Sacred Texts  Bible  Index 
Polyglot  KJV  Sep  Vul 

Genesis (Bereshit) Index
  Previous  Next 

Tanach (Hebrew): Genesis (Bereshit) Chapter 46

1 ‏וַיִּסַּ֤ע יִשְׂרָאֵל֙ וְכָל־אֲשֶׁר־ל֔וֹ וַיָּבֹ֖א בְּאֵ֣רָה שָּׁ֑בַע וַיִּזְבַּ֣ח זְבָחִ֔ים לֵאלֹהֵ֖י אָבִ֥יו יִצְחָֽק׃

2 ‏וַיֹּ֨אמֶר אֱלֹהִ֤ים׀ לְיִשְׂרָאֵל֙ בְּמַרְאֹ֣ת הַלַּ֔יְלָה וַיֹּ֖אמֶר יַעֲקֹ֣ב׀ יַעֲקֹ֑ב וַיֹּ֖אמֶר הִנֵּֽנִי׃

3 ‏וַיֹּ֕אמֶר אָנֹכִ֥י הָאֵ֖ל אֱלֹהֵ֣י אָבִ֑יךָ אַל־תִּירָא֙ מֵרְדָ֣ה מִצְרַ֔יְמָה כִּֽי־לְג֥וֹי גָּד֖וֹל אֲשִֽׂימְךָ֥ שָֽׁם׃

4 ‏אָנֹכִ֗י אֵרֵ֤ד עִמְּךָ֙ מִצְרַ֔יְמָה וְאָנֹכִ֖י אַֽעַלְךָ֣ גַם־עָלֹ֑ה וְיוֹסֵ֕ף יָשִׁ֥ית יָד֖וֹ עַל־עֵינֶֽיךָ׃

5 ‏וַיָּ֥קָם יַעֲקֹ֖ב מִבְּאֵ֣ר שָׁ֑בַע וַיִּשְׂא֨וּ בְנֵֽי־יִשְׂרָאֵ֜ל אֶת־יַעֲקֹ֣ב אֲבִיהֶ֗ם וְאֶת־טַפָּם֙ וְאֶת־נְשֵׁיהֶ֔ם בָּעֲגָל֕וֹת אֲשֶׁר־שָׁלַ֥ח פַּרְעֹ֖ה לָשֵׂ֥את אֹתֽוֹ׃

6 ‏וַיִּקְח֣וּ אֶת־מִקְנֵיהֶ֗ם וְאֶת־רְכוּשָׁם֙ אֲשֶׁ֤ר רָֽכְשׁוּ֙ בְּאֶ֣רֶץ כְּנַ֔עַן וַיָּבֹ֖אוּ מִצְרָ֑יְמָה יַעֲקֹ֖ב וְכָל־זַרְע֥וֹ אִתּֽוֹ׃

7 ‏בָּנָ֞יו וּבְנֵ֤י בָנָיו֙ אִתּ֔וֹ בְּנֹתָ֛יו וּבְנ֥וֹת בָּנָ֖יו וְכָל־זַרְע֑וֹ הֵבִ֥יא אִתּ֖וֹ מִצְרָֽיְמָה׃ ס

8 ‏וְאֵ֨לֶּה שְׁמ֧וֹת בְּנֵֽי־יִשְׂרָאֵ֛ל הַבָּאִ֥ים מִצְרַ֖יְמָה יַעֲקֹ֣ב וּבָנָ֑יו בְּכֹ֥ר יַעֲקֹ֖ב רְאוּבֵֽן׃

9 ‏וּבְנֵ֖י רְאוּבֵ֑ן חֲנ֥וֹךְ וּפַלּ֖וּא וְחֶצְר֥וֹן וְכַרְמִֽי׃

10 ‏וּבְנֵ֣י שִׁמְע֗וֹן יְמוּאֵ֧ל וְיָמִ֛ין וְאֹ֖הַד וְיָכִ֣ין וְצֹ֑חַר וְשָׁא֖וּל בֶּן־הַֽכְּנַעֲנִֽית׃

11 ‏וּבְנֵ֖י לֵוִ֑י גֵּרְשׁ֕וֹן קְהָ֖ת וּמְרָרִֽי׃

12 ‏וּבְנֵ֣י יְהוּדָ֗ה עֵ֧ר וְאוֹנָ֛ן וְשֵׁלָ֖ה וָפֶ֣רֶץ וָזָ֑רַח וַיָּ֨מָת עֵ֤ר וְאוֹנָן֙ בְּאֶ֣רֶץ כְּנַ֔עַן וַיִּהְי֥וּ בְנֵי־פֶ֖רֶץ חֶצְר֥וֹן וְחָמֽוּל׃

13 ‏וּבְנֵ֖י יִשָׂשכָ֑ר תּוֹלָ֥ע וּפֻוָּ֖ה וְי֥וֹב וְשִׁמְרֽוֹן׃

14 ‏וּבְנֵ֖י זְבוּלֻ֑ן סֶ֥רֶד וְאֵל֖וֹן וְיַחְלְאֵֽל׃

15 ‏אֵ֣לֶּה׀ בְּנֵ֣י לֵאָ֗ה אֲשֶׁ֨ר יָֽלְדָ֤ה לְיַעֲקֹב֙ בְּפַדַּ֣ן אֲרָ֔ם וְאֵ֖ת דִּינָ֣ה בִתּ֑וֹ כָּל־נֶ֧פֶשׁ בָּנָ֛יו וּבְנוֹתָ֖יו שְׁלֹשִׁ֥ים וְשָׁלֹֽשׁ׃

16 ‏וּבְנֵ֣י גָ֔ד צִפְי֥וֹן וְחַגִּ֖י שׁוּנִ֣י וְאֶצְבֹּ֑ן עֵרִ֥י וַֽאֲרוֹדִ֖י וְאַרְאֵלִֽי׃

17 ‏וּבְנֵ֣י אָשֵׁ֗ר יִמְנָ֧ה וְיִשְׁוָ֛ה וְיִשְׁוִ֥י וּבְרִיעָ֖ה וְשֶׂ֣רַח אֲחֹתָ֑ם וּבְנֵ֣י בְרִיעָ֔ה חֶ֖בֶר וּמַלְכִּיאֵֽל׃

18 ‏אֵ֚לֶּה בְּנֵ֣י זִלְפָּ֔ה אֲשֶׁר־נָתַ֥ן לָבָ֖ן לְלֵאָ֣ה בִתּ֑וֹ וַתֵּ֤לֶד אֶת־אֵ֙לֶּה֙ לְיַעֲקֹ֔ב שֵׁ֥שׁ עֶשְׂרֵ֖ה נָֽפֶשׁ׃

19 ‏בְּנֵ֤י רָחֵל֙ אֵ֣שֶׁת יַעֲקֹ֔ב3 יוֹסֵ֖ף וּבִנְיָמִֽן׃

20 ‏וַיִּוָּלֵ֣ד לְיוֹסֵף֮ בְּאֶ֣רֶץ מִצְרַיִם֒ אֲשֶׁ֤ר יָֽלְדָה־לּוֹ֙ אָֽסְנַ֔ת בַּת־פּ֥וֹטִי פֶ֖רַע כֹּהֵ֣ן אֹ֑ן אֶת־מְנַשֶּׁ֖ה וְאֶת־אֶפְרָֽיִם׃

21 ‏וּבְנֵ֣י בִנְיָמִ֗ן בֶּ֤לַע וָבֶ֙כֶר֙ וְאַשְׁבֵּ֔ל גֵּרָ֥א וְנַעֲמָ֖ן אֵחִ֣י וָרֹ֑אשׁ מֻפִּ֥ים וְחֻפִּ֖ים וָאָֽרְדְּ׃

22 ‏אֵ֚לֶּה בְּנֵ֣י רָחֵ֔ל אֲשֶׁ֥ר יֻלַּ֖ד לְיַעֲקֹ֑ב כָּל־נֶ֖פֶשׁ אַרְבָּעָ֥ה עָשָֽׂר׃

23 ‏וּבְנֵי־דָ֖ן חֻשִֽׁים׃

24 ‏וּבְנֵ֖י נַפְתָּלִ֑י יַחְצְאֵ֥ל וְגוּנִ֖י וְיֵ֥צֶר וְשִׁלֵּֽם׃

25 ‏אֵ֚לֶּה בְּנֵ֣י בִלְהָ֔ה אֲשֶׁר־נָתַ֥ן לָבָ֖ן לְרָחֵ֣ל בִּתּ֑וֹ וַתֵּ֧לֶד אֶת־אֵ֛לֶּה לְיַעֲקֹ֖ב כָּל־נֶ֥פֶשׁ שִׁבְעָֽה׃

26 ‏כָּל־הַ֠נֶּפֶשׁ הַבָּאָ֨ה לְיַעֲקֹ֤ב מִצְרַ֙יְמָה֙ יֹצְאֵ֣י יְרֵכ֔וֹ מִלְּבַ֖ד נְשֵׁ֣י בְנֵי־יַעֲקֹ֑ב כָּל־נֶ֖פֶשׁ שִׁשִּׁ֥ים וָשֵֽׁשׁ׃

27 ‏וּבְנֵ֥י יוֹסֵ֛ף אֲשֶׁר־יֻלַּד־ל֥וֹ בְמִצְרַ֖יִם נֶ֣פֶשׁ שְׁנָ֑יִם כָּל־הַנֶּ֧פֶשׁ לְבֵֽית־יַעֲקֹ֛ב הַבָּ֥אָה מִצְרַ֖יְמָה שִׁבְעִֽים׃ פ

28 ‏וְאֶת־יְהוּדָ֞ה שָׁלַ֤ח לְפָנָיו֙ אֶל־יוֹסֵ֔ף לְהוֹרֹ֥ת לְפָנָ֖יו גֹּ֑שְׁנָה וַיָּבֹ֖אוּ אַ֥רְצָה גֹּֽשֶׁן׃

29 ‏וַיֶּאְסֹ֤ר יוֹסֵף֙ מֶרְכַּבְתּ֔וֹ וַיַּ֛עַל לִקְרַֽאת־יִשְׂרָאֵ֥ל אָבִ֖יו גֹּ֑שְׁנָה וַיֵּרָ֣א אֵלָ֗יו וַיִּפֹּל֙ עַל־צַוָּארָ֔יו וַיֵּ֥בְךְּ עַל־צַוָּארָ֖יו עֽוֹד׃

30 ‏וַיֹּ֧אמֶר יִשְׂרָאֵ֛ל אֶל־יוֹסֵ֖ף אָמ֣וּתָה הַפָּ֑עַם אַחֲרֵי֙ רְאוֹתִ֣י אֶת־פָּנֶ֔יךָ כִּ֥י עוֹדְךָ֖ חָֽי׃

31 ‏וַיֹּ֨אמֶר יוֹסֵ֤ף אֶל־אֶחָיו֙ וְאֶל־בֵּ֣ית אָבִ֔יו אֶעֱלֶ֖ה וְאַגִּ֣ידָה לְפַרְעֹ֑ה וְאֹֽמְרָ֣ה אֵלָ֔יו אַחַ֧י וּבֵית־אָבִ֛י אֲשֶׁ֥ר בְּאֶֽרֶץ־כְּנַ֖עַן בָּ֥אוּ אֵלָֽי׃

32 ‏וְהָאֲנָשִׁים֙ רֹ֣עֵי צֹ֔אן כִּֽי־אַנְשֵׁ֥י מִקְנֶ֖ה הָ֑יוּ וְצֹאנָ֧ם וּבְקָרָ֛ם וְכָל־אֲשֶׁ֥ר לָהֶ֖ם הֵבִֽיאוּ׃

33 ‏וְהָיָ֕ה כִּֽי־יִקְרָ֥א לָכֶ֖ם פַּרְעֹ֑ה וְאָמַ֖ר מַה־מַּעֲשֵׂיכֶֽם׃

34 ‏וַאֲמַרְתֶּ֗ם אַנְשֵׁ֨י מִקְנֶ֜ה הָי֤וּ עֲבָדֶ֙יךָ֙ מִנְּעוּרֵ֣ינוּ וְעַד־עַ֔תָּה גַּם־אֲנַ֖חְנוּ גַּם־אֲבֹתֵ֑ינוּ בַּעֲב֗וּר תֵּשְׁבוּ֙ בְּאֶ֣רֶץ גֹּ֔שֶׁן כִּֽי־תוֹעֲבַ֥ת מִצְרַ֖יִם כָּל־רֹ֥עֵה צֹֽאן׃

1 wayyissa‘ yiśərā’ēl wəḵāl-’ăšer-lwō wayyāḇō’ bə’ērâ ššāḇa‘ wayyizəbaḥ zəḇāḥîm lē’lōhê ’āḇîw yiṣəḥāq:

2 wayyō’mer ’ĕlōhîm| ləyiśərā’ēl bəmarə’ōṯ hallayəlâ wayyō’mer ya‘ăqōḇ| ya‘ăqōḇ wayyō’mer hinnēnî:

3 wayyō’mer ’ānōḵî hā’ēl ’ĕlōhê ’āḇîḵā ’al-tîrā’ mērəḏâ miṣərayəmâ kî-ləḡwōy gāḏwōl ’ăśîməḵā šām:

4 ’ānōḵî ’ērēḏ ‘imməḵā miṣərayəmâ wə’ānōḵî ’a‘aləḵā ḡam-‘ālōh wəywōsēf yāšîṯ yāḏwō ‘al-‘êneyḵā:

5 wayyāqām ya‘ăqōḇ mibə’ēr šāḇa‘ wayyiśə’û ḇənê-yiśərā’ēl ’eṯ-ya‘ăqōḇ ’ăḇîhem wə’eṯ-ṭapām wə’eṯ-nəšêhem bā‘ăḡālwōṯ ’ăšer-šālaḥ parə‘ōh lāśē’ṯ ’ōṯwō:

6 wayyiqəḥû ’eṯ-miqənêhem wə’eṯ-rəḵûšām ’ăšer rāḵəšû bə’ereṣ kəna‘an wayyāḇō’û miṣərāyəmâ ya‘ăqōḇ wəḵāl-zarə‘wō ’itwō:

7 bānāyw ûḇənê ḇānāyw ’itwō bənōṯāyw ûḇənwōṯ bānāyw wəḵāl-zarə‘wō hēḇî’ ’itwō miṣərāyəmâ: s

8 wə’ēlleh šəmwōṯ bənê-yiśərā’ēl habā’îm miṣərayəmâ ya‘ăqōḇ ûḇānāyw bəḵōr ya‘ăqōḇ rə’ûḇēn:

9 ûḇənê rə’ûḇēn ḥănwōḵə ûfallû’ wəḥeṣərwōn wəḵarəmî:

10 ûḇənê šimə‘wōn yəmû’ēl wəyāmîn wə’ōhaḏ wəyāḵîn wəṣōḥar wəšā’ûl ben-hakəna‘ănîṯ:

11 ûḇənê lēwî gērəšwōn qəhāṯ ûmərārî:

12 ûḇənê yəhûḏâ ‘ēr wə’wōnān wəšēlâ wāfereṣ wāzāraḥ wayyāmāṯ ‘ēr wə’wōnān bə’ereṣ kəna‘an wayyihəyû ḇənê-fereṣ ḥeṣərwōn wəḥāmûl:

13 ûḇənê yiśāsḵār twōlā‘ ûfuûâ wəywōḇ wəšimərwōn:

14 ûḇənê zəḇûlun sereḏ wə’ēlwōn wəyaḥələ’ēl:

15 ’ēlleh| bənê lē’â ’ăšer yāləḏâ ləya‘ăqōḇ bəfadan ’ărām wə’ēṯ dînâ ḇitwō kāl-nefeš bānāyw ûḇənwōṯāyw šəlōšîm wəšālōš:

16 ûḇənê ḡāḏ ṣifəywōn wəḥagî šûnî wə’eṣəbōn ‘ērî wa’ărwōḏî wə’arə’ēlî:

17 ûḇənê ’āšēr yimənâ wəyišəwâ wəyišəwî ûḇərî‘â wəśeraḥ ’ăḥōṯām ûḇənê ḇərî‘â ḥeḇer ûmaləkî’ēl:

18 ’ēlleh bənê ziləpâ ’ăšer-nāṯan lāḇān ləlē’â ḇitwō watēleḏ ’eṯ-’ēlleh ləya‘ăqōḇ šēš ‘eśərēh nāfeš:

19 bənê rāḥēl ’ēšeṯ ya‘ăqōḇ3 ywōsēf ûḇinəyāmin:

20 wayyiûālēḏ ləywōsēf bə’ereṣ miṣərayim ’ăšer yāləḏâ-llwō ’āsənaṯ baṯ-pwōṭî fera‘ kōhēn ’ōn ’eṯ-mənaššeh wə’eṯ-’efərāyim:

21 ûḇənê ḇinəyāmin bela‘ wāḇeḵer wə’ašəbēl gērā’ wəna‘ămān ’ēḥî wārō’š mupîm wəḥupîm wā’ārədə:

22 ’ēlleh bənê rāḥēl ’ăšer yullaḏ ləya‘ăqōḇ kāl-nefeš ’arəbā‘â ‘āśār:

23 ûḇənê-ḏān ḥušîm:

24 ûḇənê nafətālî yaḥəṣə’ēl wəḡûnî wəyēṣer wəšillēm:

25 ’ēlleh bənê ḇiləhâ ’ăšer-nāṯan lāḇān lərāḥēl bitwō watēleḏ ’eṯ-’ēlleh ləya‘ăqōḇ kāl-nefeš šiḇə‘â:

26 kāl-hannefeš habā’â ləya‘ăqōḇ miṣərayəmâ yōṣə’ê yərēḵwō milləḇaḏ nəšê ḇənê-ya‘ăqōḇ kāl-nefeš šiššîm wāšēš:

27 ûḇənê ywōsēf ’ăšer-yullaḏ-lwō ḇəmiṣərayim nefeš šənāyim kāl-hannefeš ləḇêṯ-ya‘ăqōḇ habā’â miṣərayəmâ šiḇə‘îm: f

28 wə’eṯ-yəhûḏâ šālaḥ ləfānāyw ’el-ywōsēf ləhwōrōṯ ləfānāyw gōšənâ wayyāḇō’û ’arəṣâ gōšen:

29 wayye’əsōr ywōsēf merəkaḇətwō wayya‘al liqəra’ṯ-yiśərā’ēl ’āḇîw gōšənâ wayyērā’ ’ēlāyw wayyipōl ‘al-ṣaûā’rāyw wayyēḇəḵḵə ‘al-ṣaûā’rāyw ‘wōḏ:

30 wayyō’mer yiśərā’ēl ’el-ywōsēf ’āmûṯâ hapā‘am ’aḥărê rə’wōṯî ’eṯ-pāneyḵā kî ‘wōḏəḵā ḥāy:

31 wayyō’mer ywōsēf ’el-’eḥāyw wə’el-bêṯ ’āḇîw ’e‘ĕleh wə’agîḏâ ləfarə‘ōh wə’ōmərâ ’ēlāyw ’aḥay ûḇêṯ-’āḇî ’ăšer bə’ereṣ-kəna‘an bā’û ’ēlāy:

32 wəhā’ănāšîm rō‘ê ṣō’n kî-’anəšê miqəneh hāyû wəṣō’nām ûḇəqārām wəḵāl-’ăšer lâem hēḇî’û:

33 wəhāyâ kî-yiqərā’ lāḵem parə‘ōh wə’āmar mah-mma‘ăśêḵem:

34 wa’ămarətem ’anəšê miqəneh hāyû ‘ăḇāḏeyḵā minnə‘ûrênû wə‘aḏ-‘atâ gam-’ănaḥənû gam-’ăḇōṯênû ba‘ăḇûr tēšəḇû bə’ereṣ gōšen kî-ṯwō‘ăḇaṯ miṣərayim kāl-rō‘ēh ṣō’n:


Next: Genesis (Bereshit) Chapter 47