‎1 ‏בִּשְׁנַ֤ת שְׁתַּ֙יִם֙ לְדָרְיָ֣וֶשׁ הַמֶּ֔לֶךְ בַּחֹ֙דֶשׁ֙ הַשִּׁשִּׁ֔י בְּי֥וֹם אֶחָ֖ד לַחֹ֑דֶשׁ הָיָ֨ה דְבַר־יְהוָ֜ה בְּיַד־חַגַּ֣י הַנָּבִ֗יא אֶל־זְרֻבָּבֶ֤ל בֶּן־שְׁאַלְתִּיאֵל֙ פַּחַ֣ת יְהוּדָ֔ה וְאֶל־יְהוֹשֻׁ֧עַ בֶּן־יְהוֹצָדָ֛ק הַכֹּהֵ֥ן הַגָּד֖וֹל לֵאמֹֽר׃

‎2 ‏כֹּ֥ה אָמַ֛ר יְהוָ֥ה צְבָא֖וֹת לֵאמֹ֑ר הָעָ֤ם הַזֶּה֙ אָֽמְר֔וּ לֹ֥א עֶת־בֹּ֛א עֶת־בֵּ֥ית יְהוָ֖ה לְהִבָּנֽוֹת׃ פ

‎3 ‏וַֽיְהִי֙ דְּבַר־יְהוָ֔ה בְּיַד־חַגַּ֥י הַנָּבִ֖יא לֵאמֹֽר׃

‎4 ‏הַעֵ֤ת לָכֶם֙ אַתֶּ֔ם לָשֶׁ֖בֶת בְּבָתֵּיכֶ֣ם סְפוּנִ֑ים וְהַבַּ֥יִת הַזֶּ֖ה חָרֵֽב׃

‎5 ‏וְעַתָּ֕ה כֹּ֥ה אָמַ֖ר יְהוָ֣ה צְבָא֑וֹת שִׂ֥ימוּ לְבַבְכֶ֖ם עַל־דַּרְכֵיכֶֽם׃

‎6 ‏זְרַעְתֶּ֨ם הַרְבֵּ֜ה וְהָבֵ֣א מְעָ֗ט אָכ֤וֹל וְאֵין־לְשָׂבְעָה֙ שָׁת֣וֹ וְאֵין־לְשָׁכְרָ֔ה לָב֖וֹשׁ וְאֵין־לְחֹ֣ם ל֑וֹ וְהַ֨מִּשְׂתַּכֵּ֔ר מִשְׂתַּכֵּ֖ר אֶל־צְר֥וֹר נָקֽוּב׃ פ

‎7 ‏כֹּ֥ה אָמַ֖ר יְהוָ֣ה צְבָא֑וֹת שִׂ֥ימוּ לְבַבְכֶ֖ם עַל־דַּרְכֵיכֶֽם׃

‎8 ‏עֲל֥וּ הָהָ֛ר וַהֲבֵאתֶ֥ם עֵ֖ץ וּבְנ֣וּ הַבָּ֑יִת וְאֶרְצֶה־בּ֥וֹ ואכבד וְאֶכָּבְדָ֖ה אָמַ֥ר יְהוָֽה׃

‎9 ‏פָּנֹ֤ה אֶל־הַרְבֵּה֙ וְהִנֵּ֣ה לִמְעָ֔ט וַהֲבֵאתֶ֥ם הַבַּ֖יִת וְנָפַ֣חְתִּי ב֑וֹ יַ֣עַן מֶ֗ה נְאֻם֙ יְהוָ֣ה צְבָא֔וֹת יַ֗עַן בֵּיתִי֙ אֲשֶׁר־ה֣וּא חָרֵ֔ב וְאַתֶּ֥ם רָצִ֖ים אִ֥ישׁ לְבֵיתֽוֹ׃

‎10 ‏עַל־כֵּ֣ן עֲלֵיכֶ֔ם כָּלְא֥וּ שָׁמַ֖יִם מִטָּ֑ל וְהָאָ֖רֶץ כָּלְאָ֥ה יְבוּלָֽהּ׃

‎11 ‏וָאֶקְרָ֨א חֹ֜רֶב עַל־הָאָ֣רֶץ וְעַל־הֶהָרִ֗ים וְעַל־הַדָּגָן֙ וְעַל־הַתִּיר֣וֹשׁ וְעַל־הַיִּצְהָ֔ר וְעַ֛ל אֲשֶׁ֥ר תּוֹצִ֖יא הָאֲדָמָ֑ה וְעַל־הָֽאָדָם֙ וְעַל־הַבְּהֵמָ֔ה וְעַ֖ל כָּל־יְגִ֥יעַ כַּפָּֽיִם׃ ס

‎12 ‏וַיִּשְׁמַ֣ע זְרֻבָּבֶ֣ל׀ בֶּֽן־שַׁלְתִּיאֵ֡ל וִיהוֹשֻׁ֣עַ בֶּן־יְהוֹצָדָק֩ הַכֹּהֵ֨ן הַגָּד֜וֹל וְכֹ֣ל׀ שְׁאֵרִ֣ית הָעָ֗ם בְּקוֹל֙ יְהוָ֣ה אֱלֹֽהֵיהֶ֔ם וְעַל־דִּבְרֵי֙ חַגַּ֣י הַנָּבִ֔יא כַּאֲשֶׁ֥ר שְׁלָח֖וֹ יְהוָ֣ה אֱלֹהֵיהֶ֑ם וַיִּֽירְא֥וּ הָעָ֖ם מִפְּנֵ֥י יְהוָֽה׃

‎13 ‏וַ֠יֹּאמֶר חַגַּ֞י מַלְאַ֧ךְ יְהוָ֛ה בְּמַלְאֲכ֥וּת יְהוָ֖ה לָעָ֣ם לֵאמֹ֑ר אֲנִ֥י אִתְּכֶ֖ם נְאֻם־יְהוָֽה׃

‎14 ‏וַיָּ֣עַר יְהוָ֡ה אֶת־רוּחַ֩ זְרֻבָּבֶ֨ל בֶּן־שַׁלְתִּיאֵ֜ל פַּחַ֣ת יְהוּדָ֗ה וְאֶת־ר֙וּחַ֙ יְהוֹשֻׁ֤עַ בֶּן־יְהוֹצָדָק֙ הַכֹּהֵ֣ן הַגָּד֔וֹל וְֽאֶת־ר֔וּחַ כֹּ֖ל שְׁאֵרִ֣ית הָעָ֑ם וַיָּבֹ֙אוּ֙ וַיַּעֲשׂ֣וּ מְלָאכָ֔ה בְּבֵית־יְהוָ֥ה צְבָא֖וֹת אֱלֹהֵיהֶֽם׃ פ

‎15 ‏בְּי֨וֹם עֶשְׂרִ֧ים וְאַרְבָּעָ֛ה לַחֹ֖דֶשׁ בַּשִּׁשִּׁ֑י בִּשְׁנַ֥ת שְׁתַּ֖יִם לְדָרְיָ֥וֶשׁ הַמֶּֽלֶךְ׃

1 bišənaṯ šətayim ləḏārəyāweš hammeleḵə b^aḥōḏeš haššiššî bəywōm ’eḥāḏ l^aḥōḏeš hāyâ ḏəḇar-yəhwâ bəyaḏ-ḥagay hannāḇî’ ’el-zərubāḇel ben-šə’alətî’ēl p^aḥaṯ yəhûḏâ wə’el-yəhwōšu‘a ben-yəhwōṣāḏāq hakōhēn hagāḏwōl lē’mōr:

2 kōh ’āmar yəhwâ ṣəḇā’wōṯ lē’mōr hā‘ām hazzeh ’āmərû lō’ ‘eṯ-bō’ ‘eṯ-bêṯ yəhwâ ləhibānwōṯ: f

3 wayəhî dəḇar-yəhwâ bəyaḏ-ḥagay hannāḇî’ lē’mōr:

4 h^a‘ēṯ lāḵem ’atem lāšeḇeṯ bəḇātêḵem səfûnîm wəhabayiṯ hazzeh ḥārēḇ:

5 wə‘atâ kōh ’āmar yəhwâ ṣəḇā’wōṯ śîmû ləḇaḇəḵem ‘al-darəḵêḵem:

6 zər^a‘ətem harəbēh wəhāḇē’ mə‘āṭ ’āḵwōl wə’ên-ləśāḇə‘â šāṯwō wə’ên-ləšāḵərâ lāḇwōš wə’ên-ləḥōm lwō wəhammiśətakēr miśətakēr ’el-ṣərwōr nāqûḇ: f

7 kōh ’āmar yəhwâ ṣəḇā’wōṯ śîmû ləḇaḇəḵem ‘al-darəḵêḵem:

8 ‘ălû hâār wahăḇē’ṯem ‘ēṣ ûḇənû habāyiṯ wə’erəṣeh-bwō wə’ekāḇēḏ wə’ekāḇəḏâ ’āmar yəhwâ:

9 pānōh ’el-harəbēh wəhinnēh limə‘āṭ wahăḇē’ṯem habayiṯ wənāf^aḥətî ḇwō y^a‘an meh nə’um yəhwâ ṣəḇā’wōṯ y^a‘an bêṯî ’ăšer-hû’ ḥārēḇ wə’atem rāṣîm ’îš ləḇêṯwō:

10 ‘al-kēn ‘ălêḵem kālə’û šāmayim miṭṭāl wəhā’āreṣ kālə’â yəḇûlāh:

11 wā’eqərā’ ḥōreḇ ‘al-hā’āreṣ wə‘al-hehārîm wə‘al-hadāḡān wə‘al-hatîrwōš wə‘al-hayyiṣəhār wə‘al ’ăšer twōṣî’ hā’ăḏāmâ wə‘al-hā’āḏām wə‘al-habəhēmâ wə‘al kāl-yəḡî‘a kapāyim: s

12 wayyišəm^a‘ zərubāḇel| ben-šalətî’ēl wîhwōšu‘a ben-yəhwōṣāḏāq hakōhēn hagāḏwōl wəḵōl| šə’ērîṯ hā‘ām bəqwōl yəhwâ ’ĕlōhêhem wə‘al-diḇərê ḥagay hannāḇî’ ka’ăšer šəlāḥwō yəhwâ ’ĕlōhêhem wayyîrə’û hā‘ām mipənê yəhwâ:

13 wayyō’mer ḥagay malə’aḵə yəhwâ bəmalə’ăḵûṯ yəhwâ lā‘ām lē’mōr ’ănî ’itəḵem nə’um-yəhwâ:

14 wayyā‘ar yəhwâ ’eṯ-rûḥa zərubāḇel ben-šalətî’ēl p^aḥaṯ yəhûḏâ wə’eṯ-rûḥa yəhwōšu‘a ben-yəhwōṣāḏāq hakōhēn hagāḏwōl wə’eṯ-rûḥa kōl šə’ērîṯ hā‘ām wayyāḇō’û wayy^a‘ăśû məlā’ḵâ bəḇêṯ-yəhwâ ṣəḇā’wōṯ ’ĕlōhêhem: f

15 bəywōm ‘eśərîm wə’arəbā‘â l^aḥōḏeš baššiššî bišənaṯ šətayim ləḏārəyāweš hammeleḵə: