Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 22

1 ‏כֹּ֚ה אָמַ֣ר יְהוָ֔ה רֵ֖ד בֵּֽית־מֶ֣לֶךְ יְהוּדָ֑ה וְדִבַּרְתָּ֣ שָׁ֔ם אֶת־הַדָּבָ֖ר הַזֶּֽה׃

2 ‏וְאָֽמַרְתָּ֙ שְׁמַ֣ע דְּבַר־יְהוָ֔ה מֶ֣לֶךְ יְהוּדָ֔ה הַיֹּשֵׁ֖ב עַל־כִּסֵּ֣א דָוִ֑ד אַתָּ֤ה וַעֲבָדֶ֙יךָ֙ וְעַמְּךָ֔ הַבָּאִ֖ים בַּשְּׁעָרִ֥ים הָאֵֽלֶּה׃ ס

3 ‏כֹּ֣ה׀ אָמַ֣ר יְהוָ֗ה עֲשׂ֤וּ מִשְׁפָּט֙ וּצְדָקָ֔ה וְהַצִּ֥ילוּ גָז֖וּל מִיַּ֣ד עָשׁ֑וֹק וְגֵר֩ יָת֨וֹם וְאַלְמָנָ֤ה אַל־תֹּנוּ֙ אַל־תַּחְמֹ֔סוּ וְדָ֣ם נָקִ֔י אַֽל־תִּשְׁפְּכ֖וּ בַּמָּק֥וֹם הַזֶּֽה׃

4 ‏כִּ֤י אִם־עָשׂוֹ֙ תַּֽעֲשׂ֔וּ אֶת־הַדָּבָ֖ר הַזֶּ֑ה וּבָ֣אוּ בְשַׁעֲרֵ֣י הַבַּ֣יִת הַזֶּ֡ה מְלָכִים֩ יֹשְׁבִ֨ים לְדָוִ֜ד עַל־כִּסְא֗וֹ רֹֽכְבִים֙ בָּרֶ֣כֶב וּבַסּוּסִ֔ים ה֥וּא ועבדו וַעֲבָדָ֖יו וְעַמּֽוֹ׃

5 ‏וְאִם֙ לֹ֣א תִשְׁמְע֔וּ אֶת־הַדְּבָרִ֖ים הָאֵ֑לֶּה בִּ֤י נִשְׁבַּ֙עְתִּי֙ נְאֻם־יְהוָ֔ה כִּי־לְחָרְבָּ֥ה יִֽהְיֶ֖ה הַבַּ֥יִת הַזֶּֽה׃ ס

6 ‏כִּֽי־כֹ֣ה׀ אָמַ֣ר יְהוָ֗ה עַל־בֵּית֙ מֶ֣לֶךְ יְהוּדָ֔ה גִּלְעָ֥ד אַתָּ֛ה לִ֖י רֹ֣אשׁ הַלְּבָנ֑וֹן אִם־לֹ֤א אֲשִֽׁיתְךָ֙ מִדְבָּ֔ר עָרִ֖ים לֹ֥א נושבה נוֹשָֽׁבוּ׃

7 ‏וְקִדַּשְׁתִּ֥י עָלֶ֛יךָ מַשְׁחִתִ֖ים אִ֣ישׁ וְכֵלָ֑יו וְכָֽרְתוּ֙ מִבְחַ֣ר אֲרָזֶ֔יךָ וְהִפִּ֖ילוּ עַל־הָאֵֽשׁ׃

8 ‏וְעָֽבְרוּ֙ גּוֹיִ֣ם רַבִּ֔ים עַ֖ל הָעִ֣יר הַזֹּ֑את וְאָֽמְרוּ֙ אִ֣ישׁ אֶל־רֵעֵ֔הוּ עַל־מֶ֨ה עָשָׂ֤ה יְהוָה֙ כָּ֔כָה לָעִ֥יר הַגְּדוֹלָ֖ה הַזֹּֽאת׃

9 ‏וְאָ֣מְר֔וּ עַ֚ל אֲשֶׁ֣ר עָֽזְב֔וּ אֶת־בְּרִ֥ית יְהוָ֖ה אֱלֹֽהֵיהֶ֑ם וַיִּֽשְׁתַּחֲו֛וּ לֵאלֹהִ֥ים אֲחֵרִ֖ים וַיַּעַבְדֽוּם׃ ס

10 ‏אַל־תִּבְכּ֣וּ לְמֵ֔ת וְאַל־תָּנֻ֖דוּ ל֑וֹ בְּכ֤וּ בָכוֹ֙ לַֽהֹלֵ֔ךְ כִּ֣י לֹ֤א יָשׁוּב֙ ע֔וֹד וְרָאָ֖ה אֶת־אֶ֥רֶץ מוֹלַדְתּֽוֹ׃ ס

11 ‏כִּ֣י כֹ֣ה אָֽמַר־יְ֠הוָה אֶל־שַׁלֻּ֨ם בֶּן־יֹאשִׁיָּ֜הוּ מֶ֣לֶךְ יְהוּדָ֗ה הַמֹּלֵךְ֙ תַּ֚חַת יֹאשִׁיָּ֣הוּ אָבִ֔יו אֲשֶׁ֥ר יָצָ֖א מִן־הַמָּק֣וֹם הַזֶּ֑ה לֹֽא־יָשׁ֥וּב שָׁ֖ם עֽוֹד׃

12 ‏כִּ֗י בִּמְק֛וֹם אֲשֶׁר־הִגְל֥וּ אֹת֖וֹ שָׁ֣ם יָמ֑וּת וְאֶת־הָאָ֥רֶץ הַזֹּ֖את לֹֽא־יִרְאֶ֥ה עֽוֹד׃ ס

13 ‏ה֣וֹי בֹּנֶ֤ה בֵיתוֹ֙ בְּֽלֹא־צֶ֔דֶק וַעֲלִיּוֹתָ֖יו בְּלֹ֣א מִשְׁפָּ֑ט בְּרֵעֵ֙הוּ֙ יַעֲבֹ֣ד חִנָּ֔ם וּפֹעֲל֖וֹ לֹ֥א יִתֶּן־לֽוֹ׃

14 ‏הָאֹמֵ֗ר אֶבְנֶה־לִּי֙ בֵּ֣ית מִדּ֔וֹת וַעֲלִיּ֖וֹת מְרֻוָּחִ֑ים וְקָ֤רַֽע לוֹ֙ חַלּוֹנָ֔י וְסָפ֣וּן בָּאָ֔רֶז וּמָשׁ֖וֹחַ בַּשָּׁשַֽׁר׃

15 ‏הֲתִֽמְלֹ֔ךְ כִּ֥י אַתָּ֖ה מְתַחֲרֶ֣ה בָאָ֑רֶז אָבִ֜יךָ הֲל֧וֹא אָכַ֣ל וְשָׁתָ֗ה וְעָשָׂ֤ה מִשְׁפָּט֙ וּצְדָקָ֔ה אָ֖ז ט֥וֹב לֽוֹ׃

16 ‏דָּ֛ן דִּין־עָנִ֥י וְאֶבְי֖וֹן אָ֣ז ט֑וֹב הֲלוֹא־הִ֛יא הַדַּ֥עַת אֹתִ֖י נְאֻם־יְהוָֽה׃

17 ‏כִּ֣י אֵ֤ין עֵינֶ֙יךָ֙ וְלִבְּךָ֔ כִּ֖י אִם־עַל־בִּצְעֶ֑ךָ וְעַ֤ל דַּֽם־הַנָּקִי֙ לִשְׁפּ֔וֹךְ וְעַל־הָעֹ֥שֶׁק וְעַל־הַמְּרוּצָ֖ה לַעֲשֽׂוֹת׃ ס

18 ‏לָכֵ֞ן כֹּֽה־אָמַ֣ר יְהוָ֗ה אֶל־יְהוֹיָקִ֤ים בֶּן־יֹאשִׁיָּ֙הוּ֙ מֶ֣לֶךְ יְהוּדָ֔ה לֹא־יִסְפְּד֣וּ ל֔וֹ ה֥וֹי אָחִ֖י וְה֣וֹי אָח֑וֹת לֹא־יִסְפְּד֣וּ ל֔וֹ ה֥וֹי אָד֖וֹן וְה֥וֹי הֹדֹֽה׃q

19 ‏קְבוּרַ֥ת חֲמ֖וֹר יִקָּבֵ֑ר סָח֣וֹב וְהַשְׁלֵ֔ךְ מֵהָ֖לְאָה לְשַׁעֲרֵ֥י יְרוּשָׁלִָֽם׃ ס

20 ‏עֲלִ֤י הַלְּבָנוֹן֙ וּֽצְעָ֔קִי וּבַבָּשָׁ֖ן תְּנִ֣י קוֹלֵ֑ךְ וְצַֽעֲקִי֙ מֵֽעֲבָרִ֔ים כִּ֥י נִשְׁבְּר֖וּ כָּל־מְאַהֲבָֽיִךְ׃

21 ‏דִּבַּ֤רְתִּי אֵלַ֙יִךְ֙ בְּשַׁלְוֹתַ֔יִךְ אָמַ֖רְתְּ לֹ֣א אֶשְׁמָ֑ע זֶ֤ה דַרְכֵּךְ֙ מִנְּעוּרַ֔יִךְ כִּ֥י לֹֽא־שָׁמַ֖עַתְּ בְּקוֹלִֽי׃

22 ‏כָּל־רֹעַ֙יִךְ֙ תִּרְעֶה־ר֔וּחַ וּֽמְאַהֲבַ֖יִךְ בַּשְּׁבִ֣י יֵלֵ֑כוּ כִּ֣י אָ֤ז תֵּבֹ֙שִׁי֙ וְנִכְלַ֔מְתְּ מִכֹּ֖ל רָעָתֵֽךְ׃

23 ‏ישבתי יֹשַׁבְתְּ֙ בַּלְּבָנ֔וֹן מקננתי מְקֻנַּ֖נְתְּ בָּֽאֲרָזִ֑ים מַה־נֵּחַנְתְּ֙ בְּבֹא־לָ֣ךְ חֲבָלִ֔ים חִ֖יל כַּיֹּלֵדָֽה׃3

24 ‏חַי־אָנִי֮ נְאֻם־יְהוָה֒ כִּ֣י אִם־יִהְיֶ֞ה כָּנְיָ֤הוּ בֶן־יְהֽוֹיָקִים֙ מֶ֣לֶךְ יְהוּדָ֔ה חוֹתָ֖ם עַל־יַ֣ד יְמִינִ֑י כִּ֥י מִשָּׁ֖ם אֶתְּקֶֽנְךָּ׃

25 ‏וּנְתַתִּ֗יךָ בְּיַד֙ מְבַקְשֵׁ֣י נַפְשֶׁ֔ךָ וּבְיַ֛ד אֲשֶׁר־אַתָּ֥ה יָג֖וֹר מִפְּנֵיהֶ֑ם וּבְיַ֛ד נְבוּכַדְרֶאצַּ֥ר מֶֽלֶךְ־בָּבֶ֖ל וּבְיַ֥ד הַכַּשְׂדִּֽים׃

26 ‏וְהֵֽטַלְתִּ֣י אֹתְךָ֗ וְאֶֽת־אִמְּךָ֙ אֲשֶׁ֣ר יְלָדַ֔תְךָ עַ֚ל הָאָ֣רֶץ אַחֶ֔רֶת אֲשֶׁ֥ר לֹֽא־יֻלַּדְתֶּ֖ם שָׁ֑ם וְשָׁ֖ם תָּמֽוּתוּ׃

27 ‏וְעַל־הָאָ֗רֶץ אֲשֶׁר־הֵ֛ם מְנַשְּׂאִ֥ים אֶת־נַפְשָׁ֖ם לָשׁ֣וּב שָׁ֑ם שָׁ֖מָּה לֹ֥א יָשֽׁוּבוּ׃ ס

28 ‏הַעֶ֨צֶב נִבְזֶ֜ה נָפ֗וּץ הָאִ֤ישׁ הַזֶּה֙ כָּנְיָ֔הוּ אִ֨ם־כְּלִ֔י אֵ֥ין חֵ֖פֶץ בּ֑וֹ מַדּ֤וּעַ הֽוּטֲלוּ֙ ה֣וּא וְזַרְע֔וֹ וְהֻ֨שְׁלְכ֔וּ עַל־הָאָ֖רֶץ אֲשֶׁ֥ר לֹא־יָדָֽעוּ׃

29 ‏אֶ֥רֶץ אֶ֖רֶץ אָ֑רֶץ שִׁמְעִ֖י דְּבַר־יְהוָֽה׃ ס

30 ‏כֹּ֣ה׀ אָמַ֣ר יְהוָ֗ה כִּתְב֞וּ אֶת־הָאִ֤ישׁ הַזֶּה֙ עֲרִירִ֔י גֶּ֖בֶר לֹא־יִצְלַ֣ח בְּיָמָ֑יו כִּי֩ לֹ֨א יִצְלַ֜ח מִזַּרְע֗וֹ אִ֚ישׁ יֹשֵׁב֙ עַל־כִּסֵּ֣א דָוִ֔ד וּמֹשֵׁ֥ל ע֖וֹד בִּיהוּדָֽה׃

1 kōh ’āmar yəhwâ rēḏ bêṯ-meleḵə yəhûḏâ wəḏibarətā šām ’eṯ-hadāḇār hazzeh:

2 wə’āmarətā šəma‘ dəḇar-yəhwâ meleḵə yəhûḏâ hayyōšēḇ ‘al-kissē’ ḏāwiḏ ’atâ wa‘ăḇāḏeyḵā wə‘amməḵā habā’îm baššə‘ārîm hā’ēlleh: s

3 kōh| ’āmar yəhwâ ‘ăśû mišəpāṭ ûṣəḏāqâ wəhaṣṣîlû ḡāzûl mîyaḏ ‘āšwōq wəḡēr yāṯwōm wə’aləmānâ ’al-tōnû ’al-taḥəmōsû wəḏām nāqî ’al-tišəpəḵû bammāqwōm hazzeh:

4 kî ’im-‘āśwō ta‘ăśû ’eṯ-hadāḇār hazzeh ûḇā’û ḇəša‘ărê habayiṯ hazzeh məlāḵîm yōšəḇîm ləḏāwiḏ ‘al-kisə’wō rōḵəḇîm bāreḵeḇ ûḇassûsîm hû’ wə‘aḇədwō wa‘ăḇāḏāyw wə‘ammwō:

5 wə’im lō’ ṯišəmə‘û ’eṯ-hadəḇārîm hā’ēlleh bî nišəba‘ətî nə’um-yəhwâ kî-ləḥārəbâ yihəyeh habayiṯ hazzeh: s

6 kî-ḵōh| ’āmar yəhwâ ‘al-bêṯ meleḵə yəhûḏâ gilə‘āḏ ’atâ lî rō’š halləḇānwōn ’im-lō’ ’ăšîṯəḵā miḏəbār ‘ārîm lō’ nwōšāḇâ nwōšāḇû:

7 wəqidašətî ‘āleyḵā mašəḥiṯîm ’îš wəḵēlāyw wəḵārəṯû miḇəḥar ’ărāzeyḵā wəhipîlû ‘al-hā’ēš:

8 wə‘āḇərû gwōyim rabîm ‘al hā‘îr hazzō’ṯ wə’āmərû ’îš ’el-rē‘ēhû ‘al-meh ‘āśâ yəhwâ kāḵâ lā‘îr hagəḏwōlâ hazzō’ṯ:

9 wə’āmərû ‘al ’ăšer ‘āzəḇû ’eṯ-bərîṯ yəhwâ ’ĕlōhêhem wayyišətaḥăwû lē’lōhîm ’ăḥērîm wayya‘aḇəḏûm: s

10 ’al-tiḇəkû ləmēṯ wə’al-tānuḏû lwō bəḵû ḇāḵwō lahōlēḵə kî lō’ yāšûḇ ‘wōḏ wərā’â ’eṯ-’ereṣ mwōlaḏətwō: s

11 kî ḵōh ’āmar-yəhwâ ’el-šallum ben-yō’šîyâû meleḵə yəhûḏâ hammōlēḵə taḥaṯ yō’šîyâû ’āḇîw ’ăšer yāṣā’ min-hammāqwōm hazzeh lō’-yāšûḇ šām ‘wōḏ:

12 kî biməqwōm ’ăšer-hiḡəlû ’ōṯwō šām yāmûṯ wə’eṯ-hā’āreṣ hazzō’ṯ lō’-yirə’eh ‘wōḏ: s

13 hwōy bōneh ḇêṯwō bəlō’-ṣeḏeq wa‘ălîywōṯāyw bəlō’ mišəpāṭ bərē‘ēhû ya‘ăḇōḏ ḥinnām ûfō‘ălwō lō’ yiten-lwō:

14 hā’ōmēr ’eḇəneh-llî bêṯ midwōṯ wa‘ălîywōṯ məruûāḥîm wəqāra‘ lwō ḥallwōnāy wəsāfûn bā’ārez ûmāšwōḥa baššāšar:

15 hăṯiməlōḵə kî ’atâ məṯaḥăreh ḇā’ārez ’āḇîḵā hălwō’ ’āḵal wəšāṯâ wə‘āśâ mišəpāṭ ûṣəḏāqâ ’āz ṭwōḇ lwō:

16 dān dîn-‘ānî wə’eḇəywōn ’āz ṭwōḇ hălwō’-hî’ hada‘aṯ ’ōṯî nə’um-yəhwâ:

17 kî ’ên ‘êneyḵā wəlibəḵā kî ’im-‘al-biṣə‘eḵā wə‘al dam-hannāqî lišəpwōḵə wə‘al-hā‘ōšeq wə‘al-hammərûṣâ la‘ăśwōṯ: s

18 lāḵēn kōh-’āmar yəhwâ ’el-yəhwōyāqîm ben-yō’šîyâû meleḵə yəhûḏâ lō’-yisəpəḏû lwō hwōy ’āḥî wəhwōy ’āḥwōṯ lō’-yisəpəḏû lwō hwōy ’āḏwōn wəhwōy hōḏōh:q

19 qəḇûraṯ ḥămwōr yiqqāḇēr sāḥwōḇ wəhašəlēḵə mēhālə’â ləša‘ărê yərûšālāim: s

20 ‘ălî halləḇānwōn ûṣə‘āqî ûḇabāšān tənî qwōlēḵə wəṣa‘ăqî mē‘ăḇārîm kî nišəbərû kāl-mə’ahăḇāyiḵə:

21 dibarətî ’ēlayiḵə bəšaləwōṯayiḵə ’āmarətə lō’ ’ešəmā‘ zeh ḏarəkēḵə minnə‘ûrayiḵə kî lō’-šāma‘atə bəqwōlî:

22 kāl-rō‘ayiḵə tirə‘eh-rûḥa ûmə’ahăḇayiḵə baššəḇî yēlēḵû kî ’āz tēḇōšî wəniḵəlamətə mikōl rā‘āṯēḵə:

23 yōšaḇətî yōšaḇətə balləḇānwōn məqunnanətî məqunnanətə bā’ărāzîm mah-nnēḥanətə bəḇō’-lāḵə ḥăḇālîm ḥîl kayyōlēḏâ:3

24 ḥay-’ānî nə’um-yəhwâ kî ’im-yihəyeh kānəyâû ḇen-yəhwōyāqîm meleḵə yəhûḏâ ḥwōṯām ‘al-yaḏ yəmînî kî miššām ’etəqenəḵḵā:

25 ûnəṯatîḵā bəyaḏ məḇaqəšê nafəšeḵā ûḇəyaḏ ’ăšer-’atâ yāḡwōr mipənêhem ûḇəyaḏ nəḇûḵaḏəre’ṣṣar meleḵə-bāḇel ûḇəyaḏ hakaśədîm:

26 wəhēṭalətî ’ōṯəḵā wə’eṯ-’imməḵā ’ăšer yəlāḏaṯəḵā ‘al hā’āreṣ ’aḥereṯ ’ăšer lō’-yullaḏətem šām wəšām tāmûṯû:

27 wə‘al-hā’āreṣ ’ăšer-hēm mənaśśə’îm ’eṯ-nafəšām lāšûḇ šām šāmmâ lō’ yāšûḇû: s

28 ha‘eṣeḇ niḇəzeh nāfûṣ hā’îš hazzeh kānəyâû ’im-kəlî ’ên ḥēfeṣ bwō madû‘a hûṭălû hû’ wəzarə‘wō wəhušələḵû ‘al-hā’āreṣ ’ăšer lō’-yāḏā‘û:

29 ’ereṣ ’ereṣ ’āreṣ šimə‘î dəḇar-yəhwâ: s

30 kōh| ’āmar yəhwâ kiṯəḇû ’eṯ-hā’îš hazzeh ‘ărîrî geḇer lō’-yiṣəlaḥ bəyāmāyw kî lō’ yiṣəlaḥ mizzarə‘wō ’îš yōšēḇ ‘al-kissē’ ḏāwiḏ ûmōšēl ‘wōḏ bîhûḏâ:


Next: Jeremiah (Yermiyah) Chapter 23