‎1 ‏ה֣וֹי בָּנִ֤ים סֽוֹרְרִים֙ נְאֻם־יְהוָ֔ה לַעֲשׂ֤וֹת עֵצָה֙ וְלֹ֣א מִנִּ֔י וְלִנְסֹ֥ךְ מַסֵּכָ֖ה וְלֹ֣א רוּחִ֑י לְמַ֛עַן סְפ֥וֹת חַטָּ֖את עַל־חַטָּֽאת׃

‎2 ‏הַהֹלְכִים֙ לָרֶ֣דֶת מִצְרַ֔יִם וּפִ֖י לֹ֣א שָׁאָ֑לוּ לָעוֹז֙ בְּמָע֣וֹז פַּרְעֹ֔ה וְלַחְס֖וֹת בְּצֵ֥ל מִצְרָֽיִם׃

‎3 ‏וְהָיָ֥ה לָכֶ֛ם מָע֥וֹז פַּרְעֹ֖ה לְבֹ֑שֶׁת וְהֶחָס֥וּת בְּצֵל־מִצְרַ֖יִם לִכְלִמָּֽה׃

‎4 ‏כִּֽי־הָי֥וּ בְצֹ֖עַן שָׂרָ֑יו וּמַלְאָכָ֖יו חָנֵ֥ס יַגִּֽיעוּ׃

‎5 ‏כֹּ֣ל הבאיש הֹבִ֔ישׁ עַל־עַ֖ם לֹא־יוֹעִ֣ילוּ לָ֑מוֹ לֹ֤א לְעֵ֙זֶר֙ וְלֹ֣א לְהוֹעִ֔יל כִּ֥י לְבֹ֖שֶׁת וְגַם־לְחֶרְפָּֽה׃ ס

‎6 ‏מַשָּׂ֖א בַּהֲמ֣וֹת נֶ֑גֶב בְּאֶרֶץ֩ צָרָ֨ה וְצוּקָ֜ה לָבִ֧יא וָלַ֣יִשׁ מֵהֶ֗ם אֶפְעֶה֙ וְשָׂרָ֣ף מְעוֹפֵ֔ף יִשְׂאוּ֩ עַל־כֶּ֨תֶף עֲיָרִ֜ים חֵֽילֵהֶ֗ם וְעַל־דַּבֶּ֤שֶׁת גְּמַלִּים֙ אֽוֹצְרֹתָ֔ם עַל־עַ֖ם לֹ֥א יוֹעִֽילוּ׃

‎7 ‏וּמִצְרַ֕יִם הֶ֥בֶל וָרִ֖יק יַעְזֹ֑רוּ לָכֵן֙ קָרָ֣אתִי לָזֹ֔את רַ֥הַב הֵ֖ם שָֽׁבֶת׃

‎8 ‏עַתָּ֗ה בּ֣וֹא כָתְבָ֥הּ עַל־ל֛וּחַ אִתָּ֖ם וְעַל־סֵ֣פֶר חֻקָּ֑הּ וּתְהִי֙ לְי֣וֹם אַחֲר֔וֹן לָעַ֖ד עַד־עוֹלָֽם׃

‎9 ‏כִּ֣י עַ֤ם מְרִי֙ ה֔וּא בָּנִ֖ים כֶּחָשִׁ֑ים בָּנִ֕ים לֹֽא־אָב֥וּ שְׁמ֖וֹעַ תּוֹרַ֥ת יְהוָֽה׃

‎10 ‏אֲשֶׁ֨ר אָמְר֤וּ לָֽרֹאִים֙ לֹ֣א תִרְא֔וּ וְלַ֣חֹזִ֔ים לֹ֥א תֶחֱזוּ־לָ֖נוּ נְכֹח֑וֹת דַּבְּרוּ־לָ֣נוּ חֲלָק֔וֹת חֲז֖וּ מַהֲתַלּֽוֹת׃

‎11 ‏ס֚וּרוּ מִנֵּי־דֶ֔רֶךְ הַטּ֖וּ מִנֵּי־אֹ֑רַח הַשְׁבִּ֥יתוּ מִפָּנֵ֖ינוּ אֶת־קְד֥וֹשׁ יִשְׂרָאֵֽל׃ ס

‎12 ‏לָכֵ֗ן כֹּ֤ה אָמַר֙ קְד֣וֹשׁ יִשְׂרָאֵ֔ל יַ֥עַן מָֽאָסְכֶ֖ם בַּדָּבָ֣ר הַזֶּ֑ה וַֽתִּבְטְחוּ֙ בְּעֹ֣שֶׁק וְנָל֔וֹז וַתִּֽשָּׁעֲנ֖וּ עָלָֽיו׃

‎13 ‏לָכֵ֗ן יִֽהְיֶ֤ה לָכֶם֙ הֶעָוֹ֣ן הַזֶּ֔ה כְּפֶ֣רֶץ נֹפֵ֔ל נִבְעֶ֖ה בְּחוֹמָ֣ה נִשְׂגָּבָ֑ה אֲשֶׁר־פִּתְאֹ֥ם לְפֶ֖תַע יָב֥וֹא שִׁבְרָֽהּ׃

‎14 ‏וּ֠שְׁבָרָהּ כְּשֵׁ֨בֶר נֵ֧בֶל יוֹצְרִ֛ים כָּת֖וּת לֹ֣א יַחְמֹ֑ל וְלֹֽא־יִמָּצֵ֤א בִמְכִתָּתוֹ֙ חֶ֔רֶשׂ לַחְתּ֥וֹת אֵשׁ֙ מִיָּק֔וּד וְלַחְשֹׂ֥ף מַ֖יִם מִגֶּֽבֶא׃ פ

‎15 ‏כִּ֣י כֹֽה־אָמַר֩ אֲדֹנָ֨י יְהוִ֜ה קְד֣וֹשׁ יִשְׂרָאֵ֗ל בְּשׁוּבָ֤ה וָנַ֙חַת֙ תִּוָּ֣שֵׁע֔וּן בְּהַשְׁקֵט֙ וּבְבִטְחָ֔ה תִּֽהְיֶ֖ה³ גְּבֽוּרַתְכֶ֑ם וְלֹ֖א אֲבִיתֶֽם׃

‎16 ‏וַתֹּ֨אמְר֥וּ לֹא־כִ֛י עַל־ס֥וּס נָנ֖וּס עַל־כֵּ֣ן תְּנוּס֑וּן וְעַל־קַ֣ל נִרְכָּ֔ב עַל־כֵּ֖ן יִקַּ֥לּוּ רֹדְפֵיכֶֽם׃

‎17 ‏אֶ֣לֶף אֶחָ֗ד מִפְּנֵי֙ גַּעֲרַ֣ת אֶחָ֔ד מִפְּנֵ֛י גַּעֲרַ֥ת חֲמִשָּׁ֖ה תָּנֻ֑סוּ עַ֣ד אִם־נוֹתַרְתֶּ֗ם כַּתֹּ֙רֶן֙ עַל־רֹ֣אשׁ הָהָ֔ר וְכַנֵּ֖ס עַל־הַגִּבְעָֽה׃

‎18 ‏וְלָכֵ֞ן יְחַכֶּ֤ה יְהוָה֙ לַֽחֲנַנְכֶ֔ם וְלָכֵ֥ן יָר֖וּם לְרַֽחֶמְכֶ֑ם כִּֽי־אֱלֹהֵ֤י מִשְׁפָּט֙ יְהוָ֔ה אַשְׁרֵ֖י כָּל־ח֥וֹכֵי לֽוֹ׃ ס

‎19 ‏כִּי־עַ֛ם בְּצִיּ֥וֹן יֵשֵׁ֖ב בִּירֽוּשָׁלִָ֑ם בָּכ֣וֹ לֹֽא־תִבְכֶּ֗ה חָנ֤וֹן יָחְנְךָ֙ לְק֣וֹל זַעֲקֶ֔ךָ כְּשָׁמְעָת֖וֹ עָנָֽךְ׃

‎20 ‏וְנָתַ֨ן לָכֶ֧ם אֲדֹנָ֛י לֶ֥חֶם צָ֖ר וּמַ֣יִם לָ֑חַץ וְלֹֽא־יִכָּנֵ֥ף עוֹד֙ מוֹרֶ֔יךָ וְהָי֥וּ עֵינֶ֖יךָ רֹא֥וֹת אֶת־מוֹרֶֽיךָ׃

‎21 ‏וְאָזְנֶ֙יךָ֙ תִּשְׁמַ֣עְנָה דָבָ֔ר מֵֽאַחֲרֶ֖יךָ לֵאמֹ֑ר זֶ֤ה הַדֶּ֙רֶךְ֙ לְכ֣וּ ב֔וֹ כִּ֥י תַאֲמִ֖ינוּ וְכִ֥י תַשְׂמְאִֽילוּ׃

‎22 ‏וְטִמֵּאתֶ֗ם אֶת־צִפּוּי֙ פְּסִילֵ֣י כַסְפֶּ֔ךָ וְאֶת־אֲפֻדַּ֖ת מַסֵּכַ֣ת זְהָבֶ֑ךָ תִּזְרֵם֙ כְּמ֣וֹ דָוָ֔ה צֵ֖א תֹּ֥אמַר לֽוֹ׃

‎23 ‏וְנָתַן֩ מְטַ֨ר זַרְעֲךָ֜ אֲשֶׁר־תִּזְרַ֣ע אֶת־הָאֲדָמָ֗ה וְלֶ֙חֶם֙ תְּבוּאַ֣ת הָֽאֲדָמָ֔ה וְהָיָ֥ה דָשֵׁ֖ן וְשָׁמֵ֑ן יִרְעֶ֥ה מִקְנֶ֛יךָ בַּיּ֥וֹם הַה֖וּא כַּ֥ר נִרְחָֽב׃

‎24 ‏וְהָאֲלָפִ֣ים וְהָעֲיָרִ֗ים עֹֽבְדֵי֙ הָֽאֲדָמָ֔ה בְּלִ֥יל חָמִ֖יץ יֹאכֵ֑לוּ אֲשֶׁר־זֹרֶ֥ה בָרַ֖חַת וּבַמִּזְרֶֽה׃

‎25 ‏וְהָיָ֣ה׀ עַל־כָּל־הַ֣ר גָּבֹ֗הַ¹ וְעַל֙ כָּל־גִּבְעָ֣ה נִשָּׂאָ֔ה פְּלָגִ֖ים יִבְלֵי־מָ֑יִם בְּיוֹם֙ הֶ֣רֶג רָ֔ב בִּנְפֹ֖ל מִגְדָּלִֽים׃

‎26 ‏וְהָיָ֤ה אוֹר־הַלְּבָנָה֙³ כְּא֣וֹר הַֽחַמָּ֔ה וְא֤וֹר הַֽחַמָּה֙ יִהְיֶ֣ה שִׁבְעָתַ֔יִם כְּא֖וֹר שִׁבְעַ֣ת הַיָּמִ֑ים בְּי֗וֹם חֲבֹ֤שׁ יְהוָה֙ אֶת־שֶׁ֣בֶר עַמּ֔וֹ וּמַ֥חַץ מַכָּת֖וֹ יִרְפָּֽא׃ ס

‎27 ‏הִנֵּ֤ה שֵׁם־יְהוָה֙ בָּ֣א מִמֶּרְחָ֔ק בֹּעֵ֣ר אַפּ֔וֹ וְכֹ֖בֶד מַשָּׂאָ֑ה שְׂפָתָיו֙ מָ֣לְאוּ זַ֔עַם וּלְשׁוֹנ֖וֹ כְּאֵ֥שׁ אֹכָֽלֶת׃

‎28 ‏וְרוּח֞וֹ כְּנַ֤חַל שׁוֹטֵף֙ עַד־צַוָּ֣אר יֶֽחֱצֶ֔ה לַהֲנָפָ֥ה גוֹיִ֖ם בְּנָ֣פַת שָׁ֑וְא וְרֶ֣סֶן מַתְעֶ֔ה עַ֖ל לְחָיֵ֥י עַמִּֽים׃

‎29 ‏הַשִּׁיר֙ יִֽהְיֶ֣ה לָכֶ֔ם כְּלֵ֖יל הִתְקַדֶּשׁ־חָ֑ג וְשִׂמְחַ֣ת לֵבָ֗ב כַּֽהוֹלֵךְ֙ בֶּֽחָלִ֔יל לָב֥וֹא בְהַר־יְהוָ֖ה אֶל־צ֥וּר יִשְׂרָאֵֽל׃

‎30 ‏וְהִשְׁמִ֨יעַ יְהוָ֜ה אֶת־ה֣וֹד קוֹל֗וֹ וְנַ֤חַת זְרוֹעוֹ֙ יַרְאֶ֔ה בְּזַ֣עַף אַ֔ף וְלַ֖הַב אֵ֣שׁ אוֹכֵלָ֑ה נֶ֥פֶץ וָזֶ֖רֶם וְאֶ֥בֶן בָּרָֽד׃

‎31 ‏כִּֽי־מִקּ֥וֹל יְהוָ֖ה יֵחַ֣ת אַשּׁ֑וּר בַּשֵּׁ֖בֶט יַכֶּֽה׃

‎32 ‏וְהָיָ֗ה כֹּ֤ל מַֽעֲבַר֙ מַטֵּ֣ה מֽוּסָדָ֔ה אֲשֶׁ֨ר יָנִ֤יחַ יְהוָה֙ עָלָ֔יו בְּתֻפִּ֖ים וּבְכִנֹּר֑וֹת וּבְמִלְחֲמ֥וֹת תְּנוּפָ֖ה נִלְחַם־בה בָּֽם׃

‎33 ‏כִּֽי־עָר֤וּךְ מֵֽאֶתְמוּל֙ תָּפְתֶּ֔ה גַּם־הוא הִ֛יא לַמֶּ֥לֶךְ הוּכָ֖ן הֶעְמִ֣יק הִרְחִ֑ב מְדֻרָתָ֗הּ אֵ֤שׁ וְעֵצִים֙ הַרְבֵּ֔ה נִשְׁמַ֤ת יְהוָה֙ כְּנַ֣חַל גָּפְרִ֔ית בֹּעֲרָ֖ה בָּֽהּ׃ ס

1 hwōy bānîm swōrərîm nə’um-yəhwâ l^a‘ăśwōṯ ‘ēṣâ wəlō’ minnî wəlinəsōḵə massēḵâ wəlō’ rûḥî ləm^a‘an səfwōṯ ḥaṭṭā’ṯ ‘al-ḥaṭṭā’ṯ:

2 hahōləḵîm lāreḏeṯ miṣərayim ûfî lō’ šā’ālû lā‘wōz bəmā‘wōz parə‘ōh wəl^aḥəswōṯ bəṣēl miṣərāyim:

3 wəhāyâ lāḵem mā‘wōz parə‘ōh ləḇōšeṯ wəheḥāsûṯ bəṣēl-miṣərayim liḵəlimmâ:

4 kî-hāyû ḇəṣō‘an śārāyw ûmalə’āḵāyw ḥānēs yagî‘û:

5 kōl hiḇə’îš hōḇîš ‘al-‘am lō’-ywō‘îlû lāmwō lō’ lə‘ēzer wəlō’ ləhwō‘îl kî ləḇōšeṯ wəḡam-ləḥerəpâ: s

6 maśśā’ bahămwōṯ neḡeḇ bə’ereṣ ṣārâ wəṣûqâ lāḇî’ wālayiš mēhem ’efə‘eh wəśārāf mə‘wōfēf yiśə’û ‘al-keṯef ‘ăyārîm ḥêlēhem wə‘al-dabešeṯ gəmallîm ’wōṣərōṯām ‘al-‘am lō’ ywō‘îlû:

7 ûmiṣərayim heḇel wārîq y^a‘əzōrû lāḵēn qārā’ṯî lāzō’ṯ rahaḇ hēm šāḇeṯ:

8 ‘atâ bwō’ ḵāṯəḇāh ‘al-lûḥa ’itām wə‘al-sēfer ḥuqqāh ûṯəhî ləywōm ’^aḥărwōn lā‘aḏ ‘aḏ-‘wōlām:

9 kî ‘am mərî hû’ bānîm keḥāšîm bānîm lō’-’āḇû šəmwō‘a twōraṯ yəhwâ:

10 ’ăšer ’āmərû lārō’îm lō’ ṯirə’û wəl^aḥōzîm lō’ ṯeḥĕzû-lānû nəḵōḥwōṯ dabərû-lānû ḥălāqwōṯ ḥăzû mahăṯallwōṯ:

11 sûrû minnê-ḏereḵə haṭṭû minnê-’ōr^aḥ hašəbîṯû mipānênû ’eṯ-qəḏwōš yiśərā’ēl: s

12 lāḵēn kōh ’āmar qəḏwōš yiśərā’ēl y^a‘an mā’āsəḵem badāḇār hazzeh watiḇəṭəḥû bə‘ōšeq wənālwōz watiššā‘ănû ‘ālāyw:

13 lāḵēn yihəyeh lāḵem he‘āwōn hazzeh kəfereṣ nōfēl niḇə‘eh bəḥwōmâ niśəgāḇâ ’ăšer-piṯə’ōm ləfeṯ^a‘ yāḇwō’ šiḇərāh:

14 ûšəḇārāh kəšēḇer nēḇel ywōṣərîm kāṯûṯ lō’ y^aḥəmōl wəlō’-yimmāṣē’ ḇiməḵitāṯwō ḥereś l^aḥətwōṯ ’ēš mîyāqûḏ wəl^aḥəśōf mayim migeḇe’: f

15 kî ḵōh-’āmar ’ăḏōnāy yəhwih qəḏwōš yiśərā’ēl bəšûḇâ wān^aḥaṯ tiûāšē‘ûn bəhašəqēṭ ûḇəḇiṭəḥâ tihəyeh³ gəḇûraṯəḵem wəlō’ ’ăḇîṯem:

16 watō’mərû lō’-ḵî ‘al-sûs nānûs ‘al-kēn tənûsûn wə‘al-qal nirəkāḇ ‘al-kēn yiqqallû rōḏəfêḵem:

17 ’elef ’eḥāḏ mipənê g^a‘ăraṯ ’eḥāḏ mipənê g^a‘ăraṯ ḥămiššâ tānusû ‘aḏ ’im-nwōṯarətem katōren ‘al-rō’š hâār wəḵannēs ‘al-hagiḇə‘â:

18 wəlāḵēn yəḥakeh yəhwâ l^aḥănanəḵem wəlāḵēn yārûm lər^aḥeməḵem kî-’ĕlōhê mišəpāṭ yəhwâ ’ašərê kāl-ḥwōḵê lwō: s

19 kî-‘am bəṣîywōn yēšēḇ bîrûšālāim bāḵwō lō’-ṯiḇəkeh ḥānwōn yāḥənəḵā ləqwōl z^a‘ăqeḵā kəšāmə‘āṯwō ‘ānāḵə:

20 wənāṯan lāḵem ’ăḏōnāy leḥem ṣār ûmayim lāḥaṣ wəlō’-yikānēf ‘wōḏ mwōreyḵā wəhāyû ‘êneyḵā rō’wōṯ ’eṯ-mwōreyḵā:

21 wə’āzəneyḵā tišəm^a‘ənâ ḏāḇār mē’^aḥăreyḵā lē’mōr zeh hadereḵə ləḵû ḇwō kî ṯa’ămînû wəḵî ṯaśəmə’îlû:

22 wəṭimmē’ṯem ’eṯ-ṣipûy pəsîlê ḵasəpeḵā wə’eṯ-’ăfudaṯ massēḵaṯ zəhāḇeḵā tizərēm kəmwō ḏāwâ ṣē’ tō’mar lwō:

23 wənāṯan məṭar zarə‘ăḵā ’ăšer-tizər^a‘ ’eṯ-hā’ăḏāmâ wəleḥem təḇû’aṯ hā’ăḏāmâ wəhāyâ ḏāšēn wəšāmēn yirə‘eh miqəneyḵā bayywōm hahû’ kar nirəḥāḇ:

24 wəhā’ălāfîm wəhā‘ăyārîm ‘ōḇəḏê hā’ăḏāmâ bəlîl ḥāmîṣ yō’ḵēlû ’ăšer-zōreh ḇār^aḥaṯ ûḇammizəreh:

25 wəhāyâ| ‘al-kāl-har gāḇōha¹ wə‘al kāl-giḇə‘â niśśā’â pəlāḡîm yiḇəlê-māyim bəywōm hereḡ rāḇ binəfōl miḡədālîm:

26 wəhāyâ ’wōr-halləḇānâ³ kə’wōr h^aḥammâ wə’wōr h^aḥammâ yihəyeh šiḇə‘āṯayim kə’wōr šiḇə‘aṯ hayyāmîm bəywōm ḥăḇōš yəhwâ ’eṯ-šeḇer ‘ammwō ûm^aḥaṣ makāṯwō yirəpā’: s

27 hinnēh šēm-yəhwâ bā’ mimmerəḥāq bō‘ēr ’apwō wəḵōḇeḏ maśśā’â śəfāṯāyw mālə’û z^a‘am ûləšwōnwō kə’ēš ’ōḵāleṯ:

28 wərûḥwō kən^aḥal šwōṭēf ‘aḏ-ṣaûā’r yeḥĕṣeh lahănāfâ ḡwōyim bənāfaṯ šāwə’ wəresen maṯə‘eh ‘al ləḥāyê ‘ammîm:

29 haššîr yihəyeh lāḵem kəlêl hiṯəqadeš-ḥāḡ wəśiməḥaṯ lēḇāḇ kahwōlēḵə beḥālîl lāḇwō’ ḇəhar-yəhwâ ’el-ṣûr yiśərā’ēl:

30 wəhišəmî‘a yəhwâ ’eṯ-hwōḏ qwōlwō wən^aḥaṯ zərwō‘wō yarə’eh bəz^a‘af ’af wəlahaḇ ’ēš ’wōḵēlâ nefeṣ wāzerem wə’eḇen bārāḏ:

31 kî-miqqwōl yəhwâ yēḥaṯ ’aššûr baššēḇeṭ yakeh:

32 wəhāyâ kōl m^a‘ăḇar maṭṭēh mûsāḏâ ’ăšer yānîḥa yəhwâ ‘ālāyw bəṯupîm ûḇəḵinnōrwōṯ ûḇəmiləḥămwōṯ tənûfâ niləḥam-bāh bām:

33 kî-‘ārûḵə mē’eṯəmûl tāfəteh gam-hû’ hî’ lammeleḵə hûḵān he‘əmîq hirəḥiḇ məḏurāṯāh ’ēš wə‘ēṣîm harəbēh nišəmaṯ yəhwâ kən^aḥal gāfərîṯ bō‘ărâ bāh: s