Sacred Texts  Bible  Index 
Polyglot  KJV  Sep  Vul 

Isaiah (Yisheyah) Index
  Previous  Next 

Tanach (Hebrew): Isaiah (Yisheyah) Chapter 25

1 ‏יְהוָ֤ה אֱלֹהַי֙ אַתָּ֔ה אֲרֽוֹמִמְךָ֙ אוֹדֶ֣ה שִׁמְךָ֔ כִּ֥י עָשִׂ֖יתָ פֶּ֑לֶא עֵצ֥וֹת מֵֽרָח֖וֹק אֱמ֥וּנָה אֹֽמֶן׃

2 ‏כִּ֣י שַׂ֤מְתָּ מֵעִיר֙ לַגָּ֔ל קִרְיָ֥ה בְצוּרָ֖ה לְמַפֵּלָ֑ה אַרְמ֤וֹן זָרִים֙ מֵעִ֔יר לְעוֹלָ֖ם לֹ֥א יִבָּנֶֽה׃

3 ‏עַל־כֵּ֖ן יְכַבְּד֣וּךָ עַם־עָ֑ז קִרְיַ֛ת גּוֹיִ֥ם עָרִיצִ֖ים יִירָאֽוּךָ׃

4 ‏כִּֽי־הָיִ֨יתָ מָע֥וֹז לַדָּ֛ל מָע֥וֹז לָאֶבְי֖וֹן בַּצַּר־ל֑וֹ מַחְסֶ֤ה מִזֶּ֙רֶם֙ צֵ֣ל מֵחֹ֔רֶב כִּ֛י ר֥וּחַ עָרִיצִ֖ים כְּזֶ֥רֶם קִֽיר׃

5 ‏כְּחֹ֣רֶב בְּצָי֔וֹן שְׁא֥וֹן זָרִ֖ים תַּכְנִ֑יעַ חֹ֚רֶב בְּצֵ֣ל עָ֔ב זְמִ֥יר עָֽרִיצִ֖ים יַעֲנֶֽה׃ פ

6 ‏וְעָשָׂה֩ יְהוָ֨ה צְבָא֜וֹת לְכָל־הָֽעַמִּים֙ בָּהָ֣ר הַזֶּ֔ה מִשְׁתֵּ֥ה שְׁמָנִ֖ים מִשְׁתֵּ֣ה שְׁמָרִ֑ים שְׁמָנִים֙ מְמֻ֣חָיִ֔ם שְׁמָרִ֖ים מְזֻקָּקִֽים׃

7 ‏וּבִלַּע֙ בָּהָ֣ר הַזֶּ֔ה פְּנֵֽי־הַלּ֥וֹט׀ הַלּ֖וֹט עַל־כָּל־הָֽעַמִּ֑ים וְהַמַּסֵּכָ֥ה הַנְּסוּכָ֖ה עַל־כָּל־הַגּוֹיִֽם׃

8 ‏בִּלַּ֤ע הַמָּ֙וֶת֙ לָנֶ֔צַח וּמָחָ֨ה אֲדֹנָ֧י יְהוִ֛ה דִּמְעָ֖ה מֵעַ֣ל כָּל־פָּנִ֑ים וְחֶרְפַּ֣ת עַמּ֗וֹ יָסִיר֙ מֵעַ֣ל כָּל־הָאָ֔רֶץ כִּ֥י יְהוָ֖ה דִּבֵּֽר׃ פ

9 ‏וְאָמַר֙ בַּיּ֣וֹם הַה֔וּא הִנֵּ֨ה אֱלֹהֵ֥ינוּ זֶ֛ה קִוִּ֥ינוּ ל֖וֹ וְיֽוֹשִׁיעֵ֑נוּ זֶ֤ה יְהוָה֙ קִוִּ֣ינוּ ל֔וֹ נָגִ֥ילָה וְנִשְׂמְחָ֖ה בִּישׁוּעָתֽוֹ׃

10 ‏כִּֽי־תָנ֥וּחַ יַד־יְהוָ֖ה בָּהָ֣ר הַזֶּ֑ה וְנָ֤דוֹשׁ מוֹאָב֙ תַּחְתָּ֔יו כְּהִדּ֥וּשׁ מַתְבֵּ֖ן במי בְּמ֥וֹ מַדְמֵנָֽה׃

11 ‏וּפֵרַ֤שׂ יָדָיו֙ בְּקִרְבּ֔וֹ כַּאֲשֶׁ֛ר יְפָרֵ֥שׂ הַשֹּׂחֶ֖ה לִשְׂח֑וֹת וְהִשְׁפִּיל֙ גַּֽאֲוָת֔וֹ עִ֖ם אָרְבּ֥וֹת יָדָֽיו׃

12 ‏וּמִבְצַ֞ר מִשְׂגַּ֣ב חוֹמֹתֶ֗יךָ הֵשַׁ֥ח הִשְׁפִּ֛יל הִגִּ֥יעַ לָאָ֖רֶץ עַד־עָפָֽר׃ ס

1 yəhwâ ’ĕlōhay ’atâ ’ărwōmiməḵā ’wōḏeh šiməḵā kî ‘āśîṯā pele’ ‘ēṣwōṯ mērāḥwōq ’ĕmûnâ ’ōmen:

2 kî śamətā mē‘îr lagāl qirəyâ ḇəṣûrâ ləmapēlâ ’arəmwōn zārîm mē‘îr lə‘wōlām lō’ yibāneh:

3 ‘al-kēn yəḵabəḏûḵā ‘am-‘āz qirəyaṯ gwōyim ‘ārîṣîm yîrā’ûḵā:

4 kî-hāyîṯā mā‘wōz ladāl mā‘wōz lā’eḇəywōn baṣṣar-lwō maḥəseh mizzerem ṣēl mēḥōreḇ kî rûḥa ‘ārîṣîm kəzerem qîr:

5 kəḥōreḇ bəṣāywōn šə’wōn zārîm taḵənî‘a ḥōreḇ bəṣēl ‘āḇ zəmîr ‘ārîṣîm ya‘ăneh: f

6 wə‘āśâ yəhwâ ṣəḇā’wōṯ ləḵāl-hā‘ammîm bâār hazzeh mišətēh šəmānîm mišətēh šəmārîm šəmānîm məmuḥāyim šəmārîm məzuqqāqîm:

7 ûḇilla‘ bâār hazzeh pənê-hallwōṭ| hallwōṭ ‘al-kāl-hā‘ammîm wəhammassēḵâ hannəsûḵâ ‘al-kāl-hagwōyim:

8 billa‘ hammāweṯ lāneṣaḥ ûmāḥâ ’ăḏōnāy yəhwih dimə‘â mē‘al kāl-pānîm wəḥerəpaṯ ‘ammwō yāsîr mē‘al kāl-hā’āreṣ kî yəhwâ dibēr: f

9 wə’āmar bayywōm hahû’ hinnēh ’ĕlōhênû zeh qiûînû lwō wəywōšî‘ēnû zeh yəhwâ qiûînû lwō nāḡîlâ wəniśəməḥâ bîšû‘āṯwō:

10 kî-ṯānûḥa yaḏ-yəhwâ bâār hazzeh wənāḏwōš mwō’āḇ taḥətāyw kəhidûš maṯəbēn bəmê bəmwō maḏəmēnâ:

11 ûfēraś yāḏāyw bəqirəbwō ka’ăšer yəfārēś haśśōḥeh liśəḥwōṯ wəhišəpîl ga’ăwāṯwō ‘im ’ārəbwōṯ yāḏāyw:

12 ûmiḇəṣar miśəgaḇ ḥwōmōṯeyḵā hēšaḥ hišəpîl higî‘a lā’āreṣ ‘aḏ-‘āfār: s


Next: Isaiah (Yisheyah) Chapter 26