Sacred Texts  Bible  Index 
Polyglot  KJV  Sep  Vul 

Genesis (Bereshit) Index
  Previous  Next 

Tanach (Hebrew): Genesis (Bereshit) Chapter 28

1 ‏וַיִּקְרָ֥א יִצְחָ֛ק אֶֽל־יַעֲקֹ֖ב וַיְבָ֣רֶךְ אֹת֑וֹ וַיְצַוֵּ֙הוּ֙ וַיֹּ֣אמֶר ל֔וֹ לֹֽא־תִקַּ֥ח אִשָּׁ֖ה מִבְּנ֥וֹת כְּנָֽעַן׃

2 ‏ק֥וּם לֵךְ֙ פַּדֶּ֣נָֽה אֲרָ֔ם בֵּ֥יתָה בְתוּאֵ֖ל אֲבִ֣י אִמֶּ֑ךָ וְקַח־לְךָ֤ מִשָּׁם֙ אִשָּׁ֔ה מִבְּנ֥וֹת לָבָ֖ן אֲחִ֥י אִמֶּֽךָ׃

3 ‏וְאֵ֤ל שַׁדַּי֙ יְבָרֵ֣ךְ אֹֽתְךָ֔ וְיַפְרְךָ֖ וְיַרְבֶּ֑ךָ וְהָיִ֖יתָ לִקְהַ֥ל עַמִּֽים׃

4 ‏וְיִֽתֶּן־לְךָ֙ אֶת־בִּרְכַּ֣ת אַבְרָהָ֔ם לְךָ֖ וּלְזַרְעֲךָ֣ אִתָּ֑ךְ לְרִשְׁתְּךָ֙ אֶת־אֶ֣רֶץ מְגֻרֶ֔יךָ אֲשֶׁר־נָתַ֥ן אֱלֹהִ֖ים לְאַבְרָהָֽם׃

5 ‏וַיִּשְׁלַ֤ח יִצְחָק֙ אֶֽת־יַעֲקֹ֔ב וַיֵּ֖לֶךְ פַּדֶּ֣נָֽה אֲרָ֑ם אֶל־לָבָ֤ן בֶּן־בְּתוּאֵל֙ הָֽאֲרַמִּ֔י אֲחִ֣י רִבְקָ֔ה אֵ֥ם יַעֲקֹ֖ב וְעֵשָֽׂו׃

6 ‏וַיַּ֣רְא עֵשָׂ֗ו כִּֽי־בֵרַ֣ךְ יִצְחָק֮ אֶֽת־יַעֲקֹב֒ וְשִׁלַּ֤ח אֹתוֹ֙ פַּדֶּ֣נָֽה אֲרָ֔ם לָקַֽחַת־ל֥וֹ מִשָּׁ֖ם אִשָּׁ֑ה בְּבָרֲכ֣וֹ אֹת֔וֹ וַיְצַ֤ו עָלָיו֙ לֵאמֹ֔ר לֹֽא־תִקַּ֥ח אִשָּׁ֖ה מִבְּנ֥וֹת כְּנָֽעַן׃

7 ‏וַיִּשְׁמַ֣ע יַעֲקֹ֔ב אֶל־אָבִ֖יו וְאֶל־אִמּ֑וֹ וַיֵּ֖לֶךְ פַּדֶּ֥נָֽה אֲרָֽם׃

8 ‏וַיַּ֣רְא עֵשָׂ֔ו כִּ֥י רָע֖וֹת בְּנ֣וֹת כְּנָ֑עַן בְּעֵינֵ֖י יִצְחָ֥ק אָבִֽיו׃

9 ‏וַיֵּ֥לֶךְ עֵשָׂ֖ו אֶל־יִשְׁמָעֵ֑אל וַיִּקַּ֡ח אֶֽת־מָחֲלַ֣ת׀ בַּת־יִשְׁמָעֵ֨אל בֶּן־אַבְרָהָ֜ם אֲח֧וֹת נְבָי֛וֹת עַל־נָשָׁ֖יו ל֥וֹ לְאִשָּֽׁה׃ ס

10 ‏וַיֵּצֵ֥א יַעֲקֹ֖ב מִבְּאֵ֣ר שָׁ֑בַע וַיֵּ֖לֶךְ חָרָֽנָה׃

11 ‏וַיִּפְגַּ֨ע בַּמָּק֜וֹם וַיָּ֤לֶן שָׁם֙ כִּי־בָ֣א הַשֶּׁ֔מֶשׁ וַיִּקַּח֙ מֵאַבְנֵ֣י הַמָּק֔וֹם וַיָּ֖שֶׂם מְרַֽאֲשֹׁתָ֑יו וַיִּשְׁכַּ֖ב בַּמָּק֥וֹם הַהֽוּא׃

12 ‏וַֽיַּחֲלֹ֗ם וְהִנֵּ֤ה סֻלָּם֙ מֻצָּ֣ב אַ֔רְצָה וְרֹאשׁ֖וֹ מַגִּ֣יעַ הַשָּׁמָ֑יְמָה וְהִנֵּה֙ מַלְאֲכֵ֣י אֱלֹהִ֔ים עֹלִ֥ים וְיֹרְדִ֖ים בּֽוֹ׃

13 ‏וְהִנֵּ֨ה יְהוָ֜ה נִצָּ֣ב עָלָיו֮ וַיֹּאמַר֒ אֲנִ֣י יְהוָ֗ה אֱלֹהֵי֙ אַבְרָהָ֣ם אָבִ֔יךָ וֵאלֹהֵ֖י יִצְחָ֑ק הָאָ֗רֶץ אֲשֶׁ֤ר אַתָּה֙ שֹׁכֵ֣ב עָלֶ֔יהָ לְךָ֥ אֶתְּנֶ֖נָּה וּלְזַרְעֶֽךָ׃

14 ‏וְהָיָ֤ה זַרְעֲךָ֙ כַּעֲפַ֣ר הָאָ֔רֶץ וּפָרַצְתָּ֛ יָ֥מָּה וָקֵ֖דְמָה וְצָפֹ֣נָה וָנֶ֑גְבָּה וְנִבְרֲכ֥וּ בְךָ֛ כָּל־מִשְׁפְּחֹ֥ת הָאֲדָמָ֖ה וּבְזַרְעֶֽךָ׃

15 ‏וְהִנֵּ֨ה אָנֹכִ֜י עִמָּ֗ךְ וּשְׁמַרְתִּ֙יךָ֙ בְּכֹ֣ל אֲשֶׁר־תֵּלֵ֔ךְ וַהֲשִׁ֣בֹתִ֔יךָ אֶל־הָאֲדָמָ֖ה הַזֹּ֑את כִּ֚י לֹ֣א אֶֽעֱזָבְךָ֔ עַ֚ד אֲשֶׁ֣ר אִם־עָשִׂ֔יתִי אֵ֥ת אֲשֶׁר־דִּבַּ֖רְתִּי לָֽךְ׃

16 ‏וַיִּיקַ֣ץ יַעֲקֹב֮ מִשְּׁנָתוֹ֒ וַיֹּ֕אמֶר3 אָכֵן֙ יֵ֣שׁ יְהוָ֔ה בַּמָּק֖וֹם הַזֶּ֑ה וְאָנֹכִ֖י לֹ֥א יָדָֽעְתִּי׃

17 ‏וַיִּירָא֙ וַיֹּאמַ֔ר מַה־נּוֹרָ֖א הַמָּק֣וֹם הַזֶּ֑ה אֵ֣ין זֶ֗ה כִּ֚י אִם־בֵּ֣ית אֱלֹהִ֔ים וְזֶ֖ה שַׁ֥עַר הַשָּׁמָֽיִם׃

18 ‏וַיַּשְׁכֵּ֨ם יַעֲקֹ֜ב בַּבֹּ֗קֶר וַיִּקַּ֤ח אֶת־הָאֶ֙בֶן֙ אֲשֶׁר־שָׂ֣ם מְרַֽאֲשֹׁתָ֔יו וַיָּ֥שֶׂם אֹתָ֖הּ מַצֵּבָ֑ה וַיִּצֹ֥ק שֶׁ֖מֶן עַל־רֹאשָֽׁהּ׃

19 ‏וַיִּקְרָ֛א אֶת־שֵֽׁם־הַמָּק֥וֹם הַה֖וּא בֵּֽית־אֵ֑ל וְאוּלָ֛ם ל֥וּז שֵׁם־הָעִ֖יר לָרִאשֹׁנָֽה׃

20 ‏וַיִּדַּ֥ר יַעֲקֹ֖ב נֶ֣דֶר לֵאמֹ֑ר אִם־יִהְיֶ֨ה אֱלֹהִ֜ים עִמָּדִ֗י וּשְׁמָרַ֙נִי֙ בַּדֶּ֤רֶךְ הַזֶּה֙ אֲשֶׁ֣ר אָנֹכִ֣י הוֹלֵ֔ךְ וְנָֽתַן־לִ֥י לֶ֛חֶם לֶאֱכֹ֖ל וּבֶ֥גֶד לִלְבֹּֽשׁ׃

21 ‏וְשַׁבְתִּ֥י בְשָׁל֖וֹם אֶל־בֵּ֣ית אָבִ֑י וְהָיָ֧ה יְהוָ֛ה לִ֖י לֵאלֹהִֽים׃

22 ‏וְהָאֶ֣בֶן הַזֹּ֗את אֲשֶׁר־שַׂ֙מְתִּי֙ מַצֵּבָ֔ה יִהְיֶ֖ה בֵּ֣ית אֱלֹהִ֑ים וְכֹל֙ אֲשֶׁ֣ר תִּתֶּן־לִ֔י עַשֵּׂ֖ר אֲעַשְּׂרֶ֥נּוּ לָֽךְ׃

1 wayyiqərā’ yiṣəḥāq ’el-ya‘ăqōḇ wayəḇāreḵə ’ōṯwō wayəṣaûēhû wayyō’mer lwō lō’-ṯiqqaḥ ’iššâ mibənwōṯ kənā‘an:

2 qûm lēḵə padenâ ’ărām bêṯâ ḇəṯû’ēl ’ăḇî ’immeḵā wəqaḥ-ləḵā miššām ’iššâ mibənwōṯ lāḇān ’ăḥî ’immeḵā:

3 wə’ēl šaday yəḇārēḵə ’ōṯəḵā wəyafərəḵā wəyarəbeḵā wəhāyîṯā liqəhal ‘ammîm:

4 wəyiten-ləḵā ’eṯ-birəkaṯ ’aḇərâām ləḵā ûləzarə‘ăḵā ’itāḵə lərišətəḵā ’eṯ-’ereṣ məḡureyḵā ’ăšer-nāṯan ’ĕlōhîm lə’aḇərâām:

5 wayyišəlaḥ yiṣəḥāq ’eṯ-ya‘ăqōḇ wayyēleḵə padenâ ’ărām ’el-lāḇān ben-bəṯû’ēl hā’ărammî ’ăḥî riḇəqâ ’ēm ya‘ăqōḇ wə‘ēśāw:

6 wayyarə’ ‘ēśāw kî-ḇēraḵə yiṣəḥāq ’eṯ-ya‘ăqōḇ wəšillaḥ ’ōṯwō padenâ ’ărām lāqaḥaṯ-lwō miššām ’iššâ bəḇārăḵwō ’ōṯwō wayəṣaw ‘ālāyw lē’mōr lō’-ṯiqqaḥ ’iššâ mibənwōṯ kənā‘an:

7 wayyišəma‘ ya‘ăqōḇ ’el-’āḇîw wə’el-’immwō wayyēleḵə padenâ ’ărām:

8 wayyarə’ ‘ēśāw kî rā‘wōṯ bənwōṯ kənā‘an bə‘ênê yiṣəḥāq ’āḇîw:

9 wayyēleḵə ‘ēśāw ’el-yišəmā‘ē’l wayyiqqaḥ ’eṯ-māḥălaṯ| baṯ-yišəmā‘ē’l ben-’aḇərâām ’ăḥwōṯ nəḇāywōṯ ‘al-nāšāyw lwō lə’iššâ: s

10 wayyēṣē’ ya‘ăqōḇ mibə’ēr šāḇa‘ wayyēleḵə ḥārānâ:

11 wayyifəga‘ bammāqwōm wayyālen šām kî-ḇā’ haššemeš wayyiqqaḥ mē’aḇənê hammāqwōm wayyāśem məra’ăšōṯāyw wayyišəkaḇ bammāqwōm hahû’:

12 wayyaḥălōm wəhinnēh sullām muṣṣāḇ ’arəṣâ wərō’šwō magî‘a haššāmāyəmâ wəhinnēh malə’ăḵê ’ĕlōhîm ‘ōlîm wəyōrəḏîm bwō:

13 wəhinnēh yəhwâ niṣṣāḇ ‘ālāyw wayyō’mar ’ănî yəhwâ ’ĕlōhê ’aḇərâām ’āḇîḵā wē’lōhê yiṣəḥāq hā’āreṣ ’ăšer ’atâ šōḵēḇ ‘āleyhā ləḵā ’etənennâ ûləzarə‘eḵā:

14 wəhāyâ zarə‘ăḵā ka‘ăfar hā’āreṣ ûfāraṣətā yāmmâ wāqēḏəmâ wəṣāfōnâ wāneḡəbâ wəniḇərăḵû ḇəḵā kāl-mišəpəḥōṯ hā’ăḏāmâ ûḇəzarə‘eḵā:

15 wəhinnēh ’ānōḵî ‘immāḵə ûšəmarətîḵā bəḵōl ’ăšer-tēlēḵə wahăšiḇōṯîḵā ’el-hā’ăḏāmâ hazzō’ṯ kî lō’ ’e‘ĕzāḇəḵā ‘aḏ ’ăšer ’im-‘āśîṯî ’ēṯ ’ăšer-dibarətî lāḵə:

16 wayyîqaṣ ya‘ăqōḇ miššənāṯwō wayyō’mer3 ’āḵēn yēš yəhwâ bammāqwōm hazzeh wə’ānōḵî lō’ yāḏā‘ətî:

17 wayyîrā’ wayyō’mar mah-nnwōrā’ hammāqwōm hazzeh ’ên zeh kî ’im-bêṯ ’ĕlōhîm wəzeh ša‘ar haššāmāyim:

18 wayyašəkēm ya‘ăqōḇ babōqer wayyiqqaḥ ’eṯ-hā’eḇen ’ăšer-śām məra’ăšōṯāyw wayyāśem ’ōṯāh maṣṣēḇâ wayyiṣōq šemen ‘al-rō’šāh:

19 wayyiqərā’ ’eṯ-šēm-hammāqwōm hahû’ bêṯ-’ēl wə’ûlām lûz šēm-hā‘îr lāri’šōnâ:

20 wayyidar ya‘ăqōḇ neḏer lē’mōr ’im-yihəyeh ’ĕlōhîm ‘immāḏî ûšəmāranî badereḵə hazzeh ’ăšer ’ānōḵî hwōlēḵə wənāṯan-lî leḥem le’ĕḵōl ûḇeḡeḏ liləbōš:

21 wəšaḇətî ḇəšālwōm ’el-bêṯ ’āḇî wəhāyâ yəhwâ lî lē’lōhîm:

22 wəhā’eḇen hazzō’ṯ ’ăšer-śamətî maṣṣēḇâ yihəyeh bêṯ ’ĕlōhîm wəḵōl ’ăšer titen-lî ‘aśśēr ’ă‘aśśərennû lāḵə:


Next: Genesis (Bereshit) Chapter 29