Sacred Texts  Bible  Index 
Polyglot  KJV  Sep  Vul 

Habakkuk (Chavaquq) Index
  Previous  Next 

Tanach (Hebrew): Habakkuk (Chavaquq) Chapter 2

1 ‏עַל־מִשְׁמַרְתִּ֣י אֶעֱמֹ֔דָה וְאֶֽתְיַצְּבָ֖ה עַל־מָצ֑וֹר וַאֲצַפֶּ֗ה לִרְאוֹת֙ מַה־יְדַבֶּר־בִּ֔י וּמָ֥ה אָשִׁ֖יב עַל־תּוֹכַחְתִּֽי׃

2 ‏וַיַּעֲנֵ֤נִי יְהוָה֙ וַיֹּ֔אמֶר כְּת֣וֹב חָז֔וֹן וּבָאֵ֖ר עַל־הַלֻּח֑וֹת לְמַ֥עַן יָר֖וּץ ק֥וֹרֵא בֽוֹ׃

3 ‏כִּ֣י ע֤וֹד חָזוֹן֙ לַמּוֹעֵ֔ד וְיָפֵ֥חַ לַקֵּ֖ץ וְלֹ֣א יְכַזֵּ֑ב אִם־יִתְמַהְמָהּ֙ חַכֵּה־ל֔וֹ כִּֽי־בֹ֥א יָבֹ֖א לֹ֥א יְאַחֵֽר׃

4 ‏הִנֵּ֣ה עֻפְּלָ֔ה לֹא־יָשְׁרָ֥ה נַפְשׁ֖וֹ בּ֑וֹ וְצַדִּ֖יק בֶּאֱמוּנָת֥וֹ יִחְיֶֽה׃

5 ‏וְאַף֙ כִּֽי־הַיַּ֣יִן בּוֹגֵ֔ד גֶּ֥בֶר יָהִ֖יר וְלֹ֣א יִנְוֶ֑ה אֲשֶׁר֩ הִרְחִ֨יב כִּשְׁא֜וֹל נַפְשׁ֗וֹ וְה֤וּא כַמָּ֙וֶת֙ וְלֹ֣א יִשְׂבָּ֔ע וַיֶּאֱסֹ֤ף אֵלָיו֙ כָּל־הַגּוֹיִ֔ם וַיִּקְבֹּ֥ץ אֵלָ֖יו כָּל־הָעַמִּֽים׃

6 ‏הֲלוֹא־אֵ֣לֶּה כֻלָּ֗ם עָלָיו֙ מָשָׁ֣ל יִשָּׂ֔אוּ וּמְלִיצָ֖ה חִיד֣וֹת ל֑וֹ וְיֹאמַ֗ר ה֚וֹי הַמַּרְבֶּ֣ה לֹּא־ל֔וֹ עַד־מָתַ֕י וּמַכְבִּ֥יד עָלָ֖יו עַבְטִֽיט׃

7 ‏הֲל֣וֹא פֶ֗תַע יָק֙וּמוּ֙ נֹשְׁכֶ֔יךָ וְיִקְצ֖וּ מְזַעְזְעֶ֑יךָ וְהָיִ֥יתָ לִמְשִׁסּ֖וֹת לָֽמוֹ׃

8 ‏כִּֽי אַתָּ֤ה שַׁלּ֙וֹתָ֙ גּוֹיִ֣ם רַבִּ֔ים יְשָׁלּ֖וּךָ כָּל־יֶ֣תֶר עַמִּ֑ים מִדְּמֵ֤י אָדָם֙ וַחֲמַס־אֶ֔רֶץ קִרְיָ֖ה וְכָל־יֹ֥שְׁבֵי בָֽהּ׃ פ

9 ‏ה֗וֹי בֹּצֵ֛עַ בֶּ֥צַע רָ֖ע לְבֵית֑וֹ לָשׂ֤וּם בַּמָּרוֹם֙ קִנּ֔וֹ לְהִנָּצֵ֖ל מִכַּף־רָֽע׃

10 ‏יָעַ֥צְתָּ בֹּ֖שֶׁת לְבֵיתֶ֑ךָ קְצוֹת־עַמִּ֥ים רַבִּ֖ים וְחוֹטֵ֥א נַפְשֶֽׁךָ׃

11 ‏כִּי־אֶ֖בֶן מִקִּ֣יר תִּזְעָ֑ק וְכָפִ֖יס מֵעֵ֥ץ יַעֲנֶֽנָּה׃ פ

12 ‏ה֛וֹי בֹּנֶ֥ה עִ֖יר בְּדָמִ֑ים וְכוֹנֵ֥ן קִרְיָ֖ה בְּעַוְלָֽה׃

13 ‏הֲל֣וֹא הִנֵּ֔ה מֵאֵ֖ת יְהוָ֣ה צְבָא֑וֹת וְיִֽיגְע֤וּ עַמִּים֙ בְּדֵי־אֵ֔שׁ וּלְאֻמִּ֖ים בְּדֵי־רִ֥יק יִעָֽפוּ׃

14 ‏כִּ֚י תִּמָּלֵ֣א הָאָ֔רֶץ לָדַ֖עַת אֶת־כְּב֣וֹד יְהוָ֑ה כַּמַּ֖יִם יְכַסּ֥וּ עַל־יָֽם׃ ס

15 ‏ה֚וֹי מַשְׁקֵ֣ה רֵעֵ֔הוּ מְסַפֵּ֥חַ חֲמָתְךָ֖ וְאַ֣ף שַׁכֵּ֑ר לְמַ֥עַן הַבִּ֖יט עַל־מְעוֹרֵיהֶֽם׃

16 ‏שָׂבַ֤עְתָּ קָלוֹן֙ מִכָּב֔וֹד שְׁתֵ֥ה גַם־אַ֖תָּה וְהֵֽעָרֵ֑ל תִּסּ֣וֹב עָלֶ֗יךָ כּ֚וֹס יְמִ֣ין יְהוָ֔ה וְקִיקָל֖וֹן עַל־כְּבוֹדֶֽךָ׃

17 ‏כִּ֣י חֲמַ֤ס לְבָנוֹן֙ יְכַסֶּ֔ךָּ וְשֹׁ֥ד בְּהֵמ֖וֹת יְחִיתַ֑ן מִדְּמֵ֤י אָדָם֙ וַחֲמַס־אֶ֔רֶץ קִרְיָ֖ה וְכָל־יֹ֥שְׁבֵי בָֽהּ׃ ס

18 ‏מָֽה־הוֹעִ֣יל פֶּ֗סֶל כִּ֤י פְסָלוֹ֙ יֹֽצְר֔וֹ מַסֵּכָ֖ה וּמ֣וֹרֶה שָּׁ֑קֶר כִּ֣י בָטַ֞ח יֹצֵ֤ר יִצְרוֹ֙ עָלָ֔יו לַעֲשׂ֖וֹת אֱלִילִ֥ים אִלְּמִֽים׃ ס

19 ‏ה֣וֹי אֹמֵ֤ר לָעֵץ֙ הָקִ֔יצָה ע֖וּרִי לְאֶ֣בֶן דּוּמָ֑ם ה֣וּא יוֹרֶ֔ה הִנֵּה־ה֗וּא תָּפוּשׂ֙ זָהָ֣ב וָכֶ֔סֶף וְכָל־ר֖וּחַ אֵ֥ין בְּקִרְבּֽוֹ׃

20 ‏וַֽיהוָ֖ה בְּהֵיכַ֣ל קָדְשׁ֑וֹ הַ֥ס מִפָּנָ֖יו כָּל־הָאָֽרֶץ׃ פ

1 ‘al-mišəmarətî ’e‘ĕmōḏâ wə’eṯəyaṣṣəḇâ ‘al-māṣwōr wa’ăṣapeh lirə’wōṯ mah-yəḏaber-bî ûmâ ’āšîḇ ‘al-twōḵaḥətî:

2 wayya‘ănēnî yəhwâ wayyō’mer kəṯwōḇ ḥāzwōn ûḇā’ēr ‘al-halluḥwōṯ ləma‘an yārûṣ qwōrē’ ḇwō:

3 kî ‘wōḏ ḥāzwōn lammwō‘ēḏ wəyāfēḥa laqqēṣ wəlō’ yəḵazzēḇ ’im-yiṯəmahəmāh ḥakēh-lwō kî-ḇō’ yāḇō’ lō’ yə’aḥēr:

4 hinnēh ‘upəlâ lō’-yāšərâ nafəšwō bwō wəṣadîq be’ĕmûnāṯwō yiḥəyeh:

5 wə’af kî-hayyayin bwōḡēḏ geḇer yâîr wəlō’ yinəweh ’ăšer hirəḥîḇ kišə’wōl nafəšwō wəhû’ ḵammāweṯ wəlō’ yiśəbā‘ wayye’ĕsōf ’ēlāyw kāl-hagwōyim wayyiqəbōṣ ’ēlāyw kāl-hā‘ammîm:

6 hălwō’-’ēlleh ḵullām ‘ālāyw māšāl yiśśā’û ûməlîṣâ ḥîḏwōṯ lwō wəyō’mar hwōy hammarəbeh llō’-lwō ‘aḏ-māṯay ûmaḵəbîḏ ‘ālāyw ‘aḇəṭîṭ:

7 hălwō’ feṯa‘ yāqûmû nōšəḵeyḵā wəyiqəṣû məza‘əzə‘eyḵā wəhāyîṯā liməšisswōṯ lāmwō:

8 kî ’atâ šallwōṯā gwōyim rabîm yəšāllûḵā kāl-yeṯer ‘ammîm midəmê ’āḏām waḥămas-’ereṣ qirəyâ wəḵāl-yōšəḇê ḇāh: f

9 hwōy bōṣē‘a beṣa‘ rā‘ ləḇêṯwō lāśûm bammārwōm qinnwō ləhinnāṣēl mikaf-rā‘:

10 yā‘aṣətā bōšeṯ ləḇêṯeḵā qəṣwōṯ-‘ammîm rabîm wəḥwōṭē’ nafəšeḵā:

11 kî-’eḇen miqqîr tizə‘āq wəḵāfîs mē‘ēṣ ya‘ănennâ: f

12 hwōy bōneh ‘îr bəḏāmîm wəḵwōnēn qirəyâ bə‘awəlâ:

13 hălwō’ hinnēh mē’ēṯ yəhwâ ṣəḇā’wōṯ wəyîḡə‘û ‘ammîm bəḏê-’ēš ûlə’ummîm bəḏê-rîq yi‘āfû:

14 kî timmālē’ hā’āreṣ lāḏa‘aṯ ’eṯ-kəḇwōḏ yəhwâ kammayim yəḵassû ‘al-yām: s

15 hwōy mašəqēh rē‘ēhû məsapēḥa ḥămāṯəḵā wə’af šakēr ləma‘an habîṭ ‘al-mə‘wōrêhem:

16 śāḇa‘ətā qālwōn mikāḇwōḏ šəṯēh ḡam-’atâ wəhē‘ārēl tisswōḇ ‘āleyḵā kwōs yəmîn yəhwâ wəqîqālwōn ‘al-kəḇwōḏeḵā:

17 kî ḥămas ləḇānwōn yəḵasseḵḵā wəšōḏ bəhēmwōṯ yəḥîṯan midəmê ’āḏām waḥămas-’ereṣ qirəyâ wəḵāl-yōšəḇê ḇāh: s

18 mâ-hwō‘îl pesel kî fəsālwō yōṣərwō massēḵâ ûmwōreh ššāqer kî ḇāṭaḥ yōṣēr yiṣərwō ‘ālāyw la‘ăśwōṯ ’ĕlîlîm ’illəmîm: s

19 hwōy ’ōmēr lā‘ēṣ hāqîṣâ ‘ûrî lə’eḇen dûmām hû’ ywōreh hinnēh-hû’ tāfûś zâāḇ wāḵesef wəḵāl-rûḥa ’ên bəqirəbwō:

20 wayhwâ bəhêḵal qāḏəšwō has mipānāyw kāl-hā’āreṣ: f


Next: Habakkuk (Chavaquq) Chapter 3