‎1 ‏הֵ֤ן עַבְדִּי֙ אֶתְמָךְ־בּ֔וֹ בְּחִירִ֖י רָצְתָ֣ה נַפְשִׁ֑י נָתַ֤תִּי רוּחִי֙ עָלָ֔יו מִשְׁפָּ֖ט לַגּוֹיִ֥ם יוֹצִֽיא׃

‎2 ‏לֹ֥א יִצְעַ֖ק וְלֹ֣א יִשָּׂ֑א וְלֹֽא־יַשְׁמִ֥יעַ בַּח֖וּץ קוֹלֽוֹ׃

‎3 ‏קָנֶ֤ה רָצוּץ֙ לֹ֣א יִשְׁבּ֔וֹר וּפִשְׁתָּ֥ה כֵהָ֖ה לֹ֣א יְכַבֶּ֑נָּה לֶאֱמֶ֖ת יוֹצִ֥יא מִשְׁפָּֽט׃

‎4 ‏לֹ֤א יִכְהֶה֙ וְלֹ֣א יָר֔וּץ עַד־יָשִׂ֥ים בָּאָ֖רֶץ מִשְׁפָּ֑ט וּלְתוֹרָת֖וֹ אִיִּ֥ים יְיַחֵֽילוּ׃ פ

‎5 ‏כֹּֽה־אָמַ֞ר הָאֵ֣ל׀ יְהוָ֗ה בּוֹרֵ֤א הַשָּׁמַ֙יִם֙ וְנ֣וֹטֵיהֶ֔ם רֹקַ֥ע הָאָ֖רֶץ וְצֶאֱצָאֶ֑יהָ נֹתֵ֤ן נְשָׁמָה֙ לָעָ֣ם עָלֶ֔יהָ וְר֖וּחַ לַהֹלְכִ֥ים בָּֽהּ׃

‎6 ‏אֲנִ֧י יְהוָ֛ה קְרָאתִ֥יךָֽ בְצֶ֖דֶק וְאַחְזֵ֣ק בְּיָדֶ֑ךָ וְאֶצָּרְךָ֗ וְאֶתֶּנְךָ֛ לִבְרִ֥ית עָ֖ם לְא֥וֹר גּוֹיִֽם׃

‎7 ‏לִפְקֹ֖חַ עֵינַ֣יִם עִוְר֑וֹת לְהוֹצִ֤יא מִמַּסְגֵּר֙ אַסִּ֔יר מִבֵּ֥ית כֶּ֖לֶא יֹ֥שְׁבֵי חֹֽשֶׁךְ׃

‎8 ‏אֲנִ֥י יְהוָ֖ה ה֣וּא שְׁמִ֑י וּכְבוֹדִי֙ לְאַחֵ֣ר לֹֽא־אֶתֵּ֔ן וּתְהִלָּתִ֖י לַפְּסִילִֽים׃

‎9 ‏הָרִֽאשֹׁנ֖וֹת הִנֵּה־בָ֑אוּ וַֽחֲדָשׁוֹת֙ אֲנִ֣י מַגִּ֔יד בְּטֶ֥רֶם תִּצְמַ֖חְנָה אַשְׁמִ֥יע¹ אֶתְכֶֽם׃ פ

‎10 ‏שִׁ֤ירוּ לַֽיהוָה֙ שִׁ֣יר חָדָ֔שׁ תְּהִלָּת֖וֹ מִקְצֵ֣ה הָאָ֑רֶץ יוֹרְדֵ֤י הַיָּם֙ וּמְלֹא֔וֹ אִיִּ֖ים וְיֹשְׁבֵיהֶֽם׃

‎11 ‏יִשְׂא֤וּ מִדְבָּר֙ וְעָרָ֔יו חֲצֵרִ֖ים תֵּשֵׁ֣ב קֵדָ֑ר יָרֹ֙נּוּ֙ יֹ֣שְׁבֵי סֶ֔לַע מֵרֹ֥אשׁ הָרִ֖ים יִצְוָֽחוּ׃

‎12 ‏יָשִׂ֥ימוּ לַֽיהוָ֖ה כָּב֑וֹד וּתְהִלָּת֖וֹ בָּאִיִּ֥ים יַגִּֽידוּ׃

‎13 ‏יְהוָה֙ כַּגִּבּ֣וֹר יֵצֵ֔א כְּאִ֥ישׁ מִלְחָמ֖וֹת יָעִ֣יר קִנְאָ֑ה יָרִ֙יעַ֙ אַף־יַצְרִ֔יחַ עַל־אֹיְבָ֖יו יִתְגַּבָּֽר׃ ס

‎14 ‏הֶחֱשֵׁ֙יתִי֙ מֵֽעוֹלָ֔ם אַחֲרִ֖ישׁ אֶתְאַפָּ֑ק כַּיּוֹלֵדָ֣ה אֶפְעֶ֔ה אֶשֹּׁ֥ם וְאֶשְׁאַ֖ף יָֽחַד׃

‎15 ‏אַחֲרִ֤יב הָרִים֙ וּגְבָע֔וֹת וְכָל־עֶשְׂבָּ֖ם אוֹבִ֑ישׁ וְשַׂמְתִּ֤י נְהָרוֹת֙ לָֽאִיִּ֔ים וַאֲגַמִּ֖ים אוֹבִֽישׁ׃

‎16 ‏וְהוֹלַכְתִּ֣י עִוְרִ֗ים בְּדֶ֙רֶךְ֙ לֹ֣א יָדָ֔עוּ בִּנְתִיב֥וֹת לֹֽא־יָדְע֖וּ אַדְרִיכֵ֑ם אָשִׂים֩ מַחְשָׁ֨ךְ לִפְנֵיהֶ֜ם לָא֗וֹר וּמַֽעֲקַשִּׁים֙ לְמִישׁ֔וֹר אֵ֚לֶּה הַדְּבָרִ֔ים עֲשִׂיתִ֖ם וְלֹ֥א עֲזַבְתִּֽים׃

‎17 ‏נָסֹ֤גוּ אָחוֹר֙ יֵבֹ֣שׁוּ בֹ֔שֶׁת הַבֹּטְחִ֖ים בַּפָּ֑סֶל הָאֹמְרִ֥ים לְמַסֵּכָ֖ה אַתֶּ֥ם אֱלֹהֵֽינוּ׃ ס

‎18 ‏הַחֵרְשִׁ֖ים שְׁמָ֑עוּ וְהַעִוְרִ֖ים הַבִּ֥יטוּ לִרְאֽוֹת׃

‎19 ‏מִ֤י עִוֵּר֙ כִּ֣י אִם־עַבְדִּ֔י וְחֵרֵ֖שׁ כְּמַלְאָכִ֣י אֶשְׁלָ֑ח מִ֤י עִוֵּר֙ כִּמְשֻׁלָּ֔ם וְעִוֵּ֖ר כְּעֶ֥בֶד יְהוָֽה׃

‎20 ‏ראית רָא֥וֹת רַבּ֖וֹת וְלֹ֣א תִשְׁמֹ֑ר פָּק֥וֹחַ אָזְנַ֖יִם וְלֹ֥א יִשְׁמָֽע׃

‎21 ‏יְהוָ֥ה חָפֵ֖ץ לְמַ֣עַן צִדְק֑וֹ יַגְדִּ֥יל תּוֹרָ֖ה וְיַאְדִּֽיר׃

‎22 ‏וְהוּא֮ עַם־בָּז֣וּז וְשָׁסוּי֒ הָפֵ֤חַ בַּֽחוּרִים֙ כֻּלָּ֔ם וּבְבָתֵּ֥י כְלָאִ֖ים הָחְבָּ֑אוּ הָי֤וּ לָבַז֙ וְאֵ֣ין מַצִּ֔יל מְשִׁסָּ֖ה וְאֵין־אֹמֵ֥ר הָשַֽׁב׃

‎23 ‏מִ֥י בָכֶ֖ם יַאֲזִ֣ין זֹ֑את יַקְשִׁ֥ב וְיִשְׁמַ֖ע לְאָחֽוֹר׃

‎24 ‏מִֽי־נָתַ֨ן למשוסה לִמְשִׁסָּ֧ה³ יַעֲקֹ֛ב וְיִשְׂרָאֵ֥ל לְבֹזְזִ֖ים הֲל֣וֹא יְהוָ֑ה ז֚וּ חָטָ֣אנוּ ל֔וֹ וְלֹֽא־אָב֤וּ בִדְרָכָיו֙ הָל֔וֹךְ וְלֹ֥א שָׁמְע֖וּ בְּתוֹרָתֽוֹ׃

‎25 ‏וַיִּשְׁפֹּ֤ךְ עָלָיו֙ חֵמָ֣ה אַפּ֔וֹ וֶעֱז֖וּז מִלְחָמָ֑ה וַתְּלַהֲטֵ֤הוּ מִסָּבִיב֙ וְלֹ֣א יָדָ֔ע וַתִּבְעַר־בּ֖וֹ וְלֹא־יָשִׂ֥ים עַל־לֵֽב׃ פ

1 hēn ‘aḇədî ’eṯəmāḵə-bwō bəḥîrî rāṣəṯâ nafəšî nāṯatî rûḥî ‘ālāyw mišəpāṭ lagwōyim ywōṣî’:

2 lō’ yiṣə‘aq wəlō’ yiśśā’ wəlō’-yašəmî‘a b^aḥûṣ qwōlwō:

3 qāneh rāṣûṣ lō’ yišəbwōr ûfišətâ ḵēhâ lō’ yəḵabennâ le’ĕmeṯ ywōṣî’ mišəpāṭ:

4 lō’ yiḵəheh wəlō’ yārûṣ ‘aḏ-yāśîm bā’āreṣ mišəpāṭ ûləṯwōrāṯwō ’îyîm yəy^aḥêlû: f

5 kōh-’āmar hā’ēl| yəhwâ bwōrē’ haššāmayim wənwōṭêhem rōq^a‘ hā’āreṣ wəṣe’ĕṣā’eyhā nōṯēn nəšāmâ lā‘ām ‘āleyhā wərûḥa lahōləḵîm bāh:

6 ’ănî yəhwâ qərā’ṯîḵā ḇəṣeḏeq wə’^aḥəzēq bəyāḏeḵā wə’eṣṣārəḵā wə’etenəḵā liḇərîṯ ‘ām lə’wōr gwōyim:

7 lifəqōḥa ‘ênayim ‘iwərwōṯ ləhwōṣî’ mimmasəgēr ’assîr mibêṯ kele’ yōšəḇê ḥōšeḵə:

8 ’ănî yəhwâ hû’ šəmî ûḵəḇwōḏî lə’^aḥēr lō’-’etēn ûṯəhillāṯî lapəsîlîm:

9 hāri’šōnwōṯ hinnēh-ḇā’û w^aḥăḏāšwōṯ ’ănî magîḏ bəṭerem tiṣəm^aḥənâ ’ašəm ’eṯəḵem: f

10 šîrû layhwâ šîr ḥāḏāš təhillāṯwō miqəṣēh hā’āreṣ ywōrəḏê hayyām ûməlō’wō ’îyîm wəyōšəḇêhem:

11 yiśə’û miḏəbār wə‘ārāyw ḥăṣērîm tēšēḇ qēḏār yārōnnû yōšəḇê sel^a‘ mērō’š hārîm yiṣəwāḥû:

12 yāśîmû layhwâ kāḇwōḏ ûṯəhillāṯwō bā’îyîm yagîḏû:

13 yəhwâ kagibwōr yēṣē’ kə’îš miləḥāmwōṯ yā‘îr qinə’â yārî‘a ’af-yaṣərîḥa ‘al-’ōyəḇāyw yiṯəgabār: s

14 heḥĕšêṯî mē‘wōlām ’^aḥărîš ’eṯə’apāq kayywōlēḏâ ’efə‘eh ’eššōm wə’ešə’af yāḥaḏ:

15 ’^aḥărîḇ hārîm ûḡəḇā‘wōṯ wəḵāl-‘eśəbām ’wōḇîš wəśamətî nəhārwōṯ lā’îyîm wa’ăḡammîm ’wōḇîš:

16 wəhwōlaḵətî ‘iwərîm bəḏereḵə lō’ yāḏā‘û binəṯîḇwōṯ lō’-yāḏə‘û ’aḏərîḵēm ’āśîm m^aḥəšāḵə lifənêhem lā’wōr ûm^a‘ăqaššîm ləmîšwōr ’ēlleh hadəḇārîm ‘ăśîṯim wəlō’ ‘ăzaḇətîm:

17 nāsōḡû ’āḥwōr yēḇōšû ḇōšeṯ habōṭəḥîm bapāsel hā’ōmərîm ləmassēḵâ ’atem ’ĕlōhênû: s

18 h^aḥērəšîm šəmā‘û wəh^a‘iwərîm habîṭû lirə’wōṯ:

19 mî ‘iûēr kî ’im-‘aḇədî wəḥērēš kəmalə’āḵî ’ešəlāḥ mî ‘iûēr kiməšullām wə‘iûēr kə‘eḇeḏ yəhwâ:

20 rā’îṯā rā’wōṯ rabwōṯ wəlō’ ṯišəmōr pāqwōḥa ’āzənayim wəlō’ yišəmā‘:

21 yəhwâ ḥāfēṣ ləm^a‘an ṣiḏəqwō yaḡədîl twōrâ wəya’ədîr:

22 wəhû’ ‘am-bāzûz wəšāsûy hāfēḥa b^aḥûrîm kullām ûḇəḇātê ḵəlā’îm hāḥəbā’û hāyû lāḇaz wə’ên maṣṣîl məšissâ wə’ên-’ōmēr hāšaḇ:

23 mî ḇāḵem ya’ăzîn zō’ṯ yaqəšiḇ wəyišəm^a‘ lə’āḥwōr:

24 mî-nāṯan liməšwōseh liməšissâ³ y^a‘ăqōḇ wəyiśərā’ēl ləḇōzəzîm hălwō’ yəhwâ zû ḥāṭā’nû lwō wəlō’-’āḇû ḇiḏərāḵāyw hālwōḵə wəlō’ šāmə‘û bəṯwōrāṯwō:

25 wayyišəpōḵə ‘ālāyw ḥēmâ ’apwō we‘ĕzûz miləḥāmâ watəlahăṭēhû missāḇîḇ wəlō’ yāḏā‘ watiḇə‘ar-bwō wəlō’-yāśîm ‘al-lēḇ: f