוָֽה׃ ס

7 ‏לֶאֱד֗וֹם כֹּ֤ה אָמַר֙ יְהוָ֣ה צְבָא֔וֹת הַאֵ֥ין ע֛וֹד חָכְמָ֖ה בְּתֵימָ֑ן אָבְדָ֤ה עֵצָה֙ מִבָּנִ֔ים נִסְרְחָ֖ה חָכְמָתָֽם׃

8 ‏נֻ֤סוּ הָפְנוּ֙ הֶעְמִ֣יקוּ לָשֶׁ֔בֶת יֹשְׁבֵ֖י דְּדָ֑ן כִּ֣י אֵ֥יד עֵשָׂ֛ו הֵבֵ֥אתִי עָלָ֖יו עֵ֥ת פְּקַדְתִּֽיו׃

9 ‏אִם־בֹּֽצְרִים֙ בָּ֣אוּ לָ֔ךְ לֹ֥א יַשְׁאִ֖רוּ עֽוֹלֵל֑וֹת אִם־גַּנָּבִ֥ים בַּלַּ֖יְלָה הִשְׁחִ֥יתוּ דַיָּֽם׃

10 ‏כִּֽי־אֲנִ֞י חָשַׂ֣פְתִּי אֶת־עֵשָׂ֗ו גִּלֵּ֙יתִי֙ אֶת־מִסְתָּרָ֔יו וְנֶחְבָּ֖ה לֹ֣א יוּכָ֑ל שֻׁדַּ֥ד זַרְע֛וֹ וְאֶחָ֥יו וּשְׁכֵנָ֖יו וְאֵינֶֽנּוּ׃

11 ‏עָזְבָ֥ה יְתֹמֶ֖יךָ אֲנִ֣י אֲחַיֶּ֑ה וְאַלְמְנֹתֶ֖יךָ עָלַ֥י תִּבְטָֽחוּ׃ ס

12 ‏כִּי־כֹ֣ה׀ אָמַ֣ר יְהוָ֗ה הִ֠נֵּה אֲשֶׁר־אֵ֨ין מִשְׁפָּטָ֜ם לִשְׁתּ֤וֹת הַכּוֹס֙ שָׁת֣וֹ יִשְׁתּ֔וּ וְאַתָּ֣ה ה֔וּא נָקֹ֖ה תִּנָּקֶ֑ה לֹ֣א תִנָּקֶ֔ה כִּ֥י שָׁתֹ֖ה תִּשְׁתֶּֽה׃

13 ‏כִּ֣י בִ֤י נִשְׁבַּ֙עְתִּי֙ נְאֻם־יְהוָ֔ה כִּֽי־לְשַׁמָּ֧ה לְחֶרְפָּ֛ה לְחֹ֥רֶב וְלִקְלָלָ֖ה תִּֽהְיֶ֣ה בָצְרָ֑ה וְכָל־עָרֶ֥יהָ תִהְיֶ֖ינָה לְחָרְב֥וֹת עוֹלָֽם׃

14 ‏שְׁמוּעָ֤ה שָׁמַ֙עְתִּי֙ מֵאֵ֣ת יְהוָ֔ה וְצִ֖יר בַּגּוֹיִ֣ם שָׁל֑וּחַ הִֽתְקַבְּצוּ֙ וּבֹ֣אוּ עָלֶ֔יהָ וְק֖וּמוּ לַמִּלְחָמָֽה׃

15 ‏כִּֽי־הִנֵּ֥ה קָטֹ֛ן נְתַתִּ֖יךָ בַּגּוֹיִ֑ם בָּז֖וּי בָּאָדָֽם׃

16 ‏תִּֽפְלַצְתְּךָ֞ הִשִּׁ֤יא אֹתָךְ֙ זְד֣וֹן לִבֶּ֔ךָ שֹֽׁכְנִי֙ בְּחַגְוֵ֣י הַסֶּ֔לַע תֹּפְשִׂ֖י מְר֣וֹם גִּבְעָ֑ה כִּֽי־תַגְבִּ֤יהַ כַּנֶּ֙שֶׁר֙ קִנֶּ֔ךָ מִשָּׁ֥ם אֽוֹרִידְךָ֖ נְאֻם־יְהוָֽה׃

17 ‏וְהָיְתָ֥ה אֱד֖וֹם לְשַׁמָּ֑ה כֹּ֚ל עֹבֵ֣ר עָלֶ֔יהָ יִשֹּׁ֥ם וְיִשְׁרֹ֖ק עַל־כָּל־מַכּוֹתֶֽהָ׃

18 ‏כְּֽמַהְפֵּכַ֞ת סְדֹ֧ם וַעֲמֹרָ֛ה וּשְׁכֵנֶ֖יהָ אָמַ֣ר יְהוָ֑ה לֹֽא־יֵשֵׁ֥ב שָׁם֙ אִ֔ישׁ וְלֹֽא־יָג֥וּר בָּ֖הּ בֶּן־אָדָֽם׃

19 ‏הִ֠נֵּה כְּאַרְיֵ֞ה יַעֲלֶ֨ה מִגְּא֣וֹן הַיַּרְדֵּן֮ אֶל־נְוֵ֣ה אֵיתָן֒ כִּֽי־אַרְגִּ֤יעָה אֲרִיצֶ֨נּוּ מֵֽעָלֶ֔יהָ וּמִ֥י בָח֖וּר אֵלֶ֣יהָ אֶפְקֹ֑ד כִּ֣י מִ֤י כָמ֙וֹנִי֙ וּמִ֣י יֹעִידֶ֔נִּי וּמִי־זֶ֣ה רֹעֶ֔ה אֲשֶׁ֥ר יַעֲמֹ֖ד לְפָנָֽי׃ ס

20 ‏לָכֵ֞ן שִׁמְע֣וּ עֲצַת־יְהוָ֗ה אֲשֶׁ֤ר יָעַץ֙ אֶל־אֱד֔וֹם וּמַ֨חְשְׁבוֹתָ֔יו אֲשֶׁ֥ר חָשַׁ֖ב אֶל־יֹשְׁבֵ֣י תֵימָ֑ן אִם־לֹ֤א יִסְחָבוּם֙ צְעִירֵ֣י הַצֹּ֔אן אִם־לֹ֥א יַשִּׁ֛ים עֲלֵיהֶ֖ם נְוֵהֶֽם׃

21 ‏מִקּ֣וֹל נִפְלָ֔ם רָעֲשָׁ֖ה הָאָ֑רֶץ צְעָקָ֕ה בְּיַם־ס֖וּף נִשְׁמַ֥ע קוֹלָֽהּ׃

22 ‏הִנֵּ֤ה כַנֶּ֙שֶׁר֙ יַעֲלֶ֣ה וְיִדְאֶ֔ה וְיִפְרֹ֥שׂ כְּנָפָ֖יו עַל־בָּצְרָ֑ה וְֽ֠הָיָה לֵ֞ב גִּבּוֹרֵ֤י אֱדוֹם֙ בַּיּ֣וֹם הַה֔וּא כְּלֵ֖ב אִשָּׁ֥ה מְצֵרָֽה׃ ס

23 ‏לְדַמֶּ֗שֶׂק בּ֤וֹשָֽׁה חֲמָת֙ וְאַרְפָּ֔ד כִּי־שְׁמֻעָ֥ה רָעָ֛ה שָׁמְע֖וּ נָמֹ֑גוּ בַּיָּ֣ם דְּאָגָ֔ה הַשְׁקֵ֖ט לֹ֥א יוּכָֽל׃

24 ‏רָפְתָ֥ה דַמֶּ֛שֶׂק הִפְנְתָ֥ה לָנ֖וּס וְרֶ֣טֶט׀ הֶחֱזִ֑יקָה צָרָ֧ה וַחֲבָלִ֛ים אֲחָזַ֖תָּה כַּיּוֹלֵדָֽה׃

25 ‏אֵ֥יךְ לֹֽא־עֻזְּבָ֖ה עִ֣יר תהלה תְּהִלָּ֑ת קִרְיַ֖ת מְשׂוֹשִֽׂי׃

26 ‏לָכֵ֛ן יִפְּל֥וּ בַחוּרֶ֖יהָ בִּרְחֹבֹתֶ֑יהָ וְכָל־אַנְשֵׁ֨י הַמִּלְחָמָ֤ה יִדַּ֙מּוּ֙ בַּיּ֣וֹם הַה֔וּא נְאֻ֖ם יְהוָ֥ה צְבָאֽוֹת׃

27 ‏וְהִצַּ֥תִּי אֵ֖שׁ בְּחוֹמַ֣ת דַּמָּ֑שֶׂק וְאָכְלָ֖ה אַרְמְנ֥וֹת בֶּן־הֲדָֽד׃ ס

28 ‏לְקֵדָ֣ר׀ וּֽלְמַמְלְכ֣וֹת חָצ֗וֹר אֲשֶׁ֤ר הִכָּה֙ נבוכדראצור נְבֽוּכַדְרֶאצַּ֣ר מֶֽלֶךְ־בָּבֶ֔ל כֹּ֖ה אָמַ֣ר יְהוָ֑ה ק֚וּמוּ עֲל֣וּ אֶל־קֵדָ֔ר וְשָׁדְד֖וּ אֶת־בְּנֵי־קֶֽדֶם׃

29 ‏אָהֳלֵיהֶ֤ם וְצֹאנָם֙ יִקָּ֔חוּ יְרִיעוֹתֵיהֶ֧ם וְכָל־כְּלֵיהֶ֛ם וּגְמַלֵּיהֶ֖ם יִשְׂא֣וּ לָהֶ֑ם וְקָרְא֧וּ עֲלֵיהֶ֛ם מָג֖וֹר מִסָּבִֽיב׃

30 ‏נֻסוּ֩ נֻּ֨דוּ מְאֹ֜ד הֶעְמִ֧יקוּ לָשֶׁ֛בֶת יֹשְׁבֵ֥י חָצ֖וֹר נְאֻם־יְהוָ֑ה כִּֽי־יָעַ֨ץ עֲלֵיכֶ֜ם נְבוּכַדְרֶאצַּ֤ר מֶֽלֶךְ־בָּבֶל֙ עֵצָ֔ה וְחָשַׁ֥ב עליהם עֲלֵיכֶ֖ם מַחֲשָׁבָֽה׃

31 ‏ק֣וּמוּ עֲל֗וּ אֶל־גּ֥וֹי שְׁלֵ֛יו יוֹשֵׁ֥ב לָבֶ֖טַח נְאֻם־יְהוָ֑ה לֹא־דְלָתַ֧יִם וְלֹֽא־בְרִ֛יחַ ל֖וֹ בָּדָ֥ד יִשְׁכֹּֽנוּ׃

32 ‏וְהָי֨וּ גְמַלֵּיהֶ֜ם לָבַ֗ז וַהֲמ֤וֹן מִקְנֵיהֶם֙ לְשָׁלָ֔ל וְזֵרִתִ֥ים לְכָל־ר֖וּחַ קְצוּצֵ֣י פֵאָ֑ה וּמִכָּל־עֲבָרָ֛יו אָבִ֥יא אֶת־אֵידָ֖ם נְאֻם־יְהוָֽה׃

33 ‏וְהָיְתָ֨ה חָצ֜וֹר לִמְע֥וֹן תַּנִּ֛ים שְׁמָמָ֖ה עַד־עוֹלָ֑ם לֹֽא־יֵשֵׁ֥ב שָׁם֙ אִ֔ישׁ וְלֹֽא־יָג֥וּר בָּ֖הּ בֶּן־אָדָֽם׃ ס

34 ‏אֲשֶׁ֨ר הָיָ֧ה דְבַר־יְהוָ֛ה אֶל־יִרְמְיָ֥הוּ הַנָּבִ֖יא אֶל־עֵילָ֑ם בְּרֵאשִׁ֗ית מַלְכ֛וּת צִדְקִיָּ֥ה מֶֽלֶךְ־יְהוּדָ֖ה לֵאמֹֽר׃

35 ‏כֹּ֤ה אָמַר֙ יְהוָ֣ה צְבָא֔וֹת הִנְנִ֥י שֹׁבֵ֖ר אֶת־קֶ֣שֶׁת עֵילָ֑ם רֵאשִׁ֖ית גְּבוּרָתָֽם׃

36 ‏וְהֵבֵאתִ֨י אֶל־עֵילָ֜ם אַרְבַּ֣ע רוּח֗וֹת מֵֽאַרְבַּע֙ קְצ֣וֹת הַשָּׁמַ֔יִם וְזֵ֣רִתִ֔ים לְכֹ֖ל הָרֻח֣וֹת הָאֵ֑לֶּה וְלֹֽא־יִהְיֶ֣ה הַגּ֔וֹי אֲשֶׁ֛ר לֹֽא־יָב֥וֹא שָׁ֖ם נִדְּחֵ֥י עולם עֵילָֽם׃

37 ‏וְהַחְתַּתִּ֣י אֶת־עֵ֠ילָם לִפְנֵ֨י אֹיְבֵיהֶ֜ם וְלִפְנֵ֣י׀ מְבַקְשֵׁ֣י נַפְשָׁ֗ם וְהֵבֵאתִ֨י עֲלֵיהֶ֧ם׀ רָעָ֛ה אֶת־חֲר֥וֹן אַפִּ֖י נְאֻם־יְהוָ֑ה וְשִׁלַּחְתִּ֤י אַֽחֲרֵיהֶם֙ אֶת־הַחֶ֔רֶב עַ֥ד כַּלּוֹתִ֖י אוֹתָֽם׃

38 ‏וְשַׂמְתִּ֥י כִסְאִ֖י בְּעֵילָ֑ם וְהַאֲבַדְתִּ֥י מִשָּׁ֛ם מֶ֥לֶךְ וְשָׂרִ֖ים נְאֻם־יְהוָֽה׃

39 ‏וְהָיָ֣ה׀ בְּאַחֲרִ֣ית הַיָּמִ֗ים אשוב אָשִׁ֛יב אֶת־שבית שְׁב֥וּת עֵילָ֖ם נְאֻם־יְהוָֽה׃ ס

1 liḇənê ‘ammwōn kōh ’āmar yəhwâ hăḇānîm ’ên ləyiśərā’ēl ’im-ywōrēš ’ên lwō madû‘a yāraš maləkām ’eṯ-gāḏ wə‘ammwō bə‘ārāyw yāšāḇ:

2 lāḵēn hinnēh yāmîm bā’îm nə’um-yəhwâ wəhišəma‘ətî ’el-rabaṯ bənê-‘ammwōn tərû‘aṯ miləḥāmâ wəhāyəṯâ ləṯēl šəmāmâ ûḇənōṯeyhā bā’ēš tiṣṣaṯənâ wəyāraš yiśərā’ēl ’eṯ-yōrəšāyw ’āmar yəhwâ:

3 hêlîlî ḥešəbwōn kî šudəḏâ-‘ay ṣə‘aqənâ bənwōṯ rabâ ḥăḡōrənâ śaqqîm səfōḏənâ wəhiṯəšwōṭaṭənâ bagəḏērwōṯ kî maləkām bagwōlâ yēlēḵə kōhănāyw wəśārāyw yaḥədāyw:

4 mah-tiṯəhaləlî bā‘ămāqîm zāḇ ‘iməqēḵə habaṯ haššwōḇēḇâ habōṭəḥâ bə’ōṣərōṯeyhā mî yāḇwō’ ’ēlāy:

5 hinənî mēḇî’ ‘ālayiḵə paḥaḏ nə’um-’ăḏōnāy yəhwih ṣəḇā’wōṯ mikāl-səḇîḇāyiḵə wənidaḥətem ’îš ləfānāyw wə’ên məqabēṣ lannōḏēḏ:

6 wə’aḥărê-ḵēn ’āšîḇ ’eṯ-šəḇûṯ bənê-‘ammwōn nə’um-yəhwâ: s

7 le’ĕḏwōm kōh ’āmar yəhwâ ṣəḇā’wōṯ ha’ên ‘wōḏ ḥāḵəmâ bəṯêmān ’āḇəḏâ ‘ēṣâ mibānîm nisərəḥâ ḥāḵəmāṯām:

8 nusû hāfənû he‘əmîqû lāšeḇeṯ yōšəḇê dəḏān kî ’êḏ ‘ēśāw hēḇē’ṯî ‘ālāyw ‘ēṯ pəqaḏətîw:

9 ’im-bōṣərîm bā’û lāḵə lō’ yašə’irû ‘wōlēlwōṯ ’im-gannāḇîm ballayəlâ hišəḥîṯû ḏayyām:

10 kî-’ănî ḥāśafətî ’eṯ-‘ēśāw gillêṯî ’eṯ-misətārāyw wəneḥəbâ lō’ yûḵāl šudaḏ zarə‘wō wə’eḥāyw ûšəḵēnāyw wə’ênennû:

11 ‘āzəḇâ yəṯōmeyḵā ’ănî ’ăḥayyeh wə’aləmənōṯeyḵā ‘ālay tiḇəṭāḥû: s

12 kî-ḵōh| ’āmar yəhwâ hinnēh ’ăšer-’ên mišəpāṭām lišətwōṯ hakwōs šāṯwō yišətû wə’atâ hû’ nāqōh tinnāqeh lō’ ṯinnāqeh kî šāṯōh tišəteh:

13 kî ḇî nišəba‘ətî nə’um-yəhwâ kî-ləšammâ ləḥerəpâ ləḥōreḇ wəliqəlālâ tihəyeh ḇāṣərâ wəḵāl-‘āreyhā ṯihəyeynâ ləḥārəḇwōṯ ‘wōlām:

14 šəmû‘â šāma‘ətî mē’ēṯ yəhwâ wəṣîr bagwōyim šālûḥa hiṯəqabəṣû ûḇō’û ‘āleyhā wəqûmû lammiləḥāmâ:

15 kî-hinnēh qāṭōn nəṯatîḵā bagwōyim bāzûy bā’āḏām:

16 tifəlaṣətəḵā hiššî’ ’ōṯāḵə zəḏwōn libeḵā šōḵənî bəḥaḡəwê hassela‘ tōfəśî mərwōm giḇə‘â kî-ṯaḡəbîha kannešer qinneḵā miššām ’wōrîḏəḵā nə’um-yəhwâ:

17 wəhāyəṯâ ’ĕḏwōm ləšammâ kōl ‘ōḇēr ‘āleyhā yiššōm wəyišərōq ‘al-kāl-makwōṯehā:

18 kəmahəpēḵaṯ səḏōm wa‘ămōrâ ûšəḵēneyhā ’āmar yəhwâ lō’-yēšēḇ šām ’îš wəlō’-yāḡûr bāh ben-’āḏām:

19 hinnēh kə’arəyēh ya‘ăleh migə’wōn hayyarədēn ’el-nəwēh ’êṯān kî-’arəgî‘â ’ărîṣennû mē‘āleyhā ûmî ḇāḥûr ’ēleyhā ’efəqōḏ kî mî ḵāmwōnî ûmî yō‘îḏennî ûmî-zeh rō‘eh ’ăšer ya‘ămōḏ ləfānāy: s

20 lāḵēn šimə‘û ‘ăṣaṯ-yəhwâ ’ăšer yā‘aṣ ’el-’ĕḏwōm ûmaḥəšəḇwōṯāyw ’ăšer ḥāšaḇ ’el-yōšəḇê ṯêmān ’im-lō’ yisəḥāḇûm ṣə‘îrê haṣṣō’n ’im-lō’ yaššîm ‘ălêhem nəwēhem:

21 miqqwōl nifəlām rā‘ăšâ hā’āreṣ ṣə‘āqâ bəyam-sûf nišəma‘ qwōlāh:

22 hinnēh ḵannešer ya‘ăleh wəyiḏə’eh wəyifərōś kənāfāyw ‘al-bāṣərâ wəhāyâ lēḇ gibwōrê ’ĕḏwōm bayywōm hahû’ kəlēḇ ’iššâ məṣērâ: s

23 ləḏammeśeq bwōšâ ḥămāṯ wə’arəpāḏ kî-šəmu‘â rā‘â šāmə‘û nāmōḡû bayyām də’āḡâ hašəqēṭ lō’ yûḵāl:

24 rāfəṯâ ḏammeśeq hifənəṯâ lānûs wəreṭeṭ| heḥĕzîqâ ṣārâ waḥăḇālîm ’ăḥāzatâ kayywōlēḏâ:

25 ’êḵə lō’-‘uzzəḇâ ‘îr təhillâ təhillāṯ qirəyaṯ məśwōśî:

26 lāḵēn yipəlû ḇaḥûreyhā birəḥōḇōṯeyhā wəḵāl-’anəšê hammiləḥāmâ yidammû bayywōm hahû’ nə’um yəhwâ ṣəḇā’wōṯ:

27 wəhiṣṣatî ’ēš bəḥwōmaṯ dammāśeq wə’āḵəlâ ’arəmənwōṯ ben-hăḏāḏ: s

28 ləqēḏār| ûləmamələḵwōṯ ḥāṣwōr ’ăšer hikâ nəḇûḵaḏəre’ṣṣwōr nəḇûḵaḏəre’ṣṣar meleḵə-bāḇel kōh ’āmar yəhwâ qûmû ‘ălû ’el-qēḏār wəšāḏəḏû ’eṯ-bənê-qeḏem:

29 ’âŏlêhem wəṣō’nām yiqqāḥû yərî‘wōṯêhem wəḵāl-kəlêhem ûḡəmallêhem yiśə’û lâem wəqārə’û ‘ălêhem māḡwōr missāḇîḇ:

30 nusû nnuḏû mə’ōḏ he‘əmîqû lāšeḇeṯ yōšəḇê ḥāṣwōr nə’um-yəhwâ kî-yā‘aṣ ‘ălêḵem nəḇûḵaḏəre’ṣṣar meleḵə-bāḇel ‘ēṣâ wəḥāšaḇ ‘ălêhem ‘ălêḵem maḥăšāḇâ:

31 qûmû ‘ălû ’el-gwōy šəlêw ywōšēḇ lāḇeṭaḥ nə’um-yəhwâ lō’-ḏəlāṯayim wəlō’-ḇərîḥa lwō bāḏāḏ yišəkōnû:

32 wəhāyû ḡəmallêhem lāḇaz wahămwōn miqənêhem ləšālāl wəzēriṯîm ləḵāl-rûḥa qəṣûṣê fē’â ûmikāl-‘ăḇārāyw ’āḇî’ ’eṯ-’êḏām nə’um-yəhwâ:

33 wəhāyəṯâ ḥāṣwōr limə‘wōn tannîm šəmāmâ ‘aḏ-‘wōlām lō’-yēšēḇ šām ’îš wəlō’-yāḡûr bāh ben-’āḏām: s

34 ’ăšer hāyâ ḏəḇar-yəhwâ ’el-yirəməyâû hannāḇî’ ’el-‘êlām bərē’šîṯ maləḵûṯ ṣiḏəqîyâ meleḵə-yəhûḏâ lē’mōr:

35 kōh ’āmar yəhwâ ṣəḇā’wōṯ hinənî šōḇēr ’eṯ-qešeṯ ‘êlām rē’šîṯ gəḇûrāṯām:

36 wəhēḇē’ṯî ’el-‘êlām ’arəba‘ rûḥwōṯ mē’arəba‘ qəṣwōṯ haššāmayim wəzēriṯîm ləḵōl hāruḥwōṯ hā’ēlleh wəlō’-yihəyeh hagwōy ’ăšer lō’-yāḇwō’ šām nidəḥê ‘wōlām ‘êlām:

37 wəhaḥətatî ’eṯ-‘êlām lifənê ’ōyəḇêhem wəlifənê| məḇaqəšê nafəšām wəhēḇē’ṯî ‘ălêhem| rā‘â ’eṯ-ḥărwōn ’apî nə’um-yəhwâ wəšillaḥətî ’aḥărêhem ’eṯ-haḥereḇ ‘aḏ kallwōṯî ’wōṯām:

38 wəśamətî ḵisə’î bə‘êlām wəha’ăḇaḏətî miššām meleḵə wəśārîm nə’um-yəhwâ:

39 wəhāyâ| bə’aḥărîṯ hayyāmîm ’āšûḇ ’āšîḇ ’eṯ-šəḇîṯ šəḇûṯ ‘êlām nə’um-yəhwâ: s


Next: Jeremiah (Yermiyah) Chapter 50