Sacred Texts  Bible  Index 
Polyglot  KJV  Sep  Vul 

Ezekiel (Yechezqel) Index
  Previous  Next 

Tanach (Hebrew): Ezekiel (Yechezqel) Chapter 5

1 ‏וְאַתָּ֨ה בֶן־אָדָ֜ם קַח־לְךָ֣׀ חֶ֣רֶב חַדָּ֗ה תַּ֤עַר הַגַּלָּבִים֙ תִּקָּחֶ֣נָּה לָּ֔ךְ וְהַעֲבַרְתָּ֥ עַל־רֹאשְׁךָ֖ וְעַל־זְקָנֶ֑ךָ וְלָקַחְתָּ֥ לְךָ֛ מֹאזְנֵ֥י מִשְׁקָ֖ל וְחִלַּקְתָּֽם׃

2 ‏שְׁלִשִׁ֗ית בָּא֤וּר תַּבְעִיר֙ בְּת֣וֹךְ הָעִ֔יר כִּמְלֹ֖את יְמֵ֣י הַמָּצ֑וֹר וְלָֽקַחְתָּ֣ אֶת־הַשְּׁלִשִׁ֗ית תַּכֶּ֤ה בַחֶ֙רֶב֙ סְבִ֣יבוֹתֶ֔יהָ וְהַשְּׁלִשִׁית֙ תִּזְרֶ֣ה לָר֔וּחַ וְחֶ֖רֶב אָרִ֥יק אַחֲרֵיהֶֽם׃

3 ‏וְלָקַחְתָּ֥ מִשָּׁ֖ם מְעַ֣ט בְּמִסְפָּ֑ר וְצַרְתָּ֥ אוֹתָ֖ם בִּכְנָפֶֽיךָ׃

4 ‏וּמֵהֶם֙ ע֣וֹד תִּקָּ֔ח וְהִשְׁלַכְתָּ֤ אוֹתָם֙ אֶל־תּ֣וֹךְ הָאֵ֔שׁ וְשָׂרַפְתָּ֥ אֹתָ֖ם בָּאֵ֑שׁ מִמֶּ֥נּוּ תֵצֵא־אֵ֖שׁ אֶל־כָּל־בֵּ֥ית יִשְׂרָאֵֽל׃ פ

5 ‏כֹּ֤ה אָמַר֙ אֲדֹנָ֣י יְהוִֹ֔ה זֹ֚את יְר֣וּשָׁלִַ֔ם בְּת֥וֹךְ הַגּוֹיִ֖ם שַׂמְתִּ֑יהָ וּסְבִיבוֹתֶ֖יהָ אֲרָצֽוֹת׃

6 ‏וַתֶּ֨מֶר אֶת־מִשְׁפָּטַ֤י לְרִשְׁעָה֙ מִן־הַגּוֹיִ֔ם וְאֶ֨ת־חֻקּוֹתַ֔י מִן־הָאֲרָצ֖וֹת אֲשֶׁ֣ר סְבִיבוֹתֶ֑יהָ כִּ֤י בְמִשְׁפָּטַי֙ מָאָ֔סוּ וְחֻקּוֹתַ֖י לֹא־הָלְכ֥וּ בָהֶֽם׃ ס

7 ‏לָכֵ֞ן כֹּֽה־אָמַ֣ר׀ אֲדֹנָ֣י יְהוִ֗ה יַ֤עַן הֲמָנְכֶם֙ מִן־הַגּוֹיִם֙ אֲשֶׁ֣ר סְבִיבֽוֹתֵיכֶ֔ם בְּחֻקּוֹתַי֙ לֹ֣א הֲלַכְתֶּ֔ם וְאֶת־מִשְׁפָּטַ֖י לֹ֣א עֲשִׂיתֶ֑ם וּֽכְמִשְׁפְּטֵ֧י הַגּוֹיִ֛ם אֲשֶׁ֥ר סְבִיבוֹתֵיכֶ֖ם לֹ֥א עֲשִׂיתֶֽם׃ ס

8 ‏לָכֵ֗ן כֹּ֤ה אָמַר֙ אֲדֹנָ֣י יְהוִ֔ה הִנְנִ֥י עָלַ֖יִךְ גַּם־אָ֑נִי וְעָשִׂ֧יתִי בְתוֹכֵ֛ךְ מִשְׁפָּטִ֖ים לְעֵינֵ֥י הַגּוֹיִֽם׃

9 ‏וְעָשִׂ֣יתִי בָ֗ךְ אֵ֚ת אֲשֶׁ֣ר לֹֽא־עָשִׂ֔יתִי וְאֵ֛ת אֲשֶֽׁר־לֹֽא־אֶעֱשֶׂ֥ה כָמֹ֖הוּ ע֑וֹד יַ֖עַן כָּל־תּוֹעֲבֹתָֽיִךְ׃ ס

10 ‏לָכֵ֗ן אָב֞וֹת יֹאכְל֤וּ בָנִים֙ בְּתוֹכֵ֔ךְ וּבָנִ֖ים יֹאכְל֣וּ אֲבוֹתָ֑ם וְעָשִׂ֤יתִי בָךְ֙ שְׁפָטִ֔ים וְזֵרִיתִ֥י אֶת־כָּל־שְׁאֵרִיתֵ֖ךְ לְכָל־רֽוּחַ׃ פ

11 ‏לָכֵ֣ן חַי־אָ֗נִי נְאֻם֮ אֲדֹנָ֣י יְהוִה֒ אִם־לֹ֗א יַ֚עַן אֶת־מִקְדָּשִׁ֣י טִמֵּ֔את בְּכָל־שִׁקּוּצַ֖יִךְ וּבְכָל־תּוֹעֲבֹתָ֑יִךְ וְגַם־אֲנִ֤י אֶגְרַע֙ וְלֹא־תָח֣וֹס עֵינִ֔י וְגַם־אֲנִ֖י לֹ֥א אֶחְמֽוֹל׃

12 ‏שְׁלִשִׁתֵ֞יךְ בַּדֶּ֣בֶר יָמ֗וּתוּ וּבָֽרָעָב֙ יִכְל֣וּ בְתוֹכֵ֔ךְ וְהַ֨שְּׁלִשִׁ֔ית בַּחֶ֖רֶב יִפְּל֣וּ סְבִיבוֹתָ֑יִךְ וְהַשְּׁלִישִׁית֙ לְכָל־ר֣וּחַ אֱזָרֶ֔ה וְחֶ֖רֶב אָרִ֥יק אַחֲרֵיהֶֽם׃

13 ‏וְכָלָ֣ה אַפִּ֗י וַהֲנִחוֹתִ֧י חֲמָתִ֛י בָּ֖ם וְהִנֶּחָ֑מְתִּי וְֽיָדְע֞וּ כִּי־אֲנִ֣י יְהוָ֗ה דִּבַּ֙רְתִּי֙ בְּקִנְאָתִ֔י בְּכַלּוֹתִ֥י חֲמָתִ֖י בָּֽם׃

14 ‏וְאֶתְּנֵךְ֙ לְחָרְבָּ֣ה וּלְחֶרְפָּ֔ה בַּגּוֹיִ֖ם אֲשֶׁ֣ר סְבִיבוֹתָ֑יִךְ לְעֵינֵ֖י כָּל־עוֹבֵֽר׃

15 ‏וְֽהָ֨יְתָ֜ה חֶרְפָּ֤ה וּגְדוּפָה֙ מוּסָ֣ר וּמְשַׁמָּ֔ה לַגּוֹיִ֖ם אֲשֶׁ֣ר סְבִיבוֹתָ֑יִךְ בַּעֲשׂוֹתִי֩ בָ֨ךְ שְׁפָטִ֜ים בְּאַ֤ף וּבְחֵמָה֙ וּבְתֹכְח֣וֹת חֵמָ֔ה אֲנִ֥י יְהוָ֖ה דִּבַּֽרְתִּי׃

16 ‏בְּֽשַׁלְּחִ֡י אֶת־חִצֵּי֩ הָרָעָ֨ב הָרָעִ֤ים בָּהֶם֙ אֲשֶׁ֣ר הָי֣וּ לְמַשְׁחִ֔ית אֲשֶׁר־אֲשַׁלַּ֥ח אוֹתָ֖ם לְשַֽׁחֶתְכֶ֑ם וְרָעָב֙ אֹסֵ֣ף עֲלֵיכֶ֔ם וְשָׁבַרְתִּ֥י לָכֶ֖ם מַטֵּה־לָֽחֶם׃

17 ‏וְשִׁלַּחְתִּ֣י עֲ֠לֵיכֶם רָעָ֞ב וְחַיָּ֤ה רָעָה֙ וְשִׁכְּלֻ֔ךְ וְדֶ֥בֶר וָדָ֖ם יַעֲבָר־בָּ֑ךְ וְחֶ֙רֶב֙ אָבִ֣יא עָלַ֔יִךְ אֲנִ֥י יְהוָ֖ה דִּבַּֽרְתִּי׃ פ

1 wə’atâ ḇen-’āḏām qaḥ-ləḵā| ḥereḇ ḥadâ ta‘ar hagallāḇîm tiqqāḥennâ llāḵə wəha‘ăḇarətā ‘al-rō’šəḵā wə‘al-zəqāneḵā wəlāqaḥətā ləḵā mō’zənê mišəqāl wəḥillaqətām:

2 šəlišîṯ bā’ûr taḇə‘îr bəṯwōḵə hā‘îr kiməlō’ṯ yəmê hammāṣwōr wəlāqaḥətā ’eṯ-haššəlišîṯ takeh ḇaḥereḇ səḇîḇwōṯeyhā wəhaššəlišîṯ tizəreh lārûḥa wəḥereḇ ’ārîq ’aḥărêhem:

3 wəlāqaḥətā miššām mə‘aṭ bəmisəpār wəṣarətā ’wōṯām biḵənāfeyḵā:

4 ûmēhem ‘wōḏ tiqqāḥ wəhišəlaḵətā ’wōṯām ’el-twōḵə hā’ēš wəśārafətā ’ōṯām bā’ēš mimmennû ṯēṣē’-’ēš ’el-kāl-bêṯ yiśərā’ēl: f

5 kōh ’āmar ’ăḏōnāy yəhwōih zō’ṯ yərûšālaim bəṯwōḵə hagwōyim śamətîhā ûsəḇîḇwōṯeyhā ’ărāṣwōṯ:

6 watemer ’eṯ-mišəpāṭay lərišə‘â min-hagwōyim wə’eṯ-ḥuqqwōṯay min-hā’ărāṣwōṯ ’ăšer səḇîḇwōṯeyhā kî ḇəmišəpāṭay mā’āsû wəḥuqqwōṯay lō’-hāləḵû ḇâem: s

7 lāḵēn kōh-’āmar| ’ăḏōnāy yəhwih ya‘an hămānəḵem min-hagwōyim ’ăšer səḇîḇwōṯêḵem bəḥuqqwōṯay lō’ hălaḵətem wə’eṯ-mišəpāṭay lō’ ‘ăśîṯem ûḵəmišəpəṭê hagwōyim ’ăšer səḇîḇwōṯêḵem lō’ ‘ăśîṯem: s

8 lāḵēn kōh ’āmar ’ăḏōnāy yəhwih hinənî ‘ālayiḵə gam-’ānî wə‘āśîṯî ḇəṯwōḵēḵə mišəpāṭîm lə‘ênê hagwōyim:

9 wə‘āśîṯî ḇāḵə ’ēṯ ’ăšer lō’-‘āśîṯî wə’ēṯ ’ăšer-lō’-’e‘ĕśeh ḵāmōhû ‘wōḏ ya‘an kāl-twō‘ăḇōṯāyiḵə: s

10 lāḵēn ’āḇwōṯ yō’ḵəlû ḇānîm bəṯwōḵēḵə ûḇānîm yō’ḵəlû ’ăḇwōṯām wə‘āśîṯî ḇāḵə šəfāṭîm wəzērîṯî ’eṯ-kāl-šə’ērîṯēḵə ləḵāl-rûḥa: f

11 lāḵēn ḥay-’ānî nə’um ’ăḏōnāy yəhwih ’im-lō’ ya‘an ’eṯ-miqədāšî ṭimmē’ṯ bəḵāl-šiqqûṣayiḵə ûḇəḵāl-twō‘ăḇōṯāyiḵə wəḡam-’ănî ’eḡəra‘ wəlō’-ṯāḥwōs ‘ênî wəḡam-’ănî lō’ ’eḥəmwōl:

12 šəlišiṯêḵə badeḇer yāmûṯû ûḇārā‘āḇ yiḵəlû ḇəṯwōḵēḵə wəhaššəlišîṯ baḥereḇ yipəlû səḇîḇwōṯāyiḵə wəhaššəlîšîṯ ləḵāl-rûḥa ’ĕzāreh wəḥereḇ ’ārîq ’aḥărêhem:

13 wəḵālâ ’apî wahăniḥwōṯî ḥămāṯî bām wəhinneḥāmətî wəyāḏə‘û kî-’ănî yəhwâ dibarətî bəqinə’āṯî bəḵallwōṯî ḥămāṯî bām:

14 wə’etənēḵə ləḥārəbâ ûləḥerəpâ bagwōyim ’ăšer səḇîḇwōṯāyiḵə lə‘ênê kāl-‘wōḇēr:

15 wəhāyəṯâ ḥerəpâ ûḡəḏûfâ mûsār ûməšammâ lagwōyim ’ăšer səḇîḇwōṯāyiḵə ba‘ăśwōṯî ḇāḵə šəfāṭîm bə’af ûḇəḥēmâ ûḇəṯōḵəḥwōṯ ḥēmâ ’ănî yəhwâ dibarətî:

16 bəšalləḥî ’eṯ-ḥiṣṣê hārā‘āḇ hārā‘îm bâem ’ăšer hāyû ləmašəḥîṯ ’ăšer-’ăšallaḥ ’wōṯām ləšaḥeṯəḵem wərā‘āḇ ’ōsēf ‘ălêḵem wəšāḇarətî lāḵem maṭṭēh-lāḥem:

17 wəšillaḥətî ‘ălêḵem rā‘āḇ wəḥayyâ rā‘â wəšikəluḵə wəḏeḇer wāḏām ya‘ăḇār-bāḵə wəḥereḇ ’āḇî’ ‘ālayiḵə ’ănî yəhwâ dibarətî: f


Next: Ezekiel (Yechezqel) Chapter 6