‎1 ‏וַיִּפֹּ֥ל יוֹסֵ֖ף עַל־פְּנֵ֣י אָבִ֑יו וַיֵּ֥בְךְּ עָלָ֖יו וַיִּשַּׁק־לֽוֹ׃

‎2 ‏וַיְצַ֨ו יוֹסֵ֤ף אֶת־עֲבָדָיו֙ אֶת־הָרֹ֣פְאִ֔ים לַחֲנֹ֖ט אֶת־אָבִ֑יו וַיַּחַנְט֥וּ הָרֹפְאִ֖ים אֶת־יִשְׂרָאֵֽל׃

‎3 ‏וַיִּמְלְאוּ־לוֹ֙ אַרְבָּעִ֣ים י֔וֹם כִּ֛י כֵּ֥ן יִמְלְא֖וּ יְמֵ֣י הַחֲנֻטִ֑ים וַיִּבְכּ֥וּ אֹת֛וֹ מִצְרַ֖יִם שִׁבְעִ֥ים יֽוֹם׃

‎4 ‏וַיַּֽעַבְרוּ֙ יְמֵ֣י בְכִית֔וֹ וַיְדַבֵּ֣ר יוֹסֵ֔ף אֶל־בֵּ֥ית פַּרְעֹ֖ה לֵאמֹ֑ר אִם־נָ֨א מָצָ֤אתִי חֵן֙ בְּעֵ֣ינֵיכֶ֔ם דַּבְּרוּ־נָ֕א בְּאָזְנֵ֥י פַרְעֹ֖ה לֵאמֹֽר׃

‎5 ‏אָבִ֞י הִשְׁבִּיעַ֣נִי לֵאמֹ֗ר הִנֵּ֣ה אָנֹכִי֮ מֵת֒ בְּקִבְרִ֗י אֲשֶׁ֨ר כָּרִ֤יתִי לִי֙ בְּאֶ֣רֶץ כְּנַ֔עַן שָׁ֖מָּה תִּקְבְּרֵ֑נִי וְעַתָּ֗ה אֶֽעֱלֶה־נָּ֛א וְאֶקְבְּרָ֥ה אֶת־אָבִ֖י וְאָשֽׁוּבָה׃

‎6 ‏וַיֹּ֖אמֶר פַּרְעֹ֑ה עֲלֵ֛ה וּקְבֹ֥ר אֶת־אָבִ֖יךָ כַּאֲשֶׁ֥ר הִשְׁבִּיעֶֽךָ׃

‎7 ‏וַיַּ֥עַל יוֹסֵ֖ף לִקְבֹּ֣ר אֶת־אָבִ֑יו וַיַּֽעֲל֨וּ אִתּ֜וֹ כָּל־עַבְדֵ֤י פַרְעֹה֙ זִקְנֵ֣י בֵית֔וֹ וְכֹ֖ל זִקְנֵ֥י אֶֽרֶץ־מִצְרָֽיִם׃

‎8 ‏וְכֹל֙ בֵּ֣ית יוֹסֵ֔ף וְאֶחָ֖יו וּבֵ֣ית אָבִ֑יו רַ֗ק טַפָּם֙ וְצֹאנָ֣ם וּבְקָרָ֔ם עָזְב֖וּ בְּאֶ֥רֶץ גֹּֽשֶׁן׃

‎9 ‏וַיַּ֣עַל עִמּ֔וֹ גַּם־רֶ֖כֶב גַּם־פָּרָשִׁ֑ים וַיְהִ֥י הַֽמַּחֲנֶ֖ה כָּבֵ֥ד מְאֹֽד׃

‎10 ‏וַיָּבֹ֜אוּ עַד־גֹּ֣רֶן הָאָטָ֗ד אֲשֶׁר֙ בְּעֵ֣בֶר הַיַּרְדֵּ֔ן וַיִּ֨סְפְּדוּ־שָׁ֔ם מִסְפֵּ֛ד גָּד֥וֹל וְכָבֵ֖ד מְאֹ֑ד וַיַּ֧עַשׂ לְאָבִ֛יו אֵ֖בֶל שִׁבְעַ֥ת יָמִֽים׃

‎11 ‏וַיַּ֡רְא יוֹשֵׁב֩ הָאָ֨רֶץ הַֽכְּנַעֲנִ֜י אֶת־הָאֵ֗בֶל בְּגֹ֙רֶן֙ הָֽאָטָ֔ד וַיֹּ֣אמְר֔וּ אֵֽבֶל־כָּבֵ֥ד זֶ֖ה לְמִצְרָ֑יִם עַל־כֵּ֞ן קָרָ֤א שְׁמָהּ֙ אָבֵ֣ל מִצְרַ֔יִם אֲשֶׁ֖ר בְּעֵ֥בֶר הַיַּרְדֵּֽן׃

‎12 ‏וַיַּעֲשׂ֥וּ בָנָ֖יו ל֑וֹ כֵּ֖ן כַּאֲשֶׁ֥ר צִוָּֽם׃

‎13 ‏וַיִּשְׂא֨וּ אֹת֤וֹ בָנָיו֙ אַ֣רְצָה כְּנַ֔עַן וַיִּקְבְּר֣וּ אֹת֔וֹ בִּמְעָרַ֖ת שְׂדֵ֣ה הַמַּכְפֵּלָ֑ה אֲשֶׁ֣ר קָנָה֩ אַבְרָהָ֨ם אֶת־הַשָּׂדֶ֜ה לַאֲחֻזַּת־קֶ֗בֶר מֵאֵ֛ת עֶפְרֹ֥ן הַחִתִּ֖י עַל־פְּנֵ֥י מַמְרֵֽא׃

‎14 ‏וַיָּ֨שָׁב יוֹסֵ֤ף מִצְרַ֙יְמָה֙ ה֣וּא וְאֶחָ֔יו וְכָל־הָעֹלִ֥ים אִתּ֖וֹ לִקְבֹּ֣ר אֶת־אָבִ֑יו אַחֲרֵ֖י קָבְר֥וֹ אֶת־אָבִֽיו׃

‎15 ‏וַיִּרְא֤וּ אֲחֵֽי־יוֹסֵף֙ כִּי־מֵ֣ת אֲבִיהֶ֔ם וַיֹּ֣אמְר֔וּ ל֥וּ יִשְׂטְמֵ֖נוּ יוֹסֵ֑ף וְהָשֵׁ֤ב יָשִׁיב֙ לָ֔נוּ אֵ֚ת כָּל־הָ֣רָעָ֔ה אֲשֶׁ֥ר גָּמַ֖לְנוּ אֹתֽוֹ׃

‎16 ‏וַיְצַוּ֕וּ אֶל־יוֹסֵ֖ף לֵאמֹ֑ר אָבִ֣יךָ צִוָּ֔ה לִפְנֵ֥י מוֹת֖וֹ לֵאמֹֽר׃

‎17 ‏כֹּֽה־תֹאמְר֣וּ לְיוֹסֵ֗ף אָ֣נָּ֡א שָׂ֣א נָ֠א פֶּ֣שַׁע אַחֶ֤יךָ וְחַטָּאתָם֙ כִּי־רָעָ֣ה גְמָל֔וּךָ וְעַתָּה֙ שָׂ֣א נָ֔א לְפֶ֥שַׁע עַבְדֵ֖י אֱלֹהֵ֣י אָבִ֑יךָ וַיֵּ֥בְךְּ יוֹסֵ֖ף בְּדַבְּרָ֥ם אֵלָֽיו׃

‎18 ‏וַיֵּלְכוּ֙ גַּם־אֶחָ֔יו וַֽיִּפְּל֖וּ לְפָנָ֑יו וַיֹּ֣אמְר֔וּ הִנֶּ֥נּֽוּ לְךָ֖ לַעֲבָדִֽים׃

‎19 ‏וַיֹּ֧אמֶר אֲלֵהֶ֛ם יוֹסֵ֖ף אַל־תִּירָ֑אוּ כִּ֛י הֲתַ֥חַת אֱלֹהִ֖ים אָֽנִי׃

‎20 ‏וְאַתֶּ֕ם חֲשַׁבְתֶּ֥ם עָלַ֖י רָעָ֑ה אֱלֹהִים֙ חֲשָׁבָ֣הּ לְטֹבָ֔ה לְמַ֗עַן עֲשֹׂ֛ה כַּיּ֥וֹם הַזֶּ֖ה לְהַחֲיֹ֥ת עַם־רָֽב׃

‎21 ‏וְעַתָּה֙ אַל־תִּירָ֔אוּ אָנֹכִ֛י אֲכַלְכֵּ֥ל אֶתְכֶ֖ם וְאֶֽת־טַפְּכֶ֑ם וַיְנַחֵ֣ם אוֹתָ֔ם וַיְדַבֵּ֖ר עַל־לִבָּֽם׃

‎22 ‏וַיֵּ֤שֶׁב יוֹסֵף֙ בְּמִצְרַ֔יִם ה֖וּא וּבֵ֣ית אָבִ֑יו וַיְחִ֣י יוֹסֵ֔ף מֵאָ֥ה וָעֶ֖שֶׂר שָׁנִֽים׃

‎23 ‏וַיַּ֤רְא יוֹסֵף֙ לְאֶפְרַ֔יִם בְּנֵ֖י שִׁלֵּשִׁ֑ים גַּ֗ם בְּנֵ֤י מָכִיר֙ בֶּן־מְנַשֶּׁ֔ה יֻלְּד֖וּ עַל־בִּרְכֵּ֥י יוֹסֵֽף׃

‎24 ‏וַיֹּ֤אמֶר יוֹסֵף֙ אֶל־אֶחָ֔יו אָנֹכִ֖י מֵ֑ת וֵֽאלֹהִ֞ים פָּקֹ֧ד יִפְקֹ֣ד אֶתְכֶ֗ם וְהֶעֱלָ֤ה אֶתְכֶם֙ מִן־הָאָ֣רֶץ הַזֹּ֔את אֶל־הָאָ֕רֶץ אֲשֶׁ֥ר נִשְׁבַּ֛ע לְאַבְרָהָ֥ם לְיִצְחָ֖ק וּֽלְיַעֲקֹֽב׃

‎25 ‏וַיַּשְׁבַּ֣ע יוֹסֵ֔ף אֶת־בְּנֵ֥י יִשְׂרָאֵ֖ל לֵאמֹ֑ר פָּקֹ֨ד יִפְקֹ֤ד אֱלֹהִים֙ אֶתְכֶ֔ם וְהַעֲלִתֶ֥ם אֶת־עַצְמֹתַ֖י מִזֶּֽה׃

‎26 ‏וַיָּ֣מָת יוֹסֵ֔ף בֶּן־מֵאָ֥ה וָעֶ֖שֶׂר שָׁנִ֑ים וַיַּחַנְט֣וּ אֹת֔וֹ וַיִּ֥ישֶׂם בָּאָר֖וֹן בְּמִצְרָֽיִם׃

1 wayyipōl ywōsēf ‘al-pənê ’āḇîw wayyēḇəḵḵə ‘ālāyw wayyiššaq-lwō:

2 wayəṣaw ywōsēf ’eṯ-‘ăḇāḏāyw ’eṯ-hārōfə’îm l^aḥănōṭ ’eṯ-’āḇîw wayy^aḥanəṭû hārōfə’îm ’eṯ-yiśərā’ēl:

3 wayyimələ’û-lwō ’arəbā‘îm ywōm kî kēn yimələ’û yəmê h^aḥănuṭîm wayyiḇəkû ’ōṯwō miṣərayim šiḇə‘îm ywōm:

4 wayy^a‘aḇərû yəmê ḇəḵîṯwō wayəḏabēr ywōsēf ’el-bêṯ parə‘ōh lē’mōr ’im-nā’ māṣā’ṯî ḥēn bə‘ênêḵem dabərû-nā’ bə’āzənê farə‘ōh lē’mōr:

5 ’āḇî hišəbî‘anî lē’mōr hinnēh ’ānōḵî mēṯ bəqiḇərî ’ăšer kārîṯî lî bə’ereṣ kən^a‘an šāmmâ tiqəbərēnî wə‘atâ ’e‘ĕleh-nnā’ wə’eqəbərâ ’eṯ-’āḇî wə’āšûḇâ:

6 wayyō’mer parə‘ōh ‘ălēh ûqəḇōr ’eṯ-’āḇîḵā ka’ăšer hišəbî‘eḵā:

7 wayy^a‘al ywōsēf liqəbōr ’eṯ-’āḇîw wayy^a‘ălû ’itwō kāl-‘aḇəḏê farə‘ōh ziqənê ḇêṯwō wəḵōl ziqənê ’ereṣ-miṣərāyim:

8 wəḵōl bêṯ ywōsēf wə’eḥāyw ûḇêṯ ’āḇîw raq ṭapām wəṣō’nām ûḇəqārām ‘āzəḇû bə’ereṣ gōšen:

9 wayy^a‘al ‘immwō gam-reḵeḇ gam-pārāšîm wayəhî hamm^aḥăneh kāḇēḏ mə’ōḏ:

10 wayyāḇō’û ‘aḏ-gōren hā’āṭāḏ ’ăšer bə‘ēḇer hayyarədēn wayyisəpəḏû-šām misəpēḏ gāḏwōl wəḵāḇēḏ mə’ōḏ wayy^a‘aś lə’āḇîw ’ēḇel šiḇə‘aṯ yāmîm:

11 wayyarə’ ywōšēḇ hā’āreṣ hakən^a‘ănî ’eṯ-hā’ēḇel bəḡōren hā’āṭāḏ wayyō’mərû ’ēḇel-kāḇēḏ zeh ləmiṣərāyim ‘al-kēn qārā’ šəmāh ’āḇēl miṣərayim ’ăšer bə‘ēḇer hayyarədēn:

12 wayy^a‘ăśû ḇānāyw lwō kēn ka’ăšer ṣiûām:

13 wayyiśə’û ’ōṯwō ḇānāyw ’arəṣâ kən^a‘an wayyiqəbərû ’ōṯwō bimə‘āraṯ śəḏēh hammaḵəpēlâ ’ăšer qānâ ’aḇərâām ’eṯ-haśśāḏeh la’ăḥuzzaṯ-qeḇer mē’ēṯ ‘efərōn h^aḥitî ‘al-pənê mamərē’:

14 wayyāšāḇ ywōsēf miṣərayəmâ hû’ wə’eḥāyw wəḵāl-hā‘ōlîm ’itwō liqəbōr ’eṯ-’āḇîw ’^aḥărê qāḇərwō ’eṯ-’āḇîw:

15 wayyirə’û ’ăḥê-ywōsēf kî-mēṯ ’ăḇîhem wayyō’mərû lû yiśəṭəmēnû ywōsēf wəhāšēḇ yāšîḇ lānû ’ēṯ kāl-hārā‘â ’ăšer gāmalənû ’ōṯwō:

16 wayəṣaûû ’el-ywōsēf lē’mōr ’āḇîḵā ṣiûâ lifənê mwōṯwō lē’mōr:

17 kōh-ṯō’mərû ləywōsēf ’ānnā’ śā’ nā’ peš^a‘ ’^aḥeyḵā wəḥaṭṭā’ṯām kî-rā‘â ḡəmālûḵā wə‘atâ śā’ nā’ ləfeš^a‘ ‘aḇəḏê ’ĕlōhê ’āḇîḵā wayyēḇəḵḵə ywōsēf bəḏabərām ’ēlāyw:

18 wayyēləḵû gam-’eḥāyw wayyipəlû ləfānāyw wayyō’mərû hinnennû ləḵā l^a‘ăḇāḏîm:

19 wayyō’mer ’ălēhem ywōsēf ’al-tîrā’û kî hăṯ^aḥaṯ ’ĕlōhîm ’ānî:

20 wə’atem ḥăšaḇətem ‘ālay rā‘â ’ĕlōhîm ḥăšāḇāh ləṭōḇâ ləm^a‘an ‘ăśōh kayywōm hazzeh ləh^aḥăyōṯ ‘am-rāḇ:

21 wə‘atâ ’al-tîrā’û ’ānōḵî ’ăḵaləkēl ’eṯəḵem wə’eṯ-ṭapəḵem wayən^aḥēm ’wōṯām wayəḏabēr ‘al-libām:

22 wayyēšeḇ ywōsēf bəmiṣərayim hû’ ûḇêṯ ’āḇîw wayəḥî ywōsēf mē’â wā‘eśer šānîm:

23 wayyarə’ ywōsēf lə’efərayim bənê šillēšîm gam bənê māḵîr ben-mənaššeh yulləḏû ‘al-birəkê ywōsēf:

24 wayyō’mer ywōsēf ’el-’eḥāyw ’ānōḵî mēṯ wē’lōhîm pāqōḏ yifəqōḏ ’eṯəḵem wəhe‘ĕlâ ’eṯəḵem min-hā’āreṣ hazzō’ṯ ’el-hā’āreṣ ’ăšer nišəb^a‘ lə’aḇərâām ləyiṣəḥāq ûləy^a‘ăqōḇ:

25 wayyašəb^a‘ ywōsēf ’eṯ-bənê yiśərā’ēl lē’mōr pāqōḏ yifəqōḏ ’ĕlōhîm ’eṯəḵem wəh^a‘ăliṯem ’eṯ-‘aṣəmōṯay mizzeh:

26 wayyāmāṯ ywōsēf ben-mē’â wā‘eśer šānîm wayy^aḥanəṭû ’ōṯwō wayyîśem bā’ārwōn bəmiṣərāyim: