Sacred Texts  Bible  Index 
Polyglot  KJV  Sep  Vul 

Ezekiel (Yechezqel) Index
  Previous  Next 

Tanach (Hebrew): Ezekiel (Yechezqel) Chapter 11

1 ‏וַתִּשָּׂ֨א אֹתִ֜י ר֗וּחַ וַתָּבֵ֣א אֹ֠תִי אֶל־שַׁ֨עַר בֵּית־יְהוָ֤ה הַקַּדְמוֹנִי֙ הַפּוֹנֶ֣ה קָדִ֔ימָה וְהִנֵּה֙ בְּפֶ֣תַח הַשַּׁ֔עַר עֶשְׂרִ֥ים וַחֲמִשָּׁ֖ה אִ֑ישׁ וָאֶרְאֶ֨ה בְתוֹכָ֜ם אֶת־יַאֲזַנְיָ֧ה בֶן־עַזֻּ֛ר וְאֶת־פְּלַטְיָ֥הוּ בֶן־בְּנָיָ֖הוּ שָׂרֵ֖י הָעָֽם׃ פ

2 ‏וַיֹּ֖אמֶר אֵלָ֑י בֶּן־אָדָ֕ם אֵ֣לֶּה הָאֲנָשִׁ֞ים הַחֹשְׁבִ֥ים אָ֛וֶן וְהַיֹּעֲצִ֥ים עֲצַת־רָ֖ע בָּעִ֥יר הַזֹּֽאת׃

3 ‏הָאֹ֣מְרִ֔ים לֹ֥א בְקָר֖וֹב בְּנ֣וֹת בָּתִּ֑ים הִ֣יא הַסִּ֔יר וַאֲנַ֖חְנוּ הַבָּשָֽׂר׃

4 ‏לָכֵ֖ן הִנָּבֵ֣א עֲלֵיהֶ֑ם הִנָּבֵ֖א בֶּן־אָדָֽם׃

5 ‏וַתִּפֹּ֣ל עָלַי֮ ר֣וּחַ יְהוָה֒ וַיֹּ֣אמֶר אֵלַ֗י אֱמֹר֙ כֹּה־אָמַ֣ר יְהוָ֔ה כֵּ֥ן אֲמַרְתֶּ֖ם בֵּ֣ית יִשְׂרָאֵ֑ל וּמַעֲל֥וֹת רֽוּחֲכֶ֖ם אֲנִ֥י יְדַעְתִּֽיהָ׃

6 ‏הִרְבֵּיתֶ֥ם חַלְלֵיכֶ֖ם בָּעִ֣יר הַזֹּ֑את וּמִלֵּאתֶ֥ם חוּצֹתֶ֖יהָ חָלָֽל׃ פ

7 ‏לָכֵ֗ן כֹּֽה־אָמַר֮ אֲדֹנָ֣י יְהוִה֒ חַלְלֵיכֶם֙ אֲשֶׁ֣ר שַׂמְתֶּ֣ם בְּתוֹכָ֔הּ הֵ֥מָּה הַבָּשָׂ֖ר וְהִ֣יא הַסִּ֑יר וְאֶתְכֶ֖ם הוֹצִ֥יא מִתּוֹכָֽהּ׃

8 ‏חֶ֖רֶב יְרֵאתֶ֑ם וְחֶ֙רֶב֙ אָבִ֣יא עֲלֵיכֶ֔ם נְאֻ֖ם אֲדֹנָ֥י יְהוִֽה׃

9 ‏וְהוֹצֵאתִ֤י אֶתְכֶם֙ מִתּוֹכָ֔הּ וְנָתַתִּ֥י אֶתְכֶ֖ם בְּיַד־זָרִ֑ים וְעָשִׂ֛יתִי בָכֶ֖ם שְׁפָטִֽים׃

10 ‏בַּחֶ֣רֶב תִּפֹּ֔לוּ עַל־גְּב֥וּל יִשְׂרָאֵ֖ל אֶשְׁפּ֣וֹט אֶתְכֶ֑ם וִֽידַעְתֶּ֖ם כִּֽי־אֲנִ֥י יְהוָֽה׃

11 ‏הִ֗יא לֹֽא־תִהְיֶ֤ה לָכֶם֙ לְסִ֔יר וְאַתֶּ֛ם תִּהְי֥וּ בְתוֹכָ֖הּ לְבָשָׂ֑ר אֶל־גְּב֥וּל יִשְׂרָאֵ֖ל אֶשְׁפֹּ֥ט אֶתְכֶֽם׃

12 ‏וִֽידַעְתֶּם֙ כִּֽי־אֲנִ֣י יְהוָ֔ה אֲשֶׁ֤ר בְּחֻקַּי֙ לֹ֣א הֲלַכְתֶּ֔ם וּמִשְׁפָּטַ֖י לֹ֣א עֲשִׂיתֶ֑ם וּֽכְמִשְׁפְּטֵ֧י הַגּוֹיִ֛ם אֲשֶׁ֥ר סְבִיבוֹתֵיכֶ֖ם עֲשִׂיתֶֽם׃

13 ‏וַֽיְהִי֙ כְּהִנָּ֣בְאִ֔י וּפְלַטְיָ֥הוּ בֶן־בְּנָיָ֖ה מֵ֑ת וָאֶפֹּ֨ל עַל־פָּנַ֜י וָאֶזְעַ֣ק קוֹל־גָּד֗וֹל וָאֹמַר֙ אֲהָהּ֙ אֲדֹנָ֣י יְהוִ֔ה כָּלָה֙ אַתָּ֣ה עֹשֶׂ֔ה אֵ֖ת שְׁאֵרִ֥ית יִשְׂרָאֵֽל׃ פ

14 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

15 ‏בֶּן־אָדָ֗ם אַחֶ֤יךָ אַחֶ֙יךָ֙ אַנְשֵׁ֣י גְאֻלָּתֶ֔ךָ וְכָל־בֵּ֥ית יִשְׂרָאֵ֖ל כֻּלֹּ֑ה אֲשֶׁר֩ אָמְר֨וּ לָהֶ֜ם יֹשְׁבֵ֣י יְרוּשָׁלִַ֗ם רַֽחֲקוּ֙ מֵעַ֣ל יְהוָ֔ה לָ֥נוּ הִ֛יא נִתְּנָ֥ה הָאָ֖רֶץ לְמוֹרָשָֽׁה׃ ס

16 ‏לָכֵ֣ן אֱמֹ֗ר כֹּֽה־אָמַר֮ אֲדֹנָ֣י יְהוִה֒ כִּ֤י הִרְחַקְתִּים֙ בַּגּוֹיִ֔ם וְכִ֥י הֲפִֽיצוֹתִ֖ים בָּאֲרָצ֑וֹת וָאֱהִ֤י לָהֶם֙ לְמִקְדָּ֣שׁ מְעַ֔ט בָּאֲרָצ֖וֹת אֲשֶׁר־בָּ֥אוּ שָֽׁם׃ ס

17 ‏לָכֵ֣ן אֱמֹ֗ר כֹּֽה־אָמַר֮ אֲדֹנָ֣י יְהוִה֒ וְקִבַּצְתִּ֤י אֶתְכֶם֙ מִן־הָ֣עַמִּ֔ים וְאָסַפְתִּ֣י אֶתְכֶ֔ם מִן־הָ֣אֲרָצ֔וֹת אֲשֶׁ֥ר נְפֹצוֹתֶ֖ם בָּהֶ֑ם וְנָתַתִּ֥י לָכֶ֖ם אֶת־אַדְמַ֥ת יִשְׂרָאֵֽל׃

18 ‏וּבָ֖אוּ־שָׁ֑מָּה וְהֵסִ֜ירוּ אֶת־כָּל־שִׁקּוּצֶ֛יהָ וְאֶת־כָּל־תּוֹעֲבוֹתֶ֖יהָ מִמֶּֽנָּה׃

19 ‏וְנָתַתִּ֤י לָהֶם֙ לֵ֣ב אֶחָ֔ד וְר֥וּחַ חֲדָשָׁ֖ה אֶתֵּ֣ן בְּקִרְבְּכֶ֑ם וַהֲסִ֨רֹתִ֜י לֵ֤ב הָאֶ֙בֶן֙ מִבְּשָׂרָ֔ם וְנָתַתִּ֥י לָהֶ֖ם לֵ֥ב בָּשָֽׂר׃

20 ‏לְמַ֙עַן֙ בְּחֻקֹּתַ֣י יֵלֵ֔כוּ וְאֶת־מִשְׁפָּטַ֥י יִשְׁמְר֖וּ וְעָשׂ֣וּ אֹתָ֑ם וְהָיוּ־לִ֣י לְעָ֔ם וַאֲנִ֕י אֶהְיֶ֥ה לָהֶ֖ם לֵאלֹהִֽים׃

21 ‏וְאֶל־לֵ֧ב שִׁקּוּצֵיהֶ֛ם וְתוֹעֲבוֹתֵיהֶ֖ם לִבָּ֣ם הֹלֵ֑ךְ דַּרְכָּם֙ בְּרֹאשָׁ֣ם נָתַ֔תִּי נְאֻ֖ם אֲדֹנָ֥י יְהוִֽה׃

22 ‏וַיִּשְׂא֤וּ הַכְּרוּבִים֙ אֶת־כַּנְפֵיהֶ֔ם וְהָאֽוֹפַנִּ֖ים לְעֻמָּתָ֑ם וּכְב֧וֹד אֱלֹהֵֽי־יִשְׂרָאֵ֛ל עֲלֵיהֶ֖ם מִלְמָֽעְלָה׃

23 ‏וַיַּ֙עַל֙ כְּב֣וֹד יְהוָ֔ה מֵעַ֖ל תּ֣וֹךְ הָעִ֑יר וַֽיַּעֲמֹד֙ עַל־הָהָ֔ר אֲשֶׁ֖ר מִקֶּ֥דֶם לָעִֽיר׃

24 ‏וְר֣וּחַ נְשָׂאַ֗תְנִי וַתְּבִיאֵ֤נִי כַשְׂדִּ֙ימָה֙ אֶל־הַגּוֹלָ֔ה בַּמַּרְאֶ֖ה בְּר֣וּחַ אֱלֹהִ֑ים וַיַּ֙עַל֙ מֵֽעָלַ֔י הַמַּרְאֶ֖ה אֲשֶׁ֥ר רָאִֽיתִי׃

25 ‏וָאֲדַבֵּ֖ר אֶל־הַגּוֹלָ֑ה אֵ֛ת כָּל־דִּבְרֵ֥י יְהוָ֖ה אֲשֶׁ֥ר הֶרְאָֽנִי׃ פ

1 watiśśā’ ’ōṯî rûḥa watāḇē’ ’ōṯî ’el-ša‘ar bêṯ-yəhwâ haqqaḏəmwōnî hapwōneh qāḏîmâ wəhinnēh bəfeṯaḥ hašša‘ar ‘eśərîm waḥămiššâ ’îš wā’erə’eh ḇəṯwōḵām ’eṯ-ya’ăzanəyâ ḇen-‘azzur wə’eṯ-pəlaṭəyâû ḇen-bənāyâû śārê hā‘ām: f

2 wayyō’mer ’ēlāy ben-’āḏām ’ēlleh hā’ănāšîm haḥōšəḇîm ’āwen wəhayyō‘ăṣîm ‘ăṣaṯ-rā‘ bā‘îr hazzō’ṯ:

3 hā’ōmərîm lō’ ḇəqārwōḇ bənwōṯ bātîm hî’ hassîr wa’ănaḥənû habāśār:

4 lāḵēn hinnāḇē’ ‘ălêhem hinnāḇē’ ben-’āḏām:

5 watipōl ‘ālay rûḥa yəhwâ wayyō’mer ’ēlay ’ĕmōr kōh-’āmar yəhwâ kēn ’ămarətem bêṯ yiśərā’ēl ûma‘ălwōṯ rûḥăḵem ’ănî yəḏa‘ətîhā:

6 hirəbêṯem ḥaləlêḵem bā‘îr hazzō’ṯ ûmillē’ṯem ḥûṣōṯeyhā ḥālāl: f

7 lāḵēn kōh-’āmar ’ăḏōnāy yəhwih ḥaləlêḵem ’ăšer śamətem bəṯwōḵāh hēmmâ habāśār wəhî’ hassîr wə’eṯəḵem hwōṣî’ mitwōḵāh:

8 ḥereḇ yərē’ṯem wəḥereḇ ’āḇî’ ‘ălêḵem nə’um ’ăḏōnāy yəhwih:

9 wəhwōṣē’ṯî ’eṯəḵem mitwōḵāh wənāṯatî ’eṯəḵem bəyaḏ-zārîm wə‘āśîṯî ḇāḵem šəfāṭîm:

10 baḥereḇ tipōlû ‘al-gəḇûl yiśərā’ēl ’ešəpwōṭ ’eṯəḵem wîḏa‘ətem kî-’ănî yəhwâ:

11 hî’ lō’-ṯihəyeh lāḵem ləsîr wə’atem tihəyû ḇəṯwōḵāh ləḇāśār ’el-gəḇûl yiśərā’ēl ’ešəpōṭ ’eṯəḵem:

12 wîḏa‘ətem kî-’ănî yəhwâ ’ăšer bəḥuqqay lō’ hălaḵətem ûmišəpāṭay lō’ ‘ăśîṯem ûḵəmišəpəṭê hagwōyim ’ăšer səḇîḇwōṯêḵem ‘ăśîṯem:

13 wayəhî kəhinnāḇə’î ûfəlaṭəyâû ḇen-bənāyâ mēṯ wā’epōl ‘al-pānay wā’ezə‘aq qwōl-gāḏwōl wā’ōmar ’ăhāh ’ăḏōnāy yəhwih kālâ ’atâ ‘ōśeh ’ēṯ šə’ērîṯ yiśərā’ēl: f

14 wayəhî ḏəḇar-yəhwâ ’ēlay lē’mōr:

15 ben-’āḏām ’aḥeyḵā ’aḥeyḵā ’anəšê ḡə’ullāṯeḵā wəḵāl-bêṯ yiśərā’ēl kullōh ’ăšer ’āmərû lâem yōšəḇê yərûšālaim raḥăqû mē‘al yəhwâ lānû hî’ nitənâ hā’āreṣ ləmwōrāšâ: s

16 lāḵēn ’ĕmōr kōh-’āmar ’ăḏōnāy yəhwih kî hirəḥaqətîm bagwōyim wəḵî hăfîṣwōṯîm bā’ărāṣwōṯ wā’ĕhî lâem ləmiqədāš mə‘aṭ bā’ărāṣwōṯ ’ăšer-bā’û šām: s

17 lāḵēn ’ĕmōr kōh-’āmar ’ăḏōnāy yəhwih wəqibaṣətî ’eṯəḵem min-hā‘ammîm wə’āsafətî ’eṯəḵem min-hā’ărāṣwōṯ ’ăšer nəfōṣwōṯem bâem wənāṯatî lāḵem ’eṯ-’aḏəmaṯ yiśərā’ēl:

18 ûḇā’û-šāmmâ wəhēsîrû ’eṯ-kāl-šiqqûṣeyhā wə’eṯ-kāl-twō‘ăḇwōṯeyhā mimmennâ:

19 wənāṯatî lâem lēḇ ’eḥāḏ wərûḥa ḥăḏāšâ ’etēn bəqirəbəḵem wahăsirōṯî lēḇ hā’eḇen mibəśārām wənāṯatî lâem lēḇ bāśār:

20 ləma‘an bəḥuqqōṯay yēlēḵû wə’eṯ-mišəpāṭay yišəmərû wə‘āśû ’ōṯām wəhāyû-lî lə‘ām wa’ănî ’ehəyeh lâem lē’lōhîm:

21 wə’el-lēḇ šiqqûṣêhem wəṯwō‘ăḇwōṯêhem libām hōlēḵə darəkām bərō’šām nāṯatî nə’um ’ăḏōnāy yəhwih:

22 wayyiśə’û hakərûḇîm ’eṯ-kanəfêhem wəhā’wōfannîm lə‘ummāṯām ûḵəḇwōḏ ’ĕlōhê-yiśərā’ēl ‘ălêhem miləmā‘əlâ:

23 wayya‘al kəḇwōḏ yəhwâ mē‘al twōḵə hā‘îr wayya‘ămōḏ ‘al-hâār ’ăšer miqqeḏem lā‘îr:

24 wərûḥa nəśā’aṯənî watəḇî’ēnî ḵaśədîmâ ’el-hagwōlâ bammarə’eh bərûḥa ’ĕlōhîm wayya‘al mē‘ālay hammarə’eh ’ăšer rā’îṯî:

25 wā’ăḏabēr ’el-hagwōlâ ’ēṯ kāl-diḇərê yəhwâ ’ăšer herə’ānî: f


Next: Ezekiel (Yechezqel) Chapter 12